|
الجبهجية:ناس هولاكو...شعر :عبدالباقي الطيب
|
يُومُو الجَّانَا حُكْم الجَّبْهَة يَا سَامْعِينْ يُومَاً أَسْوَدْ وُشُومْ عَلَينَا لَعِينْ بِإسْم الدِّينْ وُلرَايَة الشَّرِعْ رَافْعِينْ جُونَا التُّرُكْ وُنَاسْ هُولاَكُو مُجْتَمْعِينْ *** فِى غَفْلَةْ زَمَانْ وَالأُمَّة غِيرْ مُنْتَبْهَة زَي الجَّرَادْ هَجَمُونَا نَاسْ الجَّبْهَة بِالشَّالاَتْ وَالدِّقُونْ شَنَاتْ الخِلَقْ مِشَّبْهَة شَبَه قِرُودْ الجِّبَالْ الشُّفْتُو فِي أَبْهَا *** بَلَدْنَا الرَّافْلَة خِيرْ وُبِالنَّعِيمْ تِتْبَاهَى غَزُوهَا التَّتَرْ نَاسَاً قُبَاحْ جَبَّاهَة بِالدَّمَارْ خَلَّوهَا النَّفِسْ تَكِشْ تَابَاهَا وُخَرَبُوهَا خَرَابْ سُوبَا السِّمِعْتُو نَبَاهَا *** الجَّبْهَة جَاتْ بِالدَّمْ مِحَمِّرْ سَيفَه تَلْعَبْ بِالشَّرِعْ عَلِى مَزَاجَه وكِيفَه لَفَّاحْ سَمُومَه الجَّانَا سَابِقْ صِيفَه خَلَّى الحَالَة شِينَة وصَعَبْ وِصِّيفَه *** زَلْزَالْ دَمَارْ يَا الجَّبْهَة يَومِكْ شُومْ بَلْدُوذَرْ خَرَابْ صَبَّحْتِى العَمَارْ مَهَدُومْ شُوكَةْ حُوتْ نَشَبْتِي بِقِيتِي فِي الحَلْقُومْ الحَيِ مَعَذَّبْ وَالمَاتْ سَعِيدْ مَرْحُومْ *** هَجَمْتِي هَجْمَةْ وَحَشْ فَتَّاكْ وُضَارِي وأَكَلْتِي الحَيِ وُنَبَشْتِي الإنْدَفَنْ مِضَّارِي مَشْرُوعْ الخَرَابْ القُتِّي دِينْ وُحَضَارِي غَتَّسْ بَلَدْنَا وسَابُو قَاطْعَ الطَّارِي *** لِلْفَسَادْ بَنِيتِي جْسُورْ وفَتَحْتِي كَبَارِي وكِلاَبِكْ تَهَوْهِوْ فُوقْ العُزَازْ وُتْبَارِي مِنْ تَمَانْيَة النُّومْ صِبِحْ عَلَينَا اجْبَارِي لاَ فَنَّانْ يَغَنِّي اللِّيلْ وَلاَ طَمْبَارِي *** كُلْ مَاهَبَشْتِي مَكَانْ إِتْخَلْخَلَتْ أَرْكَانُو وَأصْبَح فِي خَبَرْ نَاسْ قِبَيلْ ألكَانُو بِالضَّرِيبَة الظَّالْمَة قَفَّلْتِي الغَشِيمْ دُكَّانُو وُزُولِكْ قَعَدْ مَسَكْ المَحَلّة مَكَانُو ***
زُولِكْ يَنْشَافْ ظَرِيفْ وَأدِيبْ وَنَّاسْ وَالْبِسْمَعْ كَلاَمُو أَكِيدْ يَقُولْ وَدْ نَاسْ مِنْ عَمَايْلُو البِقَتْ فِينَا دَهْ النَّسْنَاسْ يِتْبَرُّو نَاسْ فَرْعُونْ وُيَخْجَلْ الخَنَّاسْ *** صَاقْعَةْ لِيلْ وَقَعْتِي فُوقْنَا يَا الإِنْقَاذْ وُصَبَّحْتِي الْبَلَدْ حَرِيقَاً يَقِجْ بِالجَّازْ يَبَّسْتِي الزَّرِعْ رَقَدْتي َالنَّخَل أَعْجَازْ شَيَّبْتِي الشَّبَابْ وُصُغَارْنَا صَارُو عُجَازْ *** شَجَرْةَ الْخِيرْ المِنْ زَمَانْ مَزْرُوعَه يَبَّسْتِيهَا يَا الإِنْقَاذْ وُجَفُّو فِرُوعَه تِجَارْةَ السُّوقْ الْفِي الْكِتَابْ مَشْرُوعَه عَلِى الْكِيزَانْ حَلاَلْ عَلِينَا تَبْ مَمْنُوعَه *** أَسْرَابْ جَرَادِكْ هَلَكَتْ بَلَدْنَا وزَرْعُو وُبِالظُّّلُمْ نَشَّفْتِي لَبَنْ الْحَلُوبْ فِي ضَرْعُو أَكَلْتِي اللَّيِّنْ وُفِي الْيَابِسْ تِيُوسِك ْ يَرْعُو وَالْبِنْضُمْ كِلاَبِكْ فِي رَقَبْتُو تَبْ بِنْدَرْعُو ***
أَحْكَامْ الشَّرِيعَة السَّمْحَة مَسَخْتِي فُرُوضَه وُبِالدِّينْ تِجَارْتِكْ بِقَتْ نِهَارْ مَعَرُوضَه زَكَاةْ الْغَنِي عَلِى الْفَقِيرْ مَفْرُوضَة وَالحُُرَّة مِنْ الْحَاجَة سَايْمَة عُرُوضَه *** شِعَارِكْ فِي السُّلْطَة دِيِنْ وَالْحَاصِلْ إسْتِبدَّادْ استبداد إسْتِبْدَادْ بِالجُّورْ وَالتَّسَلُّطْ كُلْ صَبَاحْ يَزْدَادْ نَهَبْتِي الْبَلَدْ لاَ رَقِيبْ عَلِيكْ وَلاَ عَدَّادْ وباِلحَرَامْ شِبِعْتِي لَذِيذْ لِحُومْ وجَدَادْ *** الْبَلَدْ أَصْبَحْ سِجُونْ وُفِي السِّجُونْ أَشْبَاحْ وَالجَّلاَّدْ يَعَرْبِدْ لِى رِقَابْ النَّاسْ أَبَاحْ الشَّبَابْ طَلَعْ خَلاَّهَا لِلْكِيزَانْ قُبَاحْ وَالْمُوَاطِنْ فِي الجَّحِيمْ لِيلُو يَلْعَنْ فِي الصَّبَاحْ *** أَهَلْ الْبَلَدْ بِالذِّلَّة شِبْعُو مَهَانَة وَالشَّبَابْ وَدَّو الجَّنُوبْ يَمُوتْ بِالدَّانَة الْفَقُرْ خَيَّمْ وَالنَّاسْ تَوِحْ جَعَّانَة وَالْبِنْضُمْ يَمُوتْ بِالنَّارْ ضَرِبْ جَبَخَانَة ***
الْكِلاَبْ حَايْمَة وَأسَدْ الْعَرِينْ مَمْنُوعْ وَالرِّجَالْ سَاكْتَة صُوتْ الْحَرِيمْ مََسْمُوعْ وَدْ النَّاسْ غَتَسْ وَالْلَّئِيمْ مَرْفُوعْ وَالْكِرَامْ إِنْهَانُو ضَاقُو لَحْسَ الْكُوعْ *** سَلَبْتِي اللِّحُومْ وُنَجَرْتِي فِي الْعُظَامْ قَدُّومْ وُبَشْتَنْتِي الْغَلاَبَة وبِقَتْ أَشْبَاحْ تَحُومْ دَعْوَةْ الْمَظْلُومْ تَصِيبِكْ رِجَالْ مَعَ الْحَرُّومْ وُقَبْل النَّاسْ قِيَامْتِكْ إِنْتِي تْقُومْ *** بِى جَاهْ الرُّسُلْ وَالْكَفَلْ الْيَتِيمْ مَحَرُومْ بِى زَلْزَالْ يَزِيلِكْ عَالْمَ الْخَفِي الْمَبْرُومْ بِى سِرْ الْمَثَانِي السَّبْعَة وُسُورْةَ الرُّومْ يَهِدِّكْ الْهَدَّه كِسْرَى وعَظِيمْ الرُّومْ *** بِي يَسٍ فِيكْ أَهْلَ الصَّلاَحْ يِنْدَرْعُو وُبِالْوَاقْعَة تَقَعْ نَاسِكْ جَحِيمْ يِنْزَرْعُو بِي جَاهْ نَبِينَا الصَّافِي طَاهِرْ فَرْعُو مِنِّكْ نَسْلَمْ وِإسْلاَمْنَا يَسْلَمْ شَرْعُو
|
|
|
|
|
|