|
|
|
 Re: جِن "عبد القادر" و جِن "بن الملوح" وما بيناتُن -- نضمى ساى (Re: أبوذر بابكر)
|
..
اللللللللللله، عليك يا أبا ذر، يا شقيقي في الغار، والله كتابتك دي حلوة جنس حلاة
قريتها تلاتة مرات
أمحمّد زين، أفرس رجل، وراجل أسمح مره، شالوها منو لأنو كريم
سيف ودرق ما بتتشال، جبخانة وأب ستة الحارق، أبداً لا
حب وقلوب، المره بتريدو ريداً جنسو براهو،
الزول بقه يباري بالشجر ساااي، ويشيل وينم،...
تآمروا على كرمه وبسالته، العمدة وأم البنيّة،
يا أهل الريف الجايين
ويا أهل الريف الماشين
تعالوا شوفوا أمحمد زين
سافل القرضة وصعيد للعين
..
ريقك لبن الدرجت
وسنّك برق الهرجت
---
ما هو المبوبح طولك
وميهن دلوة شطورك
إن مهلني العُمر تاني بجيك،..
--------------
شايل أب ستة الحارق
والليلة إن طار مو مارق
...
| |
 
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: محسن خالد)
|
يا محسن
يا أسمح السمحين
اريتك طيب وحالك زين
دى حكاوى من مخزون مصوبر جوه فى "سِويبة" الروح
أكيد طبعا بتعرف السِويبه"
شى من الوالده الله يطراها بالخير والعافية
والشى الكتير من "امييامنه"
دى حبوبتى ام امى، إسمها آمنه، ولامن نقول ليها "امى آمنه"
"بنخلت" اليا والآلف شان يبقن كلمه واحده
كانت احسن "مرا" لاقتنى فى الدنياوالناس كانو مسمنها "الجيّد"
باليا المشدده يعنى ال Good
وفعلا كانت جيد وجيد جدا كمان، عشان كدى انا سميت عليها "آمنه" بتى
أول حكايه قالتا لى
كانت عن حبوتها "التومه" بت ود الطاهر الكتيابى، وكيف إنها كانت مع النسوان الاتحزمن ووقفن صف
ورمن روحن فى البحر ساعة "الدفتردار" ضرب ديار الجعليين
أمها كانت صغيره ختوها فى خُرُج فى ضهر حمار ودفروها مع الناس القبلو صعيد
والقصة طويلة
أما عن حفلة الجاغريو دى، كانت على لسان الوالده، واليوم داك حضرت الحفله وهاك يا رقيص وهاك يا شبابيل قبال ما يتمو حلوها
بعدين أمحمّد زين ود عمر ده عندنا معاها لحمه عديل
الوالد أهله من "عرب الصابراب" القالن الشيخ الجيلى فى مسداره داك
يا ام ضمير ظعنك حده
وختم ابزليق بلد العمده
بكو الصابراب وجفو الغمده
والنار فى جريب خمدت خمده
وهن مسلميه وفيهن برضو عرق شكريه وبطاحين
والله يا محسن كتّ حافظ غناهو كله بس نسوى شنو مع الراس البقى غربال
اهلك رحلو وحاحو
وبى كتارهن راحو
وشك بى شرخو
قمرا لاقى صباحو
الليلة ام خد نزلت وين
سافل القلعة وصعيد العين
فايته الصيد بى اتنين
طول رقبة ولون ايدين
عقدو الشوره امامك
وضربو الحُق قدامك
الجدلة ام رشمه زمامك
ومتل لون عجوه كلامك
بالله كان عندك ليهو غنوات قولن لينا
وارقد مضارى بالعافية
ويطيب معناك انشاء الله دايما
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: زول ساكت)
|
اغنية ترام ابروف للشاعر الشيخ عباس عبدالملك
مسجلة لدى اذاعة ام درمان بصوت الفنان على الشايقي
ترام ابروف امس شال السمح معروف
سبقني
قام بيها الترام مخطوف وخلتني التقول مكتوف
آذتني
واصل حبي مامنتوف رويحتي تسوي في التفتوف
احزنتني
يالحارق الحشا والجوف ويانور البصر والشوف
سبيتني
جوه الهجعه طيفها يطوف جزم رشماتها تامن الخوف
جفتني
اخوك يالخايلة صار مأسوف طريتا ودمعي كب نسوف
هلكني
هي حاكمة الدنيا للمسكوف قليب عاشقك عليك معكوف
عازلي دعني
هي ملكه ولابسه الملكوف مناي من ايدها عشرة كفوف
التذيدني
حباب يوم زعلتو المعروف غضب قال لي هاك مصروف
كفتني
ضحك وانحظ ذوق وظروف قلبنا لاشكلة بالمعروف
بسطني
جسيمك ناعماً كالغوف كخز او نرجساً ملفوف
يريعني
بريد شخصك جلوس ووقوف اكون بي عفوكم محفوف
يسعني
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: زول ساكت)
|
العزيز
زول ساكت
تحايا ممعطونة فى الود ليك ولشاعرنا البديع ود عبد الملك
Quote: جن وجلن عيون الناظرين أنجالن
جمعن جن مفن جن بيه من أنجالن
حواجبن زجج ومنزعجالن
جدن فيه جد جاثي بترجالن
المصباح مزخرف في الطروز وجالن
وصنعت خالقن خافيه من وجالن
ربيعات القوم الفترن سجالن
ليتي عسى أكون ارضية لي أرجالن |
ود عبد الملك هنا طبعا مسك فى لزوم ما لايلزم
وده شى ما بقدر عليهو غير الأفذاذ من الشعراء والمبدعين بالجد
لزوم ما لا يلزم بحتاج لذخيرة وفيرة جدا من المفردات والأهم من ده
طريقة السبك والاستعمال الفى محله
وإنحناءة لود عبد الملك الشاعر الملك
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: أبوذر بابكر)
|
Quote: ود عبد الملك هنا طبعا مسك فى لزوم ما لايلزم
وده شى ما بقدر عليهو غير الأفذاذ من الشعراء والمبدعين بالجد |
هذا العباس يااباذر
كما قال عنه الشريف يوسف الهندي ابوه الصقر(الفكي احمد عبدالملك) وأمه الحديه (ام برعه بت ود الفحل)
كل ماكتب من اللزوميات له جناس عجيب
مطارحاته مع ود الرضي والشريف يوسف الهندي تثبت ذلك
اكثر شعره في مديح المصطفى صلى الله عليه وسلم
له قليل من الاغاني ومجموعة من القصائد الوطنية التي القيت في الليالي السياسية للحزب الوطني الاتحادي بقيادة الازهري
اليك جزء من اغنية له علاقة بمجنون ليلى
غزال البانة اريدا ام قامةً عاجبانا فرعاً
ربي اتولانا من شان نظرتك فالانا
كالسقد المنام خلانا
مجنون ليلى اخير ملانا
نوعاً
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: أبوذر بابكر)
|
من هذيان "المجنون"هذيان
ذات مساءٍ عجولٍ
قلتُ يا ليلَى
خبئى هذا الليلَ
فى عينيكِ
وأنا سأخبئ صحراءَ الروحِ
وما فيها من ظمأٍ
فى جيبِ قصيدتى
وحين تمطى ليلُ النشيدُ كى ينامَ
تأهبَ لموته القصيرِ
للرجوع
أغلقَ القمرُ نوافذَ الضياءِ
إستحالَ الكحلُ فى عينى أغنيتى
عتمةً يسكنها الصمتُ
أمسى الضياءُ
موكباً للحزن
وشرفةً للدموع
يا ليلَى
كيفَ بعدها المزار
وكل خيامِ الأهلِ
ملؤها الهموم
يا ليلَى
كيفَ الصباحُ غريبٌ عندنا
و كيفَ تجفونا الديار
لمى إليكِ فتاتَ الصبرِ
وأغزلى لنا أمنيةً
من جدايلِ النهار
فهذا الليلُ لم يعد وفياً
لم تعد تحالفنا النجوم
يا ليلَى
أضحى العشقُ
أطلالاً من وميضٍ
بين نيرانِ القبيلة
هم والهوى
على خصامٍ
هم والخريفُ
على خصامْ
كيفَ السبيلُ إذن
ولقاءنا معلقٌ على مشاجبِ الغيوم
لا السيفُ أصدقُ ولا الكلام
بل العشقُ أولاً
ومبعثٌ الهمومِ
مرتجىً ودمعةٌ نبيلةْ
والموتُ ثانياً
طريقنا الطويلةْ
وآهةُ الختام
يا ليلَى
غداً أجيئكِ
لابساً ِشعرى
وروحى القتيلة
فكلُ ما نريد مستباحْ
عشقنا القتيلُ
مستباحْ
ضحكُ الخزامى
مستباحْ
حزنُ اليتامى
مستباحْ
وجفنُ زرقاءَ اليمامه
يرفُ فى البعيدِ
يرقبُ الصباحْ
نبوءة تقولها مع ابتسامهْ
غداً شروقُ شمسكم دمٌ
غداً غروبُكم جراحْ
يا ليلَى
خذى ما تبقى من غناء
فغداً......
أما سمعتِ قولَ تلكم اليمامهْ
لنلمَ ما تبقى من رجاءٍ
غداً تجيئنا وتعلنُ السماءُ
إبتداءَ موسمِ النواحْ
كلُ شئٍ الآن
مستباحْ
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: أبوذر بابكر)
|
ابوذر
ياقريب
والله حكاية الديوان مغستا تشق عديل
قام العم الناجي الصديق الله يديهو العافيه بمحاولات جادة لعمل لملمه للشعر المنثور عند اولاد واحفاد ود عبدالملك
وقبل بداية اغترابي بدأت معه خطوات عملية حيث توليت كتابة كل مالدى عمنا المرحوم ابراهيم عبدالملك رفيق شيخ عباس وحافظ كل اشعارة وقد جمعت اكثر من مائة قصيده نبويه واغنيه واشعار وطنيه وخلافة في دفترين
احدهما مازال معي والاخر تسلط عليه احد الاخوة وطلبه لمدة محدودة ولكنه لم يعده ولن يعيده لانه ضاع
مازال الامل موجود حيث توجد اشعار مكتوبة لدى ابنه احمد بالعيدج
وهناك اكثر من شخص فى العائلة يحرص على جمع هذا التراث
في مقام اخر ساكتب لك المدحة النبوية التي كانت ام برعه تحبها عليها رحمة الله
وكانت دائماً تطلب سماعها من العم ابراهيم عبدالملك عليه الرحمة
| |
|
|
|
|
|
|
|
|
|
Re: جِن "عبد القادر" و جِن "بن الملوح" وما بيناتُن -- نضمى ساى (Re: زول ساكت)
|
العزيز زول ساكت
تذكرت وأنا أقرأ الآن
صديقى ورفيق بعض ايام الصبا "الناجى" وهو من عمق بيت آل يسن ، زوج بنت "أم برعه"
والذى أسموه بإسمه هذا تيمنا بعما "الناجى الصديق"
فقد سافر الناجى منذ بداية السبعينات وهو ما يزال غضا فتيا ولم نعد نحن ولا أهله يسمعون عنه، بعضهم يقول أنه فى إيطاليا وآخرون يروون أنه قد شوهد فى الهند الخ الروايات
أتمنى مخلصا أن تتكلل جهودك فى جمع هذه الأسفار القيمة حقا، ليتعرف عليها الآخرون، فود عبد الملك ليس بالشخص الهين ولا أشعاره ومنظوماته بالشى الذى ينسى ويجهل أمره
ولك الود دائما
| |
|
|
|
|
|
|
| |
أبوذر بابكر
زول ساكت
محسن خالد
فيس بوك
تويتر
انستقرام
يوتيوب
بنتيريست