|
|
 انفـــــلونــــزا الصقـــــــور : شعر / هاشم صديق
|
نقلاً عن جريدة الصحافة
انفـــــلونــــزا الصقـــــــور
شعر / هاشم صديق
انفلونزا الصقور
عطسة أولى
الحجوة
- حجيتكم ما بجيتكم
- خيراً جانا وجاكم
أكل عشانا
مصّ دمانا
فات خلاّنا
.....................
- يا زول ما تكتِّر
قول الحجوة
ما دايرين كفوه
محمد معانا
ما تغشانا
.....................
- سمح...
اسمعوا
هي قونقوليسه
وعاملة منقه
شينة مُره
وعاملة شنّه
طار ولمه.
في كلامها
الخير علامه
وبالفعايل
نار قيامه
رقّعوها
ركّبوها
جِتّه
جُبّه
سمينة جَقّه
وقادله ملْكه
نافخه لهدوما
وكضوما
«كلوشا» منفوش
راسها منكوش
صاحيه يومين
دايخة شهرين
داخله «كوما»
.....................
أها
دي شنى تبقى
يا مطيميس
ود بلومه
....................
- يا خي دي سااااهله
ما ياها الحيكووومه؟!!
عطسه ثانية
الذاتية
«أنحنا زحفنا «1»
وكل العالم ما بوقفنا»
استوردنا
حديد ياباني
استحسّنا
قمح نصراني
«اتسحسحنا»
لُبان نرويجي
اتمسّحنا
«كريم» دانماركي
اتستّفنا
عذاب سوداني
اتقاسمنا
نبق ايراني.
استوردنا
بخور اسباني
واستصحبنا
طلح برّاني.
استحسنا
كلب أمريكي
واستفضلنا
كديس بيريطاني.
استوردنا
خروف ايرلندي
واستعجلنا
«سماد» يوناني.
استلهمنا
خُطب من مالطا
واستصحبنا
ضمير «كوزاني»
.....................
استوردنا
تلج من كندا
واتدّينا
«مدمّس» غاني
استنفرنا
سيوف من بورما
واستعجلنا
«كلبش» انساني
.....................
اتعاقدنا
مُدرِّب هندي
واستصحبنا
«شُراب» اوغندي
واستفضلنا
«كَفَر» صومالي.
استحسنّا
قُلل كوبية
استوردنا
«فِلل» بوذيه
استصحبنا
تيوس تركيه
اتهافتنا
قرود كينيه
اتداولنا
«بِنَس» روسيه
استعجلنا
«وَدَك» ألماني
آآآآه ياااااني
استوردنا
قطن سوداني
.....................
«فلنأكل مما نسمع
ولنطرح مما نجمع
ولنخمش مما نلبع
ولنسمن مما نبلع»
üüü
«أنحنا ولاد «2»
الجوع والمِحِنَه
انحنا الفُقَرا
وسرقوا قَمِحْنَا
خريفنا الرازّه
وأحلامنا حرازه
مخاصمه سَمِحْنَا»
عطسة ثالثة
الأغاني
زمن الغُنا
«العولاق»
صبح الطرب
دقداق
حتى الأسامى
تميل
- عشمانه غرب النيل
- كُوكُو سنّ الفيل
- كباشي ود صارقيل
.....................
يا «مصنفات» حي ووب
يا «لجنة» قلنا الروب
ما سمعتو
«بت عنتيل»؟!!
بتغني نص الليل
- يا شوشو لايف بوي
أركب عديل رقشه
يا فقري.. يا شطه
نتلاقا في الكبري
شان نرسم الخُطه
تمشي وتقابل ابوي
يا شوشو قِرِر
هوووى.
.....................
يا لجنة الأشعار
يا لجنة الألحان
مافيش حقوق إنسان؟؟!!
.....................
أنا أركب الدفار
أسمع «سماح تُرعه»
أركب كمان تكسي
اسمع «خميس نَقْعَه»
أو أفتح الرادي
يفلقني «بالمنقه»
أتحاوا بالتلفاز
ألقا العِمَم واقعين
الربّه زي تمرين
اتنين يغَنّو أنين
اللبعه باللبعه
والبادي «ود بنزين»
.....................
أصحا الصباح
نعسان
أقرا الجرايد اموت
أمشي الشُغل
مهموم
ضبلان تقول هلفوت
أدخل لجمر السوق
يبلعني زي الحوت.
أشرب عصير ليمون
ألقا الغُنا الربراب
لاحقني بالدُراب
فالقني بالنبوت
.....................
أرجع لسجن البيت
أفتح اذاعة «جيم»
ألقا المذيع طربان
من صوت
«منال برسيم»
ويسأل كمان
فرحان
عن «دور غُنا البنوت»
.....................
أنا أمشي وين
لي وين؟
أطلب لجوء للصين؟!!
عطسة رابعة
الدموع
انفلونزا الصقور
الشَمِس قَرَصَت
جِلد حلتنا
في ساعْة البكور
مُحُمد أحمد
حك جلد احلامو
لي فول الفطور
.....................
مسكين يا مُحُمد
هملان يا مرمّد
يوماتي عليك
محموم فِلِّيل
يوماتي عليك
مغبون بالحيل
وسرسار الليل
تَف
تَف
تَف
تَف
ما سوره تنقِّط
من عينيك
اوصالك شاكيه
هواجسك صاحيه
تَهِد الحيل.
عينيك يا مُحُمد
زي شُباك
ضلفاتو قزاز
تَزْلِق في المطره
بزفرة حسره
لسدر الشارع
وبال الخيل.
آآآه يا مُحُمد
غُربال الراس
الليل وسواس
والغيظ خَنّاس.
الدنيا شراع
والوحشه شُراع
مفتول مجداف
ممكون في سيل.
.....................
حاكمت خطاك
جادلت شقاك
لقيت اخترت
تشوف بعيونك
وما بسواك.
دقيت طبلين
في الصنَّه
الهامله
صداهن رجّ
الريح الخامله
رشاش صبّ
جحيم في عضاك.
عضيت في توب
الصبر الضيق
حلبت رضاك
في جوه أذاك
.....................
آآآه يا مُحُمُد
وصوك من قمت
تريد الرمضا
عشان تتعلم
كيف تتألم
تصحصح وتصحا
بدون ما تصرخ
وترجا العون
تَدُق الصنَّه
وتبلع أنَّه
تناجي الصاخّه
تكون مجنون
.....................
وتزازي تجابد
ليل.. وبكور
كم ريس نَضَمُو
وساقو المركب
غرقت وشربت
طين الخور.
كم فالح طالح
جاكا يهرول
في غباش حدادي
في ليل مدادي
وقطع النور.
وحسع جاتك
كفوه في عطسه
اخير الغطسه
زكمه جديده
سَرَت في الجو
ونَزلت شَوْ
جابوها صقور.
عطسة خامسة
الإتفاق
حولاً تمام
من قالوا:
- ابشر يا ولد
حسع خلاص
دغَشَك شرق
.....................
حولاً تمام
صاجَك مرمَّد
يا ولد
ووشيهو ما صابح
طَرَق
.....................
صلح السواد
الاصلو ما فات
الورق.
عطسة سادسة
اعتداد:
جيبو الشُعرا
شُعرا السُلطه
ولموا السَحَرا
كلّ السَحَرا
مقَرَّم وأُسطي
.....................
جيبو ردودكم
« إيميل » «3»
سيل
لو بالايد
او بالبُسطه.
قولو شِعِركم
وارمو حبالكم
وانحنا الشُعَرا
ضمير الفُقرا
رُسُل زي «موسى»
واصْبر كف
وآخر ايد
مداها بعيد
تجدع في الصف
.....................
حتلقوا «عصاتنا»
رتت لحبالكم
ولقفت كف
مكر السَحَرا
ونكرا الشُعرا
وحتى الأُمرا
وناس بيزنطه
وأُجَرا السف.
الشعر ضمير
ما لف أو عك
والغامس قلبو
في حبر الشعب
ما باع لعذابو
براحة «كامري»
ورُزم البنك.
والشعب بصير
بالصاح والحق
بالشق والطق
بفقير أو مك
وعارف صَفّو
وقاطْع الشك.
عطسة سابعة:
توكل
«اتوكلنا عليك «4»
يا الله
بكره بنمرق
كلنا بره
من كُلِِ مدينة
من كُلِ حواري
من كُلْ حِلّة
بكره بنمرق
كُلْ خلق الله
ما نخلي منافق
طار بالزانه
ما نخلي معولق
داسنا اذانا
ما نخلي الباعو
النيل وهوانا
ما نخلي العَقَروا
لناقة صالح
وحشو وريدها
وبالجبخانه.
.....................
اتوكلنا عليك
يا الله
بكره بنمرق
كلنا بره
نقوقي نصفق
للحرية
غُبننا كاسر
ميه الميه
ندوس الكاتل
والف سريه
نقلع حقنا
بالزنديه».
عطسة ثامنة
نمّة:
لا مديت
ايدين حلمك
على المحظور
لا ظنيت
عشان وجعك
تقيف الدنيا
تابا تدور.
ولا كسّرت ناى
شوفك
على المستور
.....................
لا سامرت بي حزنك
ندم «يا ريت»
لا يوماً
على حالك
رتِِيت حنّيت
قَلَدت شقاكا
يا مسكين
على نارك
دَلَقْتَ الزيت
ولا خابت
عيون وجعك
ولا سمعك
ختاهو النور
عطسة تاسعة
توقيع
عميان وشايف
غبيان وعارف
بريان ونازف
عشمان وخايف
.....................
مالي زي شِدَراً
سكن بال الخلا
أخضر وناشف؟!
أعذريني
أصلي ما بَعْرف
شنو الفرح
الموالف
إلا بس
لهب المسارب
والمواقف
هاشم صديق
11/2/2006م
1/ من قصيدة زحف - مجموعة «الوجع الخرافي»، صفحة «48».
2/ نفس المصدر.
3/ E.mail.
4/ من قصيدة «اتوكلت عليك يا الله»- مجموعة «انتظري» صفحات «98- 99».
|
|
 
|
|
|
|
فيس بوك
تويتر
انستقرام
يوتيوب
بنتيريست