|
|
 ظرفاء المدينه .. دكتور عوض دكام .. والفنان عبد العزيز محمد داؤود
|
مما لاشك فيه ان لكل مدينة ظرفاء واهل فرفشه وقفشات مضحكة
دوما تجدهم حاضرى البديهه وسريعى النكته لاتمل مجالستهم .. او صحبتهم .. وفى الخرطوم اشتهر المرحوم الدكتور عوض دكام بخفة الظل
والنكته .. كما اشتهر المرحوم عبد العزيز داؤود حتى ان النكات ظلت تنسب لهم بعد مماتهم ... لهم الرحمه
قد يحفظ كل منا موقف ..او نكته لاحدهما ... هلا اتحفتمونا بها
وتكون ضربة البداية منى
عوض دكام قالو جاتو بنتو الصغيرونه وقالت ليهو ... يابابا فى المدرسه قالوا لينا لازم تكنسوا الفصل .. وانا ماعايزه اكنس ولا تكلم لى الابله ولا تعمل شهاده مرضيه عشان يعفونى
عوض دكام طنطن براحه كده وقال بالله شوف الخادم دى!0
من الصباح ساق البت ومشى المدرسه البنيه متكيفه
قال للمعلمه ..0
اسمعى ياختى بتى دى تكنس من البوسطه للمحطه الوسطى ... 0
ومشى خلاها
********
طبعا مع احمد قنديل ليهو حكاوى ... قالوا ام دكام ماتت وقنديل ماجا عزاهو فى الوفاة ... اها بعد فتره ام قنديل ماتت قام عوض دكام اتسده ومامشى ليهو .... قنديل قام لومو لى بعض الاصدقاء كده
قام دكام سمع اللوم ورسل لى قنديل ورقه بيقول فيها
القدم بالقدم .. والامهات كلهن خدم
**************
دكام كان مدير مستشفى الاسنان وشالوه من المنصب .. وجابو مدير جديد
واحد من اصحابو لقاهو بيتحاوم بى بره .. قال ليهو مالك يادكام حايم بى بره ...رد دكام .. ياخوى ماضرتى جوه مابقدر ادخل ( بيقصد المدير الجديد )0
****************
ابوداؤود
قال ليك ابو داوود جا ماشى بالشارع لقى ليهو مره كبيره وقف وشالها معاهو ... المره لمن وصلت محلتها ونزلت قالت ليهو شكرا
والله عمليتك دى اولاد عرب مابيعملوها
*************
برضو لقى ليهو تلاته نسوان سمان كده وركبن معاهو من حلتهم .. واحده قالت ليهو ماعرفتنى ولا شنو انا مادار السلام ... التانيه قالت ليهو وانا مادار النعيم .... نط ابو داوود وقال للتالته
انتى انا عرفتك ... اكيد دار الرياضه
*************
ابو داوود قال فى طالب كل يوم جالدينو فى المدرسه لانو مابيحفظ اسماء الله الحسنى ... واحد صاحبو قال ليهو اسمع انت ماتكتب اسماء الله الحسنى فى لياقة القميص وتسمعها من هناك
فعلا صاحبك كتبها فى لياقة القميص .. الاستاذ اول واحد قال ليهو سمع
صاحبك بدأ يسمع
الله
الرحمن
الرحيم
الملك
القدوس
اسندكو
( اسندكو شركة قمصان معروفه )
*****************
ابو داوود وكابلى مشو رحله فنيه امريكا وحجزوا ليهم فى فندق غرفه مشتركه ... الغرف صغيره وضيقه كده المهم نامو ولما صحو الصباح ابو داوود قال لى كابلى ياخى نغير الغرفه دى ...كبالى قال ليهو ياخى دى غرفه ظريفه ... او داوود قال ليهو ..ياخى انا الليل كلو اطلع انقلب بره واجى تانى من شدة الغرفه ماضيقه
**********
مع الاعتزار لكل المبدعين
اه يا جماعه لمتزكر ليهو نكته .. او موقف لابوداوود او عوض دكام
يكتبوا لينا هنا
ولكم الود
ديك الجن
|
|
 
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
التحية ليك يا ديك الجن
الا رحم الله الفنان الاستاذ عبد العزيز محمد داؤود
والدكتور / عوض دكام
بقدر ما قدما لوطنهما
د. عوض دكام
قالوا في واحدة من المرات كان بتكلم مع الحارس حامد بريمة
قام عوض دكام قال لحامد بريمة
: والله تعرف يا حامد يا أخوي إنت كان ما كورتك دي
وأنا كان ما طبي ده كان حسع مكاوينا تتطاقش
ابو داؤود
قالوا مرة سافر ابو داؤود والبلابل في رحلة فنية
وبعدين قاموا نزلوا في الفندق في غرفتين كبيرتين وبهما سرير دبل واحد كبير
قاموا البلابل مشوا على غرفتهم فقام أبودؤاود قال ليهم واحدة من البلابل تجي تنوم معاي علشان توسع على اخواتها
قاموا البلابل قالوا ليه : لا نحن التلاتة بنرقد في السرير الكبير ده
وانت امشي لغرفتك وارقد في سريرك
قام ابوداؤد حك راسه وقال ليهم : خلاص حأمشي أنوم في غرفتي وانتو كان واحدة فيكم اتضايقت تجي تنوم معاي
وكان انا اتضايقت بجي انوم معاكن
رحمهما الله
مع تحياتي الجعلي
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: الجعلي)
|
شلاقه .. والجعلى شكرا لاثراء الساحه الفكاهيه
وبالغت ياجعلى فى مكاوينا تتطاقش دى
بمناسبة حامد بريمه
قالوا الزعيم فيلب عباس غبوش كان عندوا ندوه فى العشش
قام قال للجماعه ... اولاد ارب ديل هقارين شديد
كل شئ يشيلوه هم ويدونا شئ تعبان
حتى فى كوره دى مصطفى النقر يودو لى قدام وحامد بريمه
يخلوه اخر واهد فى الفريق
شوف ليك هقاره
لوووووول ياجعلى
ديكو
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: (Re: DEEK_ALJIN)
|
ديكو اللذيذ
فعلا عوض دكام وابوداؤود من اجمل السودانيين
بحكم سكني في مدينة بحري ظللنا نلتقيهما لسنوات طويلة وكنا لا نفوت فرصة في الحديث لهما منذ ان كنا طلابا في الثانوي
ولم يحدث ان قابلنا اي منهم بعبوس او تضايق من وقفتنا معه لفترة طويلة تحت هجير الشمس
عوض دكام بعد زيارة للسعودية ساله اصدقاءه عن السعودية
قال ليهم
السعودية كباري بلا بحر
وبيرة بلا سكر
وحليب بلا بقر
كان معروف بهلاليته في مرة الهلال لاعب مع المريخ والعيادة مليانة عيانين
قام قلع البالطو وقفل المكتب ووقف فوق العيانين وقال ليهم
شوفتو ليكم زول مات من اسنانو
امشو وتعالو بكرة
رحمهما الله رحمة واسعة واسكنهما فسيح جناته
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
ديك الجـن موضوعك روعة
قال ليك أبو داوود بغني في قعدة و واحد جنبو مرض شديد
كل شوية إقول لي أبوداوود
:- زهرة الروض يا أستاذ زهرة الروض يا أستاذ
أبو داوود إضايق شديد و الراجل مصر
:- ( زهرة الروض يا أستاذ و الله بيت واحد منها برجعني عشرين سنة) .
قام أبو داوود وقف الغناء و إتلفت على الزول و قال ليهو
:- إنت عمرك كم سنة يا خوي ؟؟؟؟؟؟
:- أربعين سنة
:- بغني ليك بيتين علشان ترجع بطن أمك تاني .
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: ABUHUSSEIN)
|
ديك الجن و كل الاعزاء
بوستكم بالحيل لذيذ
ذكرني بوست للاستاذ صلاح الباشا في سوداننت قبل اشهر
شاركت فيه اماسي الحزينة الله يطراها بالخير بالطرفة دي
ومن طرائفه التى حكتها عنه زوجته الفاضلة فوزية محمد حسين انها ابان الفترة الاولى من زواجهما..ظلت تسال عبد العزيز كحال اى عروسة جديده تود ان تعبر عن حرصها عى زوجها..تساله:عبد العزيز ماشى وين؟؟
يقول: الاذاعة...
هى: وحتجى متين؟؟؟
هو :بعد ساعتين..
و فى وقت اخر:عبد العزيز ماشى وين؟..
هو : عندنا حفلة عرس فى امدرمان...
هى :وبتجى متين؟؟؟
هو: بعد اربعة ساعات
..وهكذا من يوم لاخر..وفجاة بادرها يوما...تعالى يا فوزية انا مؤجر منك عجلة!!!!!؟؟؟
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: alsara)
|
من القصص المحكاة عن عوض دكام قصة مفتشي الزكاة
دخلو عليه في لعيادة وقالوا ليه نحن ناس الزكاة قال ليهم والله كويس انتو بتجو للناس والناس ما عارفة تجيكم كيف،، جاب ليهم الببسي ودردش معاهم والجماعة اعجبوا بالترحيب والونسة وفي نهاية قالوا ليه اهه نحن عاوزين نحسب زكاة العيادة
قال ليهم يا جماعة ان جينا للجد موضوعكم ده ضريبة ام زكاة حسب الشرع، قالو ليه حاشى لله ما ضريبة ده زكاة مال متقوم
قال ليهم خلاص انا براي مال متقوم وما علي زكاة انا باسيادي امشو ليهم قاعدين خليهم يدفعوا ليكم الزكاة
مرة في بحري كنت اشتكي من ألم بأسناني وقابلني صديق لما عرف بألمي قال لي عوض دكام صديقي بمشي معك ليه هيا هيا قلت ليه عوض دكام ذاتو ياخي ممكن تكون المصاريف تقيلة والحال مش زي بعضه ، قال لي ماعليك وبعد تقلع ضرسك انا بشيل ليك حق المواصلات منه ،، تشجعت ولما وصنا البناية قابلناه نازل وقام صاحبي صاح فيه يادكتور عوض ماشي وين وانا جايب ليك صاحبي تكشف عليه ،، قال ليه قول ياعبد ضارباك فلسة اسنان شنو انتو عندكم اسنان ، من الضحك نسيت موضوع الألم وصاحبي اخد الفي النصيب وفي الطريق قال لي في الحقيقة كل ما افلس بجي لي عوض دكام ،، قلت ليه من فلسك الدائم ده اكيد ساكن في عيادتو
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
والله يا ديك الجن زى ما قال ليك العمده قرشو
ضحكنا من اعماقنا وجد لفته جميله منك واستراحه لطيفه ..
انا بتذكر قبل كم شهر كده هنا فى مسقط وفى النادى السودانى كان عاملين حفل خاص عن الاستاذ المرحو ابو داؤود
وبعض اعمامنا الكبار وكانوا معاصرين ليه ذكروا كتير جدا من نكاته .وبتذكر ليكم منها النكته دى وكانت حقيقه حصلت
قال كان عندهم حفله فى القطينه ..وهم مجموعه من الفنانين ومعاهم برعى محمد دفع الله وهو صاحب ابو داؤود جدا ..انقطعت بيهم العربيه فى الريق للقطينه . ومرو على قريه صغيره فى الطريق وكان قبل المساء ..
لقوا ليهم بيت فيه حاجه كبيره سلمو عليها ودخلوا ..الحاجه اكرمتم ودخلتم ..وما كان عندها شى فى البيت غير باقى ملاح الغداء .. جابتو ليهم فى العشا على طريقة كرم اهلنا الكبار وبقولا ليك عيب الزاد ولا عيب سيدو ..المهم كان ملاح ام رقيقه ..او ويكه كا يسميه البعض مننا
وقال الايادى بدات تتزحلق جوه الصحن تمسك يد صاحبك قبل ما تتاكد دى يد منو تقوم تزوق منك بمساعدة الويكه لووووول..
وده كلو والدنيا كانت ضلام بس فانوس صغير .. والمكابسه دى كلها بفتشو على اللحمه . فجأة برعى قال ليهم انا قبضت .. وطلع ليه عضم كبير وبدا ياكل فيه ويكايد فى ابو داؤود . وابو داؤود خلاص زهج من التفتيش اتاكد انه مافى غير العضم الما من نصيبو ده ..قام قال ليهم يا جماعه انتو المرا دى كانت طابخه ملاحها ده بى شليل ولا شنو ؟ لوووووووووووووول
الاظرف من ده كلو فى ناس والله كبار اكبر مننا كانو بسالوا قالوا شليل ده شنو ؟؟ ما عرافه هل فى زول هنا برضو ما بعرف شليل ؟؟ حتى لو ما شفناه سمعنا بيه والله فى معظم احاجينا السودانيه
يعنى مثل حبوبه تقول ليك الموت لو ما ضقناه الترب شقيناها ..
انا شغلى ده زاتو شغل حبوبات ..بصراحه بحب ونسة الناس الكبار وبرتاح اعرف القديم العتيق عن بلدى .. وبتمنى الناس تسال من القديم لانه صدق المثل البقول النسا قديمو تااااااه .. والله نحن قديمنا معتق وتراث نعتز بيه ويديكم الف عافيه
التحايا لكم جميعا
| |
|
|
|
|
|
|
|
|
 Re: ظرفاء المدينه .. دكتور عوض دكام .. والفنان عبد العزيز محمد داؤود (Re: soma)
|
Dear Soma,
I hope every body on this board knew what you ment by SHELAIL. Like you said, we need to recognize and revitalize our heritge.
I like the old folks vocabulary and idoms.
here is little something to refresh our old heritge
What is Tamak? try to guess before you look at the answer at the bottom
Tamak: means watermelon or BETEEKH, the word is used in the ALJAZEERA area specially on the east side of the nile, areas such as RUFFAA, UM7RAIZAT and BANNAT...etc
| |
|
|
|
|
|
|
|
|
 Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
من من ابناء امدرمان لا يعرف كمال سينا لاعب المريخ السابق؟
طبعا هو من اعلام مدينه امدرمان وكفي
يروي هذا الموقف هو شخصيا مع زوجته
عربيته بايظه وقاعد في البيت كم يوم وما طلع اي مكان
والزوجه غير موجوده خلال تلك الايام من بيت ابوها لي بيت
اختها ومع المجاملات الاجتماعيه
وعمك سينا مره العصريه قاعد براه جنب العربيه وزهجان والمدام كالعاده مافي اول ما جات لقتو قاعد في الواطه جنب العربيه
قالت ليه ياراجل انت جنيت ولا شنو؟
قال ليها يلا ارح نفحص ليك
قالت ليه تفحص لي شنو انا ما عيانه
قال ليها لا
افحص ليك فحص الي عشان ارخصك واطلق العربيه
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: بت امدر)
|
التحيه ليكم اهلي الطيبين
اديكم واحده من بيت الكلاوي لي ابو داود
كان في لقاء في التلفزيون مع ابو داود و كان القاء عن اسئله خفيفه المهم في فقره من البرنامج المقدم سال ابو داود عن اسامي بعض الاشخاص يعني لو ما كانو وصلو لي الوصلو ليهو كان ح يطلعو شنو . قام المقدم سالو عن محمد الامين , ابو داود قال ليهو شايل كورتو و قاعد جم الجامع الكبير
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: WaD OmI)
|
والله انت رائع يا ديك الجن ،،،،
لاكن فتحت باب انشاء الله ينسد
يعنى نقول سيرة وانفتحت
وانا اشارككم بهذه النكته
قالو ابو داؤود مشى بيت فرح على اساس احياء حفل ، لاكنه وجد الفنان القدير المرحوم / خضر بشير واقف على المسرح ويغنى ، ومعروف المطرب خضر بشير انه ينفعل مع الغناء ،،
عندما وصل ابو داؤود ووجد هذا المنظر سحب ليهو كرسى وقعد
يتفرج وهو زعلالان وحموق ، وكان امامه طفل واقف يشاهد فى المطرب خضر بشير ، قام ابو داؤود قاليهو ابعد كدة ولا كدة يا ولد ، اوعى تطير فيك شلوفة ولا اصبع يفلقك ...
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: دباش)
|
ظرفاء المدينة كثر..ولكل حي ظريفه..بس لحدي الآن ما ظهرت
لينا ظريفات ليه؟ حتى بت قضيم هي الفاضل سعيد؟
وبعدين..في زيارة لعوض دكام لإحدى دول الإغتراب في عهد الإنقاذ..سألوه يادكتور كيف الناس عاملين في البلد مع الظروف الإقتصادية الصعبة ودا؟ فقال ليهم والله الناس عاملة زي الكدايس البتتعاشر الفوق يكوركوا والتحت يكوركوا
وأرجو المعذرة
| |
|
|
|
|
|
|
|
|
|
Re: Re: ظرفاء المدينه .. دكتور عوض دكام .. والفنان عبد العزيز محمد داؤود (Re: garjah)
|
لك التحيه ديك الجن وانت تذكرنا بالمرحوم عوض دكام والمرحوم عبد العزيز داوؤد رحمهم اله رحمه واسعه
قالوا مره المرحوم عبد العزيز داوؤد عمل ليه حادث بعربيته ضرب ليه واحد قام الراجل مشي اشتكاه اها القاضي سال الراجل قبيلتك شنو قال ليه شايقي الضابط بتاع الشرطه برضو قال هو شايقي القاضي برضو طلع شايقي اها لما سالوا عبد العزيز داوؤد قالوا ليه انت جنسك شنو؟ قال ليهم انا عبد شوايقه
قالوا برضو المرحوم دكتور عوض دكام ايام التلفزيون كان كله جيش ودفاع شعبي وكده التلفزيون بتاعه خسر شالو وداه للتصليح وقال للراجل بالله هاك صلح لي المجروس دا
سلام اهلي الحنان
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: شلاقة)
|
اهلا بيكم
اول مرة اشارك في البورد وحتكون افتتاحية ظريفة
النكتة عن الدكتور رحمه الله
في يوم جاتو واحدة من بنات اهله زعلانة وبتحكي ليه:
ملحت
مع واحد طلع شغا في الحكومة (هو السيد ..... لااتذكر اسمه لكن الكان عندو محاضرة دائمابعد نشرة تلاتة في الاذاعة وبقول ايها الشعب السوداني البطل) المهم سالها عن رأيها في الحكومة وهي ما بتعرفه فنبزتها ما خلت ليها حاجة اقصد الحكومة زعل الحكومنجي وقال ليها ما عرفتني انا ....انزلي يا ....ونبزها هي زاتها من عربتي فرد عليها المرحوم ليطيب خاطرها هو نبز خادم الحرمين الشرفين خلي انتي يا خادم العباسية
واحدة تاني وطبعا هو متزوج مصرية فواحد من اولاد اهله طلب بتو فرد ليهو شنو ياعب انحنا
ننظف وانت توسخ
اسأل عنهم من لقيت وهم معي
وتطلبهم عيني وهم في سوادها
ويشتاق لهم قلبى وهم بين اضلعي
ajaj
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
التحية يا شباب
عندنا واحد صاحبنا عندو زواج أخوه و عايز ليهو جزمة للعرس و الوقت ضيق
أخوه العريس مغترب جاب ليهو جزمة و هو بجرب فيها قطع الجزمة الكراع ماشاءالله
المهم لفينا على المحلات في أم درمان لي جزمة لقينا جزم كتيرة لكن المشكلة المقاس
بقينا لم ندخل المحل نقول ليهو جيب أكبر مقاس عندك ما مهم النوع أو الشكل
المهم أكبر مقاس تعبنا و آخر حاجة دخلنا محل تومو شيك
و نحن واقفين قلنا للراجل بالله أكبر مقاس جزمة عندك جيبو
الراجل جاب الجزمة و أنا و صاحب المحل نجابد في الجزمة علشان تدخل في كراع صاحبنا
و تعبنا خلااااااااااااااص
و احد بي وراي هبشني في كتفي و قال لي :-
يا إبن العم ؟؟؟؟
إتلفت لقيتو أبو داوود قلت ليهو :- نعم
قال لي :- صاحبك دا و ديهو المصنع علشان إقطعوا ليهو جزمة
| |
|
|
|
|
|
|
|
|
 مواضيع مميزة (Re: DEEK_ALJIN)
|
يا جماعة عندي اقتراح وهو أن نقوم بنشر المواضيع الميزة بهذا البوست سواء كانت عمود بجريدة أو مقال أو قصة أو رواية أو شعر أو نثر الخ..... رأيكم يهمنا
| |
|
|
|
|
|
|
|
|
|
Re: مواضيع مميزة (Re: Wadmirghani)
|
رحم الله الفقيدين
اسمحوا لى ان اضيف الاستاذ خضر بشير لذوو الروح المرحة
قال ليك خضر بشير عندو رملة كابيها برة البيت متعود يرشها الساعة 12
بليل ويجى يشرب سجارتو بمزاج فى الرملة المرطبة
يوم رش الرملة ودخل البيت جوة لمن جه طالع لقه ناس السوارى موقفين حصينهم ورقدو يتونسو فى الرملة المرطبه
دخل جوة قال يقعد شوية امكن يمشو
رجع بعد ساعه ولسه قاعدين
ساعتين ولسه قاعدين
لمن زهج مشه جاب كوريك وطلع ليهم
( ازيك يا استاذ )
( اهلا -- عن اذنكم دايرين ندخل الرمله دى )
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
ديك الجن شكرآ للبوست الجميل دا
قرجة شكرآ للجهد
الدكتور عوض دكام
سايق عربيته الساعة واحدة صباحآ فى منطقة القماير بام درمان و ناس الشرطة عاملين كمين
للجماعة بتاعين السكر؛؛؛ ماشين بي وراه متابعينه
و طافين الأنوار و هو ماعارف اول ما وقف جنب الخور و نزل فتح الضهرية بتاعت عربيته
بس و لعوا ليك فيه الكشافات و ديك يا الكواريك
ثابيييييييييييييييييييييييييييييييييييت
المهم هو عرف الحاصل شنو و هم لسع ما عرفو؛؛؛ الضابط كورك ليه بالمكرفون
شايل شنو فى عربتك؟
الدكتور بي كل برود قال ليه شايل جنا حرام
اها الدورية كلها تنشنت جو ناطين ليك علي العربية ؛؛؛ لقوا ليك فى بيض فاسد
كل الموضوع بيض فاسد؛؛؛ كلموا الضابط
قام الضابط جاه قريب عشان إستفسر منه
فعرفه ؛؛؛ قال يا دكتور دا كلام شنو دا
كيف يعني جنا حرام؟
دكتورعوض قال ليه...يوم واحد سمعت ليك بى ديك عقد ليه علي جدادٌة؟
ربنا إرحمهم و يغفر لهم بقدر ما اعطوا لأمتهم و بلادهم
و لكم تحياتي
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: maia)
|
في عام 1988 في ليلة قبل عيد الفطر قدم الفكي عبد الرحمن سهرة تلفزيونية رائعة مع البلابل مع الموسيقار بشير عباس وكانت البلابل في تألق وانسجام مع المذيع والموسيقار حتى نسى الجميع مراعاة ما سيقوله المتزمتون ، كانت روعة وكان الضيف الوحيد في السهرة عوض دكام وكان بادي الإعجاب فظل مبتسما طول السهرة ولم ينطق بكلمة
طبعا في صباح اليوم التالي هاجمت الصحافة مقدم السهرة بقوة وسمت حضور عوض دكام بثالثة الأسافي ودوره شنو جالس مبتسم على طول كده دعاية مجانية لعيادة الأسنان، عدة صحف هاجمت عوض دكام غيظا من الطريقة التي قدم المذيع السهرة وقصده شنو في أن يجعل عوض دكام الضيف الوحيد الصامت الباسم
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: DEEK_ALJIN)
|
كل التحايا لهولاء الظرفاء
ومااحوجنا ونحن فى هجير الغربه لما يدفئ مشاعرنا ويكفى ان نعيش مع هؤلائ الظرفاء
قالو عوض دكام كان دعوهو لاجتماع في بدايه اايام الثوره والاجتماع كان فيهو الرئيس وناس الثوره اياميها كانو مطلعين شعار نأكل مما نزرع اها لمن الاجتماع خلص الرئيس لاحظ انو عوض دكام مستعجل في الطلوع قام سالو قال ليهو مالك مستعجل كده يادكتور قال ليهو ابدا سعادنك بس ماشين ناكل ممانقلع
قلت ارحل اسوق خطواتى من زولا نسى الالفه
رحلت وجيت فى بعدك لقيت كل الارض منفى
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: xspice13)
|
هاكم دي
في السبعينات ظهرت كميه من الفنانين وابو داوود عداداتو وقفت سالوه قالو ليهو الحكايه شنو قال مالاقين ناكل عيش مع البكاس, بعد مده سوق الفنان عثمان حسين حره واحد سال ابو داوود عامل كيف مع البكاسي ابوداوود رد ليهو المشكله هسع ما البكاسي المشكله الكومر العمروه ده..
ابوداوود كان بحب الاكل جدا وقبل عشي الفنانين كان بقزقز مع المدعويين قعد في طربيزه لقي الضلع رقبه اتحول لطربيزه تانيه لقي الضلع برضو رقبه اتلفت علي العريس قاليه انتو ضابحين زراف والا شنو...
الفنانين كانو بزوقو من حفلات المجاملات وعادة بكون عندهم اكتر من ارتباط في جماعه دقو الباب وختو ليهو جماعه وراء البيت نط الحيطه لقاهم قدامو قاليهم زايق من جماعه ثقلاء بدوقوا في الباب انا هسع في دربي ده ليكم....
| |
|
|
|
|
|
|
|
|
|
Re: ظرفاء المدينه .. دكتور عوض دكام .. والفنان عبد العزيز محمد داؤود (Re: shawgi badri)
|
في الخمسينات كنا بنتقابل في الصباح مع سينا امام قبه الشيخ غريب الله لكي نفترق عندمنزل عبدالله خليل لكي يتجه مع صديقه ابشر لمدرسة الاهلية ونواصل نحنا لمدرسه بيت الامانة قبل اسبوعين اتصلت بصديقي معتصم قرشي ووجدت معهم كمال وقرش ذكر لسينابان شوقي رسليك كتاب قاليهو فيهو دولارات؟.
في الثمنينات قال سينا للصادق المهدي عندما ساله عن الحاله في البلد قاليهو ياسيدي الدفتر بقي اغلي من جزء عم.. طبعا يقصد دفتر اللفز
زميل الدراسه الدكتور امين النور شقيق الشهيد بابكر النور اراد ان يشتري ترتاره لاهله فاعطاه عبد الحميد حجوج والذي كان قد اشتري كل عربات الخرده من حكومه السودان فقال د. امين العربيه كويسه بس عاوزه ليها لساتك , مكنه وجربوكس و... قال كمال الحاجات دي لو ركبتها في اي عنقريب حيمشي.
عندما كان ابو العايله لاعب الكره سكرتيرا لفريق المريخ متشددا ويبسط سيطرته علي كل شئ خاص بعد ان رقي الي رتبة صاغ, وعندما كان اللاعبين في النجيلة امام البوفيه كان ابو العائله يهدر منتقدا المستوي الضعيف للعيبه فاخرج سينا جنيها وقال لبلال الفراش بالله يابلال جيب لي واحد شاي وتسعه وتسعين صاغ.
| |
|
|
|
|
|
|
| |
garjah
قرشـــو
ABUHUSSEIN
المسافر
manubia
Elmosley
ود الخليفه
WaD OmI
سمندلاوى
banadieha
bint algazeira
ajaj
omar_ragab
Abu Mariam
بارعة
cola
Wadmirghani
ودالحلفاية
woroorrook
OmDur
SAdo7
xspice13
shawgi badri
فيس بوك
تويتر
انستقرام
يوتيوب
بنتيريست