|
|
 لان السودان كله في ام درمان اذن ام درمان هي السودان
|
بالامس وقعت يدي علي كتاب قريبي الاخ شوقي بدري حكاوي ام درمان وكم كنت سعيدا وانت اتصفح تلك الحكاوي ورجعت بي الذاكرة الي تلك الايام وتذكرت اللعبات شلبل وين راح - الرمة والحراس - صفرجت الخ
ام درمان مدينة الفن والجمال والتاريخ والسياسة والرياضة دعونا نكتب عنها ونبادلها وفاء بوفاء دعوة لكل امدرمانيئ البورد للمشاركة
ودمتم
|
|
 
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
الاخ متولى
لك التحايا الحارة
الكتابه عن امدرمان تحتاج لمجلدات وصبر وزمن طويل ...
وقبل الكتابه عن امدرمان عليك الله حدد امدرمان زمان ولا امدرمان الان؟
فى اخر زيارة لى للسودان عرفت انه امدرمان امتدت لمناطق بعيده كنا نخاف الوصول اليها زمان ... بالله عليك حددخريطة امدرمان القديمه من كل الاتجاهات ...
وبعدين نواصل
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: خالد)
|
الشكر اجزله لكم بعض كوكبة امدرمان منتصر - الناظر اخوي-خليل- علي الحسن لازم ترجع- فرح- خالد
مهما كتبنا عنها فهي في الدواخل باحيائها القديمة والحديثة وتشعر وانت فيها بانك غير غريب اليد واللسان ويلاقيك اهلها بالترحاب وقد يستوقفك احدهم سائلا من انت ولاعجب عند ذكر اسمك يكون قريبك وتبداء موجة من الذكريات وسيل من الاسئلة وعلي قول احد اهلنا الرباطاب حضر للعزاء في امدرمان ومعه ابنه وطلب من ابنه ان يقوم بالاشراف علي غسل ايدي المعزين بعد الغداء وكل مايغسل لاحد يساله السوال المعهود اسمك -عمرك- من وين والولد يجاوب بكل ادب ولكن زهج عند سواله من وين فقال من البلد يقصد الرباطاب فقال له الرجل وجاي امدرمان لشنو فقال له جاي اغسل ليك ايديك وراجع طوالي
امدرمان لها ظرفائها وسوف نفرد لهم مساحة ولها ادبائها ولها سياسيها ولها ولها ولها والباب واسع لكل من يريد الولوج فيه
ودمتم
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: خالد)
|
أنا أمدرمان تأمل في نجوعي
أنا السودان تمثل في ربوعي
أنا إبن الشمال سكنتو قلبي
على إبن الجنوب ضميت ضلوعي
أنا أمدرمان
أنا أمدرمان سلوا النيلين عني
و عن عزمات فتاي عند التجني
سلوا الحادي سلوا الشادي المغني
فخير بنيك يا سودان مني
تجيش النفس بالآمال لكن
و لكن هذه لم لا تدعني
أنا أمدرماااااااااااااااان
أنا أمدرمان مضى أمسي بنحسي
غداً و فتاي يحطم قيد حبسي
و أخرج للملا في ثوب عرسي
و أبسم بعدما قد طال حبسي
و أهمس و الفضى يعلن همسي
و أهتف و الورى يعرف حسي
فيا سودان إذ ما النفس هانت
أقدم للفدى روحي بنفسي
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Shao Dorsheed)
|
الشكر موصول لكل من تصفح هذا البوست وكل من شارك بالكتابة
اخوتي احمد القاسم - حيدر حماد - حسام شبيكة- علي احمد علي - نجوي - خالد - شاو
انا في كلامي وجهت دعوة الي كل امدرمانئي البورد للمشاركة
وقلت رجعت بي الذاكرة الي تلك الايام
امدرمان لها ظرفائها وسوف نفرد لهم مساحة ولها ادبائها ولها سياسيئها ولها ولها والباب واسع لكل من يريد الولوج فيه
اخي حسام انا رباطابي ياباني يعني اصلي وسجيمان قريبي
اخي شاو الحكاية لافيها تبش لابتيخ نزلت اهلا وحللت سهلا انت في امدر- امان
اخي حماد انا لابحب السياسة لا بتكلم فيها وهذاالبوست لامكان للسياسة فيه رجاء الموضوع واضح انا اتحدث عن ذكريات امدرمان زمان والايام الجميلة التي عشناه
ودمتم
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
الابن العزيز متوكل مالك ، تحياتى ،وامدرمان هى ملهمة خليل عبد الله الحاج اول رواية سودانية (انهم بشر ) تحدث فيها عن فريق العمايا ،وكيف كانت الحياة تدار فى اوائل الخمسينيات كتب عنها خالد الكد ، وكذا فعل على المك ، وهما يرحمهما الله من خير البشر الذين انجبتهم المدينة ، اليهم يضاف على عبد القيوم الذى راى فيها بؤرة التلاقح السودانى الاكمل ، وهى من تبنت عبد الخالق محجوب ، وفاروق ابوعيسى ، وهاشم صديق ، وزيدان ابراهيم ، وعمر الشاعر وابراهيم حسين وخدر الحاوى وابنه عبداللطيف خدر ، ابراهيم عوض ، سيف الدسوقى ،وعبد الرحمن الريح ، خرجت منها الحقيبة والمسرح ممثلا فى خالد ابو الروس والعبادى ، انجبت ولم تكل ، خرج منها الكرويون والمؤرخون مكى شبيكة ومنها الهاشماب والابروفيون ، محمد احمد المحجوب وحسن نجيلة انتموا اليها حتى الذين جاءوا من اصقاع اخرى اوتهم والبستهم فيضها ، لانها امدرمان التى (جابت ) العميرى من الابيض والسنى دفع الله من مدنى ،وغيرهم يا صديقى وابنى العزيز فهى شجن لا ينتهى وحب بلا نهاية ، فيها كان يصدح ابراهيم عبد الجليل وسرور والامين برهان ، وغيرهم من عظماء الايام الخوالى فى الغناء والادب شهدت ندوة عبدالله الامين فى الستينات ووحتى رحيل الاستاذ الفذ عبدالله حامد الامين ، شهدت( كشو )اشهر نساء العباسية اسميناها بذلك الاسم لانها كانت تجمع العلب الفارغة من الصلصةوتجول بها فى الانحاء ، حنينة (ست الصحة )اشهر من اشتغل فى الصحة ، كانت تجوب المدينة لابسة (مركوبها وعراقيهاوطرحتها ، وتركب العجلة ، تضع السفة وتدخن البرنجى)وغيرها الطيب ود مهلة اشهر الذين تعلموا فى كلية غردون لكنه انهك ذاته بالخمر ، وهى امدرمان التى قدمت للاذاعة السر محمد عوض، صلاح الفاضل ، ومعتصم فضل،والعديد يا صديقى توفيق صالح جبريل ، وصلاح احمد محمد صالح ،وابنه عبد الرحمن احمد المذيع اللامع ، وكذا علم الدين حامد ، وذو النون بشرى ،والقائمة تطول ففيها صلاح احمد ابراهيم ، واخوته ، والمؤرخ الراحل عصمت حسن زلفو ، وهاشم بدر الدين ووالده اشهر المدرسين فى السودان ، السر دوليب ، وكثيرون منهم فخر الدين محمد الدبلوماسى المعروف ، واول ممثلة سودانية جابت البلاد صحبة الفرقة المشهورة (فرقة السودان للتمثيل )بقيادة ميسرة السراج ، الفنانة سارة محمد التى ماتت فى مستشفى التجانى الماحى فى التسعينات، ومن اضيف ؟ عائشة الفلاتية ، و... القائمة تطول ... هذا ما عن لى من اثر امدرمان
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: على احمد على)
|
الاخوة الكرام تحياتي
الاستاذة سلمي الشيخ سلامة لكي التحية وانت تورخين لامدرمان وهذا هو السبب الذي دعاني لفتح هذا الموضوع وشاكرا لك كل الاشياء التي ذكرتيها وانا من مواليد حي الامراء يعني معظم الاسماءالتي ذكرتيها باعرفها وترعرت في العباسية وحي العرضة وجدي بابكر بدري رائد التعليم النسؤي وعبد الخالق محجوب متزوج عمتي نعمات مالك رجاء المواصلة يارائعة
اخي علي انا رائ في السياسة كما قال العلامة البروفسور عبدالله الطيب حينما سأل عنها فقال اما السياسة فهذا بحر لااخوض فيه
متولي الطيب مالك
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
الأخ متولى
إنت قلت فى عنوانك أم درمان هى السودان .. و بما أننى من هذا السودان فلى الحق فى الحديث عن المدينة التى تقول أنها تمثلنى .. سألوك ياتو أم درمان تقصد ؟ جاوبت بأنك تقصد أم درمان القديمة " طبعاً " ... لو كانت إجابتك بقصد أم درمان القديمة و الجديدة و ما قد كانت و ما ستكون لأنها المدينة الوطن التى تحضن الجميع دون فرز .. لو دى كانت إجابتك ما كان عافرنا و إتسايسنا معاك .. عرفت ؟؟ بعدين مداخلات البعض تدفع البوست دفعاً لإقتحام السياسة التى تنفر منها ... أنظر لهذا المثال
Quote: حاجه غريبه فعلا ... وفى النهايه يطلعوك عنصرى ... وديل طبعا ناس ما من امدرمان
|
يا ربى ناس أم درمان ديل عندهم وشم خاص فى وشوشم و لا عندهم بطاقات خاصة بيهم ؟؟
لاحظ أنو العبارة دى طوالى تسفت عنوانك بتاع أنو أمدرمان هى السودان
على أى حال واصل فى سرد ذكرياتك عن مدينتك .. عفواً مدينتنا " مش قلت هى تمثل كل السودان ؟؟ " ... أكتب عن موسى العجلاتى و نصرة و قسمة ودكتور أمين بتاع العباسية وود نفاش و بت قضيم و أبو قبورة و تور الجر و هلم جرا و سمك الموردة و صيرها
رمية أم درمانية :
ما المقصود بالأمراء؟؟
و لماذا سمى بذلك ؟؟
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: حيدر حماد)
|
Quote: الأخ خالد
لو كانت الأشعار تبنى أوطاناً ... لكان السودان دولة عظمى
قلت لى الشاعر قال : ـ
"أنا السودان تمثل في ربوعي
أنا إبن الشمال سكنتو قلبي
على إبن الجنوب ضميت ضلوعي "
العبارة الأولى فوقا شك ... أما الأخيرة دى مسيلمة زاتو بحتار فيها و يكفى حادثة الإثنين الشهيرة فى العام المنصرم
حشوة : فى مذكرات الظريف شوقى بدرى عن أم درمان .. ذكر أن شاعراً يدعى السر قدور قال له متأففاً " ياخى أم درمان إتملت غرابة و عبيد " فرد عليه أخونا شوقى " طيب ما زى ما إنت هاجرت من شماليتك لى هنا , هم برضو هاجروا من مناطقهم " فبهت المتشاعر !!! |
ياخ اختشي انا اعرف كيف انو الشاعر قاصد شنو بعد داك ياخ القال منو انو الشاعر ده ما من الجنوب ولا من الغرب ولا من الشرق ولا من الشمال بعد داك ياخ تعال الزول ده قال ليك امدرمان كل السودان كل السودان ليه لانو فيها المن الجنوب والشرق والغرب والشمال وحتى الوسط ؟
بعد داك الاشعار ما بتبني الاوطان عشان الناس بتفهما زي فهمك ده ؟
شوقي بدري بن امدرمان ورباطابي ولا يفصل بين السودانيين كما فصلت انت ؟
لو عايز بوستات دارفور ناس دارفور قاعدين يا اخوي وبستاتهم كتيرة وماليه البورد ولو دايرني انزلها ليك بنزلها !
اخر خبر
الشكر للاستاذة سلمى على هذه الكتابة السلسة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: خالد)
|
Quote: ياخ اختشي انا اعرف كيف انو الشاعر قاصد شنو بعد داك ياخ القال منو انو الشاعر ده ما من الجنوب ولا من الغرب ولا من الشرق ولا من الشمال بعد داك ياخ تعال الزول ده قال ليك امدرمان كل السودان كل السودان ليه لانو فيها المن الجنوب والشرق والغرب والشمال وحتى الوسط ؟
|
أنا ما سألتك من قصد الشاعر يا أبو طاقية.. هل إنت شايف كلامو ده حاصل فى أرض الواقع ؟؟
Quote: بعد داك الاشعار ما بتبني الاوطان عشان الناس بتفهما زي فهمك ده ؟
|
هوووى يا زول هوى ... أنا بفهم الشى الشايفو قدامى , مذابح فى الشرق و الجنوب و جبال النوبة و دارفور .... دايرنى أفهم ليك شعر واحد حلمان و مسطول و ضارب همبريب أبروف جنب البحر ؟؟؟
Quote: شوقي بدري بن امدرمان ورباطابي ولا يفصل بين السودانيين كما فصلت انت ؟
|
إنت لو فهمت القصة بتاعتو مع الشاعر داك ... ما كان كتبت كلامك ده ... كدى أرجع البصر كرتين ... و ليت كل الناس كانوا كشوقى بدرى فى وضوحه و شفافيته و فهمه للآخرين
Quote: لو عايز بوستات دارفور ناس دارفور قاعدين يا اخوي وبستاتهم كتيرة وماليه البورد ولو دايرني انزلها ليك بنزلها !
|
ده الكلام .. قلت لى البورد كله دارفور دارفور دارفور دارفور ... البورد ملان و مدفق بى دارفور ... معليش يا أبو الخلد .. إستحملهم شوية .. ياخى الناس ديل فقدوا حوالى نصف مليون قتيل و عندهم زى إتنين مليون قاعدين فى المخيمات .. فما تزهج منهم .. ديل ناس بشاركوك فى الوطن و الدين و الإنسانية ... معليش .. قطعت ليك حبل الذكريات الجميلة عن مدينتنا التاريخية أم درمان ... واصل فى سرد أشعارك و حكاويك .. بس بالله بدون تجضيم ...
آخر خبر منى أنا ده :
أنا ماشى يا أبو الخلد .. خت عينك فى البوست ده مع أخونا متولى ود الأمراء ... نتمنى ليكم سياحة ممتعة مع الأشعار الجميلة و الذكريات المعبقة ببخور التيمان ... أما أنا ماشى أشوف بوستات إقليم بعيد و جريح و منسى إسمو دارفور و فوقو كارثة إنسانية ما دايرة تدى أولاد المدن الكبيرة نفس .... ودعتك لى الله يا خالد .. حظاً سعيداً
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
دعـوا أمـدرمان تـغني
مـأمــون الرشيـد نـايــل
أيها الباسط كفّاً للوداع
أسرج مطاياك
وعجّل بالرحيل
أضرب إلى قلبك
أكباد الليالي
وتوشح
ببريق القمر الفاضح
والوجد النبيل
فإذا ما ناحت الريح
على الدرب الطويل
فترنم بحداء العاشقين
دع الدوبيت[1] يسري
في الفلاة بلا دليل
وإذا أبصرت في العتمة لهباً
يتمطى بين عينيك وبين الرمل
في الدرب البعيد
لا تخف!!
إنّهن بنات الجن
في ثوبٍ من النار
يرتلن تباريح القصيد
قل لهن
يا بنات الجن
أوقدن بخور المسك والصندل
جمراً في الوريد
ثم أرقصن قليلاً
علّ بعض الحزن ينزاح
عن القلب العليل
أيها الباسط كفّاً للوداع
أسرج مطاياك
وعجّل بالرحيل
فإذا جئت إلى وادٍ غريب
ورأيت الأرض تزهو
بخيوطٍ من نضارٍ
تتدّلى من سماوات المغيب
ورأيت الأزرق الداكن والأبيض[2]
في سحر الغروب
ينسجان من السنا درباً
هو الأجمل في كل الدروب
طأطئي الرأس!!
فأنت بحضرة النيل الحبيب!
أغرف من الماء الزلال
بكفك الواهن قطرة
أروي ظمأ العاشقين
خذ من تراب
الشاطئ الحالم زهرة
لقلوب الحالمين
ثم أجلس مطمئناً
بجوار المقرن[3] الخالد
وابعد عن فؤادك
مُرّ الذكريات
وهمّ قال..وقيل
أدر الطرف وأشهد
مولد الروح
عناق الكائنات
وموكب السحر الجميل
فإذا ما رنّ صوتٌ
وسمعت قافيةً
منغمةً بالعشق والنشوة
تضحك للنيل
وتشدو بين أحضان الأصيل
قف وأنصت!!
إنها امدرمان تدعوك
إلى شئٍ من الكسرة[4] والقهوة
في ظل النخيل
أيها الباسط كفّاً للوداع
أسرج مطاياك
وعجّل بالرحيل
عرّج على بعض الذين
توسدوا الأحلام أعواماً
وذابوا في الزحام
سلْهم!! أكان خيارهم
أحلام أهل الصفوة المتنعمين
أم صفوة الأحلام؟؟
وإذا مررت بآخرين
يصادرون
من الشفاه اليابسات
حلاوة الدنيا وطعم الابتسام
قل لهم
إن الحياة قصيرةٌ ومريرةٌ
شيئاً من الرحمة بالقوم الكرام
يا من أضعتم
لذة الفرحة في القلب
ولحظات التمني
دعوا امدرمان للحب تغني
’احرموني ولا تحرموني[5]
سنة الإسلام السلام’
دعوها تشرئب لمطلع النور
وترنو
لشعاع الضوء في الليل الطويل
أيها الباسط كفّاً للوداع
أسرج مطاياك
وعجّل بالرحيل
قد تلتقي بضريح المجد درويشاً[6]
في الجبّة المنسوجة الأطراف
من قوس قُزح
وعلى الجبين مرارة الأعوام
في كفّه السيف الذي
دانت لسطوته جباه الغاصبين
فابدأ بالسلام
قل له
يا من سموت إلى العلا
والمجد في درب الإمام[7]
أيا درويش
في سحّارة[8] الجدّة
لم نجد الوصايا[9]
بعد أن بتنا
نلوم…ولا نُلام
يا من قهرت
ذوي العيون الخُضر[10]
عذراً
إننا صرنا حمامات سلام
ذوو العيون الخُضر
جاءوا في غيابك
وكنا قد نسينا
كيف كان السيف
يعمل في يديك
وكيف كان الحق
يشرق من عذابك
جاءوا ثم ولّوا في الظلام
لم يقنعوا في هذه المرة
بالذهب المُكدس
في ذُرى شنقول[11]
أو ريش النعام
دسوا في حقائبهم
كل الوطن
سهله وجباله
صخره ورماله
شمسه وهلاله
ومجده في غابر الأيام
تركوا لنا شيئاً من الكلمات
عن حُكم الشعوب
وعن حق الشعوب
وعن حرية الكلام
فأمضينا السنين لا نقتات
إلا إرث السادة العظام
وحينما تدافع الأنين
في البطون الخاويات
لجأنا للسيوف المرهفات
وجاد ذوو العيون الخُضر
ما بخلوا
بالراجمات القاذفات الهالكات
ودخلنا
بشعار الاخوة الأعداء
معركةً تواري في رحاها النصر
لا تنتج إلا كل منهزمٍ وخاسر
بعدها صرنا كأشباحٍ
تدب على الثرى
أو عند أهل العالم العلوي
سكان مقابر
كلما ننجب طفلاً
عبقريَ النزعة
تكمن في عينيه
أسرار المفاخر
تلفّت..لم يجد اسماً ولا وطناً
تلفّت لم يجد
غير عيونٍ بائساتٍ..وحناجر
تصرخ يا شريد
إن شئت أن تحيا فهاجر
واكتشفنا آخر الأمر بانّا
قد نقلنا
محن البؤس والفاقة من جيلٍ لجيل
أيها الباسط كفّاً للوداع
أسرج مطاياك
وعجّل بالرحيل
قد أطال الشوق سهدٌ بعد بيْن
فكيف يغفو الليل في ليلٍ
وهذا مضجعي مازال يستجدي
الكرى من فرقدين
قلت للطيف الذي
يحبو على كتفيَ أو
ينساب من عينٍ لعيْن
دعني!!
فلا فرحاً أبعثره عليك
وليس عندي
غير قافيةٍ من الحزن المقيم
ودمعتين
ليس عندي
غير همسٍ من صدى ماضٍ
تمرّغ في ترابكِ يا امدرمان
فاقتربي
الشعر يهتف للهوى
إن يُسفِر الحسـن وضّـاحاً فمـا أرَبي
أو يسـجع الطـير صـدّاحاً فما طرَبي
جـاءت تـزورك امدرمـان باكيـةً
فامسح دموع الأسى عن خـدّها الترِبِ
تـاهت زمـاناً بأفـكـارٍ مسممـةٍ
كانت أمـرّ مـن الطـاعون والجرَب
سلها أتجـزع من طـغيـان عسكرها
أم مـن تكبر بعـض السـادة النُجُـبِ
ومضيت يا امدرمان في ولهٍ
أحذو ’وقلبي مترعٌ بالشوق
حذو فتاك في الزمن الخرافي[12]
أطوف على الديار
والثم الأشجار والأحجار
مشغوفاً حليق الرأس حافي
هل تبت يا مسكين
عن هجرٍ أقام بمقلتيك؟؟
أم هل تراك
على دروب الصبر والسلوان
أدمنت المنافي
فيا امدرمان
في عيْنيَ أنتِ
في حلمي
وفي كبدي
وفي وجع القوافي
أتعلم من سمائك
سيرة الماضي
ومن عينيك…قهر المستحيل
أيها الباسط كفّاً للوداع
أسرج مطاياك
وعجّل بالرحيـــل
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: محمد الواثق)
|
الاخوة جميعا لكم التحايا
اتصل بي عدد من الاخوان بريدون ان يشاركو في سرد بعض الطرائف وظرفاء امدرمان بدا من الهادي نصرالدين وودنفاش وجادكريم ورواد دار الرياضة قسم والد فار وكفتيرة وهرت وخرستو قاري الجريدة وسوف اقوم بكتابتها مع التنويه بذكر اسمائهم
وتحضرني طرفة احد رواد الدار اتي بعد ان مر علي حواء كلاب واخد المعلوم وذهب لحضور المبارة وهو منتشي للاخر ولكن بدل مايقيف في صف دار الرياضة وقف في صف الدايات والغريبة انو نفس الملامح والشبه ونفس السبورة السوداء وعند وصوله للبوابة قراء المكتوب في السبورة التطعيم ضد الجدري وضحك كثيرا وقال ناس الدار ديل جنو ولا شنو دي فرق شنو الجابوه لينا دي
اخي محمد الواثق لك التحية
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
سلام
المحطة الوسطى .. العم المرحوم عبدالكريم الزبير أبوكسكته رئيس نقابة سائقي
التاكسي - ورئيس رابطة مشجعي نادي الهلال
عباس رشوان
الاكسبريس
الحاج نقدالله
سورج
فيتال
سوق الجلود
العدني
أبومرين
التيمان
فندق حمدتو
سوق الدهب - ناس تبيدي
سوق العناقريب - محل ناس عوض كري
فينوس للحلاقة- صالون كان يجتمع فيه شعراء وأدباء أمدر
سعد الشيخ للعطور
عوض الشايقي للمايكرفونات
حلويات الدانوب لصاحبها يعقوب محمد عبدالله
حلويات الطيب سيد مكي
حوش ناس أبوالعلا
برعي المصري - للزبادي والشعير
الصالون الأخضر للحلاقة لصاحبه عطا
طاحونة الملح - لصاحبها العم متوكل - محطة مكي ودعروسة
صينية مكي والجاويش العم أحمد جبريل
بيت الكسرة - صينية مكي
..
.
.
.
ونواصل
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
عزيزى ابن امدرمان البار ود حي الامراء
امدرمان الاصاله امدرمان الحضارة امدرمان النطارة امدرمان الاماني و الامل امدرمان الدر امدرمان الروعة
حروفها تحكي عن تريخها
الاف الف الالة , الف الابتداء في اللغه العربية
و الميم ميم المناء و الاماني و الامان
و الدال دال الدر و الديار
و الراء راء الروعه و الرومانسية
و الميم ميم المال و بيت المال
و الالف الف امدرمان زمن زمان
و النون نون النصر و نون النطارة
فكيف لنا ان نتكلم عن امدرمان وامدرمان انجبت و ماذلت تنجب اهل الدين و العلماء و المبدعين . صدرها رحب رحبت بكل اهل السودان من شرقو ال غربو و من جنوبو الي شمالو عاشو في سلام و وئام ذكراياتهم ماذلت تغلغل خلجاتنا.
فحينما يحكي اخوانا بالسياسة فنحنو خارج الفورمة و حينما كانت السياسة في امدرمان فكانت تصبر في نهر معين و ليست سياسة اليوم التي تشيباها شوايب راسخه في عقول بعض الاخوان فنسال اللة ان يزيح هذا الفهم وان نعيش في سلام و امان في امدرمان جديدة و قديمة او قري مجاورة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: على احمد على)
|
اوفياء امدرمان سلام يغشاكم من هنا لعندكم
الشكر لكل امدرماني لمس فيه هذا البوست وترا حساسا
اخي رضا واصل وماتحرمنا من ذكرياتك البوست حقك ومتابع لزقاق الصابرين حتي عودة قريبي شوقي بدري
بت امدر شكرا للمرور وواصلي
الناظر كفيت ووفبت وفي انتظار مالذ وطاب من ظرفاء السروراب
اخي وصديقي احمد علي ياراجل اظهر وبان عليك الامان وصالون فبنوس للحلاقة وقهوة الظافر وحلويات الطيب سيدمكي وشريف واصل مع تقديري والف مبروك لود الباشا ابو مصطفي
لناعودة مع الهادي نصرالدين والشهير بالضلالي
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
أمدرمان
الاصالة
العاصمة الوطنية
الاذاعة
التلفزيون
المسرح القومي
الاهلية
المؤتمر
وادي سيدنا
محمد حسين
بيت الازهري
الهلال
المريخ
الطابية
بيت الخليفة
الطيب سيد مكي
برعي المصري
اسماعيل مجذوب
اولاد كايرو
عوض عمر الامام
عثمان الديم
مازدا
عثمان الصبي
سينه
عقارب القلعة
المكتبة المركزية
صلاح بريتش
ميدان البيان
الشهداء
قلعة صالح حبريل
حي العرب
المسالمة
حي العمدة
على الله
الموردة
بانت
ناس قدح الدم
خشم الموس
مكي ودعروسة
متوكل أبو الروي
آل السراج
ميدان البحيرة
معهد القرش
آل نقدالله
زقاق اللولوي
النعير
الصادق الجان
ناس كبسور
موسى نفخو
أسامة سكسك
عتوقة
آل الشفيع
بيت المال
ودأرو
بت بتي
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: على احمد على)
|
احبائي امدرمانيئ البورد سلامات
سوف نتطرق الي شخصيات امدرمانية وهذه بمثابة دعوة للكل للكتابة عن ظرفاء امدرمان وافوال امدرمان وعتاولة امدرمان ورواد دار الرياضة وسينمات امدرمان وكورة امدرمان وكل شئ عن امدرمان سمك الموردة وصيرا السكي وترنتي وبلة في ابوروف والجان وابوصليب وبرعي واخيرا الواحة واحد واتنين والكوتش في خور ابوعنجة وسماسم في الثورة الحارة السابعة
وظرفاء امدرمان الهادي الضلالي- قريب الله ابوصلعة لاعب الهلال وابوروف واخوه الهادي رمضان - جاد كريم - كفتيرة - خرستو والكثيريين
لنا عودة بالتفصيل
ودمتم
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
طلقها
وداعة الديك
عوض طراش
أحمد فونية
المرحوم سعيد خيرالله ( بلبوط )
المرحوم اسماعيل برجل
.
.
.
.
شركة النور
سوق الزلعة
أجزخانة أبونخلة
نادي الخريجين
مغلق الفاتح سلمان - شارع المهاتما غاندي
اجزخانة الام
اجزخانة الحياة
المرحوم الفنان ابراهيم الكاشف مدفون في وسط مقابر أحمد شرفي
مقبرة النصراني - قبل المطبعة العسكرية على يسارك وانت ماشي
الكلية الحربية - مدفون بها بعض قتلى الانجليز زمن الاستعمار .
اسماعيل مجذوب - الطهار
.
.
.
.
العمدة :
مدرسة أسماء فوزي
داموك
ناس تاج السر على الشيخ
ناس عثمان صالح - شرق شارع كرري
عيادة الدكتور علي البدوي المبارك - مؤلف مسرحية الدهباية
.
.
.
.
.
نرجع للثورة بالنص :
الحارة الرابعة- قهوة الجعلي
مستشفى البلك
ليمون الاطرش - مابين الحارة الرابعة والسابعة
محلات سفسفة - الركن الجنوبي الغربي للحارة الثامنة
.
.
ناس عرقلة وعصابة الرومان
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
مدرسة الأساس
مدرسة الهجرة - تخرج فيها الرئيس الاسبق المشير جعفر نميري
مدرسة المشاة - الاستاذ القدير معلم الاجيال بشير ابراهيم صالح
مدرسة الرشاد - محطة عشرين
.
.
.
حديقة الجندول
الريفيرا
سمك الموردة
اسبيرات كوجاك
محل تصليح المواتر بالموردة
سوق الموردة
آل سطيح
نادي الضباط
مدرسة الاحفاد
بازار الاحفاد
البرتش كاونسل - أمناء المكتبة جون وعصمت
رواد البرتش المرحوم صلاح برتش - الاخ الوجيه عماد حسين
المحكمة
البلدية
الاوسط
شركة النور
ميدان المولد
جامع الخليفة
بيت الخليفة
مركز شباب امدرمان
دار فلاح
القشلاق
السجن
معهد القرش الصناعي - العم مالك الزاكي
محلات فاربتر
الانجيلية
مستشفى المناطق الحارة بالملازمين
سوق الصور
ميدان البحيرة
آل نديم عدوي
أل المادح
.
.
.
.
.
ونواصل
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: على احمد على)
|
احبتي اخجلتم تواضعنا وهذا غيض من فيض
انا في الفترة السابقة كنت استمتع بان اقراء ماكتب واصلوا
اخي الناظر ممدوح وجمال شنطة من ظرفاء الجيل الحديث
اخي رضا كفيت ووفيت واصل
نرجع للثورة بالنص ودي بقي حتتنا نبداء بقهوة الجعلي كنا نجلس فيها بالساعات عندالعودة من مدرسة تلودي بصحبة الاخوان رفعت الساحر - عصام التيجاني- حبيب الله وعيسي صباح الخير لاعبي المريخ- محمد عبد العظيم المطبعجي كهربة- ويجييك الطباخ حسن باع باع ويقول ليك نكتة كانت ايام
ليمون الاطرش العم عبد القادر وانا الي الان مستغرب انو درجة برودة الليمون والشعير واحدة لاتتغير
محلات سفسفة يكفي الاسم
ناس عرقلة وعصابة الرومان تلك قصة والان عرقلة اصبح لايوخر وقت للصلاة في المسجد
خلي فاخرالكوتش وماادراك مافاخر الكوتش
فول ابوصليب المحل قفل اما الجان فقد توفي الي رحمة الله والمحل يدار عن طريق ابنه
قهوة الظافر تعتبر تجمع جكس الاحفاد والوجهاء وهي تقدم الاكل والشيشة وتتمتع بالنظافة والديكور الجميل
اخي علي الحسن لك الشكر علي الصور واصبت برعشة عند روية سوق السمك بالموردة
اخي حسام يوسف شكرا علي الاغنية الامدرمانية
كوستاوي شكرا علي المرور ورجعنالك وكيف نرفض رجوع القمرة لوطن القماري
اخبار اخوك طارق هجام شنو هو زميل دراسة بالهند
الشكر موصول للناظر علي انزال رسالة اخي وصديقي عبدالرحمن عبدالكريم ولاتعليق
ابوحميد رفيق تلودي واصل وادينا شوية من سوق امدرمان
راجعيين
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
مصنع ناس حجير لحلاوة المولد في حي العمدة جوار مدرسة ناس عثمان صالح
مقابل الخور ...
بقالة أم ياسر - أي بقالة حديثة كانت تسمى مؤسسة غذائية - أول
امرأة تدخل نظام المؤسسات الحديثة ... المربوع الثاني وانت متجه غربا
من محطة الكبري -شارع الوادي - مقابل الخور ايضا ...
أمدرمانيات :
عم سرويس : رجل في مقتبل يلبس جلابية بيضاء وطاقية يحمل كرتونة بها
مجموعة سراويس وصحون وكبابي ... يصيح بأعلى صوته
سروييييييس ........كباببببي .... صحووووون
اذا في واحد شاغله كان يرد بافظع الالفاظ النابئه ....
آآآكسر حطبببب : رجل مربوع البنية مفتول العضلات يلبس مجموعة حلقان
( فدوة ) على جانبي أذنيه .. يحمل فاسا سنينا على كتفه بارع في تكسير
الحطب - على مايبدو أنه من منطقة ريفي شمال أمدرمان .
يصيح بأعلى صوته آآآكسر حطبببب
.
.
.
.
.
ونواصل
| |
|
|
|
|
|
|
|
|
 Re: لان السودان كله في ام درمان اذن ام درمان هي السودان (Re: Ridhaa)
|
العزيز متوكل مالك
وكل الاخوة الامدرماناب ..
..
لفترة زمنية قريبه جدا كنت عندما اصل لآخر ( حديدية ) مزروعة على الاسفلت بكري الخرطوم وانا مغادرا امدرمان في طريقي للخرطوم اشعر بغربه دخيله لم اعرف سببها إلا بعد ان عايشتها هنا في الغربة
أمدرمان عشق خرافي لا يحسه إلا من عاشه ..
..
قرأت لفترة طويلة واستمتع كل أمر بهذا النص للدكتور مصطفي مدثر ..
| Quote: و لكن الدوار أتاني من ناحية حضور أم درمان في قلبها بعد أن ظننت أنه خبا، فسقطت مغشيا على أشواقي |
..
رؤى لا تطرف لها عين
طبيعي أن نحمل شوق امدرمان في حنايانا ونطوف به الدنيا ويظل ساكنا فينا ..
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
| Quote: ابوحميد رفيق تلودي واصل وادينا شوية من سوق امدرمان |
يا متولى
تعرف فى اخر اجازة لى للسودان مسكت ليك شارع ابوروف ده من الطيب سيد مكى
وانت ماشى مخبز الافراح والدانوب بتاع الباسطه وقهوة الظافر (الاخ خليل الظافر كان معانا قبل ايام هنا فى لندن ورجع السودان )...وانت ماشى على ابوروف صينية مرور
مكى ود عروسة وبت بتى وود اورو وسوق الشجرة ونازل على بحر ابوروف
فى سوق امدرمان زمان لما تمشى تتعب من السلام على المعارف ...
لكن هسي تعال شوف الاشكال زول بعرفك مافى ...ولا انت بتعرف زول ...
السودان كان زمن مايو ...
ذكريات ... وايام
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Hisham Ibrahim)
|
تنويه عبر اتصال تلفوني تم تصحيح معلومة ان محل العم حسن قرشي لليمون كان بالقرب
من البازار وانتقل الي موقعه الحالي
اقتراح بالكتابة عن شخصيات امدرمانية وان نفرد لها صفحة مثلا نكتب عن الشعراء امثال عتيق - خالد ابوالروس - العبادي - البنا والكثيريين ثم نكتب عن لاعبين الكورة ثم ظرفاء امدرمان ثم احياء امدرمان ثم الاسر المعروفة في امدرمان ثم فناني امدرمان ثم وثم والباب واسع
سوف ابداء بالشاعر الكبير محمد بشير عتيق وذلك لانني من المعجبين جدا به
ولد الشاعر في حي ابوروف عام 1909م بعد وفاة والده عام 1926م خلف العب عليه فالتحق محمد بشير عتيق بالمدرسة الصناعية عطبرة وتخرج من قسم البرادة وعمل في السكة حديد من عام 1930م الي ان تقاعد بالمعاش
كان يلذ لسماع اغنيات الشاعر ابوصلاح يقول انها تمتاز بالاوصاف الجمالية والمعاني الحسية والغزل الرقيق والعاطفة المشبوبةوالبديع ولزوم مالايلزم والجناس وقد عرف ابوصلاح اول مرة حين قدمه له الشاعر المغني عمر البنافي حفل عرس في ابوروف
يذكر انه بعث بقصيدة بالله ياشادي الغرام من كسلا الي كرومة بعنوانه بنادي الهلال الرياضي وعلمت انه حين تسلمهابدا يترنم بها حتي ان احد المستمعين اليه طربوا لبدايات اللحن بل ان احدهم قال لكرومة ياخي هو الشاعر ده رسلها ليك ملحنة
لنا عودة مع بعض قصائده
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
المعروف عن الهادى نصرالدين (الضلالي) انة مجامل لى درجه قف فكان صديقه عصمت يوسف يستمع الى نشرة اخبار الصباح فسمع بوفاة و الد احد اصدقايهم بود مدني و فكر بعد نهاية الدوام ان يتصل على الهادي عشان يمشو مع بعض الى العزاء فاتصل على الهادى .. و فذكر له الاخ الهادي انة دفن مع الجماعه تخيل انسان زى دى
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: الناظر)
|
الشاعر عتيق القي قصيدته في افتتاح السينما الوطنية بامدرمان سنة 1945م
هذا اليوم صحيح يوما سعيد بالذمة تيار السرور اجتاح بلدنا وعم
قام ياصاحي شوف الشعب كيف اتلمه لي صالح الوطن قدر فوائد جمه
في افق السعود ظهرت نجوم لصافه وثمار الجهود ان الاوان لقطافه
دار السينما ظهرت في ثياب شفافة اشبه بي عروس حسناء في يوم زفافه
طبعا غير نزاع داركم جميلة وفاخرة كظمت غيظ حسوده بالعواذل ساخره
بنيانه الفخيم يتلالا انوار زاخره تشهده من بعيدمنظر كانها باخرة
ولنا عودة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
من الشخصيات الامدرمانية التي تستوقفني طويلا العم كردمان وللذين لايعرفونه هو من سكان الثورة الحارة السابعة رجل حاضر البديهه شاعر يرتجل الشعر في لحظته وله صوت عندما يغني لابراهيم عوض يطربك ومن طرائفه مرة كان صديقنا محمد ابو والشهير بالنيتو عندو بنطلون جينز طالع موضة الايام ديك ولم يتم غسله منذ ان اشتراه وقلنا لكردمان ادينا حاجة سريعة في البنطلون فقال
كل مااشوفك صفاي بتعكر وللخوة القديمة بقيت تتنكر
هسي دا بنطلون ولا شوال سكر
ومن العبارات التي يستعملها كثيرا عندما يلتقيك يالمنقنق يالصغير سنك الله لي انا
ولنا عودة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Sahar Abdelrahman)
|
الشكر موصول لكل من تصفح هذا البوست
اخي خليل ليك وحشة وسامي يغريك السلام يافردة
سحر لااقول شكرا علي المرور ولكن اقول ياضيفنا لو زرتنا لوجدتنا نحن الضيوف وانت رب المنزل ولافض فوك ان امدرمان للكل الذي ينتمي او لاينتمي اليها
كذلك هناك احد الشخصيات الامدرمانية جديرة بالذكر عمنابشري علي شرفي رحمة الله عليه وهو من اسرة ال شرفي المعروفة ويسكن الثورةالحارة السابعة كنا نجلس معه الساعات الطوال لانمل حديثه وذكرياته عن الانجليز واصدقائه الشعراء امثال خالد ابوالروس والعبادي ومن طرائفه مع جيرانه وخاصة العم الطاهر ولنا عودة مفصلة له
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
شباب وشيب امدرمان سلام
نرجع للعم بشري علي شرفي كنا ناتيه في نهار رمضان والجو حار ونجلس معه في ظل شجرته ونبداء في رش الشجر بالخرطوش وهو يحكي لنا عن الانجليز وقد ذكر لنا ان الانجليز قالوا عند خروجهم من السودان سوف ياتي يوم تقولوا ياحليل الانجليز وذكر انو اذا قطعت غصن شجرة يتم وضعك في السجن الي ينمو الغصن مرة اخري وتحسر علي مابحدث الان
كذلك كان يحكي لنا عن الشاعر خالد ابوالروس في مسرحية تاجوج وهو من الناس الشافو تاجوج عيان ويذكر بعض من الابيات
داير اراك لكن عن ثيابك عارية
فتقول ياود محلق يمين جنيت منك بارية مانال الخوديم اهوي ليك انا جارية
ياود محلق يمين حبك تعدي مكانو واملي الفيك ذهب هدمت لي اركانو
وطلبك صار صعب
فقال المحلق لابد من امكانو
لنا عودة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: khaleel)
|
امدرمان ليك سلام عدد ماناح الطير في هيام
من طرائف العم قريب الله ابوصلعة وهو من مشاهير الثورة وابوروف مرة في صلاة عيد الاضحي وبعد انتهاء الصلاة وقبل خطبة العيد قريب الله شاف عمك الطاهر معلق الخروف فوق قبل بدء الخطبة وقال لي تعرف يامتولي عمك الطاهر دا لو كان سيدنا ابراهيم كان سيدنا اسماعيل راح فيها
ولنا عودة
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Elmoiz Abunura)
|
وصلتني هذه المشاركة من احد ابناء حي الركاببة بامدرمان الاخ عزالعرب له الشكر ذكر الاخ احمد علي عن عقارب القلعة وعقارب القلعة ديل كانوا ساكنين زمان في حي الركابية في بيت صغير في زقاق امدرماني جد وكانوا ثلاثة اخوات صفر مشهورات بانهم يلبسوا ثياب متشابهة ونادرا مايطلعوا سوا الا لمن يكونوا دايرين يعملوا شكلة قالوا كانوا معزبين شفع الحلة والكبار ودايما يعملوا المشاكل وينبزوا ويقولوا يااب ----- عفن ومعروف عنهم انهم مااتزوجو ويقال انو واحدة او اثنين منهم تزوجوا ولم يحصل النصيب وقالوا بعد ماكبروا شديد في رجل محسن من ناس الركابية اسمو صالح عبد الرحمن يعقوب صاحب شركة لولي للمواد الغذائية وهو معروف عنه حب الخير لاهله واصحابه وناس امدرمان وحي الركابية علي وجه الخصوص قالوا الراجل ده عندو بيت في القلعة زقاق اللالوبة يقع خلف بيت عم احمد وهو من تجار امدرمان القدامي المعروفين بالكرم والتدين وكان عندو برش باسمو يصلي فيالناس بامامته
وصالح عبدالرحمن يعقوب سكنهم في البيت وعين ليهم امراة لمراعتهم وخدمتهم بعد ماوصلوا من العمر ارزله وظل ناس الحلة القراب والبعاد يزورهم ويدوهم قروش والعقارب في سبات عميق ماعارفين الناس ديل منو ولازمان عملوا ليهم شنو الي ان اختارهم الله واحدة تلو الاخري
رحمهم الله ورحم جميع اهل امدرمان
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
مثلما تحدثت عن خليل فرح اود ان اتحدث عن الفنان ابو الحقيبة كرومة
كان يحكي عن كرومة مايشبه الاساطير من ذلك انه كان يلحن القصيدة في يوم واحد يتسلمها من الشاعر في الصباح او الضحي اوالنهار فاذا هي نابضة بلحنها في المساء وربما يشهد اليوم الواحد ميلاد اكثر من قصيدة
يقولون ان شباب امدرمان كان يمضي الي حيث يكون كرومة جالسا في المساء بالقهوة يرتدي القفطان الشاهيه وعلي الراس تلتف عمامة بعناية فائقة رجل نظيف البدن والهندام لايكاد يجاري اناقته احد كان شباب المدينة يرقبونه معجبين وحوله افراد جوقته من الشيالين وحينئذ يسال الشباب عن مكان الحفل ويكون في امدرمان او الخرطوم او بحري او اي مكان يدبر الشباب حالهم ويتبعونه اني سار مثلما هو زمار هاملين يسير الناس خلفه نشاوي ثم يبداء الحفل وكل مكان يصله الصوت يحرك العشاق فيتجهون صوبه
انه هبة السماء لهذا الوطن جاء واقام في رجائه قليل مكوث بمعيار الزمن كانه موتسارت زمانه ظل يصنف الالحان تلو الالحان الي يوم ان مات كان يلحن ومات بعد ان اتم رسالته زمان بدا في منتصف العشرين واستمر الي مطلع الثلث الاخير من الاربعين
غني لصالح عبدالسيد ابوصلاح - غزال الروض - جوهر صدر المحافل- يامن فاح طيب رياه - ياليل ابقي لي شاهد
غني لعمر البنا جناين اسيا - نسايم الليل زيديني - امتي ارجع لامدر واعودا
غني لعتيق الكثير غير شادن الارام- ياناعس الاجفان - ارجوك يانسيم روح ليهو - مابنسي ليلة كنا تائهين في سمر
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Ahmed El Gasim)
|
سوف نفرد هذه المساحة للكتابة عن احياءامدرمان وفرقانها حيث تضم في الجهات الاربعة اعرق الاحياء
1- حي الموردة
هو حي عريق وقديم ولعله بدا مع نشؤ بقعةالمهدي الذي اتخذ من قرية امدرمان الصغيرة مقرا لحكومة المهدية وبدا في بناء هذه المدينة وجات المراكب الشراعية تحمل الاخشاب والحطب والمواد الغذائية من الشمال والشرق والجنوب لترد امدرمان في شاطئ النيل شمال بيت المهدي والخليفة ولذلك اطلق علي هذا المرسي الموردة واتخذ الحي اسمه من هذا المرسي
حي الموردة يبدا من كبري خورابوعنجة حيث جات المباني جنوب خور ابوعنجة حديثا مثل مدرسة المؤتمر التي اقيمت اوائل الخمسينات
وبعد كبري ابوعنجة من الجهة الشرقية توجد حديقة ولس سميت باسم المستر ولس احد المديرين الانجليز تحول الاسم الي حديقة الجندول الحالية بعد الاستقلال والان ضمت لجامعة القران الكريم
وبعد حديقة الجندول يبدا سوق الموردة الذي يعتبر من اعرق الاسواق
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
العزيز متوكل لك التحية وانت تخلد تلك الساحرة بالنسبة لفريق ريد والتسمية سمعتا رواية من احد ابناء امدرمان حول سبب التسمية وهي مركز شباب امدرمان حيث كان الشباب بطعوا بعد البروفات او الحفلات بحبوا في الشوارع حول المركز وفي شوارع ريد بي حدوده التي زكرتها ومن هنا جات التسمية
لك الود وللحبيبة امدر
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: خالد احمد عبد المنعم)
|
الشكر لك اخي خالد وكلامك في محلو والريد الريد يااهل متين لامدر نصل
3- شارع الفيل
غرب الادارسة يقع هذا الشارع العريق ويسكن في هذا الشارع ال الفيل واسرة محمد الامين حامد جنوب خلوة قدح الدم في الركن الجنوبي الشرقي من فريق فنقر في اتجاه الخور القادم من قبة الشيخ البدوي مخترق حي الامراء وفريق السروجية الذي يقع جنوب الهاشماب مخترقا سوق ام سويقو ومارا بطاحونة اسكندر الي الغرب من خلوة قدح الدم وامام منزل محمد الامين حامد ليخترق شارع الفيل عند القصر بداخل الموردة غرب جامع الادارسة الي الشمال من سوق الموردة الي نهر النيل بين حديقة الموردة ودار اتحاد الفنانين
شارع الفيل حقيقة يفصل بين الموردة من جهة والهشماب وفريق فنقر وفريق العتالة الذي يقع في الجزء الجنوبي الشرقي من فريق فنقر علي مشارف خور ابوعنجة من الناحية الشمالية
وفي هذا الشارع كان يوجد نادي الموردة الرياضي التي تاسس عام 1929م وكان اول فريق سوداني يتم تسجيله بصفة رسمية من السلطات البريطانية انذاك
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
4- حي الهاشماب
وشمال شارع الفيل وحي الموردة وغرب فريق ريد يقع حي الهاشماب والذي اتخذ الاسم من من جد الاسرة الشيخ ابوالقاسم هاشم احد مشايخ الاسلام في امدرمان والسودان
كما يضم مجموعات اخري رات ان تعيش بين هذه الاسرة العريقة وعملا بالمثل القائل الجار قبل الدار وقد ظل جدنا رحمة الله عليه خضر بدري يردده في الكثير من المناسبات
من ابرز معالم الحي انه يضم دارالرياضة بامدرمان- مدرسة الدايات ومستشفي الولادة - بوابة عبدالقيوم - كلية المعلمات اول معهد لتعليم المراة رسميا بالسودان
وفي شمال شرق حي الهاشماب اختار الشيخ بابكر بدري موقعا للاحفاد في الثلاثينات ليكون معهده جوار صديقه الشيخ ابوالقاسم هاشم
والهاشماب تذخر بالشخصيات الهامة في جميع المجالات مثال ذلك محمد احمد المحجوب الذي شهد داره الصلح الشهير بين الملك فيصل وجمال عبدالناصر
ومن الهاشماب جاء الدكتور عبدالحليم محمد النطاسي البارع والاديب المقتدر والرياضي الاصيل والسياسي الكبير الذي نال عضوية مجلس السيادة بجدارة
ومن الهاشماب جاء ابوالصحف الاستاذ احمد يوسف هاشم صاحب القلم النزيه وصاحب جريدة السودان الجديد التي كان لها الدور الكبير في النضال ضد الاستعمار
وهكذا يكتمل عقد الفرسان الثلاثة كما كانو يسمونهم المحجوب وحليم واحمد يوسف
وفي حي الهاشماب لعب الامير صديق منزول كرة الشراب مع حو كرندو الشابة التي كانت ترتدي الفانلة والردي وكانت كابتن لفريق الجهة الغربية من حي الهاشماب
| |
|
|
|
|
|
|
|
|
 Re: لان السودان كله في ام درمان اذن ام درمان هي السودان (Re: Mutwali Malik)
|
المحطة الوسطى .. العم المرحوم عبدالكريم الزبير أبوكسكته رئيس نقابة سائقي
التاكسي - ورئيس رابطة مشجعي نادي الهلال
عباس رشوان
الاكسبريس
الحاج نقدالله
سورج
فيتال
سوق الجلود
العدني
أبومرين
التيمان
فندق حمدتو
سوق الدهب - ناس تبيدي
سوق العناقريب - محل ناس عوض كري
فينوس للحلاقة- صالون كان يجتمع فيه شعراء وأدباء أمدر
سعد الشيخ للعطور
عوض الشايقي للمايكرفونات
حلويات الدانوب لصاحبها يعقوب محمد عبدالله
حلويات الطيب سيد مكي
حوش ناس أبوالعلا
برعي المصري - للزبادي والشعير
الصالون الأخضر للحلاقة لصاحبه عطا
طاحونة الملح - لصاحبها العم متوكل - محطة مكي ودعروسة
صينية مكي والجاويش العم أحمد جبريل
بيت الكسرة - صينية مكي
..
................................................................................
والله ما ذكرته يا Ridha فى القائمة وما تلتها من قوائم بتخلى الواد زى الحائم الان فى امدرمان وشوارعها وازقتها.. بس ما تنسى سوق الموية من الزمن القديم ..وسوق الشمس من الزمن المتوسط.
شكرا لبك يا متولى على البوست الجميل
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Basheer abusalif)
|
اخي بشير ابوسالف لك كل التحايا ونزولا لرغبتك في التحدث عن سوق الموية وناس امدرمان طلباتهم اوامر لذلك سوف افرد هذه المساحة للتحدث عنه
سوق الموية يقال ان اول من اطلق هذا الاسم هما اللواء حمد النيل ضيف الله والاستاذ خالدابوالروس وكانا من رواد محلات جورج مشرقي الذي كان يضع جرادل ماء مثلج ويوزعه علي المارين الذين لايستطيعون الجلوس وتناول المرطبات فلما رايا منظر الماء المثلج وهما جالسان في الفرندا قالا لجورج مشرقي كمان بقيت تبيع الموية خلاص نسميه سوق الموية
يقع سوق الموية في المنطقةالواقعة في شارع الموردة القادم من كبري النيل الابيض الي المحطة الوسطي بامدرمان في المنطقة التي تبداء بدار حزب الامة مكان محطة موبيل اويل الان وتنتهي بمحل ارونت قبل المحطة الوسطي مكان عمارة البرير الان شمال جامع امدرمان مع اضافة الزقاق شرق شارع الموردة الذي ينتهي بقهوة شديد وبنك الخرطوم الان ويضم ايضا الزقاق المتفرع من قهوة ودالاغا واجزخانة امدرمان حتي نادي الخريجين ويضم غربا سينما برمبل وقهوة الزيبق حتي مباني بوستة امدرمان
وسوق الموية يتكون من عدة مقاهي ومطاعم تبداء جنوبا من مقهي يوسف الفكي غرب السينما الوطنية وبالقرب من المقهي يقع دكان حمزة الحلاق حيث تقصده مجموعة من رواد سوق الموية للحلاقة وحمزة الحلاق كان هلالابي وفي دكانه وضع العدبد من صور لاعبي الهلال وبعد دكان حمزة هناك محلات نيوبازار لصاحبها علي عبدالله الملقب بعلي سكرة وبعد محل نيوبازار كانت توجد مقهي العم احمد خير وهو مقهي عريق وقديم كانت له اربعة ضلف تفتح شرقا علي شارع الموردة الرئيسي واربعة ضلف تفتح شمالا علي ميدان سينما برمبل وكان عندما ينتصر الهلال علي نده المريخ تصدح مكروفانات الفونوغراف باغنية الفنان الكبير ولاعب الهلال السابق كروان السودان كرومة
هل الهلال والايام صفنلوا وضع تاريخ في السودان بفنه
ولنا عودة لسوق الموية
| |
|
|
|
|
|
|
|
|
|
Re: لان السودان كله في ام درمان اذن ام درمان هي السودان (Re: Mutwali Malik)
|
بالعودة الي سوق الموية اود ان اتحدث عن الرائد عليه رحمة الله جورج مشرقي وهو من اعلام سوق امدرمان
جاءته فكرة بيع المرطبات والعصائر بعد ان لاحظ ان الناس تاتي الي سينما برمبل باعداد كبيرة ويخرجون عطشي ولم تكن هناك خدمات طعام او شراب في المنطقة
القهوة جمعت كل انواع الناس ومشاربهم واتجاهاتهم واهتماماتهم وكان من رواد السينما الزعيم المصري جمال عبدالناصر وعبد الحكيم عامر اللذان كان ضابطان صغيران بالسودان وكانو عندما يخرجون من السينما يجلسون في المقهي ويطلبون المشروبات
رواد القهوة كانو من الطبقة العليا في المجتمع - الادباء - موظفي الدولة- القوات النظامية- الفنانبن- السفراء والسياسيين
من الفنانين ابراهيم الكاشف - عبدالمنعم حسيب - عثمان الشفيع - ابوداؤود - احمد المصطفي وغيرهم
من الشعراء ودالقرشي- عبدالرحمن الريح- ابوصلاح- البنا- سيدعبدالعزيز ومعظم اغاني الحقيبة ولدت في هذه القهوة
من السياسيين الذين كانو يرتادون القهوة الازهري - مبارك زروق - يحي ومحمود الفضلي -احمد يوسف هاشم - محمد نورالدين - حسن عوض الله وغيرهم
كانت تسمي قهوة الرؤساء لان كل من حكم السودان مر بها عبدالله خليل والنميري
المحل الان تحول الي بقالة كبيرة ويدار بواسطة ابنائه
| |
|
|
|
|
|
|
| |
Mutwali Malik
منتصر عبد الماجد
khaleel
فرح
خالد
Ahmed El Gasim
سلمى الشيخ سلامة
محمد الواثق
حسام يوسف
Kostawi
tmbis
Hisham Ibrahim
Sahar Abdelrahman
Elmoiz Abunura
Muhib
فيس بوك
تويتر
انستقرام
يوتيوب
بنتيريست