حلم يكاد بتحقق يراودني ان افتح صفحة البورد هذا او اي مكان فلا اجد إلا بت قضيم بت قضيم بت قضيم بت قضيم اوجع وشي ووش غيري...لان المشكلة الكبيرة أنني اكتشفت مؤخراً انني أو اغلبنا نتونس مع كل الناس إلا نحن...انفسنا...لماذا لا نونسنا يعني؟؟؟ بس لعن الله المشغولية ولو انها بتفيد حياناً كثيرة
والله طفشة...وطفشة هذه فعل حاضر مبنى على السكون من الفعل( طفشااااان) كما يقول اهل الخليج...(مصنقر) وليست كمصنقر حقتنا...فصنقرتنا تعنى جلوسنا وصنقرتهم تعنى زهجهم ذي عربيتنا وسيارتهم وملاحنا وطبيخهم وزهجنا وطفشهم وبطيخنا وحبحبهم ريالتنا وريالاتهم
دخلت البورد لاتسلي..واود ان اسركم سراً ومش غريب ان اسره لكم وتبدون كلكم شخصيات شهيرة ملمعة...ما شاء الله الصلاة على النبي
كل ما اكتب موضوع..يصيبني احساس مراهقة تتخيل أنها ستزهو ويمتلى بريدها ومسنجرها بالمعجبين والمعجبات المكسرين والمكسرات وعلى فكرة..اخيراً قريباً اكتشفت ماهية المسنجر هذا .. لعن الله الجهل والكبيبية التي منها يندرج اصلي الطيني حلو ريح الدعاش
فيها شنو يعني ان تبدأ بتنويس نفسيتك وأن تتوقف عن رسم دور أنك منظم مهم بتكتب كلام ناس كبار وترد على ناس كبار وكل في مكانه حسب خارطة الحديث ؟؟؟ ماذا يعني إن خرمجناها؟؟ ماذا يعني إن لم يشاركني احد؟؟؟ محرجة اي نعم لكن لماذا التمسك...لماذا نتناقش مع الناس ونحن لا؟؟؟ ولماذا لا تكفينا نفسنا ولو مرة واحدة من البوست على وزن مرة واحدة من الزمن؟؟؟
والله ما فوقها حاجة لذلك..قررت ان املاني زهواً وارد عليا بما لا يقل عن 120 رد اقلها كده.. اونسني باوندث شريكي؟؟؟ لذا نرجو التزام..ليس التزام فقط..بل التعهد أن لا يفتح احدكم فاهه ولو ببغم...خلوني النبي فوقكم ولو لمرة أن امارس الكلام دون رقيب ودون فقلصة ولا تنبيه
دعونا اتحدث واونسني في صمت ضاج
08-08-2002, 00:32 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
شد بصري وصلة وضعت هنا من على المنبر الآن اصبحت امارس الثقالة...فكل ما ادخل هنا اضغط على الوصلة لارى من معي الآن لا افهم لماذا افعل ذلك...بالجد حشرية غريبة...تذكرت بفعلي ذلك جارة حبوبتي والتي لا يهدأ لها بال إذا لم تعرف ناس حبوبتي طابخين شنو وجاهم منو وبدخلوا الحمام متين والليلة بزغت كم مرة ..لا مؤاخذة يعني دخلت اليوم مرةً فوجدتني برااااااي وكانت لحظة الصمت والدهشة .. اين بكري أبو بكر؟؟؟ لانه طواااالي الأربع وعشرين ساعة في البورد ففهمت وانا زولة فهامة أن رئيس الجمهورية البوردية لازم عامل حركية برمجية أن يبدو دائماً في البورد...لانه من غير الممكن أن لا يأكل ولا يشرب ولا ينام ولا حتى يحك راسه غريب والله ما يسمع قطيعتي فيه معاي
المهم استطيع بعد طول جهد وبحث ضنين..أن اعرف أن فلان بصحى بدري وعلان من سكان الواق واق وفلونة دي ما عندها شغلة ذي الليلة دي وفلتكان العلاني ممكن اربط ليه الساعة سبعة وبناء عليه تفتكروا لهذا علاقة بالقصيدة الليلة وين انا يا البي العصر مروره ؟؟؟!!! ممكن تكون قاصدة واحد من ناس البورد الشاعرة المميزة؟؟؟ احتمال
اعترف اني اكره الثقافة... ربما لان المثقفاتية لديحين ثقيلين أو في الأغلب بلادتي اللغوية الثقافية وجهلي المستوطن أو ربما اصابتي بمرض الإمساك الدائم... طلب مني اخي الاسبوع الماضي أن اغسل له الجلابية لتبدو انصع من تلك التي ذكرتها غناية ناس سمية في طهور بت اخت علياء... ظن اخي أن غناية ناس سمية قد ابتكرت هذه الاغنية التي قفشته يومها يستمع لها من وراء الحائط وهو منبشكاً منفعلاً مستجيباً لكم الشكر الذي قيل في هذا الشخص الحربوية الذي تغني له كل الغنايات إذ يبدو احياناً اخضر هايل ومرة اصفر على وردي واحياناً بنفسجي وقد يكون يوماً كحلي أو ربما زيتي.. رجل المستحيل الشايل الموبايل الجاب الدش في ضهره الجاب عشرة قدور صندلية النسيبته قالت شوية القيافة السمح البات مرة في لندن صحى لقى نفسه في خلوة..الما بشبهوا الوصل القمر وبعون الله سيحرر فلسطين.... حرك اخي راسه في كل الاتجاهات وهو يستمع لتلك الفلتة ... لم يكن يدرك أن عينان خبيثتان تراقبان بغيظ وشماتة..
يدعي أخي الثقافة...قال أنه توقف عن الاستماع للاغاني الهابطة... وجعاً وامتناعاً ..رجع يوماً من عمله مبكراً فوجد زوجته تدندن مع شريط الكاسيت...الشمار الكتير الذي بسببه ستسيب بيت امها وابوها... فاسقط في يده ان تكون زوجته لا مثقفة...فاجئها باكتشافه لرعونة تصرفها...وهبدها كلمتان تلفزيونيتان حمزاويتان اودت ببطنها المنفوخة إلى تحت الركب ...احسن... لا ادري سر ولاداتها المتعددة ياخ...إذ أن بطنها تتنفخ مع بداية كل عام دراسي...وكأن بطنها شنطة من شنط الوليدات ... اعلمنا اخي بعدها عن مقاطعته الرسمية للغناء ... كما امتنع عن المجاملات التي لا طائل معنوي لها وإن دلت على شئ انما تدل على نرجسية كامنة ... قال انه تفرغ تماماً لاتقان الثقافة
لم يكن غريباً إذن أن تبدو له الجلابية البيضا المكوية جديدة جاية هسه من سعد قشرة...اقصد من نادي الشباب المساطيل.... بدت له زاهية بالحكمة رغم استحالة اعترافه بذلك...ادهشته بلونها الجديد اللامع المفرح ولحنها الزاهي...كانت اول مرة يستمع لها...رغم انها كانت فرمالة كل السمايات والاعراس وبيوت البكاء حتى..اي والله...ففي بكاء جدي رحمة الله عليه...دخلت احداهن بوقع موسيقي بكائي نوائحي غريب...فانتازيا صوتية عظيمة...فبدات ايييي...ايييي...اوووو...آآآآآ.... ئئ وفي غمرة انشغالي بيدها المكرمشة الطالعة دوبها من حفرة الساونا السودانية كما تسميها جارة لينا مفلهمة...وأنشغالي بأن ارد لها الصاع صاعين في بكاها الحار...حيث تقول امي ان البكا بحرروه اهله...وجدتني اقلدها لكن بتسارع ابطأ قليلاً فنفسي دائماً مقطوع من الجري ورا الغنيمات...بدا صوتاً كلاسيكياً متوافقاً بدرجة مدهشة ولا عقد الجلاد... لكن في غمرة انشغالي بتوزيع النوتة الموسيقية لخمتني رائحة القدحة فأنا جعانة نظراً لضخامة تلاجتي الشبيه بتلاجة تجتوج...ونظراً لكون جدي توفى رحمة الله عليه ويدي تمتد لأول لقمة في صينية الغدا... الله يرحمه بس في السواها...ريحة التوم أصابتني بلفحة ووجدتني الخبط اللحن بصوت مخنف غريب...ايييي يا الجلابية .... استغفر الله...أيييي بيضا مكوية كر عليا يا ابوي....احيييي يا جنااااااااي بسحروك ليا...نسيت انه كان جدي وليس جناي...وللغرابة بدا لحني البكائي جميل...وللغرابة الأشد أنهم اشادوا بكرم اخلاقي العالي في تحرير البكاء ولا هالة سرحان وتحرير مجلة كل الناس... لم يدركوا ابدا ًالفرق بين نخنختي ونخنخة صاحب الجلابية البيضا المكوية... لكن الأغنية كانت سبباً في خلاف كبير بيني واخي المثقف الممتنع عن سماع الاغاني... إذ ناداني اليوم داك...يا بت..يا بت... الجلابية دي بالله غسليها نضيف بنصاعة تفوق بياض الضمير... واكويها لتبدو مهر يتهادى في صقيع الغربة البكاية...اكوي كل تفاصيلها... ما داير اشوف فيها كسرة يكسر راسك المقودس ده... ورغم اني دائماً لا ادرك السبب المقنع في وصفات اخي اللامبرر لراسي المقودس فهو خلقة من ربي ولم اتسبب في زواياه المضلعة... رغم ذلك قلت... طيب حاضر ..وقبل ان اتلاشى من امامه اوقفني مستفسراً... انت يا بت ناس سمية كان عندهم شنو اليوم داك..فقلت طهور، ارغى وازبد ولعن الجهل والغباء وحظه الذي جعله ينتمي لهذا المجتمع المسجم......قلت ببراءة. لكن طهارة سنية ما فرعونية ؟؟؟...نهرني مبلعاً لي لساني في حلقي..قبح الله وجهك يا سجم...يا قاهرة.. رددت في سري.. سجم يسجم الثقافة؟؟؟ سألني .. لكن على الجهل العليهم...دي شنو الغنية الغريبة بتاعت الجلابية دي؟؟ حقيقي الفن تدهور... قطع شك معجب بالاغنية ولكن نفسه الأبية تأبى له الاعتراف امام اخته ذات الرأس المقودس بأن الجلابية البيضا قد خبلت مخه وهو الذي حمزة عوض الله بكل سماجاته اللغوية يبدو امامه ظريفاً.. قلت لاغيظه رغم عدم بلعي للجلابية...اقصد الأغنية...والله سماحة غنية... وبدأت اردد...الجلابية البيضا مكوية يا حمادة بسحروك ليا... ووالله يا حمزة...اقصد والله يا اخوي..كان شفت اخت علياء الصغيرة دي عليها جنس فنسة...ووووب عليا ما قوس راسها عديييييل كده... وقفت اقلدها .. فانهرى اخي غيظاً وازبد... لعنة الله عليك يا مايلة يا متهايلة... مايلة وعرفناها متهايلة دي شنو... يقدرك الله اشوفك بتسمعي واللا اسمعك بتغنى هذا السقوط نحو الهاوية وذلك الفن المستنبط من درك المجتمع اللاافلاطوني وتلك الفجيعة النفسية في قوم ما ابانوا واستبانوا... والله اقطع ليك رقبتك المتطاولة الساندة راسك الخاوي المقودس ده.. النبي في شان الجملة دي ما مفروض اكره الثقافة؟؟؟!!!
08-08-2002, 11:14 PM
Abomihyar Abomihyar
تاريخ التسجيل: 03-19-2002
مجموع المشاركات: 2405
قرائي الأفاضل مساء الخير والله جنس حالة هو الواحد يكون هو نفسه ما بقدر يقرا روحه ويقوم يقول..قرائي الأفاضل تلقى الجريدة كلها... راسلتني فلانة اشتكت من معاملة ابيها (الكاسية) إذ منعها من ركوب الحصان في المزرعة واللا استشارني فلون إذ يعاني من مرض وجع الحواجب واللا انا طالبة في السنة النهائية من الطب بعد الدكتوراة وعمري اربعتاشر سنة اظن ما فيهم غير عبد الوهاب مطاوع...مثل وقدوة حقيقية والغالبية هجص وكذب واستخفاف بالعقول عجيب ما فاهمة الأبواب المصروف عليها في المجلات دي...هل فعلاً لها قراءها واللا ملي خانة وخلاص؟؟؟ ما كان اخير يدوني قروشها واللا باب الراغبين في الزواج ونعم أن كثير من الدول العربية تتبع طريقة العرض والشراء في الزواج وان هذا سلوك زواجي طبيعي عندهم...لكن لما تفتح الصفحة وتلقى واحد مؤهله متوسط ومتزوج وعمره خمسة وخمسين سنة في عين العدوً ويرغب في الزواج من فتاة خليجية تبلغ من العمر سبعتاشر سنة ويكون عندها فيلا وعربية لا ومتنازل ومستعد للإقامة في بلدها حاجة تصيب بوجع لغاليغ فعلاً بعدين مسألة البنات ناس سبعتاشر سنة دي بتوجع جد..هي عمرها سبعتاشر سنة وعندها مشكلة؟؟ ما حل المشكلة زاتو العمر الصغير ده...ده ما في حد زاته اكبر مواساة..الله يجازي كل واحدة اصغر مني
حاجة تضايق بماذا نتسلى يا قوم؟؟؟ الله يخلي لينا مجلة ماجد غايتو
جنس طربقة؟؟
يا دريمز شمشري امي ولا يهمك وعليك بالوصلة اياها...شمارها هنقدر
وشوف الابتسامة الليلة وين واللا فاتن حمامة...وجوبا مالك عليا الليلة وين وشلتي نوم عيني الليلة وين والله ما عارفة المناسبة ..لكن بالجد زهج وطربقة انا زاتي حبيتك لله فالله...وبعدين انا جديدة زيك برضو..وبرضو افتقد صديقة...اذكرها اليومين ديل بشدة...الله يطراها بالخير تسلمي يا غالية
الأخ شنو؟؟؟ مسألة ثقافتي الهندية دي تاعباني شديد مع الإنجليزي الأخ ابو ميهيار...ات هندي يا ده؟؟ بالجد اسمك ايه؟؟ كل الود .. وكلامك كبييييير عليا... وبالجد بالجد بالجد...لو ما عندك شغلة اسمعني...واللا يضيع عمرك هدر...والله براية بري عجيب بعدين احنا الشعر لا يجينا عفو الخاطر..ممكن يجينا عفو الكركار...ده لو جا من الاساس تسلم
عليكم الله اتحشروا كتييييير شان يسلم المقام وتطيب القعدة
بس ما تقول لي الونسة ما عندك يا بت امي.... وعلى حس جاية من عرس وكنا مدورين عرس الاسابيع الفاتت دي .... الجلابية مش مغسلة ومكوية دي بقت زي مبيض .. وموية غسيل ..... يا حليلك والله وحليل الثقافة.... هو اخوك ما سمع اغنية ااااااي انت القيافة ااااااااي انت انت الثقافة اااااااااي شكلو ما سمع النوع الراقي من الفن دا.... معزوووووور بس بينى بينك غنية الشمااااار دي ما عادية ... روعة وشمااااارك تقيل يا بت قضيم انا تاني بجي
سنة يا انا
سماح
08-08-2002, 11:55 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
اوع بس اكون طبظتها بجملة اكره الثقافة إذ انني كثيراً ما اكون حمودة بتاع الجامعة بتعرفوا؟؟؟ حاولت اقرا الاسم تاني لقيت ان ممكن الأتش تكون سايلنت؟؟؟ شان تآمنوا بس بالعنجليزي
لا ادري يا اخي لكني كثيراً جداً اقرأ اشياء واسمع اشياء تصيبني بالعقدة...وكنت لوقت قريب اظن انني اعاني من جهل عقيم إذ انني لاا فهم كثير من القصص الروائية تلك التي يقولون عنها قصص رمزية...والشعر الرمزي الحر ايضاً...ليس فقط لا افهمه بل اني لا استسيغه ولا يشجيني ثم اني اشاهد اللوحات الفنية فاجدها كلها مشي دجاج اطالع تحليل سياسي فاظنني من العصر الحجري..او نقد فني فأفاجا بأني ما عندي ذوق اشاهد احياناً فيلماً يدشدش اهلي اقرأ نقداً اجده تافهاً معفناً (معفناً دي دلالة على تدني ثقافتي) اشاهد مسرحاً اجده اهبلاً لزجًاً فأقرأ نقده فاجد انه عبارة عن مدرسة مش عارف مين النموذجية
كانوا يقولون لي ان ثقافتك متدنية...فلا استسيغ موسيقى باخ...اساساً مش عارفة مين باخ...وتصيبني الأوبرتات العالمية بحمى نفاس...مثلاُ يعني...ثم اتهم بتدني ثقافتي فبت اكره الثقافة..هذه التي لا تستطع التنازل عن عرشها لمكاني الداني وإذ انني قلت هذا التعبير فتأكد اني كما ذكرت انت قلته عفو الخاطر لاني اقتنعت أن الثقافة والمثقفاتية ليست بالضرورة كلام كبار وتحليل عظيم ودراسة مملة طويلة...في نظري (وفعلاً نضارتي قعر كباية) أن الثقافة بساطة سهولة وصول لكل الناس ان اكون متعلماً واصل بعلمي لطبقتي فليس هذا إنجازاً...ربما الإنجاز الفعلي استطاعتي أن اتواضع واصل لكل الناس الغلابة التي للأن لا تدرك فعلاً ما هي الثقافة..تماماً كما لا استطيع ادراكها انا هذا ما قصدته من الثقافة...كان يجب ان لا اقول الثقافة بل اللذين يدعونها والله تعالى اعلم
08-09-2002, 00:10 AM
Abomihyar Abomihyar
تاريخ التسجيل: 03-19-2002
مجموع المشاركات: 2405
شوفي يابت قضيم أنا سوداني، وبصراحة ما بقبل أوصف بأني هندي وهي بيني وبينك كمان بتحمل شوية معاني كده من بينها العوارة. كمان أنا قاعد أكتب إسمي الحقيقي في البورد ده كل يوم ، ومهيار ده إسم ولدي الكبير، وهو إسم الشاعر العربي مهيار الديلمي، على الأقل عنده قصيدة معروفة للجميع وأم كلثوم غنت منها مقاطع. واعتقد في كل حفلات الوداع في المدارس الناس قاعدة تردد، أذكرونا مثل ذكرانا لكم رب ذكرى قربت من نزحا. كفاية وللا أزيد
08-09-2002, 00:23 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
الأخ ابو مهيار رويدك يا اخي الدنيا بالليل ما بنقدر على الشكل ده اعتذر بكل الصدق إن كنت قليلة الذوق..واعلم طبعاً عن اسم مهيار المشكلة اني فعلاً لم استطع ان اقرأ الاسم بالإنجليزي حسبته مجرد لقب...ولست اتريق والعياذ بالله على الاسم كانت مزحة ولتعلم اني مزحي كثيراً ما يكون عوير...اي والله بعدين على فكرة...لي وجهة نظر في الهنود .. اي نعم نحن نصف الواحد المبالغ شوية بانت هندي واللا شنو بسبب الانطباعات التي تتركها افلامهم علينا... وان الخليج يصفونهم بصفات اخرى هم اولى بها...لكن في الواقع من أذكى الشعوب الشعب الهندي...خصوصاً في مجال التكنلوجيا والحاسوب... واول من برمج فايرس كان هندي على فكرة عملت ليك ذكية الذكية بتاعت مجلة ماجد صح؟؟؟ صدقني كان مزح واعوذ بالله من تقليل شان الآخرين وحفظك ومهيار ابنك وكل الشكر لكتابة الاسم بالعربي لافهمه كل الود وسماح ذي ما قالت سماح اعود لك سماح
08-09-2002, 01:15 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
لكن يا بت قضيم الونسه صحي ما عندك ويييييين انتي من زمان وبعدين انتي عارفه انا جنس الونسه دي والشمارات دي بحبها جدا اصلها بتزكرني بناس السودان الطيبين اها يلا تمي الونسه اصلها دي اجمل ونسه انا اسمعها
حكاية الثقافة دي اذكرتها امس لماجاني جواب من السودان وانا طايرة من الفرحة ومتوقعة القي لي سلام وحباب وشمارات طازجة واخبار اهلي والجيران ، اتفاجأ ليك ب الاندياح والانزياح والدوائر والمحاور والدهاليز والطوفان ، الله يعلم ويشهد ما فهمت اي شئ ، لا عرفتهم عيانين ولانصيحين، ولا عرفت المات من الحي برضو شكيت في فهمي واديت الجواب للراجل قلت ليهو هاك وريني ناس البيت ديل الحاصل بيهم شنو!!! وحاتك لي اسع ما قدرنا تفك الطلاسم الفيه.
ودمتي
08-09-2002, 03:13 PM
المسافر المسافر
تاريخ التسجيل: 06-10-2002
مجموع المشاركات: 5061
بت قضيم الونسة مع النفس موضوع جيد انا مرات اسمع صوت يناديني والله يا بوحميد انت شكلك حاتلخبط الأمور كلها التفت مفزوع واقول يا ربي دي بوادر جنون ولا شنو لكن في ناس بقولوا دي هموم واحد قال ثلاث ارباع الشعب السوداني بدأ يكلم نفسو
مش عارف احلام اليقظة هي برضو نوع من اليقظة ام الدندنة ببعض الكلمات غير المفهومة كذلك اكيد حلمان
08-14-2002, 01:00 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
قال قال..في حب يا اخوانا اكتر من كده؟؟؟ مين قال انه لا يوجد حب أكثر من الذي تجرأ وقرر وافتى انه لا يوجد أكثر منو؟؟؟ جنس كضب...مرة كتبت لواحدة حنكوشة في رسالة ( كضب) ردت متسائلة...ماذا قصدت بهذا الذي يشبه الضب؟؟؟!!! لا تعليق طبعاً
اختى تماضر لا مانع البتة من فرع غنا البنات المشكلة بس الشتارة نوديها وين؟؟؟ ممكن اقترح اني ابدا اغني ليكن وبعدين انتن دقن الدلوكة عليا..يمكن مرة في التاريخ تظبط معاي سلمت يا حبيبة ونفتح الموضوع مالو...لعيونك آمري
اختي العزيزة الشمشارة زهرة هل سمعتي مرة كيف أن لهجتنا الجميلة تدمر الزهرة الجميلة الناعمة فتحيلها لشجرة نيم؟؟؟ الله يدينا العافية..لدينا قدرة عظيمة لتشويه الجمال.... الف تحية للحضور الغالي والله لا حرمنا من الطلة البهية
08-14-2002, 01:06 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
العزيزة سمايل تكون قريبتك الرسلت الجواب بتشوف التلفزيون كتير خليها تمتنع فوراً رفقاً بالعيال يعني صباحك كله هنا وسعادة وود لا ادري لكني ارتاح لك كأني بعرفك من زمان دمتي ودام حضورك
الأخ المسافر
لدي قناعة ايضاً تكاد تكون راسخة...أن الحديث مع النفس الطريق الوحيد لتنقيتها من الشوائب غايتو ما عارفة الجملة الفوق دي جات صح واللا لا...لانه وقت الغدا وحان كلام البطن سلمت للحضور صورتك لطيفة جداً معبرة دمت
08-23-2002, 01:10 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
أهدي لك تحياتى واشواقي وقبلاتي الحارة من صميم القلب المشتاق الى رؤياك والحديث اليك .... تحية محملة برحيق اخوتك وصداقتك التى تسربت قطراتها الى زاتى من خلال هذه الشاشة المتشابكة الانحاء بما تحوي من كل اطياف البشر واشكالهم....
في الواقع ....كانت تلك بداية تماما كالتى نسردها مرارا وتكرارا في صفحات رسائلنا التى دوما ما نودعها الى مصيرها بابتسامة وقبلة وحضن وكأننا نود ونأمل ان تصل الى الطرف الأخر دافئة وبملامحنا .... وكأننا نوصل بعض من الشوق الي من نود ونجد كثير من المواساة في تقبيل واحتضان تلك الوريقة والتى تحمل في طياتها تفاصيل الشوق المتزامن في اوعيتنا المهاجرة والنائية بعيدا جدا عن بؤرة الوطن .....
تعرفي يا بت قضيم .... احبك لانك تملكين القدرة على تجسيد ما احسه تماما .... وكأنك لسان حالي .... بالامس جلست في مقهى لتناول شئ حار احتمى به من برد هذا المكان.... وكنت احمل دفتري الذي لا يفارقنى ابدا.... وطفقت اعبث بالقلم في يدي وأتأمل الشارع والمارة .... اخذت ارسم دوائر ومربعات واشكال حلزونية .... وسرحت في تلك الفتاة التى دلفت الى المقهى بكامل زينتها ..... لم اسمع ما كانت تقول ولكننى سرحت بخيالي بعيدا عن الواقع .... وحسبتها تطلب ... : واحد .. رجل .. طويل.. وسيم .. مهذب .. هادئ .. طيب القلب.. اسمر الملامح.. ملتزم بالدين.. يحب الوطن.. مرهف.. رومانسي.. ذو اخلاق.. له عمل جيد.. متعلم.. من اسرة محافظة.. .. يقدس الحياة الزوجية.. فيرد صاحب المحل .. متى تودي ان نجهز لك الطلبية .. فترد عليه بثقة .. في خلال الساعة دي وكأنها تقوم بتحميض فلم لصور لها..... ماذا لو كان في استطاعتنا تفصيل رجل الأحلام .... .... وما ان رجعت الى دنيا اللا أحلام ..حتى وجدت اشكالي التى كنت ارسمها وقد تخللتها دوائر وخطوط جعلتها باهته بدون ملامح... وصار مشروبي الحار .. بملامح الجو نفسه... فقمت من مكانى وقادرت المكان .. وانا ابتسم من الفكره .....
وكما قالت سماح انت تتحدثي بلسان حالنا لدرجة تدهشني احيانا فاشعر وكأني انا من كتب هذا الكلام مع جمال اسلوب وسلاسة في السرد والانتقال لا اجيدها لكني اتذوقها جيدا. ودمتي لنا ياجميلة الدواخل.
واسمحي لي ان ارد علي سماح من خلال بوستك.
عزيزتي سماح
تحية وود، لقد قرأت لك كثيرا في سودان نت وهنا واشعر ان من حقك علي ان تعرفي كم انت متميزة و رقيقة المشاعر . اتمني لك كل جميل.
08-23-2002, 01:00 PM
sama7-au sama7-au
تاريخ التسجيل: 06-10-2002
مجموع المشاركات: 674
تحية ليك مصحوبة ببسمات اطلقها مستمدة شعاعها من ابتسامتك واسمك الرائع .... شفاف الملامح.... لك حبي وانت تأتين من زمن تليد اكاد انسى تفاصيله فكم اشتاق ان ابتسم وانت اليوم اعدتي الى خلجاتي الابتسامات الضائعة وقهقهات الفرح الوردي لك ودي
اشكرك عزيزتي واشعر بفرح حقيقي وعميق لاني استطعت رسم ابتسامة جميلة علي ملامحك ، انها الغربة يا صديقتي فهي تاخذ منا اجمل ايامنا وتتركنا نهبة للقلق والتوقع والانتظار فلا نحن نعرف ماذا ننتظر ولا متي سنصل الي مبتغانا وسنظل هكذا كائنات لا منتمية وحياتنا مؤجلة في انتظار العودة. وعندما نعود لن نجد حياتنا التي تركناها ورانا في انتظارنا فلا البلد هي البلد ولا الاصدقاء هم الاصدقاء ولا نحن انفسنا. ابتسمي يا صديقتي وعيشي حياتك ودمتي لنا.
08-23-2002, 06:14 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
والله حركة سمجة اتقنتها اول ان ادخل البورد...اشوف من على المنبر الآن؟؟؟ حشرية متأصلة والله
مساء الخير يا دوما العزيزة أنها المرة المليون بعد المليون الأول يعني...يشبهني احدهم على احدهم...حتى بت اشك...مين دي اللي تشبهني لهذه الدرجة..وكيف لشخص يشبه شخص يشبه روحه فقط والجاز مسوحه؟؟؟ لا بجد...غريب فعلاً...ويبدو ان كل من شبهوني شبهوني على شخص واحد بعينه...وقد تكون هي بالتأكيد هي... حتى أن نفسي الشريرة باتت تميل !!!!لأن اقول بالفم المليان...آآآآي...انا هي... بس؟؟؟ دمتي ودامت مدهشتك
وجن دي اني؟؟؟ نصيحة لوجه الله عسى نكسب شوية محاسن في الآخرة...ارجوك لا تتخيلني قبل النوم...ياخي اتذكري حاجة عدلة؟؟؟ بس عرفتك... جنك تشوفي افلام رعب وتنومي وجن...اول مرة قريت اسمك هنا قريته و...جن...شفتي الذكاء المتقد؟؟؟ خلاص ليك عليا اونسك للصباح..ووحاة الله لو ما بس اخوي عميل في جهاز المخابرات الامريكية وكل شوية داير التليفون...كان فتحت ليك راسك ونسة كلامك بنضح شهد وكل اناء بما فيه ينضح تسلمي يا وجن
08-23-2002, 06:20 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
يا سموحة علمتني التجارب والحياة...ان الرجال تماماً كفستان السهرة...إذا اردنا يعني تتبع سردك وتشبيهك...تفصيلهم دائماً ما يحتاج إلى تدخل وتعديل...إما واسع...او ضيق...المهم أن به بعض تشويه مخل بالشكل العام
والغريب انهم درجموا دائماً على ذكر المرأة...قالوا في المرأة...قالوا في المرأة... ذكاء السيدات اسفر عن اتقاد رهيب لانها دائماً ما تعمل في صمت ولا تتحدث..كان تقول...قالوا في الرجل .. قالوا في الرجل لذلك نحن نصمت..ونتخيل أو نأمل دائماً في أنه يا ليت لو تفصيلنا جاء على المقاس دائماً...لكنه المستحيل بعينه لذا..وجب علينا أن لا نتأمل فنصدم...بس هناك نصيحة أخرى..ان الدنيا تقبل دائماً بتضاد الأشياء...وانا هنا لا امزح...لكن اعتقد انك لو اردتي رجل رومانسي...فيجب ان تكوني واقعية...لو اردتيه جميلاً...يفضل ان تكوني انت قبيحة...لو اردتيه سمجاً..كوني انت لطيفة...وهكذا... قانون الحياة الارديكا....والله لا اعرف كيف اكتبها...لكنه قانون التضاد...وسبحان من جعل المغنطيس المختلف الأقطاب يتجاذب
لا عليك..مجرد هترشة على رأيك
اعود لنفس الموضوع...خلاص لقيت لي موضوع اسويه لبانة
08-23-2002, 08:38 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
بل أنا اتشرف يا زولة بالانتماء لتلك القبيلة الذكية جداً..وهذا ليس مجاملة حيث ان البديهة هبة إلهية...شوفي مثلاً شعب آخر وخلينا نطلع من السودان يقوم واحد ينط لي بي سيفه ويقول لم احترم المش عارف مين القبلي...يعني الخلايجة مثلاً...صعب ان يفهموا نكتة مش يقولوها...البعض بالطبع...بس البعض ده يمثل الأكثرية...الطبع الرباطابي ساخر جميل... بذكاء...حيث انه ممكن يديك من التين ستين لكن بحلاوة لا تستطع معها انت نفسك المشوت (من شوتة) إلا أن تضحك..وهذه لعمري موهبة فذة نادرة..انت تنتقد شخص بحلاوة يرضى بها هذا الشخص بطيب خاطر جميل الله يخلي الرباطاب اجدع ناس وشكراً لذوقك انت...بس ساي ما شفتي باقي المساخة دمتي
08-23-2002, 09:27 PM
zola123 zola123
تاريخ التسجيل: 08-22-2002
مجموع المشاركات: 7
كما توقعت, لم أجد ألطف أو أرق من ردك على محاولتي الأولى للاشتراك في منتداكم الجميل... يبدو الأمر مشجعآ للاستمرار... ما رأيك بمبارزة نكتية على وزن شعرية ؟؟ والموضوع السخرية البحتة!!!! بالمناسبة لا أجد ضيرآ في سرد نكت بلدياتنا الطيبين التي لطالما وجدتها أكبر عنوان للظرف و سرعة البديهة الذي(ظلمونا والله) وسموه مساخة loool أظن كفاية كدة عشان ناس االمنتدى ما يكرهوني
08-23-2002, 09:47 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
يعني لو انت يا زولة من توتال بوست 2 كرهوك ناس المنتدى...يبقى انا من زماااااان في القائمة السودا..بس ما مشكلة...لوننا يضمن لنا ان نكون جزء من القائمة لا يتجزأ ولا ينفصل سلمتي لكل الذوق ما عندي مانع على النكت الرباطابية او المواقف والعجب الوصف المذهل...مرة سألت جارتنا الرباطابية عن العروس جارتنا حيث لم يسمح الزمن بحضور العرس...وصفت بشكل حقيقي من الذكاء بمكان...من ضمن ما اذكره قالت عاد ما شااااء اللللله اريتو عرس عبد القادر ولدي العريس اصصصصصصفر التقول يا يمة عصير منجة محلينه بسكر برتكانة العشاء عشا السرووووور 7 اصناف اريتها السبعة اشواط يا يمة العروس دي كرتوها كرتوها كرتوها التقول الكلية المبروطة لونها ده ما كباية لبن مقنن أبيييييض التقول يا يمة حلبوه من غنماية خواجياية سمحة سمحة سمحة سمحة سماحة الصح...سماحة البنيات لي حدهن
ما عارفة والله هل هي موهبة مكتسبة عندها واللا الطبع الرباطابي اياه..يعني الكلية المبروطة دي بالغت فيها بالجد
بتذكر الباقي وبجيك...
08-24-2002, 07:20 PM
zola123 zola123
تاريخ التسجيل: 08-22-2002
مجموع المشاركات: 7
زكرتيني بتعليقات أخوي الصغير, التي لا أستغرب أن تكون فطرة يولد بيها الطفل الرباطابي له حادثة مشهورة و عمره 3 سنوات فقط يعني أول ما اتعلم الكلام اتعلم التعليقات اللآذعة........ء عندنا جارتنا غياظة هو زاته زهج منها, كل يوم جارة بتها وجاية ...بس يوم قعد يعاين لبتها دي في احدى المناسبات و في وسط النسوان قال : انتي بتك دي ما عندها غير الفستان دا؟............. والله المرة بعدا ما عتيت بيتنا وأخذت الموضوع جد .. أحسن برضه. _______________- اها وعلى هذا المنوال يطفش ليك الضيوف غير المرغوب فيهم... اخرها زول صاحب بابا اسمه (كردمان) برضه من النوع البتستسقله خصوصآ ماما و مسمياه (هم الزمان) بس جانا يوم و قعد أخوي داك في حجره يلعب معاه و سأله بكل براء’: انت اسمك كردمان وللا هم الزمان ؟؟؟ بس والباجي معروف وقف على حيله ولا أذكر انه كرر الزيارة.... طبعآ علوبة أخذ دقة لاكن اعتقد كان قصده شريف loooooool
08-29-2002, 09:33 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
هي يا زولة ما شفت ردك إلا الليلة...بالغ الكبر معانا والله صباح الخير عندك اخو ما شاء الله استاذ...يبدو عليه النبوغ الرباطابي منذ نعومة الأظفار..مش مجرد موهبة عادية ساكت يعني الأطفال عموماً جميلين بهذه البساطة التي يمارسونها عفو الخاطر والله من يوم ما ابو مهيار قال عفو الخاطر دي مسكتها لبانة...الواحد برضو بتعلم من البوردات
تسلمي يا زولة123
08-29-2002, 01:22 PM
zola123 zola123
تاريخ التسجيل: 08-22-2002
مجموع المشاركات: 7
اتفضليه باختي, علوبة ده حسي دكتور قدر الدنيا , بس الله يستر على مرضاه ؛) ... قلتا ليكي الناس في البورد هنا بيردو حسب المزاجات ولا شنو؟ الزول تفائل خيرآ في البداية’, بس أنا دايرة أبو حراز يتحفنا برد هنااذا امكن :؛ waiting
08-29-2002, 10:42 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
يراودني حلم الثورة...عفواً..اقصد الثروة وهو حلم لا مجال للأخذ والعطاء فيه ولا يقبل للنقاش في نظري…فهو حلم مشروع ليس كما يتراءى للبعض وينظر للحالم للثروة نظرة شفقة واستياء….المال والبنون زينة الحياة الدنيا…شخصياُ...يهمني زينة المال...اي والله زينة وكثيراً ما غاظتني اغاني من نوع نبني عشي يا قماري قشة قشة..اساساً يصيبني القش بحساسية...اتخيلني وانا مكرفسة في هذا العش المفروش قش في العصريات...اكرش ذات اليمين وذات اليسار من أثر تعيظ القش وحككانه في جسمي الما ناقص من الباعوض..بعدين العش ده ضيق على جسدي الهائل..لا مجال إذن لترديد مثل هذه المبالغات الهندية البلهاء. المشكلة كانت كيف يمكن تنفيذ هذا الحلم البسيط...الثروة...وأنا ما شاء الله لا حول ولا قوة لي...تعليم بسيط، كسولة لاداء الأعمال...اجلس معظم الوقت متموسحة بالديانا استغل هوا العصريات البارد...اتصفح المجلات..احلم بيوم امتلاكي لمثل شعر باسكال وساقي إلهام وبشرة يسرا اقنع نفسي بانها تركيبات مصروفة أو احرد روحي عديل كده...فالثروة أو الشهرة تستبدل الأجساد الكرورية باجساد نجمات السينما وصاحبات الأعمال والجاه…يعني بالعربي كده القروش بتنضف. وقبل تطور وسائل المواصلات والتكنلوجيا...كانت الثروة مجرد حلم في عقلي الباطن كما يحلو لاطباء النفس الترديد..فكنت اردد للجكس كما تردد النساء قاطبة في مشارق الأرض ومغاربها أن (القروش ما مهمة..ودي ماديات تهون بالحب...المواصلات زحمة صحي وتكره وكلها ناس عرقانين لكن العربية تزيد المشاكل الصحية والكروش) أو ( ممكن نتغدى سخينة ونتعشى ضحك) أو (نلبس دمورية ونطبخ تقلية) وما إلى ذلك من جمل البلاغة التي كنا نتبادلها وبنات الحلة لللإيقاع بالفريسة...سيرة الدهب والتياب واللازي منو لا تجئ خوفاً من الطوفان... لكن بعد أن اكتشف الجكس أن فمي العنبي محض أحلام وروج...وشعري الغجري محض (سلة) ودوا فرد...وحواجبي محض خدعة وكحل فطفش..وجدت أنه لا داعي لهذه الجمل البلهاء...واسرعت انفذ هواياتي التخيلية بأن أكون ثرية، وجائتني فكرة عبقرية… جريدة الشرق الأوسط مثلاً…تفرد شهرياً مسابقة بثمنها استطيع أن املئ ليس تلاجتي فحسب..بل تلاجات الجيران كلهم…(انا زولة دنية بتحب الأكل)…أما مجلة زهرة الخليج نقودها بسيطة لا تملى احلامي أي نعم..لكنها تجعلك تقابل النجم المفضل لديك..فقط لتمسح عينيك في بهاء طلته أو طلتها وتقول للناس أنك والله شفت مثلاً نوال الزغبي بعيونك الحياكلها الدود أو كأنما قابلت شيطان المصباح (ذي شيطان الكوشة كده) لو كانت هذه النجمة هي النجمة الطيارة رزان المغربي .. حيث تطير بين كل صدور عدد مجلة الجديدة والآخر حوالي 76 مرة فقط… المجلات العربية والصحف التي تقدم جوائز عصية العد حقيقي…محازلة العد تضييع وقت…المهم اشتري وعبي الكوبون ورسل واحلم .. على المستوى المحلي…جريدة سودانية تدعي أنها تستطيع تمليكك كمبيوتر محمول.. لو اشتركت في المسابقة واجبت الإجابة الصحيحة بأن فلون العلون عالم ذرة ورجل دين وكابتن طيران عسكري خريج ثانوي ذي الفل… لم اكن اركز نظري الحقيقة على الصحف السودانية…فانا لا اطمح في كمبيوتر ولا تحرك فيا مليون الجنيه السوداني ساكناً…معليش يعني… لكن في الحتة دي بالذات وطنيتي صفر على شمال…ورحم الله امرء عرف قدر وطنيته وحلفايته وسينما كلوزيوم زاتها. حلم الثروة يمكن برضو أن يحققه لك صابون تايد…او زيت عافية…أو بسكويت كابتن ماجد…كلهم يضعون الثروة بين يديك.. التلفزيون والقنوات الفضائية بقى…حلم آخر يراودني…ابدأه بمن سيربح المليون..أو شوفة جورج قرداحي… ثم وزنك ذهب…وهذا البرنامج لا اركز فيه كثيراً فمعلوماتي العامة عندها سل مزمن.. غير برامج التليفونات آلو…مين اللي شعره اصفر وعيونه زرقا وأول حرف من اسمه راغب علامة ..لكني ايضاً ارتبك وتطير مني الإجابة لاني اعلم ان صوتي يذاع على الهواء مباشرة فلا اركز كثيراً في هذا النوع من المسابقات خصوصاُ أن جوائزها حقيقي عرة..ولو ان المشاركة في الكل تعطيك الفرصة للفوز الأكبر وبالتالي تكوين ثروة. الطريق للثروة كبير والطرق للوصول اليها عبر التلفزيون والصحف والمجلات سهل…المهم النشاط… لكن…المشكلة الصرف…ثمن المجلات والصحف والمنتوجات التي لا تستخدمها عادة تشتريها فقط للجوائز المرفقة…غير فاتورة التليفون القرب ابوي يتبرى مني بسببها… كل هذا لا يعطي الأريحية لتكوين ثروة بروية وهدوء وكيف كده ذي كيف القهوة…بعدين اللداحة في بيوت الجيران العندها دش المسابقات..تسئ لسمعة المليونيرة القادمة..ثم أن البحث المضني حول الإجابات مزعج وممل…من أين اعرف انا من هو مخترع السكسيفون؟؟؟ اساساً انا ما عارفة السيكسيفون ده شنو!!! عمل أختي الكبيرة…فتح لي أفاقاً واسعة لتحقيق هذا الحلم الجميل…حيث دخول الوطن لعالم الإنترنت… وتعميم العمل به 24 ساعة في المكتبة العامة الخاصة بعملها…غير رزالتي والإصرار على زيارتها يومياً وتتنيحي المتقن في الجهاز واستيطاني اللديح بدون تأثير الكلمات القاذعة القوية فيا…ساعدني لدخول عالم النت من ابوبه الواسعة العريضة…عالم الإنترنت الجميل…فهم يفتحون لك ابوب النعيم برسم دخول جداً بسيط… سنتان وانا اشترك في مسابقات النت… لم يشدني شئ فيه غير المسابقات والجوائز…صفة اللزوجة التي امتلكها خلقة ساعدتني في استمرار اشتراكي في المسابقات رغم اني ولا مرة في السنتان كسبت ولا دولار حتى… ما بارحني الامل…حتى جاء الفرج…فلكل مجتهد نصيب…وانا الحقيقة اجتهدت حتى قرب بصري أن يركب التونسية.. ارسلوا يخبرونني بأني فزت بمليون دولار امريكي وبضعة الآلاف فكة كده …اصبت حقيقي بغيبوبة…ادخلوني مستشفى خمستاشر نجمة… غزوا في يداي وارجلي كل ابر ودربات العالمين…علم من بالمستشفى أن هذه الأخت قربت تبقى مليونيرة…فتقرب لي حتى كدايس غرف الولادة…غرفتي تنظف في اليوم الواحد ما لا يقل عن 24 مرة… اعطوني كل انواع التغذيات التي انا فعلاً في حاجة لها… كله على الفاتورة التي سيدفعها عالم النت والشركة إياها. وبعد أن تحسن وضعي اخرجني الدكتور على كفالته لأنه يعلم ان بضعة الألاف دولار ليست بالشئ اليذكر لمليونيرة تمتلك مليون دولار امريكي وشوية الالاف فكة. تقاتلت الصحف لعمل اللقاءات الصحفية معي لكني بصراحة رفضت رغم ميلي للموافقة..لكن حبوبتن لينا عاقلة جداً…نصحتني بان العين الله يجازي محنها…قد تطير المليون دولار في طريقها للبلد…تريثت وتمسكنت ريثما اتمكن. كل من له مشكلة ما وعدته بالحل…بل أن قريبتي التي قبلت في الجامعة في كلية القانون وهي ممتحنة علمي ترغب بدراسة الطب…سحبت أوراقها لأني وعدتها قطع شك ان اصرف على تعليمها من إلى في مامون حميدة ولا مشاكل. عدد الشيلات التي كتبت لستها لا يحصى ولا يعد…كتبت كتابة يا اخواني … لما روحي اتسلت. صديق لنا فتح لي حساب في احسن بنك في العاصمة لتسهيل إجراءت نقل المليون دولار أمريكي … يوم الجمعة قضيناه في البحث المضني عن ارض تطل على النيل يرد هوائها الروح لابني لنفسي منزلاً احلم بامتداد مزرعة أمامه يرمح فيها حصان الكارو الذي يمتكله إحدى أعمامي الحالتهم صعبة شديد.. طبعاً بيتنا لم انساه…حيث نزلت ببعض النقود التي كنت احوشها للزمن لوري طوب تمهيداً للقصر الذي تخيلته مكان البيت المهتك ده. ما خليت مضى شهر…وانا انتظر … شهر ونصف …اطمئن نفسي بأن لا مشاكل… عد المليون دولار لا بد ان يأخذ وقت…هذه ليست مليون جنيه سوداني…دي امريكي والأمريكي بجرح.. لما مضى شهران بالتمام والكمال…بدأ القلق يأكلني…يكون زول غشاني وسرق مني الجايزة؟؟؟ خالتي المهجومة دوماً زعزعت إيماني بالنقة… فقررت أن اقطع الشك باليقين…وابعث برسالة شديدة اللهجة لهذا التعامل الذي لا ينم عن ذوق ابداً.. واهددهم بانني قد اقيم شكوى قانونية ضد الصفحة الما عارفة اساساً هي وين…المهم أي كلام اخوف الخواجات ديل قايلننا هينين يأخروا لينا قروشنا؟؟ عارفين ردوا قالوا شنو؟؟؟ رسلي لينا 20 دولار شان نرسل ليك المليون دولار وبضعة الالآف من الفكة!!!! انا طبعاً ما زعلانة .. لكن هسة المشكلة الطوب ده اوديه وين؟؟؟
08-29-2002, 11:47 PM
بت قضيم بت قضيم
تاريخ التسجيل: 07-05-2002
مجموع المشاركات: 2048
بالجد كلامي كتير...بعدين البتاع ده الباندوث ما اتملى إلا بعد ما انا جيت...اكون يا الله السبب؟؟؟؟ الحبيبة الزولة 123 طبعاً اتفضله ما دام دكتور...اصلوا الفيزيتا اليومين ديل نار الله يحفظه ويخليكم لبعض عن ظاهرة الرد يعني والله انا ماشة بنظرية اكتب واقرا ،إذا تفضل حد رد عليك كتر خيره، وإذا لا برضو كتر خيره زرت العديد من المنتديات العربية من قبل...الحقيقة مع التجربة يعني وجدت أن نفسياً...أغلب المشاركين في المنتديات في حاجة للكلام أكثرية الأغلب ديل في حاجة للصراخ لذلك احياناً احس انه في وقت ما تتساوى رغبة الكل في الكلام..نتحدث بصوت واحد متداخل نسمع اي نعم لكن نسمع بتشويش .. لا تركيز في الموضوع المهم ان هناك مجالاً وفضائاً للحديث والصراخ والفضفضة غير الخيال طبعاً وهذا اكبر علاج نفسي يمكن أن يمارسه الانسان فاتكلمي وسيبك المهم ان تسمعيك انت سلمتي للحضور يا غالية
بت قضيم انتي مقريك شيطان ...عيني باردة ..عين البورداب فيها حجاب......لكي ملكة هائلة في السرد ...اوعي تفهميني غلط و تقولي اني قاصد اقول ليك انك براية ... و حقيقي كما قالت واحدة من بنات الحلة كل البيقرأ كلامك بتخيل ان هو الكاتبو ....لكن عند المحاولة نفشل في مجاراتك .... اضحكني كلامك عن الثقافة .....جانا واحد بلديات .....و قال جنو وجن شاي المثقفاتية ..... احترنا العلاقة شنو بين الثقافة والشاي عرفنا انو قاصد الشاي السكرو خفيف... لك كل الاحترام
حلوة شاي المثقفاتية دي أها تاني بمسكها لبانة شكراً يا الفنجري على كلامك الجميل جداً ولا تقلق لن افهمك غلط أنا ادرى الناس بأني حقيقي براية دمت والتحية للجميع
09-18-2002, 11:41 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
بصراحة يعني عارفة حتقولوا الناس في شنو والحسانية في شنو لكني اطالب إدارة البورد (انا زاتي مالي ما عندي نفس) بالآتي تخصيص راتب شهري لأنه والله اعلم حدسي يخبرني اني ماش اترفد بسبب هذا ا لمكان الداهية الذي دخلت الله يقطع شياطينكم جميعاً اللهم آمين ما نشتغل معاكم يعني؟؟؟ !!!!
03-03-2003, 11:51 PM
DKEEN DKEEN
تاريخ التسجيل: 11-30-2002
مجموع المشاركات: 6772
راتب شهري يا كرور يا ما بتشبهي الزول النصيح ما زمان في واحد من ابورداب ديل قال ليكي لقد ( حرقتي حشاشتي) فاضحي بذلك مستعدا لان يدفع ليكي راتبو كلو ويديكي لاب توب وعدسات لاصقة قعر كباية ويسوقك معاهو اينما توجه في سيارة امريكة الصنع وتصرف وايت بنزين فقط للخروج من القراش ، وانتي بس تقعدي و تكتبي وتخرفي ..عرض عليكي كل هذا الديقتال وانتي قلتي يهو بي كل برود حشاشة يعني شنو ؟
03-04-2003, 06:23 AM
بت قضيم بت قضيم
تاريخ التسجيل: 07-05-2002
مجموع المشاركات: 2048
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بت قضيم
Abomihyar
sama7-au
Tumadir
المسافر
doma
وجن
zola123
فيس بوك
تويتر
انستقرام
يوتيوب
بنتيريست