|
|
 يجماعة اخير نقعد نسلم النهار كله ولا نشتغل!!
|
والله فترته عديــــــــــــــــــــل ومحتاج لي فتوه عديــــــــــــــــل!!
من اقعد الصباح في مكتبي تتقاطر وفود (المُُسلمين) بضم الميم..
السلام عليكم!
كيف الحال!!
سلامات!!
اهلاً اهلاً
قلنا نمر نسلم!!!!
وياريت لو نفر او اتنين او تلاته او حتى عشرين!!
والله اخلاقي جات في نخرتي وبقيت يا اجي بدري وده خصماً على راحتي ولا اطلع متاخر من المكتب خصماً على اولادي.
افتونا يرحمكم الله.
اسوي شنو؟؟
اعلق لالفته زي بتاعة جنينة الحيوانات اكتب فيها ممنوع اطعام الفيل!!
ولا اكتب عليكم السلام(مُروا طوالي) ولااكتب ممنوع السلام ياظريف!!
كمان في نوع يجي يقيف ويسألك: بالله فلان ده في؟؟
وهو شاااااااااااايف لو فلان في ولا مافي!!
نفرض هو قاصد فات وين!!
ياجماعة مافي زول يكون زايق ويكلم زول!!
ولا يجيك واحد هو اصلاً ماعندو معاك موضوع لاقديم لاجديد ويقول ليك: اها الجديد شنو!!
اهو ده بقي البطلع روحي خلاص روحي تكركر واقرب (اكردو)!!
مرات اتعلم الغتاتة واعمل ماسامع..لكن سبحان الله الواحد يكون مُصِر لدرجة الادهاش ويجي يمد ليك يدو في نخرتك!!
ده كلو كوم والزول البيصر يمد ليك يدو عشان يسلم عليك وانت مودي سندوتش الفول على خشمك!!
وتقول ليه اتفضل يعمل فيها ظريف ويقعد يحسب ليك عدد اللُقم!!
الحل شنو.
نبطل سلام ولا نبطل شغُل وناكل نيم.
|
|
 
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
تعرف يا سامي الشديدة شنو :
يكون زول خلص شغلو او اصابو الملل وعايز يكسر الروتين فطوالي يقوم يفكر يمشي لي سامي ده ياخ زول ظريف ولذيذ نغير بيهو الجو ويجي يشبكك ونسات وهاهاها وهيهيهي وإنت يكون الشغل عندك بالردوم ..
وكمان يقوم يحلف عليك تمشوا تشربو بارد من تحت اها بي هنا بي هنا تزوغ الزول ده يقوم يجيك واحد تاني ويقول ليك اها الكورة امباح كانت كيف قالوا لي الحكم ظلمكم ؟؟
وتقعد تحكي ليهو الكورة من تيت لي توت ..
تخلص منو يجيك واحد تاني يسلم عليك ويقول ليك ياخ امبارح الفيلم داك حصل فيهو شنو انا نمت في اللقطة الفلانية ديك ..
شويتين كده ويجيكم المدير ويقول ليكم يا شباب بعد شوية حا نطلع كلنا بي بص الشركة عشان نمشي نعزي نفيسة عندها حبوبتها خالة امها اتوفت ..
ويا سلااااااااااام يا شيخ عبد السلام يا سلاااااااااااااااااااااام ..
تخريمة :
بالله في زول واعي الزمن ده بياكل ليهو فول وطعمية ؟؟؟
ما قلنا ليكم إنتو الجبنة المضفرة دي ما بتعرفوها ...
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
سامي
السلام عليكم
تعرف ذكرتني واحد أخونا ميكانيكي سوداني معانا هنا ،، وأنا مشيت الورشة بتاعتو كم مرة كده ، وأول ما أدخل أسلم عليهو ، واتوقع منّو يسلم علي ببشاشة ، أقوم ألاقيهو صارّي بوزو ... وفي يوم سألت الراجل :
يا أخي إنت مالك مابتبتسم ؟
فضحك الرجل فجأة وقال :
هو بالله في حاجة يبتسموا ليها ؟
ومن يومها أصبحنا أصدقاء ...
يعني موش سلام بس ، كمان عايزين ابتسامة ،،،
أها رأيك شنو ؟
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: ودقاسم)
|
سامي
أجارك الله من هذا الصنف ..
كلو كوم .. و البجيك بيحاول يسلم عليك في إيدك و إنت بتاكل كوم تاني ..
غايتو أنا ممكن أقوم أعضيهو في نخرتو ..
***
قال شاعر قديم :
إذا جلس الثقيل إليك يوماً *** أتتك عقوبة من كل باب
فهل لك يا ثقيل إلى خصالٍ *** تنال ببعضها كرم المآب
إلى مالي فتأخذه جميعاً *** أحلّ لديك من ماء السّحاب
وتنتف لحيتي وتدقّ أنفي *** وما في فمي من ضرس وناب
على ألاّ أراك ولا تراني *** مقاطعةً إلى يوم الحساب
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
سامي اخوي
مسكاقمي
مشجع فريق الكاسات المحمولة جوا
دايماً البوست حقك لذيذ وبيطلعنا من سئم وقرف الشكل بتاع ناس السياسة
تعرف انا لمن قريت البوست حقك دا ضحكت وقلت اخوي سامي
اكيد شغال في بقالة ولا كاونتر استقبال
ان شاء الله لمن اجي السودان حازورك عشان اتونس معاك في محل الشغل
وسندوتش الفول بالطعمية تجنن
سلام
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: حمزاوي)
|
Quote: سامي اخوي
مسكاقمي
مشجع فريق الكاسات المحمولة جوا
دايماً البوست حقك لذيذ وبيطلعنا من سئم وقرف الشكل بتاع ناس السياسة
تعرف انا لمن قريت البوست حقك دا ضحكت وقلت اخوي سامي
اكيد شغال في بقالة ولا كاونتر استقبال
ان شاء الله لمن اجي السودان حازورك عشان اتونس معاك في محل الشغل
وسندوتش الفول بالطعمية تجنن
سلام |
قريبي
سلام
والله شغال في حاجة العن بعيد عنك شغال في الموارد البشرية.
فيس تو فيس.
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
| Quote: بخصوص الفول(جربت الطعمية تخيل) برضو الحال في حاله!! |
حاول غير محل الفول البتشترى منه ...
او اقول ليك حاجة فى محل اسمه لذيذ فى وبالتحديد العمارات شارع 1
متخصص ليك فى الفلاقل دى بصورة رهيبة ..
او اقول ليك امشئ امدرمان وانت من امدرمان محل اسمه الواحة
الفول بتاعه دى اخطر من الخطير وما تنسئ تدخل الشوادى كمان ...
يا حليلك يا خرطوم ويا سوداننا ....
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: عاصم ابوبكر حامد)
|
Quote: او اقول ليك حاجة فى محل اسمه لذيذ فى وبالتحديد العمارات شارع 1
متخصص ليك فى الفلاقل دى بصورة رهيبة .. |
ياعاصم ناس الخرطوم عملو لي ناس امدرمان حديقة في مقابر البكري عشان مايجوهم في حديقة الرياض.
عاوزنا نمشي نكابس فلافل في العمارات.
وبعدين نحن زاتنا مابناكل فلافل طعمية يابلاش.
والليقيمات عندنا لقيمات(زلابية نهي)
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: عمر الفاروق)
|
الأخ سامي تحياتي
اعتقد ان عدم الإهتمام بالوقت هو ظاهرة غير حضارية تميزنا نحن السودانيين ولكن هذه الظاهرة نتاج طبيعي لطريقتنا في الحياة التي تتميز بالبساطة و التعامل الساذج مع كثير من الأمور، وغالبا ما يوصف الشخص الذي يحاول تنظيم وقته ويتمرد على حياة الفوضى بالفلقصة والإستعلاء .. واهديك النكتة القديمة دي.
واحد من اهل العوض جاء الخرطوم لأول مرة لزيارة قريبة وفي المساء الراجل اصر على الذهاب للسينما بحجة انه لم يدخل السينما في حياتة ، ولكن قريبة كان مرتبط بوعد هام، فقال لضيفة انا بوديك السينما لكن مابدخل معاك وبعد الفيلم ينتهي تعال البيت وفعلا وداه لحدي باب السينما والراجل دخل براه، بالليل الراجل جاء من السينما وقريبة سأله "ان شاء الفيلم عجبك" فرد عليه قريبة قائلا "الفيلم انا مالحقت اشوف فيه حاجة، والله لما سالمت الناس لقيتو انتهي"
الصاوي
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: عمر الفاروق)
|
Quote: سامي عبد الوهاب :
السلام عليكم ياااااااااااااااا شخص ...
شايف كل معجبينك من بورداب الرياض ..
ابسط يا عم ..
انا غايتو لو مكانك بقول ليهم رسلوا لي فيزا ..
تخريمة :
يا ابوجهينة إتحرك لينا في الموضوع ده |
يابو عمير مغتربين الزمن ده هم زااااتم عاوزين اليرسل ليهم فيزا وحبة مصاريف!!
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
سامي... الغريبة كل الزملاء الكرام ديل الدخلوا هنا ما علقوا على كلمة(أكردوا)...التي ذكرتها إنت..
.............
أنا زول تراث.. عشان كدة بس طلعت بي بوستك دا بكلمة اكردوا دي.. شفتها مولعة من بعيد.. إستهوتني.. وأنا لما ألقى حاجة زي دي..أحسن لى من أكلة ثمينة..أكلة ثمينة عندي في الخليج تعني(برياني بلحم الضان) وفي السودان عندي تعني(كمونية ضأن معاها جقاجق) في الفطور.. في الغداء( فاصوليا بلدية ذات الحبة الدقاقة موش الكبيرة) تكون مهرودة مع لحم ضان..خراف يكون نسبة اللحم فيها أكثر من الفاصوليا..
......................
أها كلمة أكردوا دي إستهوتني اكثر من ديل..
..........
هل ياترى في زول بعرف الكلمة دي غير ما يكون من أصقاع الشمال لا أدري
...............
أما ضيوفك الكتار ديل عندي ليهم دواء بس خليني اعرف جنسياتهم شنو؟
ضيوف في المنزل ضيوف في الشغل المسألة تختلف
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: عبدالخالق محمد خير)
|
Quote: بدون سلام بعدين تزعل
سامي انا جاي السودان قريب يعنى هسي كان داير اسلم عليك أعمل شنو تلفونك وغيرتو القاك وين ؟؟ إلا في الشغل ونتقل دمنا نعمل شنو ما مشتاقين وكده !!
Quote: فول الجان الذ حاجه فيه شنو 4 حاجات
السلام
النقه
الشمار
القطيعه
أضيف ليهم حاجتين يا نميري
البيزيانوس
الحساب |
0912240048 واديتك التلفون لمن كنت معاك....
لمن تجي سلم علي بالنية والنيه واصلة!!
مشتاقين!!
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
أخي سامي
تحاتي
بالرغم من القالب الكوميدي الساخر لهذا الموضوع إلا أنه يقدم رسالة قيمة جدا فيما يتعلق بموضع (فاقد الزمن) أو الوقت الضائع في كتير من الشركات والمؤسسات والدوائر الحكومية (خصوصا الأخيرة دي)...
ودا يرجعنا للموضوع المطروح دائما (هل نحن شعب كسلان؟)
والسؤال التاني: هل نحن شعب مجامل زيادة عن اللازم؟
وهل مكان العمل هو المكان المناسب لهذه المجاملات؟
والأهم من دا كلو هل هناك فائض عمالة في هذه الشركات؟ يعني هل في ناس تمامة عدد بس قاعدين يضيعوا في وقت الناس؟ ولا الشغل ممكن ينتظر (ملحوق)؟
السلام شئ كويس جدا بس كترتو مسيخة... يعني زي ما بيقول المصريين: كتر السلام يقل المعرفة...
ويديك العافية يا سامي
السلام عليكم ورحمة الله وبركاته
| |
|
|
|
|
|
|
|
|
|
Re: يجماعة اخير نقعد نسلم النهار كله ولا نشتغل!! (Re: سامى عبد الوهاب مكى)
|
Quote: أخي سامي
تحاتي
بالرغم من القالب الكوميدي الساخر لهذا الموضوع إلا أنه يقدم رسالة قيمة جدا فيما يتعلق بموضع (فاقد الزمن) أو الوقت الضائع في كتير من الشركات والمؤسسات والدوائر الحكومية (خصوصا الأخيرة دي)...
ودا يرجعنا للموضوع المطروح دائما (هل نحن شعب كسلان؟)
والسؤال التاني: هل نحن شعب مجامل زيادة عن اللازم؟
وهل مكان العمل هو المكان المناسب لهذه المجاملات؟
والأهم من دا كلو هل هناك فائض عمالة في هذه الشركات؟ يعني هل في ناس تمامة عدد بس قاعدين يضيعوا في وقت الناس؟ ولا الشغل ممكن ينتظر (ملحوق)؟
السلام شئ كويس جدا بس كترتو مسيخة... يعني زي ما بيقول المصريين: كتر السلام يقل المعرفة...
ويديك العافية يا سامي
السلام عليكم ورحمة الله وبركاته |
يابو السيم فعلاً في ناس شغالة مندوبين سلام داخل اروقة الشركات والمصالح....
| |
|
|
|
|
|
|
| |
عاصم ابوبكر حامد
ايهاب نميري
عمر الفاروق
ودقاسم
ابو جهينة
elsawi
waleed500
منصوري
فرح
سامي عبد الوهاب إدريس
فيس بوك
تويتر
انستقرام
يوتيوب
بنتيريست