أمنتك عواطفي و خنت الأمانة حطمت في دقيقة أحلامنا و منانا يا ناسي المحنة يا ناكر هوانا رجع لي أمانتي و شوف لو تلقا تاني عواطف أو محنة زي عطفي و حناني ،،،،، لو تعرف يا أسمر معنى الشوق و نارو كنت تنوح و تسهر أسير ألمو و حسارو تضوق ظلم الليالي و تقول الحب جناية دي دنياك تبقى حسرة و عزاب من غير نهاية ،،،،، تعال كلمني مرة و إنت علل معنى بعدك أنا راجيك لعلك و إنت ترحم و تطرا وعدك تنسيني المظالم و قلبي تزيل شجونو و أقول للناس حبيبي غرامي حلف يصونو ،،،،، أمنتك عواطفي و خنت الأمانة حطمت في دقيقة أحلامنا و منانا يا ناسي المحنة يا ناكر هوانا رجع لي أمانتي و شوف لو تلقا تاني عواطف أو محنة زي عطفي و حناني
09-27-2019, 08:26 PM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 10930
خضر مساء الخير فعلا الأغنية دي جميلة و كلها شجن...
المرحوم صلاح أداها بنفساحاسيس الشاعر محجوب سراج الذي سمعت انه ما كتبه من اشعار كله كانت تجارب عاطفية حقيقية.. رحم الله ابن البادية و السني الضوي و نسأل الله أن يمتع الشاعر محجوب سراج بالصحة و العافية و تمسى انت و متابعينك بالخير و العافية
09-28-2019, 01:10 AM
ترهاقا ترهاقا
تاريخ التسجيل: 07-04-2003
مجموع المشاركات: 8424
زمان كان في تعاون جميل بين الفنانين ، يعني الفنان الراحل السني الضوي شعر بإنو اللحن مناسب لابن البادية أغنية مرسال الشوق للأخ عركي من ألحان الفنان عبد الكريم الكابلي أغنية أيامك للمرحوم ابن البادية من ألحان المرحوم وردي اغنية يا زاهية للمرحوم ابو داود من ألحان عبد الكريم الكابلي أغنية ,والله مشتاقين للاستاذ عثمان مصطفي من الحان الراحل وردي ، والقائمة تطول بس الذاكرة خربت
09-28-2019, 03:21 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
مرحب بيك استاذ محمد عبد الله الحسين و بالمناسبة اسم الحسين دا اسم جدي يسعد صباحك يا حبيب دي من اجمل ما غنى الراحل صلاح ابن البادية و من اجمل اشعار المسرحي محجوب سراج
Quote: خضر مساء الخير فعلا الأغنية دي جميلة و كلها شجن...
المرحوم صلاح أداها بنفساحاسيس الشاعر محجوب سراج الذي سمعت انه ما كتبه من اشعار كله كانت تجارب عاطفية حقيقية.. رحم الله ابن البادية و السني الضوي و نسأل الله أن يمتع الشاعر محجوب سراج بالصحة و العافية و تمسى انت و متابعينك بالخير و العافية
09-28-2019, 04:51 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
سعيد بمرورك موسيقارنا الجميل احمد ساطور و بالمناسبة انا وانت اتقابلنا مع العميري و تكاضر شيخ الدين و خطاب في مطعم عمنا خالد في المسرح ايام الدنيا كانت بخير وفتة السمك و الكوارع يا ريت تحلل لينا الاغنية دي انا عارف اخدتك دنيا السياسة و المعارضة للنظام البائد لكن انت انت فنان و موسيقي فياريت تفيدنا في مجال تخصصك و التحليل الموسيقي ولو لميتني في عبد الحفيظ عبد القادر كرار ح اطلب من بكري يديهو عضوية في المنبر انت و هو اضافة نوعية للمنبر محبتي
09-29-2019, 03:06 PM
walid taha walid taha
تاريخ التسجيل: 01-28-2004
مجموع المشاركات: 4208
جميل مرورك يا وليد و ليك مده ما بنتا دخولك المنبر بقى نادر اتمناك و الاسرة بألف خير و الرحمة و المغفرة للفنان الراحل صلاح ابن البادية صلاح ما كان صديق لكن بحكم عملي في التلفزيون كنت قريب منو صلاح لما جاء الرياض قابلتو في بيت بنتو و معاهو احفادو كان مفروض اسجل ليهو سهرة جماهيرية ذي ما سجلتا لعثمان حسين و عبد الرحمن عبد الله لكن وكتها كانت التفجيرات بتاعة مجمع المحيا و وزارة الداخلية و كنت مشغول شديد في قناة MBC صلاح ابن البادية من اجمل الناس الممكن تقابلم و حكاي و ودود صلاح من جيل ابوي لكن بتحس كانو من جيلك مبتسم طول الوقت الله يرحمو الاغنية دي فيها شغل موسيقى عجيب و فيها دخلات بفهموها ناس الموسيقى رغم اني بنقرش على الاكورديون و الاورغن لكن ما بقدر احلل الموسيقى و قبل فترة اهداني دكتورنا الجميل الجمهوري حيدر صادق عود سنين لفترة محدودة لكن ما وصلتا لمرحلة التخصص اتمنى اني اصل ليها و اتحفكم بشغل جميل محبتي يا وليد طه
09-30-2019, 09:29 AM
walid taha walid taha
تاريخ التسجيل: 01-28-2004
مجموع المشاركات: 4208
( دنياك تبقى حسرة وعذاب من غير نهاية ) هنا: وكأن محجوب سراج يرثي نفسه الاغنية اداءها صعب جدا ومستحيل واحد يقدر يتفوق على صوت التينور صلاح بن البادية... عواطف. هي اسم الاغنية اتخيل نفسك لن الزمن رجع بيك لى وراء وانت في مقتبل العمر واكيد الزمن داك من اجمل الازمان ..حتى في الاماكن والجيران والحبان..والاصحاب والانداد والخلان وفجأة جابوا الاغنية دي في الراديو..ً.. اتخيل نفسك بتسمعا من خلال الراديو وفي الزمن داكا صراحة يا (خدر) ماعارف اقول ليك شنو... لكن اشجيتنا ومتعتنا الله يمتعك
09-30-2019, 02:51 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
Quote: كما توفى الى رحمة مولاه الخال محمد أحمد القديم لو سمعت اللهم أرحمهم جميعا .
تحياتي
لا حول و لا قوة الا بالله أسأل الله له الرحمة و المغفرة و لأسرته خالص العزاء هذا الانسان الجميل استضافني في بيتو من سنين طويلة هو من اجمل الناس القابلتهم في السعودية انا ببكي من امس لما شفتا مداخلتك دي يا وليد غلبني ارد عليها , اهو الناس الجميليين بتسربو من بينا عزاؤنا الوحيد انهم بين ايادي رباً رحيم كلنا لها يا عزيزي هي مسألة وقت فقط ربنا يحسن اعمالنا
09-30-2019, 03:01 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
Quote: برضه الشاعر محجوب سراج المبع الحزين و المنسي يحتاج لإضاءة أو بوست..
أعتقد ذلك يا حبيب
كنت بقابل الشاعر و المسرحي محجوب سراج في مطعم عمنا خالد في المسرح و المطعم دا كان بجمع كل الفنانيين و المسرحيين و الشعراء فيما كان يسمى بالحيشان التلاتة و هي المسرح و الاذاعة و التلفزيون لما جونا الكيزان السجم قفلو الابواب الكانت فاتحة على بعض عانينا كتير من الحاجة دي و اصبح التواصل صعب مع الناس الجميلين ديل ان شاء الله افتح بوست عن الشاعر و المسرحي محجوب سراج
09-30-2019, 03:25 PM
walid taha walid taha
تاريخ التسجيل: 01-28-2004
مجموع المشاركات: 4208
الأخ خضر الطيب وضيوفه الكرام لكم الود والتحايا الطيبات ورحم الله الأخوان صلاح بن البادية والسني الضوي وأمد الله أيام الشاعر محجوب سراج ومتعه بتمام الصحة والعافية ولك جزيل الشكر على فتح هذا البوست الذي ينم عن ذوق رفيع واختيار مناسب جداً فتح لنا هذه النافذة لنتأمل كلمات أخونا الأستاذ محجوب سراج الذي اختار لها دون تخطيط حروفاً صعبة تستعصي على التلحين والغناء ولكن طوعتها ملكة السني الضوي المتمرسة في اللحن وأضفى عليها صوت صلاح بن البادية رقة وتطريباً بلغ بها حد الشجن وهذا ماعبر عنه باقتضاب أخيي وصديقي الفنان أحمد يس مما يدفعني للقول بأن اللحن والموسيقى والصوت كلها مجتمعة قد أضفت بعداً جديداً وعميقاً علق بهذه الكلمات .. أرجو أن تعيد سماع الشريط وتركز في الكوبليه الثاني من الكلمات على كلمتي .... أسمر .... وتسهر .... إنها من الكلمات الجافة في اللحن لخلوها من حرف المد الذي يمكن الصوت من إستعراض جماليات طبقاته.. ولانتهائها بحرف الراء الجاف والذي يحمل فوق ذلك علامة السكون التي تصلح للوقف فقط .... ولكن استمع لصوت صلاح والكم الهائل من التطريب الذي سكبه على هاتين الكلمتين معتمداً فقط على حركة الفتح في الحرف السابق للراء الساكنة .... والحديث حول صوت بن البادية والكلمات واللحن يطول .... لك تحياتي وشكري الجزل مرة أخرى أخي خضر ....
09-30-2019, 08:39 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
الحبيب احمد ياسين ما حصل شفتا ليك بوست لكن مداخلتك الواحدة بتساوي بوست كامل و لو تعرف يا اسمر معنى الشوق و نارو كنت تنوح و تسهر شوف الانتقالات دي و زخم الموسيقى و وقفت الموسيقى في تضوق ظلم اليالي و تقول الحب جناية ... و دنياك تبقى حسرة و عذاب من غير نهاية ياخ دي موبالغة انا كنت اتمنى اني اقدر احلل الشغل دا لكن للأسف ما عندي امكانية دا شغل كبير , موسيقياً ممكن يحللو استاذنا احمد ساطور او حبيبنا الموسيقار يوسف الموصلي و كلهم نوبيين انت تعال كلمني مرة وانت علل معنى بعدك و انا راجيك لعلك و انت ترحم و تطرى وعدك تنسيني المظالم و قلبي تزيل شجونو و اقول للناس حبيبي غرامي حلف يصونو يا سلااام هو فعلاً يرثى حاله و حال الكثيرين
09-30-2019, 09:07 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
مرحب بيك استاذ بابكر قدور انت و الاستاذ احمد ياسين انا ما بقدر اجاريكم نعم بعزف على عدد من الآلات اورغن عود اكورديون لكن مافي مستوى التخصص ممكن حدي اكون مستمع جيد لكن مستحيل اكون متخصص شوف الدخلة في امنتك عواطفي و خنتا الأمانة تم ترم تا تررا رم و سكتة الموسيقى في استحياء في تضوق ظلم الليالي و تقول الحب جناية و دنياك تبقى حسرة و عذاب من غير نهاية دا شغل انا ما بفهمو لكن مستمتع بيهو و يرجع تاني لي امنتك عواطفي هي اللزمة الاولى تحياتي يا قدور
10-01-2019, 09:21 AM
محمد مجيدو محمد مجيدو
تاريخ التسجيل: 07-06-2013
مجموع المشاركات: 2392
من اجمل اغاني الفنان الراحل صلاح ابن البادية .. نسال الله له الرحمة والمغفرة ..
الفنان عصام محمد نور ادى هذه الاغنية باحساس مرهف ..
يا سلام عليك يا مجيدو وعلى الفنان عصام عصام من جيل فنانيين دخلو التلفزيون بواسطة فنهم و بواسطة الزميل المخرج شكر الله خلف الله جميل الآداء محبتي يا مجيدو
10-02-2019, 05:07 AM
Kabar Kabar
تاريخ التسجيل: 11-26-2002
مجموع المشاركات: 18537
شكرا يا قريبي..! ده مقام كبير عليك يا صديقي ، وبطل شعبطة يا خدر الطيب..! من محل قاعد ( أينما كان، وكيفما كان) ، يا خدر ،..ارجع للطين وألأرض والناس الطيبة يا قريبي..من الضفة الغربية..مرسى البنطون في مدينة الدويم (الدويم شات والركوب عجلات على قول صديقنا الناضر هشام هباني..واصدقاء الجمال القاسم اسماعيل ادم،عمار ياسين ، سماعين وراق ، ابو القاسم اسماعيل المتعافي ، ابوذر بشير الغفاري المتعافي ، الكمندان فيصل دراج ، امل يوسف هباني ، لبني موسى ، ايثار ابو طه ، اميمة الدومة ، فوزية عثمان ..عبد الله كرشينقا ، ابكر باتا ، عوض رجب ، جعفر نحلة..عثمان ريحان..نديم ومصانع نديم ، خليل عثمان ومدارس خليل..النيل النيل ابونا خليل..وبسمة محمد ابراهيم نقد لمن اختفى في مدرسة خليل الثانوية العامة بنات..فريق الوطن ، وانا وطنابي يا خدر..وطن عيال الريس..امين ، عبد العظيم..وما بينهما..!!).. هذا مقام اكبر منك يا صديقي..!! قلت لي عادل امين دفعتك؟ بكرة ح نقول للشباب..هؤلاء هم عواجيز امسودان الذين حاولوا يمرقوا من الصندوق..ولكنهم وقعوا..! طبعا ، اخي الأصغر علم الهدي ادريس..محتار في شرح المدينة ، دويم شات..دويم سمية الجوخ..دويم الفكرة..الأنيقة..ممكن تقدر تجيب متين صلاح بن البادية عدى بيها؟.. اركب البنطون يا خدر من المرسى المقابل حي التخديرة..اقطع شرق..امشي شمال شوية من ابوحبيرة..وشوف صلاح بن البادية يعني شنو؟..صلاح زول البادية والريف..قبال رومانسية محمد موسى* المافاتت حي البوستة امدرمان..!! كلام كبير يا صديقي..فقط افهم انو امسودان ليست حركا على ناس البندر وبس..!!
تحياتي كبر ــــــــــــــــــــــ * المقصود الشاعر محمد موسى..وكتبت اغنيات كثيرة..
10-02-2019, 09:31 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
سلام يا كبر مالك نسيت الراحل اسامة الجوخ من اولاد الدويم و كان زميل قبلنا في التلفزيون اتوفى في حادث طائرة كان مفروض يكون فيها الزبير محمد صالح في مطار الخرطوم و بعدها الزبير فطس في طائرة في الجنوب انت بتعرف ناس الدويم لكن الدويم انت جيتا نازح واضح انك جيت في نهاية السبعينات انت و عبد الكريم كيكي انا اهلي الجعافرة اسسو الدويم و ابوي الله يرحمو من مواليد الدويم الدويم دي غير شهرتا ببخت الرضاء كان فيها مؤسسة النيل الابيض الزراعية و دي كانت مسئولة من مشاريع النيل الابيض دمرا النميري في آخر ايامو لما دخلو معاهو الكيزان في مدينة الدويم كان الحي الاول و التاني و لحدي بير ام صبا ديل كلهم اهلي و بعدها جوها الهبانية و الحسانية بالنسبة لصلاح ابن البادية بعرفو من 35 سنة لما كان بتردد علينا في التلفزيون الغريب شنو اني اترحم عليهو و اجيب سيرتو؟ انت محتاج تاخد الدواء ما تهمل الدواء يا كبر بتتعوق ..
10-02-2019, 10:15 AM
Kabar Kabar
تاريخ التسجيل: 11-26-2002
مجموع المشاركات: 18537
Quote: انا اهلي الجعافرة اسسو الدويم و ابوي الله يرحمو من مواليد الدويم
هههههه.. كضاب يا خدر..! الجعافرة بتاعين مين يا خدر..؟؟..يا اخوي انتا داير تطمن روحك غصبا عن التاريخ؟ وليه ما يكونوا الجعافرة نازحين زي كبر؟
البلد ما حقتك يا خدر ولا هي حقت جعافرة..كلكم نازحين زي كبر..فشنو..امشي الضل يا قريبي..! الجعافرة ما عندهم بلد ، في امسودان يا خضر الطيب..والله صحي..!! السلبطة لزومها شنو يا عمك..؟؟ الدويم بلد البجا ناس محمد عثمان ابوريش..!! وقاموا ادوها لنسابتهم الحسانية ، وفي الأصل دغيم..الجعافرة ديل ناس منو يا قريبي؟.. الدويم بلد بجا وحسانية ودغيم..الجعافرة ديل ناس منو يا خدر؟..يعني شوية حدادين استقروا في البقعة..خلاص تبقى حقتهم؟..وين يا قريبي..!!..بكرة ممكن تتشاتوا زي الترتيب..!! قال جعافرة قال.!!..طيب ما تقعوا بغداد بلد الرشيد يا خدر..ولا عمانين من بغداد..!! امرق من الدويم كليو ميتر واحد يا خدر..في أي اتجاه كان ، وتعال حدثني عن جعافرة..!!
كبر
10-02-2019, 11:07 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
ما كضبتا عليك يا كبر بقول ليك الحقيقة الانتا ما عارفا دي بلد ابوي و اجدادي يا كبر لو عندك معلومات اكتر مني افتح بوست عن الدويم الجيتوها انتو نازحين ياخ معهد بخت الرضاء بس من 1938 و قبلها كانت الدويم مدينة عامرة بأهلنا انت وقتها كنت وين ؟
10-02-2019, 11:37 AM
دفع الله ود الأصيل دفع الله ود الأصيل
تاريخ التسجيل: 08-15-2017
مجموع المشاركات: 13747
# ما تنسى يا كبر كان " طير الرهو" ملحنا ابن البادية لحم د الريح. # وأما "حسنك أمر" و "القمر بوبا عليك تقيل" ديل بقىمن الأغناني الخالة الكُنَّا لامن شَفَّع و نسمعا في الرادي الخشبي تحت ضُل العصير كدا و لا جنب حبوبة تكون موقدة المنقد و تهب في نارشاي المغيرب يلا علي غبانا نقفل ليك الرادي ونقوم جاريين ننادى باقينا من لعبة شليل كما تتداعى الأكلة إلى قصعتها عشانيجو نتلما نسمعا سوا. لكن للأسف نلقاها فاتت و جا عمر الجزلي يذبع على مسامعنا نشرة وفيات الساعة الثامنة مساءاً.
# يا خِدِر مالك علينا مقلب علينا المواجع؟!!
10-02-2019, 11:54 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
مرحب بيك ود الحيشان التلاتة انت نزلتا الاغنية Mono هاك ليها Stereo و تابع مع كبر دا لاني م فاضي ليهو تابعو و عاوزك تفهمو فهم عالي و انت قدرها محبتي الانتا عارفا
10-02-2019, 12:00 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: ما كضبتا عليك يا كبر بقول ليك الحقيقة الانتا ما عارفا دي بلد ابوي و اجدادي يا كبر لو عندك معلومات اكتر مني افتح بوست عن الدويم الجيتوها انتو نازحين ياخ معهد بخت الرضاء بس من 1938 و قبلها كانت الدويم مدينة عامرة بأهلنا انت وقتها كنت وين ؟
هههههههه..!! ده شنو ياسعادة الإعلامي الكبير خدر الطيب؟ عشان كده في اول سطر في التداخل معاك هنا..انا قلت ليك ده مقام كبير واكبر منك يا خضر الطيب..! يعني حكاية تجيب صلاح ابن البادية وتقعد تتشوبر..فالحاجات دي اكبر منك يا خدر..وقلت ليك اركب البنطون من الدويم واتدلى قصاد ابو حبيرة..وامشي شمال شوية عشان تفهم صلاح ابن البادية شوية..وزغت وعملت لينا بلد ابوي وجدي..! بخت الرضا شنو يا خدر..وانت اخترت سنة 1938؟ اها سنة 1738 يعني مافي كان بقعة اسمها الدويم ولا الرأي شنو يا قريبي؟ سألتك قبل كده يا خدر ، وانا الذي تعتبرني نازح للدويم ، جيب اسم الحي العشت فيهو في الدويم..وهسع دي قدام الخلق دي كلها يا خدر جيب اسم جدك الخامس..عشان نوريك انت شنو..!! تاني اوعك تتشعبط في صلاح ابن البادية والقامات الفنية..!! ولو عندك طايوق يا خدر يا معقد اثنيا واخلاقيا وجماليا..كان تقيف خمسمية مرة قدام مداخلة احمد ياسين وبابكر قدور..ناهيك عن كلام احمد ساطور..!! لكن حاجات زي دي انت ما عندك طايوق يفهمها..اهو شغال كرتلة شخطك بختك..تصدف معاك تجيب غنية سمحة..وبعد شوية تلف صينية عشان تحكي عن اهلك الجعافرة..والسؤال قائم يا خدر: الجعافرة ديل منو بالضبط؟..غايتو عندنا ، ديل شوية حدادين زي الحلب الجايين من الشام..وفجاة لقوا ليهم كم حي في الدويم بتاعة البجا/دغيم/الحسانية..وطوالي ركبوا لينا وش بانهم اهل الدار..!! ويظل المقام اكبر منك يا خدر الطيب..اخير تعال اتكلم عن صلاح ابن البادية..الغنا..الذوق..المزيكا..الأداء ..الإنسانية..اما جدك وابوك مع احترامي ليهم فهم نكرات ساكت يا عمك..ناهيك عن الجعافرة بي صمة خشمهم..فشنو اخير تبعد الجعافرة..! كبر
10-02-2019, 03:05 PM
دفع الله ود الأصيل دفع الله ود الأصيل
تاريخ التسجيل: 08-15-2017
مجموع المشاركات: 13747
▪ أمانة عاد ما اتلومتو تب الاتنين يا خدر و كبر؛ ختيتوه قرض ، و في حاجة ما تسوى ، و قلبتو رطوبة الجو و المغني الراقي الطروب لي كتمة و صرة وش. ليه كدا ياخ ؛ و يشهد الله أنكما معا من أعز و أقرب الأحبة إلى القلب . بعدين تعالو هنا ، الدويم حتة من وطنا البي اسمو غنينا و رطنا و أكيد إنها بتسع الجميع. ▪ سمح أقول ليكم حاجة، ح أحكي ليكم نكتة مسموعة و سمجة و بايخة بوخ لُقمة، بس لازم تجاملونا و لو بي كشمة بس بطرف شلاليفكم تورونا بياض ثلج سنونكم: ▪ يلا: كدي تعالو نضحكك شوية بشيء من حاجاتنا القاعدين ننفس بيها و عثاء السفر و ويلات طول البعاد: 😝 قوم لف!! 😝 ▪دي واحدة عاملة فوقا البت ثورية للنخاع خسوسن ، شايفة عمك الفرعون / وردي في لقاء جماهيري يعرق و يجف و شغال " و يا شعبن لهبت ثوريتك"قامت فعلن ثوريتا ولعت لمبة حمرااااء؛ و طوااالي كتبت في أقرب قروب علي الفيس: "أنا واهبة نفسي للقضية و زوجي هو الوطن المترامي الأطراف من نيمولي إلى حلفا".
▪ أتاريها واحدة بايريكس بت لزينة و(شلابة) لابدة ليها بالمرصاد 😎 ردت ليها داك الحزة : "يا سلام طبعن، أكيد و وطنك دا بيسعنا كولنا" ▪ يا زول من حيسو داك اتلحس المنشور و ذهب مع الريح إلى أقرب خور . برضو تجي تقولي شنو و تقولي منو: بالله قوم لف برا (وطنَّا البي اسمك غنينا و رطنَّا)😄
10-02-2019, 04:45 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
Quote: ▪ أمانة عاد ما اتلومتو تب الاتنين يا خدر و كبر؛ ختيتوه قرض ، و في حاجة ما تسوى ، و قلبتو رطوبة الجو و المغني الراقي الطروب لي كتمة و صرة وش. ليه كدا ياخ ؛ و يشهد الله أنكما معا من أعز و أقرب الأحبة إلى القلب . بعدين تعالو هنا ، الدويم حتة من وطنا البي اسمو غنينا و رطنا و أكيد إنها بتسع الجميع. ▪ سمح أقول ليكم حاجة، ح أحكي ليكم نكتة مسموعة و سمجة و بايخة بوخ لُقمة، بس لازم تجاملونا و لو بي كشمة بس بطرف شلاليفكم تورونا بياض ثلج سنونكم: ▪ يلا: كدي تعالو نضحكك شوية بشيء من حاجاتنا القاعدين ننفس بيها و عثاء السفر و ويلات طول البعاد: 😝 قوم لف!! 😝 ▪دي واحدة عاملة فوقا البت ثورية للنخاع خسوسن ، شايفة عمك الفرعون / وردي في لقاء جماهيري يعرق و يجف و شغال " و يا شعبن لهبت ثوريتك"قامت فعلن ثوريتا ولعت لمبة حمرااااء؛ و طوااالي كتبت في أقرب قروب علي الفيس: "أنا واهبة نفسي للقضية و زوجي هو الوطن المترامي الأطراف من نيمولي إلى حلفا".
▪ أتاريها واحدة بايريكس بت لزينة و(شلابة) لابدة ليها بالمرصاد 😎 ردت ليها داك الحزة : "يا سلام طبعن، أكيد و وطنك دا بيسعنا كولنا" ▪ يا زول من حيسو داك اتلحس المنشور و ذهب مع الريح إلى أقرب خور . برضو تجي تقولي شنو و تقولي منو: بالله قوم لف برا (وطنَّا البي اسمك غنينا و رطنَّا)😄
ههههههه جميل يا ود الحيشان التلاتة ياخ كبر دا رايح ليهو الدرب و البوست بوست استماع ما بوست نقاش عن الدويم و ضواحيها كبر عارف انو جاء الدويم نازح و الحاجة دي لما قلتها ليهو اتضايق انا بعرف كيف اتعامل مع النوعية دي , هسي ناس البيت بشيلو من اللابتوب و بنوم بقوم الصباح ناسي الحصل .. ارخيهو خليهو يستريح الدويم دي في بخت الرضاء اتخرج منها الراحلين البروفيسور عبد الله الطيب و الشعراء أحمد محمد صالح ومبارك المغربي والسر دوليب, و انا و معتز القريش و عادل امين المعاط دا :) كبر دا كدندارة ساي .. و الله صحي هسي هو لا بقى مع وفد ستو تراجي ولا مع قحت زول قاعد امفكو
10-02-2019, 05:10 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10435
يا كبر مداخلتك طويلة و انا ما عندي طولة بال و لا وكت عشان ارد عليها كلها لكن بقول ليك انك جيت نازح للدويم و كويس انك اتعلمتا من اهلي ناس الدويم الجعافرة اهل ابوي من ناحية والدتو لكن من ناحية جدي جعليين شفتا الشغل دا عامل كيف و مكونات الدويم الاثنية معروفة لكل الناس لانها حوت و جمعت فاوعت, انت زول نازح ساي مع احترامي للنازحين المحترمين لكن انت زول موهوم يا حبيب .. برضو كنا بنرحب بنوعك دا و بنسكنم في بيوتنا القديمة و بعدها نوعك دا بجي بتعالى علينا .. ياخ ما عاوز اقول اكتر من كده لو عندك موضوع عن الدويم افتح بيهو بوست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خضر الطيب
محمد عبد الله الحسين
ترهاقا
walid taha
Ahmed Yassin
بابكر قدور
محمد مجيدو
Kabar
دفع الله ود الأصيل
فيس بوك
تويتر
انستقرام
يوتيوب
بنتيريست