|
|
 مرطبات أحوال الناس الجمبنـا
|
سلام مربع
اول الحكي
من ترى يمنحنى
طائراً يحملنى
لمغاني وطنى
عبر شمس الملح والريح العقيمْ
لغة تسطعُ بالحبِّ القديمْ.
ثم لّما امتلأ البحرُ بأسماكِ السماءِ
واستفاقَ الجرسُ النائم فى إشراقةِ الماء
محمد عبد الحي ـ العودة الى سنار
_______________
هترشه اولانيه
اليوم الخميس لا شيء عنده افعله . اجازة طبيعيه ، مع انني اتمتع هذه الايام باجازة شرعيه اكتسبت حقها من تقفيل الجامعات في السودان ولم اصدق ان ا(الكيزان) اتكاسروا وبربطة معلم ، قفلوا الدكاكين اقصد الكليات وابواب الحامعات ..
والمهم ان هذا اليوم المسمي بالخميس ولماذا قطعوا له هذا الاسم ..؟ لست ادري ؟ اعني من ذلك انه لا يعتبر اجازة تخصني انا ، بمعنى اوسع اقصد لبعض سكان منزلنا .
ماذا اردت ان اقول هنا ؟ . صحوت وبي رغبة عجيبة في الهترشة .. شديت سلك لبنت خالتي .. في هذا الوقت المبكر جدا .. لكنها لعنتني الف لعنة ولم تكتفي اذ راحت تلعن اليوم اكتشفت فيه انها بنت خالتي .. (( معقولة يا شيري تشدي لي سلك و(ديك ) عمارتنا لم ينم بعد من سهر ليله ، ناهيك عن قرب انبلاج صبحه ؟؟ ))
. هذا الديك العوير ، اكتشفت انا وهي بعد رحلة بحث طويلة ومضنيه في اصوله ، انه جاء من البدو في قافلة من التيوس وبعض اغنام لان العمارة التي تسكن فيها بنت خالتي صاحبها (بدو) قيح .. ترك البدو بمجرد ان ابنه نال شهادته الكبيره (الثانوية) كاول متعلم في ديرتهم قاطبه واصبح استاذا في مدرسة ابتدائية وفكروا انه من المناسب جدا في هذا التوقيت ان يترك (ديرتهم) ويأتوا ليستوطنوا في عمارتيهم التي اشتروها .. هو وحريمه الاربعة في شقة وابنه ونساؤه الاثنتين في شقه .. ذلك هو المفروض والتقسيم العادل .. لكن الذي حدث في الحقيقة ليس كذلك اذ انه يملك عمارتين متلاصقتين ..من ثلاثة طوابق وتسعة شقق .. والحقيقة ان هؤلاء البدو تركوا (شقتيهم) واستوطنوا عندنا وليس عندنا يعني عندنا نحن بل ترك اولاده وعيال اولاده ان يندسوا في كل ركن من العمارة فما ان تفتح باب شقتك وتخطوا سلمتين حتى تضطر ان ترفعها لانك (عفصت)شافعا يفترش عتبة السلم الاولى ، وعندما تحمد الله علي انها جات على قدر كده وسلم .. تسمع صياحا والفاظا لا تعرف معناها انك دهست (صحن) اكل كان يتحلق حوله (بشكة) من الصبايا يهرشون شعورهم بيد وبالاخري ياكلون . والكلام لابنة خالتي ..
يا للهول .. !! ماذا اردت ان اقول لكم هنا
اه تذكرت كنت اتحدث عن الديك . الذي جاءوا به من البدو .. فهذا الديك فقد ساعة توقيته .. وصار العيال والكهارب يمثلون عليه حركة غسل دماغ واسعة النطاق .. داش الديك ما بين طراد العيال له ، وزفت الاسفلت الاسود الذي اصبح لون جديد وواقع حياة لم يتعودها . مسكين هذا الديك ؟؟ اصبح له صيحتين واحدة عند صلاة العشاء ، والاخرى قبل صلاة الظهر مباشرة .. وهو التوقيت الجديد الذي به التزم (البدو) في عملية نهوضهم من نومهم واصبح البكور عندهم و (الريوووق) يبدأ بعد هذه الساعة ..
ماهذا ما الذي اردت ان اقوله ؟ ايضا ذلك ما لم اخطط لاقوله لكم هنا . كنت اتحدث عن شيء وفجأة (نط) ديك البدو واحتل مساحة الحكي
ما علينا المهم .. زجرتني بنت خالتي وقالت انني صرت عديمة الزوق مثل جيراننا البدو وديكهم ..
- انت عارفة الساعة كم يا قصفة انت ؟؟
- والله ما عارفة ، وعمري ما فكرت انو اعاين لي ساعة لمن اكون ما عندي موضوع .
- لا لازم تعرفي على الاقل عشان تبطلي تزعجيني انا .. الساعة هسع خمسة صباحا . وانا هسع قبل ساعتين يا مفترية كنت بتكلم معاااااك ،يعني شنو الحصل في البلد ؟؟ صدام ضرب امريكا ، ولا قناة الجزيرة لقت اسامة بن لادن ؟؟
- ايوه اسامه بن لادن .. هو ده الموضوع الكان من زمن تايه عني
- يا بت انت مجنونه .. اسامة بن لادن شنو ؟؟ وطالبان شنو ؟
- بالله بالجد بسألك انت اسامه مشي وين ؟؟ في بالي معقولة يكون حي لحدي دي الوقت ؟؟ يا بت قال ليك الامريكان دي فتتوا جبال افغانستان حته حته .. وماخلوا جحر ما دخلوا فيهو ؟؟ .
افرض مثلا انك انت اسامه بن لادن وعليك كل الضغوطات دي ، كنت حا تمشي وين ؟؟ ماهو لازم انت تضعي في رأسك انك لازم تدفعي الثمن ، وانك انت موش مطلوبة عشان انت مجرمه ولا لع ؟؟ انت مطلوبة عشان انت كبش فداء ، وذريعة عشان بيك ينفذوا اهداف وخطط قديمه ؟
- الله يحرق اسامة بن لادن وبوش .. يا بت انا عايزه انوووووم .. بكره ماما ح تصحيني بدري عشان جايينا ضيوووف.
- اتخيلي هسع لو انت مكان بوش .. كنت ح تعملي شنو ؟؟ لا ليه اتخيل ما انت اصلك بوش ذاتو .. مخ مافي .. حد يسيب خطيبو عشان نسى عربيتو في الباركن وانت جواها لمده ساعتين ومشى البيت ؟؟ هاهاههاا
عارفة خطيبك دا لقطه .. كنت بتمني خطيبي يكون زيو ؟ لكن اهو نصيب . يا خسارة .. اتخيلي لو انا كنت مكانك ؟؟ اهو دي الحاجة الوحيدة الما قادرة اتخيلها ؟؟
- اللهم طولك يا روووح .. والله ياشيري انا اقفل السماعة ..
|
|
 
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
بري للمره الثانيه
______________
- ماعارفه ليه اتذكرت فجأة بتاع الليمون الفي ميدان ابو جنزير ..؟؟
افرضي مثلا انو الواحد كان عندو كشك زي ده .. وانا ببيع فيهو الليمون
كدي فكري معاااي اول حاجة في الشغل الزي كده .. الديكور الخارجي .. اسم الكشك ...
نقوم نسميهو بخط كبير ..(( مرطبات احوال الناس الجمبنا ))
- يعني شنو يا شيري احوال الناس الجمبنا .. انت يا بت مجنونه ؟؟ كل شنو عرفناهو
- عارفة الاسم دا بشمل حاجات كثيرة ... يعني احوال جيرانكم . كويسه ولا موش كويسه .. موش الناس بتأثروا بالناس الحولهم .؟
واهم شيء في الكشك انو اسماء التعليقات والاغاني والاشعار المكتوبة فيهو من بره .. مثلا ..
بكره معزومين على ليمون بااااارد عندنا ..
الله يأزي الكان ازانا .. عيونك فيهن شيء يحير ، ليمونا قربنا كمان وكمان .. منو القال ليك يا بوش نحن برانا .. وبرانا برانا نشيل الشيله ..
الليلة ماجانا الشبه البرتكانـــا ...
واشتري استريو كبيييييير . باربعتاشر سماعة ساوند سيستم واوزعهم . واحدة في الميدان الشرقي بتاع جامعة الخرطوم .. والتاني في الداون تاون .. والثالث في كلية الاداب بتاعة النيلين . واربعة في الاركان الاربعة بتاعة ميدان ابو جنزير .. واحد في كوبري امدرمان الجديد .. وكوبري بحري وكوبري القوات المسلحة
طيب بدل البهدلة دي ما نأجر اذاعة خاصة . ونشغل فيها الاغاني العايزنها .. فرفور ، محمود عبد العزيز ، قدوره .. وندى القلعة .. غنوه هابطه درجة اولى وغنوه هابطه درجة تانية وغنوه ماهابطه درجة اولى ، وفاصل اغاني لرقيص العروس ، عشان الناس تبطل تجيب (غنايات) في الاعراس واشيلوا منهم دم قلبهم ..اوهو نحن بنقوم بخدمة مجانيه ونساعد في الزواج الجماعي .. بس المشكلة موش في الاذاعة المشكلة في انو الناس ما عندها راديوهات . ولو عندها راديوهات ماعندها الحجارة التي يشغلوها بيها
والله فكره .. طيب ما نقوم نعمل اذاعة قطاع خاص واسميها واسميها واسميها .. شنو يا شيري تسمي اذاعتك ؟؟
ايوه اسميها (( اذاعة الناس الاولادها مغتربة )) عارفة باذاعة اسم بالشكل دا حا تسقتطبي كل السودان ، لانو اي اسره ح تضطر تسمعك عشان انت وبي كشك الليمون بتاعك دا وانت في ميدان ابو جنزير دا ، ح تضطري انك تسوقي لكل افكارك القوميه ، وممكن تعملي نداء يومي ، ونشره احوال لحركة الحياة في المدن الثلاثة وطبقات الناس .. يعني في الصباح بدري تقومي تتكلمي عن حركة توقعات اسعار الطماطم ، والخبز ، واتجاهات المواصلات والحافلات خاصة ، حركة تنقلات الركشات عشان ازدحام الطرق ، واسعار كريم ديانا ، وكريم جلسرين ، وشامبو هيداندشولدز ، حركة التيار الكهربائي وقطوعاته والمويه ... وسعر البطاطس ، والجرجير .. وحركة (سماسرة) الجمارك والمباحث والامن الخاص في مطار الخرطوم .. واخيرا .. حركة ناس المرور وحركة ناس خيمة الالزاميه دا عشان الناس الاولادهم في سن التجنيد ..
واهم شيء بين كل اعلان واعلان .. اتلكم عن فوائد الليمون وشراب الليمون في
مرطبات احوال الناس الجنبــــنا ..
هنا اذاعة الناس الاولادها مغتربة من مرطبات احوال الناس الجنبنا من ميدان ابو جنزير
اليكم فيما يلي حركات تنقلات النشالين والبواليص والحراميه في البصات وامجاد والحافلات
....
.....
اما الان فقد حان موعد برنامج ما يطلبه المستمعون .. وحركة التوب تن .. وقائمة الترشيحات من المستمعنين الاعزاء
عازه وهاجر من استراليا يطلبن الاستماع الى اغنيه ( الليلة ماجانا الشبه البرتكانــا ) بصوت قدوره ويهدينها الى سلوي باريوزنا وسمر ، يابوظبي ، وناهد يا فرانفكورت ، ورامز بفلوريدا ، وشيراز فيراكروز ، ونهي بلند ، والى مقدمة البرامج شيري بميدان ابو جنزير
وكل عشرة دقائق نستعرض برامج المساء ، ونجيب اعلان الليمون بتاعي ، ثم نذيع كورة السودان وتشاد التي هزمنا فيها باربعة مقابل لاشيء ..
ثم برنامج كل تحضر لنفسك (اكلة )سريعة دون ان تخسر وقتك الثمين في محطة البص او في داخله او منتظر دخول (الاستاذ) للمدرج ..
سندويتش طماطم بالدكوه او سلطة اسود .
واشرب الليمون البارد مع شـــيري
(( صمت .. صمت طويل))
بس المشكلة ناس الحكومة يقوموا ينطوا ليك فيها ويقولوا ليك لازم تشغل دا وما تشغل دا ..
يقوم عصير الليمون يضيع ..
عارفة نفسي اشتغل في كشك الليمون دا .. ايه رأيك بكره ارجع الخرطوم واقدم عشان اشتغل في الكشك دا ..
بس تفتكري اللبس المناسب شنو في الكشك ؟؟
طااااااااااااااخخ ..
بالله شوف البت المعفنة دي ما قفلت السماعة في وشي . اصبري
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
المسطول سال البت انت اسمك منو قالت ليهو اسماء قال ليها يعني مافي اسم محدد
وكشك الليمون دا احسن تبيعي فيهو مع الطحنية ووشوالات الفحم الفاضية والقرض بتاع الدباغة احسن تبيعي فيهو نشادر وزيتون
اصلوا الحصان الاصيل الاسود وقع في اللفة والناس الراهنو عليهو كلهم طلعت ليهم تعويضات حرب الخليج التانية وصرفوها والحاجة الغريبة انه لمن صدام غزا الكويت واحد من اخوانا المصرين اخد ليهو عربية مطافئ انا مستغرب لاسع كان داير يسوي بيها شنو
ثلاثة من البنات الاشتركو في مسابقة الجمال الاخيرة في طلعوا حوص وواحدة فيهم فازت بالوصيفة التانية اكتشفوا انها مركبة عدسة لون زينب والعدسة التانية بمبية
ودي اخر اغنية فازت في التوب تن حق الاذاعة الشيرية تعرفي الشيريا شنو قالوا شاي الكركدي يعني علي كدا الديناري عصير العجور
| |
|
|
|
|
|
|
|
|
 Re: مرطبات أحوال الناس الجمبنـا (Re: shiry)
|
المبدعة شيري
لك التحية
عندما نعيش معك هذه المعاناة ونعيشها معك ايضا علي ارض الواقع تختلف المسالة
ربنا يتوب علينا من البلد دي
احكي هذه المحنة ابنة اختي زوجها يعمل في مدينة وكفيله في مدينة اخري
مهنتوا مراقب عمال ولا يعمل بها
وذهب هذا العام لعمل الاقامة وقال لي تعال لبنت اختك
وعندها كرهت حياتي لاني عذابي واعيش حرية مطلقة استمتع بها حتي اليوم
وجيت قعدت معاها اولا نوم ما في نهائي
الجيران ما عندهم مواعيد زيارة اي وقت يدخلوا او يتصلوا
دا لما ارجع من العمل القي كمية من الاطفال في عمل جماعي تخريبي
ولا نوم ولا نفس للاكل
انا قلت يومين الواحد يعدي
لكن فجاة يتصل زوجها ويقول تم سعودة الوظيفة
يا اما خروج نهائي او يعدل المهنة
ودخل في المحاولات الخاصة لكن بدون جدوي
وبعدها ارسل الاقامة الي جدة لانوا يمكن عملها هنا من غير تعديل دا بعد تعرق بتاع...
المهم بدل يومين والله 15 يوم
ولما رجعت الغرفة كانوا الواحد راجع من غربة صعبة
الله يهدي بال البعروفك لانك شكلت قلق مكعب
وشكرا علي التفريقة دي
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
الغالية شيرى
الحمد لله على السلامة وانتى كنتى غاتسة وين بالله
والله وحشتنا الهترشة بتاعتك دى ياخى وكلامك الكل كلمة من بلد زى برنامج من كل بلد غناء طبعا دى لا سمعتيه ولا حضرتيه ولا فى زول كلمك عليه وما علينا ..
حكاية البدو زكرتنى بصاحب العمارة التى اسكن فيها فقد ضربت اسرته صداقة مع زوجتى فكانت النتيجة ان كل دقيقة يضرب الجرس ويأتى احدهم علما بان لديه عشرة اطفال وابنه الاكبر لديه ستة وابنته لديها خمسة وكلهم اصدقاء لنا تخيلى اننى استمتع بالنوم كيف وانا المفروض افتح الباب مع كل ضربة جرس توقعا لضيوف بعدين يقولوا قرشوا مرتو هارشاه وبتفتح الباب هى .. شفتى كيف حكم القوى على الضعيف..
المهم يا ستى حكاية اسامة دى انتى مصدقاها هسع ؟؟؟ ولا حكاية صدام كمان مصدقاها ؟؟ يعنى الامريكان ديل غلبهم يلقوا الملا عمر ؟؟ ولا يلقوا اسامة ولا يلقوا صدام ..
وانتى مصدقة انه الترابى اختلف مع البشير وانه سجنو ؟؟؟ طيب زمان سنة 89 ما سجنو برضو ؟؟؟
صدقى انا بقيت ما بصدق اى حاجة الا الفلس المعشعشش فى جيبى بس..
والله ليك وحشة يا بت
حكاية خطيب صاحبتك طبعا واحدة هنا كتبت عن الحكاية دى وكانت حكاية والله ما قريتيها بالله .. حقو تقريها عشان تأمنى ..
لك تحياتى واسعدنى قدومك وهترشتك الظريفة
حايقولوا على مطبلاتى للجكس لكن ولا همانى
| |
|
|
|
|
|
|
|
|
 Re: مرطبات أحوال الناس الجمبنـا (Re: shiry)
|
انا غايتو ما عارفه لكن الكشك بتاع الليمون حقو تسموهو " ليمون السعاده" يعني علي وزن مكوجي السعاده..
عارفه عارفه.. حسي تقولو البوست كلووو ما لقت فيو الا كشك الليمون ..
هي دي ماعوضيه.. عوضيييييه اقيفي... اها يخواني انا ماشه.. يا بت ما تقفي عامله راسك الذي الجيلون دا ...
| |
|
|
|
|
|
|
|
|
|
Re: مرطبات أحوال الناس الجمبنـا (Re: ShiningStar)
|
سلام مربع
لكل الناس الحلوة
اللي جاتنا هنا
اساسي
مهاجر
قرشو
انسانه
Modic
shiningStar
تفتكر انا برضو بسيبكم؟؟
ابدا وحاتكم
براكم جبتوهو لنفسكم
منو القال ليكم
قولوا انو هترشتي ليست هي نوع
من الـــبري والبري لحدي الاستيكه
ويا شاينغ استار انتي الليلة راجيك جنس بري
ارجي الراجيك
......
انتظرونـــا
ساعود اكثر هترشة
لا تغير المحطة
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
سلام مربع
اســــاسي
بـــري للمره الاولى
من يخبرنا نحن ان الاشياء في غالب الاوقات
تتخذ الوضع ذاته الذي تنشأ فيه
عقد التركيبات الاجتماعية
التي لم تلحق باي احد الاذي
تعرف ان هذا اليوم بالذات
وهو يوم الجمعة
موش برضو الليلة الجمعة
تنشا في العالب علاقة غريبة من الالفة
والحميمية فيما بيني وبين
سماع الاغاني
وقراءة بعض كتب الحظ
هل قرأت جريدة اليوم
قالوا لي فيها اخبار كثيرة
بس انا ما قريتها
ماعارفة فيهو شنو
لكن اعتقد لو انك فتحتها
سوف تطالع عنوانين بالبنط العريض
وكلها تتحدث عن تهديدات امريكا لصدام
وكلام من هنا ونتف من هناك عن
محاولات بعض قادة دولنا الاسلامية
للتدخل فض الاشتباك الكلام
هل ستقوم الحرب يا اساسي
بين العراق وامريكا
طيب نفرض انو صدام قام قل عقله وضرب
الاسطول الامريكي الموجود في قاعدة عيديد
هل تعتقد انو القاعدة ح تتكسر
والله ماعارفة لكن في بعض الاحيان يتخيل لي
كدة انو صدام ممكن يكسر ليك عساكر امريكا
ديل كلهم ويشتتهم ليك
ليه لا ؟
المانع شنو
ماهو برضو امريكا هزمت صدام قبل كده
يعني شنو البنمنع انو صدام يتغلب مرة تانية
عارف اصعب شي انك تقنع ناس عندهم حائط صد ومانع لكلامك الانت عايز تقنعهم به
مثلا مثلا حاولت منذ زمن بعيد ان لا ادخل مع اخي الصغير في اي نقاش فيما يختص بمين احسن
الارجنتين ولا هلال السودان
وكل ما احاول ان اتكلم في هذا الموضوع
اجد ان الموضوع غير منطقي بالمره
كأن مثلا تخير العروسة في يوم عرسها
ان لا ترتدي فستان الزفاف
انا نفسي اذا قدر لي الله ان اتزوج وما عارفة الكلام دا ح يحصل بتين
لان العرسان الذين رأوا انني (يعني) ربما اصلح للزواج
بعد اول تعامل رسمي يعقب خطبتهم الميمونة لي
يغيرون رايهم
واحد منهم قلت له رأي صراحة في (امه) التي تحاول ان تصغر روحها اكثر مني ومنه
وصبر علي يوم
ولم يكد اليوم الرابع يمر
الا واكتشفت انه يسمع كلام امه وقوال ولخباط وقام وصل الكلام
دا لاخته واخته لم تصدق خبر
اذ سرعان ما وصلت الخبر لامهما
وفي دقائق كنت اتلقى كرت احمر
وشطبت من سجلات اتحادهم
واصبحت بين غمضة عين وانتباهتها
دون خطيب
شفت
الى اي مدى اوصلتنا هذه الهترشة
اليوم الجمعة
وعلاقتي علاقة حميمية بي
اكل الجزر والخيار
هل تحب الجزر
انا احبه
لدرجة انني اتفاءل به
فاذا اردت ان انجح في امتحان
قربت كيس الجزر ونزلت ليك فيهو قرم وكرم كرم
سوف ادعني اشيل شوية نفس
واعود تانية
لحظات
واعود للبري للمرة الثانية
اسمع يا اساسي
انت صليت الجمعة
بالله الامام قال ليكم شنو في خطبته
؟؟
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
بمناسبة صلاة الجمعة
تعرفي الامام كان بتكلم عن الصلاة في الجامع وكدا لكن جا حتة كدا وقال ليهو كلام انا ما متاكد من صحته في ما معناه انه الزول لو اكل ثوم ما يجي الصلاة وامعني كلامه انه احسن ليهو ينوم في بيته لو اكل توم
تعرفي انا قعدت افكر قالوا التوم دا فيهو علاج لحاجات كتيرة جدا من الكرستول وكروسترولي نزل زُت وكمان للضغط ومشاكل الشراين واشياء اخري مفيدة يوجد ديليل بالجرس في ناصية الشارع طبعا فكرت في انه الثوم دا قصته شنو مع الاديان بني اسرائيل لمن اتخارجوا من مصر وربنا سبحانه وتعالي انزل ليهم المن والسلوي لكن بني يهود دقوا جرس وقالوا دايرين ما تنبت الارض من فومها وبصلها وعدسها شفتي الدناوة واستبدلوا الذي هو اعلي بالذي هو ادني يعني الثوم ادني وامروا ان يهبطوا مصر طبعا مصر ارضها بتنبت فيها الحاجات الوصفت بالادني دي والغريبة انا ماعارف لكن عيد الفصح برضو المصرين مشهورين يعني المصرين الاقباط مشهورين لاسع باكل الفسيخ ووكميات مهولة من الثوم
طبعا قعدت افكر انه لشنو الثوم دا بالرغم من فوائده الكبيرة علي الجسم الفوائد الطبية الموجودة الان لكن الاديان ما ادته وضعه فسيدنا محمد صلي الله عليه وسلم ما كان بياكل الثوم
والامام قال الزول لو اكل توم ما يدخل الجامع عديل كدا ويصلي في الجماعة يعني نجاسة هو ولا شنو لكن بيني وبينك اتزكرت فطور السودان يوم الجمعة اول شي سلطة اسود وسلطة روب ثومهم حي وكبدة فيها ثوم كدا بس نجيض وكسرة بملاح شرموط ابيض برضو ثومه يتحاوم في الكورية حقت الملاح وكان في ام فتفت كدا برضو تومها حي والزول يمشي الجامع صلاة الجمعة عادي فكرت يعني صلاتنا ديك كلها باطلة ولا شنو قلت امكن الامام دا مغالي شوية فالامر في نظري مكروه لكن الزول دا حرمه عديل كدا وقال لينا التوم دا مع الصلاة الا تشموه قدحة
وقال اكل الثوم وشارب السيجاير مفروض ما ياذوا المسلمين بروائحهم الزكية لانه في الامر اثم انا استغربت زول شرب سجارة فيها كره احتمال والفتوة بتاعة لا ضرر ولا ضرار والمعروف ان السيجاير يعمل عكس ما يعمله الثوم بالجسم فهو يزيد الكرسترول زت ويسد الشراين ويرفع الضغط ويصلح السراير سراير حديد ما عارف اتزكرت الحلبي البيصلح السراير البيكون راكب العجلة ويقول النداء اعلاه
ما موضوعنا الحلبي اسع بمناسبة الحلبي عندي فكرة اعمل بوست حق نداءات الباعة الصنايعية علي باب الله يا اسطي عطية في السودا زي صلح السراير وعناقريب ايوا الحبال يا
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
عاد يا شيري يا بتي .. الصلاه علي النبي .. نضامه نضمي .. لا حيله في امرك .. يا بت الشي رادي.. يا بت امشي ليك لي فكي يديك بخره ولا شي ..
بعدين تعالي لي جاي النحدسك .. يا بتي الطرطشه العليك شنو .. تمشي تقولي لي العريس امك بتتجوهل .. عاد يا بتي اتلومتي كان تموتي بي الكلام دا لحدوت ما يعرسك كدي و تلبسي الزفاف و ترقصي ليه كدي في الصبحيه " يا حبيب يلااااااكه بي محل يوم داكه... نسمع الموسيقه و نرقص الكنداكه انا و انتا ..." اها و كدي تتساتتي .. لكن يا بتي حسي ترا خشمك بقه ملح ملح .. الزمن دا الرجال عدمو ما زي زمان زمان كان التلاته بي ميه و الكيس هديه...
يخواني عوضيه مشت وووين ؟؟ حسي مش كانت واقفه هني ؟
| |
|
|
|
|
|
|
|
|
|
Re: مرطبات أحوال الناس الجمبنـا (Re: ShiningStar)
|
سلام مربع
مهاجر
اها ما كملت لي باقي الشمار ياخي .؟؟
انا منتظره اعرف عمل شنو زوج بت اختك .. اصلي بعشق الحكايات الزي كده ، عشان لمن يجي واحد تكون عندو مشكلة مزهجاهو اقوم ازيد احباطوا واحكيها ليهو لا وبل ازيد من عندي واضع شوية من الشمارات والبهارات ..
الا تري كم هو عالي عندي درجات الاحباط
انا بعرف واحد قريب ماما من بعيد يعني باللفة كده .. اشتروا ليهو فيزتو واللي هي (راعي اغنام) ب 6 الف ريال . وكان هو دكتور وباع عيادتو وجاء . وكفيله اصر انو يعمل عندو
اها
بس
قام الراجل البدو
يا امة تشتغل معانا ولا نسلمك الجوازات وخروج نهائي
قدم ، اخر ، بدل .. ابدا .. اصلوا مافي طريقة
شهر ، شهرين ،،، وفي الشهر الرابع
الدكتور .. فكر ، وقدر .. ثم عبث .. واخيرا
عاين ليك للبدو كويس واقشطوا ليك بنيه .. الراجل ودوهو الانعاش .. والدكتور قفلوهو ليك لمن (عمك) قام
اها .. وبعدين
ولا قبليها …. البدو صحى من (البيهو) لازم يدفعوا ليهو (بدل) دم ..
ودا يطلع كم ؟؟ شيل قدر ، نقص ، بدل ،، زيد
عشرين الف ريال … والا نسجن الدكتور ..
غايتو .. اهو
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
سلام مربع
للناس الحلوة
اللي مازالت
قاعدة هنا
العمدة قرشـــــــو
انا التي هي يوحشها كلامك العسل دا .
حقيقي والله محتاجة انو اسمع زيو .. لاني من (اهلي) ما بسمعوا ..
فهانذي اعطيك الحق في ان تقول الذي تقوله وسيبك من كلام الناس
لا بيقدم ولا بيأخر
كلام الناس .. ملامه
علي فكره دي الاغنيه وقامت براه ناطه ..
المهم ... لك الحق ان تقول العايز تقولو ..
شكرا كتير اوي اوي لطلتك
خطيبي ؟؟ جاتو نيله .. هو وين خطيبي ؟؟ ما خلاص طفـــش ..امه عملتها وطارت بيهو ..
يعني هسع في الزمن (المعفن) دا الواحد يلقى ليهو تاني وين خطيب ؟؟
تسلم يا قرشو للطله
وحنيت عليك .. كنت عايزه ابراك .. بس خليها للمره الجايه
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
سلام مربع
انسانه
والله يا انسانه ماعارفه لكن كلامك دا حلو شديد .. حقو تجي تقعدي معانا يوم كده .. لاني مرات كثيرة مابلقى الزول البتكلم معاهو ..
غير نصف شغالتنا السيرلانكيه الله لا يردها . من الصباح طفشت مع الجيران ، ابوهم معاهو (ربعه) وذابحين خروفين .. اتخيلي يا انسانه اربعة انفار يضبحوا ليهم خروفين ؟؟؟؟
خروفين يا مفترين .. ؟ والناس بموتوا من الجوع في الصومال وكينيا
خروفين ؟؟ قال ايه .. بنتهم قالت لي تعالي ساعدينا .. قلت ليها .. الله لا ردك انت وضيوف ابوك .. يا بت ايه الهبل والعبط دا ؟؟
يعني كل اثنين في خروف ؟ ليه .. عايزين ياكلوهو ولا عايزين يركبوا فيهو عشان يوصلهم ؟
يا بت ديل شوف عيني(مسوين) شوالة رز ؟ وحات الله تأكل سكان العاصمة المثلثة اذا خلطناها بي بعشرين رطل لبن بس ..
عايني ... افتكر كفاك بري
ايدي وجعتني ..
تسلمي يا انسانه على الطله الحلوة
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
سلام مربع
شاعرنا الرائع
Modic
القادم من رحم ارضنا
بقوة حشد التفصولة وايغال المعاناة
بــري للمره الرابعة
ليه بس الكلام دا ؟ انت ماعارف انو راسي بكبر وبالتالي تزيد معاناتي مع ايجاد شخص ما يتنازل ويقبل ان يجعلني شريكة حياته وانا بهذه الشناة
الا تري انه من المناسب لي ان اهجع في قوالبي .. حتى لا اضطر ان اتهاتف وراء العرسان ..
يا شيخ ؟؟ بلاش والنبي بلاش . اصلي بصدق ..
كلامك حلو مره ... وزادني تحفيزا وتحدي لان اقول هانذي قادمة بهترشتي انتظروني
شوف يا فنان .. لمن تحس انك عايز تتكلم مع زول وما فيش حد عايز يسمعك .. ارفع السماعة وأضرب اي رقم انشاء الله يطلع وزير الداخلية الفنزويلي وابدأ اتلكم معاهو . على فكره انت بتعرف تتكلم (فنزويلي) ؟؟
ما مشكلة انت اتكلم هو مجبور انو يجيب مترجم .. لانو الشمار ح يكون كاتلو .. بس انت ولا يهمك حتى ولو قفل السماعة في وشك . برضو حاول تاني انشاء الله يطلع فراش في مدرسة ابتدائية في زامبيا .. انت بتعرف (زامبي) ما مشكلة هو مضطر يسمعك لانو بفتكر انو انت (المدرس الجديد) بتاع اللغة الفرنسيه ومضطر ايضا ان ينتظرك تحدد ليهو (قطارك) الساعة كم ؟؟
هو كينيا فيها قطارها ؟؟؟ ياربي بتوصلوا كيف .
عارف احسن شي انك تسافر كينيا .. وتصطاد سمك السيلمون .. قال ليك سواحل المحيط الاطلسي فيها كمية من المطاط تساوي (كرتونة) مانجو سودانيه
هو انحن بنتكلم عن الانتخابات الاسرائلية ولا بورصة لندن ؟؟
عاين انا ماشة انوم .. تصبح علي خير
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
بـــري احتفالي بعودة
Shining Star
حبيبة البي
Shining Star
تعااليي هنا يا بت انتي
انت يا بت يامجنونه وين قعد تمشي ؟؟ عايني عايزه اسألك (قعد) دي معاناها شنو ؟؟ والله ماعارفة .. قت اسألك اصلك انت ليك مدة بدوري على (سنفجاتك) شالتهم عوضيه الغبيانه .. اها النسألك لقيتيهم ولا لسع ؟
بس كيف تلقيهم وعوضيه الغبيانه . قالوا ليك جاء الفكي (الانترنيت) وطلب منها انها تشتغل معاهو .. سكرتيره خاصة .. اتخيلي فكي اخر زمن ؟
قال الفكي دا يا بت امي . فكي نجيض نجاضة . .. دا جاتو واحدة قال ليك تشيل وتبكي وتترمد .. قال اليك الحياة دي مسخت عليها .. لا بتاكل ولا بتشرب اها انا جاياك في الحكي .. اها وداهو هنا وجابوها من هناك . .قال ليك والله يا (شاينغ) وما طالباني حليفة المرة لاخلو (الشيخ الطيب) في الجزيرة اسلانج (دي وين الجزيرة دي ؟) ولا الشيخ الطيب ولا الكدرو ولا ام حفرا عراض في نواحي الجزيرة قال ليك حتى (بارا) في الابيض مشوا ز.
اها انت يا (مراة الجن) ما بقيتي كويس .. بس قال ليك تشيل وتكورك.. والنار دي موقدة ليك فيها .. لا بتنوم ليل ولا نهار .. اها جاياك في الكلام ..
كدي يا بنيه عليك الله كان ما سقيتني من زيركم دا .. والله ريقي نشف ..
اها قال ليك (المرة ) .. تشيل وتنفض كدا . والنار الفيها دي تغلي الشاي .. الله يكرم السامعين
عليك الله يا بت كان ماسويتي لي شاي ؟ ولا اقول ليك ملحي لي فوق طريقة كسره ملاح اخضر .. كان عندكم والله جيعانه جنس جوعة .. كبدتي عايزة تنهرد .. نان هو مشوار نصاح .. ما كرعيني ديل ما اتكسرن بالمشوار دا . الله يلعنوا بتاع الركشة .. يا يومه بتاع الركشة ما كان داير يكسرنا .. والله الشافع المسنوح دا .. انا وعلوية بت حمد قدر ما وقفنا عشان نلقى لينا طريقة توصلنا للاسبتاليه عشان نزور المرة الشوم دي ما لقينا طريقة .. اها يجينا طاير الشافع ودا الحرام دا سايق الركشة الشي المتل الفره دي ..
اها يا ولد بتودينا الاسبتاليه بتاعة امدرمان بي كم ؟؟
قدر ما حنسانو انو يوصلنا بالالف ما رضي . وركبنا معاهو . اها بس اتقدم حدي طرف الشارع .. ويجي ليك بكس طاير طيران .. ويقول كده الولد .. يتفاداهو . اها بس .. ما نلقي الا وروحنا دي مشتتتين في الخور .. والناس اولاد الحلال جوه رفعوا منا الركشة . وعلوية بت حمد .. كان شفتوها .. خشمها دا مليان تراب وسفنجاتها داخلها لي هنا .. الخشم ما كبير يامه زي المطبقة .. والله بتاع الاتصالات الله يفتي عليهو .. مسك السفنجة من خشمه ويشيل وينتل فيها .. وهي ابت بالتكتلها تطلعها من خشمها .. الا غشوها .. جاء وليد اصيفر كده صاحبا لي بتاع الاتصالات . اها كورك ليك فيها .. انت يا مره . كراعك دي مشت وين ؟ اها من ماسمعت كراعك دي مشت وين . عاين ليك لي كراعها وفردرب قامت على حيلها وهاااك يا سكليب بي طول حسها .. الليلة ووووب علي الليلة ووووب عليي .. كراعي يا ناس ما اتقطعت
والسنفجات طاااااااخ وقعن من خشمها ..
يا بنيتي عليك الله كان ما شوفتي لي نصيص ليمونه انحلبو فوق ملاح الخضرة دي . مالها كده . زي التقول اتغير طعمها ..
......
شاينغ استار . والله واحشاني جدا .. وكثير جدا فتش ليك . .وسألت عنك طوب الارض .. بس ماعرفت ليك عنوان
سلمت يا بت امي للطلة .
وتسعدني هذه البهجة التي تسبق موكب قدومك
دوامي على السؤال عنا
لانك توحشينا
وبس حنيت عليك .. والا لكان هنالك مشروعا اخر للبري
سلمت يا حبيبه
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
المبدعة شيري
والله افكها فيكي لانوا وصلت
مرحلة قف في العمل
شيخنا ما حق السودان داك لا بتاع الخليج
قال سافر القاهرة النتن(دي من نتنياهو
قاعد اقولها لاي زول لما اكون زعلان منو اهو السعوديين اتعلموها مني
ورجع وعاملها كلها نوم ولم يمضي علي كشف الرواتب
بعد يرجع كشف الحال دا لنائب الشيخ عشان هو كمان يوقع
تقع فيهوا الطاوية حبالا يركة الله
وبعد داك برضو الشيخ يمضي الشيك
والنائب كذلك
دا بياخد كل شهر ثلاثة ايام حتي تكتمل العملية
التقول راتب الامين العام للامم المتخاذلة
يلا اهوا راتب .
اتم ليكي الشمار
جا زوج ابن اختي بعد 16 يوم لانوا وصل الصباح واخوك برضو بايت
يعني يوم زيادة من المعاناة
جاب معاهوا شوية عسل من جنوب المملكة
يعني عشان يلطف الجو والله ولا فطرتا شتات الي المكتب
بس المهم انوا جدد الاقامة سنتين يعني فيلم زي دا تاني قريب ما في
طبعا هي بترجع قريب السودان عشان بقية القطيع دخل الجامعة
وهي بتجي انعاش زي ما بيقولوا المغتربين
يعني اخوك راجيهوا باب شريف
والحراج
وشبرا والهرم
وشوية من سوق اليمامة
وسوق الكندرة دا طبعا اخوك بحبوا لانوا فيهوا جكس ابعاد
لكن الهيئة برضو بكثرة
ما تسمعوا الكلام دا يا شباب وتغزوا السوق
انا عارف الشباب خبرتهم في الاسواق الذكرتها اول لكن بتاع الكندرة فيهوا جنسيات تانية
المهم قمت عملت جوطة كبيرة في المكتب لانوا مدير شئون الموظفين وقف راتبي لاني ما نقلت كفالة
وصدقي المدير النتن دا سوداني
واهوا طبعا هما في رقبتي لانوا لازم اعمل ليهم مخالصات وكلاء واخوك شارب الفيلم براهوا عشان اوقات زي دي يكون عندك سلاح
لانوا الامة دي اذا دخلوا في مسالة تاخير الرواتب
مصيبة
يلا يا فردة سلام ممكن اقول ليك فردة وما في داعي
انا عندي صديقات ضيعتهم بالعبارات دي
وحاجات تانية
اها قلتي لي خطيبك فكا الشمار لاختوا والله دا انتن من نتنياهوا زاتوا
لكن كان تمسكي ليك كرت علي الولد
يعني خلي في برنامج غير مشابه لبرنامج اهلوا
بعد داك بخلي الدرب ساساقا ما هي كدي
وان قلتي ليهوا اي حاجة تاني في اهلوا يعمل ما سامع
الكرت الجايي ادينا خبر عشان نساعدك
ولو عاوزة تدخلينا الصف ما عندنا مانع لكن بشروط
| |
|
|
|
|
|
|
|
|
|
Re: مرطبات أحوال الناس الجمبنـا (Re: مهاجر)
|
سلام مربع
بري خفيف
لا خطيبي دا ..
قصتو طويلة
خليها على جنب
بس عايز اسألك اها
الكرت شنو
؟؟
وريني ليهو من هسع
لانو شايفه في واحد
في الطريق
الله يكضب الشينه
بس دا امه
فقريه اوي اوي
انا وهي شكلنا كده من هسع
الطريق ضيق ما ح يفوتنا نحن الاثنين
هو لازم يعني يكون في حموات وكده يعني؟؟
| |
|
|
|
|
|
|
|
|
|
Re: مرطبات أحوال الناس الجمبنـا (Re: كحلوش)
|
سلام مربع
كحلوش
أها كان شفت
بس
مافي دقيقة الا البواليص ديل
ما يدوك الدرب
....
.....
..
بس شربت كباية اللبن
وجرت سلك التلفون وشدت سلك
لبنت خالتها
..........
...
..
..
..
تصبح علي خير
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
الاخت شيري
سلام مستطيل
استطاله قامتك الممشوقه بتلك السمفونيه الدارجيه الرائعه التى
تعزفينا اروع من تشاوفسكى(موسيقار )وتتحفيننا بها
مع انى جديد ولكن جذبتنى لغتك الجريئه
التى تتكلمين بها وارجو ان تقبلينى من المستمعين لها
ولك كل الود
| |
|
|
|
|
|
|
|
|
|
Re: مرطبات أحوال الناس الجمبنـا (Re: مشتاق)
|
سلام مربع
مشــتاق
بتقول مشتاق مشتاق
اطربني قولك يا صديقي
موش انا برضو
انثى
؟؟
حاول ان لا تقول مثل ذلك
عارف ليه...
؟؟
لانو راسي بكبر
وبقوم اطلع في الوتر
وافكها فيكم
سلمت يا طيب للطله
والف مرحب بيك
صاحبا وليس ضيفا
لهترشتنا
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
سلام
ما في موووووود نهائي
لانوا المدعو الراتب تاخر ايضا اليوم
بالله عليكي جنس دا شفنا وين
غايتوا اديكي الكرت
مثال
زي انا امس قلت ليكي انا قابض علي الناس مخالصات بالاف الدولارات عشان كدة قاموا جابوا لي عقد عمل زي وشهم
غايتوا اعترضت علي نقاط فيهوا وقالوا لي اكتبهم عشان التعديل
يعني انتي لازم كرتك علي خطيبك القادم يكون اول حاجة تعمليها
تحلليهوا
تشوفي اول حاجة
الحاجة البتغيظوا شنو او بتخليهوا يتجوعل
تاني شوفي درجة حبوا لاموا كيف زي الكرت السابق
حاولي اديهوا احساس انو الواحد لو بقي ود اموا مابنفع في معاكي
علي خفيف ما تقيل يقوم يطفش
حاولي اديهوا احساس انوا نظام لبسو دا عاوز تغيير النوم المهم لخبطي حياتوا اللهي ممغنطة من اموا
بعيدين تخليهوا يقراء حاجات كدا تشطح بيهوا شوية ولا اقول انتي لسانك دا براهوا بيشطح بيهوا
عشان يقدر يعيش مع هترشاتك دي
نجي للحماة صدقي عندي اخوي حالف يعرس يتيمة بس ولا ما عايز
حماتك المستقبلية
اول حاجة
لازم تعرفي منو هي بتحب المرح ولا واحدة جادة
تاني حاجة اللبس بتحب تشوف خطيبة ولدها بياتوا صورة
واساليهوا هي بتحب شنو في الشاي القهوة والاكل كمان
وهل هي نقناقة يعني بتحب البري
واذا قلتي لي صعبة
اعملي الاتي
حاولي كلامك معاها يكون محدود جدا ما تكتري الكلام
عشان تحس انك غامضة شوية
بعدين ركزي علي عيوبها
وشوفي ثقافتها لحدي وين واوعي تشطحي ليها اكبر من امكانياتها
يعني عيشي معاها في الوزنة بتاعتها دا طبعا بعد تفريديها
واخر حاجة
دي وصية الجكس
خليهوا يتعلق بيكي
يعني يمشي منك يوصل يتصل عليكي
اربطيهوا بالمواضيع
انشاء عدد مجلة قديم خليهوا يفتش ليهوا اسبوع ودا زاتوا موضوع لمدة اسبوع
ما عايز اكتر بعدين تفك منناالوزنة نحنا برضو
وما نديكم اكتر تضيوعونا
| |
|
|
|
|
|
|
|
|
|
Re: مرطبات أحوال الناس الجمبنـا (Re: shiry)
|
شيري جد كلمة رائعة تنتقص منك قليلا
انا ما اصبر لحدي مااكمل باقي كلامك
بس عليك الله كان هفت ليك تضربي
مالو ما الا بت خالتك
انشاء الله اعملى مس كول و انا برد عليك
على فكرة صوت الديك دا انا بحبو عندي معاه ذكريات وارتباط نفسي
على فكرة بوستك دا ما خلاني ابتسم خلاني قربت ابكي لانو ..!أ اكيد انتي عارفة
| Quote: غنوه هابطه درجة اولى وغنوه هابطه درجة تانية |
| |
|
|
|
|
|
|
|
|
|
Re: مرطبات أحوال الناس الجمبنـا (Re: azza)
|
سلام مربع
مهاجر
بريك مادولي لكن
خليني اشيل نفسي منو
وارجع ابريك
خليك معانا
وما تغير المحطة ارجى الراجيك
الاستاذ حمزه سليمان
انا كمان
رابطة معجبي
حمــزه الفنان
عــزه
يخص علي انا
انشاء الله اتجازى
امسحيها لي في وشي
شوفتي اهوندا الحال
بتاع الناس هناك
موش بالله حاجة
خارج السيطرة
تسلم يا طيبه
يا اميره على المجاملةالرقيقة
وتسلم للطله
| |
|
|
|
|
|
|
| |
shiry
اساسي
مهاجر
قرشـــو
Modic
.. بضطر أحكيها لي نفسي و أقعد أضحــــــــــك .. و طبعا بحكيها بي صوت عالي 
مشتاق
HAMZA SULIMAN
OmDur
فيس بوك
تويتر
انستقرام
يوتيوب
بنتيريست