الشرطة والأطباء كتبت ناهد(((( الهي وطن ...امارس فيه عملي الذي أحب بأمان)))) الجاتنا في وليداتنا ما سامحتنا و ما بنسامح فيها كأم مثل ملايين الامهات في بلادي احلم بحياة كريمة لابنائي و مستقبل مشرق ، تخرجت ابنتي طبيبة ففرحت ، رغم ذلك لا زلت اراها ذات الطفلة التي اطلت على قلبي قبل 23 عام ، تخرجت فملات حياتي ببنيات ووليدات كتار زميلات و زملاء دراسة و عمل ، و صديقات و اصدقاء ... و تمضي الحياة ...و في دورتها كانت ليلة 5\9تعمل ( نبطشية) في قسم الحوادث بمستشفى ابراهيم مالك ، وعند الساعة 11:30 ليلا هاتفتها لاطمئن عليها ، و جدت حالة ارتباك و ضجة لافاجأ بان هناك إعتداء بالضرب من ( نظامي يرتدي زي مبرقع) و انهم يحتمون بالمكاتب لانه يحمل سلاح ، تم الاعتداء المباشر على ثلاثة اطباء هم .... و تم فتح بلاغات في قسم شرطة الصحافة. ذهب الأطباء المعتدى عليهم لفتح البلاغات و بقيت زميلاتهم الطبيبات في المستشفى و توقف العمل بالحوادث. و تحت ضغط دخول المرضى تواصل العمل ، و عند السا:3اعة صباحا حضر مرافق مع مريضة و و قام بالتعدي على طبيبة و قلب التربيزة حتى وقعت الطبيبة ارضا ، ثم امسك بالطبيبة الاخرى من يدها و هددها (بكسر ليك وشك)... و و طاردها حتى تدخل احد رجال الامن ......و انتهى الامر بالطبيبات في قسم الشرطة لفتح بلاغين ...ليعرف المعتدي نفسه بانه من الشرطة... اسماء المعتدى عليهم: د محمد عبد العال د أحمد معاويه د رماح د لينا حيدر د معاد احمد اسماء الشهود : د سهى جمال د صهيب حسن ارقام البلاغات : 2173 2174 2175 2177 2178 د رماح تم تهديده بالقتل و البقية تم ضربهم و لم يتورع المعتدي في الادعاء بان الطبيبة معاد كانت تجلس فوق التربيزةو ( ما شافت العيانة) ففتح بلاغ بالرقم2176.... ما تم اعتداء من قبل النظاميين هو سلوك متكرر و متواصل يجب عدم السكوت عليه ، و هنا نتساءل عن دور وزارة الصحة و ادارات المستشفيات في توفير الحماية للاطباء و الكوادر الصحية ، و قبلها في توفير بيئة العمل المناسبة حيث شهدت هذا المستشفى تحديدا توقف عن العمل و اضرابات نتيجة لانعدام ابسط الاحتياجات مثل القفازات . ان ما حدث يضع سلامة ابناءنا و بناتنا في خطر كبير و هو لا يقل عن ما حدث في المناصير من عدم توفير وسائل النتقل للتلاميذ حتى فقدنا 24 طفلا ، و يا للعجب برفقتهم كادر صحي د فايزه .. ان سلامة ابناءنا و بناتنا مسئولية هذه الحكومة المنهارة ، و لان جنا الحشا عزيز يجب ان نحميهم نحن ، و لان حرقة الحشا من نار لن نسمح باهدار سلامتهم ...و في سبيل حياتهم قدمنا أبناء ستظل حرقة فقدهم تلازمنا الى ان نقتص لهم وذلك وعدنا يا أم هزاع و يا امهات رفاقه ... إبنتي لم اجدك اغلى من زميلاتك و زملاءك ، و لم اجدني استطيع ان احميك إن لم يسلم الجميع ، فكوني سالمة وسطه...و يا معاد ما أجمل حلمك ((( إلهي وطن ...امارس فيه عملي الذي احب بأمان))) ⭕و هنا شهادات من موقع الإعتداء.: ⭕ شهادة أولى: (((((#ديوتي_الاربعاء #طوارئ_ابراهيم_مالك
قال ليك قاعد في نص ال RED ZONE ويقول ليهم ما طالع وماف زول يتكم معاي ( ب اعلى صوتو) لانو كان لابس كاكي حق شرطة عسكرية
الغريبة شرطة المستشفى واقفين مع الناس البتفرجو
السنير بتاع ال ER سحب ناسو ودخلهم المكتب
صاحبنا الكاكي حاسي انو مفروض يدخل معاهم المكتب لكن م براهو لازم يكون معاه قريبو ال من الاستخبارات، ودا كمان مبالغة ما شا الله قال ليك عندو طبنجة
وعشان حاسين انو عندهم سلطة قرروا يتموا الموضوع ب يدينهم ويهددوا بالسلاح
انضربوا 2 مدكل وواحد تاني اتهدد بالقتل بالسلاح
#طبعا ما يفوتكم #السبب حق الشكلة: عندهم قريبتهم Bassed away ربنا يرحمها ويعفر لها وهم دايرين شهادة الوفاء تطلع من ناس الer مع انو البيشنت كان مسلم من قبل 3 ايام ل وحدة باطنية
تم استخراج اذن الدفن من قبل er وطالبوهم ب انهم يتجهوا للمدير الطبي عشان يشوف ليهم ناس وحدتهم يوروهم يستلموا الشهادة امتى وانو الشهادة م ضروري اليوم عادي ممكن تجوا تستلموا ف يوم تاني
الكلام الجاب الشكل انو: لا انتو قاعدين تجرجروا فينا وانتوا كمان دكاترة ودا شغلكم ف طلعوها لينا انتو، اشتد النقاش والمواضيع بقت شخصية ويعداك ناس الامن عملوا الحاجات المتعودين عليها في المستشفيات.
# المهم:
الناس جاطت ودقت جرس وواصلوا شغل عشان العيانين م عندهم ذنب (انسانية) وكان اكبر غلط (حقيقة)
احلى م في الموضوع حوالي الساعة 3 صباحا وبعد القصة الاولى ب ساعتين وحاجة جة واحد المرة دي شرطة قال ليك قال يغير شوية ويضرب البنات مع العلم انو القروب الاول لسة ف النيابة ف موضوع المشكلة الاولى
هنا دا قرر انو زوجتو مريضة ولازم يجبر الدكتورة على انها تشوفها وبالقوة كمان
طيب #لو كانت الحوادث فاضية كان نقول انهم م عايزين يشوفوها #لو كان هو جه وليهو اكتر من 30 دقيقة كان نقول والله اتاخروا عليهو وزوجتو متضايقة لو كان هم رافضين يشوفوها كان نقول دا كمان سبب (مع انها ماف سبب بيبرر التعدي بالضرب)
تسجيل الكاميرا الانا حضرتو كان كالاتي: جه داخل قعد زوجتو في كرسي الدكتور الدكتورة بعد خلصت العيان ال في يدها قعدت ف الطربيزة اتكلم معاها وضرب الطاربيزة بعد شوية قرر انو يقلب الطربيزة بالدكتورة القاعدة فيها
مرقت تنادي اي زول يحلهم قرر يقوم يهجم على الدكتورة التانية ويمسكها من يدها ويغصبها انها تشوف زوجتو (بالغصب) او (بكسر ليك وشك) وما يفوتكم اللز والدفير للدكتورة والكوبيشنت بحجزوا منها ولمن طلعت جرا وراها الا مسكو بتاع الامن (معقولة بس؟) دا كلام دا ؟
المشكلة التانية م فيها سبب بس هو حس انو زوجتو عيانة شديد وقرر انو الدكتورات لو ما شافوهم مفروض يدقهم لانو رجل امن وكده وعارف انو كل مرة بدقوا الدكاترة وماف قانون بيردعوا
مرات الدكاترة بيكونو مستفزين؟؟ المرا دي لااااااا ماف زول غلط على واحد من الكوبيشنت او البيشنت لا كلام لا فعل (ماف سبب بيبرر التعدي بالضرب)
اي كوبيشن نظامي بجي المستشفى بعمل مشكلة بتنتهي ب انو يضرب الدكاترة ( معقولة ي ناس) ح نسكت نحن لمتين
منقول))))
⭕شهادة ثانية:((((((ابراهيم مالك او بيتنا كما يحلو لنا ان نطلق عليها امبارح كان مسرح للبلطجية و ذكور السلطة العليا ليمارسو علينا كل انواع التنمر و التعدي الجسدي حوالي الساعة 12:30 تم ضرب ثلاثة اطباء و تهديدم بالقتل و محاولة رفع السلاح حوالي الساعة 3:30 صباحا الاولاد كانو في القسم و نحن قررنا نكسر الاضراب (غباء سوداني مشبع بكل احساسيس المسؤولية تجاه المرضى و ذويه ليس الا) كان في cpr في المنطقة الحرجة قمنا به و بعداك رجعتا انا و دكتورة معاد للمنطقة الصفراء (النقلوها في حتة المنطقة الخضرا عشان يصينو الاولى) كان عدد المرضى كبير فوق اتساع المكان فجزو منهم كان بتلقى العلاج في الكراسي المخصصة لينا كاطباء من حقهم الجلوس دكتورة معاد ذات ال 35 كيلو تعبت فقعدت فوق الطربيزةو انا و دكتورة سها فضلنا واقفين متكين عليها جا داخل مرافق و بقا بطقطق في الطربيزة طلبت منو معاد ان يهدا من روعه و لكنه ابى بل و قلبا بالطربيزة وقعت و جرت وراو تستنجد بقى بتكلم معاي قلتا ليو ده م اسلوب و هو واقف و وراهو الباب (يعني ماف طريقة جري) مسك يدي و بقى بلذذ فيني و الله ماف زول يعالجا الا انتي و لا بكسر ليك وشك بكسر ليك وشك انا انتي قايلا روحك الله و المرافقين بعاينو لغاية م جو جزو منهم بقى بحجز فيو و هو ما يلقى فرصة يلزني بعد دقيقتين معاد نادت بتاع الامن عشان يجي بس يتكلم معاو و هو لسه بجري وراي و يلزني المضحك انو جوة الكبسولة عرفم انو زميل (شرطة و دفعة) و بقى الضابط بقولي امشي شوفي العيانة رفضتا طبعا و زملائي كلهم رفضو معاي و قلنا لي الليلة بس بلاغ ، مشينا قسم الصحافة لقينام خلوهة يمشي بركشتو الاكاديمس عشان مرتو عيانة و طبعا عشان هو دفعة و شخصية معروفة زي م قالي المحقق الكلام ده كلو مسجل في كاميرات المستشفى الاربعاء 5/9/2018 طوارئ ابراهيم مالك
من القصص الموسفة لاطباء الطوارئ #زرارة_العسكري_اغلى_من_دم_الطبيب
منقول))))))
⭕شهادة ثالثة(((((((#الطب_مهنة_غير_إنسانية_...
من المضحك جدا بعد الإعتداء علي و قلب الطربيزة الأنا قاعدة فيها و الرعب الدخل جواي من اللحظة الهو بدا فيها يخبت الطربيزة بيدو و الإعتداء بعدها بثواني على لينه.. لما جات تدافع عني... يجي رجل النظام الجريت استنجدبيهو بعد الاعتداء و يقولي (كدي هسي يا دكتورة شوفي العيانة حقتو عشان الطب مهنة إنسانية)
فعلا إنسانية.. أما أنا فحيوان.. أتدق الساعة تلاتة ونص فجرا.. و الكوبيشنتس (رجال بلدي) يكتفوا ب ( أسكتي يابت).. تتدق صحبتي قدامي.. ولما أقول لعساكر الباب( نحنا في الحوادث بيعتدوا علينا انتو بتعملوا في شنو؟ يقولي يازولة كنت برقص انتي مالك؟)
المضحك أكتر.. انو المرافق ده أول ما جا داخل و خبت الطربيزة و قالي أنزلي شوفي العيانة.. رديت عليهو بكل لطف في الدنيا.. وبرضو قلبني بالطربيزة.. ويجي واحد أهبل يقول(الدكاترة أسلوبم مستفز وما إنسانيين).. آي ياخ ما إنسانيين و الفينا كملت زاتو و مابقى فاضل فينا روح نقدم بيها حاجة للبلد دي.. اتهدم جواي كل الإطمئنان البيغمرني بمجرد دخولي من باب المستشفى.. واتزرع مكانو.. خوف و زعزعة و إحساس بالخيانة من الوطن الأنا مساهرة عشانو و عشان حبي ليهو.. . وهو بيرسل شرطتو تقلبني بالطربيزة.. و تروعني.. وتضرب لينة.. وتهددا تكسر وشها..
إلهي وطن... أمارس فيه عملي الذي أحب بأمان..)))) أمهم : ناهد جبرالله جبرالله
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست