|
|
 حلم الاغتراب
|
حلم الاغتراب
لم أكن أفكر يوما في الاغتراب ولكن ...
أميمة زميلتي قالتها صراحة : حب شنو يا عزيزي هو تاني في حب الواحدة عايزه تأمن مستقبلها والله يجيني واحد مغترب أبيعه في لمح البصر ( المباع خطيبها الذي رفض الخروج من الوطن )
جارتنا حاجة نفيسة أسمعها تتونس مع الوالدة ( إن شاء الله ود الهنا والسرور هو خلا حاجة جاب السعودية كلها لبت حاجة آمنة إن شاء الله حال ولدك وحال وليد ولدي) وتؤمن الوالدة على دعواتها بالإيجاب وهي ترشف القهوة .
في المواصلات أقابل معتز رفيق الدراسة شكله رايق وفايق ومبحبح : طبعا يا سيدي أخوك مغترب – وقبل أن نفترق يهمس في أذني : بالمناسبة جاني عقد عمل وقربت الم في الزوله ( التي خطبت منذ 6 سنوات) شنو أنت ما ناوي تطلع بره ؟ يسألني تعرف عادل طلع على هولندا وياسر سافر لبنان وأحمد عارف أحمد أقسم يدخل السنة دي أميركا عن طريق المكسيك الآن رافع شعار المكسيك . ويقفز من البص ويتركني معلقاَ في وسط الشماعة ( شماعة البص) وأنا أحمل أوراق التقديم للعمل كمدرس بحكومة جمهورية السودان والراتب 30 الف جنيه
عندما أصل البيت ينفجر المنزل والجيران والأصدقاء والمعارف والأهل أخواني قالوا: تدريس شنو إنت مجنون الأساتذة كلهم اغتربوا إذا التعليم نافع ما كان طلعوا ويصفقوا بأبيديهم ساخرين ومستغربين ومستعجبين من الذي يريد أن يصبح مدرساً
الجارات في ذات المساء ونسبة لانقطاع التيار الكهربائي متجمعات حول الوالدة ولا حديث إلا عني : أحسن ليك تفرش بصل – بيع مويه – ما شفت بتاع الموية في برنامج من الخرطوم سلام قال الصافي اليومي 6000 جنيه وانت تشتغل مدرس ب 30الف جنيه طلب الفول ب 600 جنيه وأقل قميص ب 18 الف جنيه و ..و.. و،... ( هل أواصل )
السفر .. الاغتراب ... الهجرة ... الدولار بناء المستقبل تطاردني المفردات في كل مكان في الطرقات والشوارع في ضحكات الناس وفي غضب الجيران
وأطرد فكرة التدريس بالضربة القاضيـة وأجري خلف جواز السفر وخلف تأشيرة الخلاص .
( أربعون عاما من الاستقلال والبلد لا زالت تراوح مكانها مختلف الوجوه والألسن والياقات والرتب والنخب والايدلوجيات والهتيفة والمتثقفين والمنتفعين والمأجورين – والبلد تضرب تمام للخلف – أربعون عاما والبنيات الأساسية لا زالت بعيدة والتدهور طال حتى قيم الناس – حتى الأحلام باتت لا تتخطى ( الكسره والملاح) وإن ارتفعت فهي تبحث عن جواز سفر ويا جواز السفر ما أكثر إيلامك )
ما أن ظفرت على أختام الدخول والخروج على جوازي بعد رحلة مضنية ومرهقة ومكلفة عرفت فيها الرشوة لأول مرة في حياتي حتى تقاطر الشباب بالتهنئة بالخروج من البلد الذي أصبح طاردا – والدعوة لي بالنجاح وأننا السابقون – وهم اللاحقون والجارات القريبات حضرن لتهنئتي أما الأعمام في الحاره والرجال فطلبوا شد الحيل والاجتهاد )
وفي ليلة الحصول على الأختام ( تأشيرة الخروج والدخول) وفي ليلة فرح السوداني المهاجر جاءت خديجة جارتنا ممازحة ( بعد دا أنا مستعدة أديك رانيا ) – أذكر أن خديجة جارتنا قابلتني بعد التخرج بشهور وأنا جالس على كرسي أمام المنزل وهي داخلة المنزل قالت حينها ( خلاص حصلت الجماعة ( أولاد الحلة) وبقيت عاطل بشهادة ) ضحكت أنا وقلت لها ( والله يا خاله عاطل لكن رانيا دي ما بخليها ( رانيا بنتها الصغرى) قالت حينها ( عشم ابليس في الجنة ماله بتي بديها لعاطل ...)
ونواصل ...
(ولا زالت القصـة في بداياتها قصتي وقصتك أنت عزيزي المغترب والذي يقف على شرفة الاغتراب )
جميع الحقوق محفوظة لدليل المواقع السودانيـة والعربية والخدميـة
|
|
 
|
|
|
|
|
|
|
|
Re: حلم الاغتراب (Re: zico)
|
زيكو
صباح الخير
سلام تعظيم لي زيكو والله يازيكو الليله بالغته تلاته مواضيع كل واحد احسن من التاني هههههههههههه يكه سكت دهرا ونطق كفرا ههههههههههه يكه اسمع اخبار ابو النسب شنو اوع يكون جاي بي نفس الفكره ههههههههههههههههه يكه وبعدين نواصل انا ماشي خلاص
زاتو
_____________
| |
|
|
|
|
|
|
|
|
|
Re: حلم الاغتراب (Re: ALZOLZATOO)
|
زيكو
نفسى اضحك الضحكة اياها لكن حظروها والزول ذاتو قال اذا ما كتبوا اسموا ما يكتبوها
لكن غلبتنى ياخى
هييييييييي يكه
اغتراب قال
وحاجة نفيسة قال
غايتو انا منتظرك تكمل الحكاية
لكن يا زيكو المحيرنى الناس جوه البلد ما بصدقوا المغتربين اصله لمايقولوا ليهم الاغتراب كعب..
يقول ليك طيب وقت كعبب انت المقعدك شنو ما تجى ؟؟
سؤالهم وجيه
لكن ما عارفين الورطة البيقع فيها المغترب يوم قطعته البحر..
المهم كمل يا زول
والحديث ذو شجون
يكه..
| |
|
|
|
|
|
|
|
|
|
Re: حلم الاغتراب (Re: قرشـــو)
|
ارسل لي اخي الاصغر خطاب قبل فترة
تعالو لنقرأ معا هذه الفقرة
وهو علي فكرة موجود داخل السودان
ساكتب لكم ما ارسله لي اخي بدون تعليق
وعملك كيف هو ؟ هل انت مبسوط فيه وحقق لك طموحك ويحقق لك الرضا ام انه مجرد عمل والسلام لان البديل الجيد لا يوجد ام انه محطة فقط لرحلات اخر0
هل استطعت من خلال هذه الغربة وبعد اكثر من عام ان تجد نفسك وتحقق ولو القليل ام ان الحال عبارة عن غربة وشوق والم فقط؟ هل وضعك هناك احسن ام بالسودان كان احسن ؟ هذه اسئلة لابد من الاجابة عليها بعد هذه الفترة كما ولا بد من تقييم وضعك بصورة اشمل وعمل جردلكل الاشياء بلغة المحاسبة حتي لا تتسرب السنين من بين ايديك ويصعب معها علاج الامر او العودة مرة اخري ويصبح الشخص اكثر خجلا ولا قدرة له علي تحمل الحقيقة المرة وهي الفشل وعدم تحقيق اي شئ يذكر نتمني من العلي القدير ان تكون نتيجة جردك ايجابية وممتاذة حتي نطمئن عليك وندعو لك بالتوفيق والسداد
ما رائكم ادام الله عزكم
| |
|
|
|
|
|
|
|
|
 Re: حلم الاغتراب (Re: zico)
|
مالك يا أبو الزيك مفتح الجروح.
عارف أنا- والله- اليوم صحيت على صوت المنبه الساعة ستة ونص صباحاً. قمت أجرجر في السفنجة ماشي على الحمام وبعد وصلت الحمام قلت أنعل أبو الشغل لابو الغربة وجيت راجع ختيت لي سفة ورقدت. غلبني النوم خوفاً من التفنيش. رجعت تاني الحمام وأنا العن في أبو اليوم المرقني من بلدي ,وأبو الناس الأجبروني على المروق. وجيت الشغل وما زلت أسب.
| |
|
|
|
|
|
|
|
|
 حلم الاغتراب (Re: zico)
|
السلام عليكم ورحمة الله وبركاته
يا اخواني الاغتراب صار فاشل ووأوصي بنات بلدي بعدم الجري وراء وهم الاغتراب
المغترب بق قش ساكت وللملم أنا مغترب
يعني يكفي قولت الشاعر علاء الدين أبو سير
الاتي تغناء بهاء الفنان عبد الرحيم أرقي
حبي انا ليك كان زادي كان جوه الحنايه دفين
كنت بضاري من الناس وخايفه عليه من العين
يعني بعد مرة سنين وهي تنتظر حبيب الغربه كان الغدر من المغترب
وقد رد عليه الشاعر محمود أحمد محمود بقوله
حبك خلي زاد لليله الصوم والفطور معروف الاخلاص ديمه ليه دليل
مالك ومال حبيب الغربه والجنبك ياهو جمل الشيل
بما اني لم احفظ هذه القصايد كامله لكن لكم هذه القصيده التي لم أعرف الشاعر
لكن يحكي حال المغترب في بلاد الغربه
ياغربة يابكاية ياغشاشة يامستهبلة
تغرينا بي درهم قروش ووراه قنطار بهدله
جيناك نقعد بس سنة وحاجاتنا ناقصة نكمله
نبني البيوت في العاصمة ونفرش اثاثها نجملة
وكرولا حارة نرسلها اصله النقل صار مشكله
ونكمل الدين بمهل والسمحة جاهزه نحصلة
غير القروش اللبي الاهل عبر الشهور حنرسلة
والباقي يدخل في البنوك ونشوف دياره ونشغلة
ناس فكرت تجني العلم وتبدا الدراسة تواصله
أحلام كثيرة وشيقة وآمال كبيرة مدنكلة
لكن حساباتنا الغلط في كل عام بنرحله
مرت سنين من العمر بنعزها وبنفصلة
والحسبة وصلت طاشرات إمكن نعيش ونبدله
وتعال نحاسبك ياوهم من غير رقم او امثله
كان للقروش نجري ونحوش لكن تقول بنشاكلة
ماراضية تقعد في الجيوب وتقول حرامي بينشله
ممحوقة مابتقضي الغرض وأقل حاجة تكملة
كملانة في البطحاء وحق وزن ومجاملات مستفحلة
ضرائب ابو عاج المشي والزامي حمدي نحوله
وأحلامنا ديك صبحت سراب نمشي ونجري ونحصله
ياريت يكون هم القروش ياغربة فيك هو المعضلة
لكن تعال شوف الهموم الما أفتكرنا نقابله
ذله ومهانة وأحتقار خلو النفوس متململه
سجنا كبير فيه الكفيل سجان قيوده مكبله
أشغاله شاقة ومؤلمة ودائما تكون مستعجله
مرض الضغط والسكري ومرض القلب ووجع الكلي
مصران وقرحة وأكتئاب ونفوسنا مامحتملة
وبقينا فيها كيمان لحم تحت الهدوم متندله
واكيد حيكون أكل المعلب وأكل المجمد عاملة
عدم الرياضة والكندشن لابد ليهم صله
وكمان تعال لي معادلة ماقدرنا اصلا نعدله
سجن العيال جوه الشقق والا فراق العائلة
جيب العيال بي جيبنا مال وجيوبنا غيره مميلة
وصغارنا صبحت بالزهج متوحشة ومتجفلة
لا قادرة تدرس بي نفس من الدروس المذهلة
تلقي الولد غالبه الكلام والبت كبيرة مريلة
كل الضغوط جاتهم سوا ماقدرنا حتي نقلله
في كل طرف تلقي القرف تلقي الخيوط متداخلة
أما الفراق أصل الوجع ومشاكلة بايتة ومقيلة
كل زول مفارق عارفة كيف مافي داعي ابدا نفصله
ياغربة أديناك كثير أدينا خاطرك يسهلة
خلينا نرجع بالفضل نلحق حياتنا نعدله
آمالنا فيك بدري أتنست ألا الرجولة متوحلة
وبقينا ذي أهل القبورلا البره عارف يدخلة
ولا الجوه يرجع لي وراء يحكي الحقيقة يوصلة
لكن خلاص هان الخلاص عدك نزل مهما علا
وأنشاء الله نحيا نودعك وتكوني ذكري نفارقة
وتكوني ذكري نفارقه
وتكوني ذكري نفارقة
ورد الله غربة كل مغترب عن بلده واهلة
[email protected]
تلات سنين دي غربه لا مال انجمع ولا حل غربه
عشان مهرك
مع خالص تحياتي ليكم
| |
|
|
|
|
|
|
| |
ALZOLZATOO
قرشـــو
انور عمر
almulaomar
فيس بوك
تويتر
انستقرام
يوتيوب
بنتيريست