|
بالبلدى
|
يا جايه من عمق الألقْ مرسومة بى لون الصفا ومسقيه من روح العبقْ
جايه وحِداكِ الأغنيات يا شايله فى إيد الخريف وخاتّه فى التانية الوفا كل الدروب مرقت تبارك طلتك تتمعنِك مندهشه كيف إنه الفراش إنضمَ ليك سوَاك حديقة وفيك سرحْ وكيف الكلام شايل حروفه ومشتهيك سمّاك حقيقة عشان يحاول يكتبك عنوان فرحْ
وكيف الشمس نِسَت الغروب لِبست خُصل ألقِك طِرَح بدل الشفق يا جايه من عمق الألق
جايه ومعاك الأمسيات نشوانه بى معنى الحضور نتقاسم اللحظات هدايا شويه ريد وشويه عيد شويه زهرات للفريق وشوية غنوات للصبايا وكل ألوان البريق تشعل تفاصيل الحكايه تعلن صباحك ونشوة الريد الدفَق يا جايه من عمق الألق
يا جايه زى لحناً رزين ممدود على وجع الوتر موسق خطاويك بالحنين
يا طلتك ضحكة نجيمه بعيدة عاشقه وغمزة فى وجنة قمر رعشة رذاذ جوه الغيوم
يا طلتك شبَال مزخرف بالنجوم يا طلتك إشراق سنا وإيقاع مدوزن فى نسق يا جاية من عمق الألق
يا مارقه من ضو القصيدة وطالعه من زهو النشيد نشوان مقام الريده فى زحمة غناى طربان مبلل بى شذاكِ ودمعة الفرح العنيد روّضْتّى حزن الليل معاى جيتك وطن خليت اساى ومعاكى خلتنى المحن معاكى فارقت الشجن جيتك وطن فُتَّ المواجع و الرهق يا جايه من عمق الألق
|
|
|
|
|
|
|
|
Re: بالبلدى (Re: Elkhawad)
|
الخواض
يا شجر مليان ثمر
ولا أقول ليك
يا قمر نشوة وسمر
ولا أحسن اقول ليك
يا حديقة ويا صباحات الزهر
تسلم يا حلو
| |
|
|
|
|
|
|
Re: بالبلدى (Re: ودقاسم)
|
العزيز ود قاسم
Quote: يدّيك العافية وأنت تنهمر بالجمال دوما... |
فضلة خيرك والله يا محمد
دى كتابة قديمة قلت نغير شوية، لزوم عدم الملل يعنى
تسلم يا زول يا حقل
| |
|
|
|
|
|
|
Re: بالبلدى (Re: أبوذر بابكر)
|
ابو ذر صباحك عطر يا جاى من لون المطر يا مارق الوجع الكتر شارى الحنين لوحات تسر
فى طلتك ضحكة طفل فى ضحكتك لمة اهل فى فرحتك جلسات عصر
ابو ذر شلت كل الوجع الموكر وغسلت الحنايا بى طيبة خاطر
محلك ما بنفات بجيك صاده التحايا ليك بتشبهك براك والامنيات ليك دعوات قبيله فتك بى عافية
| |
|
|
|
|
|
|
Re: بالبلدى (Re: soma)
|
أباذر
تحية عطرة
تعرف يا أبا ذر
عندي مرات كدة حاجات بعملها في غرفتي بالبيت حيث الكمبيوتر و بقية الأجهزة .. لا أكتب إلا و موسيقى هادئة تنطلق بصوت خفيض .. أحيانأ أستمع إلى إلقاء شعري .. بالأمس قرأت قصيدتك هذه على خلفية لموسيقى ( زامفير ) ... قرأتها بصوت خفيض و أنا أتخيل أشياء كثيرة ..
وقفت كثيرا هنا .. و رددت هذا المقطع طويلا
Quote: يا طلتك ضحكة نجيمه بعيدة عاشقه وغمزة فى وجنة قمر رعشة رذاذ جوه الغيوم
يا طلتك شبَال مزخرف بالنجوم يا طلتك إشراق سنا وإيقاع مدوزن فى نسق يا جاية من عمق الألق |
فجأة قفزتْ إلى ذهني المرحومة ليلى المغربي .. و تناهى إلى سمعي صوتها القادم من عمق الصدق ..
معليش أبو ذر .. سرحت بعيد
شكرا على هذا الجمال
أرقد عافية
| |
|
|
|
|
|
|
Re: بالبلدى (Re: ابو جهينة)
|
العزيز جلال
السلام والعطر عليك يا ابا جهينة
ويا طلتك إنت برضو إيقاع مدوزن فى نسق، يشجى ويطرب ويبهج ويفرح ويكب النشوة جوانا
حياك المولى يا زول يا أنيق يا زين
تعرف يا جلال أنا الموسيقى دى عندى، وبالجد والله، مرات كتيرة جدا أهم من الأكل، وحبيبنا تمبس عارف فينى "الخصلة الكعبة دى"
يعنى أسمع لى مقطوعة للسمندل أو واحد من فالسات اشتراوس أو مقدمة من مقدمات موزارت والله احسن لى من وليمة عشاء فخم فى "الريتز" أو فى مائدة "نقط نقط نقط" ما داير اجيب غسمه
الموسيقى واحدة من ضرورات الحياة
وذكرتنى "زامفير" الزول الخطير هذا الرومانى المبدع طالما اشجى واطرب الملايين خاصة فى فترة التمانينات وشفت ليهو كم شغل كده برضه مع الزول المجنون التانى، الألمانى جيمس لاست، وده أحسن زول بعرف يوظف "السوليست" معاهو فى الفرقة
ما اطول عليك والكلام معاك ممتع يا جلال
فتك بمليون عافية واتمنى ليك ملايين اللحظات السعيدة
وليك الود والمحبة
| |
|
|
|
|
|
|
Re: بالبلدى (Re: soma)
|
العزيزة سوما
يا كل اسماء الألق الحسنى
عطرك خريف بلل وجوه كل الزهر
كيف الأحوال
وزى ما سعدت بيك أرض البخور والسحر هناك اسعد دائما بى طلة حروفك المغموسة فى رحيق الصباحات الندية البهية
ودائما تجى يا اسماء وفى رفقتك ريحة البلد وطعم الأهل
أزدهى والله يا سوما وتنتشى الحروف وإنتى معانا شجية الوقع وشاعرة باذخة المقام
حياك الخالق وأدامك طيبة وسعيدة وسمحه
| |
|
|
|
|
|
|
Re: بالبلدى (Re: أبوذر بابكر)
|
الرائع ابوذر بابكر
كم هي جميلـة ازهار حديقتكم الغناء
لك مني هذي
مجـوبك لـيلـك المعطـون
بلـون ريحـة دعـاش خـاطـرك
مـخـندق في قوافــي البهـجـة
سـحـنة قـمرا للشـفـع
تتاوق كـلما امـكـن
تـطـارح في وشـيك قـسـمـات
نعـاسـك فيني تـوّر للمغـارب ضــو
اريدك مـنذ ان كنتي غراما
في عيـون والـديـك
مراهـن بـيـك قـوس وكمنجــة متكـية
عـلى سـاحل ضـفـاف حـزني
تـنـقـرش فـيني زي غـنـيـة
تـخربش في فـصـول الضـو بلون شـعـرك
كـلون مــســـــدار
تكلكل في الغباش جــلـدي
تشـرك للغناء المـكتوم
بحـلق الريـح
قصــدتك ما قـصــدت الـضـــو
ندهـتك امرقي مني كان تـرضـي
عـشــان ابهـل قوافيك للشـمـس
بوبـار
واتـاوق فـيـني ما الـقاك
مـخـســمك الشــعـر
بيت بيت
تحـندقي فينـي ضـو شـمعـة
تخـندقـي فيك بلـوني الشـهــد
تـمـرقـي علي من تالاك
عشــان اصـلك
متـكل في دمــوع فرحــي
ومباشــــر بي
ولك خالص حبي
| |
|
|
|
|
|
|
Re: بالبلدى (Re: الخير محمد عوض)
|
العزيز الخير محمد عوض
حياك خالق الجمال ايها الجميل حقا
وأتشرف وأسعد بأن ألتقيك هنا وأنت تتأبط سحر الكلام وشهد الأناشيد البهية
Quote: قصــدتك ما قـصــدت الـضـــو ندهـتك امرقي مني كان تـرضـي عـشــان ابهـل قوافيك للشـمـس
بوبـار
واتـاوق فـيـني ما الـقاك
مـخـســمك الشــعـر بيت بيت |
وليتك تجمل اللحظات بالمزيد من هكذا دفق بديع
دمت طيبا ولك المودة كلها
| |
|
|
|
|
|
|
Re: بالبلدى (Re: أبوذر بابكر)
|
Quote: إنه الفراش إنضمَ ليك سوَاك حديقة وفيك سرحْ وكيف الكلام شايل حروفه ومشتهيك سمّاك حقيقة عشان يحاول يكتبك عنوان فرحْ |
بالبلدى كدة
تجيد المجدافين
ونحو عمق الشعر
حيث لا شاطئ الا ا لروهة ولا عمق الا الإندهاش ..
| |
|
|
|
|
|
|
Re: بالبلدى (Re: معتصم الطاهر)
|
العزيز معتصم
الطاهر النقى الشاعر الجميل
حللت نهلاً وأهلاً وسهلاً ومن عبق حرفك تعطرت الحروف وفاح عبيرها كما نَفَس الحدائق والجروف
حياك الخالق يا صديقى وعافاك
| |
|
|
|
|
|
|
|