|
|
|
 Re: إرحل (Re: عبدالقادر محمد)
|
مدر مدر يا رواسى نحن بعاد لحقنا القيفه
إنت مدبج ونحن نقاسى برد أمشير والموج والزيفه
مركبك الماليها مطارق تمشى تقيف تسرح بيكيفا
مرة مغارب ومرة مشارق وإنت تخاف الريح وحفيفه
ساوها زينة وفوقا بيارق وإنت مدبج توب وقطيفة
كل الناس ترزح فى كفة وإنت وناسك فوق الدفة
الدايشين والراسهم لفة والشاخصين فى المدى للضفة
ساولك فوقهم ألفة جوّ الموية وريقهم جفّ
من العطش النص إتوفى وباقى النص الفضل جيفة
ضاقوا المر والحال إستعصى الشغال واللاحق الحصه
الواصال للرحم إتقصّ والهداى مو لاقى الفرصه
الرساى سافر ما وصى خلى محمد واحمد وحفصة
الأطفال العرفو القصة سدت جوه حلوقهم غصة
من الجوع الدم إتمصّ وأصبح كل الحلم رغيفة
كل الراكب شاف أحلامو دون إحساس ماتت قدامو
فن كتابو وكسر أقلامو لا الوالدين لا جار ما لامو
ناس الحلة القعدو وقاموا أصر ألح يمشي كلامو
هزموه أخوانو البى الجوع ناموا وكم خريج ما لاقى وظيفة
يا الفكيتها وقلت لها سيرى وعارف إنو الدنيا دميرى
لا فى ضفاف لا شفنا جزيرى لا فى الحيرى لا فى الطيرى
كسرت جناحا وقلت لها طيرى وإتملكت الكانت ميرى
يا السودت الناصع ديرى إيد الحق صابونة وليفى
قبلك كم متعلم وقارى عكس الريح فكولو الصارى
مشدوهين متعشى وحارى ريسها شلتو والبحارى
كم سنوات علامها البارى واقفي وهم شايفنها جارى
بقينا هلاك والقيف مضارى لا حجار لا دوحة وريفه
حسك عينك ما تتمادى وتنسى الراكب عندو إرادة
الأهوال الشافها وخاضها كان فى مدرسة ولا عيادة
شفنا الإيد الكانت أجواده يا مكسورة ياشحادة
ياما رقاب كانت سدادةعلمت الله من التعريفة
يا ريسنا قدر مديرك فك الدفة وأدها غيرك
أحفظ نفسك ترضى ضميرك وقف أوع تواصل سيرك
كان طاوعتنا شن بيضيرك عرض أكتافك وفك البيرك
لا هن شكرا وكتر خيرك وكل إنسان فى الأرض خليفة
| |
 
|
|
|
|
|
| |
عبدالقادر محمد
فيس بوك
تويتر
انستقرام
يوتيوب
بنتيريست