من لحظة سقوط البشير واعلان حميدتي الانحياز الي الثورة السودانية ... وهو يخطو كل يوم بعيدا عن الثورة وبعيدا عن الانحياز المزعوم .. ويتقرب اكثر الي اعداء الثورة حتي اصبح جزءا لا يتجزأ منهم كواجهة للنظام السابق كما كان قبلاً ... مع ان لحظة سقوط البشير كانت فرصة تاريخية له ....
خطواته كانت كالتالي: الاستفزاز والتهديد المستمر للشعب السوداني والثوار رغم ان التهديد كما يقول (بالقانون) لكن قواته تحمل السلاح وهي جاهزة لمصادرة الارواح في كل لحظة وثانية .. ارتباطه الوثيق والمعلن بالمحور العربي (السعودية - مصر - الامارات) وزيارات متكررة ... واوهام احلال قواته محل الشرطة والجيش مما يجعل منه قنبلة موقتة لتمزيق السودان فداء لقوي خارجية كما يحدث في سوريا واليمن برغم انه لا يملك اية شرعية او تفويض لتمثيل السودان خارجياً .. ولكنه يمثل السودان كما يعتقد وكما يصور له مستشاريه ب (وضع اليد) اطلاق النار المتكرر وقتل شهداء الثورة العزل .. وعدم تقديم جناة حقيقين عن طريق تحقيقات شفافة ممارسة الاستغفال والاستحمار للشعب بالباس تهم القتل لاشخاص لا علاقة لهم كحماية وغطاء للقتلة الحقيقيين مخاطبة الجماهير داخل وخارج المؤسسات كرعايا تابعين لدولة يملكها ... متوهما بانه يملك قاعدة شعبية اكثر من اي قوي اخري متضمنا الحرية والتغيير ... وملايين الثوار والمعتصمين امام القيادة ... يعتقد جازما انه يستطيع هزيمة الثوار سلميا او عسكريا .... يحارب جنوده في اليمن ... بينما حلايب محتلة الفساد المالي بلا رقيب ولا حسيب ومحاولات الرشوة المستمرة لقطاعات الشعب السوداني من خلال مرتبات او غيره في المجمل وضع نفسه كعدو الثورة الاول نتساءل من الذي يزين له كل ذلك من الذي ادخل في عقله ان العداء مع الثوار وحماية رموز النظام السابق هو الطريق القويم من الذي يوهمه بانه له جماهير وقواعد (جنجويد واحزاب فكة) اكبر من جماهير الشعب المعتصمة من الذي او همه بانه يملك هذي البلاد بوضع اليد وان كل من فيها ليسوا سوي تابعين ... ويمكنه الغاء الجنسية واستبدالها بتابعية
من اوهمه بانه يستطيع احلال قوات الجنجويد والمرتزقة بدلا عن الجيش والشرطة ... من الذي اوهمه بانه يستطيع هزيمة الثورة وانشاء دولة عسكرية ... ضد رغبة الداخل والخارج المتضمن الاتحاد الافريقي والاوربي وامريكا
ماذا عمن يدير الامور من خلفه (مستشاريه واعوانه) ويدفع به للمواجهة .... مواجهة الثوار وخلق هذا الوضع القبيح وهو وضع خاسر طال الزمن او قصر
الم يفكر لحظة بانه يتصدر شيل وش القباحة عن كل المجلس (الكيزاني) وتثيل الدولة العميقة التي يقف الملايين امام بابه لاسقاطها ... ام انه يريد ذلك ويريد ان يرث تركة النظام القديم ... ومن اوهمه بانه يستطيع ... كانما ليس هنالك ملايين في الشارع اسقطت راس النظام القديم وجاهزة لاسقاط كل من يمثل النظام القديم من الذي اوهمه بان النظام القديم اسقطه حميدتي ولم تسقطه الثورة من زين له انه اقوي من البشير لحظة سقوطه الذي كان يملك فعليا كل الاجهزة القمعية ويملك حزبا اسلاميا وجماهير
هل كان لهذا الامر ان يسير في اتجاه مختلف؟ هل يستخدم حميدتي من قبل الدولة العميقة عبر مستشارينها كما كان يستخدم سابقا من النظام في حروب الابادة ام انه اسوا كثيرا من البشير والترابي وهو الذي يقود بقية الكيزان كوريث شرعي
(عدل بواسطة Gafar Bashir on 05-30-2019, 10:27 PM) (عدل بواسطة Gafar Bashir on 05-30-2019, 11:20 PM)
حبيبنا جعفر بشير كل سنة وانت يخيير لدي راي مغاير اري ان قوة التغير لم تحسن التعامل مع حميدتي نعم الرجل تاريخه اسود نعم ماضي الرجل يدعو للخوف نعم قواته مدعاة للقلق نعم قواتة مخترقه ربما تسيطر علية الدولة العميقه لانها صنعته ولكن هذا الرجل انحاز للثورة لواحد من ثلاثة اسباب اولا بفعل الدولة العميقة وصراعاتها الداخلية ثانيا بامر المحور الخليجي ثالثا فراسة او صحوة ضمير في كلا الاحوال انحاز الرجل في هذه اللحظة التاريخية للثورة كان بامكان قوي التغير ان تستقطب الرجل وتقدم له تنازلات نعلم انها قاسية لانها علي دماء اهلنا في دارفور وهذا المر يألمهم كما يألمنا لكن البراغماتية مطلوبة للعبور بالدولة السودانية لبر الامان ولكن تعامنا معه دون حكمة وفشلنا في الاستثمار في الرجل جعل الدولة العميقة الغاضبة علي حميدتي تعيد انتاج الرجل في شكل خنجر في خاصرة الثورة يظل السؤال قائما بات الرجل رقم صعب في المعادلة السودانية وصراع المحاور كيف يمكننا كثوار وساسه ونخب التعامل مع حميدتي للعبور بالدولة لبر الامان كيف نحوله من نغمة الي نعمة
05-30-2019, 10:26 PM
Bashasha Bashasha
تاريخ التسجيل: 10-08-2003
مجموع المشاركات: 25803
بزمتكم شوفو المخلوق ده، بفكر كيف، دعكم من هذا المجرم الارعن، الفاسد العميل!
نعم هذا المدعو حسن ادم بسمي هكذا سطو في وضح النهار من مجرم، زعيم مليشيا بقايا بوكوحرام، انحياز!!
اي انحياز يا هذا، ومليشيا هذا المجرم الي هذا التاريخ بتكتل في الابرياء، او بتحاول فض الاعتصام لينفرد زعيم مليشيا خاصة بافراد اسرة بعينها، بقبيلة بعينها، تنشر سوس القبلية، الجهوية، الاستعلاء النازي الابارثيد، وتبيع جنائز اطفالنا لاسيادو العرب،؟
بتسمي قلع كهذا انحياز؟
لو فعلا انحاز ما يروح بيتو؟
عايزيين بيهو شنو هذا المجرم العميل؟
باي حق باي سلطة هذا الاهبل يسوي وباسمنا، الدفاع عن ال سعود، ويعادي في ايران، فقط لضمان سيولة مليارات الدولارات المدفعوة كثمن لاكفان اطفالنا؟
ماهذا ايها المدسوس؟
05-30-2019, 10:33 PM
Bashasha Bashasha
تاريخ التسجيل: 10-08-2003
مجموع المشاركات: 25803
Quote: ولكن تعامنا معه دون حكمة وفشلنا في الاستثمار في الرجل
بعد كل القتو انتا بي عضمة لسانك عن هذا الاهبل، برضو بتسوي استثمار؟
ماهذا؟
ليه بتربط مصيرنا كشعب وبلد، بي مصرد فرد واحد احد، كهذا، لايسوي فردة شبشب في كراع اي سوداني؟
كيف صادف او كان عندو مليشيا خاصة، مجرمة، مملوكه له، او خارجة عن سلطة الدولة، بالوكالة، لخدمة اجندة مستعبدينا الاعراب، انتا عايزنا كشعب، كمان نبرر، نمرر، نشرعن، او نعترف، بتمرير كارثة، عار، كهذا، لانو فقط سطي علي ثورتنا؟
بدل ما يقبض عليه، يحاكم او يشنق حتي الموت، هذا العار، انتا عايز تجازيهو؟
ماهذا؟
05-30-2019, 10:43 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
حميدتي إنقلابي ولم ينحاز للثورة كتائب الظل كانت تقتل وتسحل في الشباب وهو يتفرج.. عندما احس من يحرك حميدتي بإقتراب الثورة من الإطاحة بالنظام كاملا تقدمت اللجنة الأمنية بالسيرة علي السلطة بقوة السلاح وغيرت اسمها الي المجلس العسكري الإنتقالي وشغالة تماطل في قوي الحرية والتغيير منذ أكثر من 45 يوم في تلكوء واضح لا تخطئه عين الثوار متمسكين بثورتهم حتي تنهار اللجنة الأمنية وتسلم السلطة
05-30-2019, 10:39 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
تعرف يا دفعو كونه بقت المواجهة كثورة مع حميدتي أمر في حد ذاته مؤسف!! اخير زمان اعداءنا كانوا البشير و علي عثمان وهارون وقوش و غيرهم ممن على الاقل يحسنون الحديث ويعون ما يقولون كل مخاطبات حميدتي تشي عن عقلية لا ترى في الدنيا سوى صنفين من البشر إما قابل للشراء بالمال أو القتل بالسلاح!!
05-30-2019, 10:44 PM
بشير حسـن بشـير بشير حسـن بشـير
تاريخ التسجيل: 11-26-2004
مجموع المشاركات: 3420
Quote: ولكن هذا الرجل انحاز للثورة لواحد من ثلاثة اسباب اولا بفعل الدولة العميقة وصراعاتها الداخلية ثانيا بامر المحور الخليجي ثالثا فراسة او صحوة ضمير
يا حسن شفت كضبة انحيازه للثورة دي راكبنا بيها الليله. فريق الخلاء لم ينحاز للثورة بل آثر موقف المتفرج منها او لنقل المراقب لما ستؤل اليه الاحداث. لانه ببساطة لو انحاز للثورة (في منطقة الاعتصام) بعد خمسه ايام وفشل الاعتصام او فض من قبل اجهزة امن البشير الكتيرة بما فيها جهاز الامن المخترق الجنجويد للنخاع دا موقفه ح يكون شنو من البشير ؟ او العكس لن لم ياخد موقف المتفرج وحاول فض الاعتصام بالقوة انصياعا لرغبة سيده ونجح الاعتصام موقف الثوار ح يكون شنو؟ في خلال ايام الاعتصام (الخمسة) كانت تجري وتحاك في الخفاء المؤامرات لما بعد البشير. كانت واضح انه البشير انتهي وسناريوهات خلافته كانت قد بدات من ايام التظاهر الاولي. فريق الخلاء اجرم في حق الشعب دا في مناطق تاني من الوطن , هل تاب واستغفر وحمي نفس الشعب في (الاعتصام)؟؟!! الثورة خدمت حميدتي اكثر مما خدمها او انحاز ليها. كان بحلم يكون (عسكري) في الجيش يحمي تهريبه وجبل دهبه ومرتزقته , بس الليله بقدرة قادر لقي نفسه يامر وينهي حتي العساكر نفسهم. ما تشكروا راكوبة خريف ساي. فريق الخلاء مجرم وح يفضل مجرم تطارده ارواح الضحايا ولعنات ربنا ودعوات المكلومين. ياريت يكونوا مستشارنه فهموه الفرق بين الوضوء والغسل لانه قصة الديمقراطيه والشوري واااااسعه عليه شديد..
05-30-2019, 10:52 PM
Mahjob Abdalla Mahjob Abdalla
تاريخ التسجيل: 10-05-2006
مجموع المشاركات: 8949
يا ريتو لو عرف يجيب مستشارين زي بريمة وكبر ... اظن كان هسي الثوار عملو ليهو تمثال في ميدان الاعتصام ... علي الاقل في حاجات بديهية ما كان اتورط فيها ... زي محاولات رشوة الخدمة المدنية الفضائحية ... والتحرش بي ايران
Quote: لدي راي مغاير اري ان قوة التغير لم تحسن التعامل مع حميدتي
سلام حسن ادم وكل سنة وانت طيب
اولاً لاعطاء الرجل حفه موقفه لحظة سقوط البشير مشرف .. بغض النظر عن الدوافع التي ذكرت احتمالاتها وهي اللحظة التاريخية التي اقصدها .. التي كان يمكنه الامساك بها ليكون ايقونة للثورة دعنا نخرج من مصطلح الانحياز للثورة الجدلي
السؤال المهم:
هل كانت هنالك فعلاً فرصة حقيقية لكسب حميدتي للثوار؟
هذا يتطلب ايمان حميدتي ومن حوله بالثورة ... كان هنالك تقدير شعبي كبير لموقفه ...فما هي الخطوات التي اتخذها تجاه الثورة .... علي الاقل لم يشهد له احد او لقواته بحماية المتظاهرين وهو اقوي كرت يملكه ... وهذا ما يجعلنا نتساءل ان كانن هو مؤمن بالثورة وحقها في حكومة مدنية كيف تباعدت خطواته ومن يستشير في مواقفه السياسية ومخاطباته وقراراته ...
بالنسبة لعداء الثوار معه ... كان في مجملها ردود افعال ... لو كانت هنالك حادثة واحدة فقط حمي فيها اي من قوات الدعم السريع اي ثائر لكان الامر تغير. وانت تعرف كيف مجدت الثورة ابطال القوات المسلحة في مواقفهم الفردية كان يمكنه ان يجعل من كل فرد من قواته بطلاً قوميا لكن بدلا من ذلك كل واحد فيهم مته بقتل الثوار ...
واقول ان كان هناك ايمان فعلي بالثورة من قبله هناك الكثير ليفعله ... رغم صعوبته بعد تصنيف نفسه خلال الفترة السابقة يحتاج في الاساس ... تغيير كل من حوله هذا وفق فرضية ايمانه بالثورة الشارع يفهم جيدا من معه ومن ضده
05-31-2019, 01:01 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
Quote: كل مخاطبات حميدتي تشي عن عقلية لا ترى في الدنيا سوى صنفين من البشر إما قابل للشراء بالمال أو القتل بالسلاح!!
دي النقطة الجوهرية ... يا دفعة ...
ثقافة القتل والرشوة وشراء الذمم والفساد المالي دي ثقافة عاشها مع نظام الجبهة الاسلامية 30 سنة حتي تخيل انو ده الوضع الطبيعي سقط البشير وانتقل حميدتي نقلة كبيرة جدا ... من الخلاء لي القصر الجمهوري ... وملايين الشباب في الاعتصام ما قادر يميز الناس حتي اللحظة بانو الناس دي مرقت تغير كل ثقافة الجبهة الاسلامية ... القائمة علي القلع والابتزاز والفساد المالي ... مش مرقوا عشان يغيروا البشير ويرجعوا بيوتهم ينوموا مطمنين حتي اذا ظنينا فيهو افضل ظن ... في اشياء بديهية ما محتاجة ليها حتي مستشارين ...
05-31-2019, 02:03 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
بافتراض سوء النية في حميدتي : وهو انو في لحظة سقوط البشير خطط لاطلاق كذبتين الكذبة الاولي هي انو عمر البشير امر بقتل ثلث الشعب والثانية هي رفضه لتنفيذ الامر وانحيازه للثورة والهف من اطلاق الكذبتين هو قيادة انقلاب تحت شرعية الانحياز للثورة حتي يخدع الجميع و يرث تركة الجبهة الاسلامية
اذا كان لدي حميدتي قدرة وطموحات وتفكير بهذا المستوي وهي صفات قائد حقيقي (ايا كان موقعه) لماذا يختاران يكون رأسا لنظام يولد ميتا ويعيد انتاج نفس الشروط التي ادت لسقوطه وعلي بابه ملايين من الشعب الذي اسقط رئيسين في يومين بدلاً عن اختياره ان يكون احدايقونات وابطال الثورة وهي فرصة توفرت له بالصح او الكذب
اما افتراض حسن النية: ان حميدتي حقا لا يعرف ما يفعل وان هنالك من يرسم له الطريق خطوة بخطوة داخليا وخارجيا وهو يسير فيها الي حتفه أعمي البصر والبصيرة بنوايا حسنة
طبعا في السيناريو الاخير: الخوف من ان السلطة المدنية سوف تجرده من كل شيئ القوات والاموال والمناصب اذا لم تحاكمه بجرائم الحرب في دارفور وده ممكن يفسر سلوكه برضو تجاه الثورة والثوار عدم رغبته في تسليم السلطة لمدنيين
المفارقة انو انحيازه للثورة هو اللي ممكن يغفر ليهو ولو مؤقتا... ما الطريق اللي هو مااشي فيهو الان كالعدو رقم واحد للثورة
عشان كدة طرحنا السؤال حميدتي ده بستشير منو في خطواته
05-31-2019, 02:47 AM
Arif Nashed Arif Nashed
تاريخ التسجيل: 05-12-2014
مجموع المشاركات: 12692
يا جعفر معقول يا جعفر ياخي، ماك جايب خبر إنو أگبر مستشار ي الحميرلاي حميرتي هو طه الدلاهة؟! طبعن ، و مال مين يعني يشير للعروسة غير أمها. ما ياها زاتا : «شكار تا دلاكتا». بس دا كبيرم الذي علمهم سحر الخذلان و هم كوتار. ظهرو في في لقاءات المشير أول بزعامات و أعيان من سموهم زورا و بهتانا: أهل الحل و العقد من كهن الإدارة الأهلية. شفنا السيسي و مبارك الفاضل و آخرين.
تهنيقة بجاي: [}ياخ تصدق يا مؤمن ، لامن واحد فوق رشح الصادق الرزيقي، قربت أتوحس خيفة إنو كمان يجيب سيرة عمك الجولگين إمام المتخاذلين!!
05-31-2019, 05:01 AM
Bashasha Bashasha
تاريخ التسجيل: 10-08-2003
مجموع المشاركات: 25803
ده كلام تقريري وسرد احداث يا بشاشا وليس راي موقف حميدتي والمجلس العسكري البساوموا بيهو لحد الان واللي علي اساسو قوي الحرية والتغيير بيفاوضوا فيهم (كاعتراف ضمني بحق المجلس في الشراكة) ، هو موقفهم من سقوط البشير ، ... ليه قبلنا ان تكون هنالك شراكة مع العسكر حتي ولو بنسبة واحد بالمائة ... علي اي اساس؟ الناس طلعت في 6 ابريل مشت القيادة وده طلب من الجيش انو يتدخل وينحاز للثورة في اسقاط النظام واعلان سقوط البشير من قبل المجلس ايا كانت تركيبته متضمن حميدتي وقواته (كوحدة مختلفة ومنفصلة من الجيش) مهمتها الاساسية كانت حماية البشير وحميدتي بعد هذا الموقف كان ليهو موقف عدم المشاركة في مجلس ابن عوف وزين العابدين ايا كانت الدوافع او التخطيط او المؤامرة التي يحيكها هو ومن معه من مستشارين كيزان او قوي اقليمية عربية الراي من موقف حميدتي وما يمثله حتي الان هو وقواته واضح وسرد الاحداث كما هي (علي الاقل من وجهة نظر شعبية) بدون رأيي الخاص هو فتح باب للنقاش ... بدل قفلها كلها قدام واقع بيفرض نفسو
05-31-2019, 02:04 PM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
بحسابات بسيطة ما محتاجة عبقرية لا يمكن انو تشارك كحليف في ثورة وتغيير حقيقي باجترار نفس شروط النظام السابق واللي ثارت عليهو الناس ... نفس الوجوه نفس الصحفيين لاعقي احذية العسكر والاكلين من كل الموائد واعداء الثورة فلنتيجة المنطقية هي وضع نفسو علي حافة الهاوية كعدو اول للثورة ... وده حيؤدي للتخلص منه في اقرب وقت ممكن ... من قبل الثورة او من قبل المجلس العسكري كما حدث منع بن عوف وزين العابدين لكن بعد ان يؤدي حميدتي الدور المطلوب منه في اللعبة
وعلي حميدتي ان يفهم جيدا ان الثورة السودانية هي للتغيير ولن تقبل بالنظام السابق علي اي مستوي من مستوياته الثورة هي المستقبل وليس بقايا وفلول النظام السابق
05-31-2019, 02:21 PM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
Quote: يا جعفر معقول يا جعفر ياخي، ماك جايب خبر إنو أگبر مستشار ي الحميرلاي حميرتي هو طه الدلاهة؟!
تحياي استاذنا دفع الله ود الاصيل
دي الورطة التاريخية، طه مع محور السعودية عايزين ضد الاسلاميين لانهم بمثلو محور قطر ... وده بيخدم الثورة لكن حميدتي ما عندو اي جمهور غيرهم ولما كان شايلاهو الهاشمية قبل ايام بتكلم عن انو هو بيمتلك قواعد اكبر من قواعد قوي الحرية وطه عايز حميدتي يمشي يحارب ليهو في اليمن بدلا من الجنود العرب وطه عايز حميدتي يتصاحب ليهو مع مصر المحتلة حلايب وفي النهاية 250 الف دولار ولا مليون دولار مرتب شهر واحد وانتهت ويقعد يتلفت زي ما راح ليهو الدرب مع الشرطة لما قالو مرتب تلاتة شهور
اها زي طه ده والمعاهو نوع البياكلك لحم ويرميك عضم ... حايدوروهو ليك شمال يمين لمن راسو يلف ويرمو ليك يشوفو البعدو
06-01-2019, 03:39 AM
اْسامة اْباّرو اْسامة اْباّرو
تاريخ التسجيل: 02-13-2008
مجموع المشاركات: 964
لا حلول لقائد الجنجويد سوى التشبًث بالسلطة ... يقتل .يهدًد. يسيئ ... يكذب ... يرشى ... يغازل الإدارة الأهليًة ... يلعب سيرك للإلتفاف على العدالة والهروب من مصير ينتظره في دولة القانون والمحاسبة دولة سودان السلطة المدنيًة لاسبيل لهذا الجنجويدى مجرم الحرب سوى الإحتماء بالسلطة ... يعلم أن هنالك إستحقاقات عدليًة ... جرائم حرب قتل وتجنيد قصًر و نهب أموال يعلمها مطلوبات تحت الدفع ... حميدتًى على خطى المخلوع حافراُ بحافر..
سلام صاحب البوست وزوًاره
06-01-2019, 04:00 AM
ترهاقا ترهاقا
تاريخ التسجيل: 07-04-2003
مجموع المشاركات: 8422
حميدتي مستشاره عقلية القبيلة ، الزول ده بينه وبين الوقت الحاضر في فراسخ ، لسع عنده فكرة الفروسية والقبيلة والادارة الاهلية ، الزول ده في وادي آخر ، والكيزان والمستنفعين الملاعين مستغلين الظرف ده استغلال جيد وما تنسوا إنه زول كاسهم من زمااااان، زعرودة واحدة بتغير إتجاهه من أقصى اليمين إلى أقصى الشمال ولو لاحظتو كل مرة شابكنا بالقانون بالقانون زي الكيزان لمن يحلفوا وهم كاذبون اقسم بالله والمصحف الشريف، والقانون اللي هو شابك فيهو ده هو االخايف منو زاتو لأنو هو كلو على بعضه كده ما قانوني
الشكر لكل المتداخلين علي وجهة نظري الأعزاء بشاشا ومعتصم والاخ جعفر والبقية طيب ياشباب خلونا نفكر خارج الصندوق وبعلمية وواقعية الف باء ت ث السياسه تقول مادام في تفاوض لابد من تنازلات ومساومات لأنك لن تتفاوض مع شخص يسلمك رقبته ويذهب للجحيم وهو يمتلك كل أدوات العنف السؤال لماذا قبلت قوي الحرية والتغير التفاوض من اصلو مع المجلس العسكري واعتبرته شريك وهي تعلم ان المجلس هو حميدتي اليس فيهم رجلا رشيد المبدأ السليم ان تسلم قوي الحرية والتغير مطالب واجبة التنفيذ للمجلس هذا. الخطا الاستراتيجي بمبدأ التفاوض يجعلك تقدم تنازلا وتساؤم غير ذلك هاتوا برهانكم لحل المعضلة في ظل ارتضاءالتفاوض بعيدا عن الهتاف والقاء اللوم هنا وهناك والمزايدات التي تنتظم المشهد السياسي في بلادنا اعتقد أمامنا خيارين الان من وجهة نظري والتي ربما تكون معطوبة ولا ثالث لهم الاول مواصلة التفاوض بالتالي تقديم تنازلات ومساومات الثاني ان يكون لنا قوات قادرة الي الذهاب للقصر الجمهوري واعتقال البرهان وحميدتي وبعدها الذهاب في مشروع التغير الشامل الذي نحلم به بما ان الاخيرة غير ممكنة ما لم ينحاز الجيش يبقي علينا التفكير وفق فقه الواقع لان الدولة العميقة تراقب المشهد
06-01-2019, 11:12 AM
محمود الدقم محمود الدقم
تاريخ التسجيل: 03-19-2004
مجموع المشاركات: 8908
لمن كنا بنقول حيدو حميدتي وخلوه محايد لا معاكم لا ضدكم كان اهل النعره القبلية في الشمال النيلي دائما عندما يكتبون بيستحضروا تور شين وعمايل تور شين ابان عهد المهدية في شخص حميدتي وكانت القاعدة الملهمة لهم ان الغرابا خلااااااص كبسوا وحيقتلونا وحينتقموا مننا كما فعل تور شين في نسوانا في الزمانات .
..النت كمحلل سياسي ما تقع في المشهد وتبرطع ما لم تقوم بقراءة الواقع بتمعن لابد ان تقراء المشهد وانت في مكان عالي حتي تري كل الجزيئيات المكونة له وهذا ما فعله المهنيين وشركائهم ونجحوا في البداية لكنهم لاحقا فقدو السيطرة علي القيادة العامة وحلت كتائب الظل واصبحت هي التي تحرك بوصلة الاعتصامات في القيادة العامة وفق مخطاطتها واول مخططين لهما هو ضرب الدعم السريع بالجيش وضرب الدعم السريع بالشعب نجحوا في الاولي عبر سحب السلاح من حرس البوابات التي يسيطر عليها الجيش واصبحت كتائب الزل تطلق الرصاص وهي ترتدي ثياب الدعم السريع وهناك فيديو حايم في الفيس يكشف كيف تتم عملية التبديل
.وكتائب الظل ايضا نجحت في ضرب الدعم السريع بالشعب عندما بات الشعب الان يكره الدعم اكثر من اي وقت مضي لذلك المنطق كان بيقول علي الناس تجنيب الدعم السريع في الوقت الراهن تحيده وتجعله محايدا لا معك لا ضدك او في اسواء الاحوال تكون براغمتيا وتحاول تكسبه كي تجعله يضرب ليك كتائب الظل بالسلاح في حال حاولت كتائب الظل ان تعتدي عليك، هذا ما حصل، استفادت كتائب الظل ولعبت بالدعم السريع سياسية ,
في اي عمل سياسي جماهيري اول نقطة جوهرية هي انك تحاول تغطي ضهرك من كتائب الزل والكيزان والامن ، كي تكون خسائرك اقل، لكن تعادي الدعم السريع الان وانت مكشوف فان خسائرك في الارواح ستكون مريعة، لسبب بسيط جدا هو ان الدعم السريع مزيود موية وجاز وحرجل وكركدي وتمري هندي، الدعم السريع لا يحكمه قانون ومعظم افراد هذه المليشيات يريدون تحويل العاصمة الي الخلاء، وجلب الخلاء الي العاصمة.لذلك قلنا حيدوه الان، اسسو دولة المواطنة الان، دولة القانون والمؤسسات الان، ابني جيش مثل الخلق الان، ثم بعد ذلك افتح ملفات الدعم السريع من الالف الي الياء، لانك وقتذاك بتكون عندك قوة، لكن عايز تفتح ملفات الدعم السريع Now وعايز تشن حرب علي الدعم السريع Now وانت عدد المعتصمين في القيادة بعد ما كانون نصف مليون بقوا اقل من الف؟؟؟؟؟؟؟
Quote: لاسبيل لهذا الجنجويدى مجرم الحرب سوى الإحتماء بالسلطة ... يعلم أن هنالك إستحقاقات عدليًة ... جرائم حرب قتل وتجنيد قصًر و نهب أموال يعلمها مطلوبات تحت الدفع ...
حتي بجميع المفاهيم الانتهازية .... السعي لسلطة عسكرية مطلقة حاتقوده للهلاك السريع ... زي القبلو وده الطريق الماشي فيهو حلو الوحيد السعي لسلطة ذات شرعية مدنية ... يكون فيها صاحب حصانة ممكن تمهلو للفترة الانتقالية ... علي الاقل وده يتطلب الاقتراب من الثورة وليس الاقتراب من بقايا النظام السابق
Quote: لمن كنا بنقول حيدو حميدتي وخلوه محايد لا معاكم لا ضدكم كان اهل النعره القبلية في الشمال النيلي دائما عندما يكتبون بيستحضروا تور شين وعمايل تور شين ابان عهد المهدية
ما كتبته هنا يا اخي محمد اظنه طريقة التفكير والسلوك التي يعتقدها المستشارين والمحيطين بحميدتي الان وهي في مجملها ليست سوي الطريق الي الهلاك وبسرعة البرق
مافي زول متذكر موضوع تورشين حاجة زي دي ومافي زول حي من الجيل ده عشان يذكر النا س ولا متبقي احد من الضحايا ... والاغرب في الموضوع انو اللي عاث فسادا في غرب السودان وقتل ونهب وسرق واغتصب النساء والرجال والاطفال... ليسوا ابناء الشمال كانتقام من ذلك التاريخ البعيد .... بل هو حميدتي نفسه للمفارقات المبكية ... لما يذكر اسم حميددتي في اي مكان في السودان اول ما يتذكره الاحياء هو حروب الابادة والقتل والاغتصاب والنهب الذي مارسه في دارفور لانهم شاهدوه وعايشوه ولسة الضحايا الناجين احياء واولادهم احياء
الجزء الثاني في حديثك وهو في الحقيقة نسخة من حديث حميدتي والمحيطين بيهو:
اديت ما اسميته كتائب الظل وجود فعلي وحقيقي وكبير جدا حيث انها هي المسيطرة علي اعتصام القيادة وتوجهه حسب مخططات اضافة الي قدراتها العسكرية المتفوقة التي ادت الي اقتلاع السلاح من قوات الدعم السريع واطلاق النار ... وطبعا ده الاسلوب المتبع حاليا لحميدتي للتنصل من المسئولية
مافي قوة مسلح في الشارع غير قوات الدعم السريع اذا كانت الرغبة حقيقية في وجود نقاط التقاء بين قوات حميدتي والشارع السوداني فالمصداقية هي الطريق وليس التنصل من المسولية زي المسرحية الباهتة العملوها وجابو فيها كم نفر من دارفور قالو ديل اطلقوا النار
ده الكلام البنقول فيهو يا محمود الدقم يجب التخلي عن هذه العقلية اللي انت بتتكلم عنها لانها للاسف دي العقلية السايقة حميدتي الان ومودياهو لي للتهلكة وبسرعة البرق
حسب علمي مستشارين حميدتي العسكريين جلهم من جهاز الامن والمخابرات السياسيين طه وقوش ودحلان وزاد عليهم ناس الادارة الاهلية المزعومين ليضفي هالة الزعامة القبلية زي صديق ودعة وحفيد علي دينار اكاد اجزم بان هناك تنسيق مابين الصادق المهدي وبين حميدتي ولك ان تتابع بنفسك تراشق الرجلين بسهام كيوبيد وكيل المديح لكل طرف ماهو الا تاسيس للمرحلة المقبلة الصادق يريد ورثة النظام الخالف وهناك شبه تفاهمات بينهم على ذلك
06-01-2019, 06:13 PM
عبدالله الشقليني عبدالله الشقليني
تاريخ التسجيل: 03-01-2005
مجموع المشاركات: 12736
ثقافة الغطرسة والعنجهية وعدم احترام الآخر: لا ترفع عصاك في وجوهنا يا حميدتي! .. بقلم: د. حيدر إبراهيم علي نشر بتاريخ: 30 أيار 2019
لاترفع عصاك في وجوهنا يا حميدتي مرة أخرى
يعكس عناد وتمسك العسكر بمواقفهم قدرا كبيرا من غطرسة القوة، والعنجهية والإعجاب بالذات وعدم احترام الآخر ( خاصة لوكان مدنيا ) ليس في ثقافة العسكر حوار ومفاوضات ونقاش، هناك أوامر وتنفيذ، وأي اختلاف في نظرهم هو فوضى وانعدام الضبط والربط .
كدت أسال حميدتي : ماتلك بيمينك يا حميدتي ؟ ليس من مهام العصا أن ترفعها في وجوهنا عندما تخاطبنا . لأن من تخاطبهم فيهم أيضا الكثير من الفرقاء (جمع فريق أول ) في علمهم وتخصصهم ومعرفتهم وخلقهم، ليس من باب الكياسة والذوق ان ترفع العصا في وجوههم مهما كانت القوة المادية التي تستند عليها. ولكن هذه الغطرسة العسكرية قديمة تاريخيا . حين دخل نابليون روما ، قال له المستشارون: أن البابا غاضب ؟ فرد عليهم بسؤال جاهل ومتكبر: كم دبابة يملك هذا البابا؟! فالدبابات هي فقط معيار الاحترام – احترام الآخر .
كان رد حميدتي على دعوات الإضراب : أن اي مضرب يقعد في بيته ولا يأتي للعمل مرة أخرى ؟ وهو لا يعلم أن الاضراب حق إنساني في المواثيق الدولية خاصة منظمة العمل الدولية (I.L.O) وأن العمل حق من حقوق الانسان الأساسية لايستطيع أي فريق أومشير في الدنيا أن يمنعه من مواطن . ولكنه حديث غطرسة القوة العنجهية .
نحن لسنا جاحدين ونقدر دورك في خلع البشير والانحياز للثوار . ولكن هذا الانحياز ليس مؤقتا ولا جزئيا ، بل يعني تحقيق اهداف الثورة والوقوف إلى جانب تنفيذها . فالثورة ليست مجرد خلع رأس الدولة ، . بل تصفية النظام وتغيير الدولة المستبده وعناصرها وتصفية الحزب الذي أقام وساند هذه الدولة . وهذا هو الاستقرار الحقيقي للثوار الذي لم يدركه الزعيم الطائفي ، أن يرى الثوار عناصر جهاز الأمن ومديرهم يتجولون في الشوارع دون أن يكون مكانهم الطبيعي السجن والمحاكمات السريعة .
ليس لدي أي اعتراض أن تتولى أي منصب فهذا حقك كمواطن سوداني ولكن يجب أن يكون الولاء لهذا الوطن كاملا وان تحافظ على قيمة وكرامة مواطنيك والا تجعل منهم مرتزقة في اليمن وألا تعبث بحياد السودان الايجابي الذي عرف به منذ الاستقلال، وتدخله في صراعات المحاور والتحالفات المشبوهة وخلق عداوات مجانية مع الدول الكبيرة والمحترمة مثل إيران . يجب أن تدرك استخاف العرب بك وبالسودان وان نسأل لماذا لايوجد أي جندي عربي من المشاة في خط المواجهة المباشرة مع اليمنيين غير السودانيين؟ . وقد رفضت كل الدول العربية وبالذات الخليجية ان ترمي بأبنائها في التهلكة .
كنت اتوقع من حميدتي ابن الريف المهمش والمستضعف أن ينحاز للفقراء ولايقف في صف الفاسدين والمرتشين من الاسلامويين .
لماذا تصر الثورة المضادة على تقديم حميدتي ليهاجم ويهدد الثوار وهو نائب الرئيس ويختفي الرئيس – كما يقول بالعامية : يريدونك أن تشيل وجه القباحة وان تقوم لهم بالأعمال القذرة مثل إفشال إلإضراب السياسي، وأن تعلن عودة النقابات العميلة المساندة للاستبداد والفساد، وأن تعلن عن رشوة مرتب 3شهور لمن يرفض الاضراب ؟ لماذا يعلن حميدتي نيابة عن العسكر والكيزان مثل هذه المواقف !
لماذا تجتمع أنت مع محمد بن سلمان ولايذهب الفريق عبد الفتاح برهان . يحاول الكيزان أن يجعلوا منك أرجوزا يحركونه بخيوط خفية . هذا ليس امتيازا وتفضيلا لك ولكنه توريط وحرق لشخصيتك أمام أبناء شعبك باعتبارك المسئول عن حرب اليمن.
يا حميدتي لم يفت الأوان، فتوقف عن لعب الدور القذر بدلا عن الكيزان وارجع باحترام الى صفوف أبناء شعبك قبل أن يصيبك الندم وتصنع الكارثة لك ولوطنك وأهلك .
Quote: حسب المعلومات داخل الاعتصام المستشار الرئيسي دكتور مضوي
سلام يا خالد
لا اعتقد ولا اتمني دكتور مضوي مواقفه معروفة وخاض صراعا مريرا ضد الجبهة الاسلامية واعتقالات وتعذيب واتهامات بتفجيرات وخيانة عظمي.... وهو في الحقيقة احد المرشحين لرئاسة الحكومة المدنية وهو أهل لها لو كان مستشارا لحميدتي لكن الوضع جدا مختلف .... لا اعرف علاقة لمضوي بحميدتي ولم اسمع عنها قبلا ... لكني اظن ان امثال مضوي هم من يجب ان يتخذهم مستشارين لو كانت نوايا الرجل خيرا تجاه الثورة ... ولما خاض ويخوض حميدتي كل هذه المعارك الدونكيشوتية ... ولم وضع نفسه كمخلب وكممثل لاجندة خارجية وعبث بقايا نظام الانقاذ
06-03-2019, 07:03 PM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
Quote: Quote: كان بامكان قوي التغير ان تستقطب الرجل وتقدم له تنازلاتتنازلات؟ليه؟ انتا بي جدك؟ عشان شنو بالضبط يقدمو لي واحد اهبل، عبيط، ساذج، مجرم، عميل، قبلي ، الابتدائي ما كملو ، شارك في تشريد و ابادة ملايين؟ليه؟ عايزين بيهو شنو؟ عشان ميزتو شنو مثلا؟ اكررعشانعمل شنو مثلا بخلاف ممارسة ما شبا عليه من قتل او سرقة؟معقولة بدل نظام القتلة يكون زعيم الجنجويد؟هل لهذا تفتت السودان او ماتو وتشردو قرابة ال10,000,000 برئ؟
@ جيتك تاني معوقب يا جعفر ، تعرف مجرد فكرة فتح بوست للحميرلاي / حميرتي بوصفه مشيراً أولَ و بالتالي فلا بد له من حضرات مستشارين يشيرون عليه ففي حد ذاتا فكـرة لطيفة لفتح شهية أي كاتب سيناريو ليصنع منها عملاً فنياً هزلياً جديراً بوضعه بمواعينه في حانة من ( يُؤتى به من بلادٍ بعيدة ليُضحك ربات الخدور البواكيا ) .
# و لعل أظرف من يصلح لهذه المهمة البشوشة هو عمنا الكاهن العراف النوبي بشاشا. و دا رغم صرامة ردوده عاليه في مواجهة أخونا حسين آدم العالم . خاصة و هو يتساءل جاداً : عازين بيهو شنو ، و ميزتو شنو؟!! و الجواب من جانبي : شخصيبـاً ما شايـف للزول دا أي مزايـا عقليـة و لا اخلاقية ، أما ، إذا كان الحجيث عن مزايا حسية كبسطةٍ في الجسم أو سعة في المال ، فيمكن اللجوء بها إلى خالتو سهير، خسوسن إنها منزلة فوقو بهناك فوقو بوست مخسوس لامن يخلي الواحد يقرب يصدق معنوناه : " مكسرين في حميدتي" حيث جاء فيه ما يلي على حد وصفها : "بمجرد أن تقول لك إحداهن أنا راضية أكون زوجته الرابعة ، تأكد حينها أن الأمر تجاوز مرحلة الكسيّر الى مرحلة الدشدشةو الإدمان . تلك كانت ونسة الكثير من الفتيات في الفترة الماضية ، فجأة صار قائد قوات الدعم السريع محمد حمدان دقلو الشهير بـ(حميدتي )، فارس الأحلام ، و الزوج المرتجى و الأمل المنشود ، وصار أيقونة البروفايل لعدد من الفتيات و الرجال على حد سواء.
طبعا زهير عثملن متعهد خالتو سهير في المنبر قريت موضوعها المهبب بتاع حميدتي والاصم ... لكن ده نوع المواضيع البنكروهو ليك في لحظتو ويقول لا ماكنا قاصدين كدة (Didn't do it)
والحقيقة الان لا يمتلك اي ميزة ... حتي الاموال بعد دخول الامريكان في الخط حاتقيف كلها المجلس اذا ما قبل بالمشروع القادم حيابقي زي لجنرال البشير في متاهته الاخيرة
06-13-2019, 05:50 PM
دفع الله ود الأصيل دفع الله ود الأصيل
تاريخ التسجيل: 08-15-2017
مجموع المشاركات: 13704
طبعن ، لو غرقت في بيت الگلاوي لا جوة يا جعفر كان ظهرنا ليك نحنا سعاليق بني أمية ، اللمبي عبد الرحيم و شوقي و العبد الفقير إلى الله ختينا ليها مع الكلب الأكل الدريش ؛ نكتنا ليك ليها جنس بلاوي قديم على جديد حاجات من أيام درامة خطوبة « كرعين سهير » مع البنغالي داك تعيس و ربما سعيد الحظ، لامن گرهناها الشلاقة.
Quote: لا اعتقد ولا اتمني دكتور مضوي مواقفه معروفة وخاض صراعا مريرا ضد الجبهة الاسلامية واعتقالات وتعذيب واتهامات بتفجيرات وخيانة عظمي.... وهو في الحقيقة احد المرشحين لرئاسة الحكومة المدنية وهو أهل لها لو كان مستشارا لحميدتي لكن الوضع جدا مختلف ....
سلام جعفر اها أمبارح في قاعة الصداقة قالوا بالاسم حميدتي مصادرنا لا تكذب
06-16-2019, 10:55 PM
aosman aosman
تاريخ التسجيل: 02-04-2002
مجموع المشاركات: 3443
Quote: حتي الاموال بعد دخول الامريكان في الخط حاتقيف كلها
يا جماعة قصة أمريكا والأمم المتحدة والإتحاد الأوربي أعتبرها شخصيا كلام فارغ ومن المفروض ننسى هذا الموضوع, الدول الغربية بصورة عامة تلعب من أجل مصالحها فقط وتستغل سلاح الديمقراطية وحقوق الإنسان لتأديب الدول التي تحاول أن تخرج خارج إطارها التحكمي. ومافي أضفرا بحك جلدك غير أضفرك
06-16-2019, 11:04 PM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
اكيد مافي ومعروف حركة الغرب وبالخصوص امريكا عارضة رئيسها للبيع للي يدفع اكتر ثلاثين سنة م عملت حاجة غير فصل الجنوب لكن الان المسالة مختلفة ... الدعم للثورة هو دعم شعبي اكثر منو سياسي البشير سقطته اظافرنا والبعدو برضه حاتسقطو اظافرنا في النهاية شايف حميدتي لافي في كل مكان ... وبتكلم عن التدويل ..... مرعوب منه هو والمجلس علي الاقل حتي لو قال مافي اي تفاوض حايمسك ليهو دولة محاصرة من كل اتجاه زيو وزي البشير وتعجل بي نهايتو
06-17-2019, 09:31 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
Quote: اها أمبارح في قاعة الصداقة قالوا بالاسم حميدتي مصادرنا لا تكذب
والله مصادرك اكيد مصدقة
لكن اذا كان المقصود لقاء حميدتي مع قيادات القبائل و العشارئر والناس الحشدهم انا سمعت الكلام كان بقول انو مافي فرق بينا وبين قوي الحرية هم عايزين حكومة تكنوقراط نحن عايزين حكومة تكنوقراط هم عايين يرشحوا حمدوك لرئاسة الوراء نجن عايين حمدوك هم عايزين د مضوي نحن عايزين دكتور مضوي لرئاسة الوزراء ده السياق الورد فيهو
سلام يا خالد وانا ايضا اعتذر لاني فهمهتا برضو غلط المهم في الموضوع
الثورة حاتشيل في طريقها كل الاوساخ واي واحد ارتضي لنفسو يكون جزء من هذه الجريمة يتحمل مسئولية انتحاره السياسي والاجتماعي حميدتي عدو الشعب الاول في المرحلة دي ومن وراهو بقية المجلس العسكري وكل اللي يتشدد ليهم
عشان يذهبوا مبةل التاريخ مع بعض
06-18-2019, 03:51 AM
اْسامة اْباّرو اْسامة اْباّرو
تاريخ التسجيل: 02-13-2008
مجموع المشاركات: 964
هههة قال ليهم "الكلام الفى الورقة ده مكتوب ... أحسن أقول كلامى" غايتو الزًول ده مستشارينو ركًبوهو التًيتل ... مشكلتو المجلس التشريعى الغير منتخب شايف كيف؟ ياخ والله لزوجة المخلوق ده دق أب ضرطه.
06-18-2019, 08:56 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
تعرف يا ابارو لو فكر بس لحظة واحدة انو المكتوب ده ما بتاعو .... (المكتوب العملو من بداية الثورة) يمكن كان الحال اتغير
القالو ليهو انك ممكن تكون رئيس بقوة السلاح القالو ليهو انت بديل الجيش السوداني والشرطة السودانية وجهاز الامن السوداني القالو ليهو ممكن تشتري كل السودان القالو ليهو لو بقيت رئيس السودان حايكون اقتصادك اقوي من امريكا ب هللات الخليج القالو ليهو ممكن تقتل القتيل وتمشي في جناتو عاااااادي القالو ليهو ابيد المعتصمين ديل .. عشان تتفاوض بي راحتك بدون ضغوط
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Bashasha
عبدالعظيم عثمان
محمد البشرى الخضر
بشير حسـن بشـير
Mutasim Idris
Mahjob Abdalla
Arif Nashed
دفع الله ود الأصيل
ترهاقا
محمود الدقم
عبدالله الشقليني
aosman
فيس بوك
تويتر
انستقرام
يوتيوب
بنتيريست