|
Re: الي جنات الخلد - العميد شرطة عبدالحي ابراهيم الفنجري (Re: الطيب بشير)
|
إن لله وإن إليه راجعون الموت حق والحياة باطلة وهكذا قال سلفنا أن الموت ينتقي اللآليء، وأشهد أن عبدالحي أحدهم وحكمتنا الشعبية توسم "أوسمنا خلقاً، بأنه "ما زول حياة"، ونشهد أن عبدالحي كان أجملنا خلقا، وأسمحنا سجايا وأطيبنا معشراً.
اللهم لا نزكي عليك أحداً، ونستجيب لنداءك بأن "أدعوني أستجب لكم"، ونبتهل لك اللهم بأن تتقبله قبولا حسناً، وأن تسكنه فسيح جناتك، وتنزله مع الصديقين والشهداء وحسن اولئك رفيقاً.
التعازي لأسرته فردا فردا، التعازي للأخ أمين (أبوعثمان)، التعازي للاخ أبويسرا، التعازي للأخ عمر إدريس (فجراوي)، للأخ ود العجمي، للأخوان أسامة ومعتصم (رقم صفر). التعازي لأصدقائه وزملائه بالشرطة على أمتداد الوطن. التعازي لزملائه وأصدقائه بمركز شرطة كوستي ومواطني كوستي، التي ترك فيها سيرة عطرة، وذكرى عابقة بحلو المعشر.
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
الموت حق والحياة باطلة لاحول ولا قوة الا بالله حكمتنا الشعبية توسم "أوسمنا خلقاً، بأنه "ما زول حياة"، اللهم لا نزكي عليك أحداً، ونشهد أن عبدالحي كان أجملنا خلقا، وأسمحنا سجايا وأطيبنا معشراً. تميز الفقيد العزيز بدماثة الخلق وطيب المعشر فقدنا الاخ والابن والاب فقدنا زهرة شباب محافظة مروي تعجز الكلمات ويختفي البيان في وصف الفقيد العزيز والذي فجعنا برحيله واسأل الله للفقيد الرحمه ولاهله واصدقائه ومحبيه حسن العزاء التعازي لأسرته فردا فردا، التعازي للأخ أمين (أبوعثمان)، التعازي للاخ أبويسرا، التعازي للأخ عمر إدريس (فجراوي)، للأخ ود العجمي، للأخوان أسامة ومعتصم.
اكرر احر التعازي للأخ عمر ادريس ( فجراوي ) ابن عم الفقيد إنا لله وإنا إليه راجعون..اللهم أجعل قبره روضة من رياض الجنة
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
هل حقاً رحلت يافنجرى !!؟ هل حقاً رحل ياعمر !!؟ لماذا لا تقل لى ، لقد كنت كاذباً ، وكانت فقط مزحة سخيفة ياعمر !!؟ بعد أكثر من 12 ساعة على الخبر الصاعق وانا مازلت فى حالة ذهول وانهيار تام ، لقد فشلت تماماً فى حبس دموعى أوالإستعانة بالصبر كلما طاف شريط الذكريات معذرة أصدقائى ربما لا استطيع أو اتمكن من التواصل مع الناس هذه الأيام إلى أن تجف الدموع ، إنه مآتم كبير ، وحزن أكبر آه يافنجرى آه عطر تنعم بتنسمه الملائكة الآن ، ونحن لم يتبق لنا غير الآهات ولوعة الفراق وما أقساهما نجم أفل .. نعم أفل ، أضاء كالشهاب ثم أفل خلسة . بلا وداع مضى مال هذا الردى اللئيم يختار خير الأخيار !!؟ فنجرى أيها النبيل الجميل وداعا.. وداعاً قاسياً ومراً وموجعاً مسعود علي مسعود كلفورنيا
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
الأخ أمين والاخوة المتداخلين
إنا لله وإنا إليه راجعون.
أعزيكم وأعزي أسرة وأصدقاء وزملاء الفقيد وأعزي الأخ عمر ادريس فقدنا العظيم ومصابنا الكبير المرحوم العميد شرطة عبد الحي إبراهيم. إن رحيل المرحوم عبد الحي هو فقد للولاية الشمالية باثرها بل فقد للوطن ككل، فهو الرجل الطيب الخلق والمعشر الخدوم المتفاني في خدمة كافة أبناء المنطقة وعامة المراجعين لدوائر الشرطة دون كلل أو ملل أو تضجر. ألا رحم الله الفقيد رحمة واسعة وأسكنه فسيح جناته مع الشهداء الصديقين وحسن أولئك رفيقا وألهم آله وذويه وأطفاله الصبر والسلوان وحسن العزاء. وإنا لله وإنا إليه راجعون.
عبد الله
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
انا لله وانا اليه راجعون
اللهم اغفر له و ارحمه و اجعل الجنة مثواه
التعازي للأخ أمين (أبوعثمان)، التعازي للاخ أبويسرا، التعازي للأخ عمر إدريس (فجراوي)، للأخ ود العجمي
و التعازي لأسرته,
و التعازي لأهله و أقربائه بالمقل و الحجير و امبدة الحارة الرابعة
الدوام لله و لاحول ولا قوة الا بالله
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
انا لله وانا اليه راجعون
مانى مصدق
ياحييوى
يازول بى صحك....النجمه تغيب اى بالحيل.. الزهره تفوت نعم بالحيل....بس انت تموت ؟...كيف( هان ) الأمرعليك .يا عبد الحى..لاحولا ولاقوة الا بالله ...امبارح دى.. كنا بننضم... اتقالدنا شديد لمن اسلاك التلفون اهتزت...ليه ماقلت انك ناوى... تودع تمشى بعيد.. وتودع كيف.....الداير رخصه يسوى شنو...الداير بسمه يقبل وين... وكوم الناس الخليتم اطفالك واطفالى...وعمتى عاشه ..الداير يدو دفيره.. يشغلو ولدو...الداير يقرء....والمقبوض فى شيك....المهزوم فى حق الزيت....لاحولا ولا قوة إلا بالله. ياياسيكو عبد الحى مات...ياقمرالدين...يالنجمات فى حوش "جرقو" حول لسع ماتم ضحكنا عليهن لامن غابن....سون كيف البنوت....والتمرات يبكن من قامن... لاحولا ولاقوة الا بالله يامحمود ادريس .....الصلاه ياناس...عوووك... منو تانى بقولها ..امامنا مات..انضف زول..سعاتو مات ...يا امبده ...ياكوستى...ياسكر.(حنضل). كنانه...يا الجنينه وأأأه... يالدبه ...وأأه ياكورتى لاحولا ولاقوة الا بالله حجير(على) مامر عليك يوم اسود من دا...ازرق من ريح ...جات من تالا المشرق..انا متاكد ماقادره تصدق ياعبد الحى .انك.. اتوسدت الجابره رقدت..... لاحولا ولاقوة الا بالله .ياعبد الحليم...ياشيخ عبد الله ...ياصديق .. ياعباس صالح .. ياكمال...يانادى الحجير ...الخلوه ...يالجروف ..ياساقة على ..يادرب الجمل نبكيك كيف...والدم نازل لاجوه ...وصلتنا للباص... وقلت ان شاء الله مو اخر وداع ...والضحكه تجلجل... اتاريك ... عارف ؟ مستعجل ليه ... .ياعبد الحى.يالفنجرى يالنبيل يالجميل..والكاكى "حنين" فوق هامتك....الناس اتقالدو... فيك... فى الفاجعه النزلت فوقهم...الصاقعه الوقعت كع... وكانوا سوى ..ناس الحجير, والحضروا الدفن من غادى...وانا ياعبد الحى...مسكت الشافعه الجنبى وفكيتها ...مسكت اللوعه ...حضنت الفقد..مشيت للموت..قلت اسالمك... لاحولا ولا قوة الا بالله مسكت الحيطه وفكيتها .ختيت الدمعه السوداء محل اللمعه ..محل العطر الفايح.منك دايما ...وكلو... موده وذوق.. محل الجرح الكنت بتبراهو لكل الناس...ليه اسمع خبرك وانا فى اخر الدنيا براى ....براى يالعبد الحى...حضنت فراغ الغربه القاسيه... المره بدونك...ياحييوى.... وودعتك (يارب ساعدنى) بكل الوجع الجواى لى الله ... ومانى مصدق يعلم ربك مانى مصدق أستغفر الله العظيم الدوام لله لاحولا ولاقوة الا بالله
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
اخي ابو عفان لا ادري ماذا فان الحزن اكبر من ان تعبر عنه الكلمات يكاد ان يقتلني الحزن لفقد انسان لا يشبه الاخرين لن استطيع ان اتحدث عن صفات فقيدنا فانت وكل من عرفه يعرف كم هو انسان شهم وبسيط و ....و..... قلت لك لا استطيع ليس امامنا الا الدعاء له بالرحمة والعزاء لكل اسرته واخص منهم الاخت نجوي والاخ عبدالباسط
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: عمر ادريس محمد)
|
داهمته الملاريا الجمعة قام صباح السبت ولبس الكاكي وذهب لعمله زصباح الاحد داوم بشكل عادي رجع البيت صلي العصر في الجامع هناك احسن بقبضة رجع من الجامع مرهق ويرجف اتصل بسواقة وقال له انا تعبان تعال سوقني المستشفي جاء السائق .مالك جنابو؟؟قال المرحوم انا لااشعر باي شي فى جسمي سوي الراس رفعه السائق الي العربة وجري لمستشفي الشرطة وصل الدكتور جس النبض كانت الروح فارقت الجسد الطاهر ************* قبل اسبوع كان في الحجير ناس البلد اشتكوا كعادتهم ياعبد الحي إنارة الطاقة الشمسية الجبتها للجامع وقفت من يومين. رجع السبت دنقلا وارسل مهندس الطاقة وقال ليهو تغيرها ليهم ماداير صيانة وتم تغيرها بالفعل والجامع ولع تاني آخر محادثة تلفونية اجراها كانت قبل الوفاة بثلاث ساعات مع ابن عمه عزالدين وطبعاً كعادتة كل اتصالاته وكلامه شأن عام قال ليهو ياعزو من قروشو طرفكم امشي اشتري لمبات جديدة لنادي وجامع الحجير وارسلها لهم باسرع فرصة.عزالدين قال ليهو انت كلمتني من قبل وهي جاهزة الآن بالمنزل فقال له المرحوم ارسلها لهم في اول بص وان بتصل عليك المغرب وجاء المغرب وكان الفنجري في عالم آخر. ******************** تحرك الجثمان من دنقلا صوب الحجير وتحركت معه كل دنقلا شرطة جيش موظفين شعيين اهالي رجال حريم حصل زلزال في دنقلا وصلوا الحجير ثلاثة صباحاً وجدوا البلد كلها خارجة لامكان لقدم لاتعرف تعزي منو حي ووووب من الرجال انهيار تام البلد كلها شرق وغرب ماكانت وفود تمثل القري بل كانت القري كلها اى والله مشهد لم واؤكد لن يحصل تاني الصيوانات من الزومة مروي كريمة البخيت اسلي مساوي نوري القرير الاراك المقل طابور العزاء يستحيل ان يكون شخص مر عليه بالكامل بعد الدفن فى مقابر الحجير ذاد البكاء وكل شخص لايستطيع ان يكمل الفاتحة مع الآخر وينهمر الجميع فى النحيب لك الرحمة عبد الحي واقول لك كما قال صديقك كمال حسن اكيد من بالنا ماحتغيب ودعناك الله دايماً في القلوب ياحبيب
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
شكرا للجميع
لقد بكت كل محافظة مروي الفقيد وبكاه اصدقاءه الكثر في مكان -في امبده- كل انحاء السودان- في السعودية هنا كان كل منا يعزي الاخر لان المرحوم كان ملكا" مشاعا" للجميع اعزيك يا كمال العجمي في فقدك الجلل لقد صبرت واحتسبت وانت تفقد صديق عمرك عبدالغني الفنجري من قبل سنوات خلت واليوم تفقد النصف الاخر اعزي عوض محمود واعزي صديق الفقير واعزي نفسي واعزي كل القلوب الباكية
لاحول ولا قوة الا بالله
انا لله وانا اليه لراجعون
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
اللهم اغفر له وارحمه ، وعافه ، واعف عنه ، وأكرم نزله ، ووسع مدخله ، واغسله بالماء والثلج والبرد ، ونقه من الخطايا كما نقيت الثوب الأبيض من الدنس ، وأبدله دارا خيرا من داره ، وأهلا خيرا من أهله ، وزوجا خيرا من زوجه ، وأدخله الجنة ، وأعذه من عذاب القبر ، ومن عذاب النار.
التعازي لك اخي ابوعثمان اخي عمر اخي مسعود
انا لله وانا اليه راجعون
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
انا لله و انا اليه راجعون الاخوه عمر ادريس و مسعود على مسعود و ابو يسرى و و ودالعجمى و ابو عفان و محمود ادريس و فاطمه ادريس و كل اسرة الفقيد و اصدقاتئه بالسودان عامه و المديريه الشماليه و الحاره الرابعه بام بده خاصه. اقدم لكم احر التعازى فى فقيد الوطن الذى قدم الكثير لاهله و عشيرته و معارفه و نطلب من الله ان يدخله فسيح جناته ويلهم اهله و ذويه الصبر و السلوان
و دائما يفقد السودان خيرة ابنائه الفناجره امثال العميد شرطه عبدالحى الفنجرى
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: aosman)
|
اللهم اجعله قبره روضة من رياض الجنة واغفر له
اللهم واذا كان محسنا فزده احسانا اذا كان مسيئا فتجاوز عن سيئاته
لاسرته ولاهل الحجير وام بده الرابعه احر التعازي
والتعازي موصوله للاخ امين وعبدالجليل واسامه وبشكل خاص احر التعازي للأخ عمر ادريس ( فجراوي )
اقرأوا له قل هو الله احد وادعو له
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: رقم صفر)
|
رحمك الله أخى عبدالحي ابراهيم لكم الصبر وحسن العزاء أهله واصدقائه ومحبيه عرفته ضابطا صغيرا بمدينه كوستى ورغم فارق السن كان حقا صديقا لى كما كان صديقا لكل من عرفه .حريصا على صله رحمة, كنت أجده فى كل بيوت الاهل يقضي حوائجهم خصما علي زمنه وماله وعضله.أحببته كما أحبه كل الاهل والاصدقاء .فهو رجل يمتد سرداق عزاءه من كل اماكن تواجد محبيه و أصدقائه فى اطراف البسيطة حتى الحجير مرورا بكوستى وأمبدة أجد فى نفسي حزن لم اختبرمثله منذ زمن بعيد وأحس فعلا بفقده فكيف باخوته وزوجته فلهم خالص التعازى و حسن العزاء رحمه الله وجعل الجنة مثواه وجعل قبره روضة من رياض الجنة وعزائى لجميع الاهل
اسامه عبدالحليم
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: الصادق عثمان)
|
قال لي افقير علي الشريف اذكره قليلا في كوستي ثم ارسل لي هذه الاقتباسه من احدي الكاتبات الكويتيات
رحيل " الآباء " مفجعٌ هكذا، الرحيل الذي يجيء مرة واحدة، الرحيل النهائي الحاد المدبب كنصل .. وأنا " أرانا " كل يومٍ وأرى خوفنا أكبر من حزننا، أعرفُ أن الذي يبكيك في دواخلنا هو " الطفل " فينا،نموتُ قليلاً كل ليلة، نغمضُ وتطفو أرواحنا إلى فوق، في مكانٍ ما .. ننساب في أماكن وأزمنةٍ ووجوهٍ أخر، ثم نستيقظ مستسلمين لبداهة الموتِ وبساطته، واعتياديّته وعاديّته، حتى نكتشف أن ثمة آخرين ( نحبهم ) ما زالوا نائمين في الجوار، ما زالت أجفانهم مغمضمة وما زالت أرواحهم تنسابُ في البعيد الآخر و.. نكتشف أن ثمة آخرين ( نحبهم ) لن يستيقظوا بعد ذلك أبداً، وتتكشف لنا ملامح الفجيعةِ المشلّة، بكون هذا "النوم" نهائي ومؤكد وحتمي، وأن ليس ثمة حقيقة في العالم تستطيع أن تنقضه، أن تلغيه، أن تحوّر في مدخلات المعادلة لتجيء بنتيجة مغايرة، أي شيءٍ من شأنه أن يهوّن علينا فجائعية المشهد
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
عزيزى ود العجمى
كلامك... صاح ياحبيب بس.. انت سمعت الخبر الشوم..جريت.. شفت الهلع الموجوع فى عيون الناس..وبكيت..دفرت من اللخمه وهول القول نضارة صاحبك لامن وقعت ..وانت تقالد فيه..لاقيت ودالنوبى, والفناجره وولاد العجمى..وجميع الممكن تلقاه هناك ..وشك ابدا ماعندى جميع الناس شفت اللوعه تساسق قدامك...والقلوب تواسى بعضها..تدفى الحته المجروحه..جرح عظيم وكبير
نحن نسوى شنو ياخالد
ياها شاشة بكرى السحريه ..وبعض الكلمات الناقصه ومبتوره تعرف كلماتك مستنى شديد لانها صادقه وشفافه ومعبره جدا وقلت اخير الواحد يكتبلك عشان مايطرشق بالاحزان...وشفت الصوره عجيبه خلاص ...والمحنه كبيره بشكل غريب
وهاك دى...مشاهد من حالتنا
صاحبك مسعود عذبنى وعذبتو شديد التلفون يضرب ررن..ررن..ررن معاك مسعود وارد بى كلمات غير مفهمومه ونسكت يازول لامن كرت التلفون يكمل ناخد فتره وتانى نحاول وياهو الصمت الابدى .. واول مره اعرف انو الانفاس بتعبر عن حزنها ايضا عبر الاسلاك
الحجير بعد الدفن بشويه منو معاك عادل عبدالله منووووووو!!! لاحولا انجرسنا شديد والله كبار وصغار وجضع التلفون أسمع لك صوتو يحدث فى الناس واسمع فى الكوراك والارض تئن ثم الحجير بعدها بى ساعتين الو التلفون ..لما اقول انا منو ؟( صحى انا منو بعدك ياعبد الحى ؟؟) من زول للتانى وواحد داير ينضم مافى هاك عبد الحليم ياحليم لع...ياعمر لع..ياعمر لع..لع..لع الصوت طالع من بير شال منو التلفون شيخ عبد الله قال اسمى تلات مرات ثم..لا الله الا الله محمد رسول الله حتى الشيخ ماقادر يتماسك
نحن نسوى شنو..ياخالد
فى اليوم التالت رجعت فاطنه ادريس من الحجير هلو عمرررررررر واضيقى عليك ياعبد الحى واشرى عليك يانجوى وكف قفلت التلفون
نحن نسوى شنو ..ياخالد
يموت الزول الزى عبد الحى وانت بعيد ليه انت بعيد..يا ابو عثمان,مسعود,وبناديها, ونادوس, والطيب بشير, ابو ساندرا, ياسيكو,شرووم,عادل الوسيله , احمد عبالعاطى...وعييييك كان يستاهل تتاكد..بى نفسك...الطينايه التحت الراس مبلوله كويس..موزونه تمام ..عشان الراحه الابديه على الاقل..تشابه كبر القلب الكان دايما باحث عن راحة الناس الكان جارى وراهم ومهموم.. بيهم عارفك قاعد تبكى وعارف كيف الجنى ملتاع والفقد كبير...ياخالد الدوام لله
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: بكرى ابوبكر)
|
العزيز عمر
وآه,.... هل أقول أنني أحسك تماما، أم أن أتحسس نفسي، ولا تبرد حرقتي دموعا لم أذرفها من زمن بعيد أقول لك أنني قبلك جربت هذا الحزن النصل، البكاء "الفرامة"، لا يا صديقي فحزننا على رحيل عبدالحي بطعم لا يشبهه إلا بكاؤنا هذا، فملوحة دموعك يارفيقي يلعق مرارتها أمين بجدة، وتطوف بيننا "أولاد عبدالحليم" بالدوحة. وآه يا فنجري.....وهل للموت إختيار أفضل منك. اللهم أرحم عبدالحي إبراهيم وألهم آله وذويه الصبر والسلوان
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
بسمك اللهم (سامقا كان..كالنخل..؟ لا كان أسمق* باسما كان يرتدى شارة البذل والزهد والانتماء*...) اللهم أرحم عبدالحى بقدر ماقدم لهذا البلد .. اللهم أرحمه بقدر كل الدموع التى إنهالت عليه ... آه عليك وآآآآآه علينا وآه من أقصى جنوب القلب الي أقصى شمال الروح , وآه .... آه عمر أدريس آه مسود ..آه كمال العجمى ..آه أمين عثمان.. آه أبويسرا.. آه دنقلا المقل الحجير الزومة مروى كريمة كوستى الفاشر شبرا شبرا فى السودان .. وفرسك يا عبد الحي يسبق فينا دوام. آه يا خالد وكيف تكون الآه . أشهد أن لا اله الا الله وأشهدأن محمدا رسول الله .. العزاء لكــل السودان اللهم أرحمه .. اللهم أغفر له وأعف عنه.. اللهم نسألك أن تلهمنا الصبر معز أحمد
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
بسشم الله الرحمن الرحيم رحم الله عبد الحى الفنجرى واسكنه فسيح جناته عدت مساء اليوم الى المنزل فوجدت والدنى الحاجة بتول محمد على( الشايقى ) ومعها زوجتى تهانى الرشيد وشقيقتى الكبرى نازك احمد وقد بدأت الوالدة فى ترديد محاولة لم تكتمل فى رثاء المرحوم عبد الحي وها أنا ذا أعود لأكتبها لكم جميعا.
يبكى الحجير أعلن حدادو لبــس السواد يبكى الولد .. ولد البلد مونة البلد ضهر البلد ولدا" رضع حب البلد وقدر ظروف أهل البلد ولدا" كان للمساكين سنـــد حبًًٌَُّّّّّّّّّّ الحجير وأهل الحجير وبرضو الحجير حباهو جد حبّ الشمال كــل الشمال وبرضو الشمال حباهو جــد يبكى النخيل .. تكى الجريد هول المصاب هداهو هد أسطورة كان هادى الولد كان أمــــة كان هادى الولـــد ولدا هميم يقضى الغرض بى فقدو جد نقص العدد يا ربــى يا واحد أحد ترعاها ذرية الولد ترحم أمو وأهل ديارو وكــل زول عرف الولد معز أحمد
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
لا إله إلا الله محمد رسول الله وكل نفس ذائقة الموت ابعدتني مشاغل الدنيا لأيام عن النت وفي هذا اليوم فجعت في أخي الحبيب عبد الحي نظيف اليد وعفيف اللسان واخو الأخوان وابن الحجير وكوستي وام بدة بل ابن السودان والتعازي لأخواني عمر ادريس وبكري علي وحانم علي وعادل ترفس وعز الدين الفنجري وكل آل الفنجري بالخرطوم والحجير وعمنا علي بامبدة وكل امبدة الحارة الرابعة وكل زملاء الفقيد بالشرطة ونسأل الله العلي القدير ان يتولاه برحمتة وينزله مع الصديقيين والنبيين وان يسكنه الفردوس الأعلي...................... رحمك الله يا عبد الحي
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
Quote: وآه,.... هل أقول أنني أحسك تماما، أم أن أتحسس نفسي، ولا تبرد حرقتي دموعا لم أذرفها من زمن بعيد أقول لك أنني قبلك جربت هذا الحزن النصل، البكاء "الفرامة"، لا يا صديقي فحزننا على رحيل عبدالحي بطعم لا يشبهه إلا بكاؤنا هذا، فملوحة دموعك يارفيقي يلعق مرارتها أمين بجدة، وتطوف بيننا "أولاد عبدالحليم" بالدوحة. وآه يا فنجري.....وهل للموت إختيار أفضل منك. اللهم أرحم عبدالحي إبراهيم وألهم آله وذويه الصبر والسلوان |
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: ابو عثمان)
|
ابِْكِنْ يا عِيوُن الليْلا(ة)
ابِْكِنْ يا عِيوُن الليْلا(ة) ** ابِْكِنْ يا عِيـُووون كَـتِّرْ وَحِيْحَكْ يا قَلِبْ وينُو الزَّمَانْ يَعْزِفْ حَنَانْ ** الليلا(ة) غيْرْ وَدَاعْ رَاحْ مُحْتَجِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون ليه يا (أ)خي رَاحِلْ دُونْ وَدَاعْ ** مَا قُتَّ مِنْ دُنْيَاكْ تِعِبْ دَايِـرْنَا نِحْنَ نَعِيشْ وَرَاك ** كيْفْ بـ قِليْبَ(نْ) مِتْخَرِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون وَللا (والله) القَدَرْ جَبَرَكْ تَسِيبْ ** نَاسَ(نْ) ليها يَامَا كُتْ تَحِبْ في الحَسْرَة والأسَى والهُمُومْ ** والعَبْرَة والدَّمْعْ الـْ بِكِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون غَشَّاشَا(ة) يَا دَارْ الزَّوَالْ ** كُلْ النَّعِيمْ الْـ فِيكْ كِضِبْ كُلْمَا تَجُودِي النَّاسْ بِـ خير ** يَلْقُوُهُ شَـرِّكْ مُتْقَلِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون يَا دُنْـيَا ليه بِتْشِيلي أخُويْ ** يَا دُنْيَا حَارْ جَرْحْ القَلِبْ مَا هَسَّا (هسع) كَانْ بينَاتْنَا نُوُرْ ** وَاليومْ دِريبُوْ عَلَيْ صِعِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون مَا بْـ يَرْحَمْ المُوتْ يَا (أ)خِي زولْ ** دَايْمَ(نْ) مَسَلَّطْ للْسَّلِبْ أتَّامْ عِيَالْ ، خَرَّابْ دِيَارْ ** بَكَّايْ عِيُوُنَ(نْ) تِنْتَحِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون هُوَ القَدَرْ ، هُوَ الأَجَلْ ** هُوَ المُسَطَّرْ مُتْكَتِبْ رَغْمْ العُلُوُمْ اتْقَدَّمَتْ ** يَا موتْ دَوَاكْ مَا عِرْفُوْ طِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون أنا جَانِي الخَبَرْ في يومْ رَهِيْبْ ** فِي نَفْسِي شُفْتُوْ كِضِبْ كِضِبْ غَشونِي وْقَالُوْ لَيْ ** رَاجِيك أَخُوُك المُغْتَرِبْ يَا (أ)خِي مَا شُفْتَ العَلَيْ ** لمـَّانْ عِرِفْتَكْ إِنْتَ غِبْ الكونْ دَا شُفْتُو عَكِسْ بَعَضْ ** حَتَّىْ الشَّمِسْ طَلَعَتْ غَرِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون جِيْتْ للدِّيَارْ مَا فِيَّا بَالْ ** البَالْ وَرَاكْ مُنْشَطِبْ جِيْتْ للدِّيَارْ وطَعَمْ الفُرَاقْ ** في حَلْقِي مُرْ مُرَّ(نْ) كِعِبْ جِيْتْ للدِّيَارْ أبْكِيْكَ ** وْدَمْعْ العينْ يَسِيْلْ يَسْكِبْ سَكِبْ يَا (أ)خُوْيا وَااا أسَفِي الشَّدِيدْ ** مَا جِيْتَ قُبَّالْ تِنْـتَرِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون إنْتَ رَوَّحْتَ مَا خلْيْتْ غيْرْ ** ذِكْرَىْ المُحِبينْ للْمُحِبْ ذِكْرَاكْ مَقَدَّسَا (ة) في قِلْيبَ(نْ) ** أَرْضَعْتُوُ حِنِّيْةَ القَلِبْ ذِكْرَاكْ رَسَمْتَهَا في الخَيَالْ ** بيْنْ النِّجُوُمْ في ليْلْ ضِهِبْ ذِكْرَاكْ دَايْمَ(نْ) في صُحَايْ ** وْعَليْهَا مِنْ النّومْ أَشِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون أنا بِتْذَكَرَكْ عِنْدْ الصَّبَاحْ ** مِنْدَلِيْ للْمَزْرُوُعْ تَـَقِبْ بِتْذَكَرَكْ نُصْ النَّهَاْر فِي ** نومَا(ة) والنَّسَّامْ يَهِبْ بِتْذَكَرَكْ عِنْدَ المِغيْرِبْ ** جَايِي طَالِعْ بالدَّرِبْ بِتْذَكَرَكْ فِي كُلْ صَلاةْ ** حِيْنْ تَسْمَعْ الآذانْ تَتِبْ بِتْذَكَرَكْ فِي كُلْ لَـمَّا(ةْ) ** تَقَالِدْ وْشَايِلْ الإبْرِيْقْ تَكِبْ بِتْذَكَرَكْ وَالدَبَابِيْرْ فوْقَكَ ** تَسَانِدْ كُلْ زوْلَ(نْ) غِلِبْ ابِْكِنْ يا عِيوُن الليْلا(ة) ** ابِْكِنْ يا عِيـُووون إلاهِي أخُوْيْ عِنْدَكْ غَرِيْبْ ** اَغْفِرْلُوْ كُلْ زَلَّة(ا) وْذَنِبْ وَاْرْسِلْ سِحَابْ الرَّحْمَا(ة) يوتْ ** فوْقْ قَبْرُو يتْزَاحَمْ يَكِبْ وآنْسُوْ بـ حُوُرَ(نْ) حِسَانْ ** لا بـ تِتْوَصِفْ لابـ تِتْحَسِبْ واَقْبَلْ دُعَايْ قُولَيَّا ** أخُوُكْ فِي الجَّنَّا(ة) لا شِقَا لا تِعِبْ
الأخ عمر وكل أحباب الراحل المقيم لولا صعوبة الموقف لأسمعتكم إياها لحناً يعبر بحزن يكاد يضاهي حزن الفقد الجلل. ألا رحمه الله رحمة واسعة وألهمنا وإياكم وآل بيته الصبر والسلوان
يس م يس كاليفورنيا
| |
|
|
|
|
|
|
Re: الي جنات الخلد - العميد شرطة عبدالحي ابراهيم الفنجري (Re: yasiko)
|
الشكر للاخوة الاعزاء ابو ساندرا نايل ون دكتور محمد علي المشرف محمد الزنجي صديق عبدالهادي الاستاذة عفاف ابوكشوة عاصم محمد شريف ياسر طيفور فرح محمد عبدالرحمن a osman الاستاذة مني خوجلي الصادق عثمان الريس/بكري ابوبكر معتز سعيد الحسن الشكر لكم آلاف والحمد لله ************ ابِْكِنْ يا عِيوُن الليْلا(ة) ** ابِْكِنْ يا عِيـُووون أنا بِتْذَكَرَكْ عِنْدْ الصَّبَاحْ ** مِنْدَلِيْ للْمَزْرُوُعْ تَـَقِبْ بِتْذَكَرَكْ نُصْ النَّهَاْر فِي ** نومَا(ة) والنَّسَّامْ يَهِبْ بِتْذَكَرَكْ عِنْدَ المِغيْرِبْ ** جَايِي طَالِعْ بالدَّرِبْ بِتْذَكَرَكْ فِي كُلْ صَلاةْ ** حِيْنْ تَسْمَعْ الآذانْ تَتِبْ بِتْذَكَرَكْ فِي كُلْ لَـمَّا(ةْ) ** تَقَالِدْ وْشَايِلْ الإبْرِيْقْ تَكِبْ بِتْذَكَرَكْ وَالدَبَابِيْرْ فوْقَكَ ** تَسَانِدْ كُلْ زوْلَ(نْ) غِلِبْ **************** ولدا هميم يقضى الغرض بى فقدو جد نقص العدد
| |
|
|
|
|
|
|
|