|
|
 قراءات الظهيرة (2) # سيناريو اليابسة # ( عاطف خيري )
|
قراءات الظهيرة (2) # سيناريو اليابسة # ( عاطف خيري )
==============================================================
مخدوش الفضا..
طويل الحزن .. مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان .. شهيق
لونو زى سرك .. تكلمبو الصديق
أمو تتوحـّم على طين البحر
قبال تقابل والدو .. صدفة على الطريق
عمرو ستة شهور حِلِم
إنو الأرض مسجونة فى موية .. وكل الناس مراكبية
اليابسة ... فِركة .. مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة ..
مجدوع فى الفراغ
والرقصة لى البت فينا ..
فوق كل المسامير الندقها فى البساط
والرياح حكـّامة بى دلوكة مرّقت الشياطين .. المنها
إتجنن فقير الحلة دقيناهو
بى نفس السياط
كل المجرات .. النيازك والشُهُب
ودع راميهو الله على السما
والدنيا زار
يا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون .. والصرير
منهوبة مقبرة الفواكه فيكى
قولى معاى شرف القبايل .. جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة ..
وأدنقر ألبِّسا فى شبط أخضر
وأبيت مبلول .. وأصلِّح فى الرباط
أنا ليه شبابيك البيوت الواجمة .. والناس البُساط
وليه يرجانى النخل
فى السكة يفتح قلبى خمارة .. وخلاوى ..وبيت بكا
تعبت من المساسقة والهتاف .. ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة .. وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف .. ولد
إشتبهوا فينى ورا الجبل
شافونى دسيت الهداهد والزبد
صفا !
إنتباه !
وقعت من الهدهد بلد
نهبوها .. وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام .. إتوضا مارق للصلاة
القانقرد فى حزنو يغزل
شالة من صوف
الطواويس شارّة قمصانا
المزركشة فى الضحى
الزرازير بى عراريقا
المغبشة ..جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل .........
حجر الدُّغُش فى الموية
يقلع ضُفرى يادم !
ده ما وكت الرسم واللون
وجات المغارب حننت إيدا .. ومشت
سبحانك الأديتنا من حزنك فوانيس
الغراب يا نوح طفش
واليابسة وين ...؟
يا الله ما يابس سوى حلقى
المجرح بالدعا
طير يا حمام !
والحمام يا نوح يجامل فى السما
وبيّاع مناديل خضرا فى كل العصور
ارفع سوالك بوصل
ليه الفجر مهجور تحت
حاجب حبيب النايمة فى الجبل
المشلخ بالرمال
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة .. والليل والشتا
الهدهد تميمة الموت
معلّق فى بيوت الناس .. نعش
من خرافاتهم تعال
من دياناتهم تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخاينة
فى الدم القديم
مين يوصف للنحل ريق الحبيبة
وحبة القمحة التقوم فوق محفضة حبوبة فى الزمن اللئيم
مين اليوصف
بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مزيداً من الطين يا إله
أبنى خوفى عليك .. ومنك
أبنى آخر بيت .. حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
ــ يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر .. عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك .. نمت
كل الطيور غنت ..
منك يجينى سكوت
مين الهداك للناس
أو هدّ فيك الموت؟
يا أوسم الجايين ..
أنا قلبى حِلّة حنين
والشوق فتحنى بيوت
يا صالحة لا جنبك ..
لا فتّ منك فوت
دايماً معلق بين ..
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة .. زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة .. بالنسيج
وصيوان عزا نوح
المكفّن بالوعود
الهدهد يرك فوق دفـّة المركب .. يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
.. الشموس فاقت
ونوح بعاين فى مفاتن اليابسة
تغسل فى حصا .. ومتبرجة
سبحانك الأديتنا من ملكك سلاطين .. وإختفيت
هاك أنبياءك سالمين
وأنزل مسافة توجعك .. غابة
رقيصنا الحى
طبولنا...
وليك شبال
من اليابسة الممشّطة بالملح
... وهدهد
|
|
 
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
المكرم / هاشم أدم
مساء الورد
**************
تشكر على المرور
وتاني ( عاطف خيري ) من أعمالوا المسيفة في جهازي
مع خالص الود
--------------------------------------
نكر صوتك صداك
غالطني الزمن فيك
شهرت على الجفاف وعدك
بطاقاتنا الخريفية
رجع فاضي الكلام مليان
معاك أتبرجت غيمة
وشهق جوايـا
صوت جدول
مرقت على المطر حفيان
لقيتك والرزاز مدخل
وناديتك :أقيفى معاى
نشيل كتف الغنا الميّل
ونتخيل
حلم دونك بيتحقق
وقبلك خيل دماى واقفة على
شريانى .. تتشهق
وعرف صوتك .. صداك غنيتى
رشحت حلقك لى إذاعات الشجر
والمنتظر من عودة المدعو المطر
والمسادير .. والطنابير
واللسة فى رحم القصيد
والدابو حسّ فى سوق عكاظ
بين مزادات الحروف
غيبت رسمك .. وإحتكرتك
لى الظروف
للزمان الجايى .. واللحظة اللى
فاتت منى هسة
يا واقفة بين جرح السحاب
وبين شهقة الأرض البكر
ما كان ده ريد
كان إحتمال تغيير قوانين حركتك
ما بين حديثنا.. ولحظة
الفعل الحقيقى
وإنتباهك إنتى للشارع البيرجع
تانى لى نقطة بدايتو
وإنحيازك إنتى للشارع البيرشح
فى مسام رملو التوقع
وما أتعرف قانون نهايتو
غايتو أمشى فى الدرب البطابق
فيهو خطوة صوت حوافرك
يا فرس كل القبيلة .. تلجموا
يكسر قناعاتا ويفر .. يسكن
مع البدو .. فى الخلا
ما يرضى غير الريح
تجادلو وتقنعوا
........
إفترضتك لون أساسى
يمنح اللوحة إزدواجية القراية
ويفتح الضو
بين خطوط الريشة ..
والخط الإضافى .. الجايى
من شبكية الزول البشاهد
وإكتشفنا الرسمك وأنا
وبرضو التوارد فى الخواطر
ونفس أرقام التذاكر
البيها سافرنا وشهدنا
إنفجارك فى الأرض
يا سمرا يا واضحة
ما غنيت يوم جيتك .. صدفة
ما ظنيت يوم جيتك صدفة
قبل أبداك كان غصنك .. بشـّر
يوم ما كان إحساسك مسرى
عرج غيمك فينى .. ومطّر
لحظة طار عصفور من صدرك
رتب فينا إحساس بالإلفة
ودوزن عصب الزمن الأشتر
وإتوكلت عليكى .. وقلت
المارق منك داخل جرح الوردة وراسم فوقا غناوى الطل
المارق منك
رجع للغابات الزنج الهاربة
وللعتمور العرب العاربة
وأدى الكون مفتاح الحل
المارق منك
شادد عصب الورقة .. وحرفى
وراصد فى اللاّ وعى سكونو
مواعيد صحوه .. وحلمو ولونو
شارى يقينك فى ظنى
سارق لحظة إنى أفكر
المارق منك
مارق منك .. أو .. منى
او مت شهيد ..
***************
ما تتضارى ورا الدعوات
وما تتلبسي فرح الفات
يسكن فيك النغم الزايف
ويسرق حاسة شوفنا الواقفة
على رجلين جوانا
نحن الهاوية .. والمتطامن
من الأرض
آه من نحلك ساعة يرحل
ولمن يكتب فينا الحنضل
ويختم عمرو بفعل الشهد
قال الجدول :
طلوع النخلة .. مرور
الريح .. واحد
لكن الريح بعانق حقل
ونحن بنطلع نخلة .. وننزل
ونكتب فى ذاكرة الصفق الأخضر
سجنا الريح فى الورق الأبيض
وجهناها ضد التمر الناعس
يسقط زى قبعة الحارس
زى الكان بيناتنا ..و فات
قالت غيمة :
( بين قوسين غيمة لئيمة)
أولاد الشارع فهرس لى كل المدن
التهرس جوفك بالأسمنت
قالت ريح :
شوف الناس قنديل
لو ما نور يحرق كوخ ..
وباقى الحلة تنور
أو يتفجر جوخاو ينزل بوخ
يقول للنسمة الزايفة .. أقيفى
لو تتفرد ريح .. تتشرد ريح ..
ريح الخوف
لو تتفرد ريح تبدا تفرتق
ضفاير المدن الكاذبة
تعيد تسريحتك
يوم سمايتك .. شكل قامتك
كيف تموتى .. وتحيى تانى
ويوم قيامتك .. هو البيدينا الثبات
يا مجلوبة فى قافلة رق
ما بستحمل صدرك رصاصة ظلم
يا صابت رحم الفال
يا قطعت حبل الحلم
يا كنا نبيعك .. يا نسرق
إخترنا النار .. الضلها يحرق
طمنـّاك إنو الدنيا بخشها ضو
يجرح جلد العتمة
دم الليل قربان فجرك
يا بت يا نيل
لو نامت قمحة على
الأبيض وإتشرت زيو
وزاد الأبيض فى غيو
ومدد رجلو اليسرى
ما كان الكسرة .. جاتك من برة
صفرا .. ومنكسرة
زوجناك الشهدا وِلاد الكد
الماتو عشان الشعب
زوجناك ما عندك ضرة
زوجناك ما جاتك ضرة
وما إنشاف ماعونك فى
الحلة يساسق
ويلقى فتات
قال الأبيض لى الأزرق:
يبقى ضد الإنتباه
وضد تواريخ التمازج بينى .. بينك
ما البشوفك فى مراهقة الخرائط
وفينا من وجع المسافرين واطه .. ما لاقت هوية
رد الأزرق:
مطر الحبش لو كان نبش
جواك سقف
و هد حيلك فى الدواخل
وشدّ عصبك فى المداخل
صوت مراكبى
وإيد بتسأل فى القمح
وفينا من فرح المسافرين
قصة الشمس .. القضية
يا أعشاب النيل الأبيض
ما تتضارى ورا الدعوات
ما تتلبسى فرح الفات
أقرا تاريخك .. وأخاف
أسأل جبين الفجر .. ألقى
الفجر مطعون فى القفا
هل سافرت فى دمك المحقون
رجا حبة غضب
ما شلنا جمرك .. وإنطفا
جوانا نارك .. والمطر
جايين بالكتابة ..
وضربة الناس المهابة
لو هز نخلك باشبزق
ما غادرت تمرة السبيط
وما ساور الطورية شك
إنو الأرض أنثى .. وبتحمل بالحلال
مين اللى قال
إنو المسافة البينا بين الشمس طاقة
أو مياه النيل
بتدخل فى عروق السنبلة
المسقية بى عرق الجعانين ..
والمساهرين بالبطاقة
أقرى تاريخك .. وأقيف
جواكى .. والزمن النضيف
جواى .. من جواك غضب
سلم مفاتيح السؤال
جيل الشمس .. موكب حريق
واقف على باب الدخول
بيناتو بينات الوصول ..
لحظة شهيق
بيناتو بينات الوصول
لحظة شهيق ..
*****************
( اقتراح + شهيق )
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
عاطف خيري ...................
من الشعراء الشباب الذين شقوا طريقهم كما تسلك المياه رحلتها داخل الأنهار -ينساب لك شعره كالماء تماما حينما تضعه يأخذ شكل الأناء . تغى له الراحل مصطفى سيد أحمد بجزء من روائعه , تحسه بالمشاعر السودانيه الطيبه من الكرم والاستقبال الراقى....................
(منقول )
=============================================
أقراك مرة صاح
خلينى أقراك مرّة صاح..
عكس إحتشادك فى الحضور
هل غاب معاك وعى الطريق
أم بيكى زكـّانى الزمن
ماشيك .. وعارفك يا حريق ..
فى يوم غماماتك .. بجن
فرهد غيابك .. أغنيات
ظلت أراضى اللقيا بور
بلقاكى يا كل الطيور ..
مسجونة والحرية .. سور
وبلقاكى بيناتنا الثبات
وبيناتنا شمس البكرة
فى لحظة .. مخاض
***********
طول الوجع رشـّح
مواطن العافية .. فيك
خلانى أرجع وأبتديك
وأقراكى من كل الجهات
ومابين أقابلك .. ومشتهيك
كان حلمك الأول ترفْ
وكنتى الصبية الغايبة
فى زحمة حجا .. وكلمة شرف
كنتى الزوايا الميتة ..
فى متحف خزف
كنتى الوصايا العشرة
واللون الشحيح
********
سميت مساحاتتك حكر
كل البيحلمو بى الشمس
فجـّرت من واقعك .. عبث
سكـّنت فيك ..ضد السكون
كل اللى كان ممكن .. يكون
وطارت ضفيرتك ليل غنا
جدلة صبُر .. وطولة نفس
ومابين أقابلك ومشتهيك
ومابين أقابلك وجيت عليك
كان عندى ليك بس نحنّ
والجرح الثرى
وخيبة أمل أم الشهيد
دى الكلمة .. والوجه الجديد
وكان إحتقان نبض الزمن
نومة طفل .. فوق الدّمن
يا صاحية بى الحاصل علىْ
يا نايمة عن فقرى البليد
سميت مرافيك الوطن
صبحت مناحاتك .. نشيد
خلينى أقراك مرّة صاح..
عكس إحتشادك فى الحضور
هل غاب معاك وعى الطريق
أم بيكى زكـّانى الزمن
ماشيك .. وعارفك يا حريق ..
فى يوم غماماتك .. بجن
فرهد غيابك .. أغنيات
ظلت أراضى اللقيا بور
بلقاكى يا كل الطيور ..
مسجونة والحرية .. سور
وبلقاكى بيناتنا الثبات
وبيناتنا شمس البكرة
فى لحظة .. مخاض
***********
طول الوجع رشـّح
مواطن العافية .. فيك
خلانى أرجع وأبتديك
وأقراكى من كل الجهات
ومابين أقابلك .. ومشتهيك
كان حلمك الأول ترفْ
وكنتى الصبية الغايبة
فى زحمة حجا .. وكلمة شرف
كنتى الزوايا الميتة ..
فى متحف خزف
كنتى الوصايا العشرة
واللون الشحيح
********
سميت مساحاتتك حكر
كل البيحلمو بى الشمس
فجـّرت من واقعك .. عبث
سكـّنت فيك ..ضد السكون
كل اللى كان ممكن .. يكون
وطارت ضفيرتك ليل غنا
جدلة صبُر .. وطولة نفس
ومابين أقابلك ومشتهيك
ومابين أقابلك وجيت عليك
كان عندى ليك بس نحنّ
والجرح الثرى
وخيبة أمل أم الشهيد
دى الكلمة .. والوجه الجديد
وكان إحتقان نبض الزمن
نومة طفل .. فوق الدّمن
يا صاحية بى الحاصل علىْ
يا نايمة عن فقرى البليد
سميت مرافيك الوطن
صبحت مناحاتك .. نشيد
*************
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
الرائع /محمد بهنس
لك الود والتحية
--------------------------
شكرا للمرور وتفضل من بعض ماعندى ونأمل في الاخوه أضافت الكثير من كلمات الرجل الجميل/ عاطف خيري
***
لك ولهم جميعا خالص الود
**********************
الجالوص
معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حلمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
المكرم / محمد امين مبروك
كل الود والامنيات ,,,,,,,,,,
***********
كنت أتمني فقط لم اجدها من ضمن ما حفظت بجهازي أتمني ان ينزلها أحد الاخوان في هذا ( البوست )
والمقام روعة على روعة
-----
لك الود ,,,,
(عدل بواسطة عبد الناصر الخطيب on 03-16-2006, 06:55 AM)
| |
|
|
|
|
|
|
|
|
 Re: قراءات الظهيرة (2) # سيناريو اليابسة # ( عاطف خيري ) (Re: هشام آدم)
|
النبيل
عبد الناصر
لك التحايا المدهشة كدهشة هذا المبدع عاطف خيرى الذى امتع ارواحنا بجميل اشعاره المبهرة حد التأمل !!
Quote: إفترضتك لون أساسى
يمنح اللوحة إزدواجية القراية
ويفتح الضو
بين خطوط الريشة ..
والخط الإضافى .. الجايى
من شبكية الزول البشاهد
وإكتشفنا الرسمك وأنا
وبرضو التوارد فى الخواطر
ونفس أرقام التذاكر
البيها سافرنا وشهدنا
إنفجارك فى الأرض
يا سمرا يا واضحة
ما غنيت يوم جيتك .. صدفة
ما ظنيت يوم جيتك صدفة
قبل أبداك كان غصنك .. بشـّر
يوم ما كان إحساسك مسرى
عرج غيمك فينى .. ومطّر
لحظة طار عصفور من صدرك
رتب فينا إحساس بالإلفة
ودوزن عصب الزمن الأشتر
وإتوكلت عليكى .. وقلت
المارق منك داخل جرح الوردة وراسم فوقا غناوى الطل
المارق منك
رجع للغابات الزنج الهاربة
وللعتمور العرب العاربة
وأدى الكون مفتاح الحل
المارق منك
شادد عصب الورقة .. وحرفى
وراصد فى اللاّ وعى سكونو
مواعيد صحوه .. وحلمو ولونو
شارى يقينك فى ظنى
سارق لحظة إنى أفكر
المارق منك
مارق منك .. أو .. منى
او مت شهيد ..
*************** |
لله درك ياعاطف !!
مااروعك !!
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
الرائع : محمد بهنس
تشكر على المرور والاشارة
التي اتحفنا بها متوكل تاور في ( بوسته ) المميز
لك وله خالص الود,,,,,,,,,,,,,
(عدل بواسطة عبد الناصر الخطيب on 03-16-2006, 03:37 PM)
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
المكرم / هشام أدم
يسعد مساك
===================
سعيد بتواجدك وياريت لو عندك نصوص كاملة لعاطف خيري
تنزله لينا في البوست ده فلقرائة لعاطف خيري جمال لاينتهي
لك الود ,,,,,,,,,,,,,,,,,
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
الاستاذة : نادية عثمان
يسعد مساك بكل خير ,,,,,,,,,,,,,
=============================================
حضورك في هذا ( البوست ) أسعدنا يظل عاطف خيري المميز يدهشنا
ولك التقدير ,,,,,,,,,,,,
(عدل بواسطة عبد الناصر الخطيب on 03-16-2006, 01:58 PM)
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
الأخ عبدالناصر لك والاصفياء هنا جزيل الود
وعزرا أقدم لكم نص سيناريو البحث عن يابسة للشاعر الصديق عاطف خيرى كما لحنة
ووضع مسيقاه مصطفانا سيدنا الذى نحمد له مقبوله من الابداع بل وقد وضع له ايقاعات
متاثرا فيها بالايقاع الخليجى اى ايقاعات الغوص
الهدهد مخدوش الفراغ
طويل الحزن
مصاب بالديانات والشرود
نوح
يبلغ من الطول
مسافة يشتهى الغرقان
شهيق
اليابسة
فركة مدخورة ليوم فيه
ساير النيل قطاع رحط
كل الجزاير والبنات
البفتحو الباب للمطر
وانا
جدولك شارف على كل الجانين الصاحية فيك
والغباش فى دمى منك
لو كسر ضلعين عزرتو
لكن نهر كل العصافير البتلعب فى الوريد
وفناك جواى زى حجر
والبينا مافات الدواير
الليل
خمار القمرة مجدوع فى الفراغ
والرقصة لى البت فينا فوق
كل المسامير الندقها فى البساط
والرياح
حكامة بى دلوكة مرقت الشياطين
المنها المنها اتجنن فقير الحلة
ودقناهوا بى نفس السياط
كل النيازك
المجرات الشهب ودع
راميهو الله على السما
والدنيا ظار
ياهدهد هنا مرت مراكب نوح
محملة بالبخور
مين اللى شال من طاقة الطين
البعيد قنديل حبيبتى
وطيب الجرح المثير
مين السرق من بابا
مفتاحو الملون والصرير
منهوبة مقبرة الفواكه
فيكى قولى معاى ياشرف القبايل جر
الشاف تباريح الطلح فى النار
شافنى مرقت من عندك ضرير
انا ليه تجينى الموية حفيانة
وادنقر البسا فى شبط اخضر
وابيت مبلول واصلح فى رباط
اناليه
شبابيك البيوت الواجمة
والناس البساط
وليه
يرجانى النحل فى السكة يفتح
قلبى خمارة وخلاوى
وبيت بكا
تعبت من المساسقة والهتاف ياغيمة
اتبنى جبهة القمرا السهر
والحمى طول الليل تهضرب
وياهدهد لقيت امك ترششرش
فى السعف من عينا
تجبر خاطرا المكسور عليك
ينكسر خاطر السعف
فى ايدا
ياهدهد قيام
من السما الاول قيام
من السابع قيام
وانزل
مسافة تهبشك غنوة
واناولك كاس
( لاحقااكمل لكم باقى النص وشى من حديثى مع مصطفى عنه ودمتم)
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: عبد الناصر الخطيب)
|
الاستاذ : بدر الدين الامير
اطيب التحايا والتقدير ,,,,
==========================
شكرا علي المرور الجميل
في أنتظار ما تبقي من النص والحديث
ولك الشكر على هذه الاضافة الرائعة
***
تحياتي ,,,,,,,,,,,
(عدل بواسطة عبد الناصر الخطيب on 03-17-2006, 02:43 PM)
| |
|
|
|
|
|
|
|
|
|
Re: قراءات الظهيرة (2) # سيناريو اليابسة # ( عاطف خيري ) (Re: بدر الدين الأمير)
|
عبد الناصر والاصفياء شكرا مليان بتفاصيل الذاكرة مع مصطفى وعاطف
النصوص التى وردت عبر هذا البوست وهى
سيناريو البحث عن يابسة
شهيق
اقراك مرة صالح
الجالوص
لحنها وغناهامصطفى
ام سيناريو الهمباته الاخير الذى اورد الاخ هشام ادم جزء منه
فقد كانت قراية مصطفى له لبعض الاصدقاء فى امسيت اليوم قبل الاخير لرحيله
هو اخر فعل ابداعى مارسه على قيد الحياة وعلق عن عاطف بقوله ( ان نصوصه دايما تضعك
فى حالة تمنى ليتك كنت كاتب هذا النص)
| |
|
|
|
|
|
|
| |
هشام آدم
محمد امين مبروك
بدر الدين الأمير
فيس بوك
تويتر
انستقرام
يوتيوب
بنتيريست