غايتو صالة غردون او GMH كنا بنتفرج علي ( الشباب ) من فوق تلاجة موز كانت في سور الصالة ...
ناس عصمان طبعاً حاضرين الزمن الجميل ده ...
اما إسكرابيه ... فكان غير ... و حقيقة اول بيتزا اكلناها يا عمر البشير كانت هناك و انت لسه حايم بي سفنجتك الكنت مخلوع بيها يوم قالوا ليك تعال ابقى رئيس ...
اما حديقة السطح في المطار فكانت على مستوى عالمي ... عشاهم كان فوقه سمك فرايد ما في في الدنيا زيو ... و كان السطح مفتوح طبعا و الهمبريب بارد و كان هناك الوصف الشهير القايل انو ابرد بيرة ام جمل تلقوها في مطعم المطار ... او كما قال البيرة في المطار من شدة باردة تلقى الجمل مكنكش ...
تفتفر اللستة لفندق الواحة و صحارى و اكسلسيور ... فقد كان لهم شأن عظيم في البرامج الليلية ...
09-16-2018, 08:19 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
كانت حديقة سطح مطار الخرطوم عبارة عن مطعم من طابقين و به تراس كبير جدا يمكن للمستقبلين مشاهدة القادمين قبل دخولهم الى صالة المطار ...و ايضا وداع المسافرين ...
كان مطعم و بار بالطبع ...
كانت مواعيد الطيارات ... نعم الطيارات !!! فقد كانت كل خطوط طيران العالم تنزل مطار الخرطوم ...
سويس اير الساعة 10 و10 مساء
تكون منتظر زول جاي ...
تمشي المطار الساعة 9 ... تقعد تتعشا و البشرب ياخد ليو كاسين ... تعاين لي ساعتك لما تجي الساعة 10و 9 دقايق تمرق على التراس ... تلقى السويسرية نازله ... تتفرج على منظر الهبوط ... تسلم على الجايين ... ترجع تكمل باقي عشاك او شربتك ... 10 و نص تنزل تلقى ناسك مرقو ...
قس على ذلك البي او اي سي و من بعدها برتش اير ويز ... لوفتهانزا ... ال كي ال ام .. اير فرانس .. اليتاليا ... ايرو فلوت ... ال مدل ايست ...
و كانت السودانية زينتهم ... ركبنا مع كابتن شيخ الدين و كابتن زمرواي و كابتن الجزولي و كابتن عمر السعيد و كابتن عبد الباقي ... و الباشمهندس فتح الرحمن احمد مختار ...
سلام يا قباني انا غايتو قعدت في كذا محل من المحلات دي خصوصا صحاري واكسلسيور والمطار والحديقة القريبة من المسرح القومي يمكن اسمها الموردة... كنت النوع البباري الوالد في اي مكان وهو برضو كان بحب يسوقني معاهو اي حتة يمشيها .
09-17-2018, 03:31 AM
عثمان علي
عثمان علي
تاريخ التسجيل: 06-07-2018
مجموع المشاركات: 190
Quote: تفتفر اللستة لفندق الواحة و صحارى و اكسلسيور ... فقد كان لهم شأن عظيم في البرامج الليلية ...
يحيا صديق الزمن الجميل
ما تنسى سانت جيمس وأفريكانا وسويت روزانا والأندلس وبابا كوستا وكستليتة وسمك أتني والحاتي
ورويال والأندية: العربي واليوناني وأبولو والإيطالي ونادي التنس وحفلات راس السنة
ياخي الجرابيع المقطعين الصعاليك ديل جونا من وين
يا حليل لبن كافوري البوزعوه في البيوت بالقززا الكبير وياحليل الغاز تطلبو بالتلفون يجيك بالعربية الموتر ومعاهو هدايا أجب وتوتال وشل ويا حليل البوستة البتجي في البيوت وصناديق التلفونات في الشوارع
يا حليل مواصلات مديرية الخرطوم والأبونيه بي 25 قرش تركب الشهر كلو والبصات بالمواعيد وعندها محطات ثابتة والكمساري بالبدلة الكاكية والطاقية وبص الأهالي والتايوتا
يا حليل الخرطوم شرق والكشافة البحرية وأشجار الفواكه في كل بيت (منقة، جوافة، عنب، برتقال، ليمون) والتمر هندي المسورة بيهو البيوت يا حايل المشتل والفنطاس وحسن الجنايني والورد الإنجليزي والنرجس والفل والياسمين في كل بيت.. حديقة ونجيلة ومصطبة وشاي المغرب
ياما أكلنا بيتزا وهوت دوق وهاميرغر في بيوتنا قبل ما يجوا مستجدين النعمة ديل ونهبوا بلدنا وخيراتا
آااااااااااااااااااااه يا بلد يا أغلى من كل الحروف العابرة من وهج الغرام يا أسمى من لون الصباح لما النهار في حضنو نام
09-17-2018, 03:47 AM
عثمان علي
عثمان علي
تاريخ التسجيل: 06-07-2018
مجموع المشاركات: 190
وسان جيمس والكريزي هورس وسودان كلوب ونادي الضباط ودار المحامين ونادي الخرطوم ومرحبا وكازينو حماد العائم ...... وعييييييك. وعلي طاري حديقة السطح بالمطار، أتذكر كان في موظف قبطي في أحد مكاتب الخدمات غرب الصالة (طبعا كانت الصالة واحدة للمغادرة والوصول) - أذكر انه كان خطاط جدا في الكتابة بالانجليزي. كان بتجينا بصيلات ورود وزهور من هولندا، أتذكر كنت بكون مأخوذ جدا بطريقته وهو يعبئ فورمات الاستلام. كنت بقلد طريقته في الكتابه.
الأستاذ المخضرم يحيي قباني وضيوفه فى هذا البوست الأقرب للأسطورة
تحياتي ,
إذا كان الأمر كذلك ما علينا سوى أن نهنئ الكيزان على نجاحهم فى هدم دولة سادت فيها حكم المؤسسة وحرية الفرد واستبدلوها بالحاضر الماسخ أمامنا دولة بدون دستور بالمفهوم الحقيقي دولة يتمتع فيها منتسبيهم فقط بمزايا ورفاهية تضاهي رفاهيات دول الخليج ببترولهم دولة تبحث عن وزير يتولى منصب وزير مالية (بالتعيين) وتفشل فى إقناع فرد لاحظوا ليس بحزب دولة لا تعترف بالتعددية الحزبية وعملت وما زالت تعمل على تفكيك جميع الأحزاب الوطنية وإضعافها حتى وصلوا بنا الى قاع القاع
المعذرة لو عرجت بيكم لكن حقيقة حاجة تفقع المرارة
قلت لي كنتو تسافروا لندن حاملين جنيهات سودانية ؟ قبل حوالي 3 أسابيع وانا راجع من الخرطوم فى مطار دولة عربية .. وانا أدفع لقيمة قارورة ماء سلمته سهواً 50 جنية سوداني بدلاً من 50 ريال .. البائع سمعني كلام خلاني أخجل هههههههههه
09-17-2018, 08:35 AM
Osman Awoda
Osman Awoda
تاريخ التسجيل: 06-19-2017
مجموع المشاركات: 495
Quote: سلام يا قباني انا غايتو قعدت في كذا محل من المحلات دي خصوصا صحاري واكسلسيور والمطار والحديقة القريبة من المسرح القومي يمكن اسمها الموردة... كنت النوع البباري الوالد في اي مكان وهو برضو كان بحب يسوقني معاهو اي حتة يمشيها .
تكون مشيت الريڤيرا اذا ...
انا غايتو مشيت براي ... لأنو لو كنت في سن صغيره و ابوي رحمة الله عليه يسوقني معاو الا نمشي سودان كلوب هههه ... و الله عشان ما اكضب اخواني الكبار كانو بسوقوني النادي العالمي في بورتسودان وايضاً نادي الجزيرة في مدني ...
09-17-2018, 02:10 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
الحبيب قباني .. دائماً ما تنقلنا إلى ذلك عالم الجميل ( حقيبة وذكريات أيام الشباب) طبعاً نحن ناس ضواحي الدنيا الاقاليم البعيدة في الشمال هناك .. في الاجازات الصيفية الطويلة كنا نأتي لنقضي شهر أو أكثر في العاصمة إخوانا المقيمين في العاصمة كانوا يتولوا قيادتنا .. اما كافة المصاريف علينا الزمن كان الجميل والراتب مريح جداً مقارنة بالاسعار .. نحضر إلى العاصمة 50 جنيه ونعمل عمايل
أذكر كانت سهراتنا في كازينو النيل الازرق في بحري .. كان موقع جميل جداً .. كنا دائما نجد الفنان كمال كيلا .. وأنا بحكم أني تربال ما كنت أجيد الرقص .. فقط أتفرج رقص مختلط كمان أذكر أغنية I wana tell you about girl I know , she is may baby and I love her so بالنسبة لينا كان إنبهار ( عالم تشرب السوائل وترقص حتى الصباح ) لا مشكلة لا تعقيد
ليت الشباب يعود يوماً ..
09-17-2018, 02:28 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
في نفس تلك الازمان ديك فتحنا للدنيا لكن ما كنا بنمشي الاندية دي بل كان تخصصنا ديسكوهات من بعد حمى ليلة السبت وترافولتا المرديان والارمني والنادي الامريكي وكثير من صالات الديسكو الانتشرت في تلك الفترة اتذكر كنت مع اولاد البوسته الوحيدين المسموح لينا الدخول للنادي الامريكي وتشغيل اغنيات الدسكو وتعليم المارنيز الكانو موجودين احدث الرقصات وايضا ظهرت في تلك السنوات الشلليات شلة اولاد الملازمين وشلة اولاد نمرة 2 وشلة الاملاك شلتنا كانت اسمها الوريرس - المحاربون - مجموعة مختلفة مميزة من امدرمان اولاد وبنات ( يا الله وين الناس دي هسا ) غايتو كانت ايام ( ايام البلو استارز )
09-17-2018, 05:29 PM
عباس محمود
عباس محمود
تاريخ التسجيل: 11-26-2004
مجموع المشاركات: 1441
سلام باشمهندس قبانى الاخوة الكرام زكروا أتينيه وما جابو سيرة كباكبانا وذلك الأنتقال السلس من جلسة أتينيه لى جارو --------- بالجد البوست ده ناقص أغنية كفاية مزاح خلى الليل يكون صباح لعزال السبعينات الأسمر وليم أندرية نصار
09-17-2018, 07:10 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: الحبيب قباني .. دائماً ما تنقلنا إلى ذلك عالم الجميل ( حقيبة وذكريات أيام الشباب) طبعاً نحن ناس ضواحي الدنيا الاقاليم البعيدة في الشمال هناك .. في الاجازات الصيفية الطويلة كنا نأتي لنقضي شهر أو أكثر في العاصمة إخوانا المقيمين في العاصمة كانوا يتولوا قيادتنا .. اما كافة المصاريف علينا الزمن كان الجميل والراتب مريح جداً مقارنة بالاسعار .. نحضر إلى العاصمة 50 جنيه ونعمل عمايل
أذكر كانت سهراتنا في كازينو النيل الازرق في بحري .. كان موقع جميل جداً .. كنا دائما نجد الفنان كمال كيلا .. وأنا بحكم أني تربال ما كنت أجيد الرقص .. فقط أتفرج رقص مختلط كمان أذكر أغنية I wana tell you about girl I know , she is may baby and I love her so بالنسبة لينا كان إنبهار ( عالم تشرب السوائل وترقص حتى الصباح ) لا مشكلة لا تعقيد
ليت الشباب يعود يوماً ..
يا عم علي بيّاع الزيت ... و عربيتك مربوطة بخيت
و الله نسيت كازينو النيل الأزرق .. كانت لنا أيام معاو خاصة أيام البركس ...
قتلي بي 50 جنيه تعملوا عمايل ... :)
عليك الله كان وريت الوليدات ديل العمايل دي كانت شنو ... هههه
09-18-2018, 04:24 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
ما تنسى سانت جيمس وأفريكانا وسويت روزانا والأندلس وبابا كوستا وكستليتة وسمك أتني والحاتي
ورويال والأندية: العربي واليوناني وأبولو والإيطالي ونادي التنس وحفلات راس السنة
ياخي الجرابيع المقطعين الصعاليك ديل جونا من وين
يا حليل لبن كافوري البوزعوه في البيوت بالقززا الكبير وياحليل الغاز تطلبو بالتلفون يجيك بالعربية الموتر ومعاهو هدايا أجب وتوتال وشل ويا حليل البوستة البتجي في البيوت وصناديق التلفونات في الشوارع
يا حليل مواصلات مديرية الخرطوم والأبونيه بي 25 قرش تركب الشهر كلو والبصات بالمواعيد وعندها محطات ثابتة والكمساري بالبدلة الكاكية والطاقية وبص الأهالي والتايوتا
يا حليل الخرطوم شرق والكشافة البحرية وأشجار الفواكه في كل بيت (منقة، جوافة، عنب، برتقال، ليمون) والتمر هندي المسورة بيهو البيوت يا حايل المشتل والفنطاس وحسن الجنايني والورد الإنجليزي والنرجس والفل والياسمين في كل بيت.. حديقة ونجيلة ومصطبة وشاي المغرب
ياما أكلنا بيتزا وهوت دوق وهاميرغر في بيوتنا قبل ما يجوا مستجدين النعمة ديل ونهبوا بلدنا وخيراتا
آااااااااااااااااااااه يا بلد يا أغلى من كل الحروف العابرة من وهج الغرام يا أسمى من لون الصباح لما النهار في حضنو نام
معز يا جميل ...
تصدق في بيتنا كان عندنا جوافة و برتكانتين و قريبفروت و الاغرب كان عندا شجرة تين شوكي ( صبار )
تتذكر ايام نحوم في الخرطوم يا معز اخر الليالي محل ما تخش تعرف الناس و يعرفوك ...
تشوق عربيتك ... نص الناس تكورك ليك بي اسمك ...
تخش الكورة .. محلتك يقعد فوقها زول مافي ...
الغاز بالتلفون ... و يجيك شايل انابيب شل و اجب ... و انت تختار حسب المنظم العندك ... السمك لحد البيت ... البصل لحد البيت .. اذكر نكتة الفاضل سعيد لعمك البكورك بصل بصل و ما بتحرك من تحت حيطتو و حماهو النوم ... قال ليو بطريقتك دي اصلو ما ( بتصل ) اللبن لحد البيت ... البهارات و الحرجل و القنقليز و الدوم و النبق لحد البيت ... الخدار لحد البيت ...
معز ياخي دي بلد لو جرو عدادها 40 سنة لي ورا حتتصلح ...
09-18-2018, 05:00 AM
خالد العبيد
خالد العبيد
تاريخ التسجيل: 05-07-2003
مجموع المشاركات: 21983
Quote: تتذكر ايام نحوم في الخرطوم يا معز اخر الليالي محل ما تخش تعرف الناس و يعرفوك ...
تشوق عربيتك ... نص الناس تكورك ليك بي اسمك ...
تخش الكورة .. محلتك يقعد فوقها زول مافي ...
الغاز بالتلفون ... و يجيك شايل انابيب شل و اجب ... و انت تختار حسب المنظم العندك
في اجازتي قبل شهر ونصف جلست يا يحي في سوق امدرمان المحطة الوسطي طلبت كباية قهوة وسرحت مسافة ، جاء جلس جنبي شاب ثلاثيني وقال لي يا عمو شائفك سارح شديد نعل ما عندك مشكلة قلت ليه يا ولدي انا براجع في الزمن امدرمان دي ما كانت كده المحطي الوسطي شقت مكان ست اللجيمات القاعدة ديك كان في كشك بتاع مواصلات الخرطوم بتاعت ابورجيلة كان فيه عمك كمال حسن ومحمد صالخ هم المسولون عن هذه المحطة الناس بتكون جالسة في المحطة وفي جرائد يوميه الناس بتطلع علي الاخبار الي حين وصول بص ابو رجيلة المكندش يا ولدي بتعرف بص ابور جيلة ظهر عليه الاستغراب ، قلت ليه شفت العمارة القديمة الامامك دي كانت سلوي بوتيك تلبس افخم الملابس من هذا المتجر وبعدين في الحائط بتاع سلوي بوتيك كانت في شاشة بتاعت سيتما بتعرض ليك اهم اقوال الصحف في شريط اخباري ـ واين تسهر هذا المساء ، الاان المحطة الاوسطي مكان فراشت الكتب زمان لصبح محل ستات الشاي واللجيمات المهم سارح معاه كده جاء بتاع تاكسي تعاوني رشانا ليك بماء المطر وواصل مسيرته ، قلت ليه شفت امدرمان ما ياها امدرمان الزمان !!!! معليش نسيت ما سلمت عليك ياخي
09-18-2018, 09:28 AM
محمد مجيدو
محمد مجيدو
تاريخ التسجيل: 07-06-2013
مجموع المشاركات: 2392
يااخ رجعتنا لاكتر من اربعين سنة لوراء .. ايام الزمن الجميل.. حيث كانت الخرطوم مدينة راقية بمعنى الكلمة ( نحنا اولاد 3 ) وانا لي ذكريات جميلة في جميع الاماكن المذكورة هنا .... لاحظ كل هذه الامكنة كانت في الخرطوم فقط ..( الخرطوم بالليل ) اما امدرمان فكان حظها فقط حديقة الريفيرا .. وناس بحري ..طراوه ..
ياريت تعود ايامنا ... ونكمل المشوار ,,,
تحياتي ,,
عاالم بطاالـــــــــــــــــة ,,,
09-18-2018, 11:06 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: ذا كان الأمر كذلك ما علينا سوى أن نهنئ الكيزان على نجاحهم فى هدم دولة سادت فيها حكم المؤسسة وحرية الفرد واستبدلوها بالحاضر الماسخ أمامنا دولة بدون دستور بالمفهوم الحقيقي دولة يتمتع فيها منتسبيهم فقط بمزايا ورفاهية تضاهي رفاهيات دول الخليج ببترولهم دولة تبحث عن وزير يتولى منصب وزير مالية (بالتعيين) وتفشل فى إقناع فرد لاحظوا ليس بحزب دولة لا تعترف بالتعددية الحزبية وعملت وما زالت تعمل على تفكيك جميع الأحزاب الوطنية وإضعافها حتى وصلوا بنا الى قاع القاع
المعذرة لو عرجت بيكم لكن حقيقة حاجة تفقع المرارة
قلت لي كنتو تسافروا لندن حاملين جنيهات سودانية ؟ قبل حوالي 3 أسابيع وانا راجع من الخرطوم فى مطار دولة عربية .. وانا أدفع لقيمة قارورة ماء سلمته سهواً 50 جنية سوداني بدلاً من 50 ريال .. البائع سمعني كلام خلاني أخجل هههههههههه
الفاتح يا جميل ...
الدولة ماشة بالدجل و الشعوذة الان ...
لصوص و حرامية يبرطعوا ...
اما حكاية الجنيه السوداني ...
تعرف كنت بسافر من عمري 15 سنة سنويا الى بريطانيا ... اشتغل الصيف كلو ... بديت بالمزارع القط فراولة و انتهيت بشغل المطاعم ... السفر ببدا بي اني اغشى السفارة البريطانية في عمارة ابو العلا زي الساعة عشرة صباحاً كده ... ( اجدع ) ليهم الجواز ... و يا خشيت شربت ليمون في مكاتب اعمامنا ناس ابو العلا .. يا نزلت الاتنيه اكلت شي ... و ساعة واحدة التاشيرة جاهزة ... تاني مافي شي نهائي ... غير التذكرة و ورق الحمى الصفرا ... اتذكر في البدايات كنت اشيل معاي الجنيهات السودانية ... ( بقو يسجلوها في آخر صفحة في الجواز ) و في لندن اي صرافة و اي بنك ... عندهم اليافطة معلقة فيها اسعار تغيير العملات فرنك.. مارك .. دولار ... و من ضمن اللستة التي لا تزيد عن خمسة ستة عملات كان الجنيه السوداني !!! يشوفوا الجنيه ( المغطى بالدهب و كتها ) ... يتفك ليك بي جنيه و نص استرليني ...
ياخي ... في مطار لندن لما تمد جوازك السوداني زمان يقربوا يدوك تعظيم سلام ...
نحكي شنو بس و لا نعيد شنو يا شلبي ... خليها على الله بس ...
09-19-2018, 09:04 AM
Zakaria Fadel
Zakaria Fadel
تاريخ التسجيل: 01-24-2013
مجموع المشاركات: 2002
هذا (الجو)...و هذا المناخ....كانت توفره عائدات القطن...والصمغ ..والثروة الحيوانية.... كان التعليم (الحكومي)...و العلاج (الحكومي)...و الوظائف (الحكومية).....متاحة للقلة......
وفي المقابل كان مزارع (القطن) و عامل (طق الصمغ)...و راعي (الثروة الحيوانية).....يعاني الامرًين... ليس له سينما و لا بار ..ولا ديسكو..... تصيبه الملاريا في سهول الجزيرة.....فتأت عليه كل نوائب الدهر قبل ان ينقل الى مدني ...و ياويله ان كانت الاصابة في عز خريف يجوب وديان كرفان ...خلف كل شجرة صمغ ....ويشرب كدرا و طينا......
09-19-2018, 11:18 AM
محمد حمزة الحسين
محمد حمزة الحسين
تاريخ التسجيل: 04-22-2013
مجموع المشاركات: 1437
يحي قباني متعك الله بالصحة والعافيه ... لكن اسمح لي اقول لك انت عجوز خلاس ... حسي السعوديون بغيروا ريالاتهم دولار واسترليني ويمرقوا ... ههههههههههههههههههههههههههههههه
يا ود العبيد توفيق عيسي مكي رغم إنو حكاوي البوست ما بتشبهه لكن جاااي عشان يأكد إنو ما اولاد ضهاري ...ههههههههههههههه : : : : مع التحيات لله الزاكيات
09-20-2018, 10:07 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: ي نفس تلك الازمان ديك فتحنا للدنيا لكن ما كنا بنمشي الاندية دي بل كان تخصصنا ديسكوهات من بعد حمى ليلة السبت وترافولتا المرديان والارمني والنادي الامريكي وكثير من صالات الديسكو الانتشرت في تلك الفترة اتذكر كنت مع اولاد البوسته الوحيدين المسموح لينا الدخول للنادي الامريكي وتشغيل اغنيات الدسكو وتعليم المارنيز الكانو موجودين احدث الرقصات وايضا ظهرت في تلك السنوات الشلليات شلة اولاد الملازمين وشلة اولاد نمرة 2 وشلة الاملاك شلتنا كانت اسمها الوريرس - المحاربون - مجموعة مختلفة مميزة من امدرمان اولاد وبنات ( يا الله وين الناس دي هسا ) غايتو كانت ايام ( ايام البلو استارز )
ما شفتنا سمح في لفتك ديك يا تيفة ؟
بالله شفت خرطومنا ده كان سمح كيف ...
الدنيا كانت غير يا حبيب ...
09-20-2018, 10:23 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
يا سلام يا يحى قباني مليون المية نكون اتلاقينا كتير اصلو زمان الناس حبه ومعروفين كلهم كان وجودنا في الخرطوم شرق مع ناس عمتي واولادها مدخل لينا لعالم الخرطوم الجميل - ناس بروف معز عمر بخيت - وكان اخوه باشمهندس احمد عمر من دورنا وطول الوقت معاه من خلاله تغلغلنا في المجتمع الخرطومي المميز وده ما بيمنع ثقافتنا الامدرمانية الما كانت بعيدة من الاجواء دي وكانت ليها نكهتها الخاصة زمن تاني ما بتكرر
09-21-2018, 00:02 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
يا جماعة الخير انتو بتتكلموا عن السودان ولا عن سويسرا ولا السويد والنرويج... معقولة تقولوا الغاز تطلبوا بالتلفون ويجيبوا ليك قدام الباب...يعني نقول شنو في الصفوف الشايفنها دي وطولها ٥ كيلومترات....وكلامكم ده بياكد الدول كلها بتمشي لقدام الا السودان لحركة ورا بسرعة الصاروخ...
09-29-2018, 02:14 AM
Kabar
Kabar
تاريخ التسجيل: 11-26-2002
مجموع المشاركات: 18537
هل يضيرني شيئا لو قلت اني لا اعرف سودان النقيرز ، سودان البطش والحلاقة في الشوارع ، سودان المفاسد مما كنا نظنهم بعثنا الخلوق امثال حاتم حسن بخيت..! هل يضيرني لو قلت اني لا اعرف سودان الجنجويد .. سودان حميدتي..سودان القمع..سودان البنقو والمخدرات من كل جنس؟.. هل من حقي ان اقول: ثم ضاع الأمس منا؟.. هل من حقي ان اغني للحب الضائع؟..هل من حقي ان أسأل عن تلفونات ملاهي اللهو البرئ..؟.. هل من حقي ان اسأل ان نكاح الجهاد هو لهو برئ..يعرض في الملاهي الواضحة..بالتلفونات..؟..يعني هل من حقي ان اطلب احد ناشاطات جهاد النكاح بالتلفون ، مثلما وضعت انت يا يحي ، تلفونات الملاهي هنا..؟؟؟ صدق من قال: ان الرب حينما خلق السودان..ضحك كثيرا..كثيرا يا عم..!!
كبر
09-29-2018, 03:15 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: في اجازتي قبل شهر ونصف جلست يا يحي في سوق امدرمان المحطة الوسطي طلبت كباية قهوة وسرحت مسافة ، جاء جلس جنبي شاب ثلاثيني وقال لي يا عمو شائفك سارح شديد نعل ما عندك مشكلة قلت ليه يا ولدي انا براجع في الزمن امدرمان دي ما كانت كده المحطي الوسطي شقت مكان ست اللجيمات القاعدة ديك كان في كشك بتاع مواصلات الخرطوم بتاعت ابورجيلة كان فيه عمك كمال حسن ومحمد صالخ هم المسولون عن هذه المحطة الناس بتكون جالسة في المحطة وفي جرائد يوميه الناس بتطلع علي الاخبار الي حين وصول بص ابو رجيلة المكندش يا ولدي بتعرف بص ابور جيلة ظهر عليه الاستغراب ، قلت ليه شفت العمارة القديمة الامامك دي كانت سلوي بوتيك تلبس افخم الملابس من هذا المتجر وبعدين في الحائط بتاع سلوي بوتيك كانت في شاشة بتاعت سيتما بتعرض ليك اهم اقوال الصحف في شريط اخباري ـ واين تسهر هذا المساء ، الاان المحطة الاوسطي مكان فراشت الكتب زمان لصبح محل ستات الشاي واللجيمات المهم سارح معاه كده جاء بتاع تاكسي تعاوني رشانا ليك بماء المطر وواصل مسيرته ، قلت ليه شفت امدرمان ما ياها امدرمان الزمان !!!! معليش نسيت ما سلمت عليك ياخي
عريفي يا جميل ...
٣٠ سنة ... اخوك قضاها بعيدا عن ذلك البلد الأمين .. و ما زال ذاك الوطن الجميل هو الباقي في خاطري ..
ينتابني خوف .. يصل حد الرعب .. ان رفع الله القدم و عدت يوما .. ارى سودانا آخر لا اعرفه ..
فما كتبته انت يا جميل هو بعض ما أخافه ..
السودان الذي أراه هنا في المنبر .. سودان غريب .. لا اعرفه و لا علاقة له بالسودان الذي في خاطري ...
شكر للحبيب الصديق كبر لإعادة البوست مرة اخرى ...
09-29-2018, 06:42 AM
Osman Awoda
Osman Awoda
تاريخ التسجيل: 06-19-2017
مجموع المشاركات: 495
يا قبة مالك عليا 😝😊😞 هسي تمانين في المية من الناس الهنا ما حيصدقوا انه: - في رمضان الفطور في الداخلية من المرحلة الوسطی وانت طالع صينية كاملة بي عصيرها ولحومها -یصرفوالبک قروش الترحيل لاهلك في الاجازة(طلبة الداخلية في الوسطی) -تساريح بالقطر وبابور البحر في الاجازات بالنسبة للثانوي والجامعة -فی حنتوب کان عندنا ملاعب لجمیع فروع الریاضة كرة قدم مرورا بالسلة الى التنس -طبعا زائدا ال country race مرورا بالتكيلات(هنا کانوا فی جماعة اصحابنا بيزوغوا عند وصولهم قطية الحاجة تمیرة) -غي الجامعة لمن نرجع من السينما بتاعين التاكسي غالبا ما كانوا بيشيلوا مننا قروش (احتراما) -الجنايني الكان شغال في بيت بروف عبد الله الطيب كان ايام الامتحانات بيجيب لينا الشاي والقهوة علي حسابه ويقول لينا ذاكروا يا اولادي نحنا راجنكم تشيلوا البلد-شفت الفهم دا کیف؟ کفاک ولا ازیدک؟
09-29-2018, 07:05 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
يااخ رجعتنا لاكتر من اربعين سنة لوراء .. ايام الزمن الجميل.. حيث كانت الخرطوم مدينة راقية بمعنى الكلمة ( نحنا اولاد 3 ) وانا لي ذكريات جميلة في جميع الاماكن المذكورة هنا .... لاحظ كل هذه الامكنة كانت في الخرطوم فقط ..( الخرطوم بالليل ) اما امدرمان فكان حظها فقط حديقة الريفيرا .. وناس بحري ..طراوه ..
ياريت تعود ايامنا ... ونكمل المشوار ,,,
يا ريت يا مجيدو ...
ايقاع حزين خطواتي لما افوت حدودك ياوطن حفنة تراب من ارضك المكتوم عذاب فوق مساحات الزمن عندي ما بتهون دقيقه وما بتقدَّر بي تمن
عزة ضرايحك وهي بتعانق في السحاب طرَّتني في درب السفر المعزه الناسفه وشَّحت التراب والدمعه في عيون الحبيبه الراجيه زول من بدري غاب
سامحني يانيلي الوحيد يافرحة اطفال الفريق في كل لمه وكل عيد يا الكل همك يجري دمك في المجاهل في البيادر في الوريد أسقي شتله فاح شذاها يعانق احزان البعيد
وإشتهيتك لما غابت نجومك في المدى الما ليهو حد وبقيت انادي عليك وانادي.. واهتف بإسمك يابلادي.. من الفراغ ما جاني رد يا المعزه العايشه فينا وساكنا في وجداننا جد
09-29-2018, 07:32 AM
Osman Awoda
Osman Awoda
تاريخ التسجيل: 06-19-2017
مجموع المشاركات: 495
یاخي الحيرة والزهايمر ما خلونا تسلم عليك وعلي المتداخلين الاعزاء ،،، يا قبة ابو داؤد كان كل يوم الصباح بيجي دكان عمنا بندق في سوق الدناقلة جنوب راكب عربيته الفورد الخدراء اتخيل كانربيشيل من عمك ابشر الجزار كيلو لحمة ضان ويملأ قفته خدار ومعاهو بتيخة ولا شمامتين وكيلو موز تصدق الكلام دا كلو كان بي ستين قرش؟؟ الزمن داك ناس الفاضلابي و ود ابسن و ود البوش وجلالدونا و ود المدير كانوا لسة في مدرسة ستي فلة اما ود البشری وهیثم غالي ما عارف كانوا وين ،،، ياخ مالكم علي
09-29-2018, 08:20 AM
Osman Awoda
Osman Awoda
تاريخ التسجيل: 06-19-2017
مجموع المشاركات: 495
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة