|
|
 رحلة إكتشاف شخصية المبدع عبدالله وداعة الأمين
|
إليكم و إلى كل ذرة من تراب الوطن الغالي ... مبللة بعرق الطيبين المحبين التي
تنبت من بين الوجدان الصادق... أزهاراً تفوح طيباً ... مسكوباً من عبير الكلمة.
أصدقائي إخوتي الذين أنتم حروفاً لإسم البلد العزيز و إخلاصكم نقاط إسمه
لكم التحية إليكم مجدداً منكم و إليكم و عبركم
إكتشاف الإنسان للإنسان ليس من الضروري معرفة شخصه فقط من خلال الدراسة أو صلة القرابة و هكذا ، بل معرفته من خلال تصويره الآثر للشجون و المعْبَر الرئيسي لإيصال الكلمة لعاشقها ، كذلك العمل المنمق الذي عجزت الأقلام التي بيديه وصفه. أسرد قولي عن الإنسان و المبدع القلمي و المصور الحسي : عبد الله وداعة الأمين الذي يقيم بالمملكة المتحدة ( لندن) فقد أشار إلى معنى الغربة و وصف البعد المريع و الحنان و الحب الخفي الذي ينبع من أي إنسان صادق تجاه نفسه و رفاقه كالذي يسرده في إبداعاته الغير مألوفة لدى الكثيرين من السامعون للشعر الدارجي السوداني و الذي يسهل على كل حس تذوقه دونما اللجوء إلى إيضاح المحوى كشكل رمزي.
ليست مقالتي هذي عتبة لشهرته على مستوى النادي أو مستوى العالم، بل أزداد إعجاباً به و بكلماته و بمدى شفافيته كلما أطلعني على إحدى كتاباته. و وعداً سأواصل إيداع أعماله في المنبر العام دائماً و في المراكز الثقافية السودانية.
أناشدكم جميعاً كي تتعرفوا على ذلك السوداني الفذ من خلال أعماله . و أبعث إليكم تحية منه في أسطر.
رسالة الرثاء الثانية
في ذكري رحيلك يا مصطفى تأكلنا الغربة ويسافر بنا مد الغيم الى المجهول
نبكيك ام نبكي انفسنا وضيق الحال؟
ام نبكي" الشجن الاليم" "ما بين خاطر" "وحزنك النبيل"؟
"وبنفتش عليك في المنفى"
وفي "مطر عز الحريق" "وطيبة" تكاتل المشوار علي نار الجرف "طورية متكية"
"نكر صوتك صداك" "واتبرجت غيمة" "نهار شوقنا" ومشاويرنا الصباحية
وانت النيل
وكنت قبيل
دعاش الفرحة لي "طيبة" و" ود سلفاب"
و وسط الدارة "ترقص فوقا صقرية"
تنادي الشفع التلعب مع "نوره"
"وعجبنا" الكان بدقوا كرامتو فجرية
و"عم عبدالرحيم" بشهد هوان الحال
وضيم الزول وقت ترزم
خيوت الفجعه فوقو تموت
"تغرد فوقو قمريه"
"مداين" تبكي في المجهول
وفرحة زول
"بيحلم زي مراكبية؟
تكابد "ضلنا" المغشوش علي
"شعر البنية سقف
وايدين الرجال رصاص" بيوقد لي النهاريه.
بعد "عزّ المزار" والنيل بقاوم في جيوش الهم
ويسال عن صلاح الحال
يرتب "مريم الاخرى" ويصاحب لي الخدرجية
بعد "مطر الحزن عاود"
ورشة الدنيا بي سيلو
"بقول غنوات"
"ونشوة ريد"
تقالد بت فرايحية
وقت وقف النهار بالليل
تجي "البت الحديقة" كمان
"وتبكي وجيدة طعنة سيف"
وفي" الزمن الخرافي" تخت
حتة فرحه ورديه
علي "قمر الزمان" تحلم
"علي عينيك تصاوير الغنى" المسفوح
و"عباد الشمس" بشهد
"بحيض النيل" ويملى رعافو كورية
"وخوازيق البلد زادت"
"عجاج البحر" سده الغيم
معاك "ضليت" وضلت فرحة مخفية
مع غيبتك... حزنت نامت الخرطوم
بعد ما "عدى فات"الحال
دعاشك من سماء امدرمان
وتاهت "سمحه سمرية"
وانكسر الشتم بالليل
وضاع النيل
وقال "اتدفقى" الاحزان
"ويا ضي شبابيك البيوت" انسد
وسكّت لي الصنايعية
ويا" صابرين" علي جمر الحزن ابكو ا
وبكي سماكا يا السودان
عشان" قمر الزمان" اضحك
يدق مزيكة" حورية"
صحي" ابداك انا ومن وين" ؟
وانت معانا جوه الروح
محل مانروح
وفيك ارواحنا متكية
"وبراك واقف" "هردتا لهاتي" قالن ليك
"سحابات الهموم" يوم جن
"علي بابك" يعزنك بعد ما سابن الجيه
و"سافر" في "زمن بيروح"
شعاع "عينيك مدن"تحلم
في" لحظة شهقة" نص الجوف
و"ميلاد حب" يغالط في السماسرية
ودفرة وجعة تمصر ليك
مشرع الحلم الفسيح وتصر
وشيشا في "طريق الليل"
بسكّت دمعة محرية
وقالت"ماشقيتك" يوم ولا استنيت
"صديقي الاول" المسكون
وساكن في" استلاب" الغيب
ويشتل غنوة وردية
علي "غربة ومطر" و"سحاب"
عشان "اديني احساس" زول
همو علي وطن مهموم
ونفسو تقولو في"نفسي ..في داخلك اعاين" ليك
بعد تميته وردية
وجايي تسكت الشفع
ومن "عزار دموعك ديك"
تقش ايديك عشان تقدر تعاين ليك
وايدك ماها ملويه
رحلتا وسبتا دنيا الهم
بترقع في يباس الحال
علي" لوحة وطن" مجروح
وصوت مبحوح
بعد عيشة الرجال مسخت
وعاشت غربة ابدية
وقالت "يا سلام منك" رحلتا حلاص؟
وسبتا الدنيا لي الاغراب
بعد ما ناح غراب الشوم
ودقا نحاسو زندية
وجاطت فينا ريحة الخوف
وعربد في صحاري الروح
ضجيج الوجعه ينده ليك
ويشحد ربو حرية
تلامس لي سما ارضك
عشان افرح سما الخرطوم
بعد "عز المزار" في الضي
نشف ريق البنادرية
نحبك انت مافي وفي
لانك في
وبس بكفي
وجودك في مدى الاحساس
ونارك ماها مطفية
وطعمك ببقى زي ما هو
"مداد ارضك""شليل الراح"
وحزمة ناس تشنق الليل
تخلي الساحة مضوية
لكاتبه/ الأستاذ
عبدالله وداعة الأمين
مهندس/ وائل تاج السر
|
|
 
|
|
|
|
|
|
|
 Re: رحلة إكتشاف شخصية المبدع عبدالله وداعة الأمين (Re: wail tagelsir abdalla)
|
صحاني صوتك
صحاني صوتك في المنام ينده علي والناس نيام
فتشتا ليك جواي هنا وانتي الهناك وسط الزحام
صحاني صوتك
صحيتي اشواقي السهت واتطانشت كل الكلام
وندهتي لي اخر حرف جوايا حركتي الغمام
يا معلمه عيوني السهر يا داسه سحرك في الهيام
انا فيكي يشتاقني النعاس ومعاكي بشتاق ياسلام
صحاني صوتك
صحيني سدي علي دروب الرجعة افتحي سكتك
نسيني دنيا الناس خلاص بي دنيا تشبه دنيتك
خليني اهرب مني ليك من حته جواي حقتك
لي حته برضو تودي ليك تسرق ملامح دهشتك
صحاني صوتك
صحاني صوتك وما براي الكنتا هازيني الشجن
وماكنت اول زول بريد جواهو خيلك عربدن
واتوسدن سفر العيون الشوقا ساكن في الوجن
ياستي مشتاق ليك كتير مستني خطواتك يجن
صحاني صوتك
عبدالله وداعه الامين
لندن 24.01.2006
| |
|
|
|
|
|
|
|
|
|
Re: رحلة إكتشاف شخصية المبدع عبدالله وداعة الأمين (Re: wail tagelsir abdalla)
|
خالص التحايا
العزيز
wail tagelsir abdalla
شكرا لفتحك نافذه من بيت هذا الرجل ..
فهو رغم بعده يحيا في مشارفنا سخيا ينسج السحر لنا انشودة تهفو الى ريح الخلاص المشتمل صفو القصاص بلا رصاص ..
ابياتا تحتوينا كاروافد النصر المعاقر للقلوب ..دافق الامل الطروب.. فهو عطر اغنية بها الحزن يغازل او يذوب...
التحايا النواضر..
| |
|
|
|
|
|
|
|
|
 Re: رحلة إكتشاف شخصية المبدع عبدالله وداعة الأمين (Re: wail tagelsir abdalla)
|
نشكرك على مرورك و مواصلتك يا تروتسكي يا جميل
لك التعرفة دون المعرفة أعرفك المزيد من محتوى ذلك الرجل
الذي عرف نفسه بأعماله أهديك أخرى بالإنابة
سهران معاك.. .
انا والنجوم..
حاجات كتيرة.. معايا
برضوا بتشبهك
وتنادي ليك...
جوه القلب تسال عليك
سفن الحنين
الجايه منك وخلتك
مشدوه علي جزر الضياع
الشاربة من سفر النعاس
الفيهو نامت ودستك
واتعمدت تسال عليك..
لون الرذاذ
الطله من كل الشرف
واتمنى يسرق بسمتك
ويودرك بين السحاب
واللسة في رحم المطر
يحلم يدفق في الخريف
احزانو يسرق دهشتك
واتخيلك انك براك
مصلوب علي كل الخطوط
الجايا منك ماشا ليك
والجوه تحلم انو بيك
حاجاته تصبح حقتك
سهران معاك لسع كتير
واتخيلك
تسرج فرح كل الخيول
الجاية من زمنا بحن
وحنينو شايل فرحتك
وانا بي وراك شايلني
موج كل البحر واتشابى ليك
والموية تمسح في الضفاف
وانا بين ضفافي وقسوتك
اتوسد الهم الوقف
ما بيني بين صوتك واقيف
لو بس الامس دنيتك
بي حتة جواي تشتهيك
وتنادي ليك تفضل معاي
زي الفواصل في المدار
جواها ترسم منيتك
لي دنيا برضو تودي ليك
وتودرك جوه العيون
الديمة تسال عن عينيك
الفيها شاتل روعتك
زخة مطر تنده تقيف
عطشانة لي كل الحروف
الديمه برضو تودي ليك
بي فرحة تغسل لوعتك
واتخيلك سهران معاك
واتخيلك
عبدالله وداعه الامين
12.27.2005لندن
| |
|
|
|
|
|
|
|
|
|
Re: رحلة إكتشاف شخصية المبدع عبدالله وداعة الأمين (Re: wail tagelsir abdalla)
|
عبدالله وداعة الامين،،
رهيف الروح واااسع القلب،،
مريييح الحروف،،
لما يبقى الشوق جريمة
يبقى جرم الريدة اكبر
نحنا في شوقك غرقنا
وديمة بي جرمك بنكبر
طبقي حدودك علينا
ونحنا برضو نريدك اكتر
اسجني الناس التحبّك
والعيون خليها عسكر
تحرسك من شر عيونا
الديمة من عينيكي تسكر
زيدي من تهمك علينا
اصلو حكمك ما هو اخطر
من حكم ناسا تودّر
في الطريق وكلامه اشتر
شكراً وائل تاج السر عبدالله ،،
| |
|
|
|
|
|
|
|
|
|
Re: رحلة إكتشاف شخصية المبدع عبدالله وداعة الأمين (Re: wail tagelsir abdalla)
|
لكم التحايا مجدداً
و كم أيضاً بعض الأعمال لذلك الفنان المخضرم المرهف
غياب
كان غبتا منك ببقا فيك
ماتكوني بس فيني الغياب
يا فاردة بي ليل الشجن
مكحولة زي مدن السراب
برجاكي فوق ضل الامل
بتحدى بيك وهج السحاب
يا غبته جواكي الفرح
يا كنتا في نبضك عزاب
بس كوني بي انتي الوهج
وابقيلي شوق كل الصحاب
يا شاتله جواي الفرح
وحنينة زي مطر التساب
اقراكي بس وريني كيف
واجيكي بس من ياتو باب؟
***
كان غبتا منك ببقى بس
جواكي وافضل مشتهيك
و وراكي زي ضلي السرح
يوم جيتي يا اجمل شريك
فرحانة بي فرح المطر
والموية بتسابق جريك
شلتك معاي موجة عشم
ومحنة حلوة فرحتا بيك
بعتزى بيك تحتك ارض
يا خوفي من خوفي الوشيك
انو الغمام يروي الارض
وانا في غمامي يضيع وشيك
والسكة تنكر من وراي
خطوي الزمان ساسق مشيك
***
كان غبتا منك فيك بغيب
شايلك معايا محل محل
سافرتا بيك كل الدروب
وقطعتا بيك سكك الوحل
لاغيمة هدت حيلي يوم
لا هزّا احساسي المحل
لا مرة مليت من مشيك
لا حفيت اشواق الامل
فرحانة بيك روحي السهت
واطانشت روح الملل
يا سارقة من عيني النعاس
وحنينة زي كل الاهل
شيليني في كفك بجيك
قبال يشيل كفي الوجل
عبدالله وداعه الامين
لندن 03.08.2005
مهندس / وائل تاج السر
| |
|
|
|
|
|
|
| |
wail tagelsir abdalla
معتز تروتسكى
Soumeta
مبيوع
فيس بوك
تويتر
انستقرام
يوتيوب
بنتيريست