|
|
 ... فلم قصير - الرحمتات فى امستردام
|
فلم قصير الرحمتات فى امستردام
اسكرب لفلم الرحمتات
تمثيل
عمر منصور - لاجىء من ابناء الصحافه
ياسر - لاجئ ومن سكان كوستى
عبد المنعم - ايضا لاجئ ويسكن امدرمان الحاره السابعه
مشهد ليلى داخلى
لقطة متوسطة لعمر منصور نائم
تتحركه الكميره - بان - افقى تعرض اجزاء من الغرف
لقطة كلوز على ساعه منبه صوت ايقاع الساعه
صوت الجرس عاليا يد عمر تدخل الكادر يمسك الساعه
يتوقف الصوت
cut
مشهد ليلى خارجى موسيقى
لقطه متوسطه عمر يقود دراجه تبدو مجموعه من الجرائد على -
صندوق الدراجه الخلفى.. تتابعه الكميره حتى يتوقف
امام منزل
لقطه متوسطه من زاويه اخرى عمر يخرج جرئده من -
جراب الدراجه ويدسها داخل فتحه فضيه على منصتف الباب
لقطه كلوز ليده تضع الجريده بالداخل -
لقطة كلوز على وجهه -
لقطه عامه يتحرك عمر بالدراجه حتى يخرج من الكادر -
الموسيقى متواصله
cut
لقطه متوسطة له يقف بدراجته امام منزل اخر -
cut
لقطات كلوز متعدده ليده تتناول الجرائد من الجراب وتضعها -
داخل فتحات المنازل مع تغير سرعه ايقاع الموسيقى
cut
لقطه عامه لشارع عام يدخل عمر للكادر بدراجته ويختفى -
داخل شارع مظلم
تنخفض الاضاءه والموسيقى
cut
مشهد صباحى خارجى مشمس
تتحرك الكميره افقى - بان - تعرض مبنى .. تتوقف عند
لافته مركز لجوء
موسيقى
cut
مشهد صباحى داخلى
لقطه لعمر نائم اضاءه طبيعيه تسقط على وجهه من النافذه -
لقطه لباب الغرفه يفتح من الخارج يدخل ياسر تزداد الاضاءه -
لقطه كلوز لياسر يبتسم -
لقطه لياسر يزيح الملايه من وجه عمر -
لقطة لعمر يستيقظ بتكاسل -
ياسر
صباح الخير وكل سنه وانت طيب
عمر لا زال يمضمض نعاسه كويس
يحاول النوم مره اخرى
ياسر
; ياخى الدنيا عيد بطل كسل
عمر
ياخى انا الليل كلو شغال .. عايز انوم
يزيح عنه الملايه بالقوة
ياسر
; ياخى معقول يوم العيد نكون فى المعسكر .. قوم ارح
cut
مشهد نهارى خارجى منتصف امستردام
لقطه عامه لترام يتوقف يترجل منه -
عمر منصور واصدقاءه ياسر وعبدالمنعم
لقطه لهم وسط الزحام
cut
لقطه للا صدقاء الثلاثه يتحركوا فى ساحة الدام- موسيقى -
لقطه لهم يعبروا شارع مزدحم -
لقطه لهم يجلسوا تحت النصب التذكارى -
لقطه متوسطة الموسيقى تصبح خلفيه -
لقطه كلوز لياسر يشعل سجاره -
ياسر
!! انا ما بعرف ولا سودانى
عمر
!! معقول مافى زول فى البلد دى من اولاد كوستى
عبد المنعم
!! انت قايلهم ديل اولاد الصحافه
ياسر
طيب رايكم شنو نمشى نفتش سودانيين نعيد عليهم
عمر
!!! يعنى نعمل حركه السودان ديك زاتها
ياسر
ايوه .. وندخل جوه البيوت
عمر
!!! كدى ادينى سجاره .. اها نمشى وين
عبد المنعم
.... انا عندى فكره
cut
مشهد خارجى نهارى
احد الاحياء السكنيه بامستردام
ويبدو الحي هادئا كانه غير مسكون
لقطه عامه لشارع فاصل بين المنازل -
الثلاث اصدقاء يظهروا فى الكادر وهم ينظرون من حولهم
موسيقى
لقطه لهم فى شارع اخر -
لقطه عامه لهم يقتربوا من الكميره الثابته-
عمر يبدو عليه التعب
عمر
.. ياخوانا نرجع المعسكر
لقطه كلوز لعمر -
لقطه متوسطه لهم -
عبد المنعم
والله كلامك صاح ديل ما عندهم احساس
بالعيد
ياسر
.. يا شباب انا عندى فكره نعرف بيها بيوت السودانيين
عمر
!!!! شنو
ياسر
قولوا وراى
... عيدو مبارك علينا عليكم .. كل سنه طيبين طيبين
ياخوانا بصوت عالى جدا
لقطه كلوز لعمر يردد اللحن ويكتم ضحكته -
لقطه لياسر تصيبه عدوة الضحك يضرب صديقه ويضحك -
عبد المنعم يصبح اكثر حيويه
عبدالمنعم
شباب موش عيد لحم ودا حي بتاع مسلمين
معاى بصوت عالى
تين تين ... ادونا عشا.. اللاجئين
تين تين ... ادونا عشا... اللاجئين
لقطه لاحد الاتراك يخرج من منزله مبتسم لازال صوتهم متواصل -
تين تين ... ادونا عشا اللاجئين
تين تين ... ادونا عشا اللاجئين
لقطه لهم يدورا حول التركى فى دائره مواصلين الاغنيه -
تين تين ... ادونا عشا اللاجئين
لقطة لتركى يضحك ويحاول ان يغنى معهم
لقطه له يسحب من وراء ظهره زجاجة شمبانيا
ويفتحها عليهم
لقطه من اعلى لايديهم تستقبل رغوة الشمانيا بنشوه وصياح
صوتهم يرتفع اعلى
... الله يرحم الاجئيـــــــــــــن
... وناس اللــوترى الجايــــــــــــــن ..
لقطه للمنزل المقابل لمنزل التركى ويظهر سودانى من خلف -
زجاج منزله يتامل المشهد باغتضاب
لقطه لهم مع التركى من داخل منزل السودانى ومن وجهه نظره -
صوت صرخاتهم لازالت مستمره
... وناس اللوترى الجايـــــــــن ..
لقطه للسودانى يتناول الهاتف ويتصل برقم -
cut
مشهد نهارى خارجى
لقطه عامه للاصدقاء الثلاثه تكبلهم الشرطه ويدخلوا الى -
سيارة الشرطه
لقطه متوسطه وهم داخل سياره الشرطه -
لقطات لاوجههم -
لقطه للسياره تتحرك بهم -
يواصلو الاصدقاء غناء داخلى ولكننا نسمعه عالى
شمبانيا مما مرقت .... قزازه وانفجرت
بالشامبو حمونا ..... بالشرطه ودونا
تكرار
لقطه لعربه الشرطه تختفى فى احدى الشوارع -
cut
نهايه
عماد براكه
وكل سنه وانتو طيبين
يا منعم شوف الفلم دا لو عجبك تعال نبدا نصور
|
|
 
|
|
|
|
|
|
|
 Re: ... فلم قصير - الرحمتات فى امستردام (Re: layon)
|
السلام يا براكه
والله ابداع عديل كده ...............
لاكن تعرف المشكله وين يا براكه انو ما في واحد بيقدر يتخيل ليك الموضوع ده الا يكون عاش جزء من الفلم ده
لاكن تعرف يا براكه انا عرفت ليك الحي بتاع امستردام
ده لاكن الحي ده ما هادي يا براكه صاح ولا كلامي ما غلط
كل عام وانت بخير لك التحيه يا مجنون يا ..............
| |
|
|
|
|
|
|
|
|
|
Re: ... فلم قصير - الرحمتات فى امستردام (Re: imad braka)
|
سلام جميعا
كل سنة و انت طيب يا براكه و صلتي عيديتك مع احمد شكرا كتير، ما كنت قايل عيدك كان مهبب كده، الحراسة عديل كده
اتخيل لي بيتان في الحراسة بحرك موضوع اللجوء شوية ولا شنو، شد حيلك و شوف لينا الضمان المالي كم عشان نعمل ليك كشف
تحياتي يا مبدع
امجد
| |
|
|
|
|
|
|
|
|
|
Re: ... فلم قصير - الرحمتات فى امستردام (Re: Tumadir)
|
شكرا للاصدقاء ـ كل عام وانتم بخير
الاخ امجد ـ سنلتقى .. لكن عايزك تترجم قصه
ـ فطريات زمن اللجوء - للغه الهولنديه
اختنا تماضر .. عامله شنو ؟ تمام ؟
نرسل ليك تذكرة سفر وعربون فنى
شكرا للذين شاهدوا الفلم فى الخيال
براكه
| |
|
|
|
|
|
|
| |
imad braka
OMDRMAN
Tumadir
فيس بوك
تويتر
انستقرام
يوتيوب
بنتيريست