|
|
 يوميات عبدو حنفية و فتاح الكج
|
*ماقال بجى مالو ماجا
الليلة وين ياعينى بيتكم بوين ياعينى
هلاهلا ده شنو ده .. ده من وين ده كمان ؟
_عبدو انت جنيت ولا شنو دى ما بتعرفا !!
*خلاص قمت لى جنك (ياكج) اى حاجة انتا عامل فيها بتعرفا والله انت فتا (عصام بعرفا ) بهناك .. عليك الله شوف القوام ده .. تقول غزال
_يازول انت موهوم ده قوام ده .. ياخ دى تقول حارس مرمى دى شماعة ولا شنو هههه
*اها ياكج كمان قول شينة
_شينة شوية عليها ياخ دى عاملة زى عربية الباسطة الزمان ديك تمشى وتتكعوج التقول ضاربة دفار
*غايتو انتا اصو الواحد مايقول ليك حاجة التقول حسين فهمى اى حاجة تشنفا .. يازول انسا كدى ادينى سفة انتا اصو الواحد ما بستفيد منك غير كيسك المليان ده عامل لى راسك الزى تنكى الموترده .. الله يازاك جيب
_هاك ..طوالى انت شايل خشمك وحايم التقول جيبك فيهو عقرب .. مرة واحدة بس عايز اشوفك تعمل ليك كيس زى الناس
*ها العوير ده ماسعوط شنو يعنى حلاوة لكوم قوم كدة بلا لمة .. قتليك ياخ دايرين نمشى لى ناس ( جمال القرد )
_لاحول الله وده كمان مالو
* قالوا راقد ( سلطة ) .. فى المستشفى ليهو اسبوع
_ربنا يشفيهو يازول اكسح براك انا ( القرد ) ده ماداير اشوف خلقتو من يوم داك
*انسى يامان .. وبعدين ماتنسى العشرة
_عشرة .. لا قبة .. نسيت لما كراعى اتكسرت ( كب الزوغة ) وعمل نايم ياخ ده زول تعبان بنسى ليك حنانو .. اسمع انا متخارج يللا يامان
*خلاس اقيف دقيقة دخل معاى الكراسى دى .. بس فالح تجى تتكل اليوم كلو
|
|
 
|
|
|
|
|
|
|
 Re: يوميات عبدو حنفية و فتاح الكج (Re: salamat)
|
ياعبدو عبدو
*مالك يازول بتكورك مالك فى شنو
_ابوى قال ليك تعال
*خلاس امشى انا جاى كرهتونا البيت زاتو اصو الواحد مايقدر يقعد فى البيت ده دقيقة واحدة مرتاح
_ هوى ياولد مالك بتتلكع انا مش رسلت ليك اخوك اسامة وقال ليك ابوى بناديك
* فى شنو ياحاج ؟
_ انت انا مش اديتك القروش وقت ليك امش جيب لينا كهربا.. الجمرة الخبيثة دى ما ولعت عديل كدا
* ااى
_ طيب مالك قاعد ماجبتها ليه
* ماشى هسه بس قلت ارتاح شوية
_ ترتاح من شنو من القعاد فى الشارع والسهر فى الحفلات ولا من العطالة الانت فيها دى .. يللا امشى بسرعة
* يا الله .. خلاس كويس يابوى
* يازفت انتا اسامة جيب لى قميصى من جوه تلقاهومعلق فى الشماعة .. عذاب عديييييل كدا
(فى الشارع فتاح الكج قاعد وخاتى ليهو سفة كبيرة )
* فتاح اسمع يللاكا معاى
_ وين يامان ؟
* هنا قريب اسمع معاك فكه .. يعنى خمسة مخدات كدا
_ خمسين الف انتا جنيت ولا شنو والله انا ماعندى التكتح كيسى ده بس ياهو راسمالى
* ياخى طيب ما تشوف لى صحبك
_ صحبى منو ؟
* ابطايووقة
_ هههه انت وهم دا حق الفطور ماعندو تقول لى خمسين الف .. انت عايز القروش دى ليه
* يامان الحاج ادانى قروش الكهربا اول امبارح عشان اجيب بتاقة وانا لحست القروش وفضل منها شوية وداير اتمها
_ ابو الكدس وديتا وين ؟
* يعنى عامل فيها ما ناقش امال الترطيبة الامبارح دى كانت من وين تلهطوا وتنسو !!
_ اوه اتاريك امبارح فاكى اللعب وعامل فيها اوناسيس قدام الجكس يازول بطريقتك سلام يامان
اسمع انتو بيتكم دا زاتو كهربة شنو .. ما ياها لمبتكم الواحدة دى تقول بتقرا طب وتلاجتكم دى غير الموية فيها
شنو .. ههه اقعوا الزير دا ساى
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
(3 )
الرصيد كملان
والشباب فلسان
وعلى العلينا كمان ياعوض دكام
يجونا مغتربين يبددوا الاحلام
كللللللللللللام ياعوض دكام
_ شنو ياعبدو مالك ( فاكيها ) فى نفسك كده وقاعد تغنى
* اوه يا فردة كيفك ياكيمو .. تمام يامان ؟
_ مالك ياحبيب مبسوط كده فى شنو؟
* صاحبك ركبوالتونسية .. صبرى ما (اتلحس) وكده
_ مالو حصل ليهو شنو ؟
* قاليك ياحبة صقر كبير جه وختف الكتكوت .. (هبة) الليلة خطوبتا
_ معقولة .. وده منو ده هادم المسرات ده ؟
* هههه واحد قاليك شنطو تقيلة وكهربتو من هنا للروصيرص
_ مغترب ولا قاطع درب !!
* يازول ما قت ليك صقر جا طاير من الجو قالوا تاجرلكين بتاجر فى شنو ماعارف .. يابوى الزمن ده زمن ( الحروت والكنجالات ) الناس بقت ما بتسال كتير
_ وصاحبنا ابو الاصبار اخبارو شنو تلقاهو بغنى ظلمونى .. هههه
* يعنى حيعمل شنو ما ياهو حالنا وانت قايلا دى المرة الاولى يابوى ده راسو من كتر الشواكيش بقى زى تربيزة الحداد .. عامل لى فيها قيس !!
_ لكين ياحبيب دى ( مرزبة ) عديييييييييييييييييل كده
* تمر ايام وتتعدا ونقعد نحسب فى المدة .. كلنا حيحلقوا لينا .. كدى جيب سفة
_ عبدو انا مشتت
* ماشى وين ياكيمو ما تتكل شوية هسى ( الكج ) بجى
_ اقعد صاقرو براك لمن يجيب اجلك .. سلام يامان
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
الاخ عامر يا ( فردة)
لاحظ في اخر مداخلة في البوست بتاع الامتداد ( كان طارق وبعديهو انا) واسع نفس شئ طارق وانا ( عشان تعرفونا اخوان)
سرد جميل والله انا بصراحة يا عامر ١٦ سنة في المغرب نسيت المفردات دي عديل كدا وممكن تسأل طارق وانت عارف الهدرا كيف خصوصا لمن تكون بتحتك بشكل يومي مع المغاربة.
واصل
| |
|
|
|
|
|
|
|
|
|
Re: يوميات عبدو حنفية و فتاح الكج (Re: Walid Safwat)
|
رسالة من الزمن الجميل
Quote:
في البدء نؤدي لك هذه الأمانة: أحمل لك سلام وأشواق وأعجاب أختنا أميمة سري بهذا البوست وفي الحقيقة هي من لفتت انتباهي لهذا البوست "كده برضو يا عامر بقيت تفتح بوستات بدون ما تكلمنا!!" وبتقول ليك واصل يا عامر هذا السرد اللذيييييييييذ
الممتع في البوست أن هذه النماذج يمكن أن تعثر عليها بسهولة في محيطك اليومي ولا أدري حقيقة ما إذا كان عامر قد ترك لخياله العنان أم أنه أستدعى بعض الشخصيات من ذاكرته ونسج حولها هذا الأبداع
Quote: اوه اتاريك امبارح فاكى اللعب وعامل فيها اوناسيس قدام الجكس يازول بطريقتك سلام يامان
بالله هل من أحدً فيكم لا يعرف مثل هذا الشخص !!!
تحيـــــــــــــــــــــــاتي
صديقوف |
صديقى العزيز صديقوف والاخت الفاضلة اميمة سرى بنت الاكارم رسالتكم من الزمن الجميل اعادتنى
الى الايام الحلوة .. الصفا .. المودة .. الاخاء
رفعتو معنوياتى فليس الموضوع اكثر من ذاكرة صورية جايطة فى الدواخل وطبعا ياصديق الصورة
ليست كلها خيالا ولا كلها من الواقع ولكنها خليط هجينى مع كثير من الهضربة فى عالم
الديناصورات المنقرضة وبعض افتراضات من الواقع
الشكر لكما وتحياتى ياصديق الى عموم ال سرى الكرام وخصوصا بهاء الذى نتمنى طلته فى شوارع
الامتداد
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
Quote: اعترف هنا وبكامل ارادتي انني حرامي
ومتى ما وجدت ابداع وجمال بتلب الحوش
طوالي عشان كدة جيت متلب عندك
|
عزيزى وصديقى الحبيب طارق جبريل
لا يكتمل الابداع الا بحضورك ياجميل
حضرنا لنجدكم نورتو المكان وزينتو الحتة
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
(5 )
*ابطايوووووووووقة تعال يافردة .. ماشى وين ؟
_ ياحبيب .. كيفك ياعبدو .. تمام .. ماشى عندى معاينة
* معاينة!! وين ومنو الداير يعاين ليك ده ياحبة .. قال معاينة قال !!
_ غايتو انت ياعبدو السماك ( حنفية) ما كضب داير تنق طوالى اصو ماعندك شغلة تقضيها
* هو انتو خليتو فيها شغلة ما يومى (مركلسين) هنا لمن بقى الواحد لو ما تكل فى الشارع ما بحس انو لسه عايش .. ما قت لى معاينتك وين ؟
_ فى النقل النهرى ياحبيب .. ارتحت ياملك الشمارات
* وحتشتغل شنو فى النقل النهرى سنبوك ولا ابو القدح .. هههه
_ خليك انتا بس متعطل هنا وشوف الماشى والغاشى .. سلام يا فردة
* يازينب .. زينب يازولة انتى طرشتى ولا شنو ادينى كباية شاى
_ سمح ياعبدو .. الليلة ملك قاعد زى الصقر كدى وحيد
* هسى الجماعة ديل بجو .. شايك مسيييييخ .. تقول مادافعين ليك قروش خدك
_ بجيب ليك معلقة سكر زيادة ماتزعل
( يتاوق عبدو فى الشارع ليجد فردته فتاح الكج برفقة العريس المغترب عادل ود الجاك )
* ويهمس عبدو .. اااى يافتاح لابت مع العريس المغترب عارفك بياع والله انا خايفك تنحس العريس يفرتق العرس ويلقط ورق .. ما صاحبى وعارفك من يومك كجججججججججج
_ اووه عبدو كيفك والله مشتاق ليك شوق عامل شنو يازول
* اهللللللللللا يا ود الجاك حمد الله على السلامة .. شنو امبارح قعدت رجيتك انت والفردة التعبان الكج ده ماجيتو مالكم
_ ياخ اتاخرنا عشان كان عندى امانات وكمان امور العرس وكده
( فتاح الكج مقاطعا.. اسمع يا عادل اتاخرنا يللاكا بنجيك راجعين ياعبدو.. ولا اقول ليك ما تيللا معانا )
* لا لا امشو وتعالو انا مستنى جمال القرد .. امشو وتعالو
( عبدو هامسا الله يستر عليك ياعريس الغفلة الكج ده ابراهو لمن يجيب اجلك )
_ عبدو ازيك
* اهلا ياجمال .. هسى كيف حرقت تش ولا لسه يامان بعد رقاد المستشفى الواحد عرفك ( جلكمت )
_ الحمد لله تمام وين صاحبك فتاح الكج ده مايجينى فى المستشفى هسى لو ربة تلقاهو عامل سيدا اصبر لى بس ياتعبان
* سيدا بس .. سيدا ومقددا كمان تعرف ده من امبارح قاطر ليك عادل ود الجاك طبعا جا عشان يعرس وصاحبك عامل ليهو لحام شديد وفاتح لى للطيش .. ده زول وهم ساى وبييييييييييياع والله يدق فيك جرس زى السلام عليكم
_ بالله ود الجاك وصل وداير يعرس كمان بالله شوف تتذكر لما كان اسمو (مسكيتة ) من شدة الضعفة.. شفتو كان اغبش كيف وضعييييييييف
* يازول هسى اتنفخ وبقى قيييييييييييافة .. عرسو يوم الخميس الجاى .. قال اجازتو اسبوع بس
_ العروس منو ؟
* ماحتصدق .. شفتا ياسر ابو طويلة .. يامان قاليك اختو تهانى .. الدكتورة
_ دكتورة وشدييييييييييدة كده يعرسوها لود الجاك .. معقولة !! ياخ ده قرا الابتدائى بالعصر وكان بليييييييييد ولايووووق ودورو مييييت لاحول الله ..
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عبدالكريم الامين احمد)
|
(6 )
*يا بت .. عابدة تلفونى فى الشاحن خلى اسامة يجيبو لى انا مارق بره
_ كويس .. عبدو امى قالت ليك تعال دايراك
*جاى.. فى شنو ياحاجة ؟
_ عبدو ياولدى مالك عامل مشاكل مع اخوك الاكبر منك
* ياحاجة عبد الوهاب ما يشوفنى الا يقعد ينق لى فى الشغل ويقول لى انتا زول صايع وماعندك مستقبل وحتكون كده بس عواطلى .. كرهنا زاتو
_ ياولدى اخوك عاوز مصلحتك وعايز يشوفك متل الناس هسى حالك ده عاجبك تنوم لمل تصحيك الشمس وتسهر لانصاص الليالى واليوم كلو مصنقر فى الشارع لا شغلة ولا مشغلة .. عاجبك كده ؟
* ماعاجبنى .. لكين اسوى شنو .. المهم مافى مشكلة بس ما ينق لينا كل يوم فى راسنا برانا واصلة معانا الحد وبتنفرج ان شاء الله .. دعواتك يا حاجة
_ الله يرضى عليك ياولدى ده ما اخوك الكبير .. الله يعدلا عليكم كلكم يااولادى ويخدر ضراعكم ويفتحا فى وشكم .. امين يارب العالمين
* ربنا يديك العافية ياحاجة .. اها انا ماشى برة الشارع يا اسامة جيب التلفون ده
( اسامة يكتم ضحكة كادت تخرج منه وتفضحه قدام عبدو ..فيهمس عواطلى وشايل ليك موبايل ابو كمرتين هههه تلقا الرصيد خلا ..)
* ياحنين .. جيت متين يابو الشباب كيفك ياكيمو .. تمام
_ يافردة.. ازيك ياعبدو من قبيل قاعد راجيك .. هسى جمال القرد كسح قال ماشى وجاى
* عندو ( عواميد ) ولا شنو ؟ جكسايتو العاملة زى الشيتا دى .. لا حول الله قرد وشيتا شبهينا واتلاقينا
_ الليلة الطرب كيف يامان طبعا عرس الزين وكده صاحبك ود الجاك الليلة حنتو مش كده ؟
* اااى .. تصدق صاحبك الكج عامل فيها وزير العريس .. الله يستر
_ ياخ انت مستكتر عليهو وزارة زى دى ليوم واحد ياخ فى ناس وزرا مدى الحياة وزارات ومعاها كنجالات وحديد نضيف وو .. صاحبنا ده برجع لكجو بس خللى ود الجاك يسافر .. انتا مستعجل يجى يكجك ولا شنو
* اسمع ياكيمو عامل شنو مع الفيل الجديد ؟
_ ياخ زى دى ما بقولوليها فيل ياخ دى زى الغزال تقول لى فيل .. اديك كدا
* ياوهم لمن نقول للجكس فيل مامعناها الفيل بتاع جنينة الحيوانات .. معناها فيل يعنى احساس بالانجليزى ياداقس وعامل لى فيها دنجوان .. قوم لف
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
كرومة يافنان
Quote: واصل يا مان وادينا شمار الفارة المغترب ده..الجاء وعاوز يعمل عرس الزين..
من الدكتورة الشرط للارض دي....وانشاء الله 0(فتاح الكج).يكجو ويكج ليك حنانو زاتو!!!!!!!!!!! |
النشوف اخرتا مع الدباس ده
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
سلام يا عامر،
أسمح لي أُبدي إعجابي بأسلوبك في السرد..
أجمل حاجة في كتابتك إنو الزول بفتكر نفسو لاقي الشباب ديل أو بيعرفهم. الحالة هي هي؛ وحتي المصطلحات والألفاظ هي نفسها المنتشرة بين الشباب اليومين ديل ..
كدي النشوف آخرتها 
بس أوعك تطول وتشرّنا 
| |
|
|
|
|
|
|
|
|
|
Re: يوميات عبدو حنفية و فتاح الكج (Re: صديق حمدتو)
|
(8 )
* كيمو .. مالك ياحنين فاتح خشمك كدا ومقهَى يللاكا نربها مع بنات الحلة شايف ناس سارة وسهى ومعالى وكمان الليلة هبوية زاتا معاهم طبعا ديل صحبات العروس
_ هوى ياعبدو انا جنى وجن بنات الحلة ديل فلقصة فايتة الحد ونخرة مرفوعة فى الفاضى .. امش براك انا خلينى مع البث المباشر والتلفزيونات دى فى زول يلقى جنس التويكس دا ويفتش على قراصة النبق دى
* هو انتا قايل الزولة دى شغالة بيك .. دى شادة سلك ابن كلب ما شايفا بتتبسم كيف انعل ابو الحنان زاتو .. ياكيمو ياتعبان زى دى منو البخليها ليك عشان تكهربا والله دى لوجبتا الدمازين كلها ما بتكهربا .. خللينى مع جكس الحلة .. جبجب جبجب .. النبق النبق .. ايوووووووووووة قلبا قلبا قلبا يمين قلبا شمال العربية قلبا كوستى العربية قلبا سنار قلبا بيى طلعتا حية قلبا ظهرا .. قلبا عصرا ... تودينا للسادة وبنزينك شوية يالسايق العربية ببقى ليك بطارية يالسايق العربية تقوم بيى بيى بيى
* ااااااااى حتتتتى .. كيمو ياوهم تعال حصل الربة دى احسن ليك من البيش .. ابشر يا عريس .. عريسنا النفض الكيس ( كيس شنو البتنفضو والله الا كيس سعوط )
_ ياعبدو .. حنفية تعال شوف صاحبتنا خلطوها شوف الزول اب فقرة دا عامل
زى المصارع وكمان قال بخفف دمو شوف الضحك عامل خشمو الزى الشرك دا
* هوى ياكيمو بطل الحقد بتاعك دا الزول دا مالو ما قيافة هسى انتا زيو ما تبقى حاسد .. شوف القشرة دى كيف .. شتات يافردة يللاكا الناس ديل خلاس بدوا فى العديل والزين حقت العجايز دى ولا عايز تتحنن مع ودالجاك وصحبو الجلا فتاح الكج .. يللا مابكرة برضو بتجى
_ شتت يامان انا الليلة بجيب ليك اخرا .. اسمع قبل ما تمشى ادينى برنجيياية
* خد .. راسك الزى الصهريج دا .. سعوط وسجاير و .. اتقول عالم البشوفك كدا مايقول عواطللى ساى .. اقعد لم الكراسى بعدين .. شاو
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
Quote: يا عامر ياخ نحن لينا كم يوم عاملين سعد قشرة ولابدين في حلة ناس عبده حنفية وفتاح الكج عشان كده عليك الله تعال طالع ما تفوتنا حفلاتهم الحاجاتها بتجر أنوار طويلة كده
تحيــــــــــــــــــاتي
صديقوف
|
صديقى الصدوق صديقوف جينا ولقيناكم شتتو وقعدنا فى حلة ناس حنفية والكج وحضرنا الحفلة
خليك قريب امبارح الحنة والليلة العرس تجى تلقانا عاملين سعد قشرة عشان نكون بالنسبة
لى ( احمد مظهر وكدا )
فتكم بعافية .. لا باكر سلام
| |
|
|
|
|
|
|
|
|
|
Re: يوميات عبدو حنفية و فتاح الكج (Re: زرياب كنيش)
|
Quote: العرس دة اتأجل ولا الحاصل شنو
بس ما يكون فتاح (الكج) عمله
في انتظارك
|
والله ضحكتنى يا زرياب انا زاتى بديت اشك فى الكج ده يمكن عملها معاى انا زاتى
سنواصل الى ان نشوف اخرتا
شكرا على مرورك الجميل يازرياب
| |
|
|
|
|
|
|
|
|
|
Re: يوميات عبدو حنفية و فتاح الكج (Re: عامر تيتاوى)
|
(9)
_ عبدو عليك الله تعال يا وهم مالك مستعجل .. خلينا قاعدين شوية البشوفك كده يقول بتحضر للماجستير .. ياخ انتا الابتدائى فى تلتلة .. جلس يامان مازال الليل طفلا يحبو
* كيمو .. لو قعدتا للصباح مافى طريقة .. بقليبك تقول لى تعال وتعال بعيونك تقول لى مافى مجال .. كمال ترباس وكده يا حنين .. عاين عاين صحبك الكج دى شنو القاعد معاها دى .. حولة .. بقاقة بس .. نار نار عديل كده
_ شوف كمان الونسة الدقاقة .. هيى ياجماعة الجكس ده جنا ولا شنو .. ياخ الكج ده مكناتو كلها بيش .. ده قاعد يقول ليها شنو ده .. والله دنيا فرندقس
* اسمع يا كيمو انا بمشى بشمشم واجيب ليك الشمار مدقوق .. بسال ليك جكس الحلة .. ياعبير .. عبير شنو الليلة لابتين فى الصف الاخير ما شفناكى مع ناس معالى وهبوية زعلانة ولا شنو الحصل .. سمعتى ولا جابو ليك
_ هههه .. ازيك ياعبدو ما انتا زاتك ما ربيتا زى عوايدك مع انو صاحبك فتاح عامل فيها وزير العريس .. انتا العريس ده مش كان صاحبك .. لكين فتاح خرتكم كلكم الليلة .. انا كنتا قاعدة اتونس مع ماجدولين وهى ما بتحب ترقص وكده يعنى انتا عارفا براك عندها راى فى الحاجات دى
* حاجات شنو .. اسمعى عليك الله خلينا من ماجدولين .. البت القاعده مع فتاح دى من وين ؟
_ ياتا .. ام راس كبير دى ..
* هسى دى راسا كبير ياعبير .. والله انتو عندكم جنس حركات .. دى منودى ؟
_ ما بعرفا لكين اظنها صحبة العروس قرت معاها فى الجامعة .. شماراتك دى ما بتخليها اصو !!
* معقولة .. يعنى دكتورة برضو.. كيمو يا داقس .. اموت فى القصر العينى وتنقذنى الطبيبة ! قاليك دكتورة
_ هوى ياعبدو لو كده والله انا دكتورات الزمن ده زاتو ما مقتنع بيهم .. ياخ ديل فاكين اللعب ساكت ود الجاك يعرس تهانى والكج يخلط صاحبتا .. هوى انا ديل تانى بنادول ما باخدوا منهم .. هاك الروشتة دى
* يازول دى ونسة ساى صحبك الكج دا زاتو لايووووق .. تلقاها المسكينة ماقادرة تتخارج منو .. الناس الراقيين زى ديل ما بحبو يحرجوا زول .. لكين صحبك ده يتخيل انو جككسا .. زول وهم خلاس ده حدو منولة العاملة عيونا الفى نص راسا زى كشافات القطر دى
_ عبدو.. ياخ انا زاتى دبرست يللاكا نحصل لينا فولة نضربة احسن من المرض ده
| |
|
|
|
|
|
|
| |
عامر تيتاوى
فيصل محمد خليل
عبدالكريم الامين احمد
Yassir7anna
صديق حمدتو
طارق جبريل
ناصر جبريل
Walid Safwat
Khalid Osman Jaafar
فيس بوك
تويتر
انستقرام
يوتيوب
بنتيريست