يرويه دكتور حسن الزين منقول من صفحة الاستاذ عثمان فضل الله
لوقت ما وقت حكاوي لسة بدري شوية ح نحكي ونونس اولادنا بعد تسقط ان شاء الله
لكن يوم لابد من توثيقه
يوم عصيب مشاعر مختلطة مابين غبن وحزن لققد مصاب وزميل في نفس الوقت وسرور بإنقاذ مصابين اخرين
اليوم بدأ عادي بدوام عادي بمستشفى رويال كير (ح اذكر المستشفى ليس من اجل التسويق فانا لست بصاحب مصلحة في ذلك ولكن احقاقا للحق وحتى تكتمل الصورة ) بعد الساعة ٤ عصر وانا ماشي علي عيادة القلب اشوف ناس جارية في اتجاه الطؤاري مشيت اذا بكمية من الناس المصابين داخلين ...تيم الطؤاري كعادتهم بدوا بواجباتهم ووزعوا ادوراهم بقيادة د. محمد تومي نائب اختصاصي الطؤاري ودكتور محمد ناجي مدير الطؤاري ... المصابين تقريبا في اللحظة ديك ستة كلهم اصابات كبيرة اتنين واعين لحد ما تلاتة اصابات خطيرة فاقدين الوعي ... وواحد القلب اتوقف لحظة دخوله وبدينا إنعاش قلبي . الناس اتقسمت كأتيام كل تيم تولى أمر مريض .. وكنت التيم ليدر لعيان الانعاش القلبي قبل وصول دكتور انس البدوي استشاري القلب. اول استشاري وصل الطواري اتصلت بيهو يابوص الحقنا في الطواري .. لغى العيادة وفي خلال ثواني وصلنا وتولى أمر القيادة و انعاش كل المرضى.
لحدي هنا نحن ما عارفين اي اسم للناس المصابين اديناهم ارقام بس وبقينا شغالين. العيان رقم ١ ده الشغالين ليهو انعاش
يلا تعالوا احكي ليكم عننا كشعب ما يستاهل البحصل لينا ده اول حاجة من الميدان النقل لينا المصابين دكتور مصطفى طبيب اسنان وصاحب مركز الأيلتس المعروف وشارك معانا في الانعاش الممرضين قمة في التفاني والاخلاص كلهم كانوا في الطؤاري العيان رقم ١ ده ركبوا ليهو كانيولا في اي مكان د. منتصر مدير المعمل يا منتصر العيان ده ح نديه دم عايز دم بدون تحضير وماعارفين الفيصلة ح نديهو O_ve ومتوقع الاجابة تكون مافي او في قزازة واحدة لانها فصيلة نادرة لكن في ثواني جاب لي تلاتة قزازت قال لي ابدأ بي ديل وفي ظرف دقائق ح يجهز دم محضر
تعالوا احمي ليكم اكتر لحظة كانت مؤثرة: مستر حاتم البشير استشاري جراحة القلب والصدر كان معانا ومستعد القلب يشتغل عشان يأخد المصاب علي غرفة العمليات ...بدأ يركب في انبوب صدر ومنفعل ومستعجل ولسة مافينا زول عارف العيان ده اسمو منو .. مستر حاتم يركز في تفاصيل وجه المصاب ... ولسان حاله بقول لا لا ده ما هو بكون شبه ساي .. ركب الانبوب وطلع يسأل الزول ده اسمو منو .. قالوا ليهو اختو دكتورة اسمها هاجر برا .. مشى ليها اسمو منو اسمو بابكر ..طبيب ..ااي ... لا حول ولا قوة إلا بالله .. دي الشينة الكان نفسو يكضبها ... ده مساعدو و الدكتور الشغال معاهو في احمد قاسم ... ده الزول الكان معاه الصباح ... وانهار دكتور حاتم وبكى 😭😭بحرقة وابكى كل الناس الفي الطؤاري .. وبعدها عرفنا انو ده طبيب واتحول اسمو من العيان رقم ١ لدكتور بابكر
بعد مرور الدقيقة ٢٠ من الإنعاش للمرة الرابعة اوكلوا لي مهمة اهيئ الاسرة واتكلم معاهم .. مشيت ليهم برا ... لقيت امه واخته. اخته دكتورة هاجر نائب اختصاصي الطؤاري وزميلتنا بنفس المستشفى.. حسيت لساني معقود تمتمت وهمهمت وغلبني الكلام استجمعت قواي وقلت ليهم كلمتن ومشيت. بعد اكملنا الزمن المقرر حسب البرتكول توقفنا عن الانعاش وكانت من اصعب اللحظات علينا اننا نقيف من إنعاش زميلنا ... كان نفسنا نواصل رغم علمنا انه لايجدي .
اتملينا غبن شديييييد وغضب وحرقة دسنا على جرحنا الحي النازف وواصلنا انقاذ المصابين التانين اغلبهم كانوا محتاجين جراحة وجراحات مختلفة اخدناهم على غرفة العمليات لقينا كل جراحين البلد جاهزين لبوا النداء . بروف ابن عوف، أبوبكر وداعة ، مستر سيف، حسن زيادة، مستر كمال وغيرهم ياخ مستر ضرار من المعتقل طوالي جاء علي غرفة العمليات لقيناه لابس وجاهز .. اتعملت كل العمليات لكل المصابين بأسرع ما يمكن (والله لو في مايو كلينك ما تتعمل ليهم بالسرعة دي ) ((وللعلم كل الاشياء دي مجانا لا المستشفى اخدت قروش ولافي دكتور اخد قروش ))
جوا اطباء من مختلف المنطاق ملبين النداء جونا صيادلة قالوا نحن جاهزين لأي كمية من أي دواء مواطنين بسالوا ياجماعة مكان التبرع بالدم بوين
الاطباء نواب اختصاصي الطؤاري ديل كمان براهم اخوي دكتور عبدالقادر حامد ، د. محمد حسن ود.تقي الدين والبقية ديل جوا لقوا عدد الاطباء في رويال كير كويس طوالي وزعوا نفسهم علي باقي المستشفيات اتحركوا طوالي مخاطرين بنفسهم من اجل انقاذ المصابين .
بعد انتهينا من الواجب المهني كان منتظرنا واجب تاني واجب الوطن الااااف مؤلفة من الشباب بيهتفوا امام المستشفى مباشرة انا ما ح اتكلم عن الناس هتفت والثورة و و و
انا داير اتكلم عن مشاهد تانية خالص الشارع كلو طبعا مقفول بالناس لمن يجي مريض بعربية جاي المستشفى او اسعاف الناس بتفتح ليهو الشارع من هناك لحدي ما يدخل المستشفى .. سكان بري 😍اي زول شال العنو وجاء مارق الشايل سندوتشات الشائل موية ،عصير، فطائر، ياخ التحلية جابوها .. المطاعم القريبة كلهم جابوا سندوتشات ... ياخ فلنكوش بتاع البوش جاب طشاتة كبييييرة ملاها بوش ووزعها للناس ... في ناس جوا من بحري وشرق النيل وامدرمان واي زول جاي شائل معاهو حاجة كان في تاتشر جيش حارس بنك فيصل الثوار جابوا ليهم الاكل والموية والشأي وونسوهم عديل
من المناظر الجميلة برضو الثوار نضفوا المنطقة حوالين المستشفى و الشارع ولموا قوارير الموية وباقي الاكل
ويجوا يقولوا ليك ديل مخربين ومارقين
رغم انو الدنيا ليل وزحمة والناس كتيرة لكن ماسمعت زول قال انا اتسرقت مني حاجة ما سمعت بت قالت في ولد اتحرش بي ما شفت اي تصرف غلط من اي زول لاصغير ولا كبير الناس كلها كانت على درجة عالية جدا من الرقي والوعي
ياخ الساعة ٤ صباحا لمن جوا ناس الشرطة وضربوا بمبان عدد كبير جدا من الثوار دخلوا المستشفى لمن ضاقت بيهم .. والله مافيهم زول هبش او خرب حاجة ... تقول لي مخربين
اسي عليك الله المخرب منو
عموما نرجع ونقول: الناس الطلعوا ديل شباب سقفهم اعلى من توفير خبز وجاز ديل بحلموا بوطن حقيقي.
فمافي حل بعد ده غير #تسقط_بس #يانجيب_حقهم_يانموت_زيهم
#اعتصام_رويال_كير
#رحم_الله_بلدا_كان_وطن
Dr. H-E
01-19-2019, 01:02 PM
Hadeer Alzain Hadeer Alzain
تاريخ التسجيل: 07-13-2008
مجموع المشاركات: 3530
شكرآ أميرة فلقد كتبتي ووفيتي وأوفيتي ما وددت كتابته. نعم أدهش هذا الشباب الغر الثائر حتى الأعداء. تصميم وجسارة تفوق الوصف وإرادة حرة. المجد للشهداء .. والنصر للثوار .....
أنتم نجوم على صفحات التاريخ! أميرة عمر بخيت
ستنتصر الثورة السودانية وسيسقط هذا النظام بإذن الله وسيكتب التاريخ؛ أن شعباً أعزلاً من أكثر شعوب العالم طيبة، سلاماً وخلقاً رفيعاً وأصالة، قد ازاح بصدق عزيمته وشدة شكيمة شبابه، طاغيةً من أشرس طغاة العصر الحديث. ستحكي الكتب أن الشعب السوداني قد سجل في حربه ضد الجبابرة أعظم المواقف الإنسانية ودرّس العالم أن الثورة السلمية قادرة على دك حصون أكاسرة وأباطرة هذا الزمان. الثورة السودانية ثورة خلاص من الظلم والقهر والفساد. ثورة يقودها شباب تتفتح الحرية أزاهراً في أعينهم وتسطع سلميتهم بنادقاً تطلق الخوف والذعر رصاصاً في صدور الظالمين. شباب أعتى قوة من السلاح و أقوى همة من شهوات حكام مرضى بحب السلطة وكنز الأموال متلذذين بدماء الأبرياء الصامدين.
سلامٌ عليكم أيها الثوّار الأبطال سلام على أرواحكم النبيلة و على عزيمتكم القوية ومقاومتكم الباسلة وألف قبلة على جبينكم الوضاء أنتم فخرٌ لهذا الوطن وما سال من دماء الشهداء والجرحى نهر كوثرٍ يغسل الدنس عن هذه البلاد بكم فخرنا وعزنا وهاماتنا بكم سامقة تشق صدر السماء عزيز بكم هذا الوطن وجديرون أنتم بأرضه وحكمه وعزة انتمائنا لترابه الغالي النفيس! ولتعلم أيها الطاغوت وزمرتك وأتباعك والمنتفعين أن وعد الله حقٌ قد صدقته الحياة وأثبته التاريخ؛ أنك راحلٌ وأن قومك واذيالهم راحلون وراحلٌ معك هذا العهد الأسود اللئيم. ويبقى السودان ويبقى شعبه حراً أبياً صامداً قائماً على نهضة بلاده حتى يعم الخير والسلام، وأرواح الشهداء ملائكة رحمة ترفرف شاهدة من فوق رؤوس العالمين.
النصر للثورة السودانية ولقيم العدالة، الحرية والسلام والمجد والخلود لشهداء الوطن من دفعوا أرواحهم مهر خلاصٍ لهذه الأمة من الفساد والظلم و القتل و التهجير. رحم الله شهداءنا و ربط على قلوب أمهاتهم و أسرهم وأصدقائهم وأحسن عزاء السودانيين أجمعين.
العزة للسودان وما هنت يا سوداننا يوماًعلينا!
01-19-2019, 03:18 PM
Haydar Badawi Sadig Haydar Badawi Sadig
تاريخ التسجيل: 01-04-2003
مجموع المشاركات: 8271
هذا شعب عملاق يتقدمه أقزام، حفظ الله على أهله من أصايل الطبائع ما سيجعلهم نقطة التقاء الأرض بأسباب السماء، كما قال الأستاذ محمود محمد طه. وهاهي أصايل الطبائع تعبر عن نفسها أبدع ما يكون الإبداع في الصور التي سردها لنا الطبيب الإنسان الذي أتحتفتنا بمساهمته هنا.
هذا شعب لا يقهر.
طوبي لكل سوداني أصيل بأنه سوداني وبس!
01-20-2019, 09:45 AM
صلاح عباس فقير صلاح عباس فقير
تاريخ التسجيل: 08-08-2009
مجموع المشاركات: 5482
ناصر شكرا كتير.. والتحيات النواضر لدكتور حسن الزين، والتحيات النواضر لاطباء مستشفى رويال كير،، وكل الاطباء الذين شاركوا في اسعاف المصابين الثوار،، وهكذا الشعب السوداني الثائر ذو النخوة والشهامة والمروءة،،، ونسال الله ان يرحم د. بابكر الشهيد الذي بذل روحه في سبيل عزة الوطن وكرامته ، في سبيل وطن خال من اللصوص والحرامية والقتلة وسفاكي الدماء،، لعنة الله عليهم في الدنيا والاخرة،، ونسال الله ان يرينا فيهم عجائب قدرته،،،وننتظر عدالة السماء ،،،، شعب عظيم يحكمه اقزام ولصوص وقتلة وسفاكي دماء،،،
01-20-2019, 02:13 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1453
مشكورين الاخوة و الاخوات هدير الزين , حيدر بدوي, صلاح فقير وامتثال على المرور و التعليق. ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ توهم النظام انه نجح في تغيير الشخصية السودانية و شيطنة المجتمع و لكن خاب مسعاهم.
قبل الثورة كان في احساس بالضآلة و العجز و قلة الحيلة و المهانة الان اي سوداني مليان فخر و ارادة و تفاؤل...انها الثورة.
شقيقة الشهيد بابكر
تعليق الدكتور الشاعر ودبادي على الفيديو ادناه: "طيب دي عرفناها سقطت و انتهت ...المشكلة في الحكومة التي ستأتي بعد تلاتين سنة لي قدام ... هؤلاء الأشاوس رضعوا المطالبة بحقوقهم من صدور أمهاتهم ..السودان يعبر للضفة الأخري ..."
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Nasser Amin
Hadeer Alzain
Haydar Badawi Sadig
محمد حمزة الحسين
فيس بوك
تويتر
انستقرام
يوتيوب
بنتيريست