أبو عركى --- خط استواء الثورة

يا زول يا ضو
يا مارق من روح الطين
و طالع من فكرة إنك
كائن ماهل
يا مستف بالحنين
أقرب لون فى لوحة أرضك
قاعد فى هامات الجو
أصعب حاجة بتظهر منك
إنك ساهل

يا زول يا شاسع
أطعم من صلصال النيل
أكبر من كل الحزن الفينا
وفرحك واسع
يا أعذب حجوات بالليل
يا ساكن فينا وفيهم
ونسة الحلة
نداوة الطلة
قمرا وكوراك وشليل
وسهم مرسوم
فى نص القلب القاعد
فى طرف المنديل
يا ضل يا نيل
ضفِّر مساير قصتك
رتّل نشيدك لمنا
كلمنا عن طعمه الأنيق
هبهب نسايمك عمنا
ولع شرافاتك بريق
قسِّم بليلة فرحتك
خلينا نآكل كلنا
ورينا فرقات الطريق
شتت تميرات ضحكتك
كرامة لى للبلد المليح
انسج خرائط فكرتك
نشوانه بى عيون ملهمه
خط استوا الشدو المريح
سافنا من خضرة بهاك
صحارى تنده فى السما
وديان حنين
مسقيه بى ريق الوئام
غيمات وريح
افتح مسامات السكات
خت الكلام ترياق يشيل
وجع الأرض
فج عتمة الدرب الضهب
نوِّر ضلام الأمنيات
واغرس تواريب غنيتك
سويها بالطول والعرض
شان خاطر البلد التِعب
باكر تقوم
وفينا بتحوم
زفة غيوم
موكب نجوم
لا حر يجينا ولا سموم
وباكر تقوم
باكر نقوم