|
|
|
 Re: الناظر وجمعية تربية الدواجن المدرسية (Re: garjah)
|
ياقرجه والله رجعتني لي وراء شديد يعني الناظر كان الثعلب بتاع المدرسه هههههه يكه
اسمع مره في اجازة عيد الضحية وقفونا طابور عشان اجازة العيد اها المدير قال اي واحد يجيب جلد الضحية بتاعو خلال ايام العيد ويسلمها للخفير بتاع المدرسة ويسجل اسمو ولو كان عندو اخو تاني في المدرسة يسجلو برضو عشان دايرين يشترو مراوح للمدرسة طبعا مدرستنا ضخمة جدا وجميلة اها بعد المدرسة فتحت اول يوم واقفين في طابور الصباح شفنا ليك غبار طالع بي الحيطه بتاعة المدرسه اها يازول بعد شوية جه واحد من فصلنا كنا في سنة اولى ابتدائي اها جاري ليك جلد خروف ناشف ومعفن ههههههههه يكه اها المدير من هناك قال ليهو ياعواليق امشي ارمي العفن هههههههههههههههههههههه يكه
زاتوووووو
ايام لها نعناع
| |
 
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
والله يا ابن عمتى ضحكتنى لما فطست من الضحك وزكرتنى ايام جميلة قضيتها فى مدرسة الاميرية بحرى وأيام الجمعية الريفية وايام حقيقى كان لها ايقاع
الزول اللزيز زاتووووو انا خايفك تكون صاحب الجلد ههههههههههههههيكة
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: cola)
|
ya colaالاميرية1 ولا2انا غايتو كنت في الاميرية واحد،واستاذ عبدالغفار الحسن،كانت ايام حلوة جدا والهي،
حبيبنا العزيز جدا جدا البحراوي الرائع قرجة،التحية ليك وانت تذكرنا تلك الايام الخوالي،شكلها كدة مدرستكم دي كانت شمبات الابتدائية،ما عارف احسا وكدة
| |
|
|
|
|
|
|
|
|
|
الناظر وجمعية تربية الدواجن المدرسية (Re: garjah)
|
أخي فنجري
دخل أستاذ مادة التربية الاسلامية الفصل
وأول ما فعله هو اعترافه بأنه لم يصلي يوما لله
ولا يحفظ شئ من القران
وان الناظر الفقري هو الذي أجبره على تدريس المادة
كان الاستاذ يلقي ببعض الاقوال والانطباعات لا يدري أنها تلصق بالبوستك في أذهاننا
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
ياقرجه عندي اخوي كان في سنة سادسة وانا كنت في سنة تالته اها يوم في درس العصر فلقوا الاساتذة بتاعينهم اها تاني يوم عملو طابور عشان يجلدو ناس سادسه قدام الناس بعدين الناظر بتاع المدرسة كان جنو قروش ههههه يكه اها يازول رصو ليك الكنب واي استاذ ماسك سوط وخاتي كنبة في الطابور عشان يجلدو الفصلين بتاعين سادسه اها اخوي قام مشى للمدير بتاع المدرسه قال ليهو يااستاذ انا جبته قروش الدرس قال ليهو امشي ياابني انتظرني في المكتب قبل مايجلدو اها اخوي مشى شال شنطتو وعيييييييك فرتق البيت ههههههههه يكه
زاتووووووو
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
انت عارف جمعية الفلاحة دى بتاعت جكس ساكت
..................
تعرف يوم راجع البيت من المدرسة....المو ليك فينى تلاتة ....ضربونى ضرب شديد......لى الليلة ما عارف ليه
......................
بعد جيت امريكا لقيت واحد من الناس ديك....قمت سالتو ...ليه زمان اتلميتو فينى....قال لي....امك جلدتنا التلاتة عشان ماشتغلنا الواجب ....
...................
امى استاذة ابتدائي بعدين بتتضرب دايما في الكمر.....يعنى موش كركاسة ....الا تلبس مرتبة..
.................
المهم امى كانت مدرسة ابتدائي ...واخوك دايما قاطعين ليه طوبة....وما بعرف بتجى من وين..و غايتو مشاكل
shereef
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: omdurmani)
|
عزيزنا قرجة تحياتنا....عارف في بوستات زي الغنا القديم ...و حرام الناس تنساها ... ده مش تقليلا للبوستات الموجودة حاليا لكن نحن قوما بنحن للقديم ..طبعنا كده ...
تعرف مرات يا قرجه انا بتخيل اننا بقينا زي الجداد ...و العالم قفص كبير .....محل ما قبلنا نلقي ناظركم راجينا...و كل زول ليهو الحرية ان يتخيل الناظر بتاعكم ح يكون منو ......
تحياتي ليك مرة تانية ..
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
يا سلام يا قرجآآآة ـ بالله الجداد الكتير داك كان بتاعكم؟؟ نحن كنا قعد نجي نتفرج، نقول يمكن نشوف لينا شكل ديكة ـ لكين ديكة شنو ـ جدادكم كان بطري كله والفلم ما كان فيهو دقش ـ
قال "أيوة لكن يا استاذ انت ما دفعت معانا"ـ أمال القفص الكبير داك انت كنت مطلع ليهو شهادة بحث  ؟؟
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
عمنا قرجة
اعدت لنا ذاتنا التى تبحث عن ذاتنا
الرجوع للماضى فيه حميمية آثرة و هو نوع من التواصل المتقهقر للوراء .... للافضل .... و للذى سبرنا غوره
و نحن فى الابتدائى كان لدينا ناظر ممتاز جدآ
و فاضل الى ما لا نهاية للفضل
و فى نشاط الجمعيات اقترح هذا الناظر المربى و الفاضل ان ندخل لجمعية الفلاحة قسم للتغذية ... و كان عمليآ بان جلب لنا قفص غاية فى الحداثة ... و بعد ايام حضرت الكتاكيت و هى نواة للدجاج ( البياض ) و ليس اللاحم عشان ما يطمع فيهو واحد زى ناظركم يا قرجة
المهم تم تقسيم كل فصول المدرسة الى مجموعات تقوم كل مجموعة بالنظافة لقفص الدجاج فى يوم محدد من ايام الاسبوع .. و السقاية و تقديم العلف فى العلافّات الحديثة و تجميع البيض فى كل يوم
فى نهاية الاسبوع كان الناظر يجمع البيض للاسبوع كله و يقوم بتوزيعه بالتساوى المطلق بين كل تلاميذ المدرسة و ما يتبقى يعطيه للاساتذة و ما تبقى من الاساتذة يأخذ هو نصيبه منه و على استحياء
هذا الناظر الفذ هو الاستاذ داؤد احمد هابش امد الله فى عمره
و ما زلنا كل ما نزلنا اجازة نزوره فى منزله و نقدم له تقديرنا لما كان يبذله فى المدرسة الابتدائية من نشاط و من تربية للنشء على درجة كبيرة من نكران الذات و المعرفة باخلاقيات المهنة
ادعو الله ان بمد فى ايام استاذنا داؤد و ان يمتعه بالصحة و العافية
و شكرآ لك قرجة ان اتحت لنا فرصة العودة الى حميم ذكرياتنا
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: zola123)
|
اهاااا يا قرجة و كوستا ــ الزولة 123 اصيبت بالاندهاش ــ كان في داعي للفضائح ؟؟ تربو جداد في المدرسة؟؟ ــ
ويا كوستا قلت لي "و من تربية للنشء على درجة كبيرة من نكران الذات و المعرفة باخلاقيات المهنة"؟؟!!؟ ــ هههـه ــ
يعطيكم العافية ــ
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
منير
تحياتى ليك يا زول
لو علمت ما اعلم عن استاذنا داؤد احمد هابش .... لمدحته اكثر من مدحى له
و لكلت له من الثناء عاطره
فالرجل فعلآ مثال نادر للتفانى فى اداء مهام مهنته ... و فى كل هذا و ذاك فهو مربى صاحب نظرة ثاقبة و اداء عملى تطبيقى ينطبق على ما يؤمن به
الله يجزيه عنا و عن جميع تلاميذه كل خير
و يعطيه الصحة و العافية
بعدين يا منير عملتنى قدر عمك قرجه ؟؟
معليش ممكن زوله ما تكون حضرت زمن عمك قرجه
و ازيدك من الشعر بيت : تربية الدجاج بالمدارس الابتدائية كانت تدريب عملى متقدم على مايسمى اليوم بعلم الانتاج الحيوانى فى الجامعات ... يعنى نحنا كنا سابقين زماننا
و زى ما عارف يا منير هذا النوع من الانشطة عند الانجليز يسمى
BACK YARD ACTIVITIES
و بالاضافة لتربية الدواجن كان يطلب منا ان نحضر طوب طينى يصنع من قالب علبة الكبريت الصغيرة .. و المسطرين يكون عبارة عن ملعقة شاى معكوفة ... و خلف الفصول كان يطلب منا ان نبنى بيوتآ بذلك الطوب و يتم اختيار اجمل بيت مبنى و ذلك حسب جمال التصميم و روعة البناء و الناحية المعمارية .... ذلك كان تمرين متقدم فى تدريس اساسيات الهندسة المدنية ، لا يوجد اليوم فى اى مدارس من مدارسنا ... و لا حتى فى رأس اشطر استاذ ابتدائى حايم
قال بتاعين جداد قال ؟؟
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: KOSTA)
|
الحبيب المهندس
انت عارف سمير لو جا لجدادنا كنا اديناهو كلو للناظر
العزيز مانوبيا البحراوي
كيفك يا جميل نحن ناس الاميرية اتنين
استاذ عوض جميل والسحار وبشير وجنى الطير
والكندي و يوسف
نطاسة المنبر وشاعرته الرقيقة نهى
شكرا على الزيارة
ماهي تجاربك مع الجداد ما تكوني زي الزولة 123
تاكل فيهو لغاية ما عمرها بقى خمستاشر سنة حتى شافت الريش
الزولة 123
انتي عارفة من اجمل الهوايات هواية تربية الحيوانات والطيور
لانها تجعل الهاوي نشيط ومتحرك ومتفاني في خدمة هذه الحيوانات
والطيور وتعلم على الصبر وتنظيم الوقت واحترام حياة من يشاركوننا
هذا الكوكب
الحبيب منير عبدالرحيم
رفيق الصبا والمدارس الجميلة وان كنت تصغرني بعامين
فلقد تقدمناك في صفوف الدراسة ولكن نبوغك وتفوقك كانت تاتينا
اخباره فنفرح بها
ضحكتني بحكاية شهادة بحث القفص وانت عارف نحن في تلك السن
اذا طردت واحد من بيتكم يقول ليك موش بيت الله انا ما طالع
تقوم طوالي تسكت لانو دي حاجات ما فيها نقاش
برضو واحد لما يخصمك ويقول ليك خصمتك بالرسول
تفضل تحنس فيهو وتقول ليهو عليك الله اعفي لي
العزيز كوستا
انت عارف انت عندك ذكريات ومواقف جميلة في الابتدائي وده واضح من نشاطك في بوست الما قرا الابتدائي في السودان حقو راح للزميل حسبو
وهذه الذكريات الجميلة والوفاء الذي تحمله لاستاذك الذي لا زالت علاقتك به مستمرة...وطبعا حتى لا تنمحي هذه الذكريات مع تقدمك في السن وكده اقترح عليك عمل بوست بعنوان مذكرات كوستامن ايام الكسرة الى عهود الطوسطا
هههههههه
وطبعا دي مرحلة تاريخية مهمة جدا تعادل في اهميتها تاريخ المهدية
تسلم اخي ويبدو اننا متقاربون في السن يعني بكون اسغر منك بخمستاشر سنة كده
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
يا عمو قرجة ومنير وخالو كوستا
عشان هو قال ما من زمنك
انا ما باضحك فيكم والله باحسدكم ومعجبة بالنشاطات الكنتوا بتعملوا فيها
انا بس يدوني الطين القلتوا عليه ده وتاني ما تشوفوني في الفصل
اما عن الجداد فاعتذر
عشان حي وبيمشي
وانا اي حاجة حية وبتمشي باخاف منها لووول
تحياتي
زولة123
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
قرجة
ليك السلام مليون
يازول الحمد لله الما رفدك ويا خوي ناظركم دا كان مخالف لانو نظار زمان ما بالساهل يسو زي دا .لكن الحمد لله الطلعت من ناي الاولية كان ما دفعة تبقي الدفعة الورانا ونحنا طبعا حكاية دواجن زاتا ماكنا عارفنها لكن شغل الترابلة وجمعية الفلاحة جربناها لكن مامذكر الخضار كان بنوديهو وين والله الكان بشيلو منو والله يستر مايبقي الناظر
سلام ياجميل وانت ترجعنا للزمن الجميل داك
عبدالله جعفر
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
عمو قرجة
عمو منير
ذكريات الابتدائى جميلة جمال ارواحنا فى ذلك الزمن الطيب
تعرف يا عمو قرجة مرة كنت رئيس جمعية للعثور على الكنز فى دروس " خريطة الكنز " الشهيرة ... طبعآ دى تدريبات رائعة و اساسية فى علم الجغرافيا و كذلك الجيولوجيا ... و علم المساحة
المهم اعطانى الاستاذ الخريطة و اجتمعت بمجموعتى و وضعنا الخريطة فى اتجاه الشمال حسب ما شرح لنا الاستاذ فى الحصة ...و حسب ما هو وارد بالخريطة خرجنا من الصف الاول " اولى " الى خارج الفصل و تابعنا الخريطة .... الاستاذ كان غاية فى الغتاته بالله حوّمنا ليك الحله كلها من الدكان الى الجزار الى المحكمة الى النجار ثم المركز الصحى و تانى و بحسب الخريطة ترجع نفس المشاوير دى .... المهم و لما كنا شطّار و القيادة للخريطة كانت من المعلم كوستا ( لووول ) تم الرسو بالخريطة الى بر الامان و لم نعثر على اى موقع للكنز خارج المدرسة ... و بدأ بعض الذين معى بالمجموعة يشككون فى اننى ربما كنت غلطان فى قيادة و توجيه خط سير الحريطة .. و لكنى اقنعتهم حسب اتجاهات الخريطة اننا نسير فى الخط الصحيح للسير
و و جدنا انفسنا و قد عدنا للمدرسة ثانية
و كانت المفاجأة ؟؟؟؟؟
الكنز كان مدفون فى داخل المدرسة
و بالتحديد فى
الركن الجنوبى الغربى للفصل الذى بدأنا منه رحلة الخريطة
اى فصلنا ذاتو
و ذهبنا بكل ثقة و حفرنا فى ركن فصلنا و وجدنا الكنز
كان عبارة عن كيس حلاوة كبير
و تقاسمناه بيننا بالتساوى
و قد اثنى الاستاذ على مجموعتنا كثيرآ و ذكر بان خريطتنا و كنزها كانت اصعب خريطة
زولة 123
كان مفروض تقولى : عمو قرجة
عمو منير
و اخى كوستا
لكن عمومآ مقبولة منك خليتنى خال ... و صدقينى طالعة منك ظريفة
اها نحنا ناس عمو قرجة و منير لما كانولا بالابتدائى كنا بننتظرهم لما يرجعوا من المدرسة عشان يحكوا لنا عنها نحنا اللسع ما دخلناها
تقولى لى خالو ؟؟؟
بس و الله و زى ما قال عمو حسبو الما قرأ الابتدائية فى السودان حقو راح
و انا كمان بقول الما قرأ الابتدائية فى زمن ناس عمو قرجة و عمو منير حقو راح مرتين
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: KOSTA)
|
سلام يا كوستا ــ
خلاص يعني سويتني عمو؟؟ ياخي عليك الله عمرك شفت ليك عمو اسمه منير؟؟ ــ انا من زمان زايغ منكم يا جلاكين،،، لكين الظاهر اني غلطت و اتحاومت كتير قدام بوستات قرجة دا لمن وقعت في الشرك ـ ياخي الاسم دا انا قلت ابدأ بيهو من جديد واخش بيه الروضة (مع شفعي)ـ تقول لي شنو؟؟ ــ
والله يا قرجة، كل ما أقرأ بوستاتك أتخيل نفسي قاعد معاكم قدام بيتكم الناصية الديمة مزدحم بشباب الحلة ليل علي نهار داك ــ أو علي الاقل ماري بجنبكم .. السلام عليكم،،، وعليكم السلام ـ لكين بالمناسبة كلاب حلتكم كانت عاملة لينا أرضي ياخي!!! ـ و .. وبالتأكيد ذكريات الشعبية جنوب والاميرية2 والمساسقة بشارع المدارس ما بتتنسي ــ ـ
| |
|
|
|
|
|
|
|
|
|
Re: الناظر وجمعية تربية الدواجن المدرسية (Re: garjah)
|
عبدالله ود جعفر
يأيها المرهف كالزنابق فى صباح ندى
فيه ريحة الدعاش
و الخضار لسع نعسان ما صحى
و ديك كسول ظنّ ان الصبح لم يبدآ
و ثور حرون
و ريحة قنّانّة شاقه الحلة و زاكمة للانوف
و محبة الناس لبعض الوف .. الوف
داك يا ود جعفر زمنآ ما بيعود
مع اننا كنا دايرين العشق يسود
اها بعد التحية دى بنقول ليك مشتاقين و الله كتير بس عمك حسبو قفّل لينا المدرسة الليلتو و فات
و خلانا فى الصقيعة
و انا لقيت نفسى براى
اجى افتح المدرسة
و اكون الطالب
و اكون الاستاذ
و امتحن فى الذكريات براى
اها قلت على شنو يا ولد .. انتظر لما المدرسة تفتح تانى و يجوا خيّانك
و حياتك من ديك و ما زلت منتظر
لا شوفة ترد الروح و لا ردآ يطمئن
لقيت عمو قرجة جاب لينا الجداد بتاع الابتدائية
قلنا نشرّك بالجداد ده لناس مدرسة عمو حسبو المنتظرنهم من زمان
بالله السنارة طأأأأأأأأأأأأأأأااااخ جابت لينا ود جعفر
الما بغبابنا
مرحى بك فى مدرسة عمو قرجة مرحى
تعرف اكان جرّيت لينا معاك الجنا ابو آمنة داك باقى مرات مرات بقولولو المطر و بالتنقليزى الرين .. اكان جاء فى المدرسة دى امانة ما بينظمها ليك تنظيم
هل نطمع فيك ؟؟ ... و فيهو ؟؟؟
تحياتى اليكما
قرجة تلقاهو فى امنا حواء بيفتش لى الشاورمة
| |
|
|
|
|
|
|
|
|
 Re: الناظر وجمعية تربية الدواجن المدرسية (Re: KOSTA)
|
بمرافقة عبدالله جعفر
يواصل كوستا كتابة مذكراته من عصر الكسرة الى عهد الطوستا
لو سمحتو احكي ليكم اخطر علقة اخدتها في المدرسة
كان يجلس جواري في تانية متوسط لاعب الموردة المعروف عزالدين الصبابي..وكانت الحصة دبل علوم والاستاذ كانت تلك اول حصة له معناوكان يدرس الحصة وهو جالس
طبعا شقاوة تلك الايام مستحيل تجلس جوار زميلك بدون مشاغبة...بدينا ضرب بونية بدون ملاحظة الاستاذ يعني الاستاذ يقبل على السبورة تقوم تاخ تلصق لاخوك بونية...في واحدة من المرات الاستاذ اتلفت بسرعة وراى بونية طايرة
طلب مننا الوقوف
وعلق تعليق لا زلت اذكره حتى اليوم لانه قال اذا ابوي عمل كده في حصتي ما بخليهو امشو انتظروني في المكتب
انتظرنا في المكتب وانتهت الحصتين وحضر الاستاذ
وطبعا الفصل كلو بوراهو لمشاهدة العلقة
طلب الاستاذ من زميل لنا واسمه حسن الجزولي ان يحضر سيطان من النيمة
ود الجزولي لانو راجل صاحبنا وكدة مشى جاب سيطان رفيييييعة ودخل المكتب وهو يضحك
الاستاذ جمع كل السيطان التي احضرها ود الجزولي وشحط بيها ود الجزولي حتى تقطعت
وطلب من ود الجزولي معاودة احضار سيطان مناسبة
في هذه المرة احضر ود الجزولي عكاكيز وليس سيطان
انا غايتو صمدت لغاية السوط والا هو العكاز العاشر
لكن بعد داك مافي زول يسالني
اخوي عزوبرضو ادعى الصمودولكن عندما احس بان الاستاذ لن يتركه حتى يرى انهيار بغداد جعععععر
باعلى صوته
اخوكم رقد محموم قريب الاسبوع
الاستاذ هو اليوم محامي وصديق شخصي لصديقي عزالدين الصبابي
الذي يعمل محاميا ايضا
| |
|
|
|
|
|
|
| |
garjah
ALZOLZATOO
cola
manubia
almohndis
Munir
noha_g
zola123
فيس بوك
تويتر
انستقرام
يوتيوب
بنتيريست