|
|
 سيطرة النساء...على الرجال
|
عثر أخيرا على كتاب عمره 400 سنة فى بريطانيا عنوانه(نساء عزيزات)..
ويدور الكتاب حول فكرة ان النساء أكثر طهارة وورعا وأكثر حساسية من الرجل؟؟
وتؤيد المخطوطة فكرة أن النساء لابد ان يسيطرون على الرجال !!!!!!!!!!!!!!!!!!!!!!
لأنهن يتفوقن فى كل شىء.. ويوضح الكتاب حجم الصراع الازلى القديم بينهما..
الرجل يجد دائما انه الأقوى والأقدر على الادارة والسيطرة..والمرأة تجد انها تتمتع
بعقلية مدبرة ومنظمة لذا فهى الاصلح للادارة..والتاريخ ملىء بقصص ونماذج
كثيرة لهذا الصراع...ولكن هذا لا يمنع وجود ثورات نسائية على مر العصور..
ويقول المؤرخون عن هذا الكتاب إنه يعد أقدم ثورة نسائية عرفت فى التاريخ
حتى الأن..هذا اذا كانت كاتبة امراة...اما اذا كان الكاتب رجل فانه اما مجنون..
او عاشق من نوع خاص للنساء.................
إلي من تقرأني ....ولا تقرأ لي
|
|
 
|
|
|
|
|
|
|
|
Re: سيطرة النساء...على الرجال (Re: waleed500)
|
انا بطمن فيك انت على الحقايق، اهو دة انا هنا شايفاها بيعينى، انا ما بامن على السيطرة، بس بامن على ان المراة مقدراتها على النظام والادارة والتحكم فى الحياة اكبر من الرجل، سيطرة دى كلمة عنيفة وانا ما بتكلم عن العنف،
الرجل نفسه بعرف انه وجود امراة فى حياتو المنزليه بيساعدو على ترتيب نفسو وحياتو، وبالتالى وجودها فى الحياة العملية فعال والامريكان مثلا وصلوا للنتيجة دى وافسحوا للمرأة المجال لتتحرك فى ادارة الاعمال والمجالات الحياتية وهى بتثبت جدارتها فى كل مجال، اؤكد ليك انها ما سطوة ولا سيطرة ولا عنف، هى رقة ولطف ومرونة ومقدرة على تحمل الصعاب،
وهى بمرونتها وفطرتها اللينة ، اقنعت الرجل انه هو السيد وان الحال لن يعتدل من غيره، وهو حوار الطبيعة السرى بين الجنسين.
وليد، وحياة الخوة الكلام دة صاح، واسال اى امراة، وهم كلهم داسينو منكم وما كلموكم لأنو سر انثوى حميم، الكاتب بتاعك دة بس كان زكى واكتشفوا.
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
الى الاخ وليد:اعتقتدك في بادئ الامر تتحدث عن حرب عالميه ثالثه و جديده مليئه بالصراعات وليس عن كتاب الف قبل 400 سنه(صراع ،مستعمرات،الخ)
لطالما اعتقدت ان العلاقه بين الرجل و المراه اسمى و اعلى من هذا0
علاقه حب و ود و رحمه0
ربما قال الكاتب او الكاتبه هذا الراي نتيجه الظلم الذي كانت تتعرضه المراه ذلك العصر،بسبب افكارهم البليده ومعتقداتم المتخلفه0
انا مع الكاتب ان المراه تعرضت لكثير من السيطره عبر تارخها،لكن اظن انو او انها زودتها شويه0
وانا في راي انو اول سبيل لرفع احساس القهر عند النساء و احساس السيطره عند الرجال انو يتذكروا انو ربنا حبا كل جنس بصفات مكمله لبعض0
| |
|
|
|
|
|
|
|
|
|
Re: سيطرة النساء...على الرجال (Re: نصار)
|
انا؟
الله يفرحك يا نصار الليلة تشيل وتفرح فينى، مع انى كنت مغبنة من الراجل النبزنى لا ايدى لاكراعى دة، وانا عملت ليه شنو كنت يعنى؟
وصورتى دى هو قايلنى انا ما خاتاها سخرية؟
دى اكتر صورة ما بتعبر عن شخصيتى الاصلية وختيتا من حبى للفكاهة، وانا وشى ما مكرفس، الله يكرفس وشو، واناما متجوهلة، هدى سيرتى الزاتية مكتوبة من الغلاف للغلاف، فى الكرسى الساخن وصورى قبل شهرين منشورات فى الكرسى الساخن، الله يسخن كرسيه ،
والسودان كلو عارفنى انا شنو،
وياريتنى اقدر اسوى الدايراه للسودان، وكنت بس دايرة اقول ليه هدى اناوهدا اسمى وهدى صورتى ، كان صحى ود ناس وقلبك محدثك، خت اسمك وصورتك، وما تخلى الناس يكتشفوك، ويفضحوك.
معليش يا نصار مرقت فيك الغبينة، الله جابك فى دربى، ما مقصود بيها طبعا، مش كويس انو بنمرق الغبينة برضو؟
شكرا لحسن الاستماع.
| |
|
|
|
|
|
|
|
|
|
Re: سيطرة النساء...على الرجال (Re: Tumadir)
|
ايوة يانصار يادوب فهمت انك كنت عايز تقول لى وليد، وكانت غلطة مطبعية، معليش لكن كلام الاول ما بتحول، ما حابلع لسانى والمرق من بطنى مرق، والله يخلى وليد وقلبو الشاغل مساحة السودان زى ما قلت.
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
بسم الله الرحمن الرحيم
اخي العزيز وليد
اي نعم الرجال قوامون على النساء حقيقة لا نقاش فيها
وحواء تعلمها جيدا وحواء من الذكاء بحيث انها عملت حساباتها سريع كده ولقت انها خسرانة لو خشت في منافسة عضلية مع الرجل علشان كده وبخبثها المعروف عنها اخترعت مقولة اتمسكن لغاية ما تتمكن اي العبي على الوتر الحساس واستميلي ادم بالحنان والكلام المعسول وشيئا من الدلال واديهو دايما احساس انك الاقوى وبعد داك اطلبي وسريعا ما سيقول ليك شبيك لبيك
وان ما نفعت الطريقة دي فحواء تملك سلاح لا يقوى اقوى الرجال على الوقوف امامه وهو الدموع مع ان ادم يعلم تماما انها دموع تماسيح ليس الا الا انه ما ان يرى دموعها حتى يسارع بتنفيذ مطالبها
والمثل بقول
ادم تابع حوا وحلاتها لما فات الجنة زاتا
تحياتي اخي
| |
|
|
|
|
|
|
|
|
|
Re: سيطرة النساء...على الرجال (Re: بت القبايل)
|
تعجبنى تلقايتك يا تماضر وقلبك الابيض ده بيسع للجميع
ده شى
الشى الاخر
وده عجبنى اكتر انك زوله متواضعه جدا ما متل مبدعين اخر زمن
وصدق انتى ممكن تسيطرى على شريك حياتك بكل سهوله
نصار
لك الشكر عزيزى
بت القبايل
ادم تابع حوا وحلاتها لما فات الجنة زاتا
والله يا بت القبايل حواء بتعمل عمايل والله يكفينا شرها
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
عز العز تماضرنا
ما عاش البنبزك
يجيب ليك نبز من وين؟
زكرتينى قصص بحكوها عن حبوبتنا, كانت مقدمة على الروجال وليها مواقف مع الانجليز للدرجة التى حس معها ابناء اخوانها انها طغت عليهوم وما لاقى مدخلى لنقدها, فقالت ليهم يمكنكم لومى, قالوا ليها نقول فيك شنه؟ قالت ليهوم قولوا لى يا الظلموك اولاد اخوك الاحموك حق ابوك........ فأعادت اللوم عليهوم هههههههههههه
فرحك فرحنى وكون انه انا مصدر فرحك ازال عنى قدر من من قهر الزمن. ان اهدى الفرح لانسان هذا مدعى للسعادة و ان اهديه لفنانة فهذا فوق طاقتى فى الظروف العادية بس تكونى عاديتينى عدوه حميدة للحظه اتمنى ان تطول.
انتى العندك طاقة اعطاء الفرح
| |
|
|
|
|
|
|
|
|
|
Re: سيطرة النساء...على الرجال (Re: نصار)
|
وانت لما دخلت البورد دة الناس كانوا بقولوا كلمات زى ، مهما اختلفنا معه فى الراى، واختلاف الراى لايذهب للود قضية وكلام زى دة ليه؟
انت كنت بتكتب وين وشنو؟
اعذرنى فى جهلى بيك، وواضح انك كاتب كبير لكن انا القارىء المقصر، يعنى زى نظام بمبر ساخن صغير بالجنبة كدة.
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
العزيزة تماضر
حكاية الخلاف و الود جات كدا يعنا ما كانت موجه لى شخصى الضعيف (شايف استعمال التعبيرات الجاهزة دى مريحة كيف).....اما كونى كاتب كبير الله يجبر بخاطرك.... فهي صفة بعيدة عن شواربى على رأى الشوام(دى برضه جاهزة ومستوردة فى عصر العولمة)......لا اكتب فى اى مكان سوى جدار الذاكرة........فهي الوحيدة التى تصحبنا متنقلين من منفى الى منفا... لكنها اى الذاكرة, تشخبتت ووقعت فيها الحروف بعضها فوق بعض ..... يعنى مافى طريقة لاخراجها الا بعملية جراحية يجريها طبيب و اديب و فقية... تغسل فيها جدر الذاكرة على طريقة غسل الواح الفقهاء لانتاج (المحاية)....و يوضع المحلول على رفوف الكتب مكتوب عليه مدة الصلاحية و التركيبة(المجهولة....و يحفظ بعيداً عن الكبار.
ههههههههه الموصلى نجر المثل بس تبقى اللحن ههههههههه
| |
|
|
|
|
|
|
|
|
|
Re: سيطرة النساء...على الرجال (Re: نصار)
|
لا خلاص، انا عرفت نفرك، كاتب لكن ما لاقى بورد ، ردك مليان بالمهارة الكتابية، ودى من الحاجات العاجبانى فى البورد دة، وسيلة اعلام جاهزة ومجانية[قالوا نبدا ندفع لكن]
المهم مشرف انو الواحدة تتعرف على قلمك ، فى المنتدى واتمنى انو نتلاقى فى مزيد من الحوارات، جمع حوار، بضم الح.
وبمناسبة التعبيرات الجاهزة ، كنت بتامل قبل فترة فى الكتابة ومن هو الكاتب الحقيقى وانا بقرا فى كتاب البورد، وهم كثرو، فلاحظت ان الكاتب المميز، يأتى بعباراته لوحده، وهو مهرب صعب، فالكلام غالبا جاهز والتعابير غالبا معلبه، لكن لما الكاتب ينفلت من سيطرة المعلب ويعرف يبنى معمار تعبيرى متفرد، كتابتو بتولد طازجة فى غرفة ولادة عصرية ومفرحة، امسك عاطف خيرى واولاد مدرستو، ود عزة دة ماهين ، وزى كتابة منزر نقدالله الليلة وياسر منصور، والخروج من المألوف،
انا اطرب للتعبير المستحدث. انت كيف؟.
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
تسلمى تماضر
نعم من يكتب لا يعيد اكتشاف اللغة لكنه يزعجها...ويشحنها كم من الدهشة و القلق ...... ود عازا عنده مقدرة تعبيرية غير عادية تحتفى كلاماته بالقارئ فلا يملك الا ان يرد عليها السلام بأحسن منه. عاطف خيرى, الصادق الرضى و رهطهم الشفيف اخرجوا اللغة من رتابة المعهود الى زخم من الحركة و الغنج . البنية التعبيرية عندهم كأمرة بالغة الحسن فائقة الذكاء تشدك بحسنها و تشدهك بكنهها.
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
العزيز وليد
طبعاً كونا قد اختطفنا البوست بتاعك دا انا وقمر الزمان تماضر. ونسبة للانس الذى احدثه فى نفس غطست فى اعماق البورد وجبته تانى.....وقد ورد فى حوارى مع تماضر اسماء عدد من المبدعين اتمنى ان يسعدونا بأطلالتهم
| |
|
|
|
|
|
|
|
|
|
Re: سيطرة النساء...على الرجال (Re: waleed500)
|
الأخ وليد
طبعاً الموضوع دى اقدم من 400 سنة بكثير .. كانت هناك حقبة تاريخية معروفة بسطيرة النساء فيها وهي ماقبل اكتشاف السهم ( اي اول سلاح ) وظهور القوة ومن ثم تصبح السلطة للأقوى يعني مالك السلاح وليس عضلياً لانو دى زاتها نسبية يعني لو ليلي كلاي دخلت مبارة ملاكمة مع اي واحد من البورداب الأفندية ديل حتديه علقة عمره ما ينساها فالمسألة كلها نسبية حتى مسألة التفاوت العضلي فليس كل رجل اقوى من كل امرأة وايضاً ليس كل امراه اضعف من كل رجل فالنساء في ريفنا البعتلن الموية والحطب ممكن يدقن براحه عشرة من اولاد الرياض المسألة في نهاية خاضعة لنمض الحياة وايضاً حاجات تانية .. المهم نرجع لي موضوعنا ونخلي مسالة الدق دي .. أيضاً تعزي مسألة تأليه النساء في بعض الحضارات القديمة لسيادتهن في حقب تاريخية سابقة وعندنا في مروى القديمة اماني شخت كانت ملكة واله وطبعاً عدد الالهات لا يعد ولا يحصى في الحضارات البابلية والفرعونية وايضاً اليونانية .. المهم ليس كل ما وجد في تاريخنا ايجابي فاستعباد الرجل الرجل البشرية رفضته ( اقصد الرق ) ونحن نرفض اي سيطرة واضطهاد من اي طرف على الأخر ( الدنيا فساح الله ) زي ما بقولوا اخوانا اليمنيين واتمنى ان تعلوا ثقافة المشاركة وليس السيطرة
مع احترامي
الجندرية
| |
|
|
|
|
|
|
| |
waleed500
Tumadir
نصار
Elmosley
الجندرية
OmDur
فيس بوك
تويتر
انستقرام
يوتيوب
بنتيريست