محجوب التاج محجوب انتظره ابوه وامه يتخرج (طبيبا) فتخرج (شهيدا)!!

كتاب سودانيزأونلاين الموقعين على إعلان الحرية والتغيير
إحتفال السودانيين بالساحل الشرقي لولاية ميريلاند لدعم الثورة السودانية
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 18-02-2019, 08:22 AM الصفحة الرئيسية

مدخل أرشيف للعام 2018م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
29-01-2019, 05:59 PM

بكرى ابوبكر
<aبكرى ابوبكر
تاريخ التسجيل: 04-02-2002
مجموع المشاركات: 20334

للتواصل معنا

FaceBook
تويتر Twitter
YouTube


محجوب التاج محجوب انتظره ابوه وامه يتخرج (طبيبا) فتخرج (شهيدا)!!

    05:59 PM January, 29 2019

    سودانيز اون لاين
    بكرى ابوبكر-Peoria AZ USA
    مكتبتى
    رابط مختصر



    محمد عبدالماجد

    لقرايه أم دق

    (1)
    • كانت الخرطوم – شارع طويل ، وبيت ناصية ، فاتح شرق ، و(شافع) ماسك ليه راجل كبير في السن عشان يقطّعو (الزلط).
    • عيون الناس كانت هادية ومطمئنة ، يبدو منها الامان والحب والطيبة ، والخير كان بُعم ، لم يكن له تلك الخصوصية الموجودة الآن ، ولم تكن هناك (تخصيص نغمة) للقبيلة او الانتماء السياسي.
    • كل هذه الاشياء ، عرفناها اخيرا.
    • العنقريب كان بشيل مية و (بص الجريف) بشيل فوق الالف ، ممكن تركب وتنزل وما تدفع...تمشي ساي.
    • الناس مترحمنة.
    • والسودان كان مليون ميل مربع.
    • لا اتقسم ولا اتوزع فلل رئاسية.
    • كان شاي المغرب (ثابت).
    • والحبوبة في البيت كلمته تمشى على الجميع.
    • شارع النيل كان في النيل – ما كان بينه وبين النيل الف عمارة ..والف كافتريا ..ونادي عائلي ضخم يغطي نص مساحة شارع النيل في الخرطوم.
    • في اعرافنا ، لسه (الحوش الكبير) فاتح ، الناس تدخل وتطلع منه. و(صينية الغداء) تخش وتمرق من كوم لي كوم.
    • ما في طلب (زيادة) بيرجع.
    • الطفلة التى كانت وسط اللمة منسية في (الحزن القديم) ،ما كان بتخاف عليها من خطف او اغتصاب.
    • الدنيا بخير.
    • شفعنا بيلعبوا في الحلة ويرجعوا تاني يوم – ما في زول بخاف عليهم ، ولا في زول بعاين ليهم.
    • ما كان في (مشروع حضاري).
    • ولا توجه بالشكل دا.
    • لكن ما شفنا لينا حاجة غلط من زول.
    • لا قطع رؤوس.
    • ولا كتائب ظل.
    • لا تاتشر.
    • ولا بمبان.
    • في مروتنا (كروية اللبن) ، لسه بي لبنها لمن (الشمس تشرق) ،وهي تحت العنقريب ، وابوك يدق ليك في (كراع العنقريب) ، ويقول ليك : (قوم قبل صلاة الصبح ما تفوتك).
    • في حكاياتنا زول جاء من البلد جديد (ريحة التمر فوق الهدوم لون الخضار خانس لبد) ..زول اول مرة يجمع بين (البيبسي والباسطة) ، اتصوّر (سيلفي) قدام المحل ورسل الصورة للقروب بتاع الحلة.
    • عملوها (ايقونة) للمجموعة.
    • صاحبكم قصد يخلي باقى من (الباسطة) في صورة السيلفي عشان عارف الموضوع دا بيحرق فشفاش سعد ود الجضون.
    • وسعد ود الجضون زول ضعيف قدام (الباسطة) بقضي حتى على (الورقة) التى كانت (الباسطة) موضوعة عليها تعقبا لاثار (السمنة) على الورقة.
    • الناس كانوا بتلك البساطة قبل ان تظهر حساباتهم في ماليزيا.
    • الوقت داك ما كان في (سيلفي) ، لكن (الوصف) كان اقوى من صورة السيلفي.
    • ما كان في سيلفي.
    • ولا مواقع تواصل اجتماعي.
    • لكن التومة بنت جرديب ..بتنقل ليك الحاصل ولا قناة الجزيرة مباشر!!...بتخط ليها (شخيط) في الواطة ، وتقعد تحكي.
    • عندنا زول وصاف شديد ، وقت يوصف ليك (البسبوسة) تلحس ايدك وراه بدون ما تشعر ، ووقت يجيب ليك سيرة (السمك) تشم ريحتو!!.
    • تشبع وتمشى تغسل ايدك بالصابونة من ريحة السمك.
    • مرة وصف لينا هدف والي الدين محمد عبدالله في الاهلي الخرطوم نحن لغاية الآن بنعيد في الهدف.
    • وبالبطيء كمان!!.
    • الحاجات دي كلها راحت وين؟.
    • حاجاتنا اتغيرت.
    • اختفت.
    • او انتهت.
    • في حاجة غلط!!.
    • حسن ود الجضل ، ركب البحر مشى اوروبا – في ناس بقولوا غرق في البحر ، وفي ناس بقولوا شافوه في سوق التلاتاء بتاع بروكسل قاعد ليه قدام ست شاي (بلجيكية) ، وبقرأ في صحيفة (الدار).
    • امو لغاية الآن حارسة التلفون ، أي جرس يخش بتفتكرو ولدها حسن ود الجضل.
    • والطيب ود التمومة في سجن ام درمان ، دخل السوق ومضى ليه شيكات جابت خبرو.
    • محبوس بـ (يبقى الى حين السداد).
    • وعثمان ود ابوشلخة عمل ليه مشروع زراعي خسر معاه ، واختفى من البلد ، ما معروف هسع هو ذاتو وين؟.
    • طفش.
    • عثمان ود ابوشلخة قالوا زرع ليه (بطاطس) ناس الحكومة قالوا ليه نحن من اية (بطاطسية) عاوزين لينا (كوم بطاطس).
    • زرع ليه (بصل) ، شالوا قصاد أي بصلة (ملوة بصل).
    • خلاها (بور) – عملوا حوشته (ملعب خماسيات)!!.
    • ركبوا ليها كشافات – الساعة 220 جنيه.
    • والامين ود الجريتيقة ، عندو (7) عيال ،مشى الدهب ، وقالوا كل (6) شهور (بيمسكل) لي اولادو من رقم غريب!!.
    • (ذهب) ولم يعد!!.
    • الناس ديل بعد (الكتل) الحاصل دا ، تاني ممكن يقولوا لينا شنو؟.
    • عندي احساس قوي ، يقولوا ليك في (بنت) ، طلّعت ليها (تاتشر) من شنطتها و (7) عساكر.
    • طلعوا من الشنطة وانتشروا في المنطقة.
    • الكلام دا مصور بالستالايت.
    • وعشان نحسمها ليكم – البنت (شيوعية)...وخالها بيشجع فريق (الموردة)!!.
    (2)
    • طالب كلية الطب (محجوب التاج محجوب) ، انا ما بعرفو شخصيا ، لكن بعرف والده لاعب الهلال السابق والمدرب الحالي بسلطنة عمان.
    • اخوه الصغير ، ما شفتو في حتة إلّا كان معلق في رقبة ابوه.
    • ومحجوب الزول الكبير – شايل المسؤولية من بدري.
    • زول مسؤول كدا ومشحون بالوطن.
    • الناس ديل دخلت بيتهم في الصحافة ، شربت شايهم ، واتفرجت في تلفزيونهم ، بيتهم زي (نادي الهلال) مفتوح لكل الناس.
    • عشان بعدين ما تقولوا لينا (محجوب) طلع روسي!!.
    • نحن عادة نكتب عن الحالة وليس الاشخاص ، لذلك عندما كتبنا عن الطفل (المجهول) محمد عبيد كنا نكتب عن (الطفولة) ، عن (البراءة) الراحت وليس عن محمد عبيد تحديدا.
    • لا تهمنا الاشخاص.
    • ولا الاسماء.
    • ولا نفرق بين هذا وذاك.
    • ماتوا 22 طفلا غرقا في نهر النيل – كل الذي فعلته الحكومة لاهلهم في منطقة البحيرة بنهر النيل برقية تعزية.
    • حتى برقية التعزية ارسلت بعد قناة العربية والجزيرة والامراء العرب رسلوا تعزيتهم.
    • يعني بقت على محمد عبيد!!.
    • 22 طفلا ماتوا عشان عاوزين يقرأوا.
    • عاوزين يتعلموا.
    • غرقوا في رحلة (سلمية) ، اقصد في رحلة (نيلية).
    • 22 طفلا ما كملوا (كتابي الاول).
    • لسه ما حفظوا جدول 4.
    • يا ريتهم اليوم داك لو كلهم الـ 22 طالبا كانوا قد شالوا في اليوم الذي سبق رحيلهم (دفتر العيادة).
    • يا ريتهم لو كذبوا زيّكم ،وادعوا (الحمى) ، على الاقل هم اطفال ، كذبتهم مسموحة.
    • هذه هي (الطفولة) التى نكتب عنها.
    • لكن حكاية الطالب محجوب التاج محجوب ، درس في حد ذاته.
    • شاب في المقتبل ، يفيض حياة وحيوية ومروة.
    • ناس الحي في الصحافة بحكوا عن شاهمته ، قبل ايام قليلة من رحليه اقتحم احد المنازل التى اشتعلت فيها النيران والحريق من اجل ان ينقذ اهلهم.
    • كان منقطع لمثل هذه الاعمال.
    • ضحكتو حايمة في وشو اليوم كلو ، ما غابت عنه حتى وهو يودع هذه الفانية.
    • في اعتقاله الاخير كان متصدرا لحماية زميلاته البنات في كلية الطب بجامعة الرازي.
    • كان زول بتلك (البشاشة) ، يمازح الجميع ، ويضحك مع الكل ولا يتأخر في مثل هذه المواقف.
    • محجوب اثبت عمليا ان (الجود يفقر والاقدام قتال).
    • ما بخاف.
    • لا من بمبان.
    • ولا تاتشر.
    • وهو دفع حياته بسبب شجاعته تلك.
    • ولد التاج محجوب عاش (محجوب) ومات (محبوب).
    • اجتمع الناس بعد رحيله كلهم على لطفه وبشاشته وشهامته.
    • ليتني املك بعض المعلومات عن كل الشهداء لنكتب عنهم ، فهذا اقل ما يمكن ان يقدم لهم وهو يقدمون ارواحهم في سبيل غيرهم.
    • سوف نجتهد من اجل الحصول على بعض التفاصيل ، حتى نتعلم من الدرس.
    • سوف نكتب عن أي واحد فيهم ، متى ما توفرت لنا المعلومة الصحيحة.
    • وهذا هو (محجوب) ود التاج محجوب.
    • ابوه التاج محجوب لاعب الهلال السابق بيلاقى الناس في صلاة المغرب وبسوق ليه سبعة – عشرة – خمسة من الجامع عشان يشربوا معاه الشاي.
    • بسوق من طرف.
    • دي حاجة بشهد عليها.
    • عشان بعدين ما تقولوا لينا (شيوعي).
    • زول هادي وحبوب ، وما عندو قضية مع زول.
    • التاج محجوب اتغرب وسافر ومشى سلطنة عمان ، عشان يعلم (محجوب) ويدخله (كلية الطب).
    • درّسه طب بقروشه – ما قروش الحكومة.
    • دفع عليه من دم قلبه...عشان يتخرج (طبيب) ما عشان يموت قدام باب الكلية بطلق ناري او في المعتقل.
    • محجوب من (الرازي) بدل ما يتخرج (طبيب) اتخرج (شهيد).
    • لا دفاع شعبي.
    • ولا في ساحات الفداء.
    • التاج محجوب بحكم شهاداته في كرة القدم – وهو لاعب هلالي سابق شهير ولاعب منتخب وطني ، كان ممكن يقعد في البلد دي ويعيش على اسمه.
    • يخلف رجل على رجل.
    • يدرب في الهلال او يمشي أي نادي اخر في الممتاز ، لكن ما عمل كدا.
    • التاج محجوب فضّل يتغرب عشان يأكلها بعزة وشرف.
    • وعشان (محجوب) ولدو يقرأ طب.
    • الليلة يا ربي وقت يقولوا ليه (ولدك) اتكتل قدام الجامعة بتاعة الرازي ح يقول شنو؟.
    • نشرحها ليه كيف؟.
    • نوصلها ليه بي ياتو طريقة؟.
    • بنت طلعت (خرطوش) من شنطتها!!.
    • نقول شنو؟.
    • زول وضع كل طموحاته ، وكل اماله في (محجوب).
    • سماه على والده ، تأملا فيه ، ورهانا عليه.
    • محجوب (برازيلي)؟.
    • محجوب (ارجنتيني)؟.
    • محجوب (كويتي)؟.
    • ابدا – ابدا ...محجوب والله (سوداني).
    • سوداني زيّ وزيك.
    • مننا وفيّنا.
    • بيتابع مباريات الهلال ووقت الهلال يتغلب بنوم القوا.
    • الباب ما بقفلو.
    • محجوب بيلبس جلابيته البيضاء وبيمشى صلاة الجمعة.
    • بقيف مع الخالة والعمة في الشارع.
    • وبقولوا عليه لمن يمشي أي حتة دا ولد (التاج محجوب) لاعب الهلال السابق.
    • محجوب مات.
    • محجوب اتكتل.
    • ما في غزة.
    • ولا في سوريا.
    • ما في ليبيا.
    • ولا في الصومال.
    • ما في سينا.
    • ولا في البوسنة والهرسك.
    • محجوب مات هنا.
    • اتكتل قدام جامعة الرزاي.
    • كان شايل ليه (دفتر) ما (كلاشنكوف).
    • (قلم) ما (مسدس).
    • كان شايل (سماعة) ما (خوسة).
    • كان بقرأ (طب)..ما (حركة مسلحة).
    • ملامحه مازالت (طفولية) والناس في الحلة بتقول ليه يا دكتور وهو لسه طالب في السنة الثانية.
    (3)
    • وحكاية اخرى لا علاقة لها باحد.
    • سقط امامهم قتيلا برصاصات اخترقت جسمه النحيل.
    • طلقة في رقبته.
    • وطلقة في رأسه.
    • وطلقة في صدره.
    • اتوزعت الطلقات على جسمه توزيع قناص ماهر.
    • فارق الحياة مباشرة – لم تمهله تلك الطلقات التى اخترقت جسمه النحيل ان يبقى على قيد الحياة لمدة ثواني بعد ان اصابته.
    • سالت دمائه الطاهرة يبدو منها رائحة المسك ، فقد كان يهتف قبل سقوطه قتيلا (سلمية ..سلمية).
    • تجمعوا حوله المحتجين ، وحموله على وجه السرعة ، لمشرحة بالخرطوم ، وظلوا مرابطين هناك انتظارا لتقرير الوفاة.
    • انتظارا لنتيجة (الستالايت) ، فقد يكون سبب الوفاة (ملاريا خبيثة).
    • او قد تكون النتيجة ان (المرحوم) فارق الحياة قبل 121 سنة من تاريخ وفاته الحقيقي، في معركة كررى التى كانت بين قوات المهدية والقوات البريطانية ونحن ما عارفين ذلك.
    • الستالايت ممكن يعملها.
    • وشباب الثورة (لا جابتهم شيشة لا رجعهم بمبان).
    • ديل لو ناس شيشة ما كان بقوا ضد جماعة (تقعد بس)!!.
    • ولا حول ولا قوة إلّا بالله.
    • وحسبنا الله ونعم الوكيل.




















                  
|Articles |News |مقالات |بيانات

30-01-2019, 05:05 AM

Abdlaziz Eisa
<aAbdlaziz Eisa
تاريخ التسجيل: 03-02-2007
مجموع المشاركات: 22194

للتواصل معنا

FaceBook
تويتر Twitter
YouTube


Re: محجوب التاج محجوب انتظره ابوه وامه يتخرج ( (Re: بكرى ابوبكر)

                  
|Articles |News |مقالات |بيانات

30-01-2019, 11:28 AM

Yousuf Taha
<aYousuf Taha
تاريخ التسجيل: 03-05-2013
مجموع المشاركات: 682

للتواصل معنا

FaceBook
تويتر Twitter
YouTube


Re: محجوب التاج محجوب انتظره ابوه وامه يتخرج ( (Re: Abdlaziz Eisa)

    Quote: • فارق الحياة مباشرة – لم تمهله تلك الطلقات التى اخترقت جسمه النحيل ان يبقى على قيد الحياة لمدة ثواني بعد ان اصابته.



    مات تحت التعذيب والله اعلم حسب رواية التجمع
                  
|Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de