|
|
 حديث القمـــرة
|
طول حديث القمرة
طول بقى ليه سنين
وما جيتنا يوم في الباب
لا يوم رسلت جواب
لا قلت جاي متين
وباقية لينا الذكرى
لما كنا احباب
والبينا غالي ثمين
في كل ليلة حكاية
ولمان تغيب بين بين
كلامنا يبقى فيه عقاب
وحتى السنين الجاية
زرعنا ليها حنين
ووجدنا ليها اسباب
اردد حديث القمرة
لما شوقي يبين
وانسى كل عتاب
* ** * ** *
طول حديث القمرة
لا شوقا يعيد أحلامنا
لا قدرا كفانا العبرة
وفي نفس المكان من كم عهود
مرت لا سلام لا ذكرى
رقرقت فوق طريفك
وانت بعيد ما طريت للقرب فكرة
ومن زمان
أنا زي ناس زمان
دايما بعاينو لبكرة
وزي ما بكيتو فراقك
يومك تعود أنسى الحسرة
وأنساها الجذور الفي حشاي منحشرة
دفقت الدموع
فوق الخدود منكـسـرة
ارجع بالسلام
بنقول حبابك عشرة
* ** * ** *
طول حديث القمرة
وحكاية زماني طويلة
ولما السكات يغمرني
في عيوني مشاعري أشيلة
ولما تطل في سماي
بنظرة بس أشكيلة
ولما تقرب تحكي
وهنيهة باقية قليلة
هب الصباح ينصحني
البارحة ذكرى جميلة
صبر الشميسة الغادية
نساني المنام في مقيلة
لو كانت دوام تسمح لي
بادلت يومها بليلة
* ** * ** *
طال حديث القمرة
خيط حنين مغزول
ايدي ساوية مداه
وصبري السدى والنول
وذكراي طيف ألوان
رسمت حروف القول
الفي القلوب مرسوم
بأمان السنين مقفول
تفتح نسايمه في بكرة
تفرح بيه أجمل زهرة
يوم الفرح مجبول
* ** * ** *
طال حديث القمرة
واشواقي صافات في طرف السماء
ترنو من فوق مسافات الرجاء
في كم بحار
في كم غفار
ومدن صدر المرافي
وكم ديار
مراسي الشوق واللقاء
مرصوفة قدر وعدد
وشئ كثير من كلمات مدد
* ** * ** *
وطال حديثي طال ومد
حتى شوقي شد
وكلما رقد هب ووقد
لكنك يا قميرة ما بتدي رد
لو حتى مع انوارك خبرا ورد
غمر الضفاف وفات كل حد
فوق طرف القرى
وضاحية المدائن
وبطن البلد
* ** * ** *
طال حديث القمرة
طال ما ليه حد
وشوقي طول ما خمد
وطول وقوفي انا غير سند
وكان لابد ومني بد
تلتمس عن قرب يد
للوكاي سند نجد
ما تنده بعيد ما غيره حد
رفقة عمر صبر جلد
وقفة زمن قدر ووجد
* ** * ** *
طال حديث القمرة
وما قلت ليها كفاية
وتكفيني منها نظرة
وما تكفيها مني حكاية
من السنين الغابرة
ولا السنين الجاية
وحديثي أصبح فكرة
وظهورها اصبح آية
وطال حديث القمرة
وما شفت ليه نهاية
|
|
 
|
|
|
|
المسافر
فيس بوك
تويتر
انستقرام
يوتيوب
بنتيريست