|
|
 غربة وعزاب
|
لقد وصلتني هذة القصيدة العزاب علي الايميل واريد ان اهديها الي كل السودانين بجميع الوان طيفهم وخاصة اهل الغربة
سماحتك يا بلد ...!!!
سمحي سماحة الحبوبة قاعدي تحجي في الأطفال
كان في بنية أسمها فاطني سمحة سماحة مابتتقال
آهة لوعرفت الحبوبة سماحك فاتا بي أميال
سماحك والله نوعو فريد سماحا حير المثال
ما شافوهو من آدم ولا في يوم خطر بي بال
سماحك أصلو أسطوري أبدا مابيطولو خيال
بشوفو معاي وين ما كن في أستقراري والترحال
سماحك في وزير مخلص ما زاد حقوقو ريال
ما حامت شكوك حوليونو أبدا ما فعل بطال
بشوفك في سفير أجواد في العالم يدور جوال
يوري كان سماح بلدو وشعبو الرئع المفضال
يلاقي صديقو بالبسمة وعدوهو سيوفو للأنصال
بحبك في ضمير أستاذ همو يعلم الأجيال
مهما الراتب إتأخر يقول بكرة الكريم سهال
سماحك في حنان دكتور يداوي يوقي بالأمصال
يضحي يطبق الوردية أبدا ماعرف أهمال
هندسي بيطري وزراع فني إداري للأعمال
عاشقك في صمود جندي مدرع راكب الصهال
محصن بالمعوذتين صباحي يرتل الأنفال
سماحك في وجه عامل في البحاري والتربال
عاشقك في نضال أغبش يكابد عرقو صاب شلال
صياد شال شبكتو نزل وعجوزا للحبال فتال
بناي فوق سقالة مقيلو وحطاب حاشى ما سئال
يكابد في حياتو القاسية كل الدايرو لقمة حلال
بريدك في صدق تاجر زاد ماخسر المكيال
أدى زكاتو بالكامل خايف المولى مو العمال
يمينو طويلي بالصدقة تنفق مابتشوفا شمال
سماحك في الطنابرة كما وكتين يشدو بالموال
ومع كل عاشقاً لهان من السمحة شال شابال
وضهر الكلس بالسوط أصبح زيو زي غربال
ثابت أصول مابهتز لا كتوفو إنهدل لا مال
ليهو الحق رضيع صدرك لافح العز عباية وشال
سماحك زي سماح الجد فوق الفروة صنقع وقال
سبحانك ياكريم يامعطي يا وهاب ويا متعال
شايل السبحة يجرد فيها مصحفو جنبو مابتشال
وأحفادو الصغار من حولو يحاولو يقلدو الأفعال
بالبسمات يداعب ليهم وفيهم نظرو دور وجال
سمحي سماحة الزارعنو وجريدو إنتكا لمن شال
صلى على الحبيب من شافو خايف عينو منو تنال
قال منك دقر ياعين دايرين منو كم شوال
سماحك زي سماح نسمة في عز النهار القال
قاعدين في ضليل راكوبة وفنجان قهوة دور وجال
مع الحلوين من الجيران شيب وشباب حريم ورجال
بينم عشرة طيبة وعامرة ماهزاها قول القال
رهيفة رقيقة زي شاعر فعاليو تطابق الأقوال
آه من سماحك أه سماحك قبلة الآمال
درقة وسيف على الإحباط سماحك لينا ياهو الفال
فيهو بنرجا ليوم بكرة مهما ليلنا طول وطال
بس دايرنو نحن أمانك أمانك لينا راس المال
بعدو خسارة مابتغشانا دام بترولنا دفق وسال
سماحك لينا يا هو العزة ونحن العزة فينا جبال
يزينك في الشرق توتيل حاضنو القاش بحن الخال
جنوبنا جمال جنوبنا كرم يصب زي المطر هطال
غربنارجال تشد الحيل أسود الغابة والأدغال
شمالنا شموخ مهيرة العز الكم جلجلت أبطال
وسطنا كمان جزيرةأبطال ودحبوبة فيها مثال
شوف سماح بلدكم دي كفانا دمار كفانا كتال
والماببقا سيد لنفسو أخير فوقو التراب ينهال
حياتو بلا نفاع تبقا دام ما عندو إستقلال
تفول القبة لو تنطق طريقنا المهدي رسمو نضال
دا الكان وحد الأمة لا فارز جنوب لا شمال
وليه ما نوحد الراية ونخلي نحيب على الأطلال
وليه ما نوحد الراية ونخلي نحيب على الأطلال ؟؟؟؟؟؟!!!!!!
|
|
 
|
|
|
|
فيس بوك
تويتر
انستقرام
يوتيوب
بنتيريست