|
|
 خواطر رياضيه.... استراحه خفيفه....وهدية العيد لاهل المريخ
|
أول الغيث:
كل عام والجميع بخير....اجمل مافي العيد استراحه خفيفه من زحمة العمل والبحث العلمي الممل...فرصه قليله للنوم وللقاء بعض الاحبه الذين لم التقيهم من سنين..وجدت عند احدهم بعض الصحف السودانيه القديمه والحديثه فوجدتها فرصه لانعش ذاكرتي الرياضيه حيث انني لااحب السياسه ولااخوض كثيرا في الاجتماعيات لدواعي ندرة الوقت ....وجدت الكثير في الصفحات الرياضيه ومنها ما يستحق الكتابه عنه خاصه عن اهل المريخ وانتهزها فرصه طالما هناك بعض الوقت للتنغيص عليهم وذلك لتوفر الماده اللازمه خاصه وانهم لو توفر لديهم ربع ماهو مطروح في الساحه لاقلقوا مضاجعنا..عندما اخبرت صديقي عما وجدته في الصحف وعن خبث نواياي اقترح علي ان اكتب فقط في مجالي الطبي.... حيث انه من اهل القبيله الحمراء... ولكن عبثا يحاول فأنا في اجازه....
لب الموضوع:
انا لاعب كره قديم{خرده}....تخطيت الثلاثين من العمر{عجوز يعني}.. ...لدي اصابات كثيره تمنعني من اللعب { ومعطوب كمان} دا غير امراض الزمان..{الله يعين}.....من جنسيه افريقه {صديقه}......لدي الرغبه الصادقه في ان احترف عندكم وحأكون عند حسن ظنكم........وأنا واثق انه اعلامكم ما حيقصر معاي وحايكتب عني من الصفات والمميزات ماليس في ساحر العصر القديم بيليه ولا في ساحر العصر الحديث رونالدينيو.....ويقوم جمهوركم يستقبلني من مطاركم الجميل ويشيلني {يعتلني يعني } و يحوم بي العاصمه كلها ولحدي مانصل دار الاتحاد عشان نوقع ...يقوم واحد شليق من جماعتكم يتذكر انو ماكشفوا علي طبيا { شكيتوا علي الله} ..والجماعه يقوموا يعتلوني تاني للمستشفي وقبل ما تطلع النتيجه {الانا عارفها سلفا وما بتغباني} اكون خمشت الفي النصيب من الاخدر ابو صلعه.....ولما تطلع النتيجه يتلفتوا يلقوني في مطار الخرتوم...{المره دي كداري وحياتكم }....واخر الكلام وسعوا صدركم....واصلوا دي ارزاق مقدره ومكتوبه.....وقبل ما امشي اخوي سمع بي قصتي ومصايبه اكبر من مصايبي... وجايي في الطريق ...عليكم الله ما تقصروا معاه..والبركه في اعلامكم المامضلل {حاشا لله}...ودعتكم الله.
همسه للاستاذ صلاح ادريس:
عندنا في السودان عباد تخصصوا في تدمير انجازات الغير...ارجو صادقا عدم الالتفات لهم...وواصل كفاحك ..اصلو الامل فيك كبير ..وبدات ثمراته في الظهور بس واصل...وراجيانا مهام جسيمه ومباريات دوليه غايه في الاهميه.... الله يخدر ضراعك.
حاشيه:
مازال اهل المريخ في انتظار مخلفات اهل الهلال ليقتاتوا منها كالعاده ..خاصه وانه العيد ضحيه.. يعني اكيد الحصيله سمينه جدا... خصوصا وانه الخروف اجنبي......
|
|
 
|
|
|
|
فيس بوك
تويتر
انستقرام
يوتيوب
بنتيريست