ياخ ما تخجل يا الرصاصتك عرفت تخجل لما سلاحك واجه شعباً ثائر وأعزل رافع علم الوطن الأجمل وبهتف حتى غروب الهم وصاح ما عندك حبة دم ولو كان عندك ذرة دم ما نشّنت على اخيارنا الشالو حملنا عشان ننجم ووحّدو فينا عشم لي باكر وكل وطنا مقسم هم وعشان فوق كم؟ وعشان لي مين؟ عاوز ترضي لصوص الدين؟ ولا عشان الصلى في كرسي وعاشق الكرسي ووقت الرقصة مع الواقفين
يا قناص المغدور ما لحمك ودمك والمغدور لو انت بتفهم او حسّبتها صاح ود امك مرق الشارع ما بالصدفة طالع شايل همي وهمك
وانت لقيته بجبنك وغدرك وهو في باله يبقى التوب البستر عرضك ما اتخيل انك برضك ترسم موته على رصاصة طلعت ترجف من الخوف ونزلت سكنت منه الجوف عشان في صدره حتلقى امان ونبضة بتهتف للحرية وأخرى تمجّد في الاوطان سكنت رقدت في إطمئنان عشان في قلبه مداين إلفة شوارع زحمة من الإيمان وزيك شارب موية النيل وراضع من ضرع السودان الا الفرق الواضح انك بعت ضميرك للسلطان
يا قناص
ان شاء الله ضميرك نام مرتاح نحن شهيدنا عِلا وارتاح ومن شرفات الجنة بلوح للمادين في السكة الصاح للهادرين في مواكب تهتف سقطت سقطت يا سفاح وتسقط تسقط تسقط بس ابقو كتار ما تبقو شُحاح
محمد حسن خليل
01-17-2019, 06:36 AM
mohmed khalail
mohmed khalail
تاريخ التسجيل: 06-14-2007
مجموع المشاركات: 4509
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة