كتب صديقي يوسف البروف خريج كليه الاداب عن الثورة السودانية وتجمع المهنيين ودوره في الحراك وعجز النظام امام هذا المارد المسمي تجمع المهنيين في شكل قصة قصيرة تجسد هذا المعني بسم الله الرحمن الرحيم البعاتى جااااكم
يوسف البروف ................................................. صاحبى عصام ابو مدينة، مرة اتصل على قال لى ،،، يا بروف ياخى الليلة مرت على حالة غريبة خلاص ،،، قلت ليهو ،،، يا زول ان شاء الله خير،،، قال لى ،،، يا زول انا قاعد فى المكتب دخل على واحد وقال فى حاجات غريبة جدا قاعدة تحصل ليهو ومحل ما مشى ما لقى ليها حل ،،، قلت ليهو ،،، يا زول دا كلام شنو دا؟، اها احكى لى الحاصل شنو ،،، قال لى ،،، الزول دا قال النار فجأة كدا وبدون مقدمات قامت أكلت ليهو بيتو كلو وحتى الحاجات الحصلوها الناس ومرقوها من النار برضو النار تانى قامت فيها،،، قال لى...الزول دا قال اى حاجة تابعة ليهو النار بتقوم فيها.... قال لى الغريبة قال النار بتاكل الملابس لكن ما بتاكل الشنطة ،،، قلت ليهو ،،، بسم الله الرحمن الرحيم ودا يكون شنو دا كمان يا عصام؟ ،،، قال لى ،،، والله انا ذاتى احترت فى الكلام دا والأغرب قال النار بتاكل حاجاتو هو بس لكن حاجات اولادو ما بتهبشها نهائ ،،، قال لى ،،، الراجل دا هسا هو معاى فى المكتب وقال داير يكتبو ليهو عن حالتو دى فى السوشيال ميديا عشان الناس تساعدوا ولا احتمال فى زول يقرأ عن حالتو دى ويكون عارف ليها حل ،،، قال لى ،،، انا قلت ليهو أحسن زول ممكن يكتب ليك عن حالتك دى واحد صاحبى اسمو يوسف البروف عشان كدا انا اتصلت عليك والان هو معاى نديك ليهو بالتلفون عشان يشرح ليك الحاصل شنو بالضبط ولو كمان قلت نلاقيك بيهو فى محل معين كمان خلينى نسوقو نجيبو ليك محل انت قاعد ،،،قلت ليهو ،،، يا عصام حلفتك بربك ما تدينى الزول دا ولا تجيب ليهو سيرتى واعتبر نفسك لا لاقيت البروف ولا بتعرفو ولا قريت.ليهو ذاتو كمان...والله يا خوانا عصام ابو مدينة ضحك لمن التلفون وقع منو...بصراحة كدا يا خوانا انا دا قول لى اى حاجة فى الدنيا دى لكن ما تقول لى بعاتى وعفريت وشيطان وجن وكلام ذى دا،،، اكتر حاجة محيرة ليك الحكومة دى الشيطان الاسمو تجمع المهنيين دا،،، يا خوانا الشغل لا عندو رأس ولا عندو قعر،،، شغل بس يطلع بيان فى السوشيال ميديا والناس دى تجى مارقة بت بت من وين ذاتو ما معروفة ،،، ياخى شغل يقول لناس الخرطوم الكتمة تكون فى صينية القندول الساعة واحدة ظهرا والحكومة تحشد امنها وبكاسيها ودعمها السريع وتقفل المداخل والمخارج وبعداك تطلع أكبر مظاهرة فى تاريخ السودان الحديث، عليكم الله دا ما شغل بعاعيت ،،، اها بعد ما يكتمها فى الخرطوم يقوم ينقل الأحداث إلى أم در حيث قلبها وفشفاشها ومسايرها ووجناتها وبيت المال والملازمين وود نوباوى والطابية فتطلع معركة كررى فى القرن الواحد وعشرين عديل كدا،،، يقوم ينقل الأحداث إلى بحرى الجمال والصبابى وحلة حمد والحلفاية والامتداد والاملاك والحواتة فعينك ما تشوف إلا الزغاريد والنوبة والكنداكات والذوق والفهم،،، بصراحة كدا يا حكومة ليكى حق تخافى من هذا البعاتى الذى يصعب التعامل معاهو،،، البروف خاف من حالة الزول داك لانو بصراحة ديك حالة تفوق إمكانياتو خيال وتخيل وكتابة وخوف،،، تجمع المهنيين دا ادخل ليك الرعب فى الحكومة بالرغم من مليشياتها الأمنية والامن شعبية والوحدات الطلابية ومكافحة الشغب لانو اعتمد على وسائل حديثة، المباغتة وسرعة التحرك والتقنية ووحدة الهدف والمصير والقيادة الجماعية،،، حاولت الحكومة كعادتها عزل هذا الجسم الشيطانى عن الشعب باختلاق مسرحيات سمجة وبالية وذلك عن طريق إلصاق تهم منفرة من شاكلة الخلايا وعبد الواحد والمندسين والطابور الخامس والمخربين وحالة سوريا واليمن وليبيا فزاد الشعب قربا منو وزادت الشقة بينها وبين الشعب،،، حاولت اسكات هذا الجسم الشيطانى عن طريق تعطيل السوشيال ميديا فادخل ثقافة ال vpn واجبر الحكومة على استخدام الvpn مجاراة واعترافا خجلا بالهزيمة فى معركة التقنية،،، حاولت الحكومة إسكات القنوات الدولية حتى لا تكشف للعالم ما يجرى بالداخل وذلك عن طريق تضييق الخناق عليها أو باعتقال مراسليها وإغلاق مكاتب بعضها فحلت الموبايلات ذات التقنية العالية التقاط الصور أحداث حية ورصاص وبمبان وضرب ومعسكر داخل المستشفيات،،، امتلك هذا الجسم الشيطانى القنوات العالمية طرحا وتقديما وتحليلا منطقيا واقناعا وادبا وفهما واحتراما وقبولا وتجاوبا، الاعيسر مثالا بينما ظلت الحكومة تدفر للقنوات أسوأ من ولدتهم حواء السودانية دفاعا عن فظائعها وافعالها واقوالها وجرائمها، على عثمان محمد طه وسيدى الرئيس وربيع عبد العاطى مثالا،،، والله يا خوانا امبارح لقيت ليك ربيع عبد العاطى دا ضربو ليهو تلفون ناس قناة العربية متحدثا عما يجرى فى السودان والله العظيم انا الطابور دا خجلت ليهو وللحكومة وللسودان، يا خوانا الزول دا خلا ليك الموضوع كلو كلو ووقع ليك فى المذيعة نبذ وشتائم واتهامات.... تمدد هذا البعاتى فى المجتمع السودانى أساتذة وأطباء ومهندسين ومحاميين ومحاسبين وموظفين وإعمال حرة وربات منازل وأسر وأحياء وبيوت وشوارع وزقاقات وقرى ومدن وفرقان وولايات ورياض أطفال ومدارس وجامعات وكليات ومزارعين ورعاة ومشردين ونازحين ومقهورين ومغتربين ومهاجرين وصالح عام وعنصرية ومهمشين وجيش بينما تمددت الحكومة مليشيات وكتائب ظل وارزقية وبلطجية والفاتح عز الدين وعلى عثمان محمد طه وربيع عبد العاطى وتابيتا بطرس وحسن طرحة وحاتم صفوف وأحمد بلال وتمباك.. حزب الاحرار قادم بقوة فاربطوا التكك.... ثورة حتى النصر..... ا
01-14-2019, 10:03 AM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5454
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبداللطيف حسن علي
فيس بوك
تويتر
انستقرام
يوتيوب
بنتيريست