|
Re: بناديها (Re: أبوذر بابكر)
|
بناديها وبعْزِم كُلّ زول يرتاح على ضحكَة عيون فيهَا أنا بحْلم اني في أكوان بتْرحَل من مراسيها عصافير نبّتَت جِنْحات وطارت للغيوم بيهَا مسافرِ من فرح لي شوق ونازِل في حنان ليهاَ أغنّي مع مراكب جات وراها بلاد حتمْشيهَا واحزَن لي سُفُن جايات وما بْتلقَى البِلاقيها ولمّا تغيب عن الميعاد بفتِّش ليهَا في التاريخ واسأل عنَّها الاجداد واسأل عنّها المستقبل اللسّع سنينو بُعاد بفتِّش ليها في اللوحات مَحَل الخاطر الما عاد في شهقَة لون وتكيَة خط وفي أحزان عيون الناس وفي الضُّل الوقَف ما زاد بناديــــــهَـا والاقيـــــهَــا واحِس بالُلقيا زي أحلام حتصْدِق يوم والاقيــــــهَــا واحْلًم في ليالي الصيف بَسَاهر الليل واحجِّيـــهَــا ادوبي ليهَا ماضيهَا واطنْبِر ليها جاييــهَا وارسِّل ليها غنوَة شوق واقيف مرات واْلُوليهَا ونادِيـــــــــهَــا
| |
|
|
|
|
|
|
Re: بناديها (Re: أبوذر بابكر)
|
محمد عثمان وردى
ما عنده أغنية "كعبه" أو ساذجة زى ما قاعد اقول ل الأغانى المجوبكة ساى
يمكن الحنينة السكرة ما بتشبه وردى كتير زى باقى أغنياته
زى أغنية يا سلوى عند ابراهيم عوض مثلا و عقد اللولي عند سيد خليفة
كل اغنية عند وردي من الحب والورود أو يا طير يا طاير زى ما بسموها لغاية آخر أغنية كل أغنية عالم كامل من الإبداع والتجلي في كل شى
لكن
بناديها دى فيها طعم ونكهة خاصة ما عادية
كلما الزول يسمعها يكتشف فيها عوالم جديدة
| |
|
|
|
|
|
|
Re: بناديها (Re: أبوذر بابكر)
|
Quote: الدوش و وردي
حيعملو شنو يعني تفتكر ؟
شي كده فوق المألوف وخلاف المعروف
|
يا سلاااام الاخ ابوذر
ابداع الدوش صاحب الشعر الرمزي وثلاثيته الفخيمة لوردي بناديها , الحزن القديم و الود وردي اسطورة في التلحين و الغناء و الاداء واختيار الكلمات. لاحظ حتى العازفين مبسوطين.
| |
|
|
|
|
|
|
Re: بناديها (Re: Nasser Amin)
|
حبيبنا ابوذر وضيوفه الكرام
سلام يغشاكم ....
بناديها ... وبعزم كل زول يرتاح على ضحكة عيون فيها ... عليك الله يا أبا ذر شوف الكرم المنداح ده حدو وين ...وردي أسطورة الغناء الطروب وبهجة اللحن الشجي ... ياخ والله بصراحه بناديها دي عندها وقع خاص في قلبي ... شكرا أباذر لجلب كل هذا الجمال هنا ....
مع كل الحب الذي تعرف ....
وخالص حبي وتقديري ؛؛؛؛؛
| |
|
|
|
|
|
|
Re: بناديها (Re: إدريس محمد إبراهيم)
|
إدريس يا أعز الناس
كيفك ياخ وكيف اخبارك واحوالك
طولت ما جيت هنا ونورت الفجة بحضورك المبهج
وردي انسان فنان حقيقي ومليان ومستف بالإبداع العالي
بناديها فعلا شي مختلف وليه مذاق خاص جدا في أعمال وردي
حتى وردي نفسه أتذكر سمعته بحكي عن الأغنية بود ومحبة خاصة
الدوش كمان زول ما عادي طبعا وما بشبه غيره
ولما يلتقى كلام الدوش مع موسقة وحضور وأداء وصوت وردي بتتكامل الحكاية وتبقي بناديها
| |
|
|
|
|
|
|
Re: بناديها (Re: Nasser Amin)
|
كيفك يا ناصر الحال والاحوال
تعرف الدوش ده ومعاه برضو هاشم صديق و قاسم أبو زيد والتجاني سعيد وحسن السر ومعاهم كم شاب حاليا
ديل هم الممكن تقول انهم اسياد التفرد فى الشعر الغنائي
الباقين صحيح فيهم مبدعين صادقين وشعراء مجيدين
بس المجموعة ديك شى تانى مختلف تماما
كرومة والكاشف وعثمان حسين و وردى ويجي بعدهم محمد الامين
ديل هم عباقرة التلحين فى غنانا
ولو فكرنا نمسك ونشوف نماذج الإبداع التلحينى بنكون عايزين مجلدات والله للكتابة ودهر كامل للكلام
شكرا يا ناصر للمشاركة السمحة
| |
|
|
|
|
|
|
Re: بناديها (Re: أبوذر بابكر)
|
حبيبنا أبوذر .. وردي بصراحة لن يتكرر .. مولود فنان خلقة ربنا كمان يا أبوذر بالنوبية وردي مبالغة مبالغة لكن المشكلة شايف في تشويه لأغانيه هذه الايام امس في ليلة حزب الامة شاب شوه نشيد ( يا وطني ) حرام والله ما عارف عبدالوهاب وردي صامت مفروض يحافظ على تراث هذا العملاق تحياتي صدقني إنت ذوقك عالي جداً
| |
|
|
|
|
|
|
Re: بناديها (Re: علي عبدالوهاب عثمان)
|
إزيك يا على وكيف الحال
وردى مبدع ولد واتخلق فنان
سمعت وردى كتير بالنوبية
وما ببالغ لو قلت ليك بطرب اكتر مما اسمعه بالعربية مع انى ما بكون فاهم المعاني
بالذات اغنية أسمر اللونا
| |
|
|
|
|
|
|
Re: بناديها (Re: أبوذر بابكر)
|
كن أباذر تحياتي/مودتي
هى, اذن, الصوره الشعريه عند الدوش .. اكثر ما يميزها المباغته
بناديها وبعزم كل زول يرتاح على ضحكة عيون فيها
تأخذك المباغته وتلجمك الدهشة عند مدخل القصيدة .. تحس ان المفردة فىيي طرف لسانك , بيد انها عصيه .. قريبة جدا منك , وحايمه جواك ولكنها بعيده المنال .. وهذا ما اسميه حيوية الصوره الشعرية , فهى تكاد تنبض بالحياة , تلامس الواقع .. لا بفوقيه واستعلاء ولكن بعفويه مصدرها الواقع نفسه فهى منه واليه تنتمى
وأحْلم اني في أكوان بتْرحَل من مراسيها عصافير نبّتَت جِنْحات وطارت للغيوم بيهَا مسافرِ من فرح لى شوق ونازِل في حنان ليهاَ أغنّي مع مراكب جات وراها بلاد حتمْشيهَا واحزَن لي سُفُن جايات وما بْتلقَى البِلاقيها
وهنا وبعد مباغتة المدخل يدخلك الدوش فى زقاقات اليفه وشديدة الشجن , يدور بك بمفردات بسيطه بين مدارات بلاغيه لاحولااااا .. يسري فيك حزن يلازم وجدانك ولن تستطيع معه صبرا .. حالة الترحال او السفر بين محطات العشق , الفرح والشوق والحنان الفيها ثم انتظار ما قد لا يجى
ولمّا تغيب عن الميعاد بفتِّش ليهَا في التاريخ واسأل عنَّها الاجداد واسأل عنّها المستقبل اللسّع سنينو بُعاد بفتِّش ليها في اللوحات مَحَل الخاطر الما عاد في شهقَة لون وتكيَة خط وفي أحزان عيون الناس وفي الضُّل الوقَف ما زاد
هنا تشهق الالوان وتتكئ الخطوط ويسافر خاطر لن يعود فى فنتازيا الحضور الكثيف رغما عن انف الغياب .. الترجل على صهوات الزمن ماضيه ومستقبله , والسؤال هنا وهناك , فهى تمتد تاريخا يطول وكأن العشق ازلى الوجود وموجودا كمعنى راسخ فى القدم , ويتداعى فى مستقبل آت .. ولكن الدوش لا يجنح هنا للهروب من الحاضر فيعود سريعا لاحزان عيون الناس والحال الواقف والضل الوقف ما زاد
بناديــــــهَـا والاقيـــــهَــا واحِس بالُلقيا زي أحلام حتصْدِق يوم والاقيــــــهَــا واحْلًم في ليالي الصيف بَسَاهر الليل واحجِّيـــهَــا ادوبي ليهَا ماضيهَا واطنْبِر ليها جاييــهَا وارسِّل ليها غنوَة شوق واقيف مرات واْلُوليهَا بنادِيـــــــــهَــا وبناديــــــــهــا وبناديـــــهــا
تري كيف يكون الحرف اليفا لهذا الحد .. كيف العشق وكيف الحنين وكيف الحنان ان لم يترقرق منسابا متدفقا عطوفا ورقيقا كهمسات خاشعة فى حضرة الحبيب المافى ..
عفوا سأرسل لها الان غنوة شوق الآن ؟!
تحياتى
*كتابة قديمة في المنبر
| |
|
|
|
|
|
|
Re: بناديها (Re: محمد حيدر المشرف)
|
شرفنا وشرف النداء اخضر صوت الدوش بالمناداة السماوية البتطرب مسامع الواطا
وسعدنا بتشريفنا ب المشرف
ازيك ياخ وكيفنك
كتابة تريانه ونديانه وبطرانه
الدوش كائن ما عادي بكل المقاييس
وزى ما انت قلت يا محمد
النضمي البسيط والساهل بطلع منه زيفتح قدامك عوالم مهولة من المعاني
تحس إنه أي زول ممكن يقوله
لكن ما بتقدر
القصيدة دي سكنت وردي واحتلت كل مواطن الإبداع العنده
دمج تذوقه للمعاني مع إحساسه ومحبته للدوش و كلام الدموش
وطلع لينا البنادوها
ونحن برضو ننادي
شكرا يامشرف علي تجميلنا بيك
| |
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
|
|