حتقول شنو؟ لما الخلوق تتلاقى تطلب حقها قصاد الكريم يوم الحساب؟! حتقول قتلت عشان شنو؟! شان تحمي أرضك من شنو؟! شان تحمي شعبك من منو؟! حتقول شياطين وسوست؟ هو الجاب شياطينك منو؟! ... فلنفترض في الدنيا دي.. صدقنا كللللللنا قصتك.. شفعنا و الناس الكبار.. صدقنا انك في جهاد.. و انو القصاص واجب عليك.. و انو المخرِّب بيستحق يتصفَّى شان رفضك و ثار.. و انك أمير المؤمنين.. و انك بتعمل بالكتاب والسنة ..و أعوانك خيار.. و انك كما بتقول دوام شايل شديييد هم البلد.. و انو المواطن جدعزيز.. ما بترضى لو حقه اتفقد.. و انك نقي و مسؤول شديييد.. و انك بنيت.. و انك شقيت.. و انك بسيط على قدر حالك.. و القريشات بالعدد..
حتقول شنو..؟!
لمن يجو الأمات جميع ..واقفين جوار قرة عيونهم ..و ما عفو الدم الزمان حللت ينزل بالرصاص.. حللت ينزف للأبد..
حتقول شنو..
لمن يقابلوك المساكين البطونهم سكتوها بموية بي كسرة و بصل.. و اكلت انت و جاع بلد..
حتقول شنو..؟!
لمن نقابلك كلللللنا.. نحن الرعية الما رعيتنا.. رقصت فوق أوجاعنا ياما.. عصرتنا و طلعت زيتنا.. صرخت فينا الله أكبر.. و جيت بإسم الله أذيتنا.. أمرت جندك يقتلونا.. بدون إذن يقتحموا بيتنا.. هضمت ياخ أبسط حقوقنا .. و جينا طالبينك أبيتنا.. بهتَّنا.. و شهَّرت بينا.. قتلتنا.. و مثَّلت بينا.. و الله ولا يوم خفته فينا.. مليتها بلدك بالخراب.. رخصتنا برخخخص التراب.. سديتها أبواب أي خير.. و فتحت للشر ألف باب..
وريني بس يوم الحساب.. حتقول_شنو؟!
#تسقط_بس
01-22-2019, 10:20 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
محمد طه القدال: الشوارع .............. مشارعَ الخير.. شوارعَ غِــير شوارع شعـبَـنا الحَـبُّـوبْ كَـسَـاد ورَمَـاد حِـداد وسواد ولا بتعرِف تـقول الروب وكلما تجَهجِها الوثبات بتعرِف لُـغْـوَة الراندوق بتتعَـتَّـر تقوم مَـرَّات وتتوَقَّــع وفجأة تهِــب علي طولها تقيف من نَـهْـدَة الوِقِّــيع وتخَـبِر كيف تَـفِــك الطوق وتعرف وين تلُخ الطين وتعرف كيف تَـدُق الطوب وتدي المعنى للطِـقّــيع شوارع الخير .. مَـشارع غير مشارع كُـلَّـهِــن وِلـدَنْ ولا نِـدْمَـن وما مِـن الحُـزُن عِـدمَـن ولا توب الكرامه رَمَــن وزادَن في الكَـرَم كِـوِّيع شوارع ما بتبيع روحها ولا حتى بتقِــلب البيع شوارعنا الشوارعية تلاقي اللَّافَّة في الــلَّــفَّة وتخُت السفَّــة في السفَّه وتَــحَــبْس الدمعة بالصِّـنْـقيع. شوارعي بيقرا في اللابتوب شوارعي بيكتب الواتساب شوارعي يدقِّس العاملين جهاد وجَــداد شوارعي بيبدا بى نَـمَّة شوارع منتهى العِـصـيان يصاقْع الأنبيا الكَـذَبَـه ويسالم (مصطفى) النُـبْـيان فهذي النَـمَّـة نَــمَّة سوط يسوط الأدعيا الفَــسَــدَه ويلوس الكاذِب المزعوط يعود ينتِـف .. معِـط .. ريشن بِـتَـكْـرَهوا شَـعْـبَـكُم ليشِـن؟ وتـنسوا الآخرة .. ساعة الموت بتكرهوا شعبَـكُم ليـشِـنْ؟ وهُـو الأداكُم المَـثْـنَى وثُــلاث ورُبَــاع وهو الودَّاكُم الكُــلِّـيَّــة وهو اللبسكم النيشان وهو السَّـكَّــنكم المنشية هو العلمكم أكل الحوت بتكرهو شعبكم ليشن؟ ومن خيرو الكتِف ورمان دي شيزوفرينيا؟؟ والا انيميا في حب الوطن واتراكمت أزمان بتكرهو شعبكم ليشن؟ وتلهطوا من شمال وايمان وتكالوا من الطيور عيشِــن وتبزغوا في قداحة الخير من البلد الحكم طيشِــن تجحدوا في نعايم المولى تلهفوا في فطايس النعمة تلهطوا من حرام القوت بتكرهوا شعبكم لي شنو؟ شتايمكم فضل خيركم عمايمكم هي شوم طيركم كروشكم من فضل خيرنا وتِــجَـدِّعوا خيرنا للغيرنا وتمسحوا فوق رقابنا البوت؟ بتكرهو شعبكم ليشنو؟ بتكرهوا شعبنا الطيب وتربحوا من لهب حربو ترجعوا زي ديوك العِدَّه وين ما يقبلوا يخربوا فارجعوا بينا لي عند شارع التقنت ولي الولد السقا الباجور وارجعوا بينا لي يات من مطار في الدنيا سودانير لسانكم فينا زي منشار بيطلع في الصباح زفران وينزل في المسا كفران دي وَلْــدَه وخاسره يا جربان تقولوا عليه رباية جوع؟ وبين هوت دوق ولحس الكوع؟ تقول يا انتو ما ولاد تسعة لا حَـوَّاتنا حوَّاتكم ولا هذا البلد هيلكم ولا رَبَّــتكم أُمَّــاتكم.. .. ..
01-23-2019, 11:20 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
يا خاين العشرة .. يا أمنجي الحِلّة .. أشكينا لسيادك .. نشكيك ل الله .. قول عد وسمّينا .. وصِّف كمان بيتنا.. الفيهو يوم جيتنا.. بكرمنا حفّيناك.. وفي صحنا واكلناك.. يا خاين الماعون .. في وسطنا زي طاعون .. زي سوسة مدسوسة .. ناخرانا من جوّة .. يا خاين الخوّة .. يا عبد ومالكنك .. والبرأسوك كلاب .. باكر يجيك الدور .. حكم الإله غلاب .. باكر يجيك الدور .. يا أمنجي ومأجور .. ما قلت جيرانك .. ياخ ديل بنات بلدك.. لا ذمة لا غيرة .. يا خاين الجيرة .. يا بايع المعروف .. في الحلة عارفنك .. أمرك صبح مكشوف ..
#كولنغ فداسي الحليماب
01-23-2019, 11:26 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
يا لمابتخجل رقيص بي قفاكا وهزْ أجسام عدمت حياكا رغيف بجنيه جنون يازاكا رُباط ولِجام معاك شركاكا بشوف في النت جدادك كاكا كذب وأوهام وطن يتباكى حُكُمْ قرقوش نهكتو إنهاكا مرض وأسقام منو الأفتاكا تضُرب الناس سلاح فتاكا ده ما الإسلام! لعلي أراكَ في لاهاي معاك أُمَراكا بلد (أوكامْ) خريف وشتاكا لغِفْ بالكوم حقوق ضعفاكا ومال أيتام تفوق نُدداكا من الدولار مليت هاندباكا بنوك وأرقام خاف من مولاكا يوم ماتقيف قدامو براكا حساب قدام مابتلقى هناكَ قضاة الزُّور يروموا رضاكا يجيبوا كلام الشعب أباكا من أقصى الفور لجبال التاكا صلاة وصيام دعاو يوم داكَ دعا المظلوم تدُكْ أعضاكا صواريخ سام تراب في فاكا يوم مانقوم منو البلفاكا مصير صدام.
01-23-2019, 11:28 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
نحن اخوانك نحن مرقنا عشانك انت لا وقفنا صوت رصاص ولا هدانا بنبانك..... قدر مكتوب جاك انت ياخي نحن اخوانك.... حملتك رغم ظلمك لي وكل الكانو اعوانك.... سلاحي معاك هتاف سلمي... يسقط كل طغيانك... تعال يا اخوي ومد ايديك معانا بتبني اوطانك.... بوابة الثورة بيبانك... تعال خليك مع الثوار.. شعارنا بيمسح أحزانك.. حرية سلام وعدالة... بتبقى ديمه عنوانك... تعال يا اخوي..... كفاية اتزل انسانك... عشان يرجع وطنا الكان يفرهد فيهو بستانك.... اخير تسمع كلامي معاك قبل ما يتهدا بنيانك. .. يوسف حمدالنيل عربي
01-23-2019, 11:28 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
كل المدن مرقت تهتف بصوت واحد أرحل خلاص فوتنا قبل القطار ما يقيف لو صفر المأمور... باكر نجيب السيف ونوقفك طابور... لكل ولاد شعبي.. ولكل زول مقهور.. وأم الشهيد راجياك راجياك تسقط بس وتفش حرقة الجوف اصلوا الوطن مغبون راجيها يوم تشرق.. يجرد حسابوا معاك لا مؤتمر لا حوار... باكر بيشفع ليك... أرحل خلاص فوتنا سوق اللصوص بي وراك الشعب صبح واعي... كل السنين صابر... عارف كلامك زيف مهما تقول انت... لو جيتنا بي دوشكا أو سجن عالي السور لابد من تعرف.... كل البلد دارفور... أرحل خلاص فوتنا قبل القطار ما يقيف و يصفر المأمور.
01-26-2019, 11:01 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
ـ لماذا يظن الطغاه الصغار ـ وتشحب ألوانهم ـ أن موت المناضل موت القضية أعلم سر احتكام الطغاه إلى البندقية لا خائفا إن صوتى مشنقة للطغاة جميعا ولا نادما .. إن روحى مثقلة بالغضب كل طاغية صنم .. دمية من خشب ..وتبسمت ـ كل الطغاة دمى ربما حسب الصنم الدمية المستبدة وهو يعلق أوسمة الموت فوق صدور الرجال انه بطلا ما يزال ـ وخطوت على القيد ... ـ لاتحفروا لى قبرا سأصعد مشنتقتى وسأغلق نافذة العصر خلفي وأغسل بالدم رأسى وأقطع كفي .. واطبعها نجمة فوق واجهة العصر فوق حوائط تاريخه المائلة وسأبذر قمحى للطير والسابلة قتلونى ... وأنكرنى قاتلى وهو يلتف بردان في كفني وأنا من؟ سوى رجل وقف خارج الزمن كلما زيفوا بطلا قلت قلبى على وطنى .
01-26-2019, 12:02 PM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
تاااااني موت تاني وجعه وتاني دمعه وتااني صيوان في البيوت ام حزينه واب مكتف ما ليهو غير فجعه وسكوت تاني دم والف هم غير بيوت العنكبوت في تانيه طب قام فنترب قال نحى احرار او نموت ومات!! مات بي كلابك يا عمر موت الفريسه مع الوحوش .. مات بي خطاب من لهجتك ممضي وموقع فيهو قوش .. قناصه بضربو في الصدور ومرتزقه غطوها الوشوش .. كرسيك مثبت بالجثث باكر بلف لمن تدوووش ..
تااااني موت تاني وجعه وتاني دمعه وتاااني صيوان في البيوت
تسقط بس# . … . رحم الله محجوب التاج محجوب
01-28-2019, 07:37 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
فرحنــا باذخ ، تملؤنــا النشوة بأن الروح ما راحت وان سطوة كيزان الشيطان وزبانيته لم ولن يكسروا بها إرادة هذا الوطن البراح . ولكن ! في هذا الوقت كان من أعطانـا فلذة إبنه بشوق للحرية ، يتألم كتم ألمه وحكى من داخله بكلمات تسير في ذات الشوق الجميل الذي نركض خلفه يستحق التوثيق من نادى إبنه الشهيد وهو عند رب الخالق ظلت نفسه طيبة فأحزننــا أكثر هذه لرسالة كتبها الأستاذ الصادق سمل، والد الشهيد عبد الرحمن . رجل نبيل، يعلمنا الإنسانية عبر حزنه النبيل ويؤكد ما نعنيه بقوة سلميتنا التي ستبطل مفعول العنف. من الذي قتلك ياعبدالرحمن !؟ ( الضمير الغائب ) أصابني الصمت يا عبدالرحمن وقد تتساءل ألحزني عليك؟ نعم وياله من حزن .. فقد كنت معي .. ( نبي إلاّ قليلا ) . هل لعجزي عن الكتابة ؟ لا .... ولكن لان الكتابة عن رحيلك النبيل هذا تعني ان اكون امينا مع موتك . وها انا الان اكتب ... دولة اللاقانون وثقافة العنف المتجزّره في الممارسة السياسية وفي تاريخ الدولة السودانية والتي بدأت منذ الاستقلال وبلغت ذروتها الان مع هذا النظام القمعي هي المسؤولة عن كل القتل الفردي والجماعي في هذه البلاد . تطور الممارسه السياسية ومنذ نشأتها و الي الان يحكي عن بناء سياسي اعتمد الطائفة ، او الانظمة العسكرية التي تلبس لبوس الاحزاب العقائدية والتي وعيا وادراكا تهاب وتخشي دولة القانون والعدالة شكلت ركاما سياسيا تافها وكريها جدا ولم تعمل عبر تاريخها من الوصول الي ان يكون للسياسة ضمير ، وهذا ( الضمير ) هو الذي يضفي علي الممارسة السياسية السمات الاخلاقية التي تُعلِي من شأن الانسان ولا تقبل الاقصاء للاخر ايّا كان عرقه ولونه ودينه. هذا (الضمير الغائب) هو الذي قتلك ياعبدالرحمن . ياحبيب الروح ولأن دمك وان صار رمزا للاخرين فان فية ما يخصني اكثر . لذا فإنني لن ادع عذابات روحي بفقدك تدفعني لان يكون ( دمك بدم اخر) و ان فعلت فعندها ياولدي يكونوا قد نجحوا في إخراجنا من إنسانيتنا ونصير مثلهم تماما . وأبيك الذي تعرف يا عبد الرحمن لن يحتمل حين يسأل اطفال من قتلوك امهاتهم أن يا أمي أين أبي !! وتعرف يا عبد الرحمن كم احب الصغار . فالدم ليس مانراة ( مادة حمراء) بل هو الذي ينسج كامل شبكة العلاقات الانسانية وانه حين يُسْفَح يموت كل الناس . هذا ما علمني لة موتك الجميل . ولكن ان عاد دمك وأخرَّج من هذا الركام السياسي المخزي حقوقاً تصير ضميرا يحرس ( دولة القانون ) و التي تتيح لنا و لغيرنا الحقوق التي تحمي حياتنا وتجعلنا نعيش متساويين وبكرامة عندها يكون ما يخصني في دمك قد عاد وانا اقبل ، فما أبهي الدماء حين يتعافي بها الوطن . اما إن سألتني عن الاشواق يا حبيب الروح فإن مكامِن الروح حيث انت .....
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة