|
|
|
 Re: إتّخاذ إجراءات جنائية في مواجهة رجال الشر (Re: محمد البشرى الخضر)
|
تعديلات قانون الشرطة المشار إليها ترجع للعام 2017, تقريبا بعد حادثة قتيلة الديم عوضية رحمها الله
هذا الخطاب مقروؤا مع بيان الأمن ماذا يعنيان؟
بدل أن توعّي الجهات النظامية منسوبيها بواجبها وتلزمهم بعدم ارتكاب الجرائم تحت ستار تنفيذ التعليمات او فرض القانون و تعلي من قيمة المحاسبة تبحث لهم عن الحصانات و عن الحماية!!
هذا الاجراء في رأيي معيب وحتى لو كان لتعديل تم في تاريخ سابق للثورة فهو لا يتماشى مع روحها وعهد القانون و العدالة الذي قامت لأجله
و إن الشرطة في خدمة الشعب لتنزيل هذا الشعار لأرض الواقع يجب أن يضمن الغاء هذه التعديلات في إعادة الهيكلة المرتقبة
| |
  
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: محمد البشرى الخضر)
|
زمان كان عندي دكان، المؤجر أبى يدفع الايجار 3 شهور لمن ضايقته وبقيت أجيهو كل يوم قفل الدكان بي مفتاحه وشرد
في الحقيقة صاحبي شغال في السوق من البداية قال لي لا تمشي تشتكي ولا حاجة نجيب لينا شاكوش نفلس الطبلة وتجدع حاجاته في الشارع وانتهى الموضوع. لكن أنا عملت فيها متحضر وبتاع قانون مشيت اشتكيتو بواسطة محامي وتعال شوف الجرجرة
المهم بعد سلة روح حكموا غيابياً بإخلاء الدكان وانا فرحت شلت من القاضي ورقة الإخلاء والمحامي قال لي توديها العساكر وتديهم حاجة كويسة كدة عشان يفضوا الدكان
قلت ليه حاجة كويسة دي يعني شنو؟ موش دفعنا رسوم المحكمة! قال لي هو المفروض دة واجبهم بحسب قرار القاضي لكن ما بمشوا بدون قروش
مشيت للعسكري المسؤول لقيتو قاعد تحت شجرة قرأ القرار قال لي نحن عادة الإخلاء بنعملو بمبلغ كذا .. اتذكر إنه كان إيجار 3 شهور
قلت ليه خلاص جيب الورقة برجع بيها القاضي أقول ليه ما عندي قروش أجل الإخلاء لحدي ما أجيب القروش الطلبتها الشرطة
قال لي انت زول حقار .. قلت ليه ياخوي دايرين تنفذوا الإخلاء ولا تدوني ورقتي؟
قال لي الورقة نحن استلمناها تاني ما بنديك ليها والإخلاء دة بنوريك بنعملو كيف
نادى موظف ما عسكري قال ليه امشي معاهو شوف الإخلاء
الموظف طوال الطريق شغال يلمح للرقعة وانا قفلت ليه الباب نهائي قلت ليه يا عمك انا ما عندي ليك غير موية باردة مسيخة داير تنفذ أمر المحكمة خير وبركة ما داير تنفذ ارجع المركز بي راحتك
مشى معاي الدكان وجبت يد الفندك وكسرنا الطبلة دخل الدكان حصر البضاعة الموجودة فيه ومضاني على الإحصاء وقال لي يلا الحاجات دي عهدة عندك وطلع فات
كوركت ليه وانا مالي بيها موش المفروض تشيلها الشرطة عندها قال لي ما عندنا مكان نختها فيه اتصرف انت
بعديها بي اسبوع المحامي اتصل بي قال لي عندنا جلسة متابعة قلت ليه قبضوا الراجل؟ قال لي موش انت معاك أمر القبض؟ يبقى الموضوع عليك
كيف يعني علي؟ قال لي تمشي تفتشوا انت ولما تعرف مكانه تشوف ليك عساكر تديهم أمر القبض والساهلة ويمشوا يقبضوهو ليك ولا كان داير بكلم ليك عساكر مباحث بس سعرهم غالي شوية ديل بجيبهو براهم
قلت ليه يعني القاضي يكتب أمر القبض وخلاص كدة يمشي بيتهم ضميره مرتاح ونحن نشتغل شرطة نفتش! قعد يضحك علي قال لي انت عايش وين! مافي عسكري بشتغل بدون رقعة
مشى جلسة المتابعة وأديتو حقها بعديها بي اسبوعين تاني اتصل بي قال لي في جلسة متابعة تاني قلت ليه يتابعوا شنو يا ود الناس؟ يشوفونا قبضناهو ولا لأ! ما داير أي متابعة ولا داير قاضي ولا تتصل بي تاني
مشيت لي صاحبي الزماااان داك طلعنا البضاعة بعناها لي تاجر بس سعر بسيط عشان نتخارج منها وبعت الدكان قلت توبة تاني أدخل لي في تجربة زي دي
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: أحمد محمد عمر)
|
صاحبي معتمر
في المدينة المنورة اشترى موبايل جديد وركب تاكسي ليموزين مشى بيه الفندق
نسى الموبايل الجديد في التاكسي
اتصل بي 999 خلال دقايق كانت معاهو عربية دورية في استقبال الفندق
شال منه أوصاف صاحب التاكسي ورجع عربيته بقى يعمل اتصالات
جاهو الشرطي بعد ربع ساعة عرض ليه صور من موبايله بتاعة سواقين لحدي ما عرف فيهم السواق وأكد ليه إنه دة هو
الكلام دة الضهر .. بعد العشاء اتصل بيه الضابط نفسه قال ليه قبضنا سواق التاكسي وهسة معانا في القسم وموبايلك قاعد برسل ليك موقع القسم تجي تشيله
وبالنسبة للسواق كان مفروض طبعاً يرجع محل جابك يديك الموبايل أو حتى يختو في استقبال الفندق عشان كدة مفروض يتحبس، لكن الشايفينو نحن إنه راجل مسكين وانشغل بالمشاوير يعني ما كان قاصد يسرقه من عفى وأصلح أجره على الله تعفي عنه يا زول! ولا نحبسه؟ قال ليهم العفو طوالي أنا داير الموبايل بس ما داير حاجة تانية ومشى القسم وقع على كم ورقة واستلم موبايله
الكلام دة تم خلال نصف يوم
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: أحمد محمد عمر)
|
الداير اقوله إنه الشرطة العندنا دي فاقد تربوي
ما اتخيل لي في زول فيه عمار بمشي براهو كدة حباً في العمل الشرطي يبقى عسكري!
الضباط عندهم مغريات أكيد لكن العساكر الصغار ديل أغلبهم فاشلين وما لاقين شغل عشان كدة بقوا عساكر
ما عندهم كفاءة ولا في دورات تأهيلية مناسبة ومرتباتهم تعبانة وبخلوهم يتصرفوا من المواطنين عشان كدة ما تتوقع منهم غير التعامل السئ مع المواطن
زي ما قال أحدهم في كل العالم منظر الشرطي يبعث على الاطمئنان إلا في السودان يثير القلق
لأنه ما متعودين الشرطة في خدمة الشعب .. متعودين الشرطة بتجي عشان تخم الباعة المتجولين ولا المدخنين في محلات الشيشة ولا تقيف في الشارع عشان تغرم السواقين لكن عمرنا ما حسينا بمصطلح الخدمة الكاتبنو د
الفساد المستشري في الشرطة دة إرث متمكن فيها بالكامل وما بتعالج إلا بالردع الفردي لكن ما ممكن واحد عايش على الرشاوي البسميها رسوم خدمات وياخدها من المواطن بقوة عين10 ولا 20 سنة ببساطة كدة توعيهو وتفهمو إنه دة شغله البياخد عليه الراتب
الدرب دة لسة طويل لحدي ما تتصلح الأوضاع المالية وتبقى الشرطة مهنة جاذبة زي باقي العالم ويطلبوا فيها مؤهلات كمان حتى بعد داك ممكن تتعشم فيها خير
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: أحمد محمد عمر)
|
الواضح إنو الشرطة والقوات النظامية كلها شغالة مع المواطن ابتزاز
وبقت كلمة "مش دي المدنية الدايرنها؟" في طرف لسانهم
يعني يا نرضى بيهم بي سجمهم ورمادهم دا يا ناكل نارنا
المفروض يتقدم وزير الداخلية للمحاكمة وكذلك مدير الشرطة
اصلاً اي ضابط من رتبة عقيد ولا فوق مفروض يتشال طوالي ويمشي للمعاش
واستهداف الطلبة في الكليات ومحاولة تغيير أفكارهم، لأنو الناس الاشتغلو ديل بكونوا
اتشبعوا بالفساد والفوضى وتقول بدرسوهم كيف يخالفوا القانون مش كيف يحموه
اما قصة نحل الشرطة والجيش دي صعبة رغم إنهم عالة على المواطن وبصرفوا رواتب كثيرة جداً
وفي نفس الوقت هم المهدد الرئيسي لأمن المواطن
لأنو من الصعب تجيب ناس يسدوا محلهم بسرعة، أما لو اتلقى بديل يحلوهم ويتخارجوا طوالي
ولو استمروا في الدناءة دي مفروض الشعب يعاملهم بالمثل: أي عسكري يمشي لي دكتور ما يعالجو
ولو جاء لي بنا ما يشتغل ليهو ، أو كهربائي برضو يرفض .. الخ
وتحياتي
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: صبري طه)
|
| Quote: قال لي بصرف 4500 جنيه !! (الكلام دا قبل شهر تقريباً) |
يا صبري رواتب المعلمين تقريباً في الرينج دا .. ويمكن أقل
وما سمعنا بي معلم قال زبلوني
ولا ارقعوني
دا ما سبب لي سياسة غض الطرف عن التفلت والفوضى الشغالين بيها اسع دي
لو ما عجبهم يمشوا بيوتهم
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: صبري طه)
|
والله يا صبري أنا في موضوع الغمتة دة متطرف شوية :)
الموضوع دة فيه لعنة ياخ
بعدين ادخل النار بقروشي! أنهب لي مليارات واخش بيها النار ممكن لكن أدفع عشان يدخلوني النار! 
_________
طبعاً في ناس عندهم فتاوى للموضوع دة وفي ناس بتعتبرها مساعدة غير ملزمة لكن زي ما قلت ليك أنا متطرف شوية في الموضوع دة
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: أحمد محمد عمر)
|
هلا بالشباب هلا والله
يا ابو حميد الشرطة السودانية تاريخ طويل و عريق و بها كوادر مميزة من خرج منها و التحق بالعمل الشرطي في دول الخليج تركوا اثر ممتاز
مسألة الرشوة - بمسمياتها المختلفة - والتعامل معها بصورة طبيعية جعلها اقرب للحق, انتشارها ليس حكرا على الشرة بل كل مرافق الخدمة المدنية صغيرها و كبيرها, غفير المستشفى داير حقه الحمال في المطار داير حقه الأمر صار اقرب للوباء إلّا من رحم ربي
والمشكلة فيها عنصرين غير المتلقي أو الطالب كمان ما تنسى من يعطي وأحيانا يعرضها والمصيبة مش عشان ياخد حقه فقط او يمرر اجراؤه القانوني المستوقي لكل الشروط بل هناك من يأخذ بها حقا ليس له أو يتخطى بعض المتطلبات
هي مشكلة حقيقية تحتاج للعمل على مستويين رفع الوعي لدى الجميع بحقوقهم واجباتهم ومستوى الرقابة و الاجراءات القانونية دون تهاون
على سيرة الاجراءات القانونية موضوع البوست وما رشح هن تقاعس ااشرطة في أداء ادوارها الايام الماضية وخاصة ليلة راس السنة يوحي بأن هناك مقاومة عنيفة للسلطة المدنية وأن العسكر ما قادرين يستوعبوا التغيير التم
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: محمد البشرى الخضر)
|
| Quote: التحق بالعمل الشرطي في دول الخليج تركوا اثر ممتاز |
أي سجمان في السودان في أي وظيفة لمن يمشي الخليج بتعدل
السبب السيستم الرقابي والمحاسبة الفورية
دوام بي بصمة اتأخرت خصم اتأخرت تاني انذار اتأخرت تالت مع السلامة
جات شكوى مع السلامة
فرفرت بي أي طريقة مع السلامة
أصحابي حكوا لي عن طبيب زميلهم اشتغل في عسير السعودية أول شهر اعترض على حاجة طوالي عمل اضراب وعلق ورقة طبيب مضرب في صدره
وحاتك لي هسة ما عارفينو وين :)
| |
|
|
|
|
|
|
|
|
|
Re: إتّخاذ إجراءات جنائية في مواجهة رجال الشر (Re: أحمد محمد عمر)
|
فساد الشرطة ممنهج
يعني خربانة من كبارها
أصلو الشغلانة دي ما عندها حل إلا بالمحاسبة لكن أي حركة توعوية ما بتنفع
الخليج ما فيه حاجة اسمها شرطي مرتشي لأنه ببساطة لو اتقبض الله قال بي قوله
لكن عندنا عسكري المرور بشيل منك الرشوة وبقسمها مع الضابط القاعد بعيد في العربية عينك عينك
ياخي زمان لما جيت أطلع البطاقة الشخصية قالوا لي الاستمارة عند العرضحالجي خليهو يملاها ليك قلت ليهم بعرف اكتب براي أدوني ليها قالوا لي لأ الضابط ما بشتغل ليك إلا لو ملاها ليك العرضحالجي
شوف عيني دي نهاية اليوم العرضحالجي جاء يصرف في العساكر والموظفين
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
محمد البشرى الخضر
بدرالدين بابكر مصطفى
فيس بوك
تويتر
انستقرام
يوتيوب
بنتيريست