بالصدفة اكتشفت هذه الفاكهة قبل خمسة سنوات ؛ كنت اظنها طماطم لسنين طويلة.
الحصل :- كنت فى احدى البقالات العربية فى كالقرى برفقة الدفعة سلطان ؛ فجاة التفت إلينا رجل يبدو انه لبنانى واقترح نجرب فاكهة كنت نقف بجوارها ؛ وافقت على الاقتراح و اشتريت صندوق به سته قطع كبيرة جدا . مشيت البيت و اخدت قرمه و عييييك وقعت فى حبها ..بقيت انتظر الشتاء مخصوص عشانا . معظم الاصدقاء لا يعرفونها ؛ اهديت واحدة لصديق إثيوبي ؛ استغرب فى البداية و بعد داك عيييك دخل الماسورة و بقى مدمن مثلى.
اى زول لم يجربها بعد لازم يجرب ؛ اهم شء اتاكد انها ripe و معسله لانها لو نيه تبقى تافهة جدا.
التين الكاكي أو الكاكا أو القاقا أو الخرما أو بيريسيمين (بالإنجليزية: Persimmon) معروفة لدى قدماء اليونان بـ " ثمرة الآلهة ".[1][2][3] اصلها من اليابان وتزرع في شمال وشرق قارة آسيا في درجة حرارة لا تتجاوز 27 درجة مئوية تتميز بطعمها الحلو والرائع تزرع في جميع قارة آسيا وفي بلاد الشام وتركيا وفي الشمال الغربي للبلاد التونسية (بمنطقة "وشتاتة" ولاية باجة) و يسمى بالـكـريـمــة ولها أنواع كثيرة تختلف في الحجم والذوق.
11-19-2019, 07:43 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
ناذر خليفة والله ليك وحشة . صناديق شنو يا ناذر ؟ ياخى لو إنت عايز صندوقين تلاتة أطلب كونتينر عشان النصرى يتلافا البلا بالبليلة ويقوم يرسل الصندوقين تلاتة . دى تكتيكات إتعلمتها من المدام , وهى تكتيكات ناجعة جدا . خليك ثقيل وعلي سقف طلباتك ولازم تتعلم من نظرية الفاتح عزالدين الأقتصادية (نظرية تعلية السقف و رب رب رب ) ولمن النصرى يقوم بواجب الأرسال ختنا معاك فى الصورة .
11-19-2019, 09:01 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8845
سلام يا النصري وأنا أعرفها كيف معسلة ول ما معسلة؟ قبل كم سنة كدا اشتريت منها كيلو او كيلوين ما متذكر اكلت منها قدر الضواقة بس ورميت الباقي وقررت تاني ما اشتريها. هسه جاني خاطر وقلت يمكن الاشتريتها ديك ما كانت معسلة حاقوم أجربها تاني لو ما طلعت جميلة بدفعك تمنها.
11-19-2019, 09:40 AM
محمد مجيدو
محمد مجيدو
تاريخ التسجيل: 07-06-2013
مجموع المشاركات: 2392
اشتريها يا محمد سيد احمد على مسئوليتي أنا دة .. وما غالية بالمناسبة طعمها أقرب حاجة ليه المانجو لكن ما فيها الحموضة الشديدة ولا صكة السنون بتاعة المنقا يا حافظ المعسلة حمراء وعنوان البووست صحيح 100%
حبيبنا النصري .. تحياتي .. توافق غريب جداً هي الكاكا الايامات دي رخيصة جداً مقارنة بباقي المواسم الكيلو في أسواق بنده (4-5) ريال من أجمل الفواكه النوع المستوي مرة يمكن تسلخ القشر الخارجي منتشرة في اسواق السعودية بكثافة هذه الايام مع التحية الحبيب النصري
11-19-2019, 10:05 AM
جمال ود القوز
جمال ود القوز
تاريخ التسجيل: 01-25-2013
مجموع المشاركات: 5925
غايتو يا نصري الدعايات والترويج عندك .. كاكا شنو كمان .. العامل ليها قومة النفس دي .. أقل من عادية ولا سمحة ولا حاجتين ..... لكن النصيحة لي الله أخير من أم العفين الجيت روجت ليها ديك .. حدك قرمة وااااحدة ماتعرف تبلعها ولا تتفها شدة ما ريحتتها عفنة .. الريحة تكابس خيشومك قبل ماتبلع ذااااتو ...
11-19-2019, 10:22 AM
Mohd Ibrahim
Mohd Ibrahim
تاريخ التسجيل: 01-19-2004
مجموع المشاركات: 2234
واللة يالنصري عندنا ناس كتار قاعدين في الدول الاوربية دي ..لما تتكلم معاهم تحس انهم لسي قاعدين هنا في الضهاري (علي راي الامير توفيق) ..وتلقي شايل معاو ويكة وبلح وفي حالة عزلة تامة داخل الغربة ..لكن تفاعلك واندهاشاتك وتجاربك البتنقلها هنا بتحسسنا بتفاعلك الايجابي و انو الدنيا دي جميلة ومختلفة وتستحق العناء..
11-19-2019, 10:23 AM
mohmmed said ahmed
mohmmed said ahmed
تاريخ التسجيل: 10-25-2002
مجموع المشاركات: 8845
من زمني الشافع فاكهتي المفضلة كانت الشمام لكن في الثانوي ارتبطت عندي بالحوادث .. كلما آكل شمام بالليل بصحى ملجّن قدر ما حاولت أنفي التهمة من الشمام كل ما يجي موسمه بثبتها في نفسه أكتر بقيت باكل منه قطعتين بالكتير لحفظ السلامة الشخصية :) أيام الجامعة مشيت لجماعة بلدياتنا في بيت عزابة بعد نهاية اليوم الدراسي مباشرة قلت أتغدى معاهم واتراوح على داخليتي .. لكن الونسة جرتنا وحلفوا علي أبيت معاهم وناسنا حلافييييين ولواييييق جابوا لي جلابية أنوم بيها وانا كزول حساس وخجول ومسكين - والله جد - أبيت البسها وقلت ليهم نحن طلاب داخليات كوبيين عادي ننوم بالهدوم ونمشي بيهن الجامعة بعد اتعشينا جاء واحد كان مافيش وجاب معاهو شمامة وانا أعاين فيها زي الداير يدوني حقنة .. داير أقول ليهم جيبوا الجلابية لكن خجلت أها ختوها كدة أكلت قطعتين وداير اغسل يدي الحلايف اشتغلت .. ما قلت ليكم لواييق! ما خلوني أغسل يدي إلا بعد آخر قطعة .. رقدت نمت زي الساعة 12 بالليل .. ثم حدث ما حدث وحاتكم الساعة 2 بالليل دخلت الحمام غسلت الهمبوبة وبقيت تيوبلس .. الكفر البراني كانت حمته خفيفة حاولت أنفض البتاع الصوت بقى عالي بصحي الناس بقيت أهبب براحة براحة لقيت الشغلانة ما بتبقى .. شريتو في الحبل وبقيت مصنقر في السرير ممحن منتظره العالمين كلها نايمة في الحوش يعني كان واحد صحى بكتشف آثار الجريمة وانا زي طبعاً خجول وحساس عارفكم ما مصدقين لكن وحاة الله جد أها فرد صنقيرة من 2 بالليل لحدي آذان الصبح بس أول واحد اتحرك داير يصحي ختفت البتاع وجريت الحمام ومن ديك تاني الشمام حرمته حتى بعد اتزوجت بس كل ما أشوفه أتذكر منظري الجيعااااان داك في بيت العزابة وقلبي ياباهو
11-19-2019, 03:52 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
اخونا النصري سلامات ظنيتك قعادك الطويل في الغربة نساك طعم منقة كسلا الحلوة وصافي لونا وتومتي فريدة غرب القاش سكونا . والله يا النصري بعد التصور الزراعي الحصل في تجارب المنقة السودانية في جماعة زراعيين قدرو يطورو نوع اسمو شندي تو . منقة حبة صغيرة وعندها قديديم زي السنارة والله يا النصري تاكل منها في شندي الا تحلف تبيت قبلك وتترك السفر . برضو نفس الخبراء ديل انتجوا فرووت اسمو الببلو مبالغة مبالغة . تعال الزيداب شهر ١١ ياخ من البنطون يضربك اريج اليوسفي والبرتقال . يا زول عندنا حتي النجيلة ليها عطر خاص . والله العظيم فاكهتك دي هسع قدامي بجيبوها لينا من المزراعة في ثاوث كارولاينا . لكن وحاتك ولا بهوب عليها . تحياتي
نعم يا ناذر البوست كان بعنوان (القشطة فاكهة الجنة) ، دورت فيها فترة طويلة مع انها غالية لكن قاصمة الظهر لمن مشيت مرة سوبرماركت الصينيين ، ما لقيت القشطة العادية لكن لقيت واحدة كبيرة ضخمة فى حجم البطيخة وهى نوع من نفس فصيلة الفاكهة ... المهم اتوكلت على الله و شلتها و مشيت على الكاشير ، طلعتةبالوزن و الرطل خمسة دولارات ؛ يعنى تكلفتها 27 دولار ؛ اتفرزنت لبضع ثوانى ؛ معقول اشترى لى قطعة فاكهة واحدة بسبعة ووعشرين دولار ...يا زول اتوكلت و اشتريتها و عندى احساس بالذنب و تأنيب الضمير.
مشيت البيت ؛ شقيتها ؛ طلعت نيه أسوأ من التبش ؛ زعلت داير انفقع . انتظرتها يوم، يومين، اسبوع عشان تستوى ابت كله كله ..فى الاخر رميتها و كانت نهاية قصة حب استمرت ثلاثة سنوات . بس ربنا اكرمنى بافضل منها .
اقول ليك كلام ؛ اوعدك لمن اجى السودان ؛ اجيب ليك معاى كم قطعة (للضواقه). وهى فرصة نهديها لأصدقاء اخرين
محمد البشرى و محمد سيد احمد اتوكلوا على الله و جربوا النصيبة دى. و الله العظيم انا بحب الشتاء عشان الفاكهة دى . بس تذكروا انها انواع واشكال ؛ الجوافة موش فى نوع طاعم و نوع ماحلو . نفس الفكرة ؛ فى نوع من الكاكا زى الليمون تافه جدا . الاسبوع الفات اتمقلبت و اشتريت من النوع الكعب دى ؛ والله تحرق الشلاليف عديل. اضطريت ارميها. اعتقد هى سلالات لكن احسن نوع بالتجربة هى ضخمة جدا و مافيها حب seeds.
يا حافظ ؛ تكون اشتريت السلالة التافهة. المشكلة صعب تعرف الحلوة من المرة ، زى البطيخ لكن صاحب البقالة يفترض يجرب الفاكهة اول قبل بيعها . مثلا لمن القاها فى Costco بشتريها من طرف لان ناس Costco ما بيبيعوا اى حاجة قبل ان تنجح فى الاختبارات. البقالات الصغيرة (خاصة بتاعت الصينين ) ما عندهم ضمير ؛ لقوها رخيصة يبيعوها رخيصة و انت الخسران.
يا هيثم ؛ انا نفسى مرات بتمقلب و بشترى التافهة لانه صعب تفرز بين الاثنين. لكن بصورة عامة كلما يكون لونها احمر يكون احسن . بعدين كلما تكون soft زى المنقه المليانه عصير ؛ يعنى تقرب تفجخا الطماطم . الطريقة التانية تشتريها من محل محترم ما بغش الزبائن مثلCostco
غايتو نكتة المسطول والتمساح من اجمل النكات السمعتها في الفترة الأخيرة...نكتة أوسكار.... أما اجمل فاكهة في الأرض دي ما بعرفها وما أكلتها قبال كده ...المهم حاتوكل على الحي الذي لا يموت واشتري لي دستة لكن اذا لقيتها مرة ترجع لي دولاراتي على داير السنت ....
اهلا يا على ... لازم تكون رخيصة الايام دى لانه ده الموسم لكن للاسف موسم قصير. اشتريتها امبارح (المعلومة دى لناس كندا من Super Store الرطل ب 78سنت لكن النوع الصغار ، طاعم ما بطال لكن ما زى النوع الضخم الاحمر الفتاك . بس الزول احسن يعزل المستوية و النجيضه
يا ود القوز ، عندى صاحبى يقول غايتو انت لمن تدور الحاجة تطيرها السما و لمن ما تدوا تضرب بيها الواطة. انا متاكد انك وقعت فى النوع التافه من الكاكا كدى جرب تانى و اشتريها من محل محترم لا يبيع بضائع مضروبة. اتاكد انها soft و مليانه عصير و مافيها حب
محمد ابراهيم والله صدقت ؛ بالرغم ما عندى اصحاب خواجات(ماعدا عرفة الشغل و التى تنتهى بانتهاء الدوام) لكن بحاول اتجاوب مع كل شي حولى. زرت لندن لاول مرة فى فبراير وفى زيارة لمنزل احد الاصدقاء وقفت متحير فى جهاز التدفئة كنت بقارن بينه وبين النظام فى كندا و لو ما خجلت كنت سالت مليون سؤال.
بقيت ةى حاجة اقيف فيها و اتامل ههههه خليك من الحاجات الغريقة البتجيب الكلام ههه
يا عثمان موسى والله ناوى نيه ما عادية اجرب كل شي فى السودان فى زيارتى فى فبراير. وطبعا الفواكه فى اعلى القائمة. لمن مشيت كوستاريكا ؛ وقعت ليك فى موز صغار كده والله طاعم طعومية و الغريبة فيهو حبة حداقه ..مبالغة عديل .
اقول ليك كلام ..و الله من البوست ده ..فكرت اشيل كيس صغير بتاع تيراب بذور تقاوى كاكا و اهديها لمزارعين فى مناطق جبل مره ، احتمال الكاكا دى تنجح فى المناطق ديك
اوريك الحصل شنو يا احمد يسن بخصوص الفاكهة العفنة Duran
مشيت سوبرماركت جنبنا اسمه Safeway ما لقيتها ..سالت الولد الشغال فى قسم الخضروات والفواكه ؛ قال لى ما فى زبائن للفاكهة دى فى المحل ؛ المنطقة دى غالبيتها الساحقة من الهنود البنحاب السيخ. مشيت محل تانى ضخم اسمه Super Store ..لقيت الفاكهة دى كيس ؛ الرطل منها بخمسة دولارات. وزنها على الاقل تلاته كيلو؛ يلا احسب . طوالى صرفت النظر . لكن لمن نقبض بونص الكريسماس ممكن نجازف. الأيام دى غى فلس حاصل
النصري إزيك .. أنا لي قريب 20 سنة في الغربة وما عرفتها إلا قبل 3 سنة بس كنت بظنها نوع غالي من الطماطم وفعلا فاكهة لذيذة جدا ورائعة جدا النجيضة منها المعسلة غالبا لونها بكون برتقالي عديل وليس برتقالي مائل للأصفر وأهم شي لمن تجي تاكلها لازم تسلخ الجلد بتاعها زي لما تسلخ جلد البلح الرطب النجيض شديد لو أكلتها بالقشرة القشرة طعمها مسيخ شديد وبايخ جدا بضيع عليك حلاوتها
11-20-2019, 07:20 AM
محمد جلال عبدالله
محمد جلال عبدالله
تاريخ التسجيل: 06-24-2011
مجموع المشاركات: 4552
Quote: وأهم شي لمن تجي تاكلها لازم تسلخ الجلد بتاعها زي لما تسلخ جلد البلح الرطب النجيض شديد
تشيل الراس بتاعها وتضغطها من أسفل ومن الجمبات بجيك القلب بتاعها مارق جمبلغ كده طعمها لذيذ جدا وأشبه بالمنقة تاكلها وتستمتع بالطعم وحبتين تلاتة ما بكفوك والجمبك ما بتديه حيفضل باقي من عصارة الثمرة جوة القشرة ما تبقى دني وتحاول تاكلو لأنه ما حتقدر تاكله بدون القشرة ولو أكلت القشرة مساختها حتروح عليك حلاوة الأكلته.. ترميها طوالي طعمها كده زي طعم البلح الني مش مسيخ وبعمل إحساس ما حلو في اللسان والحلق؟ نفس الشي
11-20-2019, 07:48 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: ناذر خليفة والله ليك وحشة . صناديق شنو يا ناذر ؟ ياخى لو إنت عايز صندوقين تلاتة أطلب كونتينر عشان النصرى يتلافا البلا بالبليلة ويقوم يرسل الصندوقين تلاتة . دى تكتيكات إتعلمتها من المدام , وهى تكتيكات ناجعة جدا . خليك ثقيل وعلي سقف طلباتك ولازم تتعلم من نظرية الفاتح عزالدين الأقتصادية (نظرية تعلية السقف و رب رب رب ) ولمن النصرى يقوم بواجب الأرسال ختنا معاك فى الصورة .
اخبارك يا رجل . وين أراضيك ؟ غايتو النصري وعد يجيب لينا منها في فبراير .. لكن انا ما صبرت أمس دخلت لي محل فكهاني لكن للأسف ما لقيتا .. لحدي فبراير لو بقيت في السودان بضوق بتاعة نواحي كندا دي هههههه
اهلا محمد جلال نعم فى نوع لازم تطلع الجلد زى المنقه ، تكون حلو من جوه لكن الجلد تخين و طعمه مر. السلاله الذهبية تاكل من طرف. انا باكلها زى التفاح ، اقرم من طرف ..الجلد طعمه حلو جدا . فعلا مرة اشتريت واحدة بتعمل حركة (الجمبلغ ) دى😂 يعنى لازم تكون براك لانها messy جدا بتخليك تتعاور .
ياخ انا الأيام دى بغنى يا زمن وقف شوية . عشان الفاكهة دى بتختفى بعد شهرين
النصرى عاشق الفواكه ... ههههه و انا احب سلطة الفواكه .. فعلا الكاكا حلوة و طاعمة ... و انا و اولادى من المدمنين عليها و موجودة باسواق المملكة هنا كما قال حبيبنا و كبيرنا شيخ على و كذا فاكهة القشطة ...اووو روعة و قالو وقاية من البتاع الكعب داك بعيد عننا و ربنا يشفى الجميع و تتخيل يا حبيب ان فاكهة القشطة لقيتها موجودة و شايلة كمان فى بيت واحد قريبنا بالخرطوم ؟ انا صراحة ما قريت عن جوها و طقسها المناسب .... و ممكن حبيبنا بريمة يورينا السودان بلد العجائب و نحن رايحين منها ... وا مسكينتو وا بلدو بالهنا و الشفا ... وكل المودة و المحبة
11-20-2019, 04:21 PM
احمد عمر محمد
احمد عمر محمد
تاريخ التسجيل: 01-10-2013
مجموع المشاركات: 1273
برغم اهتمامي بالفاكهة وزياراتي المتكررة لشراء الخضرة والفاكهة الا انني لم اعيرها اي اهتمام البتة منَ قبل، ولا أعتقد انني كنت ساغترب منها، ولكن اليوم فعلت بعد أن اطلعت على بوستك فبادرت بشراء أربعة قطع كيلو وربع تقريبا على ذمتك، بثلاثة دولاراتَ فقط، ساقوم بتجربتها بعد الغداء اليوم ومن ثم ساقول رأي فيها، السؤال هل تؤكل ثمرة هكذا، ام تحضر عصيرا أيهما الأفضل طعما ومذاقا وفائدا غذائية.
و الله يا احمد عمر لو اشتريت السلالة الملكية تاكلها بقشرها زى التفاح . لو طلعت مره او قشرتها لازعة تعرف انك اشتريت النوع البروليتاريا.
كلما تكون زى الطماطم (تتفجخ) ومليانع عصير ، كلما تكون حلوة. غايتو دعواتنا تكون اشتريت النوع الطاعم لاننا محتاجين لمشجعين يفندوا مقولة اجمل فاكهة على وجه الكرة الأرضية. فى انتظار النتيجة
أستأذنك لأضع الفيديو التالي عن زارعة القشطة في مصر .. للحبيب بدران، طلب معلومات أضافية عن زارعة القشطة
القشطة في الأصل نبات أستوائي .. تحتاج إلي مناخ معتدل وتربة خصبة .. في جنوب كردفان تزرع عادي في المنازل مثل الجوافة والليمون .. المشكلة في القشطة في المناطق الجافة هى التلقيح .. ضعيف جداً .. لأن الزهرة تذبل في حالة أرتفاع حرارة الجو .. أو نتيجة لتقلبات الطقس .. ومما يجعل المزارع يزرعها عن طريق العقل، التعقيل طريقة مشهورة (تكاثر خضري) في زراعة كثير من الفواكهه .. هناك فيديوهات كثيرة تشرح طرق مختلفة للزراعة ... أنا ليس لدي أهتمام دراسي بأشجار الفواكه .. دا تخصص قائم بذاته في علوم الزراعة يسمى Horticulture وأتمني أن يمر أنسان متخصص في هذا المجال.
بريمة
11-21-2019, 08:05 AM
محمد جلال عبدالله
محمد جلال عبدالله
تاريخ التسجيل: 06-24-2011
مجموع المشاركات: 4552
وبمناسبة القشطة دي يا النصري بتذكر قبل 6 سنة كنت نزلت السودان وفي السوق المركزي الخرطوم لقيت بتاع درداقة خاتي قشطة وأداني ضوقتا وكانت نجيضة شديد ولينة وسكر سكر من شدة السكر الفيها تقول حلاوة هريسة .. السكر بجيك مارق كده زي حبيبات السكر العديل .. ما قادر أشرح لكن أظن الرسالة وصلت .. المهم يا زول اشتريت لي منها كم كيلو ووديتا البيت وطلعتا ما رجعت إلا تاني يوم لأني مشيت نمت عند ناس الوالدة .. المهم لمن جيت تاني يوم لقيتهم قضوا عليها قضاء مبرما لأنو جوهم ضيوف وكان معاهم شفع وحبة واحدي ما خلوها لي (وش باكي) وأنا ما أكلت غير الضواقة بتاعت سيد الدرداقة في السوق، ومنها طوالي سافرت ومن اليوم داك ليوم الليلة ما أكلت قشطة، لكن طعمها لي هسي في خشمي وعشان كده المرة دي وصيت يجيبوها لي وبكرة حا توصلني بإذن الله ..
11-21-2019, 08:06 AM
ياسر السر
ياسر السر
تاريخ التسجيل: 08-06-2010
مجموع المشاركات: 3204
فعلا فاكهة جميلة جدا جدا وطعمها اكثر من رائع انا طبعا مغرم بيها لي كم سنة كده والشي الجميل انو الأيام دي في السعودية متوفرة بكثرة وسعرها معقول وامس اشتريت لي كيلو معسسسسسسل هههههههههههههههههه يا ناذر لو ما فاطر ما تخاطر ههههههههههه اشتريها وعلى مسئوليتي ...
هل تصدق القشطة الواحدة كنت اشتريها بدولار كندى. كنت انتظر الطيارة تصل يوم الأربعاء مع فيتنام عشان امشى الخميس اشتريها. اتخيل معاى لو كل الأراضى الزراعية المناسبة لزراعة القشطة استغلت لهذا الغرض !!! ممكن نصدر للعالم كله
تعرف يا محمد جلال . القشطة دى تنفع لقعدات الونسة ؛ لانك تنقى فى اللب الابيض وسط طن من الحبوب السوداء (البذرة) اذكر ايامها كنا مجموعة من الأصدقاء معظمهم بورداب هنا (منصور المفتاح ، طلعت الطيب و معاوية المدير و دكتور عبد المنعم موسى و عبدالعظيم كودى و شهاب طه) كنا نمشى مطعم سمك هندى ، و بعد الاكل نفتح كيس القشطة ، ناكل و ننقى اللب الابيض اللذيذ و نطلع الحب و نتونس ؛ احتمال القشطة الواحدة تحتاح نصف ساعة عشان تنقى كل الحبوب السوداء التى اظن يصل عددها المئات فى القشطة الواحدة.
حاجة ممتعة فعلا ... ونسة و تنقية و استمتاع بالفاكهة
خلاص نعملةجمعية محبى الفواكه السودانية ؛ الهدف الأساسي to promote زراعة و تسويق الفواكه المحلية و الاجنبية
الكاكه دي ما ضفتها وما قاعد احب الحاجات الغريبة غريبة خاصة في الفواكه الا بكره بجرب واتمني ما تطلع زي اخر واحده اشتريتها وماعرف اسمها طلع طعمها زي القرع الني. في كل الأحوال مافي احلى من الفواكه السودانية، موز كسلا ومنقة شندي ديل من ثمار الجنة، عضوا عليهم بالشلاليف.
11-22-2019, 03:33 PM
احمد عمر محمد
احمد عمر محمد
تاريخ التسجيل: 01-10-2013
مجموع المشاركات: 1273
للأمانة ياود التاج الفاكهة السودانية فعلا طاعمة جدا بل تحس انك فعلا بتأكل موز ساعة بتكون تأكل الموز وكذلك الالبان لا تغيب نكهتها المميزة عن انفك و ان تشرب حليب البل او حليب البقر. الفاكهة في البلدان الاخرى ليس لها الطعم المميز الذي عرفناه لكل فاكهة لكن نأكلها ونتلقفها من باب العادة. بالنسبة للكاكا و لا البريسموون حقت النصري انصحك تلحق الموسم اول مرة ااكل فاكهة وانا اصرخ لجمال طعمها بالجد، بس على قول النصري ان شاء الله تقع ليك واحدة ام فانيلا الملكية وابعد من حق البرولتاريا حسب كلامو. تحياتي
طبعا يا ابوريش لم نكتشف كل عالم الفواكه البديع لكن قدر الجربناه ؛ الكاكا هى الأولى. لكن اقول ليك كلام !! قد يكون هناك منافس قوى جدا ليها ؛ ما حاتصدق شنو ؟
الدليب ؛ ياخ انا بهاتى للدليب ده من سنة 80 و كنت شايفه اجمل فاكهة سودانية. ان شاء الله عند زيارتى المرتقبة السودان حافتش الدليب ده لغاية سقط لقط.
--- وبالنسبة للفواكه الآسيوية ؛ هناك مئات و احتمال الاف الأنواع لم نسمع بها ؛ الحل الوحيد الزول يسافر هناك ؛ فكرت فى السفر لتايلاند ؛ صاحبى قال لى ده بلد شبهة 😂 ابعد عنها
11-22-2019, 06:49 PM
قسم الفضيل مضوي محمد
قسم الفضيل مضوي محمد
تاريخ التسجيل: 01-08-2013
مجموع المشاركات: 2608
. سلامات ... النصري وشركاؤه... بعد تعرشوا بوست التحلية دا .. نرجو فتح بوست يبحث في اسباب اقبال الشعب السوداني على الكافيار * ... ودمتم ... . .. . * الحقوق لي م ح المشرف ...
اهلا قسم الفضيل خلاص قربنا نعرش و احتمال نكون هدينا الف سودانى لطريق الكاكا المستقيم.
اى حاجة من البحر ما نافعة ماعدا أسماء المياه العذبة مثل البلطى.
أكلت اخطبوط فى مطعم مشهور فى اونتاريو قبل كم سنة ، جسمى كله ولع نار ، حساسية و كاروشه ، توبة تانى من الأخطبوط ..اما الكافيار بيض السمك لو كتلونى ما اكله
11-23-2019, 07:26 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
أقر وأعترف أنا مولاكم حافظ بشير بأنه قد تم تدقيسي عند شرائي للكاكا في المرة السابقة. وعليه فقد تم إعادة تصنيفها مع الفواكه اللذيذة في المركز الثاني عشر بعد الكيوي مباشرة بدرجة 10/5.3. يظل البرتكان أبو صرة في المركز الأول بدرجة 10/10.
11-24-2019, 08:45 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
شايف أكتر من واحد إتكلم عن (القشطة) ... يا جماعة القشطة فاكهة موجودة في السودان ... نعم ما منتشرة، بس موجودة ... شخصياً علاقتي بيها قديمة من ما وعيت على الدنيا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة