|
|
 هواري حمدان هجو
|
اذكر ذات يوم خريفي ونحن في احدي بقاع الانتاج الزراعي الصناعي ...في كناف ابو نعامة ذلك
المشروع الفريد قيل لنا غدا سياتي مهندس للنسيج جديد..يسمي هواري حمدان .فاذدانت استراحة
الكناف التي كان شيخها هوالنجمي الطيب سليل اسرة لها باع طويل في التفتيش
الزراعي ...وجاء هواري
وجاءت معه اجمل الاشعار عاطف خيري.محمد عبدالحي المجذوب .صلاح احمد ابراهيم .النورعثمان ابكر
وكان النجمي مبشرا باشعار قباني وجويدة وبدات احلي الليالي التي لن تتكرر ابدا في تلك البقاع
شعرا وغنا وحورعين وانتاج
مرحب بهواري حمدان الشاعر الاديب ورائد المنابر الالكترونيه ويلا يا هواري نريد ان نري ابداعك هنا
حتي تعود الينا تلك الايام
|
|
 
|
|
|
|
|
|
|
|
Re: هواري حمدان هجو (Re: WadAker)
|
الحديث عن هواري حمدان لابد ان يمر ببوابة الكناف
كنافا الفناه علي كل حالا وقد يولف الشي الذي ليس بالحسن
نستعذب الارض التي لا هواء بها ولكنها وطني (موسي ضرار ساتي)
جئنا الي الكناف بعد تخرجنا من الجامعة وفي دواخلنا حماس كبير للخدمة العامة
والعمل وسط الناس الغبش ..اتاح لنا هذا المشروع الزراعي الفريد عالما من التجربة المتكاملة
مابين العمل المهني والاندماج في المجتمع ومشاكل العمال والمزارعين والتنسيق مع شيوخ
تلك القري الطيب اهلها...
مشروع الكناف يمتد في مساحة 30 الف فدان وبه مصنع للجوالات والخيش وبه قنوات وطلمبة ري
قادرة علي ري 40 الف ..وهو احدي المشاريع التي باعها الانقاذ للقطاع الخاص فكانت الشركة
السودانية العربية للكناف مابين هاشم هجو الراسمالي السوداني واحدي الشركات السعودية
وتقع منطقة ابو نعامة الجانب الغربي للنيل الازرق مابين سنار والدمازين
وتعج المنطقة بموسسات شتي كلية ابونعامة والابحاث ومشروع الكناف المثير للجدل
فشهدت المنطقة استقرار لما وفرته هذه الموسسات من فرص عمل حتي للنساءوالرجال كبار السن
وتلتف حول ابي نعامة قري شتي اشهرها قرية تنقرو لما فيها من حياة ووناس طييبن
وانشاء الله مواصلين
| |
|
|
|
|
|
|
|
|
|
Re: هواري حمدان هجو (Re: عبدالكريم الامين احمد)
|
شكرا اخي الكريم باشمهندس عبد الكريم الامين كيكي
تفجات وانا اجد البوست باسمي..فلك التحية وانت تبحر بنا في عالم الكناف
سوف اكتب لك هنا اول نص كتبة وانا بالكناف
لجدادا الفي البيت كر كر
وكليبا الحائم جرجر
الزهج الطول صرصر
وكلاما الساخن والحر
بنغمة حزينة صفر
يالسرة إيه البحصل.... لو الواحد اتكسر
ما الرزق مقسوم ومسطر
السرة كانت مستغربة
الحالة ضايقة وصعبة
وليدأ تعبت قرتو
مستنياهو.... متين اتوظف
تضوق.... حنتو
جامعة قامت خرجتو
كاس للشغل لا من فتر
ماسابلو حته ما مامشاها
حتى السحالي في الجحر
فات ليها كان يلقى الشغل
وحكومة قالت تتجندوا
بعديها حتلاقوا الشغل
امرا مطاع الاتباع
يا سلطان بلادي
هل مستطاع
نلقى الشغل بعد التجند والصبر؟
نصبر صبر
نصبر نصوم على العطل
لامن نلاقي الشغل
..... ...... .....
السرة تسأل في الولد
ما عينوك يا ولد
ما شافوا ليك وظيفة لحد هسه في البلد ؟!
وإجيها رد
شفع صغار ما قروا
عملوا الدقون اتنكروا
راكبين عربات اتبختروا
ديل لا بعرفوا حالنا لا يسألوا
وليداتنا يا السرة القروا
كملوا التجند..... إتاخروا
لا وظيفة فيها اتعينوا
لا بلد ليها هاجروا
كل المعاينات إدخلوها
بجد وليها ذاكروا
وفي آخر لحظة تطلع لجانا وتعتذر
واخشوا ديل توشا عديل
ووليد يمين ما خشى أي معاينة
ولا ضاق نار القراية الساخنة
تلقيهو يما اولا !!!!!
قبلوهو في مكتب فلان !!!!
ومدير كمان !!!!
والله يما ما قرأ !!!!
والله يما ما قرأ !!!!
لكنو قاري الاحتمال
المنو بنخاف الجلاء
يا يما اصلك من زمان
بتكوسي لي في الهندسة
دايرا لي فيها اكون إنسان
دكتور كمان
ما أجملا .... ما أجملا
واصلح الحال القسا
في الاحتمال... كبروا العيال
زحوا الغبار
جالوصنا داك نهدوا يمة
صراية يبنيها الخيال
راكوبة من عود القصب
تلمع تقول سن الدهب
مطر الغضب قلب الدهب
سن الدهب لحريق لهب
مستنية إسوجا يمة
من ماهية زمانا لسه ما وجب
دا كلوا ما كان من فراغ
ولا السرة باعتلي الدهب
عشان تشوفني مهندسا
كان عاجبا فلان ود فلان
مهندس قديم فوق الصعيد
عربيتو بوكس مكندشة
البرتكان....المنقة....والبطيخ كمان
حب الرمان.... عود الطلح
إجيبو فوقا مربطم
.......
.....
وتمرق امو على الحريم
تقسم الخبز.... النجاح
حتى الطلح تقسمو فوق البرش
طيبة اهل ناساً حنان
والسرة كان عاجبا دا
.....
....
يالسرة دا ما كان زمان
زمن اللقيط... زمن الفزع
ما انقد زمان.... ما بترقع
وجاتنا العفاريت المسومة بالكضب
بدت تغامر بالقرش كان طره بس تقول كتب
يا يما ديل ما بستحوا
وزمانا لو طول رقيبتو إضبحوا
****** ********
واقعد براي اسرح مع الخاطر بعيد
يا يمة قالوا الليلة عيد
كل المكاتب مقفلة... لا حد برد
ولا بسألا
واقعد براي في ضل نيمة مخضرة
شربت تكون الاحتمال
تقدر تمد فروعا تاني
ولا تقصرا !!!!!
........
........
يا زول حرام تشحد تمد إيدك لابوك
رباك سنين ما اهملك
قراك سنين ما جهلك
بقاك عود ثابت متين
نسمة فساد ما بتكسرك
أصبر صبر علي الجمر
اصبر صبر علي الليالي الظالمة
وطعم الفقر
لامن تلاقي النصر
أبوابو تتفتح فجر
ويا السرة نقلعو حقنا
بالقوة لا باليسر
الاتملى نفرغوا .... والفاضي نملى ضر
............
.........
ومر موكب مجهز بالخطب
بالشعارات المزيفة بالدهب
والناس وراهو إرددوا
حنشيد نحنا بلدنا
حنلف ماكينات المصنع
وارجع صداها اقول
حنحاصر نحنا بلدنا
ونقلع شدروا الاخضر
والمصنع داك اتعطل
لا إنتج خيش لا سكر
ومصنع لكوريا نبيعو
وآخر لسوريا إتاجر
بخبرا من الخارج
واولادنا لا شغل لا مشغل
..........
...........
ونشيد آخر اتفجر
اماما جنود الفداء
اعدوا الشباب لنيل العدا
والله ياهو الفضل
والله جد مسخرة
الشعب ضاع وانبرى
والشباب دا يما مشيهو لاورى
من الهموم من الظلم
البيهو انهرى
من القراية الفي الكتب
تقراها لامن تجهرا
ونعست من تعب القلب
والنيمة ضلها ضل الخلاء
وفجأة جاني صديق
شفتو زمان .... في الجامعة كان إنسان
لابس نظيف ... شكلو ظريف
الليلة حجمو إنقسم
وعلمو الفوق لراسو إنهدم
في الجامعة كان اولا
لكن ما كان ليو أي علاقة بالتتحزب
والقطعان
ما كان جبان
كان وليداً جاي بس يقرأ وافيد البلد
ما كان إظن ان البلد
ما محتاجالو
محتاجة لطيشة في الجامعة
مع التحزب والسخط
| |
|
|
|
|
|
|
|
|
|
Re: هواري حمدان هجو (Re: عبدالكريم الامين احمد)
|
هوارى ... مبدع .. رقيق تتهافت عليه الكلمات عرفته من خلال مجهوده الجبار مشاعل جمع خلالها نخبة طيبة أمشال ملكة سبأ وأرتيقة وكان التواصل بيننا جميلا ورائعا.. أتمنى أن يواصل أبداعاته
| |
|
|
|
|
|
|
| |
عبدالكريم الامين احمد
bushramk
nile1
فيس بوك
تويتر
انستقرام
يوتيوب
بنتيريست