|
|
 الجزم العندى شيلها شيلها .... وحتى الشرابات القديمه شيلها شيلها شيلا
|
خلال ارتباطاتنا العاطفيه فى مختلف مشاوير العمر نتهادى ونكتب خطابات لمن نحب وتختلف الصيغ والتعابير من مرحله لمرحله وربما بعضنا يمتلا دولابه بالتزكارات الرسائل والاشياء الصغيره التى تزكرنا بايام ولحظات معينه ... كل تلك الاشياء الجميله وعند انتهاء او تعثر او فشل العلاقه لاسباب مختلفه تظل محل مشادده بين البعض
حيث يرى البعض ان من حقه الاحتفاظ بكل الرسائل والصور لانها توثق مرحله معينه من حياته ودوما تزكره بالايام التى مضت وبمجرد ما اهديت له صارت من ممتلكاته الشخصيه .. وانا شخصيا اساند هذه الفئه
ودوما احتفظ بمراحل حياتى بغض النظر عن طريقة انتهاء العلاقه
وتاريخها ..0
البعض الاخر يرى ان من حقه بعد انتهاء العلاقه ان يسترد كل خطاباته وصوره وهكذا ... ولديهم مبررات مختلفه .. لانها ربما تمثل مرحله يريد القضاء عليها ...0
وزى ماقال محجوب شريف
هدايانا الصغيره صغيره .. للتزكار
خوفى عليها من طول الزمن والنار
وخوفى على ... اه من وحشة المشوار
*****
اى رأى تناصرون احبتى .... واى فئة هى الصحيحه فى نظركم
وما هو رد فعلكم فى الحالات المماثله
( مع الاعتزار للاغنيه فى العنوان )
ديكو
|
|
 
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
ديك الجن
يخيل لى ان هذا السلوك ينجم عن عدم التكافؤ فى الأساس من البداية بين طرفين...واختلال مقاييس الأخذ والعطاء...فالذى يطالب الآخر باسترداد ماسبق وأن قدمه له هدية أو تذكار...يعنى أن هذا المطالب قد جعل لهذه الهدية مصلحة ما....وعندما لم تتحقق طلب باستعادتها..ده يمكن تفسير نفسى سلوكى منطقى
مجرد التفكير لدى انتهاء علاقة أو تأزمها..أو شوكشتها...فى ما مضى من هدايا وتذكارات ...يجعل التمنى مشروعا فى أن ليت هذه العلاقة لم تتم منذ البداية
تحياتى
ودعزة
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: wadazza)
|
ديكو
صباحك خير
تفتكر طلب استرداد الاشياء الصغيرة بكون رمز لى (رجع لى احساسى) ..يمكن ده السبب
انا شخصيا من انصار الفئة الاولى ..لانه الاشياء دى مهما صغر حجمها حتى لو كانت مجرد كلمات ..فهى كانت وسيلة تعبير عن احساس ..والاحساس لا يمكن استرداده
خليه يحتفظ بيها ..بس اكيد معناها بكون مختلف
وفى النهاية بكون الرضى عن النفس وعدم الندم هو البعمق عدم الرغبة فى ارجاعها
ولا شنو
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: عزيز)
|
الأحاسيس لاتأكلها النيران
تظل كما هي
عالقة بأذهاننا
نرجع اليه في وقت الجوع والحر والمطر
انها كلمات تعيدنا الى مرحلة معينة من الحياة
ربما كنا فيها أكثر مشاكسة وطفوة وبراءة
اذن لماذا نقتطع هذا الجزء الرائع من الحياة
بيني وبينك ياديك الجن شكلك كدا سوف تحضن الرسائل القديمة حتى تفقس
أما أنا فلن أحرق هذه الأحاسيس والذكريات
بل سأشتري لي صندوقاً بحجم كونتنر لأدفنه في الأرض وأدفن معه بقايا ذكرياتي
هذا كله سيتم يا أخي قبل الزواج بأسبوع
لكنني لا أخفيك سراً سأجعل لي سرادقاً أذهب عن طريقه واتلمس مخبأ صندوقي وأتلصص عليه بين الفينة والأخرى
لكن
كيف ياترى عندما تجد نفس هذه الأحاسيس عند زوجتك
هل ستتقبل ذلك
أم أن الحكاية خاصة بالديوك بس ؟؟؟
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: ابوحراز)
|
ده البجنن بوبى زاتووووووو يا ابو حراز
اتخيل جيت لقيتها ماسكه ليها صوره وقالت ليك دى كانت
فى الاربعينات سنة تلاته وخمسين فى يوم واحد واحد شهر تمانيه؟
شفتها حافظه التاريخ كيف؟
اها شعورك ح يكون شنو؟
والله اتخيل لى حتى لو كان صاحب الصوره ميت من سنين
برضو اليوم داك حترجع بيت امك مكن الزعل
لوووووول
قال سرداب قال
انت الا تسردب بالماضى بس يا حبيب
ديكو
| |
|
|
|
|
|
|
|
|
 Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
والله يا أبو الديوك المسألة بتعتمد على طبيعة العلاقة يعني بيقولو إنما الأعمال بالنيات ففي ناس بتكون علاقتها علاقة نفس قصير وخاصة من جانب الرجال يعني ما في النية ينهوا الموضوع بالعرس عشان كده لمن تحصل الهدايا والصورة الخايفين عليها ممكن بعد أن تتفركش العلاقة وينفض الموضوع تصبح ورقة ضغط وتهديد على البنية السكرية خاصة إذا كان الطرف الثاني واللي هو الرجل إنسان سطحي أو مريض نفسياً أو غير سوى. ومستوى التفكير البتفكر بيهو يا ديكنا هو مستوى رائع وراقي جداً لكين ما كل الناس زي بعض يعني إنت ممكن تأخذ شاكوش حاااار وبعدين تسردب وتحتفظ بالصور وما تعملها ورقة ضغط وتهويش لأنو دي أساليب الجبناء وإنت أكبر من هذه التفاهات.
وطبعاً الموضوع يعني الرجل بالدرجة الأولى لأن بت حواء ليس في حاجة إلى تهديد الرجل وزي ما قلت في مقال سابق هي البتدينا الشاكوش عشان كده لو كانت عاوزه تحتفظ بالعلاقة ما كان فضتها من أصلها. على العموم الصلح خير وأحسن حاجة كل واحد يرجع للتاني الحاجات الممكن يكون فيها إدانه واضحه يعني الصور والخطابات النارية التي عادة ما تكتب على أوراق مزركشة وفي بعض الأوراق يا أبو الديوك فيها ريحه. لكين إذا الجكساية أهدتك طقم أقلام أو ساعه أو نظارة شمسية أو قمرية أو علاقة مفاتيح أو تي شيرت أو بلو جينز أحمر ففي هذه الحالة أنت لست في حاجة إلى أرجاع الهدية لها حيث أن الهدية لا تنفعها بشئ لو رجعتها ليها ولو أصرت إلا تمشوا الإثنين مع بعض وتحرقوها في الكوشة عديل كده. وكان تعب منك جناح شغل الجناح التاني يا ديك الجن.
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
تصدقو ياناس انا اصلو ماكتبت خطاب لي حبيبة ولا اديت صورة لي زولة قبل كده لكن حبيت حب مباشر يعني على الهواء وكده اها كنت بقول انا مابعرف اكتب جوابات وكده وحبيبتي الخامسة مرة رسلت لي جواب كاتباهو بالقلبة قالت اكتب ليك بالمقلوب عشان تفهم لغة القلوب هههههههههههههههههههههههه يكه طبعا طول اليوم بحاول اقرا في الخطاب وفي النهاية قريتو
لكن الحمد لله حبيبتي الخامسة عشر والقبل الاخيرة مابتعرف تكتب لا جوابات ولا ايميلات لكن تصدقو انا رسلت صورتي بعد ماكبرته ههههههه يكه طبعا عبر الماسنجر وكده يكون ده شنو ياربي
ياديكو ياخي خلي كل حاجه زي ماهي ماترجع خطابات ولا تحرق الصور لحدي ماتجي ست البيت بتاعتك وح تطفشهم ليك هههههههه يكه
زاتوووووو
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: ALZOLZATOO)
|
ديكو الحبيب
اولا كلها املاك خاصة بك
و صدقنى سوف يجى يوم وستعرف تفسير لهذة العلاقة ماذا كانت تعنى
و ما الفرق بينها و مافية الان يعنى فى اليوم داك
وقد تكون تاريخ جميل لا من اجل تلك العلاقة و لكنة يؤرخ لفترة زمنية معينة من مراحل الحياة
و بعدين انا لى حسع عندى منديل مطرز بى احمر و فية قلب قادية سهم مرسوم بالحرير الاحمر
و فوقة حرفين
اها دا اشنو
و بعدين ابو لسان دا حبيبتى الخمستاشر و العشرين
هو الحب دا عرفو وين مافى البورد دا
لكم ودى
| |
|
|
|
|
|
|
|
|
 Re: الجزم العندى شيلها شيلها .... وحتى الشرابات القديمه شيلها شيلها شيلا (Re: BAKASH)
|
سلامات ديكو كلو تمام انشاءالله؟؟؟ اما عن موضوعك فانا من رايىانوالحاجات دى بتمثل جزء من حياة الانسان عشان كده الاحتفاظ بيها بكون شى جميل سواء كانت زكريات جميله او غير ذلك.... اذا كانت زكريات جميله الواحد برجع ليها مره مره كدا امااذا كانت غير كدا.. مالوالواحد برضو لما تمر عليهو لحظات حلوه بيحس بالفرق ويحمد ربو علىالنعمه دى.... ولا ماكده ؟؟؟
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
سلام ديكو
الحكايه من ما يكون فيها مبدا الرجيع دى ما نافعه من اولا حسب رأى والله ..
الحاجه التانيه طالما بقى فيها رجيع انا بتوقع انو الداير يحتفظ بى زكرياته ده .لو كان هو حريص ما كا فرط فيها من الاول مش كده ؟ تانى هى بقى فيها ادينى حقى واديك حقك معناها وصلت اللآآآآآآآآآآآآآآآآخر .. احسن بالتراضى ترجع ..لانه ممكن تسبب مشكله للطرفين مستقبلا بى صوره مباشره ولا غير مباشره .. يعنى فى نوعيه بتهدد بيها بينى وبينك لوول وده اضعف الاساليب .. الشى التانى اها معظمنا انا بقول الغالبيه السودانيه والشرقيه عموما وبالزات بنات جنسى ما بيؤمنن بالماضى على الاطلاق .. حتى لو الماضى ده كان قبال ما يلدوها هى زاتها ..لووول والله جد .. عشان كده اخير يا ديكو اخوى الرجيع بى اخوى واخوك .. ولا من الاول تكون مطايبه ساااى من بعيد لى بعيد ما فى داعى للبوح فى الورق لووول .. عشان الزكريات تكون محفوظه فى الهواء بس هواء الله ده سااى ..لا من شاف ولا من درى .لوول تحياتى وشكرا على البوست الظريف ده
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
الاخ ديكو وباقي الاخوان الاعزاء
ادخل في الموضوع طوالي انا بشوف لو ما طلبها منك صاحبها انك تتخلص منها لسسب بسيط ما ممكن تحتفظ بذكري من انسان وانت الان مع انسان تاني لو لقيت زوجتي معاها منديل من حبيب قديم او زوج سابق ح اقول طوالي انها لسه بتحبه ومتمسكه بيهو بدليل احتفاظها بالاشياء دي او بذكري ليهو في دواخلها وبعد داك شوف الكلام او هي لقت عندي رسالة قديمة من خطيبة وقرتها وعرفت كميه العاطفة الفيها
وايه الدنيا غير لمة ناس في خير او ساعة حزن
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
ديك الجن..
باديء ذي بدء..
العلاقات الإنسانية غاية في الشائكية
بمختلف الوانها وتلون تضاريسها
فما بالك بطقوس الوداع ..
وسيمفونيات الرحيل!!!!!
وملاحم فض الإشتباكات اللتي هي غاية في الدقة ..
………..
جزئية ..
المبادلات للهدايا ..والتذكارات..
والأهم ..من كل ذلك مداد القلم..
شيء من انفعالات الروح ..وألق اللحظة..
تظل تؤرخ لزمن مضى..بكل ما فيه
رؤى الإبقاء على هذه الذكريات..
تختلف من شخص لآخر
من ظروف علاقة لأخرى..
وفي مجتمعاتنا ..
من ذكر لأنثى..
…..
عني..
أنا مع الإحتفاظ بكل المتعلقات…
..لأسباب بعيدة عن النرجسية والإغراق في اللذي مضى..
فالتاريخ في قراءاته المتأنية نافذة واضحة على القادم..
كما أن الرسائل..
في بعضٍ منها ذات قيمة أدبية عالية الجودة..
ليس من السهل التفريط فيها..
أنا مع الذاكرة الكاملة..
ولا أتصالح بسهولة مع الذاكرة المبتورة..
بفعل عامل النسيان أو التناسي المباح لدى الكثيرين…
التحية لقلمك..
حين يتسلل ..في وضح النهار ..
ليبعثرنا بشكل صريح..
..
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
سلامات
يـ أروع ــا ديك
كلامك صاح يا زول لانو انا من رأي انو الحاجات دي ما بترجع .. وكان رجعتها والله تتورط ورطة.. اسأل الناس المجربين لانو الواحد في الغربة دي بحتاج ليهو لي أي محطة قديمة في حياتو يتسكع فيها آخر الليل أو أي خربشة حنينة تصحي أشواقو القديمة وتعيد ترتيبو ( طبعا الجماعة المتزوجين ) في العرض ده برضو لكن تحت .. تحت.
ممكن تتذكر تسميع جدول 7 أو الحصة الصباحية أو لستة المهرجلين او حتي يوم السبت الصباح .. وكان بقيت حريف ممكن
| |
|
|
|
|
|
|
|
|
 Re: الجزم العندى شيلها شيلها .... وحتى الشرابات القديمه شيلها شيلها شيلا (Re: DEEK_ALJIN)
|
سلامات
يـ أروع ــا ديك
كلامك صاح يا زول لانو انا من رأي انو الحاجات دي ما بترجع .. وكان رجعتها والله تتورط ورطة.. اسأل الناس المجربين لانو الواحد في الغربة دي بحتاج ليهو لي أي محطة قديمة في حياتو يتسكع فيها آخر الليل أو أي خربشة حنينة تصحي أشواقو القديمة وتعيد ترتيبو ( طبعا الجماعة المتزوجين ) في العرض ده برضو لكن تحت .. تحت.
ممكن تتذكر تسميع جدول 7 أو الحصة الصباحية أو لستة المهرجلين او حتي يوم السبت الصباح .. وكان بقيت حريف ممكن تسمع صوت أستاذ عباس أو تشوف عمي النور بقطع في سيطان شجر الحنة .. ( الله يسامحك يا عمي النور) .
انا طبعا عملته ليك الود مجنون وأول ما الشغلانة فركشت ـ جاتني وكالعادة مطالبة بي كل حقوقه كزولة أتحبت وشوكشتنا الظروف ومن حقها تحفظ حقوقة أو تخلق أي نوع من الفوضي حواليني .. المهم تعمل ليك أزمة وقتية تقدر هي تتجاوز بيها الفترة الحاليةطبعا بمسكوك من يدك البتوجعك وبجردوك حتي من شرابتك زي ما قلته .. وطبعا بالجعلنه الجواي رجعته ليها حاجاته حار.. حار وتم التسليم والتسلم وطبعا بواسطة قوي خارجية كانت في الماضي قوات صديقة وأتحالفو علي هي وصاحباته والله حلف شمال الآطلسي بس .. وحيات خوتك ( فلل ) علب البيبسي ما خلوها لي .. سافرته خليت ليها مليون ميل مربع قلت ليها انا الشقاوة بعرفه ومولود ليها وصنديد كمان وبتجلد بطني وضهري .. وانتي شوفي ليك زول يحبك غيري كان تلقي ..
لكن تعال شوف ليك الجرسة بعد أسبوع بس من ما جيت هنا ـ كلماأشوف لي طيارة في السماء كنته قاعد أطير معاها .. وكلما أشوف لي استديو بدخل أفتش ليك صورو .. شبه ساكت ما لاقاني ليها .
لكن انا نظامي كان مختلف يعني حمتي كانت خفيفة صور بس لاني كنته بكتب ليها في الحيطة الحيطة القصاد بيتم طوالي .. وما اجمل احتمال حيط السودان تعابيرنا الخفيه.. .. الحيطة القصاد بيتم دي جننتها جن برنامج اليوم كلو كانت بتلقاهو مكتوب وعندنا طبعا مصطلحاتنا الخاصة بينا البنعرفه ـ ولما يكون بيناتنا مشكلة بلقي الكلام ممسوح بي فعل فاعل ( يعني ما دايرة معاك ) تاني يوم بكتب في سطر وبفط سطر او في مدماك .. وافط مدماك .. طبعا حيرت ليك نسوان الحلة ذاتو.. والغريبة انو الكلب بتاعم كان بيحترم فكرتي وبالتالي حيطتي ما بيعمل فيها حاجة ما لزيزة.. رغم أختلافو معاي ( الكلب ) .
تعرف .. بعد فترة وبعدما قدرته اتعود علي المسالة بتاعة الغربة دي وقلبي أتحول تلقائيا لي الجنبة اليمين .. رسلت لي رسالة فيها سطور بالعددوكان أجمل كلام عرفت تقولوا من الوقت داك كلو ( انا دايرة أشتغل طلبه)
) ..ريحتني ليك راحة السنين .. وده طبعا معناتو( أسجني في جواك وشدد حراسة علي )
بالمناسبة أوعة تكون ديك رومي لانو انا عندي حساسية مع الأحجام الكبيرة..
آخر الكلام إذا أصرت علي حاجاته خليها تعمل ليك صورة منها وكمان كان في حاجات ما بتتصور ، خندق بيها وأعمل
نائم وأعمل ليك سحارة كبيرة جدا ولازم تكون بي طبلتين ( وبنقز) المهم ماتتورط ..
وبيني وبينك رجع لي حاجاتي دي خلوها زمان .. بقت حنك بيش حسي بقوا كان ما دايرنك بيعملوا ليك(BlOCK)في الماسينجر
أو (DELETE) من القائمة
يعني بشلتوك عادي جدا .. يعني الآ تكون محترف هكرز علشان تقدر تحتفظ بالعندك عندك .. والعندها عندها .. والبادي أظلم ..
| |
|
|
|
|
|
|
|
|
|
Re: الجزم العندى شيلها شيلها .... وحتى الشرابات القديمه شيلها شيلها شيلا (Re: tmbis)
|
tmpis
تمبس ...سلامات
دعنى اولا ارحب بك فى بيننا ان فاتنى ذلك قبلا
يدهشنى سردك .. وياخذنى فى عوالم الحقيقه وشريط الزكريات
فلم توثيقى لمرحلة جميله من حياتنا ... ان لم تكن قاص فعلا فانت قاص لا شك وكاتب لايشق له غبار ... ماسطرته يضاهى اروع القطع الادبيه
ومايعطيه رونقه الطبيعيه والسهوله فى السرد وتوصيل المعلومه
اضحكتنى جدا علاقتك الشائكه مع كلب ناس حبيبتكم واحترامه لرسالتك مع الاختلاف فى الود تضامنا مع اهل الدار ... وظننت لوهلة اننى مررت بتلك الحيطه ... وقرأت فيها لوحات وجدك ... وهيامك
عزيزى
انت حلو ... ولذيذ كمان
ولك التحايا .. وقبلات الصبايا ... ولهفتى لمعرفتك
ديكو
| |
|
|
|
|
|
|
|
|
 Re: الجزم العندى شيلها شيلها .... وحتى الشرابات القديمه شيلها شيلها شيلا (Re: garjah)
|
ديك الجن .. لك كل الود والتحايا
لكن بأمانه شديده قلبت علي المواجع وذكرتني لمن زوجتي وجدت صورة حبيبتي القديمه في احدي دفاتري التي أكلها الدهر وكانت ليله تعيسه جدا قعدت انظر فيها تنظير تقيل جدا واشيل واعتزر ولا حياة لمن تنادي، الغريبه انا كنت متأكد انو كل حاجات الحبيبه القديمه رجعتها ليها بس دي فلتت كيف ده الما عارفو والله لا وراكم مثل ليلتي الكالحه
ودمت
ابونور
| |
|
|
|
|
|
|
| |
BousH
لا هذا ولا ذاك ..... انت شايلو من البداية ليه .... حسي الشلاقة لزومو شنو .... عندكم فرن 
wadazza
garjah
عزيز
ابوحراز
almulaomar
7abib_alkul
ALZOLZATOO
abo ahmed
BAKASH
Tumadir
3asoola
brakat
نور الهدى
tmbis
وجن
فيس بوك
تويتر
انستقرام
يوتيوب
بنتيريست