ياسعادة السفير فتح الرحمن الى متى هذا الصمت اخر فرمانات ابوسن

Quote: ووو بح 💪💪💪نعتل البوست ده فوق لحين فك حصار المركز الثقافي السوداني

Quote: هذا ما حدث يا بدر الدين يرويه احد الحضور يا جماعة الخير ابو سن دا داير يودي المركز الثقافي دا لي وين ؟ بالجد حاجة تحير العاقل والمجنون بعدما بقى المركز مقر للعزابة والعطالة ومكان للقهوة والوزلابية وطاولات الليدو وهجره خيرة من ابدعو في إدارته وتنشيطه طيلة فترة ما قبل أبوسن الله يقلعه ويجازي الجابوه وابتلونا بيه كدي يا جماعة اهلنا قالوا يتكلم المجنون ويستنط العاقل ويا العاقل عليك الله اقنعني انا المجنون دا . الحصل يا اخوان : يوم الأربعاء الفات فوقنا دا جيت المركز الثقافي اشيل لي طعمية للعيال وانا داخل على مطعم الحوش سمعت صوت موسيقى في الصالة الكبيرة البرة ساقني الفضول اخش اشوف . دخلت لقيت فرقة موسيقية ومعاهم وليد ازيرق كدا غناي جنس غنا قعدت اسمع وعرفت أنه ديل الكانوا بعملو ليالي السمر وعرفت أنهم عايزين يعملوا ليلة سمر يوم الخميس الأمس دا . صراحة الود غناي اجبرني اقعد لغاية نهاية البروفة في آخر البروفة الشمطة قامت قالوا هم بجهزو لليلة دي ليهم اسبوع وجهزوا كل أمرهم عشان يحركو المركز الثقافي البقاء محل بكيات وعقودات وشاي ولقيمات والضلام مالي الجنبات. اها قالوا أبوسن أصدر تعليماته أنه الليلة تكون بدون اعلان آي والله ليلة بدون اعلان ابو سن عايز شنو ما فهموا قصده شنو ما عرفو وقامت الفرقة والعازفين الكانوا مبسوطين وبسطونا معاهم انقلبوا مئة وستين درجة والوشوش حمرت والأصوات علت والحلايف طغت وقالوا تاني المركز دا طالما دي طريقة تعامل ابو سن معاهم كان بقى فيه عرس إخوانهم هم ما بعزفو فيه صراحة أنا اندهشت وحزنت على ليلة كان ممكن تكون شرارة تفتح كوة في ظلام المركز الدامس الغرقان فوقو دا . حسبنا الله ونعم الوكيل فيمن عز عليه فرح الغلابة وحمل معول هدم هذا الصرح الكنز نرفع ايدينا بالدعاء لله صباح ومساء وفي جوف الليل أن يصرف هذا الأبسن عن مركزنا أنه قريب مجيب . مرفق الاعلان الموقوف عن النشر للاطلاع ومزيدا من الحسرة

Quote: أيوا كدا .. لينا زمن بوستات ابو سن

Quote: ود الأمير ياخ حدسناك خرتمية مرة، الظول دا قريبنا و البرشو بي لبن (بلدنا) الواحد دا ، بنرشو ليك بكلونيا عديل گدا. بس في عرضة أهلي اللحويين، دي لو قام حظرا حنقيف ضدو معاكم غلبن و غالبن ؛ اللي هي فعالية جاذبة حتى لأهل الدوحة . خسوسن و گت الفرسان يتقامزو بالسيوف متل أبو الدقيف فوق لهب التوقابة. بس دي الحاجة الوحيدة الفعلن بتستحق يسافرو ليها من هنا يحضروها.

Quote: بصراحة إنتو يا ناس دوحة الجميع فعلن دارين العين الحمرا. وشرارة سمح أوق ل ليكم حاجة . تدفعو كم خلو رجل ( الحوش ) و نجيبو راجع منكم .

Quote: بالعكس يا بدر ياخي ، بس بصراحة زهجانين منكم طنشتونا في لمة فطور رمضان رغم إنو دكتورنا ود المشرف اقترح تعزمونا بأي طريقة ، و رشحنا ليكم مندوبنا هناك أبو جقادو برضومسحتوه هساي كان على الأقل حيرطب ليكم جو القعدة. المهمهسي ما تقومو تعملو خساسة برضو في تكريم عمنا منصوري.