|
|
 العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي يعود
|
عت للرياض بعد قضاء 12 يوم اجازة بالسودان منها 7 أيام بالخرطوم و5 ايام بقرية الكرفاب ريفي كريمة بالولاية الشمالية.
نسبة لظروف الحجز والسفر من الرياض الي الخرطوم فقد وصلنا الي الخرطوم يوم الوقفة بالثلاثاء وامضينا اول ايام العيد بالخرطوم وسافرت ثاني ايام العيد الي القرية الكرفاب .
طريق الشريان الخربان
تحركنا في الثامنة صباحا عبر طريق الشريان ووصلنا الي مدين التمتام السلعة 11:30 وهذا الجزء من الطريق فيه حوالي 100 كلم قد تكسرت واصبحت غير صالحة للمرور عليها ويجري العمل لأصلاحها الأن.
السؤال لماذا اصبح هذا الجزء من الطريق غير صالح رغما عن قصر عمر هذا الطرق .
هل صحيح بسبب سير اليات مشروع السد عليه مماتسبب في خرابه انسبة لثقل حمولتها أم بسبب عدم تشييد الطريق حسب المواصفات المطلوبة وماهي مسئولية الشركة المنفذة وادارتها في ذلك وعلي راسهم المديرالحاج عطاالمنان.
تناولنا الفطور في التمتام وانطلقنا نحو مدينة الملتقي التي منها توجهنايسارا نحو كورتي وقبل الوصول لكورتي اتجهنا ناحية النيل حيث البنطون لعبور النيل للضفة الشرقية حيث قرية مورة. من مورة سرنا بالسيارة وتوقفنا عند قرية البرصة الساعة 2 بعد الظهر. في قرية البرصة.
العجيمية
وجدنا احتفالت القرية بحولية الشيخ عبدالباقي العجيمي حيث تجمع مئات الرجال والنساء والأطفال قدموا من البرصة والمناطق التي حولها.
تناول الجميع طعام الغداء وبدأ الأحتفال الرسمي باناشيد الطريقة العجيمية وقدمت كلمات من بعض المتحدثين من مشايخ الطريقة العجيمية ومن السادة الصافي جعفر وهاشم هارون ابراهيم الخضر الحسن احد وزراء حكومة الولاية الشمالية.
في هذا الأحتفال قابلت ولأول مرة بعداكثر من 25 عام اصدقاء منهم احمد عبدالفتاح مدير مدرسة البرصة للأساس كما بحثت في وجه و عيون كثير من الحضور وسواقي ومساعدي العربات والسيارات التي كانت واقفة حول مكان الأحتفال لعلي اجد من اعرفهم وقد وجدت الكثير .
متي يعود الميرغني
أثناء الأحتفال جاءت فرقة نوبة الختمية بقيادة محمد الحسن ولد ناس شيخنا ود ابراهيم وشاركت في الحفل بعدد من القصائد ابرزها متين العودة ياعثمان وقلت في نفسي انا الجاي من بلاد برة ومتابع اخبار السياسة واتصفح الأنترنت ماني عارف متين يعود عثمان ليروي اشواق مريديه بعودته ولكي لايفوته قطار الساسة.
|
|
 
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
وصول قرية الكرفاب
من قرية البرصة وصلنا الي قرية الكرفاب.اغلب المنازل مهجورة نزح اهلها كما هو الحال لاغلب قري الولاية الشمالية.المنازل اغابها مهدم،لكن حركةالناس اكثر جاءوا للعيد انه عيد الأضحي ومناسبات الزواج، زواج ولد عمتي قصورة الجاينو نحن بس من الخرطوم حوالي 70 زول من راجل لي مرة.وصلنا بيت عمتي قصورة ا########## مغيرب والناس واقفة قدام البيت ولمان السيارة وقفت الزغاريد طقت فرحا بقدومنا ، سلام سلام وحاتكم بكيت بصوت عالي مع عماتي والجيران بكاء الشوق وفرحة المشاهدة ، نفس اليوم كان يوم الخميس يوم حنةالعريس ودعمتي عبدالفتاح . اتعشينا وشربنا الشربوت و حضرنا الحنة والحفلة كانت دكاكينية عشان الفنان جاي باكر يوم العرس، كنا تعبانين مشينا نمنا .
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
السلام علي ناس الحلة والكرفاب
من الصباح ثالث يوم في العيد قمت اسلم علي ناس اللة القراب قراب اولاد عبدالله الحسن سالم ونس الحسن احمد الحسن مدير المدرسة واولاد المروم احمد الحسن سالم وزوجته وجارتنا تومة عبيد بكيت معاها باعلي صوتي كانت جارة وصاحبة امي يرحمها الله.بإختصار كملت الجيران .
ساقتنا ود اللمين واقعة في نص الكرفاب مسكت الكرفاب ساقية ساقية وبيت بيت من ساقيتنا الي ساقة الماحي .فطرت في الفرحاب عند ولاد المرحوم ابراهيم محمد علي الكرار. ثم ناس عبده الحسن وخلوة الفرحاب ومشيت ناس وقيع الله ود عبداللة.سلمت علي عشماني ونورة بتها. السواقي بيوتها مكسرة او فاضية .يعني لو الساقية فيها 15 بيت كان زمان هسع فيها اربهة بيوت مسكونة بس.
لمان كملت اخر الكرفاب من القبلة رجعت بي التحتانية بين النيل ودرب الترك اقصقص في التناقير بين السواقي ومرة مرة اعاين في النيل لامن وصلت ساقيتنا بي تحت قصيت سبيقتنا وقبلت تمرة المشرق حقت ناس عبيد ود مساعد . وزرت محل تمرةعمي نصر الكان بيرقد تحتها والدي وجدي رحمة الله عليهم .كانوا يمددوا العناقريب فوق الجدول والموية من تحتهم جاري تحت ضل التمرة ام ست بنات .كنا ونحن صغار نجيب الفطور والغداء ليهم هنا وكانوا مايرجعوا الأ بعد المغرب.
اليوم داك كان يوم جمعة رجعت سريع عشان اصلي في الجامع واقابل الناس في الصلاة .الأمام كان زميل الطفولة النور عبداللطيف ود من الله . كان شغال في الجيش وتركه وجأء قعد مسك المحل لان والده اصبح زول كبير ومافي زول بيمسك المحل بلاه.النور كان شيطان زينا زمن الطفولة ،كنا نتلبت للعرسان ايام الدخلة وفي مرة من المرات النور طلع فوق راس البيت وقامت ضلعة البيت انكسرت ووقعت بيه فوق العريس.الله ستر العريس والعروس ماجاتهم عوجة.
.....نواصل...
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
الله يلعن البوتوجازات الوسخت التمر
ياود الموج ذكرتني
هل تصدق من حالة مامزكركن أنا اتصلت من الكرفاب من فوق الجبل بي ناس في الرياض ولمان قالوا لي انت كضاب اديتن واحد من ناس لبلد كلمن.
الأخ صديق ، ياأخي مداخلاتك بتخليني اتذكر المشاهد لكي اتكتب ومازال عندي الكثير لي ناس مني عوض خوجلي ، بس خليني اصل الزومة.
هل تتصور قصورة عمتي بي ثلاجتها والتلفزيون والريسيفر الديجيتال وكمان البوتوجاز وانبوبة الغاز والجوالات المعلقة في اللمينة حقت الأوضة. هل تصدق البنات خلن جيب الواقود من تحت ، من جريد النخيل ، يعني النخيل مافي زول بقي يقطعو او ينضفو للواقود عشان العواسة والتبيخ وسواة الشاي . الله يلعن البوتوجاز والغاز الخلي التمر وسخان بي جريدو.
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
عيزومعة العرس ونقص المسافات
بعد صلاة الجمعة قمنا سلمن علي جميع المصلين ودي فرصة كانت السلام علي جميع من حضر للصلاة من ناس البلد. طبعا اغلب المصلين جايين للعيد.
رجعن بعد داك لي بيت العرس عشان عازمين الناس غداء. الناس جات من كل مكان في الكرفاب وكمان من ناس البرصة والأراك ومن البركل جاءوا ناس ود الجاز ومن مروي ناس المحلية لانو العريس شغال في مروي.
اعتقد ان هجرة الناس من كل القري خارج الولاية قربت المسافات وقوت العلاقات بين من تبقي من الناس في تلك القري.
كما ان المسافات بين السواقي داخل القرية الواحدة وبين القري نفسها قد صارت قصيرة بصورة ملفتة للنظر لنا نحن الذين نعرف حقيقة هذه المسافات عندما كنا صغار وحتي بعد السفر من تلك القري في مرحلة مابعد الثانوية.
وقد رد كثير من الذين سالتهم اواثرت معهم تلك الحقيقة بصحتهاوالذين يلاحظون تلك الحقيقة هم الناس الذين غابوا طويلا عن تلك القري. وق رد بعضهم بالأية التي تقول والأرض ننقصها من اطرافها.
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: ابو عثمان)
|
لمان كملت اخر الكرفاب من القبلة رجعت بي التحتانية بين النيل ودرب الترك اقصقص في التناقير بين السواقي ومرة مرة اعاين في النيل لامن وصلت ساقيتنا بي تحت قصيت سبيقتنا وقبلت تمرة المشرق حقت ناس عبيد ود مساعد . وزرت محل تمرةعمي نصر الكان بيرقد تحتها والدي وجدي رحمة الله عليهم .كانوا يمددوا العناقريب فوق الجدول والموية من تحتهم جاري تحت ضل التمرة ام ست بنات .كنا ونحن صغار نجيب الفطور والغداء ليهم هنا وكانوا مايرجعوا الأ بعد المغرب.Quote:
واحـلالي برجـعتك وبي كـلامـك السمح عن شـماليتنا...
أولا.. أقولك حمـدالله بسـلامتك ومـبروك عرس ود قصـورة انشالله بيتا مـرزق بالمـال والعيـال بركـة سـيـدي الحسـن..
Quote: شايفك عاوز تنط للزومه قبل كافوته-يا زول امشي بالترتيب
منتظرين باقي حلقاتك وصاحبك ابكروق كان معيد في الاراك انشاءالله اتقابلتوا
مع تحياتي |
ومـالو ان عبـد القـادر خـيي بـدا حـديثـو السمح لي خـيتو المشتاقة للزومي ومـروي وعـرس بت خيلاني في الخـرتـوم...أمـاني مـاك حـاسـد!
قـتلك..ان كـان رضـيت يا ابو عثمـان برسـلك انت وود المـوج مـن تمري وجـرمي السمح ده ..الله يسـألني قـاعـد في كـيسو الأبيض المصـرور يسـمع في حـديثي ده معاك ..
مـني
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
عقد الزواج في خلوة الدومي
بعد الغداء مشينا العقد حريم ورجال .الحريم ركبن البكاسي والرجال واحدين راكبيب حمير وواحدين بي رجلينن لامن وصلنا ساقية الدومي ناحية قبلي علي الأراك .وكان العقد في الخلوة .لمة كبيرة وزعو الشربات والبسكويت والحلاوة وتم العقد وضربو الرصاص.
بعد العقد طوالي مشيت الضيقة قلت اقابل بتدالدردمو فاطني في وفاة ولدها الأستاذ/كمال حسن صديق كان مدير المدرسة بالكرفاب وتوفي بالخرطوم غفرالله له.
كان معاي النور احمد الحسن ود تومة عبيد جارنا ،بعد الفاتحة ونحن راجعين لي محل العقد غشينا ناس خليفة ود محمد خير.
مشينا العقد لقينا الحفلة شغالة عندالمغيرب بالفنان والكرفون ، قالوا يسو حفلة صغيرة كدي ويسوقوا العروس لي بيت العريس .
الحفلة شغالة جات عربية فيها فرقة نوبة الختمية سايقي محمد الحسن ود ناس شيخنا ود ابراهيم ، الفرقة بي نوباته وعلمها . اخذت العلم وسقتهم دخلتهم دايرة الحفله وانا رافع العلم واهتف عاش ابو هاشم . الفنان وقف واداهم فرصة قدموا كم قصيدة والزغاريد تطق من الحريم والناس تهتف عاش ابوهاشم مع قصيدة متين العودة ياعثمان ,وعماتي قصوره والزهره يرقصن في الدارة وبنات عمتي قصورة سميرة وسمية وبنات عمتي الزهرة سلامة ومارية يرقصن ويزغردن ومعاهن بنات الحلة يخوجلن في الدايرة .
انا طبعا سارح وافكر واقول في نفسي الحمد لله انابين اهلي وكرعي فوق واطة بلدي وبين صياح وزغاريد اهلي.يعني ماني في طيارة بين الرياض وجدة ماشي لي لي شغل وخايف الطيارة تقع وانا خواف من ركوب الطيارات .
بعد داك رجعنا ومعانا العروس لي بيت ناس عمتي وهناك بعد العشاء عملو حفلة كبيرة بالفنان قرشي وفرقته والكرفون صوتو يسمع ناس الباسة في الغرب والبنات فرشولن البروش للرقيص والزغاريد من العمات والخالات تشق السماء .
براي انزويت وقلت لي نفسي ياجماعة انا وين بس لايبقي في الرياض تقوم تجينا كشة من المطوعين ناس الأمر بالمعروف والنهي عن المنكر.
ناس الخرتوم حفلاتن تنتهي الساعة 11 وحفلات البلد تستمر لاعند الساعة 3 صباحا عشان هني مافي شرطة النظام العام.
تاني يوم الصباح العريس ساق عروسو في بكسي ابوشام ولد عبدو ابنعوف وشو يقضو جزء من شهر العسل في مروي وبعدها يجو الخرتوم .
نواصل
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
العزيز عبد القادر
عودا حميدا مستطاب وهنيئا لك وأنت تفوز بهذه السانحة الطيبة وتقضى العيد بين الاهل فى الكرفاب تستنشق من طيب عليلها وخاصة ساعات العصارى مع رفرفة النخيل وهو يغازل النيل ويقف جبل أبنعوف يشهد المنظر بكل ترقب وصمت .
أثناء قراءتى لبوستك حضرت الوالدة العزيزة - أمد الله فى أيامها - تطلب منى شيئا فقلت لها : كدى يا يمه الزول دا قال من الكرفاب وبعرف ناس الاراك تعالى أعرفيه لى .
جلست معى وبدأت أسرد لها ما جرى فى البوست من حقائق وذهبنا معا فى حديث طال إمتد من الكزارير مرورا بناس شيخنا عبورا بالضيقة وإنتهاءا بالكرفاب:
1/ أولا يا ولدى عبد القادر دا والدتو فاطنة بت ود بخيت - طيب الله ثراها وأختو إخلاص وبت خالتو أمال زوجة عبد المنعم وبالمناسبة عبد المنعم دا خالى ود عمة امى لزم وكمان عندك الامين كركس راجل خدرة خالتك .
تعال ياخوى أسعلك والذاكرة رويدا رويدا بدأت ترجع إتذكرت عمك ود عبد القيوم وما أنسى يوم أن إتردفت وراء جدى على عبد الله فرح - أمد الله فى أيامه- وراكب وراه فوق حمارتو البيضاء وسرنا حتى الكرفاب وإتذكر كان عندو شغل مع ود عبد القيوم صاحبو فى عناقريب الليلاتو وما أنسى أبدا خُرج جدى الذى يحوى جميع معاول الصنعة من قدوم ومنشار وغيرهم ... غايتو يا عبد القادر الليلة رجعتنا لى زمن بعيد وسمح بالحيل ....
حمد لله على السلامة مرة تانية ودى فرصة طيبة للتعارف والتلاقى فى زمن الشتات ..
لك تقديرى وإحترامى ,,
موفق عبد الله أبوالقاسم محمد طه (أبوكروق).
الاراك - ساقية البشراب - المضواب.
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
تعالوا صلحوا بيوتكم
بعد انتهاء مراسم الزواج تجولت كثيرا لاكمل السلام علي ناس البلد وتفقت بيتنا المقفول بالسنين وبيوت اعمامنا الملاصقة لية وبحثت كثيرا في الدواليب والشنط المقفلة لاعاين الكثير من الأشياء التي تذكرني ايام الطفولة والوال والوالدة.وقد قررت ومعي اخوتي بان نقوم بصيانة المنزل حتي يكون صالح لنا عندما نعود عودة نهائية للبلد او اقل شيء لقضاء الأجازات لنل ولاسرنامثلنا مثل الأخرين الذين بداوا في اصلاح منازلهم او بناء منازل جديدة وهذا يحدث في كل القري في تلك المنطقة .
ومن هنا اوجة دعوة لكل اهل المنطقة في داخل السودان وفي خارجه بعيدا في المنافي ان يعودوا اقراهم ويحاولوا اصلاح منازلهم التي تهدمت او بناء منازل جديدة وذلك للاستقرار مستقبلا عند العودة او لقضاء الأجازات هم واسرهم بعد ان ينصلح الحال وبعد ان تتوفر الخدمات الضرورية مثل الكهرباء والمياه في المنازل والطرق والأتصالات.
العوم في البحر
رغما عن برودة الجو فقد نزلت البحر وعمت فيه واخدت لي كم ضريعات فيه.ورقدت علي ضهري فوق الرملة في الحجرة اعاين للبحر وقمت كوركت وصحت بعبارات مختلفة لكي يرجع لي صدي الصوت من الجهة الأخري من النيل ,
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
الشاعر ابراهيم الزومة بعاتي
في اليوم الرابع قبل الأخير لاجازتنا للعيد قررنا زيارة مقاشي لزيارة صيق اخواني سيد احمد العماس وهو تاجر اسبيرات بكريمة ورجل فاضل وكريم ربطته علاقات انسانية وعلاقات عمل مع اخواني جعفر وزروق. ونحن في طريقنا الي مقاشي مررنا بالاراك (ناس شيخنا ود ابراهيم) ثم الحجير والمقل التي اعدتفيا الزكريات حيث درست فيها مرحلة الثانوي العام.المناطق كلها تتشابه واضح البيوت مهجورة وبعضها مكسر يعني الاس الساكنين بقو شوية كما ان اشجار النخيل مساحاتها تمددت لتقترب من البيوت.
ثم مررنا بالبخيت وحزيمة وذهبنا اولا للزومة قبل مقاشي لزيارة صديقنا ابراهيم الزومة الشاعر ،شربنا معاه الشاي باللبن ولقيناهو مصاب بي نزلة برد وطبعا هو ساكن بالقرب من المقابر وقمنا قلنا ليه يعني لو مت في مرضتك دي مابتتعب الناس لانك قريب من المقابر قال لو مت براي بقوم امشي المقابر قلنا ليه اصلك بعاتي.
| |
|
|
|
|
|
|
|
|
|
Re: العيد بالشمالية. الكرفاب فوق جبل أبنعوف(3).شريان الشمال اتكسر.حولية العجيمية.والميرغني متي (Re: عبدالقادر علي عبدالرحيم)
|
بت القبايل مني خوجلي
بعد زيارة الشاعر ابراهيم الزومة تذكرت طلب اختنا مني خوجلي بزيارة ست الشاي فوق المشرع لكن الدنيا كانت ليل.المهم بلغت تحياتك لي ناس الزومة ونخيل الزومة .
رجنا ولتناولنا العشي مع سيداحمد العماس في مقاشي ورجعنابي ليلنا يمكن الساعة 12 .
رجعت الخرطوم وفي يوم 19/1/2006 يوم الخميس كان زواج بنت ود خالك مني وكان الحفل بنادي الزومة في الامتداد وكان خفلا كبيرا وناس كتار وفنانين كتار .
قلت لي مصطفي ابو العروس وين ثلاجة المرحوم عوض خوجلي ومشي مع واحد وراني ليها وذلك حسب وصيتك.
| |
|
|
|
|
|
|
|
| |
صديق الموج
أحمد الشايقي
ابو عثمان
Muna Khugali
wadsolfab
فيس بوك
تويتر
انستقرام
يوتيوب
بنتيريست