|
|
 مـامـا انا كلسترولي نزل زُت
|
سلام مربع
اول الحكي
واسترجعت سألت عني
فقيل لها
مافيه من رمق
دقت يد بيد
وأمطرت لؤلا من نرجس
معاوية بن يزيد
_______________
حكي لابد منه
مع انني قلت الكلام دا في بوست يحمل سؤالا
ومع انهم لم يحشروني في الموضوع
الا انني من اللقافة واللياقة
والشمار بحيث انني
لا ادع مدخلا للشمار
اوالنقة
الا وادخلت بوزي فيه
ويا ويح بوزي من كتير نقته وشماراته.
......
بري بالجملة
والبـَـْـرِي أيضاً ضاربٌ بأطنابه
هانذي ارزع بابكم فرد رزعة ببوتي مثل كابويات كادبوري في فيلم الطللقة الاخيرة ولو انني اشك ان اسمه كذلك ، لكني امعانا في الذهاب عميقا في تصديقي فيما قلت ، قطعت له اسما من راسي حتى يبدو انه اسم قريب الى عقولكم وبعيد عن سؤء ظنكم بي واتوسط مجلسكم .. واياكم ايها الندماء (المرطبين) تحت فيحاء مولاكم (تتشرشحون )عند مجلسه العامر ، ان تفتحوا (خشومكم) وتفاصحوني .. او تثيرون من حيث ادري ولا ادري نقّة تجيبون بها الّى (الهوا ) وللذين لا يعرفون كنه الهوا ، هو لفظ مجرد اطلق واريد به المعني وهو (الكبسه) أو (البلوى) ، وانشاء الله الهوا اللي (يجغم) مولاي براهو ، وانتم (تبروا وتستبروا) .. تِّنفضوا وانفضوا ايديكم من كل حاجة وانصطوا الي شماري ، انا هي المرأة التي خرجت لتوها من حواشٍ اللغة ، اي لغة لا تدري المهم ان بها بقية من هترشة وهطرقة تتمسك بطرفي لسانها ، وان سألمتموني ما اللسان .. لقلت لكم انه مطيه تمطتيها الانثى حينما تقارع الخطوب . والله لا رماكم في خطوب ولا جاب ليكم اي بليّه وكفاكم شر كل أسّيه .. تقول حبوبتي أعزّها الله ورطّبها في نومتها الابديه _ والتي اسأل الله أن تستيقظ منها وعلى جنته على طول دون حساب _ بلطائف رحمته . انها حينما كانت صبيه ولم تزل شافعة ترتع في (حق) ابوها ، على رأسها تجلب الماء بالدلاء المصنوع من الفخار من بحرهم الذي لا يبعد الا فردة كعب على مقاس (الرضيه) . والرضيه هذه الله يرحمها ، كانت من الطول بحيث انها اذا مرت بمحازاة الجدول وتوسطت نخلات ود الرفاعي الباسقات ، وبساقيها الناعمتين منظرهما والمشققة ملمسهما (تخفج) ثمر المانجو ، القائم على جانب الجدول ، ولو ان التخفيج يعني لغويا العفيص والعفيص ولا يكون الا من الشيء الاقرب الى الارض الى الادني منه ، كأن تعفص قدميك (صراصا) ، وتكون بذلك خفجته ، اي ازلته نهائيا من طريقك انت ونهائيا من وجوده هو، اي انك كتلته ، وهذا ما قصدته جدتي وهي تحدثني عن طول (الرضيه) ولو انها افصحت وقالت لي ان الرضيه وهي بطولها الفارع ذلك كانت لا تتعب يدها حينما تتناول من (سبائط ) البلح ، (تمرايه ) وتبلعها ..لكنت قد فهمت وكنت قد وفرت عليها مدائن من سؤ الفهم والادراك قد قطعتها وهي تنهك جهدها حتى انها زهجت وطفشت وقربت تشوتني بسفنجتها حينما زهجتها كثرة اسلئتي ولايوق كلامي ونعتنني في حينها بالغبيانه (( الله يقلعك انت يا شافعة الجن لسانك العامل زي البربندي دا ، انطمي يا قصفة شوية خلي كباية الشاهي تدخل نافوخنا دا )) .
حدثتني جدتي ذات قعدة كنت قد احتليت فيها ظهرها وهي تتوهط عنقريبها الموقى تحت شجرة النيمة المسمية باسم اخي الاكبر تيمنا بمولده اذ انه اول مولود جاء (نابل) لابي ، ولا يخفيكم ايها السادة كيف ان الناس في العالم الشرق اوسطي يفرحون بمقدم الولد ، فكيف تكون فرحة الجد ان بكر ابنه البكر بولد الذي صار فيما بعد اناديه بي (بابا) مع انه اصبح حكيما اي طبيبا الا انه تعود مني ذلك وتعودت انا منه هذا التناقض اناديه بي (بابا) فيرد علي، ويناديه كل الخلائق بالطبيب فايضا يلتفت اليهم ويجيبهم مبتسما ..الان عرفت من اين ورثت هذه الازدواجيه في الفهم ..
ماعليكم وما علينا ، المهم في تلك القعدة كنت قد جدلت لها فيها ضفائرها ، ومسحت شعرها بكركار زيتها ، اللزج ، وفرتقت في ذات القعدة ضفيرات شعيراتها الفضيه وهي تكورك فيني كلما ما فرتكت شعرة وامسكت الاخري ،((براحة يا قصفة ،قطعت لي شعري ، الله يقطع ايدك)) ،(( يا حبوبه ، لكن ما شعرك متلبك )) .. وتجيبني بذات لهجتها الغاضبة (( الله يلبك قلبك دا انت يا الشوم )) ولا املك ازاء حديثها الطاعم الحلو ، الا ان استجيب لحنّية دعاؤها بمزيد من مراعاة الله فيها ، وبيدي الصغيرتين امسك احدي شعراتها ، ومن بين اصابع يديّ ذاتهم انتقي الاوسط والسبابه وادخلهما خلسة الى داخل جدايل شعرها وبشويش وبشويش ، اسحب سبيبة وراء السبية حتى تستقيم سبائب شعرها ، الفضيه ، مثل سلك تلفون نمعط سلوكه .. ولا ادس عليكم سادتي احساسي ، اذ انه ورغم اطايب دعاؤها وعظيم مديحها في اخلاقي الزفت وطبعتي المعفنة الا انني كنت استمتع برائحة شعرها ونحن نتبادل انا وهي شم تلك الشعرات .. هي تسألني بالله عليك الله يا بنيتي (( شميهن لي عتتن؟؟ )) واجيب بذات اللكنه المستهبلة (( الله كيف يا حبوبه .. حلو مثل الصندل )) واليوم فقط عرفت كيف ان الحال اوصلني الى كميات الاستهبال خاصتي التي ترونها .. ؟ يا الهي .. الهذا الحد سادتي كنت انمي حبال الاستهبال في دواخلي حتى استفحل الامر واصبح لسؤء طبعي وشناته ذات صلة بالحرب القائمة ما بين العراق وامريكا ..اذ يقولون ان لجمالي الاخاذ وحلاتي يعود السبب واختلاف لجنة التفتيش عن اسحلة الدمار الشامل وامريكا والعراق .
المهم يا سادتي .. انكم لستم معنين بهذه الهترشات والنقّه .. فقد توارثتها ابا عن جد ، اذا حدث انني واثناء استراقي للسمع ، وهذا ايضا لانني لم ابطل هذه العادة الرزلة .. يا الهي ايعقل انني حملت تلك الحماقات وعبرت بها كامل عمري .. قاتل الله كروموسومات الانوثه .، ولو انني اجهل كيف انها كروموسومات وتصف بانها تابعة للانثي ، لقد كانت جدتي لابي ، طول عمرها تربي فيني ان لا أسأل سؤالا ربما لا اتلقى اجابته .
كأن مثلا مثلا اسأل سيدة الدنيا والدين والجبال والقصور وبرلمانات كل الدنيا ، امريكا اذل الله سلطانها وفرتق بيتها الابيض .. ليه العراق ما اسرائيل ولا كوريا الجنوبيه ؟؟
او ليه الانقاذ اسمها عكس فعلها ..؟؟
واهدرت كل سنين عمري _ رغم قصرها _ مع حبوبتي افهمها ان المراة يجب ان لا تستسلم لليأس ، وان لا تترك اي بابا مواربا في وجهها حتى تدنو منه وتطرقه ، حتى وان كان فيه طلاقها من بعلها الذي انجبت لها الصبيان والبنات وعاشت معه من الدهر عتيا .. لكنها ، كانت تقول لي (( زحي كده يا المسنوحة يزحك المرض ، كمان كل شيء عرفناهو عايزه تقيفي وسط الرجال وتفاصحيهن ؟؟)) والوذ بصمتي وقلة حيلتي ..
حبوبتي حكت لي ذات جلسة كنت امسد لها فيها كرعينها ، وهي تقطع بين الحين والاخر حديثها لتخبرني انني تجاوزت حد الالم ويجب ان ارجع الى مخروقتها ، وعندما افعل ، تقول ان الالم ازداد في راحة رجليها .. رغم انها تزهجني .. اي والله تزهجني ، اذ ان ظهري وعلى ليونته ولدانته احس به انطفق . واتصايح واتنايص با حبوبه وحات الله ظهري انكسر ..وتحن علي اذ انها تحبني حتى شغاف قلبها وتقوم من رقدتها وتحضنني وتقبلني حتى تسكرني رائحتها الصندلية واغفو .. حدثتني حبوبتي ان المرأة في زمنهم مهما صارت فأساً فانها لن تقطع حاجة ، لان صوتها عورة .. يدها عوره .. وجهها عورة .. يدها عورة ..وعندما اسألها شنو يعني عورة ياحبوبه ..؟؟
تنتهرني : (( يعور عينك يا بت ، عورة يعني فاجرة . وتمسك خشمي بيديها حينما تدور عيوني في اتقاد وتمتط شلاليفي .. اوعك تفرفري خشيمك دا تسأليني شنو يعني فاجرة هو انا عرفت ليك الاولانيه عشان تجيب لي تاني بلوي ؟؟؟ .
وانا بين صحوي ونومي المستهبل اسمعها .. تشاكل جارتها بت ود العقاب .. هو يا ايتها الجاره الشقيه .. الاذيه ، العويله .. يا عرة النسوان لي حدهن .. شن غرضك انت في نعلات حاج امير .. وحات سيدي الحسن راجل كسلا ، لو ما غورتي من وشي دا .. اوريك الانتي عمرك كلو ما شفتيهو .. رغم انني كنت ارقد في سلام في حجرها ، الا ان انفعالها ذاك ينفضني فرد نفضه فاجدني مدردقة في الرملة في المساحة الواقعة ما بين شجره نيمة سهلتها الكبيرة وحفرة نخلتهم ، وهي تحمش نفسها لتنهض من رقدتها فتكتشف انني طحت ارضا ، فتقول بسم الله ، بسم الله بسم الله يا النبي فوقك با بنيتي .. وهذا لتعرفوا كم كنت غالية عندها وطفلتها المدللة التي لا تقبل فيها الا ما يجود لسانها عليَ بسمح كلامها .. وتنفضني من رملة حوشها وترفعني الى صفحتها وتكمل مشوارها الهجومي الى بت ود العقاب .. وانا ما زلت اتامرجح في حضنها وهي تناتل وتشاكل فافهم أنا من موقعي القريب ذاك الى مركز الشكلة كامل قصة خصامهما.. اذ ان بنت ود العقاب تلك سامحها الله وغفر لها عظيم ذنوبها وكثير عثراتها في حق جيرتها .. انها امتهنت القوالة واللخبطة مهنة تمشي بها بين جاراتها . ومن شدة غباؤها اجترحت قصة تتقول بها بين النسوان ان حبوبتي رحمها الله وغفر لها طلبت من الحاج امير وهو جدها لام حبوتبي وهو في طريقه الى بلاد الشمالية بعد ان مّن الله عليه بنعمة الحج فاتم مناسكه كلها .. وحينما رأي ان فضل الله عليه كبيرا ، أي الحاج امير ، تذكر انه يدين لجدتي بعدد واحدة دعوة (مدنكلة) كانت قد دعتها له ،وهي ان يبلغه الله قبل ان ياخذ عمره بحجة سهلة ميسرة وان ينعم عليه فيها بزيارة سيد الانباء الاولين ويقف هناك يدعو لهم جميعا آل حاج امير ، ولما تذكر ذلك وهو في سوق امدرمان الكبير ، اذ لم يكن في الحجاز انذاك باب شريف ولا سوق عصام ناس ولا حراج الصواريخ اذ لم يكن الناس هناك في مكه قد عرفوا الاسواق بعد . ذلك ما سمعته باضاني التي سوف تأكلها الدود . كنت اقول انه لم يجد سلعة أو هدية تعجبه ، ولما اصبح في سوق امدرمان رأي سنفجات زينات بالحيل ، فلاح له وجه حبوبتي بقسماته الحلوه ، ليس لان السفنجات يشبهن جدتي حاشا لله ، بل لانها كانت وصالح دعواتها من اسباب حجه ، هكذا اعتقد الحاج امير ، ولما كانت هذه اللخباطة (بت ودالعقاب) سامحها الله وغفر الله شين عملها ، حقودة فانها مشت بين الناس تقول ان جدتي شحدت حاج امير سفنجاته ، وهذا من شدة حياؤه اعطاها خاصته التي اهداها اياه سلطان الحجاز سلطان باشا حينما انشده الاخير قصيدة مدحه فيها ، يقول مطلعها :
((..لزام التقيلة لزام التقيلة والعافية دراجا وروني العدو واقعدوا فراجا . تسلم تسلم يا ابعاج اخوي يا دراج المحن))
ولعمري ذاك كان شائن الفعل وقبيح المنتهي .. والتفّتت اليّ تذكرني ان لا اسأل الناس ان كنت اشك في انهم سيبذلون قدر جهدهم في تفتيت عظيم ظنك بنور معرفتهم ..
هو انت يا استاذنا في مجلسكم الاميري كنتو بتقولو شنو ؟؟
اه هو سؤال ... والله انا جيت بس كنت عايزة اقول ليكم والله ماعارفه اي اجابة لسؤالكم ، لكن اتخيل لي كده
حبوبتي كانت بتقول المرأة ما ممكن تكون مولانايه او مولايه ...
لان المولى في كل الاحوال هو الله ، هذا والله اعلم ..
ومع ذلك كنت قد سمعت ياسمينه في مسلسل سندباد بطل من بغداد تقول للملكه يا مولاتي ..
وهذا ماقاله امام المحدثين وشيخ المجددين المنتصر بالله اهل العوض ، وما اضافت اليه محدثتنا التي هي من التقاة شيختنا العظيمة رد الله غربتها واعانها في وعثاء غربتها وتعب جهادها الشيخه بت قضيم غفر الله لها ولنا وجميع مجلسكم الكريم ز
|
|
 
|
|
|
|
|
|
|
|
Re: مـامـا انا كلسترولي نزل زُت (Re: كحلوش)
|
سلام مربع
يا سلام عليك ياقرجة
الله يديك العافية
يادوب كده انا عرفت انو
الناس بتحب الشاي
الكنت بعملوا ليهم
بس يا خسارة مافيش حد بشرب الشاي
البسويهو في بيتنا
...؟؟
ماعارفة ليه؟؟
مع اني والله بعملوا في نص دقيقة
وربطة نعناع المدينة
بتخلص في كبايتين بس
تجي تشرب معانا شاي مغرب
؟؟
مع انو عمو (هباش) حلفني باسم
الله مااسويهو ليهو الشاي
كحلــوش
دا بس من كلحوشياتك
وزوقك الراقي
سلمت يا طيب للطلة
| |
|
|
|
|
|
|
|
|
|
Re: مـامـا انا كلسترولي نزل زُت (Re: shiry)
|
الرائعة شيري
سلام بمساحة بلادي الشاسعة
نتمنى الا تقف هترشاتك لأنها ذات نكهة خاصة ومذاق خاص
ايتها الرائعة زيدينا من هترشاتك
ولقاء بورداب جدة على الابواب جهزي نفسك
نحياتي
الجعلي
| |
|
|
|
|
|
|
|
|
|
Re: مـامـا انا كلسترولي نزل زُت (Re: اساسي)
|
سلام مربع
الجعلي
بورداب جدة النائمون في العسل
من هسع شايييني ماليابيهي الترامس
اهوندي
واحدة
واثنين
واربعة
وديك الخامسة
والثامنه اهونديك شايفاها مليانة قهوة عربي
الله يقلعها النصف شغالتنا
ابدا لا تترك هذه العادة
تشيل ترامسنا وتوديها جيراننا
وتجيب منهم
بس
ما تخاف
بقيت في عمل الشاي
بورق الليبتون
كـــدة
!!!!
سلمت للطله
اســاسي
وحات الله وسيدي الحسن
انت المفلكب
وجنــترتك تضوى كهارب
الجزيرة اسلانج
تعال نسألك يا اساسي
انت الجزيرة اسلانج دي
ويــن ؟؟
يسألني الله انا مانصيحه.؟
ياربي الاسم دا جبتوا من وين
؟؟
في حاجة اسمها الجزيرة اسلانج؟؟؟
ولا اكون قاطعاها من راسي المطاول دا
لكن والله برضو كتر خيرك وحمد الله على السلامة
انو الجات في الصفحة
لانو اتخيل لي شوية كده
وكان جنريترك دور
امزح يا طيب
هاهههاااااا ييييكه
سلمت للطله
| |
|
|
|
|
|
|
|
|
|
Re: مـامـا انا كلسترولي نزل زُت (Re: shiry)
|
الجزيرة اسلانج
كان عندي صحبي في الجامعة من الجزيرة اسلانج زهج من القراية واشتغل دولار ريال شيك سياحي والله زكرتيني ليهو امتحن سنة تانية وقال ما داير قراية ولا محاسبة ولا كلام فاضي انتهيت من الجامعة لقيت صحبي بقي حنفولي وراكب ليهو بوكسي موديل تسعين لكن قالوا انه بقي زول مستهبل كبير بالرغم من انه كان معانا مسكين لدرجة قف ولا خلاص اجلس
عندي اخوي جاء امس من السودان سالته من اخبار السودان قال لي والله اخبار غريبة خلاص والله السودان بتحصل فيهو حاجات حقتو براهو واحد سعودي بني جامع في حلتنا استلموا انصار السنة ناس الحلة مابمشو يصلو في الجامع بصلو في الزاوية يعني فسحة واحدة فيها جماعتين ومشو اشتكوهم لناس الاوقاف قالوا دايرين لجنة جديدة ما دايرين انصار السنة
صحبي درس جامعة الخرطوم علوم رياضية اسع شغال بوزع فواتير سوداتل
ودا كويس بالنسبة لناس تانية اتخرجوا وشغالين مراوح طربيزة في لساتك الحلة المدفونة في الواطة
واحد جلكيم في الحلة كان في اللجان الشعبية زمان فتح محل امان غاز كان زول ضعيف لدرجة انك كان واقف وراهو وعطست ممكن يقع اها قال لي الزول دا بقي ما بتفرز من انبوبته الا الانبوبة فيها رقبة وهو رقبتو اختفت وخطب ليهو بت السنة الفاتت اتخيل لي كانت في الروضة
ومحمد صحبي فتح محل اتصالات وتركيب عطور وبقي فتي احلام بنات الحلة
الز حاجة قالها لي سعيد الاطرش بقي شايل موبايل شغال بيهو رسايل
واجمل حاجة رسل لي معاهو ود عمي عطور تركيب قلت ليهو دا يعني استفزاز ولا شنو قال لي كمان قال ليك كان داير مساعدة ما تخجل
في النهاية داير اقول ليك الجزيرة اسلانج شمال ام درمان
| |
|
|
|
|
|
|
|
|
|
Re: مـامـا انا كلسترولي نزل زُت (Re: اساسي)
|
سلامات
ياشيري
انا كلسترولي ارتفع زت
شو سوي
والله حيرتي طبيبي وفرطقت عنقريبي من رهق الحمي والسهر وطبعا تداعي لها سائر الجسد لزوم المشاطرة
بالله قولي لي انتي راسك دي عادي والا فيهو حاجة زيادة يعني شمومة كشحة من انشلو بائعة الخمر
المهم ياشيري
والله شخصي الضعيف دا بيتنباء بيك وتنبئي ليس كااهل سباء وبرضو اهل سباء ديل النباء بتاعهم شنو ماعارف المهم غايتو كدا بس يلا اها
اسمعي وصفيلنا الشغلة دي باقي ليك اخوك محتاجا شوية
لك مني الف تحية ووالله العظيم الواو الاولي يتخايل لي للتوكيد
انتي خطييييييييييرة
يابت خشي ليك في مشروع رواية قبل ماتتطبق قوانيين شريعة الكيزان ويحرمو حاجات كتيرة بتنفع الناس
ولك ودي
| |
|
|
|
|
|
|
|
|
|
Re: مـامـا انا كلسترولي نزل زُت (Re: ودرملية)
|
شيري....
تحياتي
سرد جميل وكلام شيق، بين السطور تلمس قاصة متمكنة
لكن... تمش شوية لي جوة لغة المسلسلات ترفع ضغطك
خليك بين العربي الفصيح والدارجي السوداني
وأهم حاجة تواصلي الهترشة
| |
|
|
|
|
|
|
|
|
|
Re: مـامـا انا كلسترولي نزل زُت (Re: الشاعر)
|
اه بس انت ما نصيحة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
تعرفي المشكلة وين ؟؟؟؟؟
هي هذه القدرة الخرافية علي مزج كل الالوان العتيقة
والاستدعاء الميسور للذاكرة العامرة بالهترشات الطبيعية
والقدرة اللامحدودة للنحت والرسم بالكلمات
وفي النهاية تشرطي اللوحة او
تكسريها
مارسي الكتابة علي سبيل المتعة والاحتراف
لديك من الادوات ما يفيض
جربي ما بتخسري حاجة
اهو منها تهترشي ومنها تغني
بدل سوات الشاي المابنها بعض ناس جدة
| |
|
|
|
|
|
|
|
|
 Re: مـامـا انا كلسترولي نزل زُت (Re: nazar hussien)
|
اختنا شيرى
تعالى هنا انتو بتقعدو وين عشان نجيكم....انا كنت مستغرب على
الناس البردو ليك ديل ...مالوم ديل والله جنس كتاباتك دى لابنرد ليها
ولا حاجه..الواحد والله يغتح الموقع ده وجرى يمشى يفتش ليك كتبتى شنو
جديد ...وثم تانيا قصتك شنو مع يوم السبت ده ...انا زاتى هسى شايف ليك كلامى ده زى كلام الحبش عندنا ...والبنقالا فى السعوديه كلام غريب غريب جنب كلامك ولغتك.. واسلوبك البخلى الزول يقوم من جنب
الكومبيوتر يسال فى الناس زى يونس شلبي فى مدرسه المشاغبين...انا...البتاعه...هو....ابويا.عندك امكانية نقل الزول من نقطه او جهه للجهه التانيه بكل سهوله وسلاسه وسرعه..يعنى انت
اسم الله على مقامك كان غلبتك الشغله ممكن تشتغلى نشاله ببسااااااطه
والدليل تشلك واستحوازك اهتمام قرائك ..المداومين على القرايه وحتى
الزول البقرى فى البورد لاول مره ...الكلام ده كله الجابه شنوووو..ما
قلت ليك بتطششى الزول..ايوه ..البوست الانا برد فيه هسى ده انت عارفه انو البوست ده انا اول مره فتحته كان يوم 12-1-2003 يعنى يمكن بعد ما نزلتيه كده بشويه وطبعا كالعادة طشيت طشتى وضحكت ضحكى
وكمان استمتعت ايما استمتاع باستخدامك المتمكن جدا جدا للغه.وطريقة قصك الشيقه،واديت ربى العجب ،وقلت ماشاء الله ومشيت فى حالى....طبعا عشان اتم باقى الكلام لازم اوريك
شفت فكرة ناس رقم صفر ،وابو مهيار القالوها فى بوستك داك بتاع
الحكى والحكى الاخر2 دى يازوله الناس عملوها زمان وكونو رابطة قراء شيرى..طبعا ما سموها محبين ولا معجبين عشان الحق الادبى بتاع ناس ابو مهيار وتانيا لانو ده حاصل سلفا ..شفت الناس ديل جازفو كيف مع ظروف تسجيل الروابط البقى مستحيل فى الجامعات ده ، اسهل الواحد يسجل شريط ولا يسجل الريده من يسجل ليه رابطه فى جامعه.والناس ديل تتصورى بيعملو شنو عشان يتابعو الدرر الانت بتقولى عليها برى وهترشه وما عارف شنو داك..
اها النرجع لي موضوعنا بعد ما اديت ليك الله العجب جاتنى واحده من الفرد فى اخر اليوم ومعاها كميه كده من الورق، تعال يازول شوف شيرى بتاعتك المرضتنا بيها دى كاتبه الليله شنو...تتصورى انه الشباب..هى انا قاصد الشباب اصحابى بس...بقو يطبعو المواضيع بتاعتك ويتبادلوها بينهم زى الروايات او الكتب او زى جريده الوسيط
عشان كده سالتك قبيل عن يوم السبت_الوسيط جريدة اعلانات تصدر السبت..وتوزع ملح عشان كده بتلقاها طوالى_والغالبيه ياشيرى من البنات هو فى اولاد كميه طبعا لكن تتصورى كتاباتك عن الدبرسه والهترشه وكلامك عن همومك وهواجسك بالطريقه الساخره دىالبنات شكلهم كده بيلقو فيها متنفس لانى انا لاحظت انو البنات حتى فى قراياتهم التانيه بيميلو للكتابات الساخره العميقه المليانه بالتفاصيل المابتخلو من النزعه الرومانسيه..وياحبزا لو كانت الكاتبه امراه
عشان كده ماتتخيلى شعبية احلام مستغانمى وغاده السمان وسعاد الصباح وسط شابات الجامعات فى السودان ...وان كنت واحده منهم..
اها يا شيرى شفت الموضوع الاستفزانى وخلانى اخش عش شيرى بى
كرعى شنو يعنى ياستى انا بضم صوتى للناس البقولو ليك حاولى اتبنى حكاية الكتابه دى اديها شوية زمن مع نص شغالتكم وتلقيط الشمارات من اوضة اخوانك ومن الزمن البتفكيها فيه فى صحبات امك وانا حبيت اطلع من صمتى الانا مستمتع جدا بيه خصوصا مع استفزازات كتاباتك ومناوشاتك المستمر..عشان انقل ليك الصوره الصفيره دى عن تجربتك الانت ماكنت قايلا صداها حيصل الناس دى كلها ..بل ويصير مصدر اهتمام ومتابعه بشغف بصوره ابدا ما تتخيليها
...عزيزتنا شيرى انا سعيد قمة السعاده انى واحد من ناس البورد ده
عشان الشباب _قاصد اصحابى..الفرد_شابكنى زولتك كتبت زولتك عملت لووووول ..بالجد البورد ادانا فرصت المشاركه والتعرف على كميه من الناس ذوى المواهب الفزه وبدون مجامله ياشيرى انت افزفز واحده
غايتو الله يغتيك ويحفظك و.... ما عاوز اعمل زى حبوبتك الله يطراها بالخير_محل ما هى_وكلامى ما يخضك وياثر فيك عاوزين شيرى زى ماهى مهترشه ...لزيزه...مجنونه...فاطه سطر...عموما المزيد
المزيد
المزيد
المزيد
رج...رج...رج...رج...رج
الوضاح صاحبك
واخوك
ا
| |
|
|
|
|
|
|
|
|
|
Re: مـامـا انا كلسترولي نزل زُت (Re: shiry)
|
العزيزة شيري
لك التحية و الود
لله درك سيدتي
و أيم ألله إنك قد أربكت النبض و أذهلت اللب بحديثك هذا الذي طاف بنا في ردهات الزمن الجميل , لا أ ملك إلا أن أنحني إحتراماً لقلمك الرشيق سيدتي , و آمل بأن تاذني لي كي أطلع بعض الأصدقاء على هذه اللوحة الرائعة .
و أنا في إنتظار ردك الكريم
مع إحترامي
| |
|
|
|
|
|
|
|
|
|
Re: مـامـا انا كلسترولي نزل زُت (Re: Nimir)
|
سلام مربع
ومية مسا
على الناس المدهشة
اساسي
والله صاحبك الحنفولي اكيد هسع بكون بقى محافظ الجزيرة اسلانج لو مستهبل كبير ..
هنالك بدرسوه الاستهبال (والحنفلة) مثلما تقول .. شهادة ثانويه عامه من (جامعتهم) تساوي دكتوراة من جامعاتنا نحن
ويلااااااا .. غض الطرف وخلي حنكك (سنين) الحياة فراولة..
وصاحبك انبوبة الغاز .. عايز كيف تصل لي رقبتو .. وهي مسنوده على امان غاز ..
غايتو جماعتك ديل بالشايفاهو دا .. الا تنزل (مطرة شديدة ومعاها هوا وبس تكون في محلاتهم هم ) وصاقعة .. وتكون زي اصحاب الفيل ، ربنا يرسل ليهم صاقعتهم في محلاتهم . .مسومة من عند ربك ..
تقول آمين ولا بتخـــاف ؟؟
بيني وبينك انا باقي لي شوية كده وارمي طوبتهم ..
سلمت يا طبيب
وشكرا للمعلومة ، رغم انو صاحبك بتاع الجزيرة .. زعلني ، لكن اهو نسميها
الله بدي الجنه ..
ود رمليــــه ..
اعترف انك ارهقت معاجمي ، واعترف انك ملأتني هواء يدخل رئتي فيضمخها بالامتنان لحروفك وتشجيعك لي . .رغم انني اري ان ما اكتبه مجرد هترشه ولا استح منك هذا الاطراء
وحقيقي حقيقي انا ممتنه لك كثيرا لانك رفعت روحي المعنويه
وشكرا لك لحروفك الانيقه
,وطلتك البهية
سلمت اكثر للطله والتشجيع
الرائعة سكر زيارة
تماضر
حبيبية البي ..
انت تدرين مقدار معزتي لشخصك الغالي ، وتعرفين اكثر كيف يكون وقع حروفك على اوتار قلبي
سلمت للطله
وسلمت ايضا للكل هذا الحب
الشــاعــر
شكرا لهذا التشجيع الرائع
وهذه الاريحيه التي نثرتها على حروفي
سلمت للطله
وسلمت ايضا لكل هذا التشجيع
نزار حسين
الصديق يغيب ويظهر مثل القمر بين السحب ..
قلتها من قبل وكثيرا جدأ .. ان كلماتك تقتحم شراييني وتحتلني .. وتاكد لي انني انثي ، يجب ان تحمر خدودها خجلا . رغم انني افتقد هذه الميزة لعامل البشره والدشانه .. هل انت جادي فيما تقوله .؟؟
لا اظنكم بقادرين على استحمال ما قد تأتي به هترشتي ..
وغدا اراكم تخاصمون بوستاتي ..
سلمت للطله
وسلمت اكثر لهذا التشجيع ..
وضــــاح
ماذا عساي ان اقول وماذا في جراب معاجمي لاتيك به مرحبة بطلتك ؟؟
لم اعتقد انني سوف احتاج ليوم لاخذ نفسا عميقا .. وقرص نفسي ، لاذكرني انا ، انني في كامل قواي. .يقظانه . بالف خير . .ولست احلم او مغمية علي
هانت تفعلها بي مع سبق الاصرار والترصد .. تكعبل كلماتي . ترديها على بياض الورق
وكاني تلميذة في صفها الاول وعامها الاول ، وشهرها الاول ويومها الاول . وحصتها الاولى في اللغة ..
احتاج ان اجمع كل ادباء العالم . .ليخبروني ماذا عساي ان اكتبه لكم انت واصدقائك
هل تدري انني فعلا اشتهي ان استدعي ابو الطيب المتنبيء لاطلب منه ان يقول قصيدة مدح فيما فعلتوه بي ..؟؟
مع انني مازلت حتى الان لم اصدق ماجاء في كلامك .. ليس لانك حاشا تكذب علي ، لا انت وكل اصدقائك اهل الفضل والمن والصدق
لكني اعرف قدر نفسي ، واقدر حجم هذا الاطراء الذي قلتوه في شخصي .. وان الذي قلتوه اكثر مليون الف ومئتين وثلاثة عشر من هترشتي وفارغ كلامي ..
لذلك بلغهم عني وعن سعادتي التي لا توصف حينما اكتشفت ان لي اصدقاء يشاركونني جنياتي وهترشتي ..
وانا هيا ذي التي تتمني ان توافقي على اشراكها في جمعيتكم المجنونه جدا ،
وفعلا انتم مجانين اكثر مني ، هذا ما قالته لي ماما ، حينما قرأت لها ما كتبته ..
بلغهم تحياتي وسعادتي بانضمامي الى واحة المجنترين والمهترشين ..
يلااا ولا يهمكم ، ايه يعني زاد عدد المجنترين واحد ؟؟
سلمت يا طيب للطله
وسلمت اكثر لهذا الاطراء
نميــــر
انت ايها الطيب الجميل ، من اربكت نبض حروفي ، وجننتها جن كلكي ..
ان كنت تري فيما كتبت شيء يستحق الاحتفاظ به ، فلك الحق وهدية مني ان تاخذ الذي تريده
واعتبره هذه الهترشات من هسع تخصك انت ..
بس رجع لينا الباقي انشاء الله (حلاوة لبان) لو ماعندك فكه ...
امزح يا طيب امزح
مجرد جنتره على هامش الوداع .
سلمت يا طيب للطله
وسلمت اكثر لهذا الاطراء
| |
|
|
|
|
|
|
|
|
|
Re: مـامـا انا كلسترولي نزل زُت (Re: shiry)
|
لقد كانت تلك الاسوار هي التي تحجب اشعة الشمس وتمنعها من
دخول القصر
وبعد لحظة البسها الحكيم التاج المزنر بالجواهر
وقال لها اصبحت ملكة
لانك استطعت ان تحملي الشمس الي القصر
هذه هي اخر كلمات رواية غسان كنفاني اطفال غسان كنفاني والقنديل
الصغير
قطعا كل ما كتبه غيري من اشاده
ايتها الرائعة شيري لم يكن مجاملة كما تحاولين تصويرها
الهترشات التي تكتبينها علي الطائر هكذا غير عادية
وانسان يملك هذا الخيال المجنون
والذاكرة الكاميرا ما شاء الله
والمفردات الحية
والقدرة علي الهترشة
قادرا لان يكون ذو شان عظيم في مجال الكتابة
وانا شخصيا بعتبرك ازابيلا اخري قادمة
بشرط ان تواصلي الكتابة
علي سبيل الاحتراف
لدينا مخزون ثقافي ضخم جدا
ومساحة واسعة بين العروبة والافرقة
يمكن ان تطرزي منها ما شئت
وتهترشي فيها لا الصباح
وفي النهاية حا تلقي نفسك كتبتي بنات حارتنا جديد
او ايفالونا
وصدقيني
الابداع جاري في دمك جري عديل كدي وامكن يا ربي ورثتيه
من حبوبتك؟
نزار
| |
|
|
|
|
|
|
|
|
|
Re: مـامـا انا كلسترولي نزل زُت (Re: nazar hussien)
|
سلام مربع
الزول الرائع
نزار حسين
خجلت خجلت ، غطت النمله وجهها
وانكفات تداري وجهها من عريسها
ولم تكن على وفاق مع ذاتها
اذ كلها تضطرب .. تتناقلها
كميات من الهواجس
اولها كيف تقنع عريسها
انها ليست العروس التي كان يسعي وراها
.. هي تعرف ان عريسها كان يجري لاكثر من مساحة اثني عشر حبة ذرة على امتداد الارض
جري وجرى حتى انقطع نفسه
.. وكاد في رحلة بحثه ان يلقى حتفه
حفظت العناية الالهية في احداها من رجل الكرسي
وفي مرة اخرى طاردها طفل شرير
كانت هوايته بالفطرة
قتل النمل
.. عاد اليه وقرصه قرصة ابكته ودعكها
ولو انه حوصا لكان شكل الانتقام فظيعا
الله حفيظ
كيف تخبره انها هي وليست اختها
نفس الشامه على خديهما
ونفس الحول في العين اليسرى
.. احسن شي ءتفعله ..
تخلع عنها ثوب زفافها
وتشتت الى جحر الجيران
اه تذكرت لقد تواعدت هي وسوسو
في حجرهم .. اكثر عشرة حبات سكر
وقطعتين حلاوة طوفي
وتذكرت
اها انا احب حلاوة طوفي
فليذهب هذا العريس الاهبل
الى جنهم .. ولا الحق وليمة حلاوة طوفي
شوف بالله شوف الراجل دا عليك الله
قايلني انا سوسو؟؟
وقلعت طرحتها ورمتها في وشه
..
سيرة النملة التي باعت عريسها
عارف كنت عايز اكتب كلام كثير
لكن والله العظيم هذا مانط لي
وجدتني اهترش اليك به
كرد لكلامك
كانت في نيتي ان اشكرك جزيل الشكر على حسن ظنك بي
ولكني رأيت نملة تصعد على كي بوردت وتخترق تفكيري
واطلع مني ياجني الملازمني
وكل ماكتبت هديه ليك
سلمت للكلام الزين
والله ما يحرمنا من كلامك الزين
سلمت ياطيب
..
| |
|
|
|
|
|
|
| |
shiry
garjah
اساسي
ودرملية
Tumadir
وضاح
فيس بوك
تويتر
انستقرام
يوتيوب
بنتيريست