كم نظرنا هلال ماشادنا غير هلالو ما اظنو زلال يروينا غير زلالو ارى الهلال إنقاد ورى محيو اجلالو كلو يوم ازداد في خديدو نور يحلالو تتقاصر الابصار عن حسنو من إجلالو يتيه يصد باسم آه ما ألذ دلالو ألذ شي قربو بذل النظر في دلالو امر شي بعدو وجفاهو او إهمالو اري الغصون بتميل واقول هواها امالو على الخلاف واذا ميل علي زمانو وطرفو ليه نعسان وانا طرفي ليه يصحالو يتلو آية الحسن الفي الخديد رايحالو دلالو كل ما يزيد جسمي بيزيد إنحالو اما قلبي الضاع خلي اليروح في حالو إذا ادار لحظو علي جبل دكالو لو بَسَم انزل دمع السفاب هالو وقلبو لايشفق على عاشقو مهما شكالو حبيبي طبعك غير من ذي الحنان اشكالو إذا ادار فاهو إسلب عقولنا وقالوا طبيعي فاهو خدار لاصبغه لا دقالو بالراحه والريحان الله جل سقالو دا شعرو ليل وجبينو البدر إبقالو ولي حبيب ياليل نوم العيون قلالو لي حبيب ياليل كتل النفوس حلالو لي حبيب ياناس اشوف خدودو يلالو مع الظلام تشتاق الزهره تدلاَّلو
10-17-2018, 02:26 PM
Kabar Kabar
تاريخ التسجيل: 11-26-2002
مجموع المشاركات: 18547
اصعب حاجة ، يا الملاعمر، تحب ليك زول سودانية ، وتسرف دمع هامل كالمزن، والأصعب تقوم تلاقيها بعد سنين لمن كانت كاتمة الشوق بالسنين..!
ياخي اصعب حاجة تلاقي سودانية كاتمة الشوق لسنين..!!..ياخي دي اخير منها تلاقي حساب ربك لمن يشدك سين وجيم وفي النهاية يقول ليك: مصيرك جنهم يلا اتخارج..!!
هل تصدق ، انا كان سرقت السوق ، والله صحي يا الملاعمر..!
سرقت السوق لأني ، كنت في حالة ضرورة ، من شان (طرفهم منير اشرق فوق لي غصن البان)..!
الكلام ده في امسودان ، سنة 2015..!
لاقيت سبأ بت اللذين ، تقول ليك (ما بصح ليك يا فلان)..وهو يا ربي فلان ده البيصح ليهو شنو ولا شنو..غربة وسقط وجليد ولا دمعة مسروقة تايهة في مخدة ولا نقة اصحاب العمل ..!!
اللذيذة يا الملا عمر ، ناس تجيك في بيتكم ، تقوم تبوس جبهة ابوك..ثم تغطي وشو بالتوب والريحة الياها داك ، عشان يمدوا ليك اصبع..!
ثم يقولوا ليك: ما بصح ليك يا فلان ، طرفك دوام ناعس ، و ناس منو شنو كده ما عارف طرفهم ما غفلان..!!
قالت لي سبأ (بكل قوة عين): اهو د رب العشق ساهل..!..يلا خلينا نعيد الأيام يا جدي الغزلان..!!!
طنطنت وقلت ليها: بس درب الوصال صعبان يااااااااااااااااااخ..!
طبعا ادتني فنقر..(اصبع وسطاني ولا شنو كده ما عارف) ومعاها حاجة زي تقول: جبـــــــان..!
قالت لي: وكتين خايف من الدلنج واهلها..ح الاقيك في امدرمان..لحم راس..لا ناسك ولا ناسي..!!
بعد يومين ، مقعد في سفريات عجيبة اسمها (عرجون) ، وحجزوا لي نفس المقعد في سفرية بعد تلاتة ايام..يعني برضك سفريات (عرجون) والله يلعن ذاك العرجون الماشغال باحترام ومراعاة (حرماني وعامل السن)..!!
ناهيك من منخايس سبأ بتاعة (ما بصح ليك يا فلان)..ياخي ملعون فلان وان شاء الله تنقدا فوق راسو سما جليد وهريكين وحرائق طبيعية ذاتو..!!
ياخي امدرمان ، حتى الكتاحة فيها بقت ليها طعم ، زحمة الناس والعربات والضبان..كلها صارت حاجات جميلة..وقلبي انطرب فرحان ياااااخ..!
وتحت تحت تقول ليها ، تقول لي سبأ: وجهك بدر كامل ، طرفك اشرق لي فوق لي غصن البان ياااااااااااااااااااااااخ..!!
وتقول ليك: دمعي يذرف دمع نازل..!
واحي انا من الراقص الفنان..حبك سكن قلبي وجننت عقلي جنان..!! سجن سجن..غرامة غرامة..جهنم جهنم..حدي لاقي يمشي جهنم في شان حبو؟؟؟!!
تلك الصينية يا الملا عمر (عليك الله تزورها ولو عابرا) صينية تربط شوارع بين مدينة المهندسين ، الفيتحاب ، ام بدة المنصورة ، مدينة النخيل..في كافتيريا تشرب ليك عصير ، وصديقة الغرام (غرام الشياب ، وحق الشياب صعب يا قريبي)..تقول ليك: ليه يا خالو مافي ناس زيك كده عشان تتحب؟ ..وببراءة تقول ليها: خالو ده اصلا واحد وتاني ما بتتكرر وياهو قدامك حبيهو زي ما تدوري..!!
وعينك ما تشوف الإ النور يا الملا عمر..اتبرطشت يا رجالة وقدام عيون المارة والعربات ، حتى شفق المغريبة ما شفع ..اتبرطشت انا والبنية (بت اختها، وهي مهندسة..)..سبأ اتغبت فينا العرفة يا الملا عمر وما اجملها لحظة لمن سبأ تتغبا فيك العرفة..!!..اللذيذة..دخلوا حجازين بطيبة السودانيين دييك: يا جماعة باركوها..يا ناس استهدوا بالله يا عالم,,!! لمينا الدور..وضحكنا..وبعدها شنو كده ما عارف..!
بتذكر اخر يوم ، حكمت عليها ، على سبـأ..عزمتني في معية صديقة الغرام بت اختها المهندسة تلك..مشينا كافتيريا (يتخيل لي دكتورة بيان زمان اتكلمت عنها وقالت اسمها حبيبي مفلس ولا شنو كده ماعارف..ويا ريتها بتاعة مفلسين..ياخي كباية عصير تقصم ضهرك ذاتو..بس اوعى تقول لسبأ..!!)
الغريبة ، في الكافتيريا كانت مزيكا غربية..ثم قامت سبأ ، كانها كوكب يغالط الكون في قدرتو على القدلة والمشية البراحة ديييك..!..ووست ليك لبتاع الكافتيريا..ثم كان شريط عجيب: ضامر قوامك لان..!
وبنفس المشية اياها جات راجعة ، ودنقرت فوقي لمن قلت في نفسي الله يسترنا من النظام العام وقالت لي: ديل ثنائي ابو سعد..!!
استاذنا الملا عمر – السلام عليكم الشاعر صالح عبد السيد (ابو صلاح) شاعر الفطرة والموهبة والخيال، وفوق ذلك كما عدد من رفقاء دربه من شعراء السودان وقتها، فقد حفظ "حسب شحبح اتطلاعنا" كثير من قصائد ديوان الشعر العربي، ارجوزه وقصائده، وشطر العديد من قصائد فحول الشعراء، من ثم جل قصائده نجد فيها البساطة التصغير المحبب شفافية الروح المستهامة والشجن المعربد مورد للهلاك والجوث في الارض بلا هدى عدا قبلة المحبوب ومكوث صورته في قاع المخيلة فتتناثر درر تشجي وتشقي الحب المستحيل، وفي الحالتين يجود بتجربة انسانية لا ينضب معينها، فتتثقف ارواح صدئت فطرتها، تاطرها هرولة نحو الملموس، الذي ياتي ولا ياتي. وتعيدنا شفافية روحه ورقيق كلماته المنسابة بتؤدة تخصب وتخضر كل خلية من الجسد البالي، فيطل علينا، تاجوج والمحلق، جميل بثينة، كثير عزة وغيرهم من سفر المحبين في تاريخنا العربي. فلنتمعن في اختياره لهذه الكلمات والجمل الوريفة الظل المشبعة شوق وتحنان في قصيدته التي نحن بصددها (كم نظرنا هلال) ذلك مثل: – زلال – اجلالو – (جلاهو - اظهره) – إجلالو – ( تبجيل) – بذل (قمة العطاء) - هواها امالو – (كانه جسد نوراني) – آية الحسن (تماهت في الخديد) - قلبي الضاع ( خلي اليروح في حالو) - دار لحظو علي جبل دكالو(قنابل فراغية) - دمع السفاب هالو (تحسر) - فاهو خدار لا صبغه لا دقالو (طبيعي بلا دق شلوفة) - كتل النفوس حلالو (حكم الحب)، وغير ذلك من النسمات النديات التي يبذلها ابو صلاح لتهذيب شغافنا الجافة وزرع الندى والاخضرار لينقلنا الى ساحات الفعل والحس الانساني، مدن وضهارات. "في حب اكثر من كده ؟ " (حمد)
10-18-2018, 10:38 AM
حمد إبراهيم محمد حمد إبراهيم محمد
تاريخ التسجيل: 08-20-2009
مجموع المشاركات: 5198
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
almulaomar
Kabar
Hassan Farah
حمد إبراهيم محمد
فيس بوك
تويتر
انستقرام
يوتيوب
بنتيريست