انت تكتب وانا اكتب وكلنا نكتب في هذه المنتديات ذات الطابع الاثيري ، ولكن هل منكم من سأل نفسه يوما لماذا يكتب او بمعنى اخر ، هل يكتب لمجرد التعبير عن حالة خاصة لحظية تتملكه يرغب عندها في التعبير عن شيء ما ، ام لهدف اخر؟ سودانيز اون لاين هذا المنبر الضخم الذي بدأ عاديا كغيره من المنتديات ليصل بعد سنوات الى هذه المكانةالكبيرة ، منبر يحمل ايضا علامة او ماركة الطابع الاثيري ، بمعنى اننا اكعضاء فيه نقف خلف شاشة نكتب مشاركاتنا بحرية ..في الاخر بتحكمنا شاشة الكمبيوتر ، يمكن الكثيرين الذين كان لهم المنبر جسر للتواصل ، فخلقت علاقات اجتماعية وانسانية امتدت ابعد من الشاشة الكمبيوترية.. ولكن يبقى السؤال كل واحد بيكتب ليه؟؟ او بينظر للبورد بياتو مفهوم؟ هل الواحد بيكتب عشان يعبر عن شيء جواه ، ام بيكتب على طريقة (انا اكتب اذن انا موجود على طريقة شوفوني) ..وهل البورد هو مكان للاستعراض وابراز العضلات وساحة للظهور؟ سأقول رأي بشكل عام حسب علاقتي بالبورد على مدى اربع اعوام كاملة تخللتها الكثير من فترات الانقطاع والابتعاد والمشاهدة من على البعد، في كثير من الاحيان بسبب حالة الشد والجذب المتعاقبة في البورد او باختصار الجو العام السائد .. لاحظت انه في معظم الاحيان انه احنا كسودانيين بنميل في مشاركاتنا الكتابية مع الاخرين الى التعامل من خلال اسم الاخر بغض النظر عن مضمون كتابته ، ممكن جدا يكون الاخر زول (كتّّّاب) بتشديد التاء ، لكن الاسم او الحالة الاولى او الانطباع رقم 1 هم اللي بيقودوا عملية المشاركة ، فهمها كتب هذا الشخص بعد ذلك يظل التعامل معه من خلال اسمه فقط لتبدأ عملية التفخيم والتعظيم من نوع يا شفيف/ة ، يا رائع/ة .. و ...و .. الكثير من المطصلحات والتسميات التي تخلو من عدم الموضوعية حتى لو كتب هذا الشخص اي كلام .. فلا يكفي ان اجد كلام كبير مثلا على شاكلة ( تسرب دمي من خلال وريدي واستقر في دواخلي ليخلق لي حالة من الوعي الانساني المطلق) .. ممكن يكون كلام كبير ضخم في ظاهره .. لكن بيبقى بعد كده المضمون والمعنى الذي يريد هذا الشخص توصيله..
الشيء الاهم انه هل الناس بتتعامل مع البورد كمستقر لتفرغ فيه كل شيء بداخلها؟ بمعنى انه مرات كتيرة البعض بيديك الاحساس انه بيحمل البورد اكثر من طاقته فيتم التعامل معه على اساس انه مكان لتمرير اي شيء من خلاله..
واكيد انه كل شخص له مطلق الحرية ان يكتب ما يشاء وبالكيفية التي يراها طالما في حدود الادب واللياقة و لا يمس الاخرين بشكل مسيء.. لكن يبقى بعد ذلك احساس الفرد منا عند دخوله للمنبر ، وفي كثير من الاحيان بيحس انه داخل مكان هاديء على السطح يغلي في داخله ..مع الكثير من القدرات الاستعراضية وعدم الموضوعية واثبات حالة لا تتفق مع فكرة كون المنبر عالم داخل حوش الانترنت يوفر لحظات جميلة تنتهي بمجرد قفل الجهاز والخروج بره الشبكة ..
03-06-2006, 06:33 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
لاننا نتوه فى عوالم فقدنا فيها الهوية تقريبا لذا تجدينا نسرع الخطى الى هذا البورد لنجد من نحب ومن نشتهى ومن نتمنى ونمتع النفس والعقل بقراءات مفيدة وممتعة ونتواصل مع اخرين نكن لهم اعزاز وود ..
اصبح البورد عالم موازى لعالمنا الواقعى بل خلق لنا وصلات واقعية وامتزج هذا بذاك فكان التواجد المتواصل لنا هنا ....
من عجب قابلت بعض بورداب الداخل وعرفت انه العلينا عليهم رغم وجودهم فى وسط الاهل وفى وطن الحب والجمال ....
انها مسائل متشابكة
ولكن البعض لديه رسالة يود ايصالها من خلال البورد كذلك ....
والبعض يجد نفسه فى مشاكسات الاخرين والعكننة عليهم بسبب وبلا سبب ..
ولله فى خلقه شئون ...
واخلص الى أن البورد عزيزتى حياة فيها كل ما فى الحياة ...
والشكر للأخ بكرى
والشكر لكل من يجعلنا ناتى قسرا الى البورد لنبحث عن حروفهم التى تضوع عبقا
وانت منهم بلا شك عزيزتى ( يا رائعة )
03-06-2006, 06:34 AM
سامي عبد الوهاب إدريس سامي عبد الوهاب إدريس
تاريخ التسجيل: 11-15-2005
مجموع المشاركات: 1509
أتفق معاك في أغلب ما ذكرت.. أنا شخصيا ما كتبت كتير لكني أرى أن تكتب ما تحس إنو ممكن يفيد بعض الناس وممكن يعرفك ببعض الناس وممكن يخليك تفهم بعض الأفكار الغائبة عنك من خلال مشاركة وردود الآخرين الإيجابية
مع الشكر
03-06-2006, 06:34 AM
Foetus Foetus
تاريخ التسجيل: 09-30-2002
مجموع المشاركات: 123
Salam, Good point, am sorry but I dont have access to Arabic keyboard, this board is not different to the Sudanese society where people focus on messenger rather than the message itself. This is why a post like this doesn't get any replies. Regards
03-06-2006, 06:36 AM
Ahmed Mohammed Osman Ahmed Mohammed Osman
تاريخ التسجيل: 10-10-2005
مجموع المشاركات: 1381
مايا ايتها الشفيفة الرائعة حد الذهول موضوعك هادف ومهم ........................
ههههههههههه تذكرت بوست للاخ ناذر صنف وبوب فيه كتّاب سودانيز اون لاين بصورة طريفة لكن يبقي لكل كاتب وجهة نظر مختلفة بالطبع عن الاخرين والا لما كانت سودانيز اون لاين تأتلق بهذا الالق دوما
أولاً أنا سعيد جدأ كوني لقيت ليك بوست بعد طول غياب ثانياً عن نفسي تعودت أن تكون بوستاتي في (قالب كوميدي) وفي كثير منها يكون الموضوع محيط بي وحتى مداخلاتي للآخرين تكون خفيفة ترويحية خاصة عندما يعج البورد بالمشاكل فأنا والعياذ بالله من كلمة أنا لا افهم في الطب كثيراً وكذلك مجالات متعددة تنقصني فيها الخبرة طبعاً دا ما بمنع أني أتداخل في مواضيع دينية أو إجتماعية أما السياسية (أكتليني عديل) ولا تطالبيني بالمداخلة أنا بخاف حتى من (الألفة) بتاع المدرسة
أكرر سعادتي بهذا البوست وأتمنى أن لا أكون بعدت عن المقصد
لا حولالالالالالالالالالا
03-06-2006, 07:25 AM
مشتاق مشتاق
تاريخ التسجيل: 02-19-2002
مجموع المشاركات: 579
(لاننا نتوه فى عوالم فقدنا فيها الهوية تقريبا لذا تجدينا نسرع الخطى الى هذا البورد لنجد من نحب ومن نشتهى ومن نتمنى ونمتع النفس والعقل بقراءات مفيدة وممتعة ونتواصل مع اخرين نكن لهم اعزاز وود)
يمكن نكون فاقدين احساس الانتماء لوطن محدد ، لكن اخي العزيز في كثير من الاحيان بحس انه الناس بترمي بكل حمولها على البورد ، يمكن الناس تكتب ، تقرأ افكار غيرها ، تناقشها ، تستفيد منها ، تتواصل ، تخلق صلات جميلة ، تتواصل بكل الحبال ، لكن تبقى حقيقة انه البورد مكان رقيق جدا ابعد عن انه نمارس فيه ما نقوم به على ارض الواقع بكل تفاصيله واقعنا في الحياة مثقل باشياء عديدة فيها الكعب وفيها الكويس ، اذا حاولنا ننقلها للبورد يبقى حنحول البورد لواقع اسوأ من الواقع اللي بره .. عارف ليه ؟ لانه قعدين خلف شاشة محتمين بيها خلاف الواقع اللي بيخلينا نخجل شوية من مواجهة الوجوه..
الاخ الكريم سامي عبدالوهاب تحياتي اكيد اي شيء في البورد هنا بيقدم ليك شيء سواء كان كويس او بطال ، ايجابي او سلبي ، لكن ياريت الناس لو بتقيف عند حدود اقرأ واستفيد دون الدخول في متاهات تانية بتخلي الواحد يقفل النت ويطلع بره الشبكة حتى لا يعيش واقع سوداني اضافي يتميز بالصعوبة تسلم لمرورك
الاخ الكريم Foetus ولا يهمك اكتب كما تشاء باي لغة ، فعلا زي ما قلت المجتمع السوداني بيركز على اسم الشخص اكتر من المضمون وده اللي وصلنا للحالة الاحنا فيها حسه عارف لما كتبت البوست ده قلت قطع شك بجي القاهو وصل للصفحةالعاشرة ، فلست من الارقام المشهورة التي توصف بيا شفيفة ولا غيره من الصفات التي يعشقها الشعب السوداني و اللي خلتنا نصل لحكومة الانقاذ ولا امتلك في بروفايلي صورة كحسناوات هوليوود ، يعني حاجة تكبر كومي ما في
مشكلتنا كشعب في كثير من الاحيان عندنا عدم الموضوعية ، يعني نمجد غيرنا ظالما او مظلوما فقط لانه في يوم ما ترك لينا انطباع كويس من خلال كلام من النوع الفاهم جدا واللي ممكن اي شخص يجيد ترديده ن وعادي جدا ممكن يكون الانطباع ده منقول من الغير وليس من صميم رأينا الخاص او شفنا واتأثرنا بشكله الخارجي لا نسعى لقراْءة المضمون الحقيقي بغض النظر عن الاسم والشكل حتى لو كان ( وش ككو) دمت
ايتها الشفيفة ) الرائعة حد الذهول ) شكرا للتشجيع على طريقة مجتمع سودانيز اون لاين ، كلمات تخليني اشكّل حكومة على الفور تطيح بحكومة البشير لووووووول
مالو الناس تختلف في وجهات النظر وده شيء طبيعي وبيخلق حماس في الكتابة ، لكن المسألة ما تتحول في معظم الاحيان انه الواحد يجيب عدته وعتاده ويعسكر هنا في البورد لينقل كل تفاصيله واحساساته ، يعني بالظبط زي ما عايش في الواقع يعيش في البورد بل يصل لمرحلة انه يكره كمان ، يعني الموضوع ما محتمل ده كلو البورد في الاخر ما واقع معاش ، هو لحظة بنكتب فيها وبنطلع احساسي لما اقعد قدام الكيبورد ، زي احساس زول قاعد في حفلة فيها مختلف الناس بشوف وبتفرج وممكن اشارك لكن برجع عادي لوضعي الطبيعي ، يعني زي ما قالت العزيزة شيري بتاكي الباب وبتخارج
بدرالدين الما شين
سعدت بمرورك ايها الفنان ( خذلتك لا بقول شفيف ولا رايع) مالو الناس تكتب انشالله تكتب طريقة عمل الكسرة على طريقة اسامة السيد لكن بس يرحمونا من المبالغة في الاداء (عفوا) اقصد المبالغة في الاتكال على البورد يعني لو الكهربا قطعت ساكت صلتي بتنقطع بالنت اها الناس تمشي وين بعد داك شكرا كتير للمرور
حقيقه انا اكتب لانني احس من دواخلي انى اريد ان اكتب بغض النظر اذا كانت هناك مشاركات او لم تكن)
فعلا يعني الواحد المهم يكتب في اللحظة العاوز يكتب فيها ويشارك حيث يجد انه الموضوع يروق له ، بدون الدخول في تفاصيل الاسماء والانطباعات الاولية .. ولا مانع من الاختلاف لكن اكتب من منطلق فكرة مسبقة عن الشخص فده هو الشيء اللي بيخلي المضمون يضيع والناس تكون ماشة زي الماشة في قطيع
تسلم اخي لمرورك
03-06-2006, 12:51 PM
Sahar Abdelrahman Sahar Abdelrahman
تاريخ التسجيل: 08-04-2003
مجموع المشاركات: 517
رغم أن لديّ كتابات كثيره إلا أن مشاركتي بالبورد قليله...فلست من هواة أن يكون لديّ كل يوم موضوع أو بوست...أنا أكتب مشاعري بصوره منتظمه...لكن هل كتاباتي الخاصه سيستفيد منها الناس أم لا...إذا كانت عندي فكره معينه فأنا أحب أن أتناقش عنها مع الناس...المنبر الحر شكل لي عالما آخر أهرب إليه من غربتي وأتواصل مع الناس فيه سواء إتفقنا أو إختلفنا...لديّ أصدقاء رائعون أعتز بهم هنا... لديّ قناعه خاصه وقد تكون خاطئه وهي أن فكر الإنسان يمثل شخصيته ودواخله...لذلك أنا أتعامل مع الكثيرين هنا من هذا المنطلق... أحترم الجميع وليس عندي وقت لإضيعه في المهاترات...الحب وتقبل الآخر هما أساس التعامل عندي مع الجميع...
مع معزتي
03-06-2006, 01:10 PM
hatim hatim
تاريخ التسجيل: 03-06-2003
مجموع المشاركات: 743
مشكوره وانت تعبرين هذا الجسر المتمثل في قناعة الانسان بما حوله وحاجات الفرد المتمثل في ( هرم ماثلو)..الكثير هنا يمتلك نفس إحساسك ربما نفس الاسئلة عن ماهية العلاقة بين الفرد والمنتدي - أي منتدى من المنتديات – قناعتى أن الشخص يرى نفسه فيما يكتبه أو يقرأه وكل إنسان يكتب لرغبة ما في شيء مجهول يحوز عليه بمجرد الكتابة وبذلك يكون قد سد حاجة من حاجاته .
03-06-2006, 02:21 PM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22958
اكيد الكتابة حالة بتجي للواحد وتتملكه في لحظة ليجد انه عاوز يعبر عن رأي او يدخل في مناقشة مفيدة ، لكن كمان مرات زي ما قلت الناس بتلقي بكل حملها داخل البورد لتصل لشنو السبب ما بيكون واضح
فعلا زي ما قلتي فكر الانسان هو اللي بيعكس دواخله وشخصيته ، لكن مع احترامي للكثير مما يكتب هنا في البورد، مرات بيجي للواحد احساس انه المشاركة بتكون من اجل التواجد فقط او خلق حالة من الثقافة المتكررة اللي برضو من اجل التواجد بس عارفة بالرغم من فترة الاربع سنوات في المنبر ، الا انه في احيان كتيرة كنت بعجز عن المشاركة و في الحقيقة بتجنبها تماما . ومرات بيكون اسلم انك تقري للغير اكتر مما تكتبي
كل فئة من الفئات اللي ذكرتها اكيد بتكون شكلت دعامة ما لللاخرى لكن هل في احترام للرأي الاخر داخل الكتابات اللي بتكتب بمعنى انه الناس في مرات كتيرة بتلغي التاني لمجرد انه الرأي ما عجبها برضو دي مشكلة عندنا انه اذا لم يتفق معنا فهو ضدنا او عدونا في معظم الاحيان يمكن زي ما قلت نحنا ما كتاب محترفين بل هي لحظة كل واحد بينزل فيها بعض من افكاره ، وبيوجد وسطنا كتاب محترفين لكن في الاخر كل واحد بيقرأ للتاني ومرت كتيرة اخي الكريم زي ما قلت لسحر ، بيكون من الافضل انه الواحد يقرأ ويشوف اكتر مما يشارك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قرشـــو
سامي عبد الوهاب إدريس
Foetus
Ahmed Mohammed Osman
بدرالدين شنا
مشتاق
Sahar Abdelrahman
hatim
بدر الدين الأمير
فيس بوك
تويتر
انستقرام
يوتيوب
بنتيريست