فقد مغترب اجهزة موبايل من داخل حقيبته بمطار الخرطوم أثناء عودته من السعودية وقال الشاكي في عريضة تقدم بها لشرطة الدرجة الأولى إنه فقد (3) اجهزة موبايل مختلفة الماركات تقدر قيمتها ب(71) ألف جنيه داخل مطار الخرطوم ، وأضاف إنه حضر للسودان الساعة الثالثة صباحا عبر الخطوط الجوية السعودية وبعد تكملة الإجراءات قام باستلام حقيبته تفاجأ بها مثقوبة وبتفقدها فقد الاجهزة الثلاثة ، عليه دونت الشرطة بلاغا وباشرت التحريات لمعرفة السارق .
المصدر : صحيفة الاهرام اليوم
11-27-2018, 03:00 PM
almulaomar almulaomar
تاريخ التسجيل: 07-08-2002
مجموع المشاركات: 6485
الأخ زهير الكلام دا ما قالوا خلاص إنتهي وتم القبض علي الشبكة الإجرامية المتخصصة في سرقة الحقائب حيث أن جهاز المسح الضؤي الخاص بالجمارك خارج الصالة ومن يقوم بتشغيله يؤشر للعامل لتكملة المطلوب من ثقب أو شرك أو حتي فتح الخقيبة وببطاقة سوداني وخليك سوداني ، المهم الحكاية دي ما حا تخلص ما بقي الفرق بين دخل الفرد ومنصرفه وتطلعاته يفوق الفرق بين كرش الفيل وكافوري وكلاهما حيان بحراويان ، وهذا ليس تبريرا للسرقة. نصيحة للمغتربين الفضلو – وش ضاحك – بأن لا يضعوا أشياء ثمينة في حقائبهم التي تشحن كعفش مصاحب للراكب بل يجب أن يحملها في حقيبة يده ولا يفارق تلك الحقيبة في الصالة حتي لو داير يصلي في تكبيرة الإحرام ما يفكها من إيدو لأنو هناك الحكاية هايصة وفي رمشة عين بلحسوك يا حنين. وحتي الغفش المصاحب للراكب حبئا لو يتم تغليفه التغليف الآمن ولو في طريقة يكتف الشنطة بي حبل عشان يجهجه الحرامي وفي النهاية حرص ولا تخون ودي برضو أغنية لرامي صبري
11-27-2018, 04:22 PM
إدريس محمد إبراهيم إدريس محمد إبراهيم
تاريخ التسجيل: 03-13-2006
مجموع المشاركات: 2762
Quote: نصيحة للمغتربين الفضلو – وش ضاحك – بأن لا يضعوا أشياء ثمينة في حقائبهم التي تشحن كعفش مصاحب للراكب بل يجب أن يحملها في حقيبة يده ولا يفارق تلك الحقيبة في الصالة حتي لو داير يصلي في تكبيرة الإحرام ما يفكها من إيدو لأنو هناك الحكاية هايصة وفي رمشة عين بلحسوك يا حنين. وحتي الغفش المصاحب للراكب حبئا لو يتم تغليفه التغليف الآمن ولو في طريقة يكتف الشنطة بي حبل عشان يجهجه الحرامي وفي النهاية حرص ولا تخون
الاعزاء زهير والملا عمر
سلام ...
أعلاه هو الكلام المفيد ....
لن أنسى ابدا أنه قد تم نشلي في مطار الخرطوم بواسطة أحد عمال الخطوط الداخليه ...حيث كنت مودعا اسرتي في رحلة داخليه لبورسودان ...ماسك محمد ابني بيد وحقيبه يدويه باليد الاخرى ... وشعرت بالعامل يقول لي أي خدمه ويلمس جيبي .. أجلست محمد في اقرب كرسي وهرولت بعد أن تحسست جيبي لالحق بالعامل ولكن ويييييين ؟ ... فص ملح وداب كما يقول المصريين .... فتحت بلاغ وما الى ذلك ولكن بلا جدوى ... غايتو الحمد لله اني كنت موزع نقودي في أكثر من جيب والا كنت سأدخل في حرج عجيب ....
مع خالص ودي وتقديري ؛؛؛؛
11-27-2018, 04:54 PM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
السرقة لم ولن تتوقف في مطار الخرطوم .. مهما قالوا تم القبض على الشبكة البتسرق .. تعمل العليك لاتضع اطلاقا اجهزة موبايل او ذهب .. أو اشياء ثمينة حتظهر لبتاعين اجهزة المسح .. ولن يتوانوا ولو للحظة في سرقتها حتى لو كانت الحقيبة .. محكة الاغلاق برضو حيفتحوها لانه مافي زول حيقبضهم .. عادي جدا تجيك حقيبتك مكسورة .. ومكان ما تخت راسك تخت كرعينك .. أو نفس الجهة الحتتقدم ليها بالبلاغ في المطار .. حيقولوا ليك انت بتضيع زمنك ساي .. حاجاتك تاني مابترجع فأخير تكسب زمنك .. تحرص تحمل حقيبة صغيرة لاتفارق يدك .. تخت فيها قروشك وموبايلاتك في جيبك او فيها المهم لاتفارق يدك .. الوضع البائس ده يخلي المش حرامي يسرق ليقيم وأده ..
11-27-2018, 11:33 PM
اسامة الامام اسامة الامام
تاريخ التسجيل: 02-24-2015
مجموع المشاركات: 47
Quote: بل يجب أن يحملها في حقيبة يده ولا يفارق تلك الحقيبة في الصالة حتي لو داير يصلي في تكبيرة الإحرام
برضو ما بتتحله و يؤتى الحذر من مأمنه
في اجازتي الفايته..عملتا حسابي وختيت كل الأشياء القيمة في حقيبة تلازمني كظلي..وكنت حريص جدا عليها اكثر من حرصي على جواز سفري
نزلتا كونكشن في اديس
وانا طالع ف سلم الطيارة موظف ..الله لا كسبو .كف ختف الشنطة من يدي وجدعا في عربية متحركة وواصل جدع غيرها عملتا غاغة..وجوطه.دون فائدة كل القالو حا تستلما في الخرطوم وحا نامنا ليك وما حا يجيها حاجة عبثا حاولت افهمو انو كل أشيائي الثمينة داخلها ولذا احملها معي وكانت اثنا حجتي معاهو عيني ليها استقرت في مخزن الطايرة
نزلنا الخرطوم ..وخاتي يدي في قلبي الشنطة اتاخرت مع انها last in اخيرا جات.. والتخاف منو يكتلك وصلت دون اغلى جوال...وللاسف كان امانة حقت زول و عطر قيم شاري من السوق الحر وجهاز فحص سكر غير مستعمل عملتا نفس الغاغة دون فائدة غرمتا الجوال من سكات
وياهو دا السودان والسلام
تحياتي اخ زهير وضيوفك الاكارم
11-28-2018, 07:47 AM
almulaomar almulaomar
تاريخ التسجيل: 07-08-2002
مجموع المشاركات: 6485
يا أسامه شنطتك الشالها الموظف بتتاع الأثيوبية منك في الترانزيت هي في الواقع شنطة أكبر من المصرح بيها في رحلة الأثيوبية بين اديس أبابا والخرطوم فالناس البتجي من الإمارات أو قطر أو السعودية ودول أوروبا وأمريكا يجب أن يعوا جيداً أن الطائرة التي سوف تقلهم إلي مطار الخرطوم هي من الطائرات الصغيرة يمكن 737 وربما أصغر اشان كده وكإجراء وقائي يتم وضع شنط اليد الكبيرة والتي يزيد وزنها ربما علي 15 كيلو وربما يعتمد الموظف علي حجم الحقيبة وهو ليس لديه مانع في أن تسطحبها معك لكن وكما أسفت إجراء وقائي والدليل أنك لم تدفع عليها كعفش زائد . غايتو العتره بتصلح المشي لكن المؤسف له أن الأمن في مطار الخرطوم صفر لا كاميرات مراقبة تسجل زي مطارات العالم لا مدير صالة أو مسئول تلجأ ليهو ولغاية اآلن يجبر القادمين للخرطوم علي تعبئة نموذج دخول لاا بعاين ليهو عسكري الجوازات لا بشتغل بيهو لا بيقرأ إنت كاتب فيهو شنو والنموذج زاتو مرات ما بيكون متوفر ففي الحالة دي إنت سوداني برضو يدوك نموذج قدوم أجنبي وفيهو سءال أظن ولا إثنين من الصعب الإجابة عليهما
11-28-2018, 08:06 AM
walid taha walid taha
تاريخ التسجيل: 01-28-2004
مجموع المشاركات: 4309
مطار الخرطوم (تحفة) فقدنا موبايل وآيباد بنفس التكنيك !! هل يعقل أن تتكرر هذه الحوادث دون معرفة الفاعل ؟!! هذه السرقات لا تحدث فى إستاد إنما فى مطار ، فالعفش يمر عبر نقاط معروفة قبل أن يستلمه الراكب ، فمعرفة الفاعل لا تحتاج الى (شارلوك هولمز) !! نحن هينين ، الخوف يسرقو من يأنسوا فينا الصدق والأمانة !
مرة جايين من الامارات وواقفين منتظرين العفش، واحد شاف بطانيته مجدوعة في الصالة ورا السير، والمسكين بقى يكورك في الزول ال بيرفع العفش ويختو في السير، "يا زول ارفع لي بطانيتي دي" العامل يتلفت ويعاين للبطانية ويقول ليه " يا تو بطانية يا زول" واستمر الكر والفر بخصوص البطانية حتى استلمت عفشي واتخارجت وما عارف البطانية بقت من نصيب منو...
11-28-2018, 09:59 AM
almulaomar almulaomar
تاريخ التسجيل: 07-08-2002
مجموع المشاركات: 6485
تحياتي وليد ما تخشاه حدث يا سيدي مع لعض ممن يأنس فينا الأمانة كما تفضلت وتبدد الخوف جزئياً بأنهم لم يشيعوا الخبر في الأسافير وأكلوها في حنانهم تقديراً للعشرة واعتبارهم الأمر تصرف فردي يمثل صاحبه لا الشعب السوداني
11-28-2018, 12:55 PM
walid taha walid taha
تاريخ التسجيل: 01-28-2004
مجموع المشاركات: 4309
المُلا عمر كيفك يا رجل ؟ أعتقد أن ما يحدث فى مطار الخرطوم هو فى الواقع حزمة مشاكل تبدأ بالوساخة (ودونك الحامات) تكييف تعبان ، سير العفش مهترى وبطئ وغير مواكب للتحديث ،الخدمة نفسها غاية فى التخلف ، كدى حاول أسأل ناس الإستعلامات سؤال وشوف كان يدوك معلومة صحيحة والآن الطامة الكبرى سرقة المسافرين !!! هذا المطار اللعنة يجب إبداله بالجديد عسى ولعل أن نواكب شعوب العالم (الفقير منها) بمطار يشبه العالم والناس خالى من السرقات !!!!
بعدين شنو قصة الناس الكتااااااار العاملين فيها شغالين فى الصالة ديل؟ منو الشغال ومنو الحايم ساكت ؟ !
11-28-2018, 10:31 AM
اسامة الامام اسامة الامام
تاريخ التسجيل: 02-24-2015
مجموع المشاركات: 47
Quote: يا أسامه شنطتك الشالها الموظف بتتاع الأثيوبية منك في الترانزيت هي في الواقع شنطة أكبر من المصرح بيها في رحلة الأثيوبية بين اديس أبابا والخرطوم
اهلين أخي الملا عمر
ابدا والله يا حبيب بالعكس مطابقة للمواصفات الجاتني مع التذكرة واكثر من ناحية الوزن اقل كتير من 7 kg وحجم اقل من المواصفات المطلوبة ودا الغاظني وفقع مرارتي
بس هو شال من كلو النصيحة لله..صغيرة كبيرة ..ما فرق شكلهم ملدوغين من حركات السودانيين والعفش الفي الممرات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
almulaomar
إدريس محمد إبراهيم
جمال ود القوز
walid taha
فيس بوك
تويتر
انستقرام
يوتيوب
بنتيريست