|
|
|
 Re: اقتراح عملي للجنة اعادة المفصولين (Re: MOHAMMED ELSHEIKH)
|
يعني بدل توزيع استمارات ورقية لتعبئتها بواسطة مستفيدين
اغلبهم خارج السودان
اعملوا موقع محترم لاجراء كل الاعمال المطلوبة والناس تقدر تتابع المطلوبات والاخبار والقرارات
من اي مكان في العالم
يعني كما يقول صديقي الفحل / ابو ظبي
اعملوا web site
صعب دا يا رشيد؟
انا شخصيا متضرر وماممكن امشي السودان عشان اعبي فورم
او افرغ احد الاقرباء المشغولين بمشكلاتهم الخاصة ليتابع لي اموري.
| |
  
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
عليك الله يا هندسة الكلام دا صاح؟
هم المفصولين معظمهم خارج السودان.. و حتى ال فى الداخل يعنى الزول يدور عربيتو عشان يملأ فورم.. ؟؟ قصة و حكاية.. قال حكومة كفاءات ههههه
دا و لا يحتاج ويبسايت.. تطبيق على التلفون بس. الناس تنزله و تملأ الفورم و ترسله و الزول قاعد قدام ست الشاى فى المحطة الوسطى. لو الراحل الطيب صالح بيننا اليوم لقال من أين أتى هؤلاء.
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
انا طبعا عندي قصة مع لجنة البشير بتاعت 2007 لو تتذكروها
حسب القرار الجمهوري آنذاك وبعد تردد ونصائح من المعارضة ذهبنا وعبينا الفورمات بتاعتهم
انا اخترت تسوية المعاش بدل العودة للوظيفة (كنت في إجازة).
بعد شهرين اتصل بي واحد من سكرتارية اللجنة قائلا: تم استيعابك في العودة للعمل لانو اللجنة رأت انك مازلت (صغيرا) في السن (اول حاجي رفع معنوياتي طبعن)
قلت ليهو ياخ ماعايز انا هنا ملتزم بعقد وما بقدر اجي السودان.
المهم عدت بعد فترة للسودان ووجدت خطابي جاهز للسفر والعمل بمحطة توليد سنار مهندس وردية (15 م.و.) وانا اعمل في وظيفة اخصائي توليد في الشركة السعودية للكهرباء قطاع الجنوب( 5000 م.و.) !!! امعانا في الاذلال .
رفضت الأمر وقلت اني سوف اتظلم وفعلا رفعت تظلمي لتلك اللجنة عن طريق إدارة الهيئة القومية للكهرباء .
كان الرد: بما ان المذكور تغيب عن استلام وظيفته لمدة 45 يوم فيعتبر قرار إعادة التعيين لاغيا
حاولت إعادة الشكوي: قالوا خلاص اللجنة تم حلها وماعندك طريقة الا" تشتكي على الله" بهذا اللفظ رد على مدير الموارد البشرية رحمه الله.
قمت اشتكيت على الله في عام 2007
وحدس ماحدس عام 2019
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
محمد الشيخ ياادروبى
انابفكر اعمل لك انت وصنوك
ابن اختى القمر عبدالله حياتى محطة فى
اربجى على قرار محطة برى بس محتاجك
منكم لشوية ضمانات
شيك مضمون بمبلغ تلاتين الف دولار لكل منكما
تقرير من مستشفى الزيتونة للحالة الذهنية لكلاكما
يحدد فيه متى بدأ الزهايمر ينخر كهرباء زاكرتكم
وبجيك لباقى التفاصيل عينو خير
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
مرحب بالاخ طه ع الله من امريكا وتعليقه على البوست
ومرحب بكل الزملاء المفصولين من نواحي الدنيا علي:
mhdelsheikh@gmail .com
السلام عليكم
الاخ عبد الله فعلا اللجنه المكونه في
امر المفصولين تعسفيا لم تضع اعتبار
لي المفصولين خارج السودان
وركزت علي المقيمين بالداخل حسب اجرات اللجنه تقدم داخل السودان
وهذا ء لايتيح الفرصه لي المقيمين
بالخارج وعليه اثمن اقتراحك لي اللجنه
ب عمل web site ومد فتره التقديم
واتمني من الاخوه المقيمين بواشنطون
محاوله الاتصال بالسيد حمدوك
وتوصيل المعلومه
ان امكن ذلك
USA-NC
WALI
كتب الاخ طه :
السلام عليكم
الاخ محمدفعلا اللجنه المكونه في
امر المفصولين تعسفيا لم تضع اعتبار
لي المفصولين خارج السودان
وركزت علي المقيمين بالداخل حسب اجرات اللجنه تقدم داخل السودان
وهذا ء لايتيح الفرصه لي المقيمين
بالخارج وعليه اثمن اقتراحك لي اللجنه
ب عمل web site ومد فتره التقديم
واتمني من الاخوه المقيمين بواشنطون
محاوله الاتصال بالسيد حمدوك
وتوصيل المعلومه
ان امكن ذلك
USA-NC
WALI
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
محمد الشيخ
شوف ياعجوز انا طوال السنوات الماضية
بهظر وبضحك معك بعتبارك احد تلاميذ القمر
ود صفية اختى اتاريك دفعته وابو الريش بالانجليزى
الحضر سنة زيارة الشهيد محمود لاربجى من دفعتكم
انكربو انا جايكم ياعجزة يامسنين انا اغتربت برفقة والدى لهما
الرحمة ووقتها كنت طفل غرير مش زى بتاع حب الكلاب
تبا لكما حرقتو محطة برى وكمان جاين تحرقو ثورتنا الشبابية
ودايرين تعودو تانى لماضيكم يازهايمر يامخربين
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: بدر الدين الأمير)
|
رحم الوالدة صفية رحمة واسعة
وامد الله في عمر الخال العزيز بدر
وقد قيل : الخال والد
——————
اها وصلنا وين
جماعتك اللاحقينق ديل عملوا الوب سايت ولا لسع؟
انت ورهطك ودفعتك فاكرين الكمبيوتر دا عملوه لسودانيز اونلاين بس
ياخ كلمهم قول ليهم انا بي حالتي وعمري دا خشيت العولمة
يا جماعة اتعولموا عشان ما تضيعوا حقوق الناس
والله اقول لك
كلم لبيد يشرح ليهم
ما بتقدر علي التلتلة دي
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
ود الشيخ يازهايمر
قمنالكم بالواجب
اتصلت بمكتب حمدوك اسال عن صديقكم واستاذكم
فى مدرسة الكادر الشفيع خضر لقيتو خرج
كباقى الخوارج حولونى للخرجوهو حاتم قطان
فكان رده ينظر ويفاد
بس سالنى سؤال تعسفى
ماهى علاقة محمد الشيخ بحمد مدنى الشيخ
قلت لوماخاب ظنى السفروق
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: بدر الدين الأمير)
|
وأنا ذاتي مفصول وفي إنتظار الرابط الإلكتروني يا ودالشيخ !
بعدين يا ودالشيخ بدر الدين ولد صغمبوتي في عُمر الحبوبه سلمي الشيخ وجدنا الكبير السني دفع الله !
طبعن يا بدرو حأكتب بوست بمناسبة مرور عام للثورة السودانيه ~ بوست أضلاعه إنت ودكتور مسعود ودكتور معاويه ~ وحسان علي أحمد وفيصل محمد صالح والمدعو يونس محمود ! أمسك الخشب يا دينق !
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: abdalla elshaikh)
|
مرحبا العزيز عبد الله
بالله دا دفعة الاستاذة سلمى سلامة؟
وانا دفعة اخوها السغيروني خالص حذيفة الشيخ!
بالله ماتدخلو مع الناس ديل
لاقدرو لا لحم سدرو
شوف ليه جيهة من ناس البروف شمو وانت طالع.
بس ايدك معانا في الجرايد لموضوع الرابط دا
ولا اقوم ازعل اكلم حسين خوجلي يشيل حال اللجنة
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: طارق بخيت)
|
تعرف يا بدرو نحن وناس ودالشيخ دا قابلنا قرارات الفصل للصالح العام بسخريه و مرح عبثي بهذه القرارات لأنها كانت عباره عن تبرئة للذمه وقلادة شرفٍ الكل كان يتمناها ! ومن هذه الطرائف كانت كلما تطلع لسته بالإحاله للصالح يبتدرها الصحاب وإسمي يتصدرها ولكن حينما تظهر أللسته الحقيقيه يسقط إسمي الأمر الذي وضعني في موقع حرج مع الزملاء المفصولين ! فكان صديقي صلاح الزين ود أبوقته دائم السخريه من موقفي المحرج هذا !
ذهب الشاعر محمد عبدالحي للضفة الأخري من النهر فأقام له ناس فرّاج الطيب تأبيناً مسيخاً وعلي عكسهم إقمت له إحتفالاً يليق بموته فالشاعر لا يموت وكان ذلك بقاعة الشارقه في حضرة عقد الجلاد والسمندل ورسومات الطاهر بشري وصلاح سليمان و حضور طاغي لأصدقائه ومن بينهم علي المك والذي إنتوي بي جانباً وقال لي بصوته الباص داك ~ بالله يا كارلوس لامن أموت أعملوا لي حفله كهذه فأنا أكره عبارات كان الفقيد طيّب و دمث الأخلاق !
ألمُهم ! تاني يوم إستدعاني أستاذنا مكي سناده لمكتبه و كان وقتها مديراً لمصلحة الثقافة بأن وكيل الوزاره أمين حسن عمر قال له أما تزال مصلحة الثقافة تعج باليساريين ؟ فعرفت وقتها أننا سنحال للصالح العام ! وبالفعل بعد إسبوعٍ دلقوا برميل مصلحة الثقافة أرضاً فبانت لهم صارقيلات ما أنزل الله بها من سلطان ~ ناس كارلوس و باردوس و ناديه البنا والطاهر محمد صالح والقائمة تطول !
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: طارق بخيت)
|
شكرا للأخ طارق علي العودة للمنبر منةخلال هذا البوست ونتوقع مزيدا من الاسهامات
لك تحية وتجلة
الاخوان في دي سي لو لاقيتو حمدوك كلموه للمساكين ديل
معقول زول في "وادي الدواسر" يسافر الرياض للسفارة عشان يعمل ليه توكيل لموضوع ممكن ينجزه بكبسة زر؟
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
عبدالله ياود الشيخ
انتو اخير احالوكم لصالح الكيزان
الظريفة استقالة صديقنا مسعود وخالد الكد
وقتها كانو مدرسين لغة انجليزية بجامعة ام درمان الاهلية
ومدير الجامعة أبوزيد بتاع امن نميرى المهم جات التعليمات
من جهاز الامن بنهاء خدمات مسعود وخالد الكد قام أبوزيد
جاب مسعود وخالد قام اخبرهم انه قبل استقالاتهم وعليهم
استلام مستحقاتهم وطلع طوالى من المكتب قام خالد الكد
قال لمسعود الجماعة ديل ماقصرو معانا حتى استقالاتنا قدموها لينا
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: بدر الدين الأمير)
|
في اثنا تواجدنا بمعتقل كوبر كل يومين تجي مجموعة من خطابات الفصل للصالح العام و الجماعة تضحك وتبارك
من شلتنا كان المرحوم مصطفى ونطلق عليه مصطفى السمين حيث كان ماشاء الله اوفر ويت
في احد الأيام وصل خطاب احالته من بنك الخرطوم
جاء لقاء صاحبنا أيضا من ناس مصنع سكر كنانة اسمو عماد ورجل ظريف الكلمة
مصطفى قال لي عماد :" الليلة ناس البنك (ما) شالوني" ما للتوكيد
عماد رد عليه : " وبالله لقو ليهم كرين وين ؟"
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
شكرا للأخ طارق علي العودة للمنبر منةخلال هذا البوست ونتوقع مزيدا من الاسهامات
لك تحية وتجلة
الاخوان في دي سي لو لاقيتو حمدوك كلموه للمساكين ديل
معقول زول في "وادي الدواسر" يسافر الرياض للسفارة عشان يعمل ليه توكيل لموضوع ممكن ينجزه بكبسة زر
المهندس محمد الصباحات النواضر ولك الشكر , ونتمى ان يشارك الاخوان فى دى سى لو فى رفع هذا المقترح لحمدوك
وتجينا البشريات بالاستجابة للنداء والمقترح .
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: MOHAMMED ELSHEIKH)
|
محمد ود الشيخ والقمر وصفية
وعبدالله ود الشيخ
انا فترت تب من عتالة هذا البوست
ياخى خلاص ارجعو وانا بعوضكم
بديكم فدانين من جنينت الوالد له الرحمة
وببنى لكم عريشة بين ضريح جدى الشيخ حمد ود أبوزيد
القلب البنية وليد وضريح قاضى العدلة دشين على منحنى
النيل فى اربجى وقصة القلب البنية وليد يسال
عنها القمر ود صفية وعلى فكرة يامحمد الشيخ
هل تعلم ان صاحبك السبعينى القمر هو ولد سبعة
شهور بس امو كانت بتنده جدى لابى الشيخ حمد ود ابوزيد البصيلابى
ان يعيش ابنها البكر واهو عاش الى ان بلغ السبعين
اعملو حسابكم انا ود شيوخ وناوى عمدكم
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: بدر الدين الأمير)
|
بدرو !
فدانين و معاهم ديك وجداده وعنقريب عشان نتفرج علي ألعشق العبثي بين الديك والجداده !
يا ود الشيخ إنت لجنة المفصولين ما وضعت في الإعتبار بأن معظم المفصولين طاش بيهم الدرب في فيافي الهجره البعيده ! فما معني الخميس آخر يوم ؟ أصلو هي لجنة إختيار ؟
| |
|
|
|
|
|
|
|
|
|
Re: اقتراح عملي للجنة اعادة المفصولين (Re: abdalla elshaikh)
|
عجوز غابرين ما تتعب نفسك ياخ السودان بيسعنا انا وانت والقمر اصلوا النيل قاعد راجينا هناك .
بعدين ما تخاف علينا انا جدي موسى مورثنا جامع وكنيسة والله صحي
الجامع للقيادة الروحية
والكنيسة للاقتصادية . كيف؟؟
الساقية "2" أبو قرون تحتوي على كنيسة اثرية ومزرعة الوالد جزء لذا اسمو" مشروع الكنيسة".
لذا القريشات البتجيني من التعويض ( ايوة التعويض , ناس المدمرة كول احسن مننا؟) بنعمر بيها " الكنيسة"
عبد الله ياود الشيخ احوالك ياخي
سلام جاك
حسن اخونا مرة مشى الزراعة وجانا عمنا من بعيد وسأل " وين الحسن ماني شايفو؟"
اختنا قالت ليه "حسن مشى الكنيسة"
الراجل اخد ضحكتو وقال ليها :" الحسن متى بقى مسيحي"
شكرا على دعمكم للبوست والمثل بقول المكتولة ما بتسمع الصياح
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
MOHAMMED ELSHEIKH
Abureesh
بدر الدين الأمير
abdalla elshaikh
osama elkhawad
فيس بوك
تويتر
انستقرام
يوتيوب
بنتيريست