|
Re: المناضل الجسور جعفر خضر في سجون النظام (Re: حسن ادم محمد العالم)
|
الحبيب الأريب/ حسن ادم محمد العالم تحية زاكية
الحرية للمناضل الجسور جعفر خضر الحرية لكل الشرفاء المسجونين
نعم اردد معكم هذه القصيدة
تطلق رصاصا اطلق قلم رصاص تعبا مدفعك اعبى قلمى بالحبر تحرك دبابة مسافة شبر قلم الشينيا يفشى السر. تطلق طلقة تنبعث قصيدة يتحول طارق عطر تحيا التاية شهيدة تنبعث السحب جريدة.
| |
|
|
|
|
|
|
Re: المناضل الجسور جعفر خضر في سجون النظام (Re: احمد حمودى)
|
Quote: يا زولْ جَدِيرْ بالإحْتِرامْ
عصام عيسى رجب
One man with courage is a majority – Thomas Jefferson
"إلى (جَعْفَر خضر) وهو يُجالِدُ وحيداً كالسَّيفِ عُصْبةَ الْمُرجِفينَ في مدينةِ (القضارِف) ….."
(1) الْقومَة ليكْ يا "جَعْفَر" الشَّامِخْ جبَلْ وسلامْ يِغشِّيكْ السَّلامْ يا زولْ تَمامْ يا زولْ جَدِيرْ بالإحْترامْ تقعُدْ يقوم النِّيل يجيكْ شايلْ الأناشِيدْ بِشْبَهنَّكْ
لمَّا تمرُقْ للصِّدامْ يغشاكْ سلامْ يا زولْ جسورْ ما بْهابْ نِزالْ يغشاكْ قُمْرِي مع الْحَمامْ يدِّيِكْ شبَّالينْ هدِيلْ ويغنِّي ليكْ لامِنْ فوانيس الْفَجُرْ يوقْدَنْ بَراهِنْ بين إيديكْ
(2) وصَدقْتَ يا دُغْرِي اللِسانْ هُمَّ اللُصوصْ والأرزّقِيَّة، الأمنّجِيَّة، الإنكِشاريَّة …. النُّجُوسْ ديلْ الْمّجوسْ نارُمْ: فُلُوسْ …… عَارِينْ يِطَوِّفُوا حولَها …… وهاكْ يا ذِكِرْ: "أَسْرِقْ …… وأَنْهَبْ ما تشاءْ عَذِّبْ وكِتِّلْ في الْخُلُوقْ ويحِلَّها الْحَلَّالْ إذنْ يوم الْقيامْ ……" بِئسْ الذِّكِرْ يا مُرْجِفينْ …..!!!!! ما بعَرفوا اللهْ ….أَهَلْ ضَلالْ ما يغُرَّكْ الدَّقِنْ الْكَبييييييرْ …… ديلْ المفاسِدْ والْفُجورْ حَقِّنَّها ……. الدَّين هِنا، وهُمْ بَىْ هِنااااااااااااااكْ ……!!!!!! وأوَّلْ تَباديِ، وقُولْ معاي: هُوْ الْبِعرِفْ اللهْ بِشِيلَّو حُكْماً بالغَصِبْ ….؟! لا وبَىْ كِضِبْ قالْ أيهْ: أَمِشْ قّصرَكْ وسُوقْنِي على الْحَبِسْ …..!!!!! - ما نْسِينا نِحنا إذا نِسُوا - وينْ " التي أحسَنْ"، ووينْ "شُورى" ….. و"عَدِلْ" "لا ظُلْمْ" …. "لا إكرَاهْ" …… ولا كَسْر الرَّقاب ….. ؟! باللهِ يا "جَعفَرْ" أخُوي، هَلْ ديلْ بِيِقْرُوا معانا آي نَفْس الْكِتابْ ….؟! ما أظَنَّهُمْ …..!!!!!! ما أظَنَّهُمْ …..!!!!!! ما أظَنَّهُمْ …..!!!!!! ولو ما الإله صَانْ الذَّكِرْ كانْ حرَّفُوا أُمَّ الْكِتابْ …..!!!!! ما بعَرْفوا اللهْ وناسْ ضَلالْ هُوْ الْبِعرِفْ اللهْ وعِندُو دِينْ بِقْهَرْلُو زول …..؟! ديلْ يا خِيْ قاهْرِينْ الْعِبادْ كَمَّينْ زَمَنْ خَسَفوا الْبِلادْ سابِعْ أرِضْ بَىْ ذِمَّتَكْ يا زولْ نضِيفْ: كانتْ كِدا …..؟! بلَدينْ بِقَتْ وسِتينْ بَلَدْ ……. بَسْ كُلُّو أوَّلْ ليهو آخِرْ ……. وكُلُّو ظالِمْ ليهو حَدْ …… بِتفُوتوا زي ما جيتوا يا نسَلْ الْخَرابْ ……. بِتفُوتوا بالمركُوبْ …… وباللعناتْ تبارِيكُمْ إلى يوم الْحِسابْ …….
(3) الْقومَة ليكْ يا "جعفَر" الشَّامِخْ جبَلْ ما بِحْدِرَكْ بَطش اللِئامْ ما بِهِزَّكْ الرَّيح الْوَعِيدْ عَزمَكْ حَديدْ والْقَصَّة خِلْصَتْ يا بَطَلْ وكُلَّ الْهَلُمَّ الدايرة دِي خاتْمَةْ مطافْ يا "جَعْفَر" الشَّامِخْ جبَلْ قُومْ لَىْ حَصادْ غَرْس النَّضالْ آن الْقِطافْ آن الْقِطافْ آن الْقِطافْ ……
عصام عيسى رجب السبت 26أكتوبر 2013 |
| |
|
|
|
|
|
|
Re: المناضل الجسور جعفر خضر في سجون النظام (Re: maia)
|
Maia الشكر علي المرور ونهديك قصيده لجعفر خضر الشهداء ضد ضد الرحمن جعفر خضر (تمت كتابة أصل النص على الذاكرة داخل سجن جهاز الأمن في الاعتقال الأخير) ... ضد الرحمن الحاج مدير الأمن موحد تب ما بتني الكلمة لي قوش الرب أو يسأل : ليه؟ وقوش ذات نفسو بيعبد بشة وبرضو بيهوى السي اي ايه بشة يصلي تجاه البيت البيت الابيض ! يتضرع لـ ترمب داير دولار داير بمبان ودوام السلطة . وأمام الشعب يضرّع الزارعنا اليجي يقلَعنا صلاة الضهر يقبل موسكو وقبلة عصرو على الصهيون *** الأمن جهاز حرامي الغاز ودقيق العيش ضد الرحمن سرّاق بنزين سباب للدين بلسان الحال كتّال أطفال *** أولاد الثانوي مرقو وهديلا بنات الصف السابع أولاد الشارع أصلا في الشارع ظلو سنين منتظرين واقفين بثبات كالشجر الفارع ومازن محجوب أب عشرة سنين طلع الشارع دق الرصاص طلع للشارع لاقى المحبوب في رمشة عين *** ـ ضد الرحمن كاتل قنّاص # وعبد الرحمن شايل كراس ـ ضد الرحمن سكران سنّن خمر السلطان عبّ الرصاص # وعبد الرحمن فرحان سنّن قلم الرصاص ـ ضد الرحمن فتح النيران # عبد الرحمن انصاب في الراس حلّق لجنان وعب الشارع ضد أنجاس ** ضد الرحمن الخالي مروّة فتح النار في العامل كوّه وفتح الكاتل شتت وفرّ وفتح السما للأنوار كوّه ولاقى شفيع والعمال الزايدين قوّة مرقو صفوف تجاه القصر حتى النصر *** رسل مذموم لابسلو نقاب حنتو من دم ضد الرحمن يدخل بالباب جهة النسوان لا إحم دستور لا رحم سودان أو قيم أديان والبلد الصي نسوان مرقن زغرودة تصد صوت الرصاص بالايد قفلن لي شارع الديم وملوهو هتاف دايرات إنصاف ضد الرحمن حلاف طلاق بزناد رجاف مرّق طلقات جرحت إنصاف وفاطمة الزين أم سبعة سنين ونبتن آلاف شعب السودان الجوة هدير والبرة سند نسمات أرواح ضمّاد لجراح *** ضد الرحمن يتجسس على الرحمة النازلة من الله شان تفرج الضيق يتحسس يترصد يطق الرحمة في مقتل ما الرحمة لازم تاخد تصديق الشهدا قالولو : رحمتو واااسعة كورك: يااا قوش رسل لي مدد *** الدم السال في محل طارق قاموا طوارق النور ومجاهد وود مرسال والنيل شاهد دليل للجيل جيل الفُرّاس .. مارق كالسيل صوت الرصاص .. في اضانو هديل ضربو البمبان .. النيم منديل يتشعبطو ديل فوق الدخان من قمم االبنيان يرمو القناص يا رقاص من فوق الدم جوعت الناس وانت المتخم ألعاب النار كانت تمرين التنك الفارغ من بنزين والبنك الفارغ وكلو مَدين والقلب الفارغ من الدّين عملوه اطار والني للنار *** مهند قوّام صوتا مسلول موبايل كام كشف المشهد مين الكتال ضد الرحمن صوّب سدد الموت الموت للعايز يشهد سقط الشاهد واتشهد حضن الارض شهّد شهّد ومد الكام للثوار صورة سامر وحولو نسور جيل الفيسبوك ديل الإعجاز طايعين للعدل للظلم عُصاه نُص البمبان قام القى عَصاه لغفت كذّاب معروف الماء طفاي للنار جيل الواتساب حرّاق للماء عرّاهو سراب . وفجّر لعيون في كل وشي بدل العينين اتناشر عين تسقي العطشان *** أبو ذر يستعجب كيف ما عندنا قوت ونِسْتَنا الموت والصومعة كلها كرشة كوز والصوت مكبوت ريسان السوط طااالت .. طالت دقون الزيف وعفن البوت خراب ود قوش مُنَشِّن ديمة بـ عينو يمين صاب أبو ذر الخلى وصيّة جيبو دمانا بي سلمية حمرة عين *** وجوك كتار طالعين نابتين من الاض نازلين صابين زي أمطار حاسبو هظار يا غردون الجوك أنصار هذا الجيل الطرد الخوف العوّاض للزمن الراح ديلا ثبات أوتاد قضروف ماركو تواوا ومكي الشابك شرف الكاكي ود حلوف زي حردلو الكلمة فصاح جود ود زايد بالأرواح النصر أكيد نساء ورجال هتافا سلاح شباب أبطال الشهدا اطفال لا شك واكيد ترمي الأصنام وزي الأزهري يرفعو جد علم حرية واستقلال عدالة سلام والنصر أكيد
| |
|
|
|
|
|
|
Re: المناضل الجسور جعفر خضر في سجون النظام (Re: حسن ادم محمد العالم)
|
عاجل جداً | - دخل أستاذ جعفر خضر الحسن في إضراب مفتوح عن الطعام و تدهور حالته الصحيه داخل الزنازين ، تم إعتقاله 5 مرات منذ بداية الإنتفاضة الشعبيه ، آخر إعتقال كان من منزله بديم النور غرب يوم 8 يناير الموافق موكب الشهداء بالقضارف ، و تم إعتقال كل من : - عبد اللطيف كجول . - نور الدائم الخضر . -مغيره عبد القادر . - محمد صلاح . - أسامه بشير . و آخرين علي خلفية الحراك الأخير بالمدينة . - جعفر خضر هو خريج جامعة الخرطوم و يعمل ( معلماً ) من منازلهم يتحرك بكرسي من ذوي ( الإرادات الصلبة ) و ليست الخاصه! أسرتهُ تُحمل الأجهزة الأمنية والنظام ككل مسؤولية سلامته .
- تعليقي بحكم معرفتي و جيرتي له : - أولاً أ. جعفر خضر طيلة الإعتقالات السابقة لم يتناول طعام وشراب الأجهزة الأمنية إطلاقاً ، كانت والدته فتحية ( عليها الرحمة والمغفرة و الخلود التي إنتقلت إلي جوار ربها قبل عام ) تأتي له بالطعام و الشراب داخل الزنازين و تم تهديدها في وقت سابقة بأنه سيتم ( تصفية جعفر بالرصاص! ) . - الأمر الثاني هو تضامنه مع أرواح شهداء القضارف و السودان ككل و حرمانه من المشاركة في موكب الشهداء قبل أمس ، و أسباب أخرى كثيره تجعله يدخل في إضراب مفتوح عن الطعام . - هذا الجعفر كلته من الصلابة كجبال الشرق و مُخضر إبن الخضر مثل الحقول في فصل الخريف ، شامخ و عاتي كالنخيل ، ملامحه بخطوط الوطن الذي نحلم بيه جميعاً ، في الرابط أدناه جانب بسيط جداً لمن يعرفه عن قرب حياته ملئِية بتاريخ ناصِع و مُشرق كشمس الحرية . الرابط يوضح ( بعض ) من نُوره الساطع : https://youtu.be/lq5yw58m0hQhttps://youtu.be/lq5yw58m0hQ يا ولضمي المجد لك و الديه وطن .
منقوووول
| |
|
|
|
|
|
|
|