نقطة بتفرق : بين العرب والغرب نقطة وتقول الشاعرة وئام كمال نقطة (بتفرق).... ولكني أقول نقطة (بتقرف).... قام السفير جان ميشيل دوموند وموظفو بعثة الاتحاد الأوروبي بتنظيم إفطار رمضاني في مقر الاعتصام أمام مقر القيادة العسكرية. ويقول: نريد أن نتواصل مع شعب السودان ، وخاصة الشباب. في سعيهم لتحقيق العدالة والحرية والسلام ونقل السلطة إلى هيئة انتقالية مدنية قادرة على تلبية تطلعات الشعب السوداني الكريم. وقال السفير جان ميشيل دوموند في حفل الإفطار: "لقد تشرفت بمقابلة العديد من الشباب من جميع أنحاء السودان الموجودين هنا بحثًا عن العدالة والحرية والسلام. إنه تذكير كبير بقوة الروح الإنسانية والرغبة في الحرية وحقوق الإنسان والديمقراطية. وسيواصل الاتحاد الأوروبي دعم تلك القيم في السودان ". 📌 من هذا المقام أحب أن (لا) ارسل اي تحية للجامعة العربية وان (لا) ابارك لهم اي مناسبة واقول لهم (لا) كثر الله من امثالكم وأدام الله جامعتكم هذه رمزا للخزي والعار ومنارة للتخاذل والمسكنة والانكسار..... .ه. .ه. 📰 الجريدة: 👈 إجراءات قانونية ضد مدبري انقلاب الإنقاذ المدنيين والعسكريين 📌 اها دا بالذات تصلح فيه مقولة حسين خوجلي (اجراءات ضدهم وضد ميتينهم ذاتهم) . 📰 الجريدة: 👈 مريم المهدي تكذّب استلامها أموال من الإمارات ولقاء دحلان 📌 بي شبابو حلفو ، ولما يحلف صدقو ، أنا عارف (طه) طيب العوازل ضللو... . 📰 الجريدة: 👈 الدعم السريع: البلاد تمرّ بمنعطف خطير وهناك محاولات لـ”شيطنتنا” 📌 دا ما منعطف دا ملف يا فردة وحميدتي الشفت كتل ملف قبل الملف عشان كدا الجماعه محتارين لو كتلوا ملف هو حايكون قدامهم ولو ما كتلوا ملف ممكن الثوار يكتلوا ملف مع حميدتي وهم يطلعوا برا . 📰 الجريدة: 👈 تجمع المهنيين: التطبيق العملي لإعلان قوى الحرية خط أحمر 📌 اوعكم من سياسة الخطوط وخليكم في المربعات . 📰 الجريدة: 👈 الحركة الشعبية: جهود سلفاكير لم توحدنا وعقار وعرمان اجتمعا مع قوش بتشاد 📌 والله بي طريقتكم دي لو دخلناكم في خلاط ما تتوحدوا . 📰 الوطن: 👈 ضبط طائرة بنهر النيل تابعة لشركة أجنبية تهرب الذهب 📌 نعتبر الموضوع دا من نوع العيار اللي ما يصيبش يدوش . 📰 الوطن: 👈 "الحرية و التغيير": مفاوضاتنا المقبلة مع المجلس من أجل تسليم السلطة 📌 كععع... اديلو بالحته الفيها الصامولة . 📰 الوطن: 👈 الدقير يتوعد المجلس العسكري بمصير البشير 📌 نسأل الله السلامة ، مصير البشير بقى عبرة . 📰 الوطن: 👈 أصحاب مصانع: انقطاع الكهرباء يهدد بالتوقف عن العمل. 📌 اول انتو كنت شغالين ؟ . 📰 التيار: 👈 أحداث دامية بين لاجئين من جنوب السودان تخلّف قتلى ومصابين 📌 عشان كدا قولنا اللاجئين ديل يجب أن يكونوا في مناطق محددة . 📰 التيار: 👈 المالية تلغي عطاءً خاصًا باستيراد أسمدة 📌 فتش عن المتعافي . 📰 التيار: 👈 إلغاء تخصيص مساحة “571” فدانًا للهيئة العربية 📌 يا حليل اللواء دبيب هسع كان خصصها ولامن شاف ولا من درى . 📰 أخبار اليوم: 👈 مدير التحرير بـ (أخبار اليوم) يتجه لجرائم المعلوماتية في مواجهة اساءات وتهديدات . 📌 الاساءات ما حبابها لكن كمان الهناية ما حبابها . 📰 أخبار اليوم: 👈 السفراء الاجانب يواصلون زيارة المعتصمين وآخرهم السفير الامريكي . 📌 يعني العاوز يفض الاعتصام عليه أن يتأكد من خلوه من الدبلوماسيين . 📰 السوداني: 👈 والي البحر الأحمر: رصدنا اختراقات لمجالنا الجوي 📌 بالنظر يا مولانا والا اتطورنا ؟ . 📰 السوداني: 👈 الإرصاد: توقعات برياح عنيفة بأجزاء واسعة في البلاد 📌 شوفوا لنا الطقس أمام القيادة . 📰 السوداني: 👈 عمال غاضبون يشلون الحركة داخل الموانئ ببورتسودان 📌 اذا كان العمال غاضبون الموانئ الفاتح نفسها للحركة شنو؟ . 📰 الانتباهة: 👈 انتشار أمني واعتقالات في جوبا تحسبا لاحتجاجات ”16″ مايو 📌 اخوتنا الشعب الجنوبي لو احتجتوا مساعدة كوركوا لينا بي فوق الحيطة طوالي . 📰 الانتباهة: 👈 رئيس الجنوب يجتمع بمجلس الأمن ويتعهد بتسليم سلمي للسلطة 📌 تعهد جد جد والا برهاني ساكت ؟ . 📰 الانتباهة: 👈 مبروك مبارك سليم: التخلص من حكم الأخوان المسلمين جمعنا بالإمارات والسعودية 📌 شفيق يا رااااجل . 📰 الانتباهة: 👈 توقف جلسات غسيل الكلى بسبب انعدام المياه 📌 اللهم لطفك ورحمتك بالمرضى انك انت اللطيف الخبير . 📰 الانتباهة: 👈 مسيحيون سودانيون يطلقون مبادرة”سكر رمضان علينا” 📌 مردوده ليكم في الكريسماس ان شاءالله . 📰 الانتباهة: 👈 توزيع مصل الوقاية من السحائي في ساحة الاعتصام 📌 عليكم الله ما تنسوا المساجين ، في كل كبد رطب . 📰 الانتباهة: 👈 تمويل بـ”110″ ملايين دولار لسودانير 📌 اصبروا شوية ما تجيبوهو لينا قدام الدفار . 📰 الصيحة: 👈 ضبط موظفة استلمت”10″ مليارات جنيه من حساب رئاسة الجمهورية 📌 متزوجة الموظفة دي؟ . 📰 الصيحة: 👈 إعفاء معتز موسى ومطرف وياسر يوسف وكرار التهامي من الخارجية 📌 هههههه يعني ديل لحدي البارح كانوا شغالين؟ اللهم اخرب بيتنا احنا يا شيخ... . 📰 الصيحة: 👈 لجنة لحصر وتسلم ممتلكات وأصول الوطني بالشمالية 📌 فيها منو اللجنة دي ؟ البلد دي ما طلع ميتينها الا اللجان وشغل الدغمسة . 📰 الصيحة: 👈 والي الشمالية يعفي مدير شؤون الخدمة ويعين مديراً تنفيذياً لدنقلا 📌 خطوة للامام . 📰 الصيحة: 👈 حميدتي يوجه بتكملة مشروعات السكة حديد 📌 خلي راجل يقول لا... . 📰 الصيحة: 👈 الرئيس الكيني يأمل في توصل الأطراف السودانية لاتفاق شامل 📌 الحمد لله بدينا خلاص بدليل اتفاق ابو قردة وميادة سوار الذهب .... . 📰 آخر لحظة: 👈 الأصم: العسكري يتلقى الرؤى والأفكار من رموز نظام البشير 📌 ظاهر عليهم من موقعة ذات الكراسي . 📰 آخر لحظة: 👈 السفيرة الهولندية: نشجع المحادثات بين الأطراف السودانية 📌 الدنيا رمضان ياريت التشجيع دا يكون معهو شوية لبن على شوية سمن مع حبة جبنة عشان يكون تشجيع دسم . 📰 آخر لحظة: 👈 سلفاكير:”6″ أشهر غير كافية لتشكيل الحكومة 📌 هو الزول دا هضربته كترت كدا مالو؟ . . 📌ابووضاح 📌
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdulhaleem Osman
فيس بوك
تويتر
انستقرام
يوتيوب
بنتيريست