كتب الكاتب الفاتح جبرا المتوفرة بمعرض الدوحة
|
|
 سليمة بائعة اللبن .. قصيدة
|
سليمة بائعة اللبن
*****
بنيّاتاًً لي سليمة في بيتنا جن
قاصدات زيارة أم الحسن
قعدن مسافة وروحن
سألت أمي
سليمة لسة بتبيع اللبن؟
ضحكت وقالت..
إت بي صحّك يا الحسن
والله عندك جنس محن
ولا في شان كنت غائب في اليمن
الحمد لله الماقلتو قدامن
كانن بكن
سليمة البقيرات باعتن
في شان تسوي لوليدها الجواز
وباقي أغراد السفر
لي دار الحجاز
قصّير الفوقنا ده حولو
وقالوا إلليل ما اشتغل
ياكل ينوم متل البغل
وسليمة رجعت تشتغل
وشن الشغل
ترا العواسة الفي التكل
تعوس لي محاسن وسميّة وزحل
والبنيّات الشفتهن
الكبيرة تلقط في القطن
والصغيرة تقرأ في مدرسة المهل
والصغار حايمين متل النحل
المسكينة صبحت من غير عقل
سليمة بتبيع اللبن؟
إنشاء الله خشمك فوقو اللبن
دحين مع السفر فضلت بهيمة بتنحلب
ولا فضل جنايّاً يحويلو بقرة
الكل سافر وإغترب
ما فضل زول بين العرب
الأّ الكبار المتل أبوك
الما فيهم سبب
ويا حليل زمان وكتين يقولو
طه بالبهائم سرب
والبنيّات يفزعن للحطب
كلو إنتهى وحلّ الغضب
من رب العباد
شان العباد دايره تاكل بالغصب
والدنيا باقيالهم درب
نسألك يا ربي العفو والعيشة الكريمة
ونسالك يا ربنا ترجّع البقيرات لي سليمة
عشان تبيع لينا اللبن
عاطر التحايا
بدرالدين شنا
|
|
 
|
|
|
|
|
|
|
|
Re: سليمة بائعة اللبن .. قصيدة (Re: بدرالدين شنا)
|
أبا أواب
قطع أخدر ، قطع شك
أها - ياخ قالولك الراجل لي هسع ما اشتغل
لكن عمل خبرات كتيرة
كل لعبات الكشتينة
والمطبخ من تقطيع البصل
إلى الحلو ، يا حلو
وشعارو : الماعون اللين غسيلو هين
وأول ما يشتلغ مفكر يشتري للوالدة : سليمة يشتريلا موبايل
وعشان البنات ما يمشن الخلا
ويفارقن الشقا
لقيط القطع
الفزع للوقود
حا يشتري بوتاجاز و مايكرويف
بس انت شيل الصبر
خليه يلقى الشغل
ويجدد الاقامة
ويرضي الكفيل
والضرائب
| |
|
|
|
|
|
|
|
|
|
Re: سليمة بائعة اللبن .. قصيدة (Re: بدرالدين شنا)
|
هي يا بدر الدين انا لي يومين معلقة مع سليمة
رسلتها لي نجاة ومع انها كوميدية مسودة متل قعر الدوكة
الا ضحكتني ضحك وذكرتني زمان لمن كنا صغار انا واختي امي تدينا
اللبن عشان نبيعو في الكوبري فيها تدفع حق الصندوق عشانىتشتري الدهب وتدينا اي واحدة قرشنص عرفت العملة الغريبة
دي قرشونص تعيشك في المدرسة ملك منتهي الرفاهية فطور وتحلية بحلاوة
دربس ولا حلاوة شيكو وحلاة لكوم وبعد داك تفضل ليك تعريفة كمان تحاكي
امك وتدخل بيها في الصندوق عند بت رقية وساعة اصرفو ليك عشرين قرش تشيل السوق وتمشي دكان عبد العاطي وتشتري منو احلى عروسة وقرد عندو طبلة وترجع ترمي بت ام لعاب في الكوشة بت ام لعاب بتعرفها بت ام ليون دمية انا عندي حكاية عنها حاحكيها ليك مرة تانية .شفت يا بدر الدين ات طبعا عارف ابوي كوز وبفتكر العرايس اصنام ومكرهنالرادي الرادي البتجيبو امي كلو البعو بالواطة واكسرو تاني امي بتحب الغنا تمشي تشتري واحد من علي العبيد . المهم يازول ابوي اكتشف بيع اللبن ولماعرفنا ليك انا واختي وادانا ليك علقة بالمحاويب حق البقرة اختي خوافه بقت ما بتمشي معاي اها كل يوم انا بقيت امشي ابيع اللبن واجي صادا اشتري اللقيمات من بت ودحسن يوم ابوي بدري ربط لي بعد جا من زريبة البهائم وودا البهايم الديحة في السلخانة
سمو فاير في البكس بورى السكاكين وحبال ملانات دم وسيف مجدوع الكلام دا ايام الكيزان قطعو راس التمثال بتاع بابكر بدري في المدرسة
دي حكاية تانية خليها . كحلني ليك الحاج وانا كحلتو واكب الجرية بجردل اللبن بت ساري ادتني قروشة ما عبرت ليها اللبن بقت هي جاري وراي وابوي بالعربية ساكيني وانكشح اللبن واتشتتن القروش والمرة لقطت قروشها ورجعت لود حدارو وانا قبضوني وربطوني وجدعوني في البوكس مع روسين البقر والدم وحبل السلبة قت خلاس الليلة بودوني السلخانة وابوي دور ليك العربية بسرعة الموت والحمد لله جابوني البيت وامي رسلت لجدي في الدكان قالت ليهو ولدك عايز ادبح بتو حلف وجدي جا عشان انقذ الموقف قام ابوي قال ليه انا حلفت الا ادبحها تمش الشارع تبيع اللبن قام جدي قال ليه خلاس عز حلفك واربطها مع الغنم بس ربطوني ليك في البربندي لتاني يوم مع الغنم واكلت الامباز معاهن وامد ايدي للمزيرة اشرب بالكوز وبعد داك ارميه في الواطة لمن اطرقع تاني يوم حلوني من البربندي تعبانة . نمت نومة
ما عادية وصحيت بدري كبيت اللبن في الجردل وشلت العبار كوز اللبن
وغيرت الشارع الببيع فيهو ورجعت ابيع في اللبن من جديد . لاقاني سيد اللبن ود حدارو لاني بنافسو في البيع قال لي ابوك داك جا وخطفت الجردل وجريت وانكشح اللبن وادسيت في زقاق ناس عاجبة لحدي ودحدارو باع لبنو وجا ماري بعند ي قومي قومي واضحك ..ابوك لا جا ولا حاجة رجعت البيت بايرة ولبني مكشوح. وود حدارو رجع فرحان قاجي تمنو.الزمن دا كت في تانية ابتداي بالله عليك يا بدر الدين حسي كان ابوي خلاني ابيع في اللبن ما كان اخير من الغربة .
| |
|
|
|
|
|
|
|
|
|
Re: سليمة بائعة اللبن .. قصيدة (Re: بدرالدين شنا)
|
بسم الله الرحمن الرحيم
الغالي أهل العوض
سلام
القصيدة دي ما نجر أخضر بدليل إنو عزة قالت ما أول مرة تقراها وهي في الحقيقة أول قصيدة كتبتها من بين أكثر من 30 قصيدة ونحن كلنا يا أهل العوض أولاد سليمة وياريت نقدر نوفي سليمة حقها ونرجع ليها بقرتها وعزها (بكسر العين) وليس غنمايتها
عشة بائعة اللبن
يعني لو كان أبوك خلاك تسوي الدايراهو كان سارية بيّعك بقراتك عشان يقرأ في المانيا
عزة سلام عليك
أنا مرة سألت حنان النيل قلت ليها إيه العلاقة بين حنان (النيل) وطارق (البحر) فردت قالت صالح (مطر) فإنتي إيه العلاقة بينك وبين ود عزة الله يطراهو بالخير ، ثم إني أشكرك على رأيك في القصيدة وعايز أعرف لا قتك وين قريتيها قبل كدا؟
عاطر التحايا
بدرالدين شنا
| |
|
|
|
|
|
|
| |
بدرالدين شنا
Ahlalawad
عشة بت فاطنة
فيس بوك
تويتر
انستقرام
يوتيوب
بنتيريست