الطبزها ده واحد بلدياتنا ما جابوه لي مشكله ولا قضية ولا عامرة الا طبزها طبزة خارقة زاتو وخلى الجماعة يتضايرو علما انه هو كبير البيت واكبر اولاد ابوه وياهو راعي البيت الأول. ابوهو سواق لوري وبدخل اللوري جوة الحوش والصباح بطلعو بمش مشوايره ، اها يوم للتعوجة علي البيت والجيران ابوه قام الصباح ما لقى قدامه من اولاده الا الطبزها قام ناداهو قال ليه تعال يا ولد رجعني ورا عشان امرق اللوري ده وقام الطبزها شبكو ليك ارجع ارجع ارجع ورا ورا ورا واللوري راجع ورا بشورة الطبزها وفارق الباب وبقي مقاصد الحيطة عديل والطبزها يكورك ارجع ارجع ولما اللوري ضايق الطبزها علي الجدار زاغ من الجدار وهو يكورك ويأشر أيوا لسة لسة ورا واللوري طقش الحوش رماه وهنا الطبزها كورك بااااس خلاص . مدخل أول : وزيرة الخارجية ( لا علم لي بالمقابلة). مدخل تاني : الناطق الرسمي بأسم الحكومة الانتقالية في تصريح :( لا علم لمجلس الوزراء بالمقابلة وننتظر التفاصيل من رئيس مجلس السيادة ) ومني أنا ده عمر كبير ( والله يا فيصل واسماء أنا زاتو ما كلموني تصدقوا ؟؟ ) النص : والبلد مشغولة بالتفاوض والسلام وأزمة الدقيق والوقود وتعيين الولاة والتشريعي والاتفاق مع حركات الكفاح المسلح وأمننا وسلامنا الداخلي يفاجئنا رئيس مجلس السيادة ال ما انسمع ليه حس في كل الحاصل ده بي أنو يظهر لينا خبرو في وسائل الإعلام الأجنبية كمان ما الداخلية بأنه في عنتي في يوغندا ولاقى كمان نتنياهو وبحث معاه سبل السلام العربي الاسرائيلي والتطبيع والتبادل المشترك شفتو كيف ؟؟ وده كسر حيطة حوش السودان والحكومة والجيران والجار البعيد زاتو وما خلى ليهو حيطة واقفة . يااخي أنت إذا الحركات المسلحة السودانية وسلام السودان ال هو اهم قضايا المرحلة الانتقالية ف ٦ شهورها الأولى ما عملت فيها حاجة لسة تقوم تعمل ما عجز كل خونة الأمة العربية والاسلامية والسودانية من عمله بهذا الشكل المعلن كمان ؟؟ أنت اسى ما فاجأتنا نحن برانا انت فاجات حتى رئيس وزراك ووزيرة خارجيتك ال قالت يطرشها لا سمعت بيه لا جابوه ليها غير اسى دي ومجلس وزراك زااااتو طلع بيان طويل عريض غريب عجيب قال فيه ( لا علم لمجلس الوزراء باللقاء ) ومنتظر توضيح منك او كما قال . انتو الحكومة دي أي زول يقوم بدري بمش يعمل الحاجة البتجيهو في راسو براهو وما بكلم اخوانه ولا بشاورهم ؟؟ ما قاعدين تتلاقو ساي بالصدفة عشان تكلم اخوانك ديل تقول ليهم باكر عندي سفرة صغيرة كده وجائي ما عندكم وصية ولا عاوزين حاجة اجيبها ليكم معاي من برة ؟؟ بعدين نتنياهو حتة واحدة ولقاء مباشر كمان ؟؟ والتطبيع ده حلمت بيه ولا شفتو في رؤية ومن سريرك طوالي على يوغندا عشان ما تفسد قدسية الرؤية ؟؟ تطبيع بتعملو براك كده لا اجتماع سيادة لا اجتماع مجلس وزراء لا استفتاء لا برلمان ؟؟؟ برااااك كده عاوز تجيب لينا اسرائيل واليهود كوولهم الى أرض الميعاد الثانية السودان ؟؟؟ في تقديري ما قمتم به هو خيانة عظمى للقضية الفلسطينية بشقها الانساني بس التى قاتل فيها نفس جيشنا الوطني في اكتوبر وغيرها ضد الاحتلال الصهيوني لارض فلسطين وخيانة وطنية للبلد وتاريخه وخيانة للجيوش العربية من قائد جيش السودان وخيانة لقيم الدين وكل الأخلاق . من اعطاك هذا الحق ؟؟ ومن علاك فوق جراحهم وشهداء فلسطين ونضالاتهم من اطفالها أطفال الحجارة ونسائها وكبارها وصغارها ومحمد الدرة طفل من أطفال الحجارة قاوم وقدم روحه فداء لارضه فمن علاك فوق جراحهم؟؟ من سواااك زعيم لنا وكل تاريخنا لم يجروء احد في كل حكوماتنا علي مجرد الدعوة لتطبيع سوى نميري اخر ايامه في صفقة ترحيل اليهود الفلاشا ورحل بعدهم طوالي و المنبطح غندور في آخر ايامه ورحل برضو ؟ وانت عارف البلد الأنت رئسها الآن دي كان عندها قانون خاص بمقاطعة اسرائيل يعاقب التاجر ناهيك عن رئيس دولة لو استورد بضاعة اسرائيلية؟؟ ما قريتو ولا مر عليك في قعادك في القصر ده ؟؟ وهل تعلم ان في دولة تونس دي تم سحب ثقة الرئيس وتم طرح مقترح سحب ثقة رئيس البرلمان لمجرد زيارتهم لتركيا ولقاء اردوغان دون علم الحكومة وفيهم القال أنها زيارة شخصية خاصة ما رسمية لكن البرلمان المحترم حاسبه لأنه اصبح يمثل تونس ؟؟ أنت يا سعادة البرهان يجب محاسبتك أمام البرلمان وسحب الثقة منك تماما على ما قمت به وبما أنه لم يتشكل برلمان والوثيقة نصت على أن يقوم الأجتماع المشترك مقام البرلمان فعليهم الدعوة لاجتماع عااااجل وطارئ لمحاسبتك في أول اجتماع مشترك وسحب الثقة منك والطلب من المكون العسكري تبديلك فورا لأنك قمت بعمل من وراء ظهر الحكومة وعلمها وليته أي عمل وانما عمل لا يقرر فيه الا برلمان وشعب بغض النظر عن موقفنا من قضية فلسطين اختلفنا او اتفقنا معها . الآن أنت تمثل نفسك فقط ولا تمثل السودان في شئ أنت لا تمثلنا يا سعادة البرهان ولا تمثل إرادة حكومة الثورة فأنظر من تمثل ؟؟ وحني حني علي أنا يا عنتي الحاصل بينا سببو أنت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة