|
|
|
 Re: البرهان قال قوله.. علي ق ح ت الرد!! (Re: Mutasim Idris)
|
Quote:
معتصم سلامات
غايتو البرهان لو اتزنق مراقتو جاهزة يا اخوي.
ح يقول لينا اللقاء دا كان مع الرهان ما معاي انا.
كدا ننتظر رد ناس ق ح ت |
العزيز محمد نور عودو تحايا ثورة وسلام..
المزنوق هسي ما البرهان.. نحن عاوزين ردود.
قوي الاعلان قال بغشوا في الشارع!!!!
دا كلام ح ينسفهم لو ما ردوا وبقوة علي الهراء دا.
| |
 
|
|
|
|
|
|
|
 Re: البرهان قال قوله.. علي ق ح ت الرد!! (Re: منتصر عبد الباسط)
|
المجلس العسكرى وعلى راسهم فيق خلا ومن خلفو برهان لايضيعو فرصه فى التشكيك ومحاولات التخذبل عن تجمع المهنيين و ق ح ت ناهيك عن خلق كيانات خاصه الشبابيه فى محاوله لتفكيك وتكسير كتله تجمع المهنيين و ق ح ت . مثلا عندما قامو بتجميد نقابات الفلول وليس حلها (طبعا حسب تبريرهم مثلا : بسبب الارتباطات الدوليه والاقليميه للنقابات) مثلا الرزيقى السنه الفات اصبح على راس الكيان الافريقى للصحفيين وبالبحث حنلقى كيانات عديده اقليميه او دوليه موجود ضمنها كيزان تم تصعيدهم عبر النقابات والاتحادات دى بالتالى دا حيخلق فى اعتقادى مشكله لكيانات الثوره المهنيه فى التمثيل والتحرك خارجيا.الاعلام شغال فى تلميع المجلس واذيالو من الكيانات المصنوعه ولا اقول التضييق بل اقصاء تلك الاجهزه لكيانات الثوره الحقيقيه وعلى راسها ق ح ت وتجمع المهنيين. ناهيك عن الجرجره والمماطله وافتعال احداث لتعطيل الاتفاق النهائى وتسليم السلطه لقوى الثوره .والامثله النوعيه تطول الداله على عدم جديه المجلس وانتظارو لتفكيك جسد الثوره (اقاد وجماعات) حتى ينكص على عقبيه ويتد) وتصبح السلطه خالصه له وللكيانات المصنوعه مدفوعه الاجر معدومه الاراده السيسايه والرؤيه لتجاوز مشاكل البلد.
تحياتى
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Asim Ali)
|
Quote:
المجلس العسكرى وعلى راسهم فيق خلا ومن خلفو برهان لايضيعو فرصه فى التشكيك ومحاولات التخذبل عن تجمع المهنيين و ق ح ت ناهيك عن خلق كيانات خاصه الشبابيه فى محاوله لتفكيك وتكسير كتله تجمع المهنيين و ق ح ت . |
أخي وعزيزي عاصم..
طبعا هم لم ولن يفوتوا الفرصة للنيل من ممثل الشعب قوي إعلان
الحرية والتغيير لأغراض معروفة طبعا بما فيها الاستيلاء علي
السلطة وتصححيح الانقاذ بتخليق (الجيل الثاني) منهم..
دا ما بهم لا من بعيد لا من قريب يا عاصم..
في ثلاثة إتهامات بتطعن في مصداقية قوي الاعلان جاءت علي
لسان رئيس المجلس العسكري دا.. دا البهمنا..
أولا: قوي الاعلان في أول لقاء جاءت (تشارك) السلطة ما (تستلمها)!!
قوي الاعلان قادننا بإنه العساكر ما ح يفكوا السلطة في حين كلام
البرهان بعني إنهم طرحوا نفسهم شركاااااااء فيها!!
ثانيا: قوي الاعلان بتكذب علي الشارع حتي لا تتهم بالتخوين!!
دا كلام خطير جدا جدا.. لو فعلا دا الحصل معناها قوي الاعلان
فاقدة المصداقية ومتهافته علي شراكة السلطة مع العسكر..
ثالثا: مافي زول ما حزبي!! هل نست قوي الاعلان أنه 90% من الشارع
أو تقل قليل غير محزبين ولا ينتموا الي أحزاب واغلبهم نقابيين؟! يعني
هل قوي الاعلان بتمثل النسبة البسيطة في الشارع!!؟ وإنهم قالوا
عازفين علي المشاركة في الانتقالية!!.
----
إما إتهامات آبي أحمد إنهم نشطاء (هواة) ما سياسين دي فعلا تضحك.
لانه حسب فهمنا تاريخ الامة والشيوعي والاتحادي أقدم من أثيوبيا
نفسها.. ما علينا.. دا يردوا ول ما يردوا ما مهم..
إضافة لهروب قوش والاعتقالات دي مسائل ثانوية مقارنة بسرقة الثورة
نفسها..
البرهان إتهم ممثلنا في المفاوضات بكلام خطير واجب الرد عليه.
العساكر دا ديدنهم شق الصفوف وخلق البلبلة..
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
Quote: في ثلاثة إتهامات بتطعن في مصداقية قوي الاعلان جاءت علي
لسان رئيس المجلس العسكري دا.. دا البهمنا.. |
سلام عليكم اخ معتصم
المجلس العسكرى مستمر فى اطلاق الاتهامات من العيار الثقيل سواء مباشره او عبر اعلامو تصور ان يكون ضمن الحمله الاعلاميه الشرسه ضد الثوره تقرير عن تخوين واتهام بالعماله لرموز من الحريه والتغيير تركيزا على عمر الدقير.
حركاتو دى وتوقياتا اطلاقها واحد من اهدافها شغل ق ح ت بالرد والدفاع عن نفسها امام قواعدها ولكن اعتقد ان افضل شعار يستخدم للرد على كل فريه من اعضاء المجلس بيت الشعر
لو ان كلُّ كلبٍ عوى ألقمتُه حجرًا * لأصبح الصخرُ مثقالاً بدينارِ
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mahjob Abdalla)
|
| Quote: نحن نقترح محاصصة (قطاعية) للمحافظة علي مصالح فئات الشعب المختلفة بدلا من المحاصصة الحزبية السياسية. |
انا اتفق مع مبدأ المحاصصة غير السياسية و لكن من منكم يشرح لي معني المحاصصة القطاعية!
_________
المحاصصة لابد و ان تكون علي اساس الخمس اقاليم (كردفان و الشرق و الشمالية و دارفور و الاوسط ) بالتساوى.
في اكثر من واحد قبل كدا قال ما معناهو المحاصصة لا تأتي بكفاءات و لكن قولو لي هل من الصعب ان نجد خمس اشخاص من كل ولاية بها ما لا يقل عن 2 مليون نسمة, يحملون الكفاءات اللازمة و الضمير الحي للمساهمة في بناء السودان؟
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mahjob Abdalla)
|
| Quote: *البرهان* من أول إجتماع قلنا أننا نريد حكومة كفاءات وقال لنا وفد الحرية والتغيير " مافي زول ما حزبي كلنا أحزاب " |
الكلام ده برضو صحيح.
ناس الحرية و التغيير حتي الان لا يتكلمون الحقيقة فكلهم يضمرون الشر لبعضهم البعض.
يصرون علي تقاسم السلطة علي اساس حزبي بدلا من تركها لتجمع المهنيين لاختيار حكومة تكنوقراط.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mahjob Abdalla)
|
Quote:
الكلام ده كان قبل يومين او ثلاثة من المسيرة المليونية الكانت يوم 30 يونيو.
يعني ليهو شهر. لماذا اعادته هنا؟ |
إطلاقا ما مر علي وبأمانة أفتكرتو جديد لما شفت بوست بقال. في نفس الوقت
جاءتني تويتس من صفحة الاستاذ واصل علي في تويتر.
لو قابلني قبل الليلة اكيد كنت لقيت إجابات علي اسئلة كثيرة جاوب عليها البرهان
في المقابلة دي منهم الشخصيتين الحزبيتين في الوفاق السياسي والدغمسة
الغير مبررة في الوثيقة الدستورية. كلام البرهان حده الاسفل انه قوي الاعلان
هي البتخلق في العراقيل في (الشراكة) والاعلي انها بتكذب علي الشارع!!.
وطالما الكلام قديم معناها مر عليهم وسردبوا من الرد أو ما مر عليهم فوجب
منهم توضيح او اجابات!!.
Quote: المحاصصة لابد و ان تكون علي اساس الخمس اقاليم (كردفان و الشرق و الشمالية و دارفور و الاوسط ) بالتساوى.
في اكثر من واحد قبل كدا قال ما معناهو المحاصصة لا تأتي بكفاءات و لكن قولو لي هل من الصعب ان نجد خمس اشخاص من كل ولاية بها ما لا يقل عن 2 مليون نسمة, يحملون الكفاءات اللازمة و الضمير الحي للمساهمة في بناء السودان؟ |
الكلام دا بالنص إتقال لما قدموا الوثيقة (حقتهم) الاولي قبل ما يتخلوا ويتنازلوا
عنها ويبقوا ساكين أي وثيقة إترمت ليهم وإتبنوها. التسليم , طبعا اي إختيار هو
(محاصصة) من نوعا ما , والشارع ح يتقبل اي (إختيار) اللهم الا الحزبية!!
تمثيل الاقاليم الخمسة في السيادي كان ح يلقي قبول كبير من الشارع وبداية
حقيقية لسد الفجوة والجفوة بين علاقات المركز والهامش.. للحادب علي المصلحة العامة للبلد.
وممكن يكون لبنة حقيقية وأساس تتبني عليها الملامح العامة للسودان في كل هياكل السلطة
مثالا لا حصرا المحكمة الدستورية ومجلس السيادة المدني في الديمقراطية. دا للبعاين بعيد ما تحت كرعينه.
Quote: ناس الحرية و التغيير حتي الان لا يتكلمون الحقيقة فكلهم يضمرون الشر لبعضهم البعض.
يصرون علي تقاسم السلطة علي اساس حزبي بدلا من تركها لتجمع المهنيين لاختيار حكومة تكنوقراط. |
الحرية والتغيير وصلهم رشَاشْ تقيل من البرهان في المقابلة دي. فيها تخوين ليهم وفي تكذيبهم
علي الشارع (يدوا الحلة وصا والنقارة عصا) وماسكين في حتة إنهم كيان كبير وحتما
بتحصل فيه (إختلافا) وبتنقصهم الشفافية في مواجهة الشارع. المسألة (أوسع) واكبر من مجرد شفافية للاسف.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
| Quote: تمثيل الاقاليم الخمسة في السيادي كان ح يلقي قبول كبير من الشارع وبداية |
السؤال من هو ناس ق ح ت وما ومستوى الوعي حقهم
هم ثلاث بوتييكات
تجمع المهنيين وقوى الاجماع الوطني ونداء السودان+الصادق المهدي شخصيا
ديل اصلا شيوعيين وناصريين وبعثيين من الاول يعني وعي الدولة المركزية الفاسدة والفاشلة والفاشية ذى الاخوان المسلمين والسلفيين ..عشان كده الشعار المبتور والعلم نفسه دل علي انهم ما سائلين في الاقاليم ولا الفدرالية نفسها في السودان وهي ازمة ازمات هذه النخب
والدولة المركزة التي جائت بالانقلابات في السودان عبر العصور 1958 و1969 و1989 وعبر الانقلابات جات مدفوعة من استخابارات اقليمية ودولية ولم تخدم السودان ولا السودانيين ولا المشاريع نفسها سودانية ولذلك حتي اليوم يهرولو لي مصر والخليج ويلهثو في االسودان دون وعي اقليمي او دولي دور هذه الدول الرخيص في المنطقة
بل اجهضو كل محاولات بناء الدولة الديمقراطية الفدرالية الاشتراكية سواء عبر
1- اتفاقية اديس ابابا ودستور 1973
2- اتفاقية نيفاشا ودستور 2005
واول من التف عليها الكيزان ايتام الترابي من ناحية وجماعة مايو 1969 واجهضو انتخابات 2010 وانفصل الجنوب ..2011 ومشا البشير وبدرية سليمان بالاستيكة في الجاتب السيادي ولاجرائي في دستور 2005 واصبح يعين الوالي وينقل الوالي وعايز يقعد في رسانا لي الابد متجاوز المادة 57 من الدستور
*****
وهسة ق ح ت ناس 1969 الشيوعيين والبعثيين والناصريين او المجلس العسكري ناس 1989 الكيزان+ السلفيين
عايزين يمشطو الانقاذ بي قملا ويرجعونا في الاقاليم تاني تحت وصاية المركز وبالتعيين والمحاصصة وكل الكمونية العملوها في السبعة شهور دي وتجاوزو به اتفاقية نيفاشا ودستور 2005 هي اعادة تدوير الدولة المركزية الغبية
و18 ولاية فالصو تشرزم وتفكك ما تبقى من السودان ولا مشورة شعبية ولا بحترمو حاي مشارريع لاخرين الفدرالية
نحن بين وعين فقط
الدولة المركزية والمحاصصة × الدولة الفدرالية الانتخابات والشعب مصدر السلطات
وصاحب العقل يميز
https://up.top4top.net/
انا كوز جناح عشة الغبشاوي ..عشان ما يجي ربع دماغ يقك راسي...
ق ح ت لا تمثلني
****
بوست ممتاز وقبل القردة تلهو في السوق
| |
|
|
|
|
|
|
|
|
Re: البرهان قال قوله.. علي ق ح ت الرد!! (Re: adil amin)
|
| Quote: السؤال من هو ناس ق ح ت وما ومستوى الوعي حقهم |
سلام الاستاذ عادل أمين..
مستوي وعيهم يا عادل حسب تجربتهم مجتمعين زاخرة بالتجارب الديمقراطية
والنضال الثوري بشقيه المدني والعسكري في مناهضة الدكتاتوريات الثلاثة
اللي حكمت السودان وما تزال.
وصف آبي أحمد ليهم علي لسان البرهان كهواة سياسة أو ناشطين بالكثير . فيه
من التقليل قد يحصل حد الفضيحة. معقولة زوول كدا ردّ مافي!!
وكمان أديس إحتضنت مفاوضات الحركات مع القوي!! عجبي!!!
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
حسب ما قيل إنه المفاوضات مع العسكر ح تستأنف يوم الثلاثاء
لحسم ملف الوثيقة الدستورية ووضع النقط فوق الحروف.
الغلاء الطاحن والفراغ السياسي الحاصل خلق حالة أحباط
كبير في الشارع وجولة المفاوضات ح تكون فوق صفيح سااااخن.
مطالب الشارع معروفة ومحفوظة والثقة في قوي الحرية والتغيير
بتحقيقها كبيرة.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
الحبيب معتصم .. يبدو ان المجلس العسكري الانقلابي
لديه الكثير من الامور لخلط الأوراق ..
قبل ساعات ورد بأن هناك خلاف ايضاً .. المجلس العسكري
أن ق ح ت قد أخل بالاتفاق حول (( قضية الجنسية المزدوجة أبرز نقاط الخلاف،
حيث تراجعت قوى الحرية والتغيير عن شرط عدم حصول أعضاء مجلس الوزراء على جنسية أخرى،
وهو ما وقعّت عليه في الوثيقة السياسية.))
يبدو أن المجلس العسكري بدأ في أظهار حالات وافق عليها ق ح ت في مرحلة الضرورة
الحبيب معتصم .. نعم على ق ح ت اصدار بيان واضح وصريح .. لنعرف ماذا يجري
بالضبط .. يبدو أن المجلس والحكومة العميقة لديها اهداف بعيدة ..
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: علي عبدالوهاب عثمان)
|
Quote: أن ق ح ت قد أخل بالاتفاق حول (( قضية الجنسية المزدوجة أبرز نقاط الخلاف،
حيث تراجعت قوى الحرية والتغيير عن شرط عدم حصول أعضاء مجلس الوزراء على جنسية أخرى،
وهو ما وقعّت عليه في الوثيقة السياسية.)) |
اخونا علي غبد الوهاب سلام . .
النصيحة هنا الغلط راكب ق ح ت من الاول موافقين ليه !
بغض النظر عن الرأي في قصة الجنسية المزدوجه صاح ولا غلط لكن انت اتفقته ووقعته . . خلاص .
الظاهر في ناس مؤملين في الوزارة وما عايزين يفكو الجنسية التانية . .
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mohd Ibrahim)
|
كويس يا محجوب انك انتبهت لموضوع توقيت اللقاءطبعا يا معتصم اللقاء دا تم في 27 او 28 يونيو و كان استباقا لمليونية 30 يونيو التي حاول ان يخذل الناس عن التفافهم حول الحرية و التغيير فيها ويبدو انهم كانو مراهنين على فشلها ولكن اسقط في يدهم
وكانت نتيجتها المعلومة طبعا
هذا اللقاء و بالتفاصيل المذكورة فيه نشر في كل الصحف و الواثع الاسفيرية في حينه
ما فعله بقال الذي تجاهل سؤالي عن التوقيت في بوسته هو اعاد نشر التفاصيل منشوبة لعثمان ميرغني في مداخلة في بوست على صفحة مشبوهة في الفيس اعتقد ان لبقال علاقة بها
ومن هناك - من مداخلة بقال - انتشر البوست في الاسافير و نشره واصل علي في تويتر و هذه غريبة على صحفي نابه مثل واصل علي
المهم لبقال غرض ومرض لا يخفيه في النيل من الحرية و التغيير بل و الثورة في رقبتها بعد ما يبدو انها تسببت في ايقاف النقاطة!!
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: محمد البشرى الخضر)
|
العزيز عاصم سلامات..
| Quote: المجلس العسكرى مستمر فى اطلاق الاتهامات من العيار الثقيل سواء مباشره او عبر اعلامو تصور ان يكون ضمن الحمله الاعلاميه الشرسه ضد الثوره تقرير عن تخوين واتهام بالعماله لرموز من الحريه والتغيير تركيزا على عمر الدقير. |
مجلس الكيزان إتهم قوي الحرية كثير جدا بعدم الجدية في التفاوض
(حسب وجهة نظرهم) وإعلامهم طوالي في إستنفار لضرب مصداقية
القوي دا حقيقة. بس كمان لما تجي من راس المجلس في مقابلة كاملة
(ما تصريح) دي تقرأ حقائق ما إتهامات يا عاصم. إتهام لما اقول ليك
أنت ما جادي , لكن لما أقول ليكم (انتو كضابين) وادعمها بدليل علي
مواقفكم وانتو شلة ومافيكم زول يرد علي إدعائي ببقي حقيقة.
دا مصير بلد ما شراية عربات يا عاصم.
Quote: حيث تراجعت قوى الحرية والتغيير عن شرط عدم حصول أعضاء مجلس الوزراء على جنسية أخرى،
وهو ما وقعّت عليه في الوثيقة السياسية.))
|
استاذي العزيز علي عبدالوهاب عثمان سلام وتحايا ناضرات..
قوي الاعلان ما مرتبين وشغلهم هرجلة بكل أمانة.
| Quote: ناس برهان وكباسي ديل لايستحقو عناء الرد .. |
محمد ابراهيم سلام..
المرة دي كان مفروض يردوا..
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
الاخ محمد سلامات..
Quote: ومن هناك - من مداخلة بقال - انتشر البوست في الاسافير و نشره واصل علي في تويتر و هذه غريبة على صحفي نابه مثل واصل علي
|
أنت كدا يا محمد مسكت في البردعة وخليت لي الحمار..
ما المهم أنه متين انتشر واعيد نشره المهم هنا رئيس المجلس
قال وفد القوي كضابين و آبي أحمد قال هواة ونشطاء ما سياسين
محترفين (خبرة ومسئولية). يفرق ناشط من ممثل حزب..
لا سمعنا آبي أحمد نفي لا شفنا القوي إستنكروا..
المهم.. الليلة بدأت المفاوضات تاني وسط صفيح سااااااخن
غلاء في الشارع وموت أطفال بالجملة في الابيض.
مسئولية تاريخية قدامهم والشارع مترقب.
قرفنااااااااااا.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: محمد البشرى الخضر)
|
Quote:
الحمار دا حايم ليه شهر يا معتصم وبعده كانت تلتين يونيو الغيرت الكثير من الامور و اعادتها لنصابها
في حينه لم يتوقف احد في ترهات البرهان و يهتم بها فلم سنهتم بها الآن ؟؟ |
30 يونيو كانت عند التجمع والقوي اسمها مواكب الشهداء وعند الشارع قال
مليونية الترحم علي شهدائنا وبالمرة إعادة البردعة للحمار.
الاهتمام الأن لانه يا محمد عرفنا كيف المجلس علي الاقل بنظر علي
الهواة والنشطاء ديل الكضابين علي شارعهم من زواية المجلس.
قدرنا عرفنا ليه العسكر بتصعلقوا علي المفاوضين رغم أنه الشارع
واقف الف أحمر في قضاياه. كنا بنستغرب كيف القوي وراءها
كل الدعم الشعبي والثورة وثوارها والمفاوضين مااا في نفس قوة
وعزم الشارع. العسكر قدروا يفصلوا بين الشارع كقوة
بخافوا منها والمفاوضين. قالوا طلّعوا مليون مليونية طالما دا مستوي
فهم المفاوضين وقواعد انطلاقهم الحزبي.
فهمنا علي الاقل أنه عدم الاحترام لمقدرات
القوي التفاوضية قابلها تنازلات كبيييييرة وكثييييرة أقلاها بس
وضعية الدعم السريع الليلة في الدستورية يا محمد يااااخ.
الليلة بدأت المفاوضات وقدامهم مسئولية تاريخية وشلالات الدم
جارية تحت رجولهم. يا أوفي عهدهم بالشارع يا سقطوا مع
المجلس.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
يعني يا معتصم لم تعرفها في وقتها, طيب ما سالت نفسك عن غرض بقّال وهو المناصر للانقاذ سابقا و الآن للمجلس العسكري من اعاة النشر في هذا التوقيت!!
سيبك من بقال ما لاحظت التكتيك الجديد في التخذيل عن الحرية و التغيير و المهنيين المتبع من بعض مشبوهي المجلس ناس تراجي وذو النون الحرق لساتك قدام مقر التجمع و لايف احمد الضي الاتهم قحت بالعنصرية حتى في إهتمامها بالجرحى و الشهداء!!
يا معتصم علينا ان نتعلم القراءة وراء السطور و السؤال عن صحة واسباب كل ما ينشر و حتى التوقيت, المعركة صعبة ومع خصم لا يتورع عن استخدام اقذر الوسائل و تاجير أحقر الارزقية
لم نصل لهذه المرحلة إلّا بوحدتنا و لنخرج من المأزق الحالي علينا الحفاظ عليها
نقد التحالف و المهنيين أمر مشروع لكن النقد شيئ و الضغط و التخوين و الهجوم أمر آخر
في النهاية عدونا ليس التحالف و إن أخطأ وإن أخفق, عدّونا المجلس ومن وراؤه من ثورة مضادة وبقايا المؤتمر الوطني.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
انا يا معتصم لم اقل السكوت على الخطأ او الغطغطة, بل العكس, النقد الايجابي و البناء هو المطلوب
لكن يجب التفرقة بين هذا النقد وبين خدمة اجندة الثورة المضادة التي تريد كسر وحدة الشعب ووحدة قحت التي هزمتهم
موضوع البوست ربما لم تنتبه لكونه يخدم هذا الخط بغير قصد منك
بالنسبة لموضوع الخوف ما فهمت قصدك بالضبط مم أخاف, لكن خليني اقول أنا من ماذا أو على ماذا أخاف, اولا اخاف على ضياع دماء الشهداء و اخاف أكثر على استشهاد المزيد
كيف لا تضيع هذه الدماء العزيزة؟ الخطوة الاولى استلام الحكومة المدنية صاحبة الولاية على القضاء و النيابة حتى لو تحت حكم مجلس سيادي يرأسه عسكري!
ما هي الوسيلة المتحة الآن و الأقل كلفة لاستلام الحكومة المدنية, حتى الآن ليس أمامنا سوى التفاوض!
هذا ملخص رأيي و خوفي
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: محمد البشرى الخضر)
|
Quote: لكن يجب التفرقة بين هذا النقد وبين خدمة اجندة الثورة المضادة التي تريد كسر وحدة الشعب ووحدة قحت التي هزمتهم
موضوع البوست ربما لم تنتبه لكونه يخدم هذا الخط بغير قصد منك
|
حسب نظرة الشخص لاي مادة يقرأها , ويأولها حسب مساراته وإتجاه رياحه
أو حسب هواه و مما فهمه أو أتخيله من بين سطورها.
موضوع البوست يا محمد فيه إتهام بتهافت قوي الاعلان علي المشاركة
وتقاسم السلطة مع العسكر. كيف؟ هاك:
قوي الاعلان إتخلت عنها وثيقتها( وزراء+٦٧٪+سيادي مدني). بعد العصيان الناجح.
قوي الاعلان وافقت علي التفاوض علي وثيقة اثيوبيا (وزراء+٦٧٪ 7+7+1) بعد المجزرة
قوي الاعلان وافقت علي دمج الوثيقتين في الاثيوافريقية (وزراء - 5+5+1 من غير تشريعي) بعد المليونية.
عصيان مدني ومجزرة ومليونية وقوي الاعلان تتنازل. جبت حاجة من عندي؟؟
هل الكيزان بجهلوا دا؟؟ هل الكلام عن إنه دا غلط بخدم الكيزان؟؟
البرهان قال الناس ديل جاريين وراء سلطة وبكذبوا علي الشارع!!
انت فهمت شنو من الفوق دا كووووولو؟؟؟؟ اصفق ليهم إنهم بقلعوا في الشراكة؟؟؟؟؟ أسكت؟
قوي الاعلان قالت ما ح تشارك في الحكومة لكن أضافت شخصية حزبية وزادت واحدة تاني!!
البرهان قال الناس ديل بعطلوا في الاتفاقيات للمحاصصة الحزبية!!
البرهان قال آبي أحمد قاليهوا ديل نشطاء ما سياسين! أنت قولك شنو؟
وثيقة سياسية اختلفوا في التوقيع عليها في بعضهم!
وثيقة دستورية كولها ثقوب وبتكرس الآلة الامنية والجيش في يد العسكر
والدعم السريع خارج السلطة وكيان قائم بذاته من غير قانون ينظمه!!
دا موضوع البوست يا محمد..
الشارع ما اتأثر للكيزان كلام ورصاص يا محمد. بدفع كووول يوم.
الشارع بسخر من إنقلابات الكيزان وبحلل كمان ما وراءها ولا هاميهوا.
الشارع بسخر من حميدتي وشكر دعمه.
الشارع متقدم علي قوي الاعلان والكيزان و مجلسهم باميــــــــــــال.
----
قصدت بكلمة (بتخاف) هي حرص أكثر من اللازم منك لدرجة الواحد
بتساءل عن قلمك المعهود في المصادمة وقول الحق.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
احداث الابيض أعادت الكرة تاااني لقوي الحرية والتغيير وتماسك
الشارع وتمسكه بالسلمية حتم علي القوي رفع سقف المطالب
وإجبار العسكر للعودة للتفاوض وحسم ملف الوثيقة الدستورية.
التأخير في العودة للمفاوضات يخدم العسكر زي كل مرة
تمت فيها كارثة وفظاعة في الشارع حولها المجلس العسكري
لصالحه.
| |
|
|
|
|
|
|
|
|
|
Re: البرهان قال قوله.. علي ق ح ت الرد!! (Re: Mutasim Idris)
|
نعم التفاوض هو الطريق الوحيد للخروج من الازمة السودانية
بكل تعقيداتها , لكن علي ماذا التفاوض هو السؤال المهم.
للشارع مطالب لن يتنازل عنها ولن يرضي بنصف ثورة.
القصاص ووضعية قوات القتل السريع تصدرت المطالب وعلي
وفد التفاوض إدراك مقدرة الشارع علي قلب الطاولة علي العسكر
وإسقاطهم عبر الوسائل المشروعة.
دفعت عروس الرمال أغلي مهور الثورة وأعادة المشهد بكامله
لما بعد مجزرة القيادة العامة وعلي الحرية والتغيير الاستفادة
القصوي من ضعف المجلس التفاوضي هذه المرة.
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Mutasim Idris
محمد نور عودو
منتصر عبد الباسط
Asim Ali
Mahjob Abdalla
adil amin
علي عبدالوهاب عثمان
عمر سعيد علي
Mohd Ibrahim
محمد البشرى الخضر
فيس بوك
تويتر
انستقرام
يوتيوب
بنتيريست