|
|
|
 Re: كتابة حزينة من بنتي (Re: عبدالحفيظ ابوسن)
|
بوست طويل جدا جدا جدا
نسبه لاني بقيت ف الجامعه وبعيده فما دايما بعرف كل شي بحصل مع اخواني زي زمان.
المهم عماد قبل كم يوم داير يتونس معاي وكدا،وانا لحظه اعمل دا،لحظه اسوي الحاجه الفلانيه،انتظر عندي حاجه عايزه اشوفها.
م عارفه ليه م كنت حابه اني اتونس او اسمع الحاجه اللي هو عايز يتكلم عنها،المهم ف النهايه قعدت
بقي شغال يحكي لي عن صاحبو
"مصعب عمل،مصعب سوي،انا ومصعب عملنا ومشينا واتونسنا،وقاعد معاي ف الكنبه،وفردتي و..و..و"
وتسابيح بالجهه التانيه بتشكر فيهو
"ويا توته والله ولد محترم وظريف وكدا وصاحب عماد ليهو زمن"
انا:يااااه والله شوقتوني اتعرف ع مصعب صاحبك دا يا عماد.
واتوالت الاحاديث حول مصعب ومغامراتهم سوا.
صحيت الليله متاخر،لقيتهم مشوا المدرسه،المهم مما صحيت قلت لامي امبارح بالليل تعبت وم قدرت انوم وكدا عشان كدا الليله صحيت متاخر شديد
قالت لي"احنا من الصباح مع عماد صاحبو اتوفي،وببكي هو وتسابيح واصلا م سكتوا،هو واخوانو التلاته وابوهو وامو اتوفي وهم راجعين كانوا معيدين ف بلدهم"
قالت لي قلت لي عماد
"بتعرف واحد اسمو مصعب!
قال ليها" مصعب عبد المطلب!؟"
قالت ليهو"ااي ي عماد مات"
قالت لي انا م كنت قايلاهو صاحبو كدا وقاعد معاهو كمان ف نفس الكنبه"
لاول مره امي م تكون عارفه صاحب زول فينا،يمكن يكون احسن كانت وجعتها عليهو ح تكون اكتر لو سمعت بيهو منو.
انا لما قالت لي كدا لسه م جمعت انو دا مصعب داااك اللي بحكي لي عنو،بعد شويه قلت ليها
"لااا مصعب صاااحبوو"
وم قدرت اكمل الجمله،اتوجعت عليهو وع اخوي اللي كان فاكر انو ح يبقوا سند لبعض طوالي،وم فكر ف يوم انو ح يفترق عنو.
امي قالت لي انو اختهم من بلدهم رجعت الجامعه بتاعتها لانها فتحت،
تفتكروا حاليا ح يكونوا قالوا ليها شنو:
"بيتكم اتقفل"!
ح ترجع لياتو بيت تاني!،ح يستقبلها منو لما ترجع من الجامعه دا لو قدرت،
اللي ح يقيف معاها يوم تخريجها منو،اللي ح يحضنها ويقول ليها رفعتي راسي منو!؟
اخوها الصغير اللي ف اولي اساس اخر العنقود ح تقدر تنسي ضحكتو ولعبو!
امها وابوها واتصالاتهم عشان يطمئنوا عليها،ح تقدر تتعود ع عدمها!
اخوها الممتحن السنه دي،اللي اكيد بتتمني انو يشيلوه بعدين معاها ف الخرطوم عشان يكون ليها سند،فات قبل م يمتحن.
اخوها الفي سابع واللي ف تامن مع اخوي،راحواا كدا!؟
ح تعيش!
" ياخ والله مصيبتي مصيبه الزول المرتبطه بيهو خلاني"
"ياخ والله قافله معاي الحاج م اداني قروش عشان امشي احضر الكوره"
"يااخ مكتئبه امي م خلتني اطلع لصحباتي"
"يا زول زهجااان والدنيا دي مقفله معاي والامتحانات كتمت وانا م قاري"
"يااخ ان شاءالله اموت يااخ كل مره اقول عايزه اشتري حاجه تقولوا ماف"
انتو عندكم مصايب!
انا عندي مصايب!
بالجد!
ف مصيبه اكتر من انك تفقد امك،او ابوك،او اخو ليك،
ف فاجعه اكبر من انك تفقدهم كلهم!
احمدوا الله ي جماعه،احمدواا
عماد اخوي بحكي لي ودموعو م قادر يمسكها
"مصعب الوحيد اللي م اتحرق فيهم ي توته،طلع بمجرد م الباص طقشهم،جاء راجع عشان يطلعهم لقي الغاز بسرب،جري بعيد...." وسكت وسكت معاهو"...رجع عشان يطلع اي زول فيهم،اخو الصغير كان ع الباب قال يطلعوا ساعتها العربيه اتحرقت وهو طار بعيد،دخلت ليهو حديده.."وقتها م قدر ولا قدرت"...ومات يا توته،استاذنا ورانا صورتو لما ودوهو المستشفي عاينت ليهو وم قدرت شكلو كان متغير ي توته،كان لابس نفس اللبسه اللي جاء بيها......(وسكت)مات يا توته،مصعب مات"
ياااااااااااااه!الوجع م بعرف صغير ولا كبير كلنا بنتوجع نفس الوجع،م عرفت ارد اقول شنو،غير اني بكيت معاهو واتحرقت جدا من جوا.
ح يتذكروا كل ما يدخل المدرسه ح يتذكروا،كل ما يقعد ف الكنبه ح يتذكروا،كل م يكون عايز قلم او برايه او اي شي ح يتذكروا ويتذكر ضحكو،لما يكونوا عايزين يلعبوا ح يتذكروا،وح يتذكروا..وح يتذكروا....
ملحوظه:
ولما تعرف بمحض الصدفه انو البت اللي ح تشيل كل الالم دا دفعتك كانت وصحبتك!!!
يااااااااه تاني!
"قضاء وقدر ايوا،لكن الاسباب! لسه م برأ جرح الاطفال والغرق بتاعهم عشان يجينا جرح جديد،لمتين احنا ح نموت ف البلد دي كدا!
مره غرق،مره حادث!
اها وبعدو؟!
اصدق عباره قالتها احلام مستغانمي
" كنا نطمح لوطن نموت لاجله،ولكن صار لنا وطن نموت بسببه"
م عارفه ح اقول شنو تاني،بس يا ريت يكون اخر بوست اكتبو عن ضحايا البلد دي.
#لكم_الرحمه
#ولها_الصبر
| |
 
|
|
|
|
|
|
|
|
Re: كتابة حزينة من بنتي (Re: عبدالحفيظ ابوسن)
|
الله يرحمهم ويلزم زويهم الصبر شاهدت الصور وتاثرت والله نسال الله لهم الرحمه
التحايا والتعازي لكم ولكل اهالي كوستي .. بس ما تقولي الحادث في الكوه تاني ..
الحته دي مسكونه ولاشنو ؟؟
شارع كوستي الخرطوم الحته دي حصدت كتار من الاهل .. في العيد فجعنا بود الحلة جارنا في 28 برضو اتوفي نسال الله له الرحمه
و كتار شديد بعرفهم يقوليك حادث في الكوه انها اقدار الله ولا نقول الا مايرضي الله
وانا لله وانا اليه راجعون
| |
|
|
|
|
|
|
|
|
|
Re: كتابة حزينة من بنتي (Re: عبدالحفيظ ابوسن)
|
دى كتابة صادقة جداً
صاخبة فى حزنها ... ووجعها ..
وتوصيفها للحالة.....
الاهم انو بتنا كتبت ... ... قد تكون اخرجت جزء من احزانها
فى كتاباتها ....( واعتقد انها فعلت بتحويل همها -حزنها-
وتعميمو على الوطن)......
لكن اعتقد انو الولد محتاج منك وقفة و اهتمام اكبر فهو اكثر وجعا
( حسب ما جاء على لسانه فى كتابة البنية)
تعازينا وترحمنا على الاسرة المكلومة
| |
|
|
|
|
|
|
|
|
|
Re: كتابة حزينة من بنتي (Re: امير الامين حسن)
|
حبابك امير
تشكر
الولد صغير لم يتجاوز الاثني عشرة عاما
الحزن أكبر من طاقته للاحتمال . ليس الموت بل طريقة الموت نفسه .
الموت امرا يجب ان نتعلم مواجهته فهو جزءا من قصة الحياة
التجربة قاسية جدا له ولمشاعره ونظرته للدنيا
ان نكن نحن تغضبنا طريقة الموت العبثية هذه فما رأيكم بهم . هؤلاء الصغار المشبعين بالحياة
| |
|
|
|
|
|
|
|
|
|
Re: كتابة حزينة من بنتي (Re: عمر دهب)
|
دة الموجع يا دهب
مشيت بيت العزاء دون معرفة سابقة او علاقة . بتأمل في البيت والبنيان
بيت جميل جدا مبني مسلح وله طابق
لونو لبني
بتأمل فيهو
معقول صار فارغا
كيف تحتمله هذه البنت الصغيرة؟
كيف ستراه ؟
كيف لها ان تواصل الحياة؟
سألت عنها
راقدة مستشفي
تقرأ رابعة صيدلة
| |
|
|
|
|
|
|
| |
عبدالحفيظ ابوسن
الطيب عباس
عمر دهب
Osama Mohammed
نعمات عماد
فيس بوك
تويتر
انستقرام
يوتيوب
بنتيريست