|
|
|
 Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
يا ود شاموق
لقد تشرفت أنا بمعرفتك. وأنا لا أجاملك. فقد عرفتك شجاعا وشاعرا رقيقا. وهذا يكفيني. فلك الود والمحبة، وأتمنى أن نلتقي في كل مواضع الجمال ومنها الوطن الحبيب ولا أطلب على الله محالا.
ولا أعيش بآمال اللقاء وحده فأنا أعيش الواقع وأحس جماله
وكما قال الشاعر
قد يكون الغيب حلوا
إنما الحاضر أحلى
أغدا ألقاك
==
الله هنا الله الآن
====
| |
 
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: HAMZA SULIMAN)
|
والله يا أستاذ حمزة
أنا طبعاً اول ما خشيت البورد دا
بتلفت مطير عويناتي زي البرلوم الجديد
في الجامعة، شفتا منظرو بيكون كيف
بس داك كان منظري
الأسماء قدامي كبار كبار
وما فارز ليك الناس
لميت فيك في بوست الدوبيت
-بالمناسبة الليلة فتحتو هو مالو وقف ؟-
حسيت اني لميت في زولاً قريب مني بالحيل
وبدت المجادعة وتمت، من اليوم داك
فعلاً حسيت أنو دا صاحبي السنير
امسك فيهو قوي
ومن اليوم داك عاضي فيك
مكنكش قوي، بالله ما تتخيل بفرح كيف
لم القى اسمك في الناس الأونلاين
ياسلام عليك يا حمزة يا رائع
فعلاً كان يوم سعيد يوم سجلتا في البورد دا.
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: Tumadir)
|
تماضر تماضر
فاكهة البورد
تتقزم القامات
أمام فنك يا رائعة
بتهيب والله لمن أقرى كلامك
جد بتخيل إني ياربي
حأقول كلام أحسن من
كلام صاحبتي دي كيف ؟
أخير أسكت
كل مرة أقول أرد
بعيد أقول أحسن أسكت
بحس اني انا بتعب
عشان أكتب حاجة أسميها
مجازاً قصيدة، في حين
تماضر كلامها العادي
أجمل من شعري الافتراضي
لحدي أمبارح
ما صدقتا عينيا
لمن قريت تعليقك
اتشجعتا
قلتا وكت بت جيرنا
جاتنا في حوشنا
ما في عوجة
بسم الله خليني أرد
بعدما ارسلتا الرد
حسيت بحالة التقزم
قدامك تاني
ما عارف ليه
لكن جد يا أستاذة تماضر
كنت ناقصاً قبل معرفتكم
واليوم أكتملت بكم
جد سعيد سعيد سعيد
بمعرفة رائعين مثلك
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
ليه يا ود شاموق عملت فينى كدة؟؟؟؟
جريت على اضافرينى لقيتم فيهم منكير،
وشى اتلفح كف من الخجلة،
انا بس بحاول
وبتعلم
كل يوم من كتاباتك وكتابات المبدعين التانيين فى البورد دة
العفو
وشكرا المابتكفى دى، هاك ليها اتساعد بيها لمن القى كلمات تسوى تقديرك لى دة
وخلينا نتعالى على الشعور دة ونعاين سوا لى قدام وللوطن ةالاخرين، امكن نقدر نطلع لى بر
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
..
.
والله يا ود شاموق
انت زول اصيل ورائع
بس اقول ليك بالجد ..انا شكلك دا ما غريب على
وزى ما قالت تماضر يا ريت ترفع رأسك شوية
عشان اتأكد انت بيطرى ولا صيدلانى
بعدين مالك يا اخوى متمحن كدا؟؟
ولا بتكتب ليك فى قصيدة ولا رميه دوبيت
بس احلف يمين انو اتلاقينا يمكن صدفة
ولا فى دفار ولا طريق الجامعة
بس ما تقول انا قدرك انا اصغر شوووووية
تحياتى
بلم فيك ان شاء الله
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: Tabaldina)
|
العزيز تبلدينا
قال صلى الله عليه وسلم
الأرواح جنود مجندة، ما تعارف منها إئتلف، وما تناكر منها اختلف
صدق الصادق الأمين
عادي والله ممكن نكون في حياتنا ما تلاقينا، لكن الاحساس بالألفة أحياناً يكون أقوى من أي شي، تشوف زول تقول والله الزول دا بعرفو شديييييد، تطلع في حياتك ما لا قيتو في أي حته، لكن أنا لا صيدلاني لا بطري.
وبعدين شنو قصة أصغر مني، شرطاً أنا الأصغر مني في البورد دا أصحابي ساري الليل وموديك بس، انا مولود 78، يعني الوكت داك يا تبلدينا احتمال تكون انتا قائد ليك مظاهرة ولا بتدفر في الكورة مع اولاد الحلة، لوووول.
لكن بس شكلي كدا بيديني عشرة سنين زيادة في عمري، أتذكر قبال 4 سنين مشيت الحج معا أمي، وكنا في حملة كلها من اخوننا المصريين، وضعتا من أمي في عرفة، قعدت تبكي والمصريات يهدن فيها ما تخافيش يا أستاذة سميرة قوزك علاء انشاء الله حيرقع دلوأتي، أمي خلت البكاء بقت تضحك، قالوا ليها مالك ؟ قال دا ولدي، المصريين يعجبوك، بدل ما يقولوا ليها شايفين شكلوا كبير، قالوا ليها : دا انتي والله شكلك صغيرة أوي كنا فاكرينو قوزك. شكيتكم لي الله يالمصريين.
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: dreams)
|
الاخ الحبيب ود شاموق
لك التحية والحب
اهلنا بقولوا القلوب شواهد
احساسنا ببعض حقا أصبح اخوى وترابط محبة لا فكاك منها الا مزيدا من الحب
ولانك نظيف وناصع بياض السريرة تحمل كل هذا الكم من محبيك فى قلبك الطاهر
والكل يحملك رمزا للطهر والنقاء والاصالة والمحبة وصدق الاخوة
فاليحفظك الله ياكريم الاصل
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
loooooool@ 78
شفيق يا رااااااااجل
عليك الله يا شاموق دى دقن 78 ولا النظارات ؟؟
فى ذمتك غيرتهم كم مره ؟؟
بس لكن المصريين ما ليهم حق مفترض يكونوا صريحين وكدا
على العموم انا مصّر انو اتقابلنا
بس بشرط تكون انت من مواليد الستينات
يعنى 66 ، 67 ، 68
لانى انا اصغر منك شووووووووية
تحياتى وربنا يديم الالفه والمودة
| |
|
|
|
|
|
|
|
|
 Re: يا ناس البورد، هل تشرفت بمعرفتكم قبل الآن ؟ (Re: alsara)
|
الرائع الفنان الاخ ود شاموق
اتريد ان تخجلنا بكلامتك الغاية الجمال والاحاسيس الاخوية
النادرة ام ماذا ,? وعلي فكره كلامي ده مامجامله تقول
عرفت لي الف سنه او اكثر ,اي دخلت قلوبنا دون تاشيرة دخول ولا يحزنون لانك تحمل جوازا اقوي من الجواز الامريكي والبريطاني وهو جواز الطيبة وروح اهلنا البسطاء وقيمهم , فلك مني التحايا والتقدير
دقنه البجاوي
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: degna)
|
دقنا دقنا دقنا دبايوا
ياخوي
ما بالغتا في حقنا ياخي
ليه بس بتعمل كدا ؟
والله حرام يا ناس
خشيت البروفايل بتاعك
كايس إيميلك ما لقيتو
قلتا ارسل ليك بالمسنجر
خفتك ما تكون قاعد تخش
وينك غايب ومجافينا
ما تنقطع ياخي
والله يا دقنه أنا زاتي
استغربتا لمن جيت هنا
لأني شرطتا جواز سفري برا
وخشيت بلا جواز سفر
لقيت الحدود مفتوحة
والقلوب عمرانة بالخير
ما محتاجين جواز سفر
تسلم يا رائع
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: Elkhawad)
|
العزيز
ودشاموق
كل يوم يمر على هذا المنبر
واحساس الاسرة يتجذر فينا اكثر
لهفتنا على شرنوبي
ودعمنا لعبدالرحمن عبدالله
هي البدايات
وفي بداية رمضان اخواتنا قامن بعمل وصف لوجبات لزملائهن العزاب
فنحن نحس ببعضنا البعض
وكلامك لامس شغاف القلب فدلف الجميع لبوستك لرد التحية بمثلها
فاهنا اخي برفقتهم فنعم الاخوة هم
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: 3asoola)
|
عسولة يا غالية
يكفي الصمت أحياناً ليكون أجمل الردود
أحياناً انا بصمت لمن أشوف كلام زي كلامك دا
لكن المرة دي رديت عشان أقول ليكي
لو أنا صمتا وسكتا كان أخير لي
لأنو ما قادر أرد عليكي، بس أقول ليكي شنو
ولا أرد كيفن بي ياتو حروف ؟
كلها 28 حرف ما ظنيتا تكفي
محتاج لي 1000 حرف أقل حاجة عشان
أقدر أعبر ليكي عن سعادتي بيكي
تسلمي
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: alsara)
|
الساره يا غالية
والله ما قدر دا
جد يعني فتحتا البوست دا
بعدما رجعتا من الدوام
دموعي جرت من قراية الردود
ليه يا ناس قدر دا
أنا لا أسوى هذه الزمن
الذي اضعتموه في الرد
تسلمي يا السارة
بالمناسبة عندي خالتي بريدها شديد
اسمها السارة، لكن ما تخافي يعني ما كبرتك
لأنو خالتي دي أصغر من بي سنتين
وكانت برلومتي في الجامعة لووووول
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: Modic)
|
يا محمد كيفك ياخي
جاء وفد من الصحابة الى خليفة المسلمين لحاجة لهم
وكان معهم على ما أظن عبد الله بن عباس
الذي كان صغير السن يعني Teenager كدا
فقال الخليفة من هذا الذي قدمتموه على كباركم
فرد احدهم قائلاً : هذا فتى الكهول ذو قلب عقول
ولسان سئول
تحياتي لك أخي محمد Modic
وتسلم يا خي على باقة الزهور هذه التي اهديتها لي
لأن كل كلمة من كلماتك أراها الآن أمامي كزهرة يانعة
جميلة لها وقعها على القلوب قبل العيون
لك الود يا رائع
وشد حيلك امتحانات قربت ما تجيبا
ضقلها يكركب
| |
|
|
|
|
|
|
|
|
 يا ود شاموق (Re: ود شاموق)
|
يا ود شاموق
كل الناس قرايب
كل الناس اهل والما هم قرايب
قربهم العمل
فالبورد اصبح بيت للجميع وكل الاعضاء اهل البيت
والبيت بشيل مليون لو النفوس اطايبت
ما بين زمن متمنيهوا وزمن ذادنى منك اسية
| |
|
|
|
|
|
|
|
|
|
Re: يا ود شاموق (Re: كيمو)
|
كيمو صاحبي
كيفنك ياخي ؟
والله مشتاقين
وينك كدا ماظاهر
ولا أنا الما ظاهر ياربي ؟
دا ارذل العمر ياخوي
بقت الذاكرة تعبانة شديد
والله فرحان بيك وبي طلتك البهية
وتسلم يا رائع
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
تسمح لي؟؟؟
كلماتك جميله وبسيطه وما عارفه احسدك علها واللا احسدها عليك
ببساطه انت عبرت عن كل ما يحمله ناس البورد من مشاعر طيبه لبعض امكن ما عندي الكتير اللي اديهو للناس هنا او اشارك بيهو لاني زوله على قدر حالها لا انا شاعره ولا اديبه ولا حتي اتخرجت لسه لكن انا جد سعيده بتواجدي وسط الاسره الكبيره الدافئه دي
هنا بدفن احزان يومي ومشاكلي وبسعد للحظات بالشعور بالانتماء
لك كل حبي
حنين
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
العزيز ود شاموق
التحية ليك يا حبيب
بس أنا من زمان بسال نفسي ود شاموق ده شفته وين ؟؟؟
لكن يادوب لقيت الاجابة
دحين ياود شاموق يا اخوي إت ما كت ألفتنا في مدرسة
وادي سيدنا الثانوية سنة 51 ؟؟؟؟
لووووووووووووول
والله أنا بس بحب أمزح معاك
لكن حقيقي الواحد بيحس انو الناس الرائعين مثلك ديل بيعرفهم من
زمان
ولك مني أجمل تحية يارائع
الجعلي
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: وضاح)
|
يا ود شاموق
بس اعمل معاك شكلة وبعدين قول لي شفتني وين بتقول شفتني عشرة عشرة
لووووووووووووووووول
تسلم يا غالي والله الاحساس دا حقيقة لما كان اول لقاء لرابطة جدة دخلنا في الموضوع طوالي كاننا بنتعارف لينا دهور
وكان ان سهل لنا الحديث كثيرا هذا التلاقي الاثيري
وكان من التقيتهم منذ لحظات تعرفهم منذ دهور كما قالت دريمز
الحقيقة يا ود شاموق مشبهك علي واحد بس لو رفعت راسك شوية زي ما قالوا ليك
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: اساسي)
|
سلامات
ودشاموق
مابعرفك
وماعاوز اعرفك
لان الدمع الذي انزفه الان يؤزيني يؤلمني ويشجيني انت وكل بوردابي تدب في اوصاله روح البلد وريحة الدعاش مع طلت شمس الصباح
ماعايز اعرفكم
الفاضل من دموع والله العظيم عاوز اكشحو فوق تراب بلدي وانتو هنااااااااااك قاعدين متوسدين كل وريد فيني وكل نقطة دم تزح وترح من خلية لي قلب تزرع فيني الحياة وانا بموت مليون مرة
اول موتا للبلد وتانية للمساكين الهناك والاخيرة للبلد والقبلها للمساكين الهناك
وكلهن للمساكين الهناك
انا بحبكم ياخيييييي بحبكم بحبكم
والله يعلم مافي البواطن والظهور
......
واقف براك والهم عصف
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ودرملية)
|
ود رملية
والله ذرفت الدموع
آلاف المرات وانا
أقرأ ردودكم في هذا البوست
حقيقة العواطف الجياشة
المكبوتة في دواخلنا
هي عزاؤنا الوحيد
بعد أن قتلت الغربة
كل جميل في حياتنا
وما أندر الفرص التي تظهر
فيها هذه العواطف
الى الوجود في شكل
دموع وأشجان
فدعها تخرج
فكلنا قد فعلنا
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: اساسي)
|
يا سلام عليك يا أساسي
الله لا جاب شكل ولا زعل
انشاء الله نلاقيكم في اللقاء الجايي
العيد الجايي عندكم لمة زي الفاتت ؟
بجيكم والله
بالنسبة للصورة
انشاء الله النية
موجودة، بس لو
لقيت لي سبب واحد
يخليني ما اتمحن
طوالي تاني يوم
الصورة بتتعدل
الله يعدل المايلة
الصورة هينة
آآآآآآمين
تسلم يا غالي
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: Elmosley)
|
عزيزى ود شاموق
نعم نعرفك..ونعرف حتى آخر من سجل هنا..
...
فهنالك صلات تنو وتنمو ...ولا ندرى كنه أسرارها ..هل هى صلات الروح أم الكيمياء ...أم التمام وتحلق حول غمامات واقعنا فى هذا المتسع الشتاتى؟
انها فقط صلات تنمو ولن نسأل كيف تكونت...
تحياتى
ودعزة
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: ود شاموق)
|
اخى وعزيزى ود شاموق
لك التحية وعارف احساسك دا هو
الحملنى لاتعرف بيك
وتسلم ياغالى وزى ماقال دريم اغرب
حاجة انو الواحد يتعرف على واحد من خلال
البورد ولما يشوفوه لاول مرة يسلم عليهو كأنه بيعرفو من
زمن بعيد . والله الحقيقة كل الاخوة فى البورد رائعين لهم
ولك اخى ود شاموق التحية وخالص الاحترام
بدرى
ـــــــــــــــــــــــــ
أنا بلدى بلد الخير والطيبة
| |
|
|
|
|
|
|
|
|
|
Re: يا ناس البورد، هل تشرفت بمعرفتكم قبل الآن ؟ (Re: الجندرية)
|
العزيزة الجندرية
أعتز بمعرفتك وصداقتك لأنها كانت من أوائل الصداقات لي هنا، ورغم انه لا فرق بين الصداقات الأولى والأخيرة من حيث المودة والمحبة، إلا أن الصداقات الأولى دائماً ما تكون مميزة.
اما قصة خالتي دي فقصة جميلة، لكني لن أدعوك إلا أختي الجندرية، لأنك أقرب إلى أن تكوني أختي الكبرى من أن تكوني خالتي.
لك كل الود والمحبة
| |
|
|
|
|
|
|
| |
ود شاموق
almulaomar
Yasir Elsharif
بكرى ابوبكر
HAMZA SULIMAN
Tumadir
يازولyazoalيازول
عزيز
Modic
degna
garjah
3asoola
...
ابو تميم
bit barber
مشتاق
وضاح
اساسي
ودرملية
Elmosley
Badri
waleed500
الجندرية
منعمشوف
فيس بوك
تويتر
انستقرام
يوتيوب
بنتيريست